|
|
|
 Re: اكلات سريعة وخطيرة للعزومات.... مطبخ بنت الحسين (Re: مريم بنت الحسين)
|
سلام يا مريم
وما شاء الله ع البوست المحترم دة
بالله 3 صفحات؟!!
غايتو اكيد ولازم ح ألقى لي فرقة اقراهو ولو بالتقسيط المريح
لكن كفتح خشم كدة مشيت توووش ع الصفحة التانية ، متعة بالجد
وبامانة كدة ركزت ع مداخلات سناء خالد اصلها عاجباني والليلة عجبتني زيادة ومداخلة الدعوة بتاعتها ديك كسرتني عديييل كدة، بالجد بحس انها صاحبة بيت انيق وراقي من كلو!!
تسلمي ياعزيزتي وليك ولكل الايدي الشاركتك هنا تعظيم سلام
| |
 
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: nazar hussien)
|
لنا مهدي... والله نوّرتي ... كده بس... نطبخ جنس طبيخ.... منتظرين الوصفات، والله عارفاك طبّاخة يا ام الوليد...
شيماء.. مرحب بيك... اقري بمزااااااج وتعالي لينا راجعة.. منتظرينك تدينا شوية وصفات بالله... انا استفدته كتير من البوست ده...
وصفة سريعة spaghetti لزيييييييز.. لكن لازم يتقدّم طوالي... انا بعتبرها من الcomfort food... لما أعملها معناها "مدبرسه"... الوصفة الاصلية كالآتي:
spaghetti رفييييع.. (الوصفة ما بتقول كده، بس انا بحبه كده)
كريمة (او قشطة)
جبنة بارميزان
فلفل وملح
زيت زيتون يكون نوع سمح بالله EVOO ياقول Rachel
عصير ليمون وقشره (انا بفضل الليمون الاخضر الاسمه lime
نخلي السباجيتي يستوي عادي.. بعداك نصفية من الموية، لكن ما نغسله... في الصحن الحناكل فيه، نكب المقادير كلها مع بعض، ونحرّكها.. بعداك نضيف ليها السباجيتي وهو حار.. ونحرّكه معاها وناكله.. وانتهينا ههههههههههههه
انا بحب الsour food جداً ... والاكله دي انا فترة كده ادمنته عليها .. لسهولتها.. لكن ما تسألوني عملت فيني شنو بعداك...
في منها نسخة أخرى... شفتها في التلفزيون.. .بإضافة بيضة... بس ما جرّبتها، ولا عايزه احاول زاتو...
شكلها بكون كده تقريباً
بعداك بقيت اعمل منها وصفة اسرع كمان.. بستخدم النودلز (ما بتاخد زمن في النار) ومعاها ملعقتين من جبنة كيري الجرّة pot
وبعداك زيت زيتون وبارميزان.. ومبروك الpounds على قولة ساره علي
البيت بيتكم يا اخوانا...
| |
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: nazar hussien)
|
سمارت مفروض يكون عندك هسة صباح الخير مش؟
معليش أنا في حاجات كتيرة بتفوتني مرات لأني بأكتب باستعجال..و السيستم بتاع الكمبيوتر (أو يمكن بتاع المنبر) ما مساعدني بالمرة..
Quote: بينى و بينك انا لما اكون عازمه اجانب اهم حاجه المحشى ...لكن زوجى (الله يديه العافية)لما يسالوا ده اكل سودانى ..بيقول ليهم (لا)....و لما اغالط ....بيقول لى المحشى سودانى فى الخرطوم بس. المهم ..احنا فى كل عزومه بنتغالط قدام الضيوف فى الموضوع ده.
الحاجه التانية البسيطه هى انى بحمر ليهم سمك بس ببهار سودانى.. شمار و كزبره و توم و فلفل و ملح..... |
تعرفي أنا بأقيف في صفك في الحتة دي.. المحشي صحيح انو طبق منتشر في معظم الأقطار العربية بس أفتكر انو في الأصل تركي.. أو يوناني..لكن كل ناس بيعملوه بيقدموه على انو خاص بيهم.. و ما أفتكر في زول غلطان ..لأنو بالبهارات و الطعم..بيختلف من بلد للتاني.. و حقيقي مع عشرتي لعرب كتيرين خليجيين و مصريين و شوام..ما لقيت زول بيعملو بالطعم بتاعنا..و في البيوت السودانية ممكن تلقي واحد أطعم من التاني..لكن في نكهة مشتركة لا تتكرر لدى سوانا!
برضو الطعمية و الفول.. يعني نحن بنعمل الطعمية بطريقة مختلفة عن كل الشعوب التانية.. المصريين بيعملوها بالفول المقشور.. و الشوام بيعملوها بالحمص أو الكبكبي زينا.. لكن بيضيفوا ليها بيكربونات بدل البيكنج باودر..عشان كدا بتاعتهم دايماً لونها أسود و شاربة زيت!! غير كدا أفتكر نحن الوحيدين البنضيف ليها شمار أخضر..
و برضو نحن الوحيدين البنطعم الفول بزيت السمسم و الشمار الناشف
بعدين ياخي المحشي دا ما في الخرطوم بس..أنا و الله من فتحت عيوني على الدنيا لقيتو عند أهلي (في قرى الجزيرة) في ..بس ما تسأليني فتحت متين..:))
قيمة البطاطس دي كنت متخيلة انو كل الجنسيات بتعرفها.. و بصراحة استغربت لما عرفت انها جديدة على الشوام و المصريات المعاي هنا و حبوها جداً كما هي و بدون تحريف لكن حرفتها مرة بالصدفة في يوم كنا مجتمعين مجموعة أمهات و كل واحدة مفروض تجيب طبق.. عملت قيمة البطاطس و قلت أوديها ..قبل ما أطلع قلبي قال لي ضوقيها..لقيت ملحها زايد
اتلفت ما لقيت بطاطس زيادة أخفف بيها الملح .. طوالي عملت ليها صوص بيشاميل ملحو منخفض و كبيتو فوق الصينية..و رشيتو على خفيف بجبنة و أديتها 10 دقايق في فرن حار..
ما حأقدر أوصف قدر شنو المثل بتاع (رب ضارة نافعة) لفق في الحتة دي ..أول حاجة عجبت الناس جداً و تاني شيء ريحتني لروحي دي لأني كنت بأعمل صينية الخضار بالبيشاميل كمية و أنواع من الخضار مقلية و طبقات فوق بعض..و محشية باللحمة المفرومة..تحتها بيشاميل و فوقها بيشاميل..!! عملية طويلة و معقدة..هسة طوالي بأعمل قيمة بطاطس على السريع و من فوق ليها البيشاميل..الأولاد مسمينها قراتان البطاطس Potato Gratin و هي أكلتهم المفضلة!
عملت الشوربة يا سمارت..و هبّبت في حاجتين..كبيت الرز كتير..على حس انو مطبوخ جاهز اتخيلت اني مفروض أختو كتير و لا ما عارفة قلبي قال لي شنو!!
و كترت الليمون بالغلط..شغل ما كان منظم.. مع اني في الأول ظبطت مقاس الشوربة..but it's one of those days
جيت عشان أصورها ..لقيت اني من أمس ناسية الكاميرا مفتوحة و بطاريتها نازلة..(عايزة اسمايلي المكزز أسنانه داك)
بالرغم من كدا الطعم بالنسبة لي أنا كان لذيذ جداً ..و أكيد حأعملها تاني خاصة انها سهلة جداً جداً.. بس حألتزم أكتر بالوصفة و الرز اللي يتسلق في الشوربة..
بالنسبة للأولاد هبة و هديل حبوها جداً.. و حسن و أبوه اضطريت أضيف ليهم شوية سكر يخفف من الحموضة بتاعة الليمون
الحسنة الوحيدة (الارتكبتها) بدون قصد اني عشان أصورها زينتها بLemon Balm
و نكهته مع طعم الليمون في الشوربة بيخليني أكون عايزة أجربها تاني في الأسبوع دا و أضيف ليها في آخر مرحلة مع البيض و الليمون chopped Lemon Balm
____________________________________________________________________________________
هالة..ممكن أصاحبك... عشان توديني تعرفيني على خالتو.. ياخي أنا بأموت في الناس الخبرة..و بأكون عايزة أعرف منهم الصغيرة قبل الكبيرة..ربنا يخليها ليكم و يديها الصحة و العافية يا رب
_____________________________________________________
مريم ياخي أخجلت تواضعي و الله ...شكراً ليك على كل التعليقات الحلوة..بس خليني أجيك بمهل لأنو الدنيا عندنا هسه نص الليل ..و عايزة أكتب ليك كلام كتيييييييير
_____________________________________________________
نجوان ..تسلمي انت و يسلم ذوقك..أنا مرات صبّابة..و خاصة بعد فترة صمت طالت و فترة صمت تقترب..لكن محتاجين نكتسب منك خبرات و انت واضح أنك فارسة لا يشق لها غبار في ساحة المطبخ .. فما تحرمينا رجاء
_____________________________________________________
شيماء..شكراً ليك شديد على ثنائك اللطيف.. بس أنا ما قدر ما كلماتك صورتني.. زولة بسيطة و يا دوب بأتعلم.. بس يمكن مرنة بتأقلم بسرعة, و بحب أطور نفسي و أتعلم الجديد دائماً..
مودتي..
____________________________________________________
يااااا لنا..لي ساعة بأكتب في المداخلة دي رجعت شوية لقيتك دخلت المطبخ..
هلا و غلا..بأم الوليد
| |
|
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: Sana Khalid)
|
| Quote: ما حأقدر أوصف قدر شنو المثل بتاع (رب ضارة نافعة) لفق في الحتة دي ..أول حاجة عجبت الناس جداً و تاني شيء ريحتني لروحي دي لأني كنت بأعمل صينية الخضار بالبيشاميل كمية و أنواع من الخضار مقلية و طبقات فوق بعض..و محشية باللحمة المفرومة..تحتها بيشاميل و فوقها بيشاميل..!! عملية طويلة و معقدة..هسة طوالي بأعمل قيمة بطاطس على السريع و من فوق ليها البيشاميل..الأولاد مسمينها قراتان البطاطس Potato Gratin و هي أكلتهم المفضلة! |
عندي حاجتين بعملهم كتغيير في الاكل... الباشميل، والبطاطا المهروسة... ومعاهم جبنة، وعلى الفرن... اكلتك دي مرّه عملتها برضه لمصقّعة... كانوا جاييني ضيوف، وعملته ليهم مصقّعة... بس الظاهر قطّعته الأسود شرائح ارفع من العادة.. خفتها تقوم تدوب مع التسبيكة الاخيرة.. قمته عملته معاها بطاطس... ومن فوق ليها بشاميل من النوع ابو كديس (مع قشطة)... ومن فوق عملته ليها موزيريلا.. والفرن ...
كانت اكلت الموسم
| |
|
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: Sana Khalid)
|
مريوم والجميع الظريفين.. ســـلامات
عارفة نفسي مقصًرة.. طبعا يا جماعة لقيت مريوم كاتبة لي في حيطتي بتاعت الفيس بوك تسأل مني..
أنا موجودة بس غرقانة في طبيخ غير.. لوووووول
أكيد اكيد جايكم بشوربات ما تخرًش الميًه.. لكن سنوية بأكلاتها الملونات دي عقًدتنا عديييل..
غايتو كان عملت لي أكلة إلا أنتظر امشي لأستوديو العريس في القاهرة عشان يطلًع لي الصورة مية مية:)))))
وبالمناسبة دي أعلن إنضمامي لحزب العدة الختييرة.. أمي بعد شويتين حتأجر مخزن أو شقة تانية للعدة البقت أكتر من الناس:)))
الحلو إننا قاعدين نعمل (كووردنيشن). مثلا لما راوية تجيب طقم، بهاء بيجيب ليهو الـ (إكسيسوريز).. وهدى الكبايات....الخ.
لما مشيت المانيا. غطستا في سوق العدة. بهاء شافني بتمًن في طقم ملاعق وشوك وسكاكين. حلف قال لي ما بتشتري من اي مكان حتى ولو بألف يورو. لازم نمشي لمدينة شنو كدا ما عارف. العملو فيها السيوف بتاعت نابليون. تصدقوا!!!
(طبعا عشان نتبوبر للضيف البيكون بياكل بيهم بإنه الحديدة دي حفيدة حديدة نابليون..ههههههههه)
بالهنا ليكم/ ن ولكل القراء
| |
|
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: Raja)
|
رجاء العباسي.. والله ضحكته ضحك لما قريت انك كتبته ليك في حيطك... الترجمة مرات بتكون ألز من الحقيقة.. ههههه بالمناسبة السعيدة دي، امس اكتشفته انه محمود ولدي رسم لحبوبة (جدارية) في الحيطة بتاعت السلّم... وحبوبته الكانت بتعاني مع اخوي مروان زمان لما كان صغير، ورسم الحيط، حسيتها الموضوع على قلبها زي العسل!! ناديته وشاكلته.. قام كالعادة قال لي "ما تكورك"... قلت ليه لي إنت تعمل كده.. قال لي "عقاب" (يعني هاتي من الاخر)...
منتظرينك .. افضي لينا سريع
| |
|
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: Sana Khalid)
|
اها يا سناء وهالة جيتكم بالاكيدة..
الكبيبة البعملا بعملا بابسط المواد..
ومن هسه مافي واحدة تسألني من المقادير..حاستعمل مفرادت (خمشة) و(نتشة)و(حبة) وحاجات زي دي والتقدير ليكم بعد داك...
ويا ناس هواري ونزار ركزوا الاكلة دي حلوة وسااااهلة..
المواد:-
لحمة مفرومة
رز
خمشةبقدونس
بهارتكم المفضلة
مصرة عصير ليمون
بيض
حتة صلصة
توم مفروم نتشة ونص
زيت تحمير
بجيب لحمة مفرومة وببوخا في النار بس ما لدرجة النجاض ..
وبنجض لي رز والكمية ما تكون كتيرة..واهم حاجة الرز يكون مفلفل ما مديدة..فهمتوني يا العزابة؟؟
يعني الرز علي اللحمة المفرومة يكونوا متساااوين..بمعني اللحمة ما اكتر من الرز والرز ما اكتر من اللحمة..فهمتوني؟؟
بنشل اللحمةالمفرومة من النار يعني لحمة مفرومة شبه منجضة وبختها في صحن واسع مع الرز ووبضيف كل البهارات المفضلة لي وفي خلطة بهارات شامية الايامات دي شايفاها في المطبخ لونها اصفر زي العصفر (ما تحرجوني وتسالوني من اسمها) المهم تتبلوا الخلطة دي بالبهارات البتحبوهامع توم مفروم عشان النكهة وكدة ..البصل ما بفضلوا لانو مع التحمير بيحمر هههههه ..انا بضيف ليها برضو حبة ليمون وصلصة (نتشة) وبقدونس او شمار مفروم..بعد داك بجغمسهم مع بعض بي يدي وبعد داك بجي بدورا زي ما بدور الطعمية..يعني اتخيلوا نفسكم بترموا في طعمية الفرق انو قبل بعد ما ادورها اقراص بغطيها بالبقسماط...(عيش ناشاااف) في الوقت دة بجيب لي بيض وبضربوا بمعلقة عادية..بقوم ادخل القرص بتاع الكبيبة في البيض وارميهو في الزيت..اهم حاجة الزيت يكون علي نار هااااادئة والزيت يكون ما كتير وما شوية..اتصرفوا في قصة الزيت دي..تختوااقراص الكبيبة بعد تغطيتا بالزيت في النار الهادئة لمن يبقي لونا دهبي وتنشلوها في ورق مطبخ..عشان الزيت وكدة..
بعد داك تختوها في سرويس وتزينوها بالطريقة البتفضلوها...
ــــــــــــــــــــــــــــــــــــــ
ولو حصلت ليكم اي مضاعفات ما تطلعوني انا السبب..تكونوا كترتو من الخمشات والنتشات
| |
|
|
|
|
|
|
|
|
 Re: اكلات سريعة وخطيرة للعزومات.... مطبخ بنت الحسين (Re: سارة علي)
|
| Quote: احنا يا سمارت لسه ما جابوا لينا الstock ده.. وكل ما اشوف rachel ray تعملوه، اتغاظ.. لانه فعلا بسهّل حاجات كتيرة.. ووقت كتير.. بس انا بعمل العادي بالعظام، واخته في الفريزر.. واستعمله |
مــــــــــــاسمحة يامريم
يو ديدنوط ميس ايت
مابريدها خالص واحسن تعملي شوربتك براك حتى لو ماجي بس
لانها فيها ريحة وطعم كدا إحنا مامتعودين عليهو
بالمناسبة بتعذر شديد عشان مشغوليات عجيبة كدا
لكن جاية ولغاية ما أجي تحية لسناء وعمايلها
مميزة ياخ
| |
|
|
|
|
|
|
|
|
 Re: اكلات سريعة وخطيرة للعزومات.... مطبخ بنت الحسين (Re: مريم بنت الحسين)
|
سنوية،
| Quote: هالة..ممكن أصاحبك... عشان توديني تعرفيني على خالتو.. ياخي أنا بأموت في الناس الخبرة..و بأكون عايزة أعرف منهم الصغيرة قبل الكبيرة..ربنا يخليها ليكم و يديها الصحة و العافية يا رب |
و أنا موافقة يا ستى،
و لو إنك ح تستخدمينى كبرى،،
لكن زى ما قلت ليكى،
متعودة،،،،
مريومة،،
أنا شخصيا بستعمل ماجى عند الحوجة (الماسة)،
لكن بفضل شوربة الدجاج (المفرزنة)،،،،
يا سرورة،
لكن الوصفة عندك،،،
مريحة راحة،،،،،
ما قصرتى،،
فضل بس تدوقينا،،،،،،
الله يديكم العافية،،،،
| |
|
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: سارة علي)
|
تخريمة(2)
ودي بخص بيها العزابة للتخلص من رائحة البصل..ممكن تستخدموا قشرة ليمونة معصورة مع ملح وتدعكوا بيها يدكم..وبرضوا سمعتا بي قشر البصل ذاتو الفوق فوق تلموا وتحرقو وتختو يدينكم في دخانو..سمعتا الاخيرة دي وجربتها مرة وما تسالوني النتيجة كانت شنو؟؟ لكن بركز علي الليمون اكتر..
وما(إيلك) الا سارة
| |
|
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: سارة علي)
|
| Quote: ودي بخص بيها العزابة للتخلص من رائحة البصل..ممكن تستخدموا قشرة ليمونة معصورة مع ملح وتدعكوا بيها يدكم..وبرضوا سمعتا بي قشر البصل ذاتو الفوق فوق تلموا وتحرقو وتختو يدينكم في دخانو..سمعتا الاخيرة دي وجربتها مرة وما تسالوني النتيجة كانت شنو؟؟ لكن بركز علي الليمون اكتر.. |
سرورة.. الكحة ولا صمة الخشم ..
والله يا حبيبات إن شاء الله يوم شكركن ما يجي ..إستفدنا موووت ..لأنو أصلا طلعنا قاعدين
سااااي ..
يا مريوم.. بوست زس العسل ..
سناء خالد أنت معلمة كبيرة وفنانة فنانة ..
ـــــــــــــــــــــــــــــــ
المساعدة بالصفقة برضو ما بطالة صاح ؟
| |
|
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: داليا حافظ)
|
من الوصفات البحبها اعملها للضيوف، او حتى للبيت هي الكريب باللحمة المفرومة أو مع التونة...(دي ما وصفة سريعة، بس ممكن تجهيزها قبل يوم)... وصفتين مختلفات... لكن خلونا نتكلم عن الكريب...طبعا وصفته بتشبه البانكيك.. انا بستخدم وصفة سهلة وما بتتنسي
كوب حليب
كوب دقيق
بيضة
وحبة ملح
الحلو في الوصفة دي انه لو عايزه ادبّل الكمية، ساهل جداً... نضرب البيضة براها وبعداك نضيف الحليب والدقيق.. ما بحتاج ضرب شديد.. بس تكون الخلطة متجانسة...في طوّه، نكب حبّة زيت زيتون.. والطوة مفروض تكون حارة نسبياً... وباستخدام كمشة صغيرة نملاها مرّه واحده.. مع تحريك الطوة عشان يتوزّع.. انا بستخدم طوّه صغيرة.. بعد ما ننتهي نجهّز الحشوة..
نجي للحشوة... في نوعين.. لحمة مفرومة، نحشي بيها.. ونلفها اسطوانية... ونرصّها في الصينية... انا برصّها بحيث الجزء البنّي يكون لي فوق عشان الشكل يطلع حلو... بعداك في طوة بكب ملعقة سمنة او زبدة.. ومعاها توم وخل وصلصة... وبعداك بكبها فوق الكريب.. وبغطيها، وادخلها الفرن عشرة دقايق بس.....
الحشوة التانية، تونة... بعمل نفس الشي (في طوة بكب ملعقة سمنة او زبدة.. ومعاها توم وخل وصلصة) ومعاه التونة عشان التونة تكون طريه ما ناشفة... وبحشي بيها، وبعمل نفس الصوص من فوق للبانكيك.. بتطلع نكهة جميلة جداً
شكلها بطلع زي كده...
اثناء ما بفتش لصورة ممكن تشبه الوصفة دي.. لقيت شكل عجبني شديد.. ممكن اعمله المرّه الجايه.. شكلها ظريف... طبعا الربطة واضح إنها بي الجزء الاخضر، من البصلة الخضراء
| |
|
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: سارة علي)
|
نبدأ في الوصفات الصحية..
بالوصفات الصحّية ما بعني انها بتنقص وزن بمجرد تناولها، لكن القيمة الغذائية فيها عالية.. سواءاً كانت low fat او low carb او low calories او high fiber... رغم انه اتباع غذاء متوازن وصحّي، وممارسة الرياضة بانتظام (الرياضة الرياضة الرياضة) كفيلين بإنهم ينزلوا الوزن (انصح نفسي اولا)
اي وصفة احنا بنعملها ممكن يتعمل منها نسخة صحّية... النكته طبعا انه ما بتطلع زي الاصلية.. انا عارفه سمارت صاحبتي رغم انها زولة رياضية، لكن ما بتدور تغيير الاكل اصله... بس حأكتب للفائدة.. واتمنى البقية يساعدوا
اول وصفة حأبداها هي وصفة سريعة لoatmeal cupcakes كيكات الشوفان الصغيرة... اهم ميزه السرعة، بالاضافة إلى انها مليانه fiber وسكرها قليل....
المقادير
كباية شوفان
كباية حليب، يكون قليل الدسم او خالي الدسم
كباية دقيق
بيضة واحده
ربع كباية سكّر
نص ملعقة ملح
ملعقة باكينج بودر
الطريقة
ندمج المقادير السائلة كلها مع الشوفان ونخليهم مع بعض لمدة ربع ساعة...
بعداك نضيف المقادير الجافة.. ونختها في صينية بتاعت
cupcakes دي الصينية
طبعا ما ننسى نعمل في الصينية الكبابي الورقة قبل ما نكب العجينة...
وندخلها الفرن.. لمدة نص ساعة.. ونختبرها بإننا ندخل سكين جواها، لو طلعت نظيفه معناها استوت...
انا بضيف للوصفة زبيب عشان ازيد القيمة الغذائية.. وبرضه عشان البيضه ما تعمل زفاره، بديها حبة قرفة..
| |
|
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: Hala Hassan)
|
بوست شهي و كاااامل الدسم يا مريومة...
قلت ما ممكن اجي داخلة يدي فاضية...جبت ليكم معاي وصفة ساااااهلة جدا و سريعة بالذات للسيدات العاملات الطوالي مستعجلات.
جيبي دجاج او لحمة او سمك....قطعيهو و رصيهو في صينية فرن...
جيبي الخلاط و ارمي فيهو بصلتين,ثوم,2 ملعقة صلصة,2 طماطم, 2 فلفل اخضر,2 ملعقة سمن,ملح و بهارات ( كاري لو دجاج , شمار أخضر لو سمك , كسبرة لو لحمة ).
اخلطي حتى يصير المزيج ناعماً...و كبيهو في وش صينية الفرن و غطيها بالفويل..
دخليها الفرن لمدة ساعة اقل حاجة...مسافة تحمي الاولاد و تستحمي و تصلي الضهر و العصر...
ما تنسي تعملي معاها رز بالخضار او مكرونة..
و ..بالهنا.
| |
|
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: nazar hussien)
|
نزار ازيك.... والله الnuggets بتاعت كنتاكي طعمها رهيب.. لكن كعععععععععععبه من كترت الزيت الفيها... الطريقة البعملها بيها زمان، قبل ما اقوم في ثورة الاكل الصحي
المقادير
كرعين جداد... كاملة (انا بفضل الكرعين) تغسلهم وتقطعهم النص من المفصل
بقسمات
دقيق
ملح وفلفل وبهارات (قرفة مطحونة وحبّة كزبرة وشمار)
بيض
ليمون
الطريقة
تخلط البيضة ومعاها الليمون والملح والبهارات .. وممكن تضيف ليها حبّة موية.. بعداك نغمّس فيها قطعة الدجاج، وندخلها الدقيق ونرجعها للبيض وبعداك البقسمات (نبهر البقسمات برضه)... ونختهم في صينية جاهزين للتحمير... بعد ما ننتهي من الدجاج كله.. القصة بتبقى في التحمير... الزيت يكون متوسط الحرارة... ما يكون بارد على الدجاج ما يشرب الزيت والتدبيله تفك.. وما يكون حار عشان ما ينضج من بره ومن جوه يكون نيء... النقطة التانية المهمة انه ما نكتر عدد القطع في الزيت.. لانها لما تكتر بتبرّد الزيت ... حسب حجم الطوة... برضه الزيت يكون كتير.. بحيث يغمر القطعة... محتاج متابعة عشان ما ينحرق.. وكل دقيقتين يتقلب عشان اللون يكون متساوي... بعداك نطلع الدجاج في ورق يمتص الزيت...
وصحتين وهناء
| |
|
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: mamkouna)
|
الأخت مريم والزوار تحية طيبه وسلآم
قلنا نساهم بحاجه بسيطه واقتصادية وتنفع للعزومات
بفتك دجاج وسلطه بيضاء وتحليه
أولا : البفتك تجيب صدور دجاج تنظفيها كويس بالخل والملح والماء
تقطعى الصدور لمكعبات صغيره تملحيها وترشيها بالفلفل والكزبره
الناشفه والشمار الناشف وتعصرى فيها ليمون . تضع بقسمات فى ورق زبده
ولا كيس نايلون نظيف وعلى البقسات تخطى قطعة الدجاج وتضعى عليها بقسمات وتضربيها
بمضرب الكستليته أو بزجاجة ببسى لحدى ماتبقى مفلطحه بس ماتكون ريفه
شديد . تسخنى زيت غزير فى طوه وتضربى بيض فى صحن صغير معه ملح وفلفل
أسود تضعى قطقة الدجاج فى البيض وتحمريها فى الزيت الحار لكن النار ماتكون حاره
شديد ومابارده .
ثانيا: السلطه البيضاء تسلقى البطاطس والجزر وتقشريهم وتختى معاهم اسويت كورن معلب sweet corn
بعد تصفيته من ماء التعليب وتقطع معاهم بصل أخضر وتضيفى عليهم سلت كريم salad cream
ثاثا : التحليه نجيب بف باسترى المربعه الواحده نقطعها الى اربعه أجزاء وندهنها بجبنة كيرى
او اى جبنة مثلثات وندخلها الفرن الى وان تستوى مابتخد زمن بس تحمر بسيط نطلعها ونسقيها
بالحليب المركز ونرشها بالفسدق المطحون أو فول سودانى مجروش .
صحتين وعافيه .
| |
|
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: آسيا)
|
آسيا ألف مرحب بيك... الحلو شكله رووووووووووعه..sweet and sour... ومبتكر.. وسريع .. الpuff pastry ميزتها انها سريع بتنضج... وممكن نعمل بيها اصناف حلوه او مالحة.. حأجبرها.. ممكن تكون ظريفة برضه لقعدة بتاعت شاي مغربية او قهوة...
البفتيك بتاعك ذكرني بفتيك بتعمله ماما.. بطلع رووووعه.. لكن سريع جدا جدا جداً....
بدل اللحمة او الدجاج... بتستخدم البيرجر الجاهز.. تجيب العلبة من السوبرماركت.. وتجهز البقسمات والبيض .. من غير دقيق..
البيرجر يكون حجمه رفيع... ومجمّد.. لانه لما يسيح، التحكم بيه بكون صعب... وما بحتاج يتملّح لانه البيرجر فيه بهارات وملح
نغلف البيرجر بالبقسمات والبيض بنفس طريقتك القلتيها للبفتيك العادي... الزيت يكون وسط... وما بتاخد زمن في التحمير لانها رفيعه... وبتطلع روعه.. وضيوفك بفتكروا انك تعببببببببتي فيها...
الف شكر يا آسيا ومنتظرين منّك زيادة
| |
|
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: آسيا)
|
سلامات الاخت مريم بت الحسين وضيوفها الكرام
وحقيقي البوست دا مفيد جدا مش للعزابة بس بفيد حتي الاسر في التغيير وبه افكار ممتازة
وغايتو ( بكري ابوبكر) ربنا ( يخدر ضراعه) لمانا كلنا من قبل الارض الاربعة في حوش واحد.....
بت الحسن معليش ..بس حبيت اسلم علي سناء خالد
ويا سناء لو انت سناء الدكتورة البيطرية من شمبات جامعة الخرطوم ..ازيك يا زولة وليك وحشة وسنييييييييين ما اتلاقينا وانحنا دفعة بس انا من ناس زراعة
عارفة الخلاني اقول دي سناء خالد الشمباتية شنو؟؟؟؟
اذكر سناء جميلة وراقية وانيقة ومرتبة في ملبسها ومكياجها وعطورها
وعندما رايت صور الوصفات المرفقة بتاعتك ايقنت انك هي
وحتي لو سناء خالد تانية برضو لها التحية....
ويا بت الحين عشان ما ازور بيتك ويدي فاضية جيت ومعاي وصفة ل Pasta with Tuna sauce
وهي ساهلة جدا في عملها وشهية جدا ولا تستفرق وقت
الكميات بصلةواحدة مقطعة صغار
واحد فلفل اخضر مقطع بنفس حجم البصل( يمكن استخدام فلفل احمر او اصفر او برتقالي ) بتدي الوصفة الوان جذابة
علبة تونة (solid tuna in water)
قطعتين طماطم متوسطة الحجم ومستوية( مقطعات قطع صغيرة ويمكن خلطها) او علبةtomato sauce
في حلة في نار متوسطة يوضع البصل مع ملعقتين زيت زيتون ويقلب لمدة 3-5 دقايق ثم يضاف الفلفل الاخضر والطماطم ( او الصوص) وتقلب لمدة قليلة ويتم اضافة التونة وقليل من الفلفل الاسود والملح والتوم وتترك علي النار لمدة لا تزيد عن 10 دقايق....بعد ان تطفي منها النار يمكن اضافة ملعقة عصير ليمون للخلطة....
أها انا في الversion بتاعي بضيف ليها نص ملعقة دكوة (صدقوني الدكوة بتديها طعم تاني)...وشوية شطة خضراء مقطعة صغار( بعد ما اطلع نصيب ربا بتي بالجنبة )
قبل ما تبدي في عمل الصوص
في حلة عميقة توضع كمية من الماء مع شوية ملح وملعقة زيت زيتون وبعد ان تغلي توضع بها المكرونة( the pasta) ودايما انا بستخدم المكرونة المصنوعة من الاقمح الاسمر ويا ريت لو حباتها كبيرة شوية(it can hold the sauce better than the small sizes)
تصفي المكرونة بعد ما تستوي من الموية
تغرفي المكرونة في الصحن ومن فوق عليها الصوص
واهم شئ تؤكل وهي سخنة يعني من النار كل من المكرونة والصوص سخنات ومعاها صحن سلطة بالجنبة
يا ريت لو جربتوها تدوني رايكم وبالهنا والشفا
ولي عودة اكيدة
| |
|
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: مريم بنت الحسين)
|
يا سلاااااام.. زميلتنا أمل كرّار.... اولا مرحب بيك في البورد.. نوّرتينا... وشرّفتينا بي الوصفة بتاعتك...
انا بعمل وصفة قريبة منها كده... بس من غير الدكوة.. المره الجايه اعملها، حأجرب اضيف ليها الدكوة، واجي اوريك رأيي
امل منتظرين زيادة
والله يا جماعة ما تتصوروا انا مشتاقة كيف اجازتي دي تنتهي، ويبدا الsemester الجديد وادخل في معمة المحاضرات.. عشان افتح بمزاج البوست ده واختار وصفة معيّنة اعملها.. من غير ما احتار...
| |
|
|
|
|
|
|
|
|
 Re: اكلات سريعة وخطيرة للعزومات.... مطبخ بنت الحسين (Re: مريم بنت الحسين)
|
يااااااااه...أمل كرار.. ازيك؟ و الله مشتاقين ...ما كنت محتاجة تذكريني بيكي..اسمك و صورتك ما بتنسو ياخ..
كيفك بالله يا أمل؟
أنا ياني ذااااتي سناء خالد الشمباتية..بلحمها و (عظمها)..و كلامها الكتير و لسة Hyperactive.. كما قال أحدهم ذات قطيعة شمباتية..
بالله يا ناس المنبر تاني تعملو لي حساب:)).. بقت عندي عزوة في المنبر دا....أمل دي لو نزلت انتخابات بتفوز بدون دعاية.. لأنها صاحبة الناس كلهم..و بتكسب شعبية واسعة بطبيعتها و بدون تعب..
بالجد فرحانة بشوفتك هنا يا أمل...
ياخي حتخلوني أشكر بكري مرتين في ظرف تلاتة يوم.. دي ما قايلاها بتحصل علي.. :))
_________________________________
هالة ...ازيك..
أنا مبسوطة انك رضيتي تصاحبيني.. و الله أنا خاطبة ودك لي زمن.. زولة صاحبتي بعزها و بثق في رايها.. شكرتك لي شديييد
بعدين مالها الكباري..عيبيها لي يا باش؟؟
حلو الفراولة ما فيهو ابداع شديد..أنا ما قلت جلي عشان ما زول يفتكرو جلي جاهز...
عبارة عن فراولة مجمدة..أضفت ليها سكر كتير لأنو الفراولة حامضة..و على نار هادية بدون موية..و ما خليتها تغلي كتير عشان ما أنتهي من الfruit meat و تبقى مربى!
بعدين دوبت فيها جيلاتين باودر..و على طبق التقديم و للتلاجة..بعد ما جمدت..زينتها بالفرش كريمFresh Cream ..ضربتو في البيت ما اشتريت الويبWhipped Cream الجاهز عشان يكون قوامه زي ما عايزاه سهل التشكيل..
معليش ما متذكرة المقادير لأنو الكلام دا من 2007 و تاني ما عملتها لأنو في أصناف أحيانا ما بكررها كتير. زي دي ما بأعملها في عزومة تكون فيها أطفال عشان فرشات الصالة واحدة off white و التانية بيج غامق..يعني لو قلبوها لي فيهم ..يبقى الله معاي..
الحاجة التانية انو لقيتها ما كويسة لبوفيه... لأنها لو قعدت كتير برة حتدوب زي ما بيدوب الجلي العادي..بالرغم من اني كنت مفترضة انو كونها معتمدة على عصير بسيط طلع من الفاكهة نفسها مع السكر..يبقى ممكن تحافظ على قوامها..أنا قصدت ما أخت معاها كيك أو بسكوت..لأنو كنت عاملة نوعين كيك إضافة للتارت فكنت عايزة دا يكون خفيف..
بعد ما شالو منو أول مرة و قعد ساعة برة..لاحظت انو بدأ يدوب شلت الباقي دخلتو التلاجة.. و ما رجعتو السفرة تاني لأني استشنيت شكلو بعد ما اتشال منو و بقى أقل من النص!
أفضل طريقة لتقديمو أفتكر تكون في كأسات صغيرة أو في ramkins
و لو في بوفيه ما تطلعي كل الكاسات..لكن شوية شوية و كل ما يخلص جيبي من التلاجة..
أنا بأحاول آخد الأفكار من المطاعم و البوفيهات.. فيما ندر أمشي مطعم و ما أحاول آخد منو فكرة... تقديم أو إسم طبق! و فيما ندر أكرر نفس طلب المرة الفاتت..أي نعم شلاقتي مرات بتضحك خالد فيني لما الطلبتو يطلع مش و لا بد ..لأنو هو بيحب يكون في السيف سايد ..و يطلب الضامنو.. or what highly recommended
لكن غالباً بأكتشف متع كانت حتفوتني لو ما جربت..:) and sometimes he ends up ordering what (I) had last time!
__________________
سمارت ياخي ما تكوني زعلت من تحريفي للشوربة..لأنو مريم قالت انت بتحبي اتباع الوصفة بدقة..(أنا و الله ما بأغير قبل أجرب الأصلية إلا لاستبدال مواد غير متوفرة أو غير حلال..لكن الشوربة دي بس الاستعجال و قلت أستفيد من الرز البايت..و بعد دا و الله كانت لذيذة, عايزة أعملا تاني بسرعة قبل الليمون بالم العندي ما يخلص )
أمبارح ضربت مشوار من هنا لكوستكو قريب ساعة..عشان ألقى الفلانك استيك من ضمن أشياء أخرى لازماني..ما لقيتو للأسف لكن جبت بدالو Chuck Eye Roast لأنو كان قطعة كبيرة..و الكروتونز و حأجرب قريب إن شاء الله و أقول ليك ..بس عليك الله لو عندك نصيحة بخصوص الوصفة قوليها لي قبل ما أجربها يعني لو نوع اللحمة ما بينفع ممكن أوفره لحدي ما ألقى المطلوب..
_________________
أتمنى تتسهل لي العودة تاني قريب إن شاء الله..
| |
|
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: smart_ana2001)
|
| Quote: بخت الاسوداية كلها فى الفرن ..لما تستوى بطلعها |
هل يمكن ميكروفته؟ وما الزمن اللازم لذلك؟ وإذا كانت الإجابة بلا، فأرجو تنويرنا عن احداثيّات الاستواء باقي نحنا الشغلة دي ما شغلتنا بَسْ الظروف جبرتنا...يعنى المدّة ودرجة الحرارة وما إليه.
أنا قاعد أشويهو فوق عيون البوتوجاز رغم أنفي...تلقيني موهّط أكان تلاتة أكان أربعة أسودايات وأقعد أتجارى بيناتهن دي قرّبت تحرق أقلبها، دي بزبزت، دي شنو داك ما بعرفو...ثمّ من العيون الكحيلة وإلى حيلة الحلّة الفيها موية أغمرهم عشان أقدر أطلّع القشرة بسهولة وكذا مرّة تخيب ومرّة تصيب وكلّو يهون ومن أجل عيون سلطة الأسود تُرغم أنوف.
مشكورة مقدّماً يا سمارت.
| |
|
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: smart_ana2001)
|
سنوية،،
شكرا ليكى و لصاحبتك الموثوق فيها،،
و صحبتك من حظى،،
القاكى وين؟؟؟
ح أجرب حلو الفراولة،
لكن زى ما قلتى الجلاتينة و الكريمة ما بستحملوا الحر،،،
نعاملوا معاملة الايسكريم،،،
مريومة،،
إضافة بسيطة للكنتاكى،،
نفس وصفتك دى،
بس بنسلق الفراخ فى الاول سلقة خفيفة،
عشان نتأكد من الإستواء،،
بالمناسبة،
فكرة البيرقر البلـ بقسماط بنعملها عادى جدا،،
لكن أنا شخصيا بفتكرها غشة غشة،
و ما بنقدمها للضيوف،،
as if they should know!!
أقنعتينى لكن، :-(
سمارت أنا،،
لو شويتى الاسود و عملتى الخلطة بالطحينة ببقى بابا غنوج رهيب جدا،،
بس طبعا بوسخ البوتاجاز،،،
فكرة الفرن حلوة ح أجربها،،،،
| |
|
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: Hala Hassan)
|
تعرفي يا سناء.. الحلو البي الفراولة اتخيلته يكون معاه كيك.. زي فكرته الtrifill كده... لكن كده شكلها ظريفه، وخفيفه.. تعرفي، انا حسي خطر لي انه ممكن الواحد يعمل فيها surprise جوه بتاعت كيري.. انا طبعا شي حلو ساااده كده ما بقدر اكله... كدي النجرّب الفكره كده، واجي اقول ليك كان نفعت ولا لأ
هاله.. والله الضيوف بجيبوا خبرها للبوفتيك بيرجر... والفكرة الاصلية طبعا انها تتعمل في وقت زنقة... لأنه البفتيك الراسه عديل دي عايز تحانيس كتيره.. ووقت طويل
سناء مرّه أخرى.. جايينا دكتور زميل الوالد أردني يتغدى معانا.. قمت حلفت و"غسمت" إلا نعمل ليهم غدا سوداني من الطراز الاول... تأثيريك فيني لزيز .. بعد ما كانت ماما مخططه للمنسف..قلت ليها المنسف ما بناباه (بحب جدا بالدجاج انا)... لكن لما يجونا، حنعمل ليهم سوداني....
بديكم التفاصيل بكره بعد يمشوا
| |
|
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: Sana Khalid)
|
والله قراصتك يا سناء، بس بانكيك بالصوص.. روووووووووووووووووعه... البشوفها يحلف يقول ما قرّاصة... لكن تعرفي، نسابتي المحس ما حيقتنعوا لي بيها... لكن لناس ما سودانيين، ممكن تكون طبق دولي.. ويخلي الناس كلها تركّز عليه...
انا حأجربها بكره، واجي اقول ليك....
ألف سلامة عليها خالتو يا سناء.. ربنا يديها العافية ويسلّمها..
| |
|
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: مريم بنت الحسين)
|
مطبخك روعه يامريومه بس اوصيك بعد ما تكملي الطبيخ وتنظفي المكان تولعي ليك بخور في البيت وتتلبسي انتي على سنجت عشرة( مش كدة بقولوها ) والعجب لو كنتي محننة و... وقلتي كدي لبستي الثوب الربط الما خمج لزوم تدخلي في جو النسونه للنهاية وتقعدي قدام التلفزيون بعدما تسلمي محمود لابوه وكباية نسكافي بالمك الكبير وانتي خالفه كراع في كراع ملكه والله ومافي حد بلحقك بالهناء يختي
| |
|
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: أبنوسة)
|
ابنوسه ازيك... وhappy birthday ياخ... عازماك عشاء بمناسبة العيد ده... واصلا انت الinspiration بتاع البوست... عشان كده انتاجاته كلها ليك....
انا من أنصار لبس الشبشب الكعب العالي في البيت... مع تسريحة كده لزيزه (ضنب حصان)... وداك يا البخور.. بالذات لو كنت محننه وراسمه... ده طبعا في ايام النسونه الدرجة اولى.. ايام الشغل ما تسألي ولا تعلّقي.. والحمدلله شغلي ده اجازاته كتيره... ههههههههه
مرحب بيك يا حبيبه... وشرفتي البوست
| |
|
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: مريم بنت الحسين)
|
سلام مريم بت الحسين
وسلام كل الاخوات
ويا سناء خالد بالجد ليك وحشه زمن طويل
وغايتو انا بدعي لبكري كل صلاة لمانا كلنا ..انت في شرق الدنيا وانا في غربها
ويا ممكونة شكرا ليك علي الوصفة الاخيرة طبقتها امس ...اصلو نويت عليها من الصباح ...
رصيت الchicken pieces في صينية الفرن بعد ما غسلتو بالخل والموية وخلطت كل الحاجات في الخلاط..فلفل اخضر وطماطم وبصلة وشوية عصير طماطم والبهارات وكبيتها في الصينية ودخلتها في التلاجة...
اختك جات نهاية اليوم مطمنة ودخلت الصينية في الفرن وبعد ساعة وشوية اكلنا احلي صينية فراخ مع الرز....
مع انو انا ما بحب الرز كتير لكن كان لذييييييييييذ مع الفراخ وسيف ابو ربا كان اكتر زول مبسوط من الاكلة( بيحب الرز شديد..)
وكمان شايلة باقيها for my lunch today
__________________________________________________________
ويا بت الحسين جيت المرة دي ومعاي وصفة لسلطة المكرونة والتفاح ..وهي ساااااااهلة والاطفال بالذات بحبوها
تسلقي مكرونة ويفضل ذات الاحجام الصغيرة (elbow shap) في موية وشوية ملح وملعقة زيت زيتون...تصفيها وتخليها تبرد خالص
تقطعي تفاحة او اتنين ويا ريت تفاح اصفر او اخضر وبالعدم المتوفر قطع صغيرة قريبة من حجم المكرونة..وما تنسي ماتقشري التفاح لون القشرة بدي السلطة لون وكمان القشرة مفيدة صحيا..واضيفي ليهم ربع بصلة بيضاء مقطع صغار ومغسول في موية دافية وملح( يقلل ريحة البصل شوية) ويمكن ما تضيفي البصل بالذات لو الاطفال ما بحبوهو
في وعاء مختلف اخلطي تلات ملاعق كبير مايونيز( قليل الدهون ياريت) مع معلقتين زبادي وشوية ملح وقليل جدا من التوم المهروس ناااعم واضيفي الخليط الاخير للمكرونة والتفاح والبصل وقلبيهم مع بعض ودخليهم التلاجة
يمكن تقديمهم ساعة الاكل لان المايونيز ما بتستحمل الجو الدافي
ودا طبق ينفع as a side dish مع Bar B Q بالذات ال chicken Bar B Q
___________________
اسمارت....
سلامات وطريقة الطبخ الصحي تعجبني وانا من انصارها حتي لو نضحي بقليل من الطعم
ومرات كتيرة بحس انو الاكل المطبوخ بالبخار طعمه احلي و خفيف علي المعدة....
عارف فكرة الاسود في الفرن دي ساااهلة وغير متعبة ..ومرات انا بسلقة مع شووية موية وحبة ملح
شكرا ليك ..وانا غايتو مقتنعة بيك مما قالوا بتعملي السجوك في البيت.....ذكرتني شيف امريكي من اصول ايطالية اسمو ماريو بتالي بعملو كل حاجاتو from the cratch بس جنو يطبخ بالزبدة وانا والزبدة ما متصالحين.... وبحب الوصفات الfigure friendly
وغايتو يا جماعة استحملوني شكلي حادق لي خيمة في البوست دا
وجاية تاني
| |
|
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: امل كرار ابراهيم فرح)
|
سلامات يا امل...
ماريو بتالى مره واحده?? يا اختى
Mario Batali is an Iron Chef
لكن مشكوره...
(مريم ح تزعل منى) ..لكن انا ما بحب رتشل راى...نهائى. كلامها بقى كتير و كتبها ما فيها صور. :-(
انا بتكيف جدا لBobby Flay و Alton Brown مع ان الاخير ما شف. لكن خطر جدا.
و لومشيتى فيقس لازم تمشى مطعم بوبى فلى. و ابعدى من مطعم Emeril Lagasse ...
________________________
اغلبكم حايمين الدنيا دى كلها...عندى فكرة صغيرة ..اى زول مشى مدينة و لقى فيها مطعم جميل يكتب اسم المطعم (و لو ممكن العنوان)..
ابدا انا?
الخرطوم...مشيت مطعم اسمه كادبورى فى شارع النيل بعد جامعة الخرطوم ...و انتو ماشين على برى. اكلت فيه لحم غزال و تمساح...حقيقى الاكل كان جميل جدا و طاااعم.
| |
|
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: smart_ana2001)
|
وب علي يا سمارت... لحم تمساح... انا لا يمكن أقدر اكله، لو عارفاه لحم تمساح....
انا الليلة مشغوووووووله مع موضوع الضيوف الجايين ده.. لكن بديكم سريع سريع اسم مطعم في الاردن (ما تدقوني)... لكن هو اصلا كافتيريا مقابل الجامعة الاردنية في عمّان، كنت ساكنه في عمارة جنبها بالضبط، اسمها "سيفين" ... ماseven .. جرّوا الياء الاولى... المطعم ده بعمل حاجه اسمها potato roasted مبالغة.. ما زي البنعرفها دي... دي براااااها.... بحكي ليكم بتفاصيلها بعدين.. والله قرّبت أخلي مازن اخوي يجيب لي معاه من الاردن لما وصل امس.....
عايزين عصائر مبتكره للضيوف الشيك يا سيدات....
وبجيكم
| |
|
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: مريم بنت الحسين)
|
خلاص بوظتوا لينا الرجيم اها اديكم الفاهيتا
ممكن تتعمل دجاج او لحم
بتقطع شرائح و يتبهر كوييس بملح و فلفل و ليمون و ثوم و شوية زيتو اي بهار انتي بتحبيه, سخني شويه زيت و لكن لو عندك الطوه البتشوي مافي داعي للزيت اها على نار عاليه و قلبي عشان ما يحرق و لمن الللحمه او الدجاج يستووا اضيفي فلفل اخضر او احمر او اصفر و بصل مقطع شرائح كبار و قلبي لغاية ما الخضار يستوي. جيبي خبز التورتيلا و لو مافي خبز لبناني و بالعدم عيش عادي لكن باللبناني و التورتيلا اجمل طبعا و سخنى الخبز و في كل خبزه شويه لحمه و معاها من الخضار و جنبها قدمي افوكادو مقطع شرائح او معمو قواكامولي و وصفة القواكامولي هي حبة افوكادو ناضجه قطعيها و اهرسيها لكن ما تنعميها شديد و معاها ربع بصله و طماطمايه صغيره قطعيهم و اضيفيهم للافوكادو المهروس و عصرة ليمونه ملح و سنة توه و احلى و اسرع اكله مكسيكيه. عشان كمان تختصري الزمن جيبي دجاج صدور مخليه او لحمه فيليه و قطعيها شرايح و بهريها و على الفريزر و برضه البصل و الفلفل و لمن تجى تطبخيهم طلعي كيس الدجاج او الللحمه و ما بتاخد اكثر من خمسه دقايق في النار.
حلو سهل و رفرشنق في الصيف
ايسكريم فراوله عبيه في كاسات حلوه و جيبي فراوله فرش ولو ما موجود ممكن مجمده قطعيها صغار و اضيفيها على الايسكريم و خليك كريمه فيها, حموضتها رهيبه و شكلها جميل و سريعه انا بحتفظ في الفريزر دايما بكيس فراوله مقطعه للضيوف البيجوا فجأء.
عصير سريع و لذيذ
خلي عندك كركدي مطعم و مركز في الفريزر ممكن تجمديه في قوالب الثلج او كور احجامها مناسبه و ممكن بعد تتجمد تعبيه في اكياس في الفريزر (انا مشكلتي باكلها دندرمه) و لمن يجوك ضيوف او لناس البيت سفن اب و معاه كم مكعب في كاس جميل و ما تقولي ليهم ده شنو, و كمان جميل جدا مع الجنجريل, في صبحيتي ماما و صاحبتها جمدوه بكميات تجاريه و ختوه في كور البنش و معاه جنجرايل و لهسه حديث المدينه كان.
نصيح نفعتمي جدا في بيتي
دايمها خلي عندك حلة تخديعه او دمعه في الفريزر بتنفك في الازمات و الزنقات و لو ما عندك نفس تطبخي نزليها تفك من الثلج و سخنيها و ارمي فيها اي خضار, باميه, بطاطس العندك, برضه خلي عندك صينيه خضار او بطاطس في الفريزر نيه و على الفرن طوالي, برضه المكرونه بالبشاميل بتتجمد حلوه جدا.
بجيكم بنصايح المطبخ
شكلي حاقدكم و احرف مسار البوست مريم ما تدقيني :)
| |
|
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: Dania Elmaki)
|
اها نسيت الفطاير
نص كوبايه مويه نص كبايه زيت و نص كبايه حليب ملعقه كبيره خميرة بيره و ملعقه كبيره سكر ملعقه صغيره ملح ثلاثه كبابي دقيق ممكن بدل نص الكوبايه مويه و نصلها لبن تعمليها كوبايه لبن من غير مويه بتطله هشه شديد و لينه
دوبي الخميره في ملعقتين مويه دافيه ما سخنه ولا بارده و معاها السكر اضيفي الحليب برضه يكون دافيء ما بارد و الزيت و بعد عشره دقايق اضيفي الدقيق و الملح و اعجني لمن تفك من الكوره لو لقيتي العجنه قويه او كترتي الدقيق اضيفي ملعقتين كبار زبادي خليها تتخمر (ما قلنا اكلات سريعه, السرعه انك تطلعيها من الفريزر).
بعد ما تتخمر افردي العجينه و قطعيها زي ما تحبي انا شخصيا بحب لفة الكرواساون او نص الدايره بقطعها دواير بكوبايه كبيره و حشوه في النص و اقفلها نص دايره او مثلث و الف الكرواساون و ما محتاجه اي حاجه فوق لا بيض لا غيره الا لو عاوزه انت و على الفرن, نجي لموضوع سريعه, ممكن تسويها نص استواء عشان بس توقفي مفعول الخميره و ترصيها في صينينه او صحن كل واحده بعيده من بعض و على الفريزر لغاية ما تتجمد بعد داك عبيها في اكياس بلاستيك او علب بلاستيك و بنجمدها اول في الصينيه عشان ما تتلصق في بعض لمن تكوني عاوزه تاكليها سخني الفرن و من الفريزر خليها بره شويهو عدل على الفرن و راقبيها اول ما تتحمر من فوق خلاص. الحشوات على كيفك, جبنه و نعناع بسيط, جبنه و زيتون, لحمه مفرومه, خضار جبنه و جزر و فلفل اخضر و دي رهيبه, لبنه و زيتون, او زعتر. برجع ثاني
| |
|
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: Dania Elmaki)
|
مريم ...ان شاء الله تكونى صورتى اكل العزومة....
و ان شاء الله كل الامور تكون تمام
دانية ...شكرا على وصفة الفهيتا....
و الله يا جكس البورد طلعتوا كلكم خطرات فى المطبخ..
_______________________________
دانية ...بالمناسبة الفهيتا ما اكلة مكسيكية.....لو مشيتى المكسيك و قلتى فهيتا ما فى زول ح يعرفها
الفهيته اكلة امريكية 100% او ما يقال عنه Tex-Mex cuisine و هو الاكل اللى ظهر فى تكساس لكن متاثر بالاكل المكسيكى
| |
|
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: Dania Elmaki)
|
يا مريم
نسيت اقول انى عملت صينية السمك و الكريب بالتونة . صينية السمك طلعت خرافية. و شكلها حتبقى من الحجات اللى ح اعملها طوااالى. يا اخي الشمار الاخضر (Dill) ده مبااالغة فى اى حاجه. و يا سناء احنا برضو عندنا غالى و ما متوفر ...بمشى المحل وبلاقى فرد علبة ذى الى انتى خاتا صورتها و بتكون بحوالى دولارين لتلاته علي حسب المحل.
فى الكريب شكلى كبيت فيه خل كتير. اما تدينى مقدار للخل و الصلصة او المره الجايه ح اعملها بصوص بتاع طماطم جاهز و ابرد اضانى.
____________________________
Dania
...Enjoy
| |
|
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: walid taha)
|
وجن ازيك.. والله يا عزيزة كان صعب نرفع البوست تاني بعد الحزن الغشانا كلنا.... شكرا ليك...
وليد طه... والله السيدات كلهم ما قصّروا، اكلات كلها سريعة وساهله.. شد حيلك واعمل كل جمعة واحده... بتلقى روحك غيّرته كتير..
Quote: نسيت اقول انى عملت صينية السمك و الكريب بالتونة . صينية السمك طلعت خرافية. و شكلها حتبقى من الحجات اللى ح اعملها طوااالى. يا اخي الشمار الاخضر (Dill) ده مبااالغة فى اى حاجه. و يا سناء احنا برضو عندنا غالى و ما متوفر ...بمشى المحل وبلاقى فرد علبة ذى الى انتى خاتا صورتها و بتكون بحوالى دولارين لتلاته علي حسب المحل.
فى الكريب شكلى كبيت فيه خل كتير. اما تدينى مقدار للخل و الصلصة او المره الجايه ح اعملها بصوص بتاع طماطم جاهز و ابرد اضانى. |
سمارت صاحبتي... الكريب بالتونه روووووحه الخل.. بس ما تكتري لانه اصلا نكهته قوية... يعني اعمل ملعقتين صلصة وملعقة خل وممكن تحليهم بشوية موية عشان تكون سائلة شوية...
بجيكم بكره بوصفة meatballs...
| |
|
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: مريم بنت الحسين)
|
من الtips الأخدتها من ماما موضوع التوم.. طبعا انا من النوم البفضّل استخدم... الهرّاسه دي .. طبعا لو لقيته مهروس جاهز ما بمانع، لكن بفضّل دي...
للناس الزي أمي بزهجوا من الهرّاسه، هي بتنضفه توم كتيييييييييييير... وبعداك بالمفرمه بتاعت اليد العاديه، بتفرمه، وتقسمه في foil صغار صغار وفي الفريزر...
اول حاجه ما بياخد زمن عشان يسيح.. يعني لما نحتاج نستخدمه، عشرة دقايق بكون ساح، وبحتفظ بطعمه ونكهته القوية، ولونه ما ببقى أخضر.... وما بياخد مساحه في الفريزر.... جارتي قبل كده نصحتني اعمله في برطمانية، ومعاه زيت زيتون ... لكن نكهته ما استمرت اكتر من يومين...
مواصلة لماما بتعمل الموضوع (اكتر من عصفور بحجر واحد، وهي شااااااااطره في الحاجه دي)... تقوم في نفس اليوم العندها فرم التوم ده، تجيب الكبكبي تبّله... ومعاه بصله مقطّعه.. اها تفرم التوم اول... وتزحه بعيد... وفي المفرمه زاتها تفرم الكبكبيه، ومعاه البصله... طبعا بواقي التوم قاعده في المفرمه.. كده تكون جهّزته توم وطعميه......
جايه بي وصفة الكفته (الناس اكلوا الكريب، طلعته لي بقطعه واحده بس!)
| |
|
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: مريم بنت الحسين)
|
الmeatballs او الكفته من الاكلات البحبها جداً، وبعملها كتير للضيوف.. زمان لما ما كنت شغاله، كنت بجيب اللحمه المفرومه واعمل الوصفه من الاول، لحدي ما اكتشفنا الكفته المصرية بتاعت أمريكانا... هي كفته معموله بالرز، والبقدونس، بهاراتها مختلفة شوية عن طريقتنا، لكن ظريفة شديد...
دي الصورة الوحيدة اللقيتها في الانترنت ليها
ما موجوده في الامارات، او انا ما اتوفقته ألقاها، لكن في السعودية موجوده، وهي زي ما قلت من شركة أمريكانا... بجيبها، وبحمّرها كلها في زيت خفيف.. ما غزير... (لو سايحه ممكن تقلبيها في الزيت في لحظتها...)... انا بشكّلها على شكل meatballs صغار.. عشان تتقلب كويس في الزيت.. ما تحتاج تحمير غزير ...اها انا بقلبها كميه، وبقسمها لطبخات، وبختها ف الفريزر.... لما اكون عايزه اطبخها... ما بتحتاج تسيح، لانه حجمها صغير... لو مستعجله ممكن تعمل قدحه ومعاها صلصة المكرونه الجاهزه (المارينارا)... ومويه... ونكب الكفته جواها، ونغطيها عشرة دقايق، الغدا مرق.. طبعا في المسافة دي بكون الرز جهزناه.... ولو ما مستعجلين شديد، نقطع بصلة متوسطه مربعات، ونقلبها في شوية زيت... ومعاها صلصة ومويه وبهارات ونخت معاها الكفته....
لما اسويها بجيب ليكم الصورة
| |
|
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: عفاف الصادق بابكر)
|
عفاف بابكر.. مرحب مرحب.. والله نورتينا.... وانا معجبه بأرائك ومتابعاك بعيوني ساي...
منتظرين منّك والله.. انا حسي جيت بمزاج، كل يوم افتح صفحة في البوست ده واختار لي وصفة أطبّقها.... كل يوم حاجه.. والرابح الاكبر ناس البيت ههههههههههههههههه......
ادينا وصفات جديدة، انا جنّي وجن حيرة الغداء دي، فيها ضربة راس بايخه خلاص....
| |
|
|
|
|
|
|
|
|
|
Re: اكلات سريعة وخطيرة للعزومات.... مطبخ بنت الحسين (Re: مريم بنت الحسين)
|
غايته مبااااااااااااااااااااااااااااااااااالغه
الما جرّبت وصفة ممكونة بتاعت الجداد مع الكاري ... فاتها تسعماية وتمانية من عمرها... ياخ دي اكله ظريفة بشكل... لزييييييييييييييييييييييييييييييييزه وممتعه.... وطاعمة.. والاهم من ده كله انها ما عايزه اي شغل تقريباً....
انا بس ما كان عندي فلفل اخضر، عملته بدله تلاته ملاعق بابريكا.... ومعاه رز... مباااااااااااااالغه... ومافي طريقة انظل ليه صور...
| |
|
|
|
|
|
|
|
|
 Re: اكلات سريعة وخطيرة للعزومات.... مطبخ بنت الحسين (Re: وليد عبد اللطيف)
|
مريوم الحبيبة
الكفتة السريعة بعملها كالآتي:
لحمة مفرومة + بيضة + بقسماط مطحون+ ملح+بصلة مفرومة+توم مفروم+فلفل أسود+بقدونس
مرات بدل البقسماط بخت رز مسلوق لكن لازم أخلط مكوناتها في الفود بروسيسور
وبصبعها وبحمرها في زيت غزير
وبعدين ممكن أصوصها:------
حبة زيت وملعقتين تلاتة صلصة حسب كمية اللحمة ولمن أقلبها شوية على الزيت أضيف الموية (ما كتير) وشوية فلفل أسود وتوم وملح لو لزم الأمر واخت الكفتة جوة الصلصة دي لغاية الكفتة تتشرب والموية تكمل وبتطلع روووعة...
بالهنا
لنا
| |
|
|
|
|
|
|
|
|
 Re: اكلات سريعة وخطيرة للعزومات.... مطبخ بنت الحسين (Re: lana mahdi)
|
دي حاجةمشهورة بيها أمي
المقادير
--------
بيض مسلوق سالم ومقشر
لحمة مفرومة
بصلة صغيرة مفرومة نااااعم
شوية توم مفروم نااااعم
ملح
فلفل اسود مسحون
بيض مضروب مع حبةملح وفلفل
حبةدقيق
بقسماط مطحون او عيش منشف ومدقوق
زيت للتحمير
الطريقة
--------
1-تفرم اللحمة المفرومة لتنعم زيادة
2-يضاف لها البصلة والتوم الناعم ويفرمو مع بعض
يضاف الملح والفلفل معاهم
نقسم اللحمةالمفرومة لي اجزاء وكل بيضة مسلوقة نغطيها كويس بي جزء
نشيل البيضة المغطاة باللحمة ونطمسها في الدقيق لغاية تتغطا كويس بالدقيق
نشيلها ونختها في البيض المخفوق المتبل بالملح والفلفل
نغطيها بالبقسماط المطحون
وتحمر في زيت غزير
لنا
| |
|
|
|
|
|
|
| |
سارة علي
smart_ana2001
مريم بنت الحسين
lana mahdi
Shayma
nazar hussien
Raja
Rawia
داليا حافظ
mamkouna
امل كرار ابراهيم فرح
وليد عبد اللطيف
أبنوسة
Dania Elmaki
وجن
عفاف الصادق بابكر
Akram Omara
فيس بوك
تويتر
انستقرام
يوتيوب
بنتيريست