|
|
 يوميات خلّوصة..
|
يوميات..ها
(خلوصة بت ظريفة وبت ناس وطيبة..لكن عندها مشكلة واحدة..مشكلة لكن ماا مشكلة!!) ..
الاهداء لزميلتي وصديقتي "ميادة" واهلي في "الهوم" و"ليكم"..
1
أخيراً
لن ييأس حسين من محاولاته المستميتة بالرغم من احراجي له أكثر من مرة ، ها هو الآن يحاول التحدث الي ويزعم أن وجوده في "السوبر ماركت" الآن مجرد مصادفة ، سيلقي التحية وسيحاول أن (يتظارف)..أهاا... مراوغة مكشوفة..ركب سيارته مسرعاً وكأنه لم يرني ليعود في اليوم التالي ويمثل علي (تمثيلية) أخرى لأقع في حباله ، حسين الطويل الوسيم ذو الشعر الاسود الناعم والعيون البنية وصوته القوي الساحر وابتسامته التي تنقط عسل لا يستطيع أن يفوز بحبي رغم محاولاته المستميتة لن يستطيع أن يفوز بقلبي "قايلني داقسة أنا!!" "عامل لي ريحتو السمحة دي"
حسين
"عامل فيها شافني وزاغ عشان المرة الجاية اسأله ويفتح موضوع".
****
"يا بت انتي كنتي وين؟"
"أحييييي" عدنا للبيت وصراخ أمي وهاهي الآن تحاول أن تطمئن أن مزاجي صار"معكراً" تماماً كما يحلو لها.
-"دايرة شنو يا ماما؟!"
-"يا بت انتي مش كنتي بتقولي لي يـُمّـا؟ ماما دي من متين؟ " "كنتي وين؟"
-"في الشغل ياماما حاكون وين يعني؟"
-"في شغل لحدي بالليل؟" "يابتي انتي عارفة ابوك كان عرف تأخيرك دا بسوي شنو ، الحمدلله مافيش كان انفضحنا فضيحة " "نحن ناس مستورين وعمر الناس ما اتكلمت فينا وهسي انا ..... "
وقفت مستمعة لباقي المحاضرة وعقلي يسرح في اشياء أخرى ، هل سيأتي حسين جارنا لحفل زواج "سهام" بنت خالة "عواطف" يوم الخميس! أكيد سيأتي ومعه وائل ابن خالته الظريف...
-"ودا شنو الفي يدك دا؟"
-"كريمات يا ماما من السوبر ماركت وشوية خلطات من عمار علي"
-"سجم خشمي ، سجم خشمي..عمار علي دا منو يا بت؟"
-"الدكتور بتاع الصيدلية الفي الناصية دي يا ماما ، راجل الكريهة السنيحة بت سيد العمارة الفيها الصيدلية"
-"يابت انتي لسة في عوارتك دي؟ البوريك زي (عمار) دا شنو؟ وكمان حافظة اسم ابوهو يا اخلاص؟!!"
-"اولاً اسمي "خلوصة" يا ماما بعدين عمار دا ظريف وما بيني وبينو اي حاجة اصلاً هو اسمو عمار علي التاج اهلو من شمبات وكان قرا في مصر مع ...."
-"يابت انتي مجنونة؟ ، الله يصبرني وما اموت لي برزمة قلبية ، انتي عشان عوارتك دي قاعدة لسة..اخواتك الصغار كلهم عرسو واولادهم دخلو المدارس وانتي.......
كو كو كو-قومي افتحي الباب دا قامت قيامتك
"السلام عليكم"
-حسين؟؟؟؟؟؟؟
-لو سمحتي أنا جاركم الجديد وكنت حابب...
-اسمع هنا نحن هسي نسوان برانا والكلام دا ما بنفع و...
-لا لا لا ياخي انا بس كنت يعني...
-لو داير تتقدم لي عديل تجي لابوي وبعدين نحن اسرة محافظة...
-ياخي افهميني يا اخت انا بس كنت داير سيد البيت عشان الماسورة الطرشقت في...
كررررو
"ايوة رجال ما يجو الا بالعين الحمرة ، قايلني داقسة أنا"
أخييرررررراً
(عدل بواسطة محمد يوسف الزين on 07-13-2009, 10:42 AM)
|
|
 
|
|
|
|
|
|
|
|
Re: يوميات خلّوصة.. (Re: محمد يوسف الزين)
|
2
لازم اعرف الحاصل
"في حاجة بين السكرتيرة الجديدة والمدير"
لم استطع ان انتزع من رأسي هذه الفكرة.."السكرتيرة دي ماااا براها" ، لماذا في كل مرة يطلبها المدير تنظر الي هذه النظرة..وكأنها عرفت أني قرأتها وعرفت سرها ، سأحاول أن استكنه خفاياها وو
"هو ما وجيه شديد ، لكن طيب وقلبو ابيض ، طوااالي مبتسم ، لكن في حاجة ظاهرة في الابتسامة دي ، شكلو حزين في حياتو ، اكيد اكيد مرتو ما مريحاهو ، حتكون بت عمو عرسوها ليهو بدون رضاهو ، ولا واحدة ختّـافة كدة كففف ولقى روحو معرسها وبعداك ندم ، ياخ بقول يا إخلاص دي بصورة لذيذة خلاص ، اكيد داير فرصة عشان احكي لي مشاكلو ، انا طبعاً يستحيل يستحيل افكر فيهو ، دا زول معرس وبي اولادو ، وبعدين مديري يعني ما لذيذة كدة وامبيسبوول عديل كدة يعني ، لكن المشكلة انو معجب بي ، يعني بكورك لبنات المكتب كلهم في وشهم وانا الوحيدة البقول لي يااا إخلاص ، ياخي اسمي دا عندو رهييييب رهابة! ومبالغة عديييل كدة ، تكون ياربي نيتو كعبة؟ ، سجمي..لا لا لا لا ما اظن ، الزول دا نيتو طيبة وعيونو حزينة وشكلو بس داير ليهو زول يحكي ليهو ،
لكن الرجال ديل مستهبلين انا عارفاهم ، بالذات البعانو في حياتهم الخاصة ،
لكن ياخ هو بدا يعجب بي ، المرة الفاتت لمن لمن..ااااااااي متذكرة ساعة اتظارف ، والله هو طوالي ظريف ، ياربي هو مالاقي فرصة؟ ، انا غايتو ما احرجو اذا فتح معاي موضوع ، لازم اقيف معاهو في محنتو ، الناس للناس وما حاحرجو زي ما بحرج الرجال الدايرين معاي موضوع مننننن سيد الدكان لحدت سواق الترحيل ، ياربي حيسألني متين؟!
لكن السكرتيرة الجديدة دي مااا طبيعية ، عندها حركات ما عاجباني ،
هسي في داعي كللل ورقة تطلعها تمشي بيها للمدير عشان يمضيها؟؟؟؟؟
(عدل بواسطة محمد يوسف الزين on 07-13-2009, 10:51 AM)
| |
|
|
|
|
|
|
|
|
 Re: يوميات خلّوصة.. (Re: محمد يوسف الزين)
|
انت خلوصه دي ما نخطب ليها وارغو عشان تجيها صدمه قلبيه ونرتاح منها 
قالوا مي عزالدين أُغمي عليها في كوره مصر ورواندا بعد اضاعه خطيبها زيدان لفرصه مضمونه في خت سته
| |
|
|
|
|
|
|
|
|
Re: يوميات خلّوصة.. (Re: محمد يوسف الزين)
|
3
ثم..
عبدالرحيم..
وووووب علي يا عبدالرحيم..
عبدالرحيم!!
ووووب وووووب
سويت ليك شنو أنا يا عبدالرحيم؟
استغفرتك يا ربي
ووب ووب
(يا اخلاص)!!!
-أيوة يا ماما..ان شاءالله خير؟
- ما لبستي مالك؟ العقد الساعة 5 وهسي الساعة 5 إلللا شوية.
- ما ماشة
- شنو؟ الناس ديل بزعلو - قومي البسي يا بت
- قلت ليك ما ماشة يا ماما.. معنديش نفص
- على كيفك.
- انتي يا ماما - عريس منوية الجاي من امريكا دا مش ياهو عبدالرحيم ود خالتو "حياة" جارتنا زمان؟ الكنا بنلعب معاهم ديلك؟
- يا بت انتي ما نصيحة؟! دا محمد ودخالتهم ، ود اخت "حياة" الساقوهم امريكا في الاول. يا حليلها "حياة" والله ، ايام ما بتتعوض...
ومنوية قالو لقطتو براها ، ناس حياة زاتهم اتفاجأوا ، المهم بعدين قال ليك...
- محمد دا كان بجيهم في البيت لمن كانو جيرانا؟
- اظنو.. يمكن كان بجي مع أمو.
.
.
.
.
.
"ووب علي يا محمد ووب"
"سويت ليك شنو يا محمد انا؟ ، خلاص نسيت عشرتنا ولعبنا زمان"!
****
- شاي اللبن يا حاج
- شكراً
- عارف يا حاج..اخلاص دي حالتها "ازتفلحت"
- اسسستفففحلتتت ، خلي الفلسفة دايرة تقولي شنو؟
- المهم..البت دي حالتها بقت صعبة ولازم نشوف ليها عريس.
- يامرة الحكاية دي قسمة ونصيب. يعني اشيلها في ضهري دا والف بيها الشارع؟
- ومالو؟ دا زاتو من الدين. ياخي شوف ليها واحد ان شاءالله من اصحابك المعاك في السوق ديل.
انا خايفاها تفوت رسمي وشعبي لو خليناها بحالتها دي.
انت مش عبدالنبي بتاع الخضار مش كان لمح ليك انو دايرها لود اخوهو؟
- عبدالنبي دا ما تجيبي لي سيرتو ، دا زول بتاع سكر وتلقى ود اخوهو ولا ود اختو دا طينة زيو ، دا نسب دا هسي؟
- والله يا ابراهيم القرضمة ما سمحة ، بعدين انت مش زمانك كنت...
- بقوم بأأكلك البنبر دا هسي يا ولية ، الاندايات دي زمان غير اب صلعة أخوك دا ورانا ليها منو؟
- استغفرتك يا مالك روحي ، ما تجيب سيرة اخوي.
- خلاص انتهينا
- يا حليلك يا اخلاص والله البت دي واجعاني جنس وجعة..
- قلت ليك الحكاية دي قسمة ونصيب. اخواتها التلاتة عرسو وفيهم الاشنا منها.
- بررري والله ، اخلاص بتي ما شينة ، اخلاص سمحة وظريفة واهلنا كلهم بشكروها وناس شغلها كمان.
- طيب مالها قاعدة لي هسي زي طوب الانجليز؟!
طيب قشقشي دميعاتك ديل وقومي شوفي لي ابريقي خليني اصلي العشا. هي زاتها اخلاص وينها؟
يا اخلاص
يا اخلاص
كدي يا حليمة قومي شوفيها..
يا ابرااااااهيم الحقني ، اخلاص طفشت من البيت
| |
|
|
|
|
|
|
|
|
 Re: يوميات خلّوصة.. (Re: عزاز شامي)
|
عزاز
ياخي كان كدا انتي حتتعبي شديد
يوميات خلوصة دي طويلة طول ما عادي
بريفزلي إن "يوميات خلوصة"
(خلوصة بت ظريفة وبت ناس وطيبة..لكن عندها مشكلة واحدة..مشكلة لكن ماا مشكلة!!) ..
4
حاجة حليمة بتبالغي..
تحكيها بت الجيران (بطة)..
- يا أمي في واحد برة سايق ليهو "أطوز" ومتريح قال لي نادي لي الحاجة.
- مالو قال داير شنو؟
- قال داير "يتعرف علينا"
قفزت حاجة حليمة من العنقريب حتى "كورك" العنقريب وأوشك على الطيران كرد فعل لفقدانه نصف الطن من اللحم المتمثل في حاجة حليمة بصورة مفاجأة. وهتفت:
- قال شنو يا ولد؟ داير يتعرف علينا؟ اتاريك طلعطي مية من تحت جبن يا اخلاس.
"مية من تحت تبن يا خالتو قصدك"
- اخلاس دي طلعت ما قاعدة في الواطة ، ناوليني يا "بطوية" توبي دا.
"مافي داعي تلغوسي اسمي دا كدا عليك الله ، المهم.."
- هاك التوب يا حجة.
- سمح..اجري يا ولد دخلو الصالون وجيب موية.
"مرحب مرحب ، شرفت والله يا ولدي ، اتفضل"
- اهلاً يا حجة. حاج ابراهيم كلمكم اننا حنمر عليكم الليلة مش كدا؟
"حاج ابراهيم انت زاتك متورنطط معاها؟؟؟!"
- لا ما كلمنا ، اتفضل اتفضل.
- طيب دقيقة نطلع الورق ونبدا الاسئلة.
- ما محتاجة ورق يا ولدي ، نخش في الموضوع طوالي بلا مواخدة.
- طيب ممكن اعرف الاسرة الكريمة بالاسامي لو سمحتي.
انتفخت أوداج حاجة حليمة وبدأ رشاش الكلام..
- نحن اسرة معروووووفة ، أولاد العُمد وأحفاد الملوك ، انا جدي الطاهر ود ال..
- لا يا حجة ما فهمتيني..ابدي لي بحاج ابراهيم والاولاد
- سمح..حاج ابراهيم ود المرضي ود خشم التمساح
- تمساح؟!! طيب انتي والأولاد.
- انا حليمة بت صالح ود الطيب ود النفوك ود ابراهيم ود صالح ود الجكو..
- خلاص كفاية كفاية..اولادكم
- عندنا ما شاءالله ماشااااءالله خمسة..الكبيرة احلام معررررسة احمد الله وقاعدة مع راجلها في كسلا وبعداك سناء ودي في ام بدة وعندنا أم الحسن مسمنها عليي أم الحاج ساكنة جمبنا هنا في الشارع الـ..
- يا حجة عدي لي القاعدين معاكم بس.
- أممممم فهمممممتكك ..عندنا آخر القنقود الفتح ليك الباب دا "عبودي" وعندنا اخلاااااس. اتفضل يا ولدي اشرب الموية..اها انت من وين؟ وابوك منو؟ و و و ..بالمناسبة انت بتكتب في شنو؟
- طيب يا حجة..كدا انا انتهيت..لمن يجي حاج ابراهيم قولي ليهو ناس التأمين الصحي جو خلاص ومافي داعي يجي يقدم شكوى في المكتب تاني.
- مافهمتك يا ولدي ، لكن ما مشكلة.
- بالمناسبة يا حجة..الجابت لينا البارد دي بتبقى ليكم شنو؟
"سجمي وسجم خشمي وماالو قايلها براحة كدا؟ ومن قبيل عامل فيها مهنذب!"
- دي يا ولدي بت الجيران واسمها "السُّررة" وبنلقببتها ونقول ليها "بطة" أقصد "قرنتية" وهي معرسة قبل كدة ومطلقة وعندها تلااتة اقصد سبعة شُفع وما تشوفها معصعصة كدا وشكلها زي الفي الثانوي العالي ، دي عمرها خمسة واربعين سنة ، مع السلامة ، الباب بيجاي. قال التطمين الصحوي قال.
"استغفرتك يا مالك ياروحي"
بلا مواخدة يعني...
نواصل..
| |
|
|
|
|
|
|
|
|
|
Re: يوميات خلّوصة.. (Re: محمد يوسف الزين)
|
-5-
مشكلة نورمال
تحكيها (تيسير) صاحبة (لولو) بت خالة اخلاص..
- يا خلوصة يا اختي الزول دا زول ظريييف ومشهور بأنو ختييير ، ثم تانياً ما حنقول لي زول ، الحاجة دي بيني وبينك ومافي زول بعرف بيها ، ما حتندمي يا خلوصة اسمعي كلامي.
- أوكي ، ديل ، ديفنتلي ، زد واي ، انتي عارفة يا "لولو" لو سمعت ساكت انو في زول عرف لا انتي صاحبتي ولا بت خالتي ولا بعرفك زاتو.
تفو تفو نجيييط طاخ طاخ ، اها أنا حلفت ليك
- خلاس ، وصفي لي وانا بمشي ليهو "ستريت أهيد" براي ما تمشي معاي.
- كويس ، شارع الخمسين بيغادي لعمارة السبعين جمب بوتيك ضوين.
- أوووووكي.
***
- أهلاً أهلاً ، مرحب مرحب اتفضلي. اسمك اخلاس مش كدة؟
- شوف يا دكتور ما معناتا أنا مجنونة عشان كدة جيت عيادة نفسانية.
- منو القال كدا؟ ياخي دا فهم مغلوط ، ودا كان زمان هسي الطبيب النفساني زيو وزي دكتور الاسنان والعيون ، انا دايرك تكوني ريلاكس وفكري انك بتزوري في واحد صديق وانسي حكاية انو دي عيادة وكدا ، أمم اتكلمي..
- اقول شنو؟
- ما قلنا انتي هسي مع صديق ، ما ضروري تقولي لي مشكلتك طوالي ، انسيها خالص ، اتكلمي بس.
- والفايدة شنو؟ يعني معليش يا دكتور واكسيوزمي يعني انا دفعت كشف برة عشان ابراك؟
- ها ها انجخ ها ، الظاهر عليك روحك مرحة شديد ، انا قصدي عرفيني علي نفسك ، احكي لي عن اخلاص. اتفضلي هنا وأنا حاطفي اللمبة المزعجة الفي وشنا دي وخليك ريلاااااكس وابدي.
- أمممم؟! سمح خلي الباب دا فاتح.
- ها ها انجخ ها ، راحتك ، يللا ابدي والزمن كلو حقك.
"الزول دا شكلو داير يبرمج بي ، التقول في زول بعديي!! ، انا الوحيدة الدقست وجات هنا ، انا خسرانة شنو"
- اسمي اخلاص ابراهيم ، اقدس الحياة ..... اقصد يعني شغالة في شركة قنقليس العالمية ، بنصدر التبلدي وكدا ، عمري تلاتة وعشرين سنة ، ساكنة الدندناوية شرق.
- جميل جميل ، في زول مزعلك؟ مضايقة من حاجة؟ كرهانة شنو؟ حاسة بملل؟
- انا انا؟ انا! انا؟ ......
- اتفضلي الموية دي ، اخدي نفس ، واعتبريني غير موجود ، اصلاً انتي جاية هنا عشان تحكي لي زول وظيفتو يكتم الاسرار ، انتي ناسية انو دا اكل عيشنا ، ها ها انجخ ها ، ما تخافي احكي بس.
طيب
طيب..
- طيب ، مشكلتي يا دكتور انو انا شكلي حلو ، وظريفة والناس كلهم بحبوني ، ومشكلتي انو اي زول قصدي رجل يعني بتعرف علي بفكر انو يرتبط بي ، كل يوم واحد بتقدم وكل يوم واحد يشاغل ، انا كرهت الحاجات دي يا دكتور ....،
ذنبي شنو يعني؟؟؟..
انا داير اعيش حياة نورمال ، انا ما دايرة اتزوج الا لمن اقتنع بزول ويحصل ماطش بيناتنا ، وناس البيت مافاهمني و و و نيييييييييييف اهئ اهئ
- ولا يهمك يا اخلاص ، انا فاهمك ، مشكلتك عادية ، ولا اقول ليك ولا مشكلة ولا حاجة ، بس اعملي واعملي واعملي وبعدين..
اعملي واعملي واعملي واذا الناس عملوك..تقومي تعملي وتعملي وتعملي ،
انا زاتي مشكلتي كانت زيك ، يعني انا بحب الطب النفسي وناس بيتنا كانو دايرني اشتغل حاجة تانية تجيب قروش ، يعني اعمل شنو انا يعني؟!..ابيع بايركس يعني؟
"طراخ"
| |
|
|
|
|
|
|
|
|
|
Re: يوميات خلّوصة.. (Re: حامد محمد حامد)
|
الاصدقاء .. عزاز وحامد شكراً على الـ up والـ up shara
دي يومية لم أكتبها ولكن كتبها واحد من زملائنا هنا في الأون لاين..تكملة.. (الاسم بعدين)
وريقة من دفتر يوميات (خلوصة)
بعد أن إنفض السامر من حولها و لم يلازمها الا شبيهتها (التاية) .. و هما جالستان تحلمان و تحتسيان كوب من القهوة بعد أن صارت الفناجين لا تؤثر
قفزت التاية من بنبرها و هي تهلل و تكاد تنهي ما تبقي لها من لحظات في هذه الفانية و هي تقول وجدتها وجدتها .. و تغطي ما إنكشف مما تبقي من عوراتها
تعالي معاي يا خلوصة يا عسل انتي ..
مشن الكمبيوتر و قالت ليها نعمل ليك اي ميل جديد لنج باسم رومانسي
إختاري واحد عليكـ الله يا خلوصة
ظهرت لغاليغ خلوصة من الفرح و هي تصرخ : جاياك يا اب شرا
ضغطت التاية علي المفاتيح لتكمل تفاصيل التسجيل :[email protected]
و بسرعة فتحت مسنجر جديد و بدأت تعمل ساين إن و خلوصة تحلم بعالم وردي
و تكاد مصارينها تخرج عبر لسانها الملتصق بذقنها و ريالتها السايلة علي ركبتيها
و بدأت التاية في سرد ما أنزل الله به عليها من خبرات في المسنجر
و خلوصة ترصرص المعلومات في عنقرتها كما ترصرص إسكيرتاتها في ضلفة دولاب أمها ..
تناولت خلوصة ورقة بيضاء و بدأت تكتب عنوانها الجديد عليها في طريقة تسلسلية مرتبة و بدأت في تقطيعها علي شكل (بيزنس كارد) و حملت شنطتها و توجهت الي بيتهم ..
بدأت رحلتها من محطة المواصلات كلما شافت عمة و لا بنطلون حايم تديو ورقة مرورا بالحافلة و الامجاد ثم بتاع الركشة و إنتهاء بالكارو الموصل الاخير لما قبل حلتهم .
وهي تحلم بغد سعيد و لستة كاربة في مسنجرها الجديد و العريس السفسيري (الاسفيري) كما تناديه صديقتها التاية ..
دخلت البيت و الغبار يكسو ساقيها ذوات الشكل المقوس و هي تدندن بإغنيتها المفضلة
ابوي انا راضية بيهو ابوي وافق عليهو ..
| |
|
|
|
|
|
|
|
|
|
Re: يوميات خلّوصة.. (Re: عزاز شامي)
|
ود الصايم
عزاز
شكراً يا فرد على التشجيع
المرّة الجاية بتزبط!
ندت من "لولو" بنت خالة اخلاص ابراهيم حركة عصبية وهي تتكلم مع اخلاص في غرفة البنات في منزل خالة اخلاص ابراهيم..
- يا خلوصة قلت ليك الزول دا عندو نفسيات.
اندفعت اخلاص ترد على بنت خالتها قائلة..
- ياخي انا سمعتو باضاني دي بسأل في أبوك وبقول ليهو "الزولة دي مخطوبة؟" ، انا عارفة الفكي بتاع "التاية" دا زول بركة ، ياخي يومين بس؟!
- يا اخلاص يا بت خالتي الزول دا مشهور قالو ، كل يوم داير عروس جديدة وما بعرس ، عندو نفسيات..اصلاً قالو كان بحب ليهو واحدة وماتت وبعد موتها قالو....
- دايراهو دايراهو ، لولو!!
انتي ما دايراني اعرس؟
(حُضُنـُت حُضُنـُت)
- ما تقولي كدا يا خلوصة ، بالمناسبة انتي مش قلبتي انترنت؟ سويتي شنو؟
- والله يا لولو....
"يا لولو داير اخلاص دي في كلمتين"
حاضر يا أبوي..قومي سريع..
(كُربك كُربك)
- اخلاس..انتي طبعاً زي بتي ، انتي زي لولو وسمر وااااحد يعلم الله
- ايوة يا عمو..
في زول قال دايرك.
(جضوم اخلاص ولعت احمر وبعدين اخضر وبعدين اصفر وتاني قلبت احمر ، وعيونها بقت في نص راسها)
- أيوة يا عمو أها؟!!!
- انا بس داير احذرك ، الزول دا شغال معاي اكتر من خمسة سنة وبعرفو كويس.
- مالو؟ (الجضوم اتقلبت ازرق)
- يعني..ماااااا نصيح كدا ، زييييي العندو نفسيات
- "................"
المهم احكي ليك القصة زي ما سمعتها من الناس قالو بالليل بقعد يكورك ويقول اسم خطيبتو الماتت ، وكل يوم هو داير بت جديدة وبعد ساعتين تلاتة تلقاهو نسى الاولى وداير ليهو واحدة تانية.. يعني زول ما نصيح عديل..وانا والله لو ما بخاف ربنا ما كان جيت استشرتك..المسؤلية برضو ، واحسن نشوف الموضوع دا انا وانتي قبل ما يصل لحاج ابراهيم.
- يا حراااااام اهئ اهئ.
- هو شنو الحرام؟؟؟؟
- خطيبتو ماتت؟؟!!!
- طيب رايك شنو؟ خليك من مأساتو
- يعني يا عمو يعني
- أممم؟!
اخلاس!!!
يا بتي الزول دا ما نصيح. وانا جيت هنا ما عشان اخد رايك جيت احذرك بس اذا لاقاك في الشارع ولا كدا. لانو ممكن عادي بعديها يلاقي واحدة تانية ويقول ليها دايرك!
- يا عمو يعني يعني يعني.وانا زاتي يعني يعني يعني ، وبعدين هو زاتو قال ليك يعني يعني وانا زاتي بكون عجبتو يعني يعني وبعدين الناس ديلك يعني يعني ، وبعدين شغال في اليعني يعني وانا امس يعني يعني ، ونشوف الخطوبة يعني واحتمال يعني بعدين يعني وتجربة يعني وكدا يعني ،
واضرب لأبوي هسي دي
- جداً (حاجة غريبة سبحان الله ، لله في خلقه شؤن..شيل يا حاج ابراهيم المصيبة دي براك أنا برة منها)
***
بعد ثلاثة أيام و4 ساعات شهد حوش عم ابراهيم تجمعاً كبيراً من "بنات الحلة" وبين الساعة الخامسة والسادسة كانت التاية تعرف شلة الانترنت الذين صادقوا خلوصة على حاجة حليمة وبدت حاجة حليمة وهي ترص في الاطباق ولا تفهم عن ماذا تتحدث التاية ولكن تحاول قدر الامكان فك الالغاز التي يرد فيها لفظة "انترنت".
في نفس الوقت كانت اخلاص في الغرفة ولولو برفقتها "تطول بالها" اكثر من اللازم وهي تتحمل اخلاص وهي تغير في الملابس التي انفقت فيها سلفية كبيرة جداً والكوافير وهي تتذمر -لولو- من عدم دفع الخطيب لهذه التكاليف واخلاص نفسها لا تتحدث الا عنه
"بحب القشطة بالمربى وما بحب الشاي وهو سخن وجنو وجن القميص يطبقوهو مرتين في المكوة و...."
- انتي متين عرفتي يا اخلاص الحاجات دي كلها؟!..كلها يومين!!.
- كأني بعرفو لي سنييين يا لولو يا حبيبتي انا ، نحن لييل ونهار بنتونس وامبارح دي فاطرين ومتغديين ومتعشيين سوا وبعداك تلفون لحدت الصباح.
- اخلاص يادوب دي خطوبتك دايراك تتقلي قدام أهلو وبعدين.............
- اعمل ظلال عيون بمبي مع الطرحة ولا ازرق مع الفستان؟ وبعدين الكم دا.......
ولا للا للا لللللاااااي
أكيد الزغروتة دي خالتو فاطمة جات خاشة
وبعد ساعتين من انتظار الضيوف ..........
****
كل الاحداث التالية تحكيها التاية صديقة خلوصة...
*خطيب اخلاص خش بيت الجيران وخطب "بطة" ، في ناس قالو لقى بطة شايلة "الكعك" وداخلة بيت ناس اخلاص ، وفي ناس قالو دق بابهم بالغلط قايلو بيت ناس اخلاص ، وفي ناس قالو .......... المهم العقد بعد اسبوعين وقالو بطة من هسي جابت هدومو وحاجاتو وقعدتو في الصالون بتاعم (صالون ناس بطة طبعاً).
* اخلاص في مستشفى ساهرون هسي.
* حاجة حليمة سافرت البلد قالو مشت للفكي ابو ليمونة.
* الكرساقات الفضلت اتبرعو بيها للمساكين.
نواصل
| |
|
|
|
|
|
|
|
|
|
Re: يوميات خلّوصة.. (Re: محمد يوسف الزين)
|
يا سلااااام
تزوجت (إخلاص) وأنجبت بنتين أمورتين سمت الأولى حليمة على أمها وسمت الأخرى فتحية على أم (عادل) زوجها.. عادل ورغم مرور عشرة سنوات على زواجهما ما يزال وسيماً كما رأته إخلاص في أول مرة ، لقد عاشا قصة حب جميلة قبل الزواج وصارت أجمل بعد زواجهما ، أدخلت إخلاص بنتاها في مدرسة "الاحلام الذهبية النموذجية الخاصة" حيث يكفي مرتب عادل النفقات الباهظة ، وتسافر إخلاص في كل إجازة الى الخارج مع زوجها وبنتيها وكانت في أحد الأيام وهي في المطبخ "تنهر" في "الشغالة" لتقصيرها الواضح والمهين في ترتيب غرفة الاستقبال حيث من المنتظر أن تشهد احتفالاً خاصاً بالدكتوراة التي نالها عادل والتي دعت فيها عدداً من الضيوف بالذات "بطة" و"التاية" اللذان لم يريا "العفش" الجديد! ..عندما دخل عليها عادل..
- خلوصة
- عدولي
- حوحو وتوحة نايمات؟
- جو من المدرسة ونامو ، اهاااا مالك؟؟؟ هئ هئ هئ
- غمضي عيونك
- أها غمضتها
- فتحيها
- يااااا الله ياها زاتها الشفتها في الفترينة...وااا
إخلااااااس قومي قامت قيامتك
-في شنو يا أمي؟
هسي في زول بصحي ليهو زول كدا؟
سجمي!! الساعة كم؟
التورتة..عادل ما جا؟
- عادل منو يا بتي؟ استغفري كدي
- أمم؟ لا مافي حاجة. قصدي عادل امام..قالو عندو فلم جديد رهيب رهابة..
- يا حليلك يا اخلاس يا بتي..كدي قومي سوي لابوك العشا
ذهبت أخلاص الى المطبخ ودمعة تقطر من عينيها وهي تردد "الاحلام الذهبية النموذجية الخاصة"!!!!!!
.
.
| |
|
|
|
|
|
|
|
|
|
Re: يوميات خلّوصة.. (Re: Ahmed Yousif Abu Harira)
|
Quote: عارف يا استاذ
خلوصة دى الخالق الناطق جارتى بالحيطة ، بس دييك اسمها ببتدى بحرف ( العاء )
بالذات فى حتة يعنى يعنى ....
واصل ياخى ايام العمر معدودة |
لووووول
نواصل ان شاءالله ، شكراً على القراءة
وتحياتنا لجارتك التي تبدأ بالعاء
| |
|
|
|
|
|
|
|
|
|
Re: يوميات خلّوصة.. (Re: محمد يوسف الزين)
|
محمد يوسف سلام
يا خي ربنا يفتح علي خلوصة و بالمره يفتح علينا او لينا معاها
مودتي ....يعني الزول ليهو زمن ما ضحك ...و اللهم اجلعه خير كما يقول البدور
يا ابو الشرا تجيبو ريس
| |
|
|
|
|
|
|
|
|
|
Re: يوميات خلّوصة.. (Re: حافظ حسن ابراهيم)
|
أووو حافظ شخصياً
كدي دقيقة..
حافظ..
اتخيل الخميس الفات دا بس حفظت كل بوستاتك في فلاش ومشيت قريتها في البيت لحدت الساعة 3 صباحاً!
جاييك قدام يا حبيب..حاصاحبك حاصاحبك مافي اتنين تلاتة..ولا على كيفك
| |
|
|
|
|
|
|
|
|
|
Re: يوميات خلّوصة.. (Re: محمد يوسف الزين)
|
يوميات خلوصة
مليتنا حزن يا محمديوسف
بعنى خلوصه يوماتى احلامها منهده
ود واقعنا بالتأكيد
الاهل الكبار محتجين على سلوك البنات
قالو بنات اخر زمن
كيف البنت لمن يدعو ليها فى الاعياد والمناسبات السعيده
ويقولو ليها عقبالك
تكورك ردا آآآآآآآآآآآآآآآآآآمين
ديل بنات عيونن بيضا
الله عالم ما فاهمين حاجة سااااى
| |
|
|
|
|
|
|
|
|
|
Re: يوميات خلّوصة.. (Re: Siham Elmugammar)
|
سهام المجمر
ليه يا سهام ياخ
ليه بس عملتيها كلها حزن..
عشان خاطرك نعمل لي خلوصة نهاية سعيدة
احتمال أغير رأيي ما معروف
شكراً ليك..وفعلاً اثرتي نقطة مهمة..التربية والزواج والمجتمع والعنوسة الخ
| |
|
|
|
|
|
|
|
|
 Re: يوميات خلّوصة.. (Re: محمد يوسف الزين)
|
ذهبت أخلاص الى المطبخ ودمعة تقطر من عينيها وهي تردد "الاحلام الذهبية النموذجية الخاصة"!!!!!!
عاوزين نهاية سعيدة لخلوصة.....عشان حبيناها
يامحمد يوسف ياحكاى
تحياتى
| |
|
|
|
|
|
|
|
|
|
Re: يوميات خلّوصة.. (Re: محمد يوسف الزين)
|
أبو الحارث
رن الهاتف الجوال بأغنية "اضربني بمسدسك املاني انا رصاص تاح تاح تراح" يشق صمت الغرفة وفجأة..اندفعت اخلاص ابراهيم من آخر المنزل لتضرب بـ"الشبشب" الموبايل وقد تملكتها الهستريا مع هتافها "اسكت ، اسكت قاتلك الله"!!
تحدثت لولو بنت خالتها التي كانت معها في المطبخ بطريقة خبيثة وهي تضغط على الحروف الأخيرة في عبارتها..
- دا شنو كمان دا؟ ما قلنا التزززمنا واتنقّبنا وما بنصافح وكدا!
ردت اخلاص وهي منفعلة..
- آآي الحمدلله التزمنا ، نغمة الموبايل دي من أيام الجهل ، كل ما أقول أغيرها أنسى هسسسي دي بغيرها لـنغمة "هزّاز"
- هزني بمسدسك املاني هزاز زاز زاز قزاز
- لوووولو!!
- خلاص خلاص ، والله يا بت يا خلوصة أنا للان ما مقتنعة بالنقاب بتاعك دا ، دا شنو كمان دا؟؟؟
- ياخ مش بتعرفي خولة جارتنا البيغادي ديك؟
- اااااي مش خولة دفعتي الوااحدة دي؟
- ما شاءالله والحمدلله والله أكبر ، خولة دي سبب هدايتي هي الساقتني لدروس شيخ "مدثر".
- خولة دي كضاااابة ، عاااارفاها أنا ، عرست ليها واحد من تنظيم القاعدة وهسي دايرة تعمل لينا فيها شيخخة ، يعني هسي القال ليك اتنقبي وما تصافحي دا شيخ مدثر ولا خولة الكضابة.
- ياخ شيخ مدثر دا ماااااااا شاء الله.
وووب علي ووووب انا هي هي هي أها؟؟! تمي (لولو)
متذكرة يوم أمي أصبعها اتكسر؟ يوم دخلت فتيل المحلبية وأبا يطلع داك؟
- ااي متذكرة يا اخلاس أها تمي..
- أصلاً أنا اليوم داك كنت زهجانة ليك جنس زهجة!! أها كان في قرووب من نسوان الحلة القدادات جونا زيارة يطمنو وكدا ، أها كان معاهم خولة دي قامت دعتني لحضور الدرس بعد صلاة المغرب في زاوية "الهجرة النبوية" الفي حلتنا دي ، اها مشيت وصليت ليك المغرب جماعة وقعدت اسمع الدرس ، ياخ مااااااشاء الله وتبارك الله ، الدرس ، زول (قصدي شيخ) كلامو كلو منطقي ياخي نحن كنا وحاة الله لافين ساي في الدنيا دي ، أها من ديك مشيت "سعد قشرة" واشتريت لي عبايتين كاربات ويلا اتنقبت وبقيت ما بصافح ، واحرجت ليك أي واحد خفيف داير يصافح بالذات حسين جارنا الجديد المطنقع قال يصافح قال ، المصافحة حرااااااااااااام ، والأخوات سموني قامو "أم الحارث" والله عجبني الحارث دا جنس عجب قبل "أبو الحارث" زاتو ، ودرس شيخ مدثر دا نهائي بقيت ما بفوتو ، انتي يا لولو ما تجي معاي ، عليك الله ، والنبي فيك والتقطعك و...
- اخلااااس ، عارفاك انا ، الموضوع دا فيهو إنّ ، شيخ مدثر دا متزوج؟
- اي ، اتنين بس!!
- سجمي ، اتنين وبس؟ طيب انتي شفتيهو؟
- ايوة راجل صالح عديل كدا ، جا لأمي عزم ليها في اصبعها ، جابتو خولة.
- شنو؟ طيب هو شافك؟ طبعاً ما بعاين للنسوان ، هو ذاتو يعاين ليك كيف بالخيمة حقتك دي.
- لأ هو اليوم داك عزم لي أنا برضو في عيوني كانت واجعاني.
- سجمي ، فوق النقاب؟
- لأ بدون نقاب ، ضرورة شرعية ديك كانت عشان "الرُقية" تمشي.
- اخلاص!
***
رحبت النساء في درس المغرب بالقادمة الجديدة "لولو" ترحيب مقتضب والتي أتت مع اخلاص بنت خالتها ، وهمست احداها لاخلاص.. "يا أم الحارث بت خالتك دي ما كان تلبسيها كويس قبل ما تجيبيها معاك ، شرطت عينا ، دا شنو هسي توب البيت المتلفحة بيهو دا لا يصح هذا الكلام يا أم الحارث"!
اعتذرت اخلاص وهي "مدنقرة" قبل أن تلتفت الى لولو التي همست لها..
- اسمعي نسوان شيخ "مدثر" الاتنين ديل معانا هسي في الدرس؟
- لأ ، هم محتاجين؟ ما شاءالله معاهم شيخ مدثر زاتو في البيت مافي داعي يجو هنا.
- طيب خولة وينها؟ انا ما شايفاها.
-يتبع-
| |
|
|
|
|
|
|
|
|
|
Re: يوميات خلّوصة.. (Re: نهال كرار)
|
والله يا محمد يوسف لو عارف المتابعينك قدر شنو ما تخلي الكتابه
زعلانين منك عديل كده
قربت اكتب ليك .. شده ما خلوصه مبالغه وبعرف لي زي خمستاشر خلوصه علي الأقل
| |
|
|
|
|
|
|
|
|
|
Re: يوميات خلّوصة.. (Re: محمد يوسف الزين)
|
الخير في ما اختاره الله
(تتمة أبو الحارث)
(أكل طعامكم الأبرار وصلت عليكم الملائكة وكتبكم الله فيمن عنده يا شيخ ابراهيم)
نظر الحاج ابراهيم الى الرجل وهمهم.
- على شنو يا شيخ مدثر يا ولدي ،
- لا والله يا حاج ابراهيم وليمتكم ما شاءالله ، طعام لذيذ وجميل.
الشاي يا ولد يا عبده
- اها يا شيخ ابراهيم نجي للمهم ، على بركة الله اخش ليك في الموضوع ،
ما شاءالله بتك من الأخوات المداومات معانا في المسجد ، وهي زولة نحسبها تقية ان شاءالله
يا ولد الشاي... كمل يا شيخ مدثر
- والله يا حاج عندنا أخونا ما شاءالله حافظ القرآن بتلاتة قراءات..
- ما شاءالله تبارك الله
- ومسكناهو هسي زاوية في حي القروراب شرق..
- ماشاءالله تبارك الله
- هو طبعاً أخونا وراجل مبروك وزول مهذب ، ودايرين نسترو بس..
بس شنو يا حاج هو ما سوداني...
- كيف ما سوداني؟ جنسو شنو؟
- هو من دولة السنغال ، جا هنا طالب ، وقرا واتخرج في المعهد بتاعنا.
- والله يا شيخ مدثر أنا ما عندي مشكلة ، لكن زي ما انت عارف لازم استشير.
- ان شاءالله يا شيخ ابراهيم توافق ، وربنا ان شاءالله يسهل الزواج دا
وعلى بركة الله وأكل طعامكم الأبرار وافطر عندكم الصائمون وجزاكم الله خيراً
- خير يا ولدي.
***
(يا خولة)
أيوة يا أبو عبدالله
- بالله اعملي لي زبادي غباشة ولا أي حاجة نهضم بيها الاكل الكتير دا
- ارسل ليك اجيب ليك ببسي؟
- الببسي حرام ، انتي ما عارفة فيهو دهن الخنزير اعوذ بالله.
- اها احكي لي؟! حصل شنو
- الحمدلله كل خير,
- والله يا ابو عبدالله جزيت خيراً والله ، يعني دا عمل عظيم والله. اخلاص دي صاحبتي ورفيقة دربي ، قلت لي العريس اسمو منو؟
- اسمو أبو حفص ، أبوبكر عمر أنجاي.
( الحمدلله البقت في انجاي دا ، والله انا قايلاك داير تربع انت زااااتك ، الرجال ديل ما عندهم ....)
- بتوسوسي بشنو انتي هداك الله؟ وينو الزبادي؟
- جزيت خيراً وبارك الله فيكـ
***
سجم خشمي
بالراحة يا حاجة ما تسمعي البت
- في زمتك يا ابراهيم هسي شيخ الجامع دا ، شابكك عندي معاك موضوع ، وشغال انت من الصباح تردم لي في الاكياس وانا احمر واطبخ ، عشان يجي يقول لينا داير اخلاص لواحد سنبالي؟
- سنقالي يا حليمة ، دي بلد ، وبعدين قال ليك حافظ القران تلاتة مرات.. يعني بتلاتة اجزاء.. قصدي تلاتة بتاعات.. اللهم صلي على سيدنا محمد ..ايوة قراءات.
- انت يعني موافق يا حاج؟!
- كدي نشوف راي البت.
- شوف يا حاج ، انا بتي ما بتمشي البلد البتقولوها دي ،
- الزول دا (مستـ غ ر) هنا
- بقوم بهج ويسوق بتي معاهو ، لا لا لا لا لا
كدي طيب انطمي
يا اخلاص
- يا بتي...
- عارفة
- هو شنو العارفة؟ بقول ليك.
- عارفة
- ؟
- وموافقة
على بركة الله
لا لا لا لا لا لا لا لا اخلاس لا لا لا لا لا
يا حليمة قلت ليك انطمّي
***
رن هاتف لولو بنت خالة اخلاص..
ألو ، وين يا تيسير استنيني يا عولاق
منو؟ اخلاص؟ ، والله دا فلم هندي خليني احكي ليك
شفتي.. ، اخلاص اتلمت ليك في جماعة كدا في الزاوية حقتم دي ، أها نحن قلنا دين وتوبة وما قلنا حاجة
المهم بعدينك وشتينك وبعدينك وشتينك قامو جابو ليها واحد امام جامع عربي ما بعرف قال بعرف فرنسي بس
ااي من دولة شقيقة
اها ضربت لي خالتو حليمة عشان الحق المأساة دي ، قمت طوالي شلت شنطتي وقعدت ليك معاهم
يازولة الزول دا معاهم كل يوم ، يوم يجيب ليهو كيس موز ، ويوم كيس عجور
اي شفتو ، المسافة بين الجلابية والشراب كعبة خلاص
أها والله لمن لقيت خلوصة موافقة ، البت دي عملو ليها غسيل مخ عديل كدا
شنو؟ ااي ، لأ المشكلة ما كانت هنا بس ، قلنا عربي وبتعلم ، يا خلوصة خشت في الفرنسي
عم ابراهيم؟ عم ابراهيم ما عارفة الناس ديل عجبوهو ، لأنو كلو ما يجو يشبكهم ليك (الخير في ما اختاره الله)
المشكلة انو الناس ديل ما عارفاهم كيف كيف ، قالو شنو؟! قالو زواج ناس صالحين
المهر 500 جنيه ، وشنطة مافي وريحة مافي ، اي شي مافي بالمناسبة
يازولة قدر ما قعدنا انا وخالتي ، قالت كلو كلو بس دايراهو
انا والله ما عندي مشكلة ، بس ما عجبتني الخيمة الحتخشها اخلاص دي لمن تموت
الناس ديل صعبين ياخخ
ااي ، شنو؟ ههههه ، كدي اسمعي الباقي
ونحن في حيرتنا ديك جاتني ليك فكرة جهنمية عديييل كدا
اي ، عندهم جارهم اسمو حسين ، اها حسين دا مدشدش ليك بت اللذينا من زمااااان
اها طقت ليك لي لولو الذكية اللي هي أنا فكرة عبقرية ،
ألفت لي فلم كاااامل واخرجتو ليك ، الله يغفر لي غايتو
جيت خاشة ليك لي خلوصة وعاملة فيها زعلانة ، قلت ليها حسين وقفني في الشارع وسألني من عرسك
وكان زعلاان وقعدت اوصف ليها ، وعملت فيها زعلانة من حسين اللايوق الشبكني اخلاص اخلاص
واخرجت ليك كم فلم على نفس الحنك دا كم يوم كدا..
شنو؟ اااااي
يازولة دا كلامك؟
فكت ليك النقاب دا وجدعتو ليك هناااااااااك
| |
|
|
|
|
|
|
| |
محمد يوسف الزين
Maawya Hussein
حامد محمد حامد
هواري نمر
محمد عبد الماجد الصايم
عبدالغني كرم الله
عبد الدائم سيد أحمد
Ahmed Yousif Abu Harira
حافظ حسن ابراهيم
Siham Elmugammar
خالد عبد الله محمود
مهيرة
توما
حيدر حسن ميرغني
Abdlaziz Eisa
ممدوح أبارو
فيس بوك
تويتر
انستقرام
يوتيوب
بنتيريست