احب المحاسبة

Quote: لكن، بحكم الخبرة التي اكتسبتها بصفتي الوريث الشرعي (وريث! خلااااس يا..باريس هيلتون) لهذه الصناعة؛ لو كنت شاورتني لكنت نصحتك، بصفتك سوق ناشئ وسط أسواق "السرّيحة" العاتية، بأنّه يجب عليك أن تعلم أنّ القاعدة الذهبيّة لهذا السوق (شأنه شأن جميع الأسواق الرأسمالية) هي: The house always wins لا وقال ليك شنو! "افتح القفص داك و دخلا جوّة"!...

Quote: كأنو ما سمع سؤالي قال لي افتح القفص داك و دخلا جوّة ؟ . .

اها بيني و بينكم كنت عاوز اخلص من الذِلّة دي و السلام ، فتحت
القفص و دفست ليك " خالتو جفاف " بلا وداع اخير و بلا دموع ذاتو . بس قامت " كااااااك " ، الياهو نظام :

Quote: كيف يهون! تريرا تَمْ ريرا!

او قول نظام وووب – التقول من الرهط و عندها باسويرد في سودانيز اون لاين ؟
من قبيل كاك دي وين لما دخلوك الفحص الكاكي ؟
و ليه ياخ دايمن الكاكي بفتش الوانا ذاتو ؟
يا حاجة حطب الله جاية تكتلي قلبي اسي ؟ . . قبيل وين يا ام " البيض " ؟ لما كنا عاوزينك تكاكي و تبيضي لينا وشنا؟ ما بيضتي بينا نحن ديل ؟! هو صحي الابيض احسن من الاسود ؟ - مرة خدمت ( مواطن )* انبسط مني قال لي " بيَّّض الله وجهك ، قلت ليهو اسي دعيت لي و لا دعيت عليّ ؟ !
قلت ليك العلاقة دي مش ممكن تستمر . . و لازامن تنتهي . .
برا كاك برا مناحة معاك ! قومي لفي كدا ! ما داير معاك ياخ بعد الشفتو منك ! قلنا ليك خلاص " فارقيهو دربي " ياخ ! . . .
ياخ و الله إتشأمت بيك رسمي و شعبي ، كسرتي حظي و نحستيني . .
يدوم سعدك مع غيري ياخ ! خشي لي جوة و اريتو حسن جداد يحولك حيوياً و يحصدك و يعمل منك كفتة ذاتو ! كسحي ! فراق قيقراوي لجدادتو إن شاء الله .
لما اتلفت عليهو لقيتو مادي لي عدد واحد جنية سوداني فقط لا غير . . استلمت ورقة البنكنوت المرسوم عليها صورة رئاسة " البنك المركزي " و هي تعاني ألم الفراق برضو، و تحكي عن فقد توام روحا و رفيقا في راسمال قيقا السقط شهيد انار لنا الطريق .
بس صريت ليهو وشي و انقلعت ، استباقاً لقولة : ورينا عرض كتافك – هو ما ترزي طبعاً . بتاع جداد ياخ ! انتو نسيتوا ؟ - لكن اي زول منتهك مقولات الترزية المساكين ديل ! . . العجب ناس السياسة و مفتيي الديار !!
قعدت اعمل جرد و اعداد حسابات ختامية . . . في حسابات النتيجة :
اريتا الخسارة كان وقفت على محق راسمالي ساي ؟ دي سختتو عديل . . . الشغلة لعنة عديل ؟
كـchـنت ليك تجارة فيها روح ، و كـchـنت التجارة في روحا دي ذاااااتا ! . .
المهم لما اديتو قفاي – طبعي كدا ياخ ! طوالي : ادي قفاي لي داراً بقت مي داري - و كان الاخير يقمر عيش عديل من هول الرصعة الاتلقيتها في بداية مشاور البزنس ، او قول نهايتو عديل ؟ . . بعض النهايات مخاتلة جداً ، تتنكر في شكل البدايات .
على العموم بالحادث دا انتهت علاقتي بكلمة " بزنس " بشكل و فتحت آفاق علاقة جديدة مع بزنس بشكل ارقى ، على الاقل ما فيهو جداد و جري و بهدلة و نفسيات . .


-----------------
* يحكى انو بعض ( المواطنين ) في جزيرة العرب ، نواحي نجد و قيل قريب من مضاربكم ، كانوا ( يسمرون ) و المذياع يشيل و يلقط و يذيع ليهم في اخبار العالم ، ورد من ضمن ما ورد ( نص ) خبر عن " انهيار ثلجي يؤدي بحياة عدد من المواطنين في كندا . . ." نط واحد من ( الرَبع ) : يستاهلون ايش يودي ( المواطنين ) هاديك الديار البعدية ، رايحين يسربعون آها ؟! لوووووووووووول يا ( مواطن ) مافي فرقة معاكم في " وطنية " لزول تاني ؟!

يا بدوي ما رديت لي على " من اركان الدنيا " ؟ ما طقش اضانك ؟
علي المك دا مجنون ياخ ! . . في الشريط الكنا مسجلينو من الاذاعة، كان عاجباني الحتة دي ، قال :
( الناس في بلدي ألوانهم بنّية ، و يقولون " سُمر " تظرّفاً و خوفاً من ذكر الحقيقة )

و في " رسالة الى جيني آن " - العرف اسمها من بطاقة دعوة لزفافها - " جميل جداً ان تصلي لقرارٍ في موضوعٍ ما . . جميل جداً ان تتزوجي أحد بني لونك و جنسك . . هذا الغرب منافق جداً يكره ان يرى فتاة " بيضاء " و فتاً اسود .
و ختم رسالتو بـ " لاول مرة ارسل لك رسالةً قصيرة و اقطع علاقتي بك " . .

اها هانذا اقطع علاقتي بما كانت " جدادتي "
فاعفو لي البرية ياخ
و مشتاقين يا شباب ياخ