احب المحاسبة

Quote: يا قيقراوي واحد من جماعتكم، أكان من زُرْقَة أكان من كِرَيْعات، اتعوّد يجي المجلس في رفاعة مرّة يطلّع ليهو تصديق سكّر، مرّة يطلّع ليهو تصديق واطا ومرّة يطلّع ليهو تصديق تصديق وحسب الرزِق والتساهيل. يوم جا لِقَى الدار خلا الغفير بَسْ الفي...بسم الله الرحمن الرحيم! ها ناس نَعَل مافي عوجة! الغفير قال ليهو: العوجة في راسك دا الدنيا باقي جِمعة...هَتْ! ما هالعتو!

ذات رمضان نزلت السودان ، شعوب بيتنا ( الكبير ) منقسمين لذاكرتين أساسيتين ، " ذاكرة مستثمرين " و " ذاكرة سياح " . انا انتمي للأخيرة تماماً و اللمين يمثل الاولى بإمتياز و متوفق فيها خالص و قصة العمبلوق الاشتراهو و الدنيا قبايل عيد ، و العيد الكبير ، و كبير لاعب الهلال – لو تابعنا كبير لاعبي الاهلي بدوّرنا تاني لسلك العجلة و بجيب الكك - اها شيطان المستثمر وسوس ليهو انو يشتري عمبلوق و يسمنو و لين يجي العيد بكون بقا " خروف " كامل الدسم . و قنب يدوعل فيهو لي يوم سوقو – تصح القراءة زي ما وردت في نص القدال - مع استبعاد الاحتمال دا من مستثمر ، و الاعمال بنيات - او بما يتماشى مع سايق البوست كـ" ماركت " ، المعنى يعني رأسياً و افقياً هنا كلو ماشي - و يغرغر فيهو موية الملح و علمو شراب الموص كمان ، شفت ليك جنس خيابة ؟ ما باقي ليهو إلا المشك و سبب امتانعو ما وازع ديني . لعدم توفر المشك بس ، انقر العنيبليق ما صابح العيد لحقان أُمات طه ؟ النصيحة مسخ علينا العيد ، عملنا ليهو مراسم دفن و عزاء رسمي ، ما باقي لينا الا ندق صيوان عديل . اما انا السائح في البلاد السودانية دا يا صحبي ، فقريشاتي قسمتها بين تذكرة السفر ، و اشتريت بالباقي " كاميرا " و جيتم اباطي و النجم . الناس ديل كان جيتم بمال قارون بجايتوهو منك . أسألني منهم انا المستثمرين ديل !
رمضان كان كأحر ما يكون . اعاد ذاكرة رمضانات التمنينات وكت كان حتى الطير – ما بجيها جعان ؟ جعانين نحنا ديل في ذاتنا ياخ – حتى الطير كان بمارس هواية – هي هواية و لا إحتراف ؟ - الطيران جوّة البرندات من شدة الحر ! بالمناسبة دورة رمضان الصيفي بدأت و الخبراء قالوا انو احرها على الاطلاق ح يكون 1434 هـ بعد 3 سنة ، ح تستمر 11 سنة ، و هي بتتكرر كلو 33 سنة . شوف اترصن لي كيف 3،11،33 . و العلاقة الرياضية بينهم طالب اولى ابتدائي شايفا مش ؟ دي دايرة ليها حفظ جدول 11 او جدول 3 كمان ؟!
اها في كوستي ما في حاجتن بتكسّر الزمن الا سوق الله و أكبر دا . كل يوم الزول دا يصحى علي كيفو – ود بلد كمان ! - و يقوم ليك على السوق ما يرجع إلا عصاري كدا .
اها قلت نقوم نسلي صيامنا و منها نمارس هوايتنا و نشبع ذاكرة السُياح اكان في البلد او افكار و احوال الناس . اها من بالليل حجزت ليك مقعد .
صدّق يا مؤمن جا صحاني من النوم ! يا معلم دايرين نكسر الوكت التاني ما دا ؟ الفجر و لحدي الضحى دا مكسر خلقة ياخ ! . .
المستثمرين ديل اصلو ما بعرفو اتكيت ياخ !
اها قمنا بتجريدتنا و شلنا على السوق ، جارتنا من " الشوافة " سؤالها الاثير ، و برا سبب : ساير شقيش ؟ و كان عكستو عليها اجابتا هي ذاتا : انيّ شايلي السوق ، يا زولة ؟! الزمن دا كلو ممكونة و صابرة ؟ و الله فتي حاجة آمنة عديل ! دي بس شايلة الوجع في الجوف شديد و كلنا عاذرنها ! اها كم بدوكي في الشيلة دي ؟ . واحد اطرش كان معانا في " حفر الباطن " جنو اسئلة مع انو ما بسمعك و لا كان بستهبل علينا ما عارف ؟ بس ما يشوف ليهو حاجة متحركة ، او يسمع خشخشة رجلين . مرة سأل واحد اخونا : ماشي وين ؟ قال ليهو واصل السوق هنا بس و راجع . طروشي قال ليهو : ايواااا ، معليش ياخ كنت قايلك ماشي السوق !! والله كان واصل بي طريقتو دي بعوق ليهو زول . اسي يا خوانا مش امكن يكون طرشو دا داخلي و العطل في المكنة – مكنة الفهم - ذاتا ما طرش عرضي ساي ؟!


---------------
نواصل حتى نرى ست البوست هنا جهرةً منورة بوستيها
صدقوني تعبتوا معاي