احب المحاسبة

Quote: هالك يا قيقا الحالة دي قبل ان اطلق الادارة المالية من عامين ( طلاق تلاته) تم دمج كل المصانع الحكومية التابعة لحكومة الامارة تحت مظلة شركة قابضة واحدة وكان من حظي ان اكون مسئول الحسابات المركزية في الشركات التابعة للقطاع الزراعي و تم استلام احد مزارع النخيل من وزارة الزراعة لتكون تابعة للشركة المعنية بتصنيع التمور تقريبا في 1/1/2006 و كان عدد اشجار النخيل في محضر الجرد 167000 شجرة نخيل وفي محضر الجرد في 1/4/2006 تاريخ استلامي كان عدد اشجار النخيل 202000 علما بانه خلال فترة الثلاث اشهر بين الجردين لا توجد أي مشتريات شتول أو اشجار نخيل و لكن ادارة المزرعة الجديدة ( والغربال الجديد ليه شدة) قلعت الشتول ( الفسائل ) من الاشجار و زرعتها في جزء من المزرعة كان خالي .( و الشتول لم تكن مدرجة في الجردفي 1/1/2006) حسب المعييار الخاص بالاصول البيولجيةلازم تكون حاوي عشان تعمل الوكيشن للمصروفات .... كدي اديك فرصة تتخيل و ترجع للمعيار المعني و ما تنسي في المعيار تشوف حكاية تسعير الاصول البيولجية وسبيل المثال البقر ( حامل / مرضعة / و قاطع / ولا تحلب)

- رهاب أملت لينا إرهاب ياك . . قالوا كورة نهي !

مشيت حمّلت المعيار المصري رقم ( 35 ) . . طبعاً الما عارف بقول عدس ! . . لكن نقولها بأسى يليق : ما عندنا معيار سوداني يا شباب !
و لما تكون طالب و " بالعربي " كمان تمش تفتش يا المعيار لمصري او السعودي زي ما قرونا ليهو في جامعة جوبا ذات تجربة ؟
مؤسف قعادنا اباطنا و النَجِم ! يخربنا من معيارن " دق اب جلفة " - محلي - الغريبة الفناننين يعنوا ساااااااااااي :
" الناس في بلدي يصنعون الحب " ! . . و الشعب يغني برضو مبسووووووط ! . . . طيب ما تسووا لينا معيار محاسبي أقل حاجة ياخ !
رغم ان استقامة الرأي بتتطلب انو نذكر الحقائق و انو فعلاً /جماعة الـ ACCA - القيادة و السيطرة - سيطروا على الشغلة خاااااااااالص !! من زمن الانقليز و ما ادو فرقة معاهم لزول و فشلوا في تطوير معايير سودانية ، و مركز الدراسات الحسابية ما قام بدورو المطلوب و ممكن نقول فشل فيهو عديل ، لكن بالمقابل كم حققوا للسودان ( عضوية لاتحاد الدولي - الامتحان المشترك مع زمالة المحاسبين القانونيين بانجلترا و ويلز ) - و هي اول اربعة اذ هن معترف بهن في الكار !؟
هل الحل المستقيم في حل " مجلس المحاسبين القانونيين السودانيين " ؟!!!!
دا حل البصيرة ام حمد ساي ! . . اها استفدنا شنو اسي غير طرودنا من الانترناشونال فيدرشين ، و زمالتنا السودانية بقت غير معترف بها و لا من فِرِد نفر و لا هيئة محاسبية ؟! . . و مصير 17000 طالب زمالة سودانية في مهب الريح ؟ . تعرف المرسوم المؤقت الصدر بيهو قانون مجلس تنظيم مهنة المحاسبة والمراجعة 2004 م ، دا كان وبال على مهنة المحاسبة ( في السودان ) . . بدل ما يتعامل مع مشاكل المهنة بموضوعية و علمية و مهنية وفق اخلاق المهنة - المحاسبة المهنة الاكثر إكتفاءاً في الناحية دي بدليل الوليدين الشرعيين للـ (IFAC) "مجلس المعايير الدولية للمراجعة والتأكيدات (IAASB)" و"مجلس المعايير الدولية لسلوك وآداب المهنة المحاسبية (IESBA)" - و بي كدا فتح لينا الباب على مصراعيه او على مصاريعو من القبل الاربع لهواء الدباغة ! . . و طبيعي بعد الإلغاء بدأ العد التنازلي لإضعاف المهنة.. ، زيادة خير راجع مقال الاستاذة / رباح الصادق دا : إعلان الخرطوم لتعزيز الشفافية ومحاربة الفساد . . أوقني التعبير " وتأكيدا لأن جرائم الفساد انتهاك لحقوق الإنسان "؛ عموماً ح ارجع لـ ( 6 ) دي عندي فيها جكة سغيرونة كدا فيما يخص جمعيتنا ( مكة المكرمة )

نرجع للبقر و الزراعة دي البتنفعنا بعد ما التتر يدمروا مهنتنا . . المرحوم الخاتم عدلان في مقال قال عن حارقي كتب ابن رشد " ما كانوا يدرون بأنهم يشعلون النار في رؤؤسهم ذاتها حينما حرقوا الكتب " او نحو ذلك

اسمع واصل في البراكتس و المعايير و انا معاك و بهابش في التنظير - النظرية - خصوصاً انو صاحبك البدوي اداي ليها مقشرة ، و الارباب و رحاب و بقية الشباب خليهم يتأكدموا كان يقنعو د. رحاب دي :

Quote: يدخل الارباب و قيقراوي و هم شايلين ليهم دفاتر و غازين اقلام في شعرهم وفي يدهم التانيه شاي و يقولو لهم: حا ننقذكم، لوووول

لووووووووولين تلاتة يا دكترة البغزوا القلم ديل قبيلة تانية ياخ ! و هم عربان توابع اليانكي ذاتو !
لكن تنفعي محاسب /سناريست رايك شنو في الهوية الهجين دي ؟ . . . سبع صنائع و ان شاء الله اصلواما يضيع ليك بخت . . . قولي آمين

و اعذروني ياخ على الخرمجة هي عبرة و نواح قلنا عشان ما نطق ياخ . . . غايتو البركة في الهلال العظيم


جايك يا سيدي البدوي



-----------------------------
بالجد تلفونات كتيرة في شأن البوست دا .. الشريف مبسوط منكم . . . واصلوا