|
|
|
 Re: إستفتــــاء حقيقى للحركة الشعبية فى نيــــالا ..!! (Re: محمد كابيلا)
|
إستقبال خرافى لوفد الحركة الشعبية فى نيالا بقيادة مرشح التغيير أو السودان الجديد(ياسرعرمان
جيمس وانى إيقا ..باقان أموم ) ذكرنى هذا الحشد المهيب إستقبال الدكتور الراحل جون قرنق فى الساحة
الخضراء حيث إحتشدت الجماهير من تلقاء أنفسها بدون تعبئة وكان إعلام الحركة الشعبية ضعيفاَ ومع ذلك
تجمهرت بشكل منظم من المطار إلى ميدان المولد وسط المدينة ولو لا إنقطاع الكهرباء لكان النقل حى
ومباشر وكان الغرض من الزيارة تدشين الحملة الإنتخابية للحركة الشعبية ...!!!
يتبع ..
| |
 
|
|
|
|
|
|
|
|
Re: إستفتــــاء حقيقى للحركة الشعبية فى نيــــالا ..!! (Re: محمد كابيلا)
|
عند وصول الوفد ميدان المولد كان أنصار الحركة الشعبية يهتفون ...
عرمان عرمان للسودان
عرمان عرمان للسودان
New Sudan yes we can
New Sudan yes we can يبدو أن كل البدايات تبدأ بالموسيقى حيث كان الفنان إبراهيم خواجة ...
أرمى صوتك عندنا
سودان جديد حقنا
أرمى صوتك عندنا
رئيسنا قاعد جمبنا
يتبع ..
| |
|
|
|
|
|
|
|
|
|
Re: إستفتــــاء حقيقى للحركة الشعبية فى نيــــالا ..!! (Re: محمد كابيلا)
|
خير إفتتاح كانت تلاوة مباركة من آيات الذكر الحكيم ومن ثم قدمت المنصة سليمان إسحق على سكرتير
الحركة الشعبية بولاية جنوب دارفور :
بسم الله بإسم الوطن والتحية لكل الحضور وجماهير الحركة بصفة خاصة لإستقباله هذا الوفد وسعداء لتنزيل
وتطبيق إتفاقية السلام على أرض الواقع ونحن حركة لا نعرف الجهوية ونتحدث عن السودان الجديد الذى يحترم
المرأة يتخلله هتافات ..
المرأة وييى ..كل القبائل وييى
سوف نخوض الإنتخابات على كل المستويات وكل القوائم والحديث يطول نترككم لضيوفنا الكرام والآن أقدم
لكم الرفيق عمر عبد الرحمن فور مرشح الحركة الشعبية لولاية جنوب دارفور :
يتبع ...
| |
|
|
|
|
|
|
|
|
|
Re: إستفتــــاء حقيقى للحركة الشعبية فى نيــــالا ..!! (Re: محمد كابيلا)
|
كلمة الرفيق عمر عبد الرحمن فور مرشح الحركة الشعبية لولاية جنوب دارفور :
السلام عليكم وبدأ بهتاف :
دارفور وييى
النازحين وييى
الجماعة ديلك وييى حيث كان يشير إلى بعض الجماهير الذين يتسلقون الشجر لمشاهدة المنصة بإسمكم جميعاَ
نحى ضيوفنا الكرام ضيوف الحركة الشعبية وسعداء بهذا الحشد الكبير وتمثل هذه الزيارة تدشين الحركة
الشعبية للحملة الإنتخابية ونحن فى الحركة لنا أوليات لا بد أن نقف عندها وهى قضية دارفور ولا يجوز
التحدث عن الديمقراطية والتحول الشامل قبل الحديث عن دارفور أولاَ (إنقطعت الكهرباء لمدة نصف ساعة فى
منظر لا يخلو من الحسد وعند تشغيل المولد تبعه هتاف) :
كهرباء وييى
كهرباء وييى يواصل أن قضية دارفور هى فى الأساس سياسية ونرى حل قضية دارفور عبر وسائل سياسية وليست عسكرية لذلك
نتحدث عن طريق الإنقاذ وقضايا المرأة والشباب والرحل والمشردين وقضايا المفصولين عن الخدمة تعسفياَ
نحن سعيدين بهذا الحضور وسيأتى الوقت الذى نتحدث فيه عن قضايانا شكراَ جزيلاَ .
يتبع ..
| |
|
|
|
|
|
|
|
|
|
Re: إستفتــــاء حقيقى للحركة الشعبية فى نيــــالا ..!! (Re: محمد كابيلا)
|
الأمين العام للحركة الشعبية باقان أموم :
ياسر عرمان سودان جديد
ياسر عرمان وحدة طوعية
مبسوط جداَ معكم هذا المساء فى نيالا ولو سمحتوا لى بعد السلام أقول ليكم جينا نقدم ليكم واحد من
نيالا ياسر سعيد عرمان صوت لـ ياسر عشان ندى فرصة للسودان أرمى صوتك لــ ياسر لأنه معناها أول مرة
حتكون حر فى السودان . تعبنا من الحروبات الأهلية نقدم ياسر عشان السلام فى دارفور عشان نعالج مشاكل
النازحين عشان تحقيق المصالحة يا أخوانا إنتهى الزمن ربنا خلقنا عشان نتعارف مش نتحارب والسودان
يسعنا كلنا كان عرب كان أفارقة صوتك لـ ياسر من أجل الوحدة الطوعية لأنه من أكثر الشخصيات الذى يوحد
السودان عايز يجيب العدالة للسودان وبرنامجه برنامج تغيير عشان يتساوى كل السودانيين وحــ يكون
عندنا فرصة كبيرة لعدم تشتيت السودان إذا إنتخبنا ياسر عندنا فرصة نلم السودان عايزين يكون فى حرية
عشان نشتغل ونعمل تنمية وعدالة ونشترى إسمنت وسيخ ونبنى المدارس بدل نضرب المواطن نوفر الموية
عشان الناس ما نعطش وتزرع وتنتج . نحن جينا مدينة نيالا جينا ليك يا أمى عشان نطلب منك صوتك لــ ياسر
لأنه هو بنظر فى قضية المرأة عشان تساعد فى بناء الوطن وأساس المجتمع الأمهات جينا ليكم يا شباب عشان
تصوت لــ ياسر عشان يبنى ليكم مستقبل أفضل وفرص عمل . عايز أطلب من كل واحد سؤال ؟
العايز يصوت لـ ياسر عرمان يرفع يدو فما كان من الحضور إلا أن رفعوا أيديهم جميعاَ والطلب الأخير من
هنا ترجع وأبدأ مع جيرانك وأرجع القرية كلمهم عشان يصوتوا لـ ياسر الآن الإنتخابات نتيجة لنضال عشان
السلطة يكون فى يد الشعب وتانى ما دايرين زول يجى بدبابة وتانى فى طلب صغير (رئيسنا الكبير وكان
يقصدالبشير دخل السودانيين فى مشاكل طول قاعد يحكم تانى شنو ؟ دايرين شباب والشباب هو ياسر عرمان .
يتبع ..
| |
|
|
|
|
|
|
|
|
|
Re: إستفتــــاء حقيقى للحركة الشعبية فى نيــــالا ..!! (Re: محمد كابيلا)
|
الرفيق جيمس وانى نائب رئيس الحركة الشعبية :
نيالا وييى
دافور وييى
سودان جديد وييى
جماهير مدينة نيالا كل فى الندوات نحنا نبدأ الكلام بالغنا ومتأكد كتير منكم يعرف :
SPLM حكومة بتاعنا
حكومة بتاعنا SPLM
الرفيق ياسر /باقان /كل الرفاق الجماهير بتاعنا برمة بتاع السلام ورئيس الحركة بسلم عليكم كلكم
ونحنا جينا عشان نفتح السكة عشان هو جاى ورانا قبل ما أبدأ موضوعى عربى بتاعى ما زى بتاع باقان
عربى بتاعى عربى كونجو كونجو فى جوبا داير أقول مبروك ليكم مواطنون جنوب دارفور عشان الإستقبال
الحار من المطار لغاية هنا وعايز أقول أهداف ورؤية الحركة هى وحدة السودان نحنا جبنا ليكم زول
بتاعنا كان قاعد مع دكتور قرنق جبنا ليكم ياسر وهو الذى يقدم لكم برنامج الحركة الشعبية ونحنا ما
عايزين نرجع تانى للحرب عايزين سلام دائم ونحن فى الحركة لأول مرة أدينا فرصة للمرأة وهى نسبة 25 فى
المائة والشباب بدون عمل لأسباب ما فى إستثمار ونحن نريد الوحدة على أسس جديدة وليس على أوانطة
فى الختام سرد قصة محلية من قبيلة البارى فى مضمونها تمثيل للحركة أنها وإن بدأت صغيرة فهى أمل
السودان .
يتبع ...
| |
|
|
|
|
|
|
|
|
|
Re: إستفتــــاء حقيقى للحركة الشعبية فى نيــــالا ..!! (Re: محمد كابيلا)
|
ياسر سعيد عرمان مرشح الحركة الشعبية لرئاسة الجمهورية :
نيالا وييى
جنوب دارفور وييى
دارفور وييى
المرأة الدارفورية وييى
معسكرات وييى ..نازحين وييى
أكبر مجموعة من المعسكرات منعوهم الحضور رغم ذلك فى ناس مجموعة طوعية تتم بإختيار أول حاجة الفاتحة
على أرواح شهداء دارفور والكرسى مضمون طالما إنتو جيتو دقيقة حداد على أرواح نساء وبنات دارفور
وشكراَ جزيلاَ للناس القطعوا الكهرباء ما دايرين كهرباء بعدكم . أحيكم رغم الظروف الذى أعلمه (انت
ما تفسر وأنا ما بقصر ) صفقة قوية للنساء المرأة وييى وأشكر كل القوى السياسية قوى جوبا .الإسلام
نشر عن طريق دارفور والنيل الأزرق وليس الخرطوم وبالتالى إذا فى زول عيان نودى المستشفى ودارفور
تعلم الإسلام وليس الخرطوم وخرجت منها مسلمين صالحين ونشعر بالحزن الكبير للخراب والدمار دارفور لا
نستاهل ذلك منذ مئات السنين لو فى مشكلة فى دارفور بحلو فى الراكوبة بدون مفاوضات أرض دارفور لأهل
دارفور ما فى زول يجيب قبيلة محل أخرى قبل الإنتخابات كان لنا إنحياز لدارفور سنة 83 كتبنا عن
دارفور والسودان لا يبنى إلا بحل كامل لقضية دارفور والمؤتمر الوطنى مستعجل قلنا نلقنو درس فى
إستعجالو وبخصوص الأصوات الشجرة أم عروقن فوق بره والنجمة النجمة بتهدى الناس أما الشجرة فلا تقربوها
وموضوع دارفور لا يتحل فى أبوجا أو الدوحة وإنما بجلوس حركات دارفور مع بعض وللمؤتمر الوطنى أن
يعتذر لأهل دارفور قبل أن يطلب الأصوات وأى زول يأخذ جزائه والخرطوم مفروض يكون زى الميز للكل فيه
نصيب وأول قرار هو قضية دارفور عادلة وتعويض النازحين وما حكى جلدك مثل ظفرك وفى الختام أدى النجمة
أو أى حزب من قوى جوبا وشكراَ جزيلاَ .
كل الود
محمد كابيلا
| |
|
|
|
|
|
|
|
|
|
Re: إستفتــــاء حقيقى للحركة الشعبية فى نيــــالا ..!! (Re: محمد كابيلا)
|
إيقا: الحركة الشعبية ستفوز بـ 85% في الانتخابات
عرمان: أول قرار سأتخذه الاستجابة لمطالب أهل دارفور
نيالا: علوية مختار: اعلن مرشح الحركة الشعبية للرئاسة، ياسر عرمان انه سيتخذ فور دخوله القصر الجمهوري حال فوزه في الانتخابات، قرارا يستجيب لمطالب أهل دارفور بمنحهم الاقليم الواحد واعادة أراضيهم وتعويض المتضررين جراء الحرب وتمكين أبناء دارفور من حكم اقليمهم وتأمين مشاركتهم في السلطة المركزية، بينما أكد نائب رئيس الحركة جيمس واني ايقا اكتساح حركته لانتخابات الرئاسة بنسبة 85% وطالب السودانيين بالتكاتف لانقاذ البلاد من التشرذم واغلاق الباب أمام الحكومة بعد فوات الأوان.
ودشنت قيادات الحركة الشعبية حملتها الانتخابية بمدينتي الضعين ونيالا بجنوب دارفور أمس، وسط حشد جماهيري قدر مراقبون أن مائة ألف شخص تجمعوا بميدان المولد بنيالا، برغم مضايقات تعرضوا لها خاصة النازحين القادمين من معسكرات كلمة ودريج والسلام وعطاش للوصول الى مقر الحشد، بقفل الكباري وحجز العربات، بحسب افادات منظمي الحملة ومرشح الرئاسة ياسر عرمان الذي ادان العملية وقال لدى مخاطبته الجماهير بنيالا ان الاستقبال الذي وجدته قيادات الحركة ومرشحيها في نيالا يمثل استفتاءً حقيقيا للحركة قاطعاً بانحياز الحركة منذ تأسيسها إلى قضية دارفور، وأكد ان البلاد لا يمكن ان تكون فيها انتخابات أو ديمقراطية أو حريات إلا بحل شامل وعادل لقضية دارفور، وقال ان الحركة رأت ضرورة ان تجري الانتخابات بعد حسم قضية دارفور لكن المؤتمر الوطني مستعجل لان ما يهمه هو اصوات دارفور وليس الموت والدمار الذي تعانيه واضاف «ان الحركة رأت تلقين الوطني درساً في الانتخابات» وقال عرمان ان أول قرار سيعلنه بعد فوزه في الانتخابات ودخوله القصر الجمهوري هو اعادة أراضي دارفور لأهلها ومنحهم الاقليم الواحد واعادة النازحين واللاجئين إلى قراهم وتعويضهم وترك دارفور لابنائها ليحكموها ومشاركتهم في السلطة والثروة قبل التفاوض، وشدد «فهي لا تحتاج لتفاوض وسيصدر قرار بشأنها في يوم واحد».
ودعا عرمان قبائل التماس مع الولايات الجنوبية للتعايش سلمياً مع جيرانهم بغض النظر عن ما تفرزه نتائج الاستفتاء.
وفي السياق ذاته، أكد الامين العام للحركة الشعبية باقان أموم ان عهد قيام الحكومات عبر الدبابات قد انتهى وولى زمانه وقال ان الانتخابات جاءت نتيجة للنضال والسلطة الآن للشعب ولم تقم حكومة في السودان إلا بالانتخابات وجزم بأن انتخاب عرمان فرصة كبيرة لمنع تشتيت البلاد ولتحقيق الوحدة الطوعية لأحلال السلام في دارفور.
من جانبه، أكد نائب رئيس الحركة الشعبية جيمس واني ايقا ان مشكلة دارفور من الممكن حلها في اول سنة من اندلاعها لكنها طالت بسبب غياب الارادة السياسية للمؤتمر الوطني. وقال ان الطريق للسودن الجديد يتم عبر حل مشكلة دارفور، وشدد على ان عرمان هو الوحيد الذي يحلها ويضع حدا للتهميش وقطع واني بأن الحركة الشعبية ستفوز بالانتخابات بنسبة 85% ، داعيا للوقوف مع بعض لتوحيد السودان مؤكدا تمسك الحركة بوحدة السودان.
http://www.alsahafa.sd/details.php?articleid=2712
| |
|
|
|
|
|
|
|
|
Re: إستفتــــاء حقيقى للحركة الشعبية فى نيــــالا ..!! (Re: محمد كابيلا)
|
مرشح حملة الامل و التغيير يدين قرار فصل الاطباء.
القرار ضد الاطباء و القاضي بفصلهم قرار ظالم لا سند له و يستخف بكل القوانيين و التقاليد و الاعراف و إستمرار لنهج و سياسيات الانقاذ منذ بدايتها و ينتهك الدستور في وقت يتلطع فيه الشعب السوداني للتحول الديمقراطي و التغيير وعلي كل القوى الساسية السودانية الوطنية و الديمقراطية و منظمات المجتمع المدني الوقوف في خندق واحد مع اطباء السودان و ادانة هذا القرار و منع تنفيذه.
ان القرار يدلل مرة اخرى علي طبيعة سياسيات المؤتمر الوطني و لقد قمت قبل قليل باعلان نفس الموقف من معسكر (كرندق) للنازحين في غرب دارفور و طلبت من النازحين في غرب دارفور التضامن مع اطباء السودان لان السياسة التي ادت الي النزوح والتشريد هي نفس السياسة التي تشرد الاطباء و لذلك علينا ان نقف وقفة قوية ضد هذه السياسيات.
وتجري الان في جوبا مشاورات مع النائب الاول الفريق سلفاكير بهذا الصدد و نحن علي إتصال مستمر مع الاطباء داخل و خارج السودان و ندعو اطباء السودان بالخارج وهم مجموعة كبيرة و قوية التأثير ندعوهم للتضامن بكافة الاشكال مع أطباء الداخل.
ان مهنة الطب في ظل سياسيات الانقاذ قد تدنت أخلاقيا و مهنيا و لقد أفقرت شعب السودان و أصبح العلاج جزء من التجارة و الاستثمار و اصبحت المؤسسات الطبية خاضعة لسيطرة المؤتمر الوطني الشي الذي يدعو الي إعادة النظر في الخدمات خاصة الصحة و التعليم.
ياسر عرمان
غرب دارفور في 17 مارس 2010
| |
|
|
|
|
|
|
|
|
|
Re: إستفتــــاء حقيقى للحركة الشعبية فى نيــــالا ..!! (Re: Nazar Yousif)
|
http://www.splm-north.com/news.html
ياسر عرمان بدارفور: سأُوقف الحرب
الاثنين, 15 مارس 2010 13:29
الحركة الشعبية لتحرير السودان
مكتب مرشح رئاسة الجمهورية
الأستاذ ياسر سعيد عرمان
حملة الأمل والتغيير
خبر صحفي
إنطلقت ظهر اليوم الأحد 14 مارس 2010 حملة الأمل والتغيير لمرشح رئاسة الجمهورية الأستاذ ياسر سعيد عرمان بأقاليم دارفور الثلاثة. شارك في تدشين الحملة، التي أُستهلت من مدينتيّ الضعين ونيالا بولاية جنوب دارفور كل من الأستاذ ياسر عرمان مرشح رئاسة الجمهورية عن الحركة الشعبية لتحرير السودان والأستاذ جيمس واني إيقا نائب رئيس الحركة الشعبية، الأستاذ باقان اموم الأمين العام للحركة الشعبية والأستاذ عمر عبدالرحمن مرشح الحركة الشعبية لولاية حنوب دارفور.
وبالرغم من المحاولات المتعددة لعرقلة وتحجيم وصول ومشاركة المواطنين من النازحين وسكان مدينة نيالا، بما فيها فصل التيار الكهربائي ومنع النازحين(ات) من المعسكرات القريبة من دخول المدينة والمشاركة في إستقبال الرئيس المرشح وقادة الحركة الشعبية لتحرير السودان، بالرغم من ذلك ضاق ميدان المولد على إستيعاب عشرات الألاف من الحضور الدارفوري مرددين شعارات ملئها الأمل والتغيير مثل " ياسر سعيد نظامه جديد" و " أرض دارفور لأهل دارفور".
إستهل مرشح رئاسة الجمهورية، الأستاذ ياسر سعيد عرمان لقائه بمواطنيّ ونازحيّ جنوب دارفور بقراءة الفاتحة والترحم على ضحايا الإنتهاكات الجسيمة التي طالت الإقليم، باثاً للامل وسط المواطنين(ات) بأن أولى قراراته الرئاسية ستكون إيقاف الحرب بما يستجيب لحقوق ومطالب الدارفوريين(ات) المشروعة، بما فيها عودة الإقليم الواحد والعودة الطوعية والآمنة للنازحين(ات) واللاجئين(ات) لقراهم ومناطقهم الأصلية، وتوفير التعويض اللازم بما يمكنهم(ن) من دمل الجراح والعودة للحياة الطبيعية، إضافة الى توجيه ميزانيات الحرب في دارفور الى قضايا التنمية الملحة.
وقدم قادة الحركة الشعبية لتحرير السودان الأستاذ جيمس واني إيقا وباقان أموم أوكيج وعمر عبدالرحمن مرشح الحركة الشعبية لمنصب والي الولاية تصوراتهم للحل العادل والشامل لأزمة دارفور مُنبهين الى أن من أسباب إختيار الحركة الشعبية لياسر سعيد عرمان لرئاسة الجمهورية إحاطته ومقدرته بأن يكون خادماً للسلام والعدالة والتنمية بدارفور.
بيتر نتانا، المكتب الإعلامي
للإتصال بمكتب إعلام مرشح رئاسة الجمهورية الرجاء الإتصال على الأرقام أدناه:+249-(0)15-4882041 / +249-(0)907333884 / +249-(0)907333885+249-(0)907333886
hope& [email protected]
هذا البريد الإلكتروني محمي من المتطفلين و برامج التطفل، تحتاج إلى تفعيل جافا سكريبت لتتمكن من مشاهدته.
http://www.splm-north.com/news.html
| |
|
|
|
|
|
|
|
|
|
Re: إستفتــــاء حقيقى للحركة الشعبية فى نيــــالا ..!! (Re: Nazar Yousif)
|
فوق من أجل سودان جديد خالي من العصبية الدينية والعرقية والقبيلة
سودان يشعر فيه كل مواطن أنه مواطن أصيل من الدرجة الأولى
سودان خالي من التهميش والإستعلاء الثقافي والعرقي والديني
سودان العدالة والحرية والمساواة .. سودان السلام والتسامح والأمان
وأملنا كبير والتغيير قادم قادم لا محال
من أجل الضعفاء والبؤساء
من أجل الأرامل واليتامي
من أجل الجوعي والعطشى
| |
|
|
|
|
|
|
|
|
|
Re: إستفتــــاء حقيقى للحركة الشعبية فى نيــــالا ..!! (Re: salah almaleeh)
|
صلاح المليح ...
تحيـــــاتى ..
Quote: فوق من أجل سودان جديد خالي من العصبية الدينية والعرقية والقبيلة
سودان يشعر فيه كل مواطن أنه مواطن أصيل من الدرجة الأولى
سودان خالي من التهميش والإستعلاء الثقافي والعرقي والديني
سودان العدالة والحرية والمساواة .. سودان السلام والتسامح والأمان
وأملنا كبير والتغيير قادم قادم لا محال
من أجل الضعفاء والبؤساء
من أجل الأرامل واليتامي
من أجل الجوعي والعطشى
|
هذا ما نريده بالحرف الواحد
تسلم لمرورك ..!!
كل الود
محمد كابيلا
| |
|
|
|
|
|
|
| |
محمد كابيلا
Nazar Yousif
salah almaleeh
محمد نيالا
بشير أحمد
Mustafa Shogar
احمد محمد بشير
ذواليد سليمان مصطفى
فيس بوك
تويتر
انستقرام
يوتيوب
بنتيريست