|
|
 وداعا للفيس بوك
|
(كتاب الوجه)
خلال تعاملي بالموقع أعلاه كنت حريصا ألا تجمع قائمه أصدقائي
إلا من تجمعني به علاقة حقيقية في ارض الواقع
أو أقاربي ممن لي معهم تواصل
لكن ان يكون زميل دراسه لم تجمعني به الا حجره الدرس
وافترقنا عشرون سنة
فلا
ولكن ان يكون زوج بنت بنت خاله امي الذي بعد لأي شديد تذكرت
اسمه
فلا
زميل عمل فرضت علي الظروف ان اتعامل معه بالاميل
لاجد منه طلب اضافه
فلا
صاحب صاحبك الذي جمعته معي حيطة صديقي المشترك قد يكون
اعجب بتعليق مني او فضل ان يكون صديقي مباشره
فلا
وجدت ان قائمتي علي الرغم من المحظورات اعلاه
قد جمعت ما يزيد عن المائه صديقا اسفيريا
لا تجمعهم الا صدفه ان كانو اصدقائي او معارفي
في احد مراحل تطوري من طالب روضه الي موظف حكومي
بالدرجة التاسعه القطاع كم كده ما عارف
اتخيل معارف زي ديل كرتله ما تلمهم واشك ان الكثيرين منهم
لا يهمه ان يمشي جنازتي بعد عمر طويل
(لا اظن ان اداره الفيس بوك حريصه علي ان تزودك بقائمة الاصدقاء
الذين يودوا ان يمشوا في جنازتك)
|
|
  
|
|
|
|
|
|
|
|
Re: وداعا للفيس بوك (Re: ود الخليفه)
|
لكل شخص من المضافين معي لغه خاصه بتواصلنا
واحترام متبادل في حدود الصداقه او الزماله او القرابه
مع احترام الخصوصيه
لكن مع التقاطعات( الاصدقاء المشتركين) سرعان ما تبدا الخصوصيه
في الانفراط
الخصوصيه التي اعنيها هي خصوصية العلا قه مع أي من الأصدقاء
الافتراضيين
فابن اختي ليس صديقي بالمعني العام وان كان.
وجدت أني لا استطع أن أتحكم في هذه العلاقات عن طريق الفيس بوك
علاقتي واسلوبي مع صديق من الدرجه الاولي انتقلت مثلا للتعليق
علي صوره مثلا ما دخل زوج بنت بنت خالتي المذكور عاليه بهذا
الامر
طبعا السودانين من غير تعميم واطلاق احكام تنعدم عندهم الخصوصية
مثلا بتقرا في جريده في المواصلات وفي موضوع عن الازمة
الاقتصاديه العالمية والرهن العقاري
طوالي ينط ليك واحد في حلقك :-
مرت جيرانا رهنت بيتا للبنك واشترت ركشه
وادتها لعز الدين ود السره العاطل داك قام عمل بيها حادث مع بتاع
اكسنت موديل 2005 اورنيك جابا سيدا من السعوديه بعد ما كفيلو
فنشو قامت مرتو ابت ترجع السودان قام طلقا وجاب العربيه دي
اشتراها من الكرين من سمسار اسمو عبدو جلابيه
دقسو فيها لانو ...............................................
| |
|
|
|
|
|
|
|
|
|
Re: وداعا للفيس بوك (Re: ود الخليفه)
|
عفوا الموضوع كان شنو؟؟
الفيس بوك
ايوا
الظاهر انو المساله دي بتعادي لانو ود جيرانا كان عندو زمان برجم
قام عاداني
نرجع لموضوع خصوصية العلاقة التي انتفت في الفيس بوك
اتخيل لو واحد اخد ليه شاكوش في احد المراحل العمريه
من واحده اسمها ست النفر
لو مشى يشتري كسره شباب الحله يكونو قاصين ليه
ماشي وين
بكل براءه يرد ليهم ماشي لي ست الكسره
فتنطلق قهقهات بليده وسط سؤال استنكاري بليد
ست الكسره ولا ست النفر
ها ها ها ها ها ها ها ها ها
يقوم واحد يسال ست النفر دي منو؟
يتبرع الجميع لخلق قصه لا تشبهه
فيغير مجبرا اتجاه ست الكسره ليجيب عيش من الفرن !!!!
| |
|
|
|
|
|
|
|
|
|
Re: وداعا للفيس بوك (Re: ود الخليفه)
|
التحركات في الحله مرصوده من قبل شباب الحله
سيد الدكان مسؤول الاستخبارات والشمارات في الحله
سيد الدكان دا ممكن يتبرع بمعلومات غاية في الخطوره
فلذلك لا تجد دكان امام القصر الجمهوري
للاسباب المجتمعه اعلاه يكون كل اصدقائي المضافين في قائمتي
قد ابتنوا دكاكين في حيطتي القصيرة
| |
|
|
|
|
|
|
|
|
|
Re: وداعا للفيس بوك (Re: ود الخليفه)
|
لذلك قررت اما ان اقاطع الجميع ولا يكون لي اصدقاء
او ان اقاطع الفيس بوك
ولا اعرف احد فارق الحياة بعد ان عمل دي اكتفيشن
دي اكتفيشن طبعا ما انتحار للناطقين بغيرها (ناس ودالصائم وكده)
اذا كان دي اكتفيشن انتحار بالمنطق كده لا بد من مفارقه الحياه
اسفي علي البعض لا انجليزي لا منطق؟
الدي اكتفيشن عكس الاكتفيشن
يعني لو دي اكتفيشن انتحار
يبقي الاكتفيشن عدم الانتحار
(لقيتني كيف؟)
لكن للاسف لا تعني الكلمة انتحار
وانما مفارقة الفيس بوك باحسان
طبعا لمن عملت كليك في الدي اكتفيشن
دموعي قربن يجرن
| |
|
|
|
|
|
|
|
|
|
Re: وداعا للفيس بوك (Re: ود الخليفه)
|
واتخيلت اغنية محمد احمد عوض شغاله بالنجليزي
مفارق كيف تخلينا لشوقنا وذكري ماضينا
وطبعا دا كلو بالانجليزي يا مرسي
جابو لي صوره بروفايل لي كم نفر من الاصدقاء
فلان يفتقدك
علان miss you
سيد الدكان قال ليك جيب باقي الحساب
زوج بنت بنت خاله امك في انتظارك
الحلم العربي لن يتحقق ان فارقت الفيس بوك
الغنيمات بغرزن اكان ما اتعشن
ود جيرانكم قال ليك اديني سحبه في عجلتك
حسيت باني حا استشهد بعد شويه
طيب خليت الفيس بوك مالك؟
دا سؤال لازم تجاوبو وانت طالع
الغريبه وانا خاشي مافي زول سالني قال لي ماشي وين؟
طبعا دي ترجمه غير امينه للمثل البقول دخول الحمام مش زي
خروجو
المهم انو لمن سالوني السؤال دا كانوا متوقعين مني كم اجابة
لقيت خاتين لي خيارات من ضمنها
شنو شنو كده خصوصيه (بالانجليزي)
لمن اشرت عليها
قالوا لي طيب ما مكن تتحكم فيها وتعمل بلوك وفريند اونلي
وشنو ما عارف
طبعا لمن اصريت والحيت
هم برضو اصروا والحوا
باسويردك ياها زاتا اكان حبيت تجينا تاني
ونفس الاسم
ونفس الملامح والشبه
بس خليك قريب
بالانجليزي
| |
|
|
|
|
|
|
|
|
|
Re: وداعا للفيس بوك (Re: ود الخليفه)
|
كانما جبل كان كاتم علي انفاسي
ولكن يبدو ان الالحاح انتقل الي بريدي الالكتروني
كانما اصروا علي وجودي معهم
لقيت رساله من اداره الموقع تذكرني باني عملت دي اكتفيشن
واعادوا علي ما ذكروه سابقا
والان تحررت وتحللت من مايربطني بالفيس بوك
وهذا ما جنيته علي نفسي
طبعا لا يعني ان هذا الموقع سئ كليا وانما به الكثير من الحسنات
مثلا انه عرفني بزوج بنت بنت خاله امي
وهذه محمده
ذكرني الموقع عن طريق احد الاصدقاء اني درست بالصف الثالث
حيان قبل سنين عددا
لعلي اواصل في سرد الاشياء الجميله لاحقا
لكن لا بد من جلد الذات والتعذيب قليلا
جلد الذات
| |
|
|
|
|
|
|
|
|
|
Re: وداعا للفيس بوك (Re: حاتم علي)
|
الاخ حاتم
تحياتي وسلامي
طبعا حاولت اقفل الصور والحاجات دي علي الاصدقاء فقط
لكن احسست اني اجمع الماء والزيت الحجاره والبيض ! في سله واحده
البيض دي بي معنييها الاثنين
اما حكايه اعمل كم اكاونت دي فصعبه شويه معاي لعدة اسباب
تشكر يا ملك ولا اراك الله دي اكتفيشن في عزيز
| |
|
|
|
|
|
|
|
|
|
Re: وداعا للفيس بوك (Re: ود الخليفه)
|
شوف ياود الخليفة
التعامل مع وش الكتاب ده
زي اخو العريس الجاتهم السيرة من
حتة بعيدة
تلقاهو لازم يبتسم ويسلم ويقبل ويجامل كل زول جاااي مع
السيرة حتى لو كان كمسارى الحافلة
يازول ياتتعامل بي وش سماحة يا يشيلك وش الكتاب وش القباحة
| |
|
|
|
|
|
|
|
|
|
Re: وداعا للفيس بوك (Re: ombadda)
|
والله دي معاي صعبه جدا لانو واحد من اخواني معاه 32 صديق مشترك
بالنسبه لي المساله ما عمليه خالص بد ما اوجع راسي مره واحده
تبقي علي مرتين
تشكر يا دكتور
| |
|
|
|
|
|
|
|
|
|
Re: وداعا للفيس بوك (Re: حافظ كنجال)
|
تحياتي حافظ
مرحب بالسيره كلها واشيلا فوق راسي
بس مافي زول يسال بتاع الدكان الجنبنا عن اي موضوع يعني يشيل برنجيهو ويتخارج طوالي
بلا بدل ما نشيل وش القباحه
وحصل فعلا
احسن نشيل الحساب مره وحده
| |
|
|
|
|
|
|
|
|
|
Re: وداعا للفيس بوك (Re: حافظ كنجال)
|
تحياتي حافظ
مرحب بالسيره كلها واشيلا فوق راسي
بس مافي زول يسال بتاع الدكان الجنبنا عن اي موضوع يعني يشيل برنجيهو ويتخارج طوالي
بلا بدل ما نشيل وش القباحه
وحصل فعلا
احسن نشيل الحساب مره وحده
| |
|
|
|
|
|
|
|
|
|
Re: وداعا للفيس بوك (Re: ود الخليفه)
|
ود الخليفة : هل تتحسر على وداعك الفيس بوك؟
هل هناك منفعة من كل هذا؟
هل تواصل بهذه الكثافة يقتل الشوق الذي هو أحد أم المشاعر اللطيفة؟
هل تنصح بنتك وابنك بالدخول للفيس بوك؟؟؟؟
أسئلة واقعية أتردد في الاجابة عليها ، وياريت نسمع رايكم،،
| |
|
|
|
|
|
|
|
|
|
Re: وداعا للفيس بوك (Re: عبد اللطيف بكري أحمد)
|
الاخ عبد اللطيف
انا بطبعي انسان اجتماعي لدرجه بعيده جدا
لكن ما ممكن اكون في سوق الله اكبر واي زول عارف عني اي حاجه
داير اشتري شنو وعندي كم
ولابس شنو
هذا ما لا اقبله
اما الفيس بوك فلديه علي افضال كثيره
جمعني باصدقاء لي منهم قرابه العشرين عام لم اقابلهم
قرب المسافات بين اهلي واخواني الضاربين في الارض
قربني جدا لابناء اخواني
واحسست اني قريب منهم ومن تفكيرهم علي الرغم من فرق السن
والمسافه المكانيه
واشياء اخري جميله
ولكن هناك خطوط لا اتجاوزها ابدا
احد اصدقائي علي ارض الواقع جمعتني به المدرسه الثانويه
ولا تزال علاقتي به جميله وان كانت تعتمد علي الصدفه في غالبيه لقاءاتنا
طلب ريكويست ولم استجب لذلك فاحببت ان تكون علاقتنا في محل احترامها المتجدد
بعيده عن الواقع الافتراضي الذي قد يجمعه مع احد لا يهمه كثيرا
تتخيل كان نصيبي كيلا من الشتائم وانه وانه وانه
طبعا بكل بساطه لم استطع ان افقد صديق وان كان ثمنه الفيس بوك بحاله
لان الاصدقاء علي الواقع لا نجدهم صدفه
واحسست ان خصوصية علاقاتي محكومه في الفيس بوك لدرجة الحذر
اما اطفالي انشاء الله فذلك جيل له معطياته الخاصه لهم ان يكتسبوا معارفهم وتجاربهم الخاصه
تحت التوجيه المباشر
الي ان يصلوا لمرِحة التمييز لهم حرية الاختيار تحت الاشراف
حتي لا ينجرفوا امام الغثاء
شكرا ليك كتير
| |
|
|
|
|
|
|
|
|
|
Re: الفيس بوك عالم جميل (Re: ود الخليفه)
|
سمعت عباره نسبها محدثي لجويده
ان الذين يعلمون دواخلنا فانهم يستعبدون شيئا فينا
او كما قال
اذا كان كل من يعرف عن دواخلي شيئا مضافا عندي بالفيس بوك
صرت عبدا للجميع
| |
|
|
|
|
|
|
|
|
|
Re: الفيس بوك عالم جميل (Re: بكري عباس علي)
|
الاخ بكري
سلامي وتحياتي
مرات التكنلوجيا تفرض عليك التعامل
يعني الموبايل
معظم المجاملات والعلاقات الاجتماعيه اصبحت عن طريق الموبايل
مما افقد حميمية التواصل
لغاية الان بعض الاسر لا تقبل دعوة زواج عن طريق رسالة sms او مكالمة تلفونية
وتعتبر ذلك نوع من عدم الاهتمام
لكن بدل ما تتعب وتمشي لي زول احتمال تلقاه ولا لأ
تتصل عليه اولا وتخبره انك قام اليه
طبعا كسر رقبه يستناك ولا يبقي زول كعب
طبعا دي خطوه في حد ذاتا ما هينه كونو تعرف انو في زول جاييك
اما مرحلة انك تعتذر لو كنت مشغول فدي مرحلة تانيه
طبعا الاستخدام الكويس للموبايل يجنبنا الكثير من الاحراج
فبالتالي التكنلوجيا ممكن توجه سلوكنا الانساني في اي اتجاه
حسب توظيفنا ليها
طبعا انا كنت فرحان بالفيس بوك دا فرحه شديده خلاص
لمن بديت اكتشف انه بدأ يجردني من لباسي وريشي
فخرجت محافظا علي ما بقي
| |
|
|
|
|
|
|
|
|
|
Re: الفيس بوك عالم جميل (Re: ود الخليفه)
|
الأخ ود الخليفة...تحية طيبة...فعلآ أعجبتني أخلاقك ...والله هذا وفاء نادر...فقد آثرت الإحتفاظ بصداقتك علي الإحتفاظ بالفيس بوك....صدقني معظم منتسبي الفيس بوك لا يهمهم كثيرآ أن يخسروا أصدقاءهم.....لك التحية والمودة...
راشد
| |
|
|
|
|
|
|
|
|
|
Re: الفيس بوك عالم جميل (Re: أمين محمد سليمان)
|
....... ود الخليفة
والله انت رجل فنان وطاقة ابداع .....
وقد استهوتنى العبارة التى نقلتها عن محدثك (( ان الذين يعلمون دواخلنا فانهم يستعبدون شيئا فينا ))......
............ وبالفهم البسيط المباشر يستعبد المحبوب حبيبه ... وبالفهم الصوفى العميق تتجلى الاولوهية فى ابهى معانيها باستعباد الجميع
دمت
امام
| |
|
|
|
|
|
|
|
|
|
Re: الفيس بوك عالم جميل (Re: أمين محمد سليمان)
|
الأخ : ود الخليفة وضيوفه الكرام
السلام عليكم ورحمة الله تعالى وبركاته
لا يختلف اثنان بأن للفيس بوك محاسن ومساوئ
وقد ذكر صاحب البوست جزء من هذه المحاسن ,
والتي تتغلب على المساوئ . فالممارسة داخل
الفيس بوك هي التي تحدد مدى استفادتك أو
تضررك منه . والإنسان الكيس هو الذي يحدد
خطواته داخل الموقع , وإلا الإنزلاق ... فالمشاركة
تتوقف على نوعية الأصدقاء وقدراتهم الفكرية ,
وإمكانياتهم الإبداعية ...
أما أبرز عيوب الفيس بوك هو عدم المحافظة على
خصوصية الإنسان , وفي هذه الحالة يكون الاحجام
أولى من التواصل ... ويرفض الانسحاب , لأنو الحضور
قد يساهم في الإصلاح ...مع ألف شكر
| |
|
|
|
|
|
|
|
|
|
Re: الفيس بوك عالم جميل (Re: د.يوسف محمد طاهر)
|
يا ودالخليفه أخـــوي
تصور بعد مريت علي حوارك دهـ .. وحياتك مشيت علي حسابي وعلي طول روحت دي اكتيف
شكرا انك سربت لي هذا القدر من الشجاعة لمقابلة تلك الخطوة
و تاني ماراجعين مش لو قال لي فلان حا يفتقدك او حتي فلانة ذاتها !
لك تقديري وودي
| |
|
|
|
|
|
|
|
|
|
Re: الفيس بوك عالم جميل (Re: د.يوسف محمد طاهر)
|
د يوسف
سلامي
طبعا من الممكن التحكم في قائمة الاصدقاء
لكن من المستحيل التنبؤ بما يدور في الخاطر او التعليقات
عالم افتراضي من االاصدقاء يتحكم في سلوكك
بالنسبه لي
الي الجحيم
تسلم
| |
|
|
|
|
|
|
|
|
|
Re: الفيس بوك عالم جميل (Re: Rashid Elhag)
|
الاخ راشد
تحياتي
لابد انك سمعت بالمثل الانجليزي
الذي يأتي بسهوله تخسره بسهوله
تماما يعبر عن المال في نوادي القمار
اما الاصدقاء اللذين تتعب في تصفيتهم
فلا بد ان تتعب في المحافظه عليهم
المسج بتاعة الموبايل ديل وصلتك؟
االاصدقاء مثل الاحجار الكريمه لا نصنعهم انما نجدهم فنحافظ عليهم
| |
|
|
|
|
|
|
|
|
|
Re: الفيس بوك عالم جميل (Re: ود الخليفه)
|
| Quote: والله يا ود الخليفة الشي الاسمو وش الكتاب دا انا من اول يوم ما ارتحتا ليهو ماعارف ليه |
ولا عرفت ليهو .......... اتشربكت فيهو لا ايدي لا كراعي .....
عشان كده اسه لابدخل فيهو ورغم كده تجيك رسالة فلان كتب ليك في حيطتك !! كتابة الحيطة الوحيدة البنعرفه يا كتابة الشفع زماااان
الكلها كلام خارم بارم يا كتابة الشعارات بتاعت البعثيين والشيوعين ...........
ياخي نحن من زمن تكنلوجيا (تلفون علبة الصلصة)* عشان كده يمكن النقلة بقت علينا كبيرة ..........
* عشان خاطر الاجيال الجديدة تلفون علب الصلصة (تجيب علبتين صلصة فاضين طبعا وتربط خيط بين العلبتين وتمسك علبة وصاحبك علبة وتمشي بعيد مسافة تخلي الخيط مشدود ممكن تتكلموا مع بعض عااااادي)
| |
|
|
|
|
|
|
|
|
|
Re: الفيس بوك عالم جميل (Re: omer osman)
|
| Quote: االاصدقاء مثل الاحجار الكريمه لا نصنعهم انما نجدهم فنحافظ عليهم |
العزيز ود الخليفة....هذه والله كلمات مضيئة...وهي تماثل في المعني لمقولة (الصداقة كنز لا يفني)..خاصة الصداقة المنزهة من الغرض...يعني صداقة لله في الله...محبة وخوة لله في الله....هناك نقطة مهمة أريد التركيز عليها...وهي أننا يجب أن نكون جاهزين لخلق صداقات جديدة عند أقرب فرصة...فدومآ نصادف أشخاص كالحجارة الكريمة في مسار حياتنا اليومية...وهذه فرص يجب عدم التفريط فيها أبدآ....لذلك أستغرب لفهم بعض الناس الذين يقيمون الصداقات بالتقادم...مثلآ يقول لك أحدهم...فلان دا أعرفه منذ عشرة سنين لذلك فهو صديقي...وفلان دا عرفته أمس لذلك فهو ليس صديقي...طيب مش ممكن الذي عرفته حديثآ أفضل مليون مرة من الذي تعرفه منذ عشرة سنين..سؤال يطرح نفسه....لك الود
راشد
| |
|
|
|
|
|
|
|
|
|
Re: الفيس بوك عالم جميل (Re: Rashid Elhag)
|
ود الخليفة كيفنك
ياخي الشي المتل شناط العنقريب دة اصلي ما ردتو
والعجب الكتابة الفي الحيط دي اصلها ابت تظبط معاي
ياخي نحن من زمن تكتب في ادبخانة المدرسة: احب ندى
| |
|
|
|
|
|
|
|
|
|
Re: الفيس بوك عالم جميل (Re: طارق جبريل)
|
طارق جبريل
بالله انت قاعد في المغرب من الزمن داك؟
والله فاتتك حاجات كتيره خلاص
شكلك من النوع الكان بقشر في درس العصر عشان بنات المدرسه المجاوره بجن لي
استاذ محمود بتاع الرياضيات
شكرا ليك كتير علي المرور
| |
|
|
|
|
|
|
|
|
|
Re: الفيس بوك عالم جميل (Re: Rashid Elhag)
|
الاخ راشد
سعيد جدا بتشريفك لي في البوست
طبعا العبره بمن صدق لا بمن سبق
لكن طول مدة الصداقه تجعل الصديق ككتاب مفتوح
وبعدين زي ما قال المثل اتنين ما منهم مدسه ربك وصاحبك
لكن قد يعثر موسي علي هارون فيكون له ردءا
تسلم
| |
|
|
|
|
|
|
| |
ود الخليفه
حاتم علي
حافظ كنجال
ombadda
وجن
بكري عباس علي
Khalid Osman Jaafar
Rashid Elhag
أمين محمد سليمان
د.امام الصديق عبد المعطى
د.يوسف محمد طاهر
طارق عمر مكاوي
ناذر محمد الخليفة
omer osman
طارق جبريل
فيس بوك
تويتر
انستقرام
يوتيوب
بنتيريست