الود النصيييحة لو خلا تصريحاتو دي بيجي منو .. أخوهو غناي أكتر منو ما بيناتنا لكن هو كمان غناي.. بالرغم من انهم بيغنو الاغاني الماشة اليومين ديل وخلت الناس تهيييج وتجووووط لكن عندهم من الاعمال المسموعة والجميييلة البترييح الزول في كنكوجو ..
قلبي العنيد واحدة من الحاجات البترييح في الكنكوج ..
لسة يا المليان رهافة ..العواقب ما بتخافا .. زدت في روحي اللطافة ..في القساوة الناس تزيد .. ولسة يا قلبي العنيد ..
ود حلال يا عمر والله من امس والله انفقت زمن عزيز جدا في مشاهدة و سماع معظم إنتاج الشباب احمد/ حسين الصادق و كنت ناوي افتح بوست بي اسمك اشاورك فيهو في الشباب ديل بإعتبارك متابع و اهو الواحد برضو يرفع ليك اسهمك السقطت بعد موقعة انور كنغ الاخيرة عموما بوستك ده برضو كويس (إن قبلت) عشان افهم فيهو معاكم السر شنو في شعبية الشباب ديل (وفقا لرواية اليوتيوب ) ؟ و شنو البيميزهم عن غيرهم نوعية الاغاني البغنوها ولا الشِعر البغنوهو ولا المُلحنين ولا تنفيذالموسيقي ولا رغبة السودانيين في سماع خيط جديد ولا شنو بالضبط ؟ و شنو قصة الالقاب الحايمة في السودان في السنوات العشرين دي ؟ و سبب تسمية حسين الصادق بالامبراطور؟
عشان الكلام يكون واضح من اسه يا عمر و آخرين انا لا مع الشباب ديل لا ضدهم انا عاوز افهم الظواهر البتظهر فجأة في السنوات العشرين الاخيرة , و ده طبعا نسبة لغيابي طيلة سنوات من السودان يعني بالسوداني العامي كده .. انا لحدي مصطفي سيد احمد فاهم المزاج السوداني لكن بعد رحيلو ودر مني راس الخيت
اها شن قولك ؟
_____ رجاء شديد اللهجة يا عمر اكتب ردك كلو و بعد داك قسمو , كل 7 سطور في مداخلة منفصلة ما بقدر علي دشك الطويل داك ياخ و قلل عليك الله من جرجرة الحرووووووووووف كده بقدر افهمك و احبك جدا
01-31-2010, 01:27 PM
Tabaldina
Tabaldina
تاريخ التسجيل: 02-12-2002
مجموع المشاركات: 11844
Quote: يا سباع المنبر على ما يبدو ان اخونا البدرى يود ان يصبح ( ضبعا)
تبلدينا وافر التحايا
(ضبعا) مين يا حبيب ..اخوك والله كان (من زمن بورد معاز) ولا يزال مسكينا وسيظل ان شاء الله مسكينا.. اما (سباع المنبر ) فيجب عليهم مراجعة تكتيكاتهم لانو الغالبية العظمى اصبحت هرمة وبدون اسنان كمان واي شاة حايمة ممكن تطبق فيهم المثل القديم
01-31-2010, 10:16 PM
دينا خالد
دينا خالد
تاريخ التسجيل: 06-26-2006
مجموع المشاركات: 8736
انا جيت يا عمر لانو المتداخلين ديل داخلين تووووش بحاولوا يحرفوا البوست عن مراميه ... وبحاول ان انقذ ما يمكن انقاذه !! تبلدينا دا بس يجى يخرب .. ما بصوت ليه لو كسر رقبتو ..
اها ندخل فى الموضوع :::
الزول الكتب الشعر دا والله تقول لا شاعر ولا حاجه .. دا انا بكتب احسن منو .. مافيه اى طعم ولا لون ولا رائحه دا اخير منو غنا .... الف مرة ..
مافيه اى احساس كلام ملصق وخلاص
النصيحه لا بعرفو لا بعرف اخوه .. بس جينا ننقد ليك وخلاص ذى ما بتعمل انت .. مش عامل نقاد ؟ غايتو العناد دا كان فى الراس بقى يمسك القلب ؟؟ العناد غيرووهو؟
ــــــــــــــــــــ الاغنية مهداه لانور كينج .. ودينا خالد .. ودليبنا اقصد تبلدينا طيب ياخى انت لما عارف دا كلو لى ما سميت نفسك نخيلنا !!!
02-01-2010, 06:47 AM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
غايتو يا خدر جنس حقارة عليك !! يعني انت تكتب مداخلتك في عشرين سطراً ونيف وتجي تقول لي قسم لي ردودك في 7 سطور؟؟ الغريبة انا زييك كده ما بحب اقرا الكلام الكتير لكن والله بستمتع جداً وانا بكتبو .. اما بخصوص موقعة الدمخفيفه وتقيله فياخ صدقني دي كانت زي موقعة أحد الرماة تركوا مواقعهم عشان يلقطوا الغنائم فهجمنا عليهم من الخلف وكبدناهم شر هزيمة لحدي ما كففف لفحوا البوست ورسلوا بي تحت تحت وضربوا التلفونات بي تحت تحت برضو أها دي أول 7 سطور اوفيت ليك بي عهدك بلا جرجرة حروف لكن لي قدام ما بوعدك سمح ؟ :)
02-01-2010, 10:07 AM
الخير محمد عوض
الخير محمد عوض
تاريخ التسجيل: 10-25-2005
مجموع المشاركات: 3547
وبما انا قوم قد اصتك بهم السمع- ووقف من تشنيف الاذن او حتى قبول فكرة تعاطي الجديد- لفترة امتدت لعقدين من الزمان علي اسوأ تقدير فبقت عندنا مشكلة مزمنة في تناول الظواهر الصوتية الجديدة والاستايلات الموسيقية التي تتحد مع مجمل تجرتبتهم كشباب جري تمردهم على القوالب الغنائية التقدليدية التي ظللنا نستمع لها منذ الازل. الشباب ديل احمد وحسين يمتلكان خامة صوتية اقل ما يمكن ان يقال عنها انها متفردة وبصمة صوتم لاحقة وطروبة وما تقيلة علي الاذن البتة يعني ( كتير مهضوميين) المشكلة وييييين طيب... المشكلة في رغباتنا نحن واستعدادنا لانه نسمعهم كيف!! يعني السميعة الزينا ديل بكبابر في انو اخت ليهو البوميين غنائيين واحد لوردي وجنبو طوااااالي واحد لاحمد الصادق مثلا... القصة كدا بتكون زي العييب زول سمع جميلة ومستحيلة وبعديها يسمع ( الجاب لي اخبارو قال البكى اذي عيونو) قصة كدا ما راكبة عدلا... هيك وللا ما هيك!! المهم الاشكال دا انا حاولت اتخلص منو بانو لما اسمع اي من فنانينا القدامي او اي من متمردينا الحديثيين ان اسمع اي منهم مخلصا ذهني عن اي تجربة سماعية اخرى.... بمعني, لما اسمع ابو الامين بسمععوا باعتبار هو الزول الوحيد الممكن يستحوذ علي اذني ويحيلها اذن طروب وكذا الحال لما اسمع احمد او حسين اخلي ليهم قارب الاذن مشرع لنفس الاستحواذ والباقي في عملية القبول او عدمه بخليها لانفعالات نفسية كتيرة احيانا الواحد ما بكون عندو فيها يد.... بس حقيقة لله الشابين ديل بدروا البمسكم الطريق ويقعدهم في واطاة غنانا السمح دا وصدقني امكانياتم بتم الباقي.
شكرا يا ابوعمير لهذا البوست اللطيف.
02-01-2010, 12:07 PM
عمران حسن صالح
عمران حسن صالح
تاريخ التسجيل: 11-26-2004
مجموع المشاركات: 10159
Quote: السر شنو في شعبية الشباب ديل (وفقا لرواية اليوتيوب ) ؟ و شنو البيميزهم عن غيرهم نوعية الاغاني البغنوها ولا الشِعر البغنوهو ولا المُلحنين ولا تنفيذالموسيقي ولا رغبة السودانيين في سماع خيط جديد ولا شنو بالضبط
؟
انت عايزني اتكلم معاك من وجهة نظري الخاصة ورؤيتي لي تفكير الشباب الحالي ده ولا رأيي انا عن نفسي؟ مبدئياً بجاوبك على الاتنين :) شعبية لاشباب ديل تشبه للحد البعيد شعبية عبد العزيز المبارك وقتها والناس بتسمع عثمان حسين وردي.. شعبية الشباب ديل بتشبه للحد البعيد شعبية عركي والناس وقتها مشغولة بي ابوداؤود.. شعبية الشباب ديل بتشبه شعبية مصطفى سيد احمد والناس بتغني لي وردي.. عارف يا خدر موضوع الاجيال ده موضوع حساس شديييد نحن مصرين وملحين إننا نحاول اي جيل يكبل البعدو في كل حاجاتو هو ..غنا لبس قراية تعليم فهم نقاش نضمي سلوك ..ايييييييييي شي لازم يكون بي فهمهم هم .. أضان وائل اللي خلتو يستوعب الفنانين ديل ويجعلهم مميزين عن من هم قبلهم هي بتشبه للحد البعيييد أضان خدر اللي يستوعب ما يقدم ابو عركي في زمن الناس قالوا الزول ده جا يعولق الغنا (اوووعك تقارن لي بين عركي واحمد الصادق سمح ؟) الجكس اللي بقا بيحب يسمع ناس طه وشكر الله عشان بريم الشعر وجلجلته (بي الجل يعني) بيشبه للحد البعيد الجكس الكان مكسر في وجاهة عبد العزيز المبارك .. لو لاحظت فمعظم الناس اللي بتحب الشباب ديل حبتهم ما عشان اغغانيهم نوووو حبتهم وهم بيغنوا اغاني غيرهم وعليه فنوعية الغنا هي نوعية الغنا.. بلاقي نفسي مقتنع نوعا ما بي إنجذاب الجيل الحالي لي نوعية الموسيقى المقدمة حاليا مع الاورغن والبنقز والساكس طرب عالي ورقيص فوق مع استمتاع بي اصوات بعد الشباب اللي بقت اذن المستمع الشاب متعودة عليهم اكتر من اصوات بتشبه ناس زمان .. ودي حاجة طبيعية مش يا خدر؟ يعني حتى الاصوات فيها البيذكرك انو ده جيل زمان وحاجات زمان ولو لاحظت لي صوت فيروز وام كلثوم وعبد الحليم والاطرش والكاشف فدي اصوات حقت زمااان مهما حاول شاب يقلدها بررضو بتكون حقت ناس زمان وعليه فالشباب الحالي عندو اصوات حقت ناس اسة وده سبب تاني يخليهم اكتر شعبية .. بالنسبة للألقاب يا خدر فبكل صراحة الظاهرة الحالية ظاهرة مصطنعة سببها الاعلام والصحفيين المتسلقين إضافة لي ما يسمونه مدير الأعمال بتاع الفنان .. زمان ظاهرة الالقاب عفوية وبتجي دون قصد ولاااا بيكون المعلق او المذيع أو الصحفي قاصد يقولا عشان يخالف ويشتهر .. يعني لمن قال صلاح بن البادية ومشت ما كان قصدو يشهر نفسو ويقول انا سميتو لومن قالوا العندليب الأسمر زيدان ما كان عايز يطلع اللقب ولا كان همو يتلقب.. أسة يا خدر الاسماء دي بينجروها الشباب اللي حول الفنان اصحابو وشلتو وبيقولوا ليهو يا زول بنمشييها ليك في الناس بالتالي بيكون اللقب ده عنوووة وغصباً عن المستمع عشان كده صدقني مااا بيصل وحدو يطبعو في شريطو أو في ملصق لي حفلة لكن صدقني ما بيكون مشهور بيه.. عارف يا خدر أكتر فنان كان بيحتاج لقب في الزمن ده هو محمود عبد العزيز ورغماً عن كده ما اتوجد ليهو لقب لأنو كل زول حاول يعمل لقب منجور .. فهمتني .. تخريمة : ياخ عايز اجرجر الحروف الله يرضى عليك ..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة