|
|
 Re: صقر الحزب (الجمهوري الأمريكي) يهددني بالفضيحة ..وبوليس كيس . (Re: AMNA MUKHTAR)
|
عيون تلك الصبية فى فيديو اليوتيوب :
مرة كنت أتصفح اليوتيوب ، فعثرت بالصدفة على فيديو سوداني ( خبيث جدا) نشره أحد الذئاب البشرية . وفيه تظهر فتاة سودانية فى عمر الزهور ، شبه عارية وتنظر عيناها بتبلد غريب ..الى الكاميرا التى كانت تطوف بجسدها وتتفحص تفاصيله ..وملامح وجهها ، لتفضحها وتشهر بها أمام الخلائق ..
وكان الذئب البشري الذى يحمل الكاميرا يسألها بإلحاح ..وسادية غريبة : (إتكلمى ...عايزة تقولي شنو ) ...!!
وكان لم يكفه أن يعرض جسدها على اليوتيوب ، بل يريد أيضا أن يستنطقها ...لتكتمل الاستباحة ..صوت وصورة ..!!
يا للخبث وظلام النفوس ، يا لدعارة الدواخل..
يا للإنسان عندما يتفوق شره على الشيطان نفسه..
............
فى هذا الفيديو العجيب ..كان واضحا جدا ..ان هذه الفتاة الغضة الجميلة ، كانت فاقدة تماما ..لأى تقدير للذات ، و إحساس بالكرامة الانسانية .
بعد أن دفع الإفقار والإفساد الممنهج بها هى وأمثالها الى التسول بأجسادهن على قارعة الطريق ، لتكون نهبا للذئاب وضعاف النفوس ، الذين يستكنفون أن يمدوا يد العون لأمراة دون مقابل ، ودون أن يقبضوا الثمن مقدما..
الأمر الذى جردها وأمثالها من أدنى إحساس بالكرامة ، وأفقدها ثقتها بذاتها كانسانة ، وأضعف تقديرها لذاتها لدرجة أنها ظنت إن العيش فى هذه المهانة ..هو الوضع الطبيعى لها
فى بلدها ..وبين قومها ..
.......
تلك هى أكبر جريمة ...إفقاد اليافعات تقديرهن لذواتهن ، وأجسادهن ، كى يسهل إفتراسهن ..ومزمزة عظامهن..
| |
 
|
|
|
|
|
|
|
 Re: صقر الحزب (الجمهوري الأمريكي) يهددني بالفضيحة ..وبوليس كيس . (Re: AMNA MUKHTAR)
|
فى هذه التراجيديا الاجتماعية ..
ترى ..من هو المجرم ومن هو الضحية..
من هو الفاسق .ومن هو البرئ .. ؟!
فتيات فى عمر الزهور يضطررن الى بيع أجسادهن بأبخس الأثمان ..
من هو الآثم الحقيقي ...
هؤلاء الصبيات الغرات ..أم مهندسو ما يسمى بالمشروع الاسلامى الحضاري ..
والمجرمون الذين باعو البلد ومنشآتها بأبخس الأثمان فيما يسمى بسياسات الخصخصة والتحرير الاقتصادي ، التي طبقت بصورة غير مدروسة ..
و جابت عاليها واطيها ..
وأدت الى إنزلاق الطبقة الوسطى تحت خط الفقر ..
وسحقت الطبقة المسحوقة زيادة ..
وأدت الى ظهور رأسمالية طفيلية استباحت الأخضر واليابس..
وجرائم ما يسمى ب(الصالح العام )، التى شرد فيها معيلي الأسر ..
و أدت الى إنحدار كثير من المتعففين الى الحضيض ، ليلوكوا علقم الحاجة المر ..
وذل ما بعده ذل .
*
*
| |
|
|
|
|
|
|
|
|
 Re: صقر الحزب (الجمهوري الأمريكي) يهددني بالفضيحة ..وبوليس كيس . (Re: AMNA MUKHTAR)
|
يا أمونة.. ملاسي (الصغير) ده زول مياص
وصاحب منفعة من صقر الحزب الجمهوري ده!
ومن أول مداخلة ليهو في البوست ده دخل برجله الشمال..
وجاء جارياً منتصباُ لنصرة الشر!
هذا الصحيفي المقيد.. لا يفهم معنى الإغتصاب...
وهو من أنصار الإنتصاب قبل إغتصاب الضحايا.. وعليه لم يكتب حرفاً واحداً
ضد عمليات الإغتصاب الممنهج في السودان! لأنه صحيفي مُقيد وجــبان!
فكيف له أن يفقه ما تحسه الضحية.. وبالذات لو عندو علاقة بالجاني؟
وهو بيضع مسافة بين الواو والمعطوف بعدها.. فنصحناهو، إلا إنو أبى وإستكبر!
في تأشيرة خاصة إسمها الـ U فيزا بتسمح ليك بالدخول لأمريكا ومقاضات هذا المتحرش!
إتصلنا بالحزب الجمهوري لخصوص صقريته دي وفي إنتظار ردهم علينا...
الدنيا هنا قبايل إنتخابات... والناس ديل (الجمهوريين) ما برضو العيب.
والزول ده الفيسبوك بتاعه مليان مصايب!
_________________
قيقا.. بتفتكر ملاسي (الصغير) ده متواجد هنا بكثرة لدرجة (الضرس) لييه؟
وعليك الله أرجع للفيسبوك وشوف عويس إتسبب ليهو في عقدة (مستديمة) منو لييه!
| |
|
|
|
|
|
|
|
|
|
Re: صقر الحزب (الجمهوري الأمريكي) يهددني بالفضيحة ..وبوليس كيس . (Re: AMNA MUKHTAR)
|
التهديد بالفحص الطبى للعذرية :
ذكرنى الموقف العجيب الذى تعرضت له ناشطات مصريات ومشاركات فى ثورة 25 بناير ، بإجبارهن على الخضوع لفحص طبي للعذرية من قبل الشرطة العسكرية .
ما تعرضت له انا نفسى قبل سنوات بالتهديد بالفحص الطبى للعذرية من قبل أحد عناصر ما يسمى بجهاز الأمن السودانى .
وهذا الأسلوب بالمناسبة ..من الأساليب المفضلة لدى رجال الأمن السودانى ، لإذلال المعتقلات .
* فى مساء يوم من أيام انتخابات إتحاد طلاب جامعة الخرطوم فى أواخر التسعينات ، كنت فى طريقى الى المكتبة الأكاديمية فى شارع الجمهورية .
بحثا عن مرجع اردت الاستعانة به فى أحد الأبحاث الدراسية . ولأننى كنت جديدة على جامعة الخرطوم ، بل على الخرطوم نفسها . فلم أكن أعلم يومها
إن كل الشوارع المؤدية الى الجامعة كانت مفخخة بالأمنجية وعصابات الإنقاذ ومليشياتها ..
واصطادنى أحد هذه الذئاب المتربصة بالقرب من المكتبة ، حيث أوقفنى وسألنى عن وجهتى . وعندما أخبرته لم يصدق ..ولم يقتنع طبعا ( وأنى له ذلك ..فالمؤمن فقط.. صديق)...
وأصر على إننى فى طريقى لمقابلة أحدهم لممارسة الجنس ...!! .... وعندما أنكرت ذلك ، جذب شنطتى اليدوية وأخذ يفتش فيها
ويقلب محتوياتها بفضول ..ولهفة عجيبة !! عسى أن يجد شيئا يديننى به ...
وعندما لم يجد ما يبحث عنه ، طلب منى بلهجة جافة آمرة أن أركب فى سيارتهم ( سوزوكى بيضاء صغيرة كانت مركونة فى الظلام فى شارع جانبي )..
وعندما استنكرت هذا الأمر ..وسألته عن السبب ، قال بانه يريد أن يأخذنى ليفحصوا عذريتي !!
قال لى بالحرف الواحد : ( نوعك ده...عندنا ليهو علاج واحد ...الفحص الطبى عشان نكشفك على حقيقتك ) !!
ولم ينقذني من هذا المصير المؤسف إلا عثور الذئاب على ضحية جديدة ..أكثر إسالة للعاب مني ..على ما يبدو ..
حيث لمح الرجل شاب وفتاة يسيران شبه متلاصقين ، ويتضاحكان فى مرح وإنبساط ..
ويبدو أن هذا المنظر إستفز صاحبنا غاية الاستفزاز ..!!
فطلب منى بلهجة آمرة أن أنتظر فى مكانى .
ونادى على رفيق له بصوت عال ، وهرول الإثنان للحاق بالشاب والفتاة المساكين الغافلين ..
قال انتظرى هنا قال...
فى هذه اللحظة بالذات أطلقت ساقي للريح كأن هناك مليون شيطان يطاردوننى ..عبر شارع (بصريات محمد نور) الجانبي، ومنه الى شارع القصر ..
ولم أتوقف الا عند موقف المواصلات فى السوق العربى .
*
| |
|
|
|
|
|
|
|
|
|
Re: صقر الحزب (الجمهوري الأمريكي) يهددني بالفضيحة ..وبوليس كيس . (Re: AMNA MUKHTAR)
|
التحرش بالغلمان والشباب :
الصقور : الصقر عادة رجل ذو نفوذ من نوع ما ، يهوى إفساد صغار السن من الذكور ، عن طريق إغرائهم واغواؤهم بالمال والهدايا والهبات ..بهدف تحويلهم الى غرض أو متاع جنسى ..
الريدة :
أسلوب جديد للإيقاع بالشباب ذوى الميول الجنسية العادية ( غير المثليين ) ، واستدراجهم لإقامة علاقة جنسية معهم .
وذلك بعد أن يطرح الصقر رغباته بصورة مباشرة أو غير مباشرة ، وعندما لا يجد قبولا من الشاب ( الهدف ) ، يغير استراتيجيته و أسلوب تعامله وخطابه معه ..
مثلا : ( انا عارفك ولد كويس ...وقسما بالله انا ما عايز منك حاجة بس...بريدك لله فى لله ، وعايز أساعدك وأقيف جنبك فى الظروف الصعبة العلينا دى ، ولو احتجت لأى حاجة تعال لى طوالى وما تتردد ..و انا ما حا أتأخر.....عشان انا بريدك زى ما قلت ليك لله فى لله ...اعتبرنى اخوك الكبير ..عمك ..أبوك..زى أى زول قريب منك ..وبتثق فيهو وترتاح ليهو )..
....
وطبعا ..مع الظروف الاقتصادية الصعبة يقع بعض الشباب المحتاج فى هذا الفخ أو الشرك المنسوج بعناية ..شيئا فشيئا ...الى أن يصبح مدينا للصقر ( بمبالغ وجمايل كثيرة ) لا يستطيع سدادها الا عبر التنازل شيئا فشيئا ..الى أن تقع الفاس فى الراس ..
ثم بعانون باقى عمرهم ، من التعايش مع الاحساس بالمهانة والوضاعة ، والألم النفسى الرهيب .
| |
|
|
|
|
|
|
|
|
|
Re: صقر الحزب (الجمهوري الأمريكي) يهددني بالفضيحة ..وبوليس كيس . (Re: AMNA MUKHTAR)
|
إغتصاب طالب أجنبى :
أحد الطلبة الأفارقة الذى كان يدرس فى أحد المعاهد الشهيرة بالخرطوم ، تعرض لعملية إغتصاب بشعة عن طريق تهديده بسلاح ناري
من قبل أحد أساتذته فى المعهد .
وذلك عندما استجاب هو وزميل له الى دعوة (غير كريمة ) لتناول الغداء فى إحدى الفيللات التى يملكها هذا الأستاذ ( الشهير ) فى أحد الأحياء المجاورة للمعهد .
بعد تناول الغداء طرح هذا الذئب رغباته الدنيئة بكل وضوح ، مقابل مبلغ مالي .
فرفض الشابان ذلك ...فما كان من حضرة الأستاذ المحترم إلا أن أخرج من جعبته سلاحا ناريا ، وهدد به الشابين حتى ينصاعوا لرغباته ..
خضع أحدهما للتهديد خوفا على حياته ، حين فر الآخر قفزا بالبلكونة الى أرض حديقة الفيللا ، وساعده الحارس ( الغفير ) على الهرب ،
وذلك بعد أن تعرضت ساقة للكسر نتيجة القفز من البلكونة .
| |
|
|
|
|
|
|
|
|
|
Re: صقر الحزب (الجمهوري الأمريكي) يهددني بالفضيحة ..وبوليس كيس . (Re: AMNA MUKHTAR)
|
امينا الامين
سلامات
شاكوش شنو البديهو انا تاني? يا اخوي نحنا دخلنا تأبيدة و بجيبو لينا شاي و اكل و جرايد ياخ بقينا من نوع الفورة بليون ديك هههههه
يا امين صاحبنا دا الظاهر عليهو عارف يتلمى على نوعه شوف محن ناس الحزب الجمهوري بقولوا شنو
دا قال انه في اغتصاب مشروع اتخيل?
ظاهر هو عارف افكار و عمايل ناس الحزب الجمهوري عشان كدا اتلمى على متعوسى الرجا
بس شوف رئيسنا الزينة قال ليهو شنو!
| |
|
|
|
|
|
|
|
|
|
Re: صقر الحزب (الجمهوري الأمريكي) يهددني بالفضيحة ..وبوليس كيس . (Re: AMNA MUKHTAR)
|
الاخت امنة مختار
كل سنة و انت طيبة و السنة الجاية تحققي امنياتك و تهزمي "صقر" الحزب الجمهوري بتاع الورق دا.
طبعا يا امنة تود اكن ما نصيح, و زيو وزي اغلب ناس اليمين المتطرف يعادون المرأة محاباة لشركات الادوية و شركات التأمين.
تمت هزيمة دعاواهم بعدم ضرورة اعطاء الفتيات الصغيرات حبوب منع الحمل او ما يسمى بالمورنق آفتر morning after حيث ينصح الاطباء القاصرات المغتصبات تناول الحبوب لمنع الحمل, و طبعا شركات التأمين غير سعيدة بتغطية نفقات الحبوب على الرغم من ان القاصرة لديها تأمين صحي. و لما انهزم المتعصبين خاصة اولئك الذين يرفضون الاجهاض, حتى لو حدث حمل نتيجة اغتصاب, الان يحاولون ان يرفضوا تغطية النفقات الطبية لو قررت الزوجة, مثلا, انها لا ترغب في نتيجة ممارسة مع زوجها لو احست بانها لم تكن ترغب او تم اجبارها و تخويفها للممارسة بواسطة زوجها, و هذا المأفون تود اكن (تود دي نوع من انواع الضفادع و هو يشبه الضفدع ) يعتقد انه مشروع للزوج ان يخضع زوجته بالقوة لما يريد و يسميه اغتصاب مشروع!
اديهو يوم يومين, و حا يعتذر. و النساء الامريكيات لن يتركنه, و لانه دا موسم انتخابات سترين رومني ينكره حطب, و قد يطلب منه الاعتذار للنساء, و ربما تكون دي واحدة من النقاط التي ستسقط رومني في الانتخابات ان شاء الله.
| |
|
|
|
|
|
|
|
|
|
Re: صقر الحزب (الجمهوري الأمريكي) يهددني بالفضيحة ..وبوليس كيس . (Re: ناصر جامع)
|
Quote:
ملاسي يا امنه و عرفنا، زول بتاع خالف تزكر
البروف دا جنا و لا شنو
والله يا بروف مافي حاجه تليق أن اقولها لك في موقفك هذا
غير ياخي إختشي بتاعت دينق
أو تشهير بتاع فلينتك بتاعت كيكي
|
البروف اترش يا قدعان .. ولا بالانقليزي ذاتو!
-----------
يا ناصر يا حبيب لو قريت كلام البروف بشكل عادل و منصف، لن تجد فيه ما يستاهل انو يلف عليهو ..
بل هو كلام الحق و العدل .. وزول خايف انو تتشرع مسألة الاتهامات وتصبح مسألة عادية .. او اداة تصفية حسابات مشروعة تتغذى بعصبية المتهم وناسو وعزوتو ..
شوف هنا كم مسكين ممكن ياكلا جمرة لانو ببساطة ما عندو اصحاب وناس؟
قال درويش مرة:
وانت تحرر نفسك بالاستعارات .. تذكر غيرك .. من حرموا (حق) الكلام
هل المساحة دي ساحة (عدلية) يمكن الوثوق والركون لعدالتها .. ام ساحات القضاء؟
هل المسألة ذاتو هنا بتقوم على اكتر من (الكلام)؟
هل دا اساس جيد لاقامة (العدالة)؟
مش في حديث عن رسولنا الكريم في ما معناه في خلاف اتنين قد يكون احدهم افصح من التاني وياكلو حنك ساكت؟
او نحو ذلك؟
الغلط شنو في كلام امين انو القضاء هو الساحة الاليق بمثل هذه القضايا؟
وكل سنة واتنينكم ومن يسمع بالف خير
| |
|
|
|
|
|
|
|
|
|
Re: صقر الحزب (الجمهوري الأمريكي) يهددني بالفضيحة ..وبوليس كيس . (Re: Imad Khalifa)
|
Quote: و لو باكر يا بدرنا أديت ليك واحدة شاكوش و مشت منتديات (عكس الريح) قالت انك إتحرشت بيها جنسيا ... الدبارة شنو ؟
|
| Quote: بل هو كلام الحق و العدل .. وزول خايف انو تتشرع مسألة الاتهامات وتصبح مسألة عادية .. او اداة تصفية حسابات مشروعة تتغذى بعصبية المتهم وناسو وعزوتو .. |
يا قيقراوي سلام و عيد مبارك
لكن و الله يا قيقراوي بتبالغوا عديل كدا
شاكوش شنو و تصفية حسابات شنو البتخلي ليها بت تكذب و تتهم زول بالتحرش الجنسي و محاولة الاغتصاب؟؟؟
انتو الكلام دا بالنسبة للمرأة السودانية قايلنو نزهة اسافير؟؟
يا ناس انتو من السودان ولا من كوكب زحل؟
تشهير؟ ياخي هي لو عايزا تبشع بيهو يعني ما لقت حاجة تانيه غير التحرش الجنسي عشان تشهر بيهو؟
حرامي؛ امنجي؛ سلفتو قروش نكرا؛خان الامانه
انتو بتتكلموا عن المجتمع السوداني الواحد دا ولا قاعدين تتكلموا عن مجتمع باريسي
و الله امنه مختار دي الا عايزا تشهر بي نفسها و تسيئ لي سمعتها (و تحمد لها شجاعتها)
لانو قضايا الاغتصا ب دي حتي الاهل بضاروها و الناس تخاف انو سمعتهم و سمعت بتهم تتلاك علي السنة الناس
يجي البروف يقول ليك واحدة ادوها شاكوش؛ و انت يا قيقراوي جاي تقول تصفية حسابات
ياخي في ناس الزول الاعتدا علي شرفهم و شرف بتم دا يزوجوهو ليها خوفا من الفضيحه
و انتو تناقشوا الموضوع بترف فلسفي ما عندوا اي علاقة بي واقع السودان الاجتماعي
قليل جدا من النساء حتى في الغرب تتوفر لديهم الشجاعة للتغلب علي الحرج الشديد للحديث عن تجاربهم القاسية عن الاغتصاب و التحرش الجنسي
ملاسي في ناس كدا طوال تلقاهو في خطراتهم بطاردهم بالسنين
زي عصام جبرالله و واحد كدا اسمو مين الجزولي بتاع اتحاد الكتاب السوداين و تليحو لي امنه دا ما بخرج عن هذا الاطار
لكن انتو مالكم؟
| |
|
|
|
|
|
|
|
|
|
Re: صقر الحزب (الجمهوري الأمريكي) يهددني بالفضيحة ..وبوليس كيس . (Re: ناصر جامع)
|
لا حول ولا فوة الا بالله العلي العظيم
----------
ناصر جامع ياخي استهدى بالله كدي باللول .. وارجع اقرأ كلامي تاني (البروف ماعندي شغلة بيو، اصلو غير البلاوي والبل ما استفدت من جيهتو شي!)
ياخي كلامك الفوق دا انت جبتو من وين؟
منو الشكك في رواية امنة هنا؟
ياخي لو في وااااااحد بس مصدق امنة لكنت انا دا
ولو في النساء رسلاً .. لكانت امنة دي النبية ...
دا ما (محور) كلامنا .. ولا موضع خلافنا
الموضوع المعالجة ياخي
اسفيرية ام قضائية
ان شاء ربنا يكون فك عثرات قولي؟
| |
|
|
|
|
|
|
|
|
|
Re: صقر الحزب (الجمهوري الأمريكي) يهددني بالفضيحة ..وبوليس كيس . (Re: ناصر جامع)
|
ولا يمهك يا ناصر ياخي
كلو لخير ..
Quote:
معليش يا جماعة لن أستطيع الرد على المتداخلين تاني حسب نصيحة المحامي .
ولكني سأواصل الكتابة عن موضوع التحرش الجنسي كموضوع عام .
الاستاذة/ امنة مختار
|
Quote:
أكبرت فتحك للبوست الأول عن الموضوع لانو بتكلم عن تجربة شخصية بتنبه باقي الناس علي جريمة بتحصل في يوميا و مافي زول عايز يتكلم عنها في مجتمع بجرم ضحية التحرش الجنسي و يربت علي كتف المجرم عشان يواصل مع ضحية تانية ... أكبرت البوست الأول لانو ما كان فيهو إسم متهم و كان بناقش قضية عامة من خلال تجربة شخصية ....
بوستك التاني ذكرتي فيهو إسم المتهم و الراجل كل العملو إنو مشي القضاء ... و القضاء يا أخت آمنة هو محل ما الناس بتلجأ لاخد حقوها ما صفحات الانترنت خاصة لو كان المتهم ما عندو إشتراك و لا علاقة له بمكان كتابة الاتهام .... بذكرك لاسم المتهم انتي بتاسسي لمفهوم جديد بتاع تصفية حسابات - كان بالحق كان بالباطل - لانو لو الليلة آمنة مختار صادقة في اتهاماتها بكره أمين محمد سليمان بتحصل ليه مشكلة مع زول بره المكان ده و ممكن يجي ينجر أي كلام عنو و يجو أصحاب أمين و معارفو ( بغير علم ولا هدى ولا كتاب منير ) يتضامنو معاهو و يظلم زول بدون سبب غير إنو وقع مع زول غلط ...
بروف امين مبلول
|
----------
دا بالضبط الدعى ليو البروف -رغم انو علاقتو بالقانون زي علاقتي انا باللغة الفرنسية- تخمين ساي اظنو!
| |
|
|
|
|
|
|
|
|
|
Re: صقر الحزب (الجمهوري الأمريكي) يهددني بالفضيحة ..وبوليس كيس . (Re: قيقراوي)
|
| Quote: دا بالضبط الدعى ليو البروف -رغم انو علاقتو بالقانون زي علاقتي انا باللغة الفرنسية- تخمين ساي اظنو! |
قيقراوينا يا نحرير
انت عارف يا قيقراوي, لأن البلد دي بلد قانون ليس بالضرورة تكون محامي عشان تعرف قانون!
تشتغل سواق تكسي لازم تعرف القوانين المرتبطة بعملك.
تشتغل في دكان و لا في مصنع و لا شركة اهم حاجة تعرف القوانين المتعلقة بشغلك.
و في اي كلية ضمن المناهج ممكن تاخد كورس بتاع قانون, و اي مادة يدرسوها ليك لازم يدرسوك القوانين المرتبطة بيها فالوعي القانوني اهم واجبات المواطنة.
انا اخدت كورس واحد بتاع قانون و استفدت منه جدا.
اتخيل يا قيقراوي, نحنا درسنا زراعة في السودان و لم يتم تدريسنا اي حاجة عن القوانين المتعلقة بالزراعة!
هنا مافي كلام زي دا, لازم تعرف القوانين المتعلقة بالمياه و الري و استعمال الاسمدة و المبيدات و... و... و....
و بغض النظر عن مجال عملك, مخدمك لازم يعمل ليك تنوير في موضوع التحرش الجنسي, و يمضيك عليه. و الا لو حدث في مكان العمل ستكون الشركة مسئولة و عليها دفع تعويضات و غرامات باهظة.
الحكاية مضبوطة جدا هنا.
امينا الامين بتاع تنظير ساكت هههههههههه
يا امين بهاظر وحاة النبي!!!!
| |
|
|
|
|
|
|
|
|
|
Re: صقر الحزب (الجمهوري الأمريكي) يهددني بالفضيحة ..وبوليس كيس . (Re: بدر الدين احمد موسى)
|
بدرنا العالي قدرو
Quote:
اتخيل يا قيقراوي, نحنا درسنا زراعة في السودان و لم يتم تدريسنا اي حاجة عن القوانين المتعلقة بالزراعة!
|
اجل ما درستو حاجة
Quote:
انت عارف يا قيقراوي, لأن البلد دي بلد قانون ليس بالضرورة تكون محامي عشان تعرف قانون!
|
بعرف خيو .. بعرف
على عكسكم نحنا -في بزنس- لانو اصلاً ما ممكن .. واحد من تعريفات المحاسبة انها (فن يمارس في اطار القانون)
والمحاسبة جزء من الجهاز العدلي ..
لكن كم سنة ضوئية تفصلنا من فمهكم بهناك؟
ياخي البعرفو انو في امريكا الشقيقة دي بكون عندك (محاسب الاسرة) الخاص .. زي الطبيب الخاص .. وقطع شك المحامي الخاص!
ودا بسبب الضرائب طبعاً في المقام الاول
انت قايل زمالة الـCPA المصعبا علينا شنو برا القانون دا انت قايل؟
------------
كرفست مشاعري ياخي .. لمن فهمت اني قاصد انو لا علاقة بين البروف والقانون!
انت قايل علاقتي باللغة الفرنسية كعبة هي!؟
درستها في الثانوني وفي (السدست) الوحدة العلمية الفرنسية الملحقة بكلية الآدب - جامعة الخرطوم
لكن النصيحة معرفتي المذكورة اعلاه تندرج تحت تصنيف (معرفة قليلة)
وزي ما عارف .. المعرفة القليلة شر مطلق!
خصوصاً البتبرعوا بيها دي .. هي معرفة ما كفت سيدا في رقبتو دي شن طعما؟
| |
|
|
|
|
|
|
|
|
|
Re: صقر الحزب (الجمهوري الأمريكي) يهددني بالفضيحة ..وبوليس كيس . (Re: قيقراوي)
|
| Quote: و يا بروف العفو و العافية |
حبيبنا ناصر ... سلام ياخي ... حقيقة حيرتني ... ما لانك جيت بليتني بإختشي و مرقت لي فنيلة كيكي بدون إبداء أي سبب و بس ... لكن كمان كسرت رقبة كلامي و كلام قيقا و عملتها إننا بنفتكر إنو آمنة بتشهر بي نفسها و بتسيئ لي سمعتها و كلام تاني كتير ما عندو علاقة باي كلام قلناه كان أنا كان قيقا المغرض ده !!
أرقد عافية ياخي ... و العفو لله و الرسول...
------------------------------
و إنت يا قيقا يا حليلك البقيت تدافع لي !!
------------------------------
| Quote: يا امين بهاظر وحاة النبي!!!! |
يا بدرنا ... لا يحتاج ... أمريكي لا يحتاج ياخي !!
Quote: موضوع التحرش الجنسي, و يمضيك عليه. و الا لو حدث في مكان العمل ستكون الشركة مسئولة و عليها دفع تعويضات و غرامات باهظة.
|
تعرف يا بدر ... كمية ال orientations الخشيتها بتاعت ال Sexual harassment في البلد دي لو وزعت علي الشعب السوداني الشقيق لكفته .... مشكلة ال Sexual harassment إنو ممكن يكون أي حاجة ... سلام الله ده ممكن يطلع Sexual harassment لو عملتو بطريقة معينة ... و القصة دي للجنسين ... لكن طبعا الرجال - باعتبارهم مخلوقين من طينة الاسي - هم الأكثر تحرشا و بما لا يقاس !
و يكاد لا يخلو مجتمع من التحرش الجنسي و في السودان الشقيق ممكن تتحرش زي ما عايز لانو القانون ما بردعك و المجتمع كان ما طبطب عليك و طلعك ود فقري و بتبل بدري ما بعمل ليك حاجة ... و الضحايا ما يقدرو يفتحو خشمهم حتي لاقرب الناس كان أبو ولا أخو ... لانو أول سؤال ليها بكون تجريمي : إنت الوداك هناك ذاتو شنو و سين و جيم و فضيحة و خوف من الفضيحة أخير الواحدة تموت بمغستها ... الكلام ده بحصل الالف المرات يوميا و علي مقربة منا في الشغل و في المواصلات و في الشارع و المجتمع كل يوم ماشي علي يوم أظرط من أخية عشان كده بوست آمنة الاول كان أعمق لانو فتح نقاش في مسالة الناس محتاجة تناقشها و تلقي ليها حلول كمجتمع ... عكس البوست ده اللي المسالة بقت فيهو شخصية و الشخصي محلو المحاكم !!
كامل التضامن مع أختنا آمنة و كل اخواتنا اللي تعرضو لاي نوع من أنواع المضايقات !!
| |
|
|
|
|
|
|
|
|
 Re: صقر الحزب (الجمهوري الأمريكي) يهددني بالفضيحة ..وبوليس كيس . (Re: AMNA MUKHTAR)
|
الوصمة Stigma :
فى مجتماعتنا (المتخلفة ) ، بل حتى فى العالم المتحضر .
تخشي الضحية ..خاصة إذا كانت إمرأة ، من هذا الوحش النفسي ، الذي إسمه الوصمة .
الذي سيلاحقها طوال حياتها هى وأسرتها ، لو هى تجرأت وبنست ببنس شفة ، وحكت تجربتها أو وكلت الأمر للقانون ليأخذ لها حقها .
لذلك تفضل معظم النساء الصمت ..
حتى لو مزقهن هذا الصمت فى دواخلهن .
لأن لهذه الجريمة طابع خاص (جنسي ) ..
و تناول الأمور الجنسية علنا ، يعتبر من المحرمات أو الأمور المستهجنة لدى أغلب مجتمعات العالم ..
بل يثير السخط والإشمئزاز من متناوله ، بل حتى الشكوك والريبة .
ودونكم قضية الباسلة صفية إسحق ..
التى أطلق بعضهم العنان لأقلامهم دون وازع من ضمير
للتشكيك فيها والإساءة لها .
التحية لصفية إسحق
التى مهدت لنا الطريق .
وأتمنى أن يأتي يوم
تكسر فيه كل نساء السودان حاجز (الوصمة ) النفسي الرهيب ، ويركلنه هن وأسرهن ..حتى تكون هناك شفافية حول هذه المواضيع المحرم تناولها علنا .
وأتمنى أن يحدث التحول الديمقراطي الحقيقي قريبا جدا ، وتتغير كل القوانين المقيدة للنساء ، وتسن قوانين رادعة حول التحرش الجنسي والإغتصاب ..
حتى لا نضطر نحن أن نلجا لمواقع السايبر ..لنفضفض عن (بعض ) ما نعانيه .
وأكاد أجزم ، إن عدد لا يحصي من نساء السودان
تعرضن لهذا النوع من الممارسات غير السوية .
فتخيلوا لو أعطاهم المجتمع والقانون الأمان ..ولم يشككوا فيهن وفى أقوالهن ...؟
عيييييييييييييييييييييك على قول الأمير الكوشي .
______________
مع العلم بإنني قد تعرضت لكثير من حوادث التحرش الجنسي فى أماكن مختلفة
الدراسة والعمل والشارع الخ
ولكن كانت هذه أول مرة أتعرض لمحاولة إغتصاب عدييييل كدا ..
وسمعت خلالها عبارات (عجيبة ) لو كتبتها هنا ..لحذف هذا البوست فورا .
| |
|
|
|
|
|
|
|
|
|
Re: صقر الحزب (الجمهوري الأمريكي) يهددني بالفضيحة ..وبوليس كيس . (Re: AMNA MUKHTAR)
|
Quote:
أعني محاولة إغتصاب فى مجتمع زى مجتمعاتنا دى ..
|
بالمناسبة في السودان الشقيق دا ذاتو في كمية من المنظمات العاملة في مجال التوعية ومكافحة الحاجات دي
وفي نساء ورجال شغالين دون كلل وملل في حماية الاسر ..
طبعاً غير حكومية
----------
لا طبعاً .. ما متا قبل كدي
لكن شقيت المقابر:)
واتمنى ما اكون ابديت بلادة حس انساني هنا، استدعت السؤال!
| |
|
|
|
|
|
|
|
|
|
Re: صقر الحزب (الجمهوري الأمريكي) يهددني بالفضيحة ..وبوليس كيس . (Re: قيقراوي)
|
يا قيقا شكلك لسه ما شقيت المقابر ذاتو :)
أما عن تساؤلك الأخير ...فالبعكس ..
فبعض المداخلات هنا ..مع إختلافي معها فى وجهة النظر ..
إلا إنها تثير عصفا ذهنيا محمودا حول الموضوع (فى عضمه ) ..
(إلا مداخلات ملاصي المغروضة بالبطبع :)...والتى أكاد أجزم بأن لو كاتبة هذا البوست كانت زولة تانية ، لإختلفت مداخلاته إختلافا كبيرا )
............
بعدين منظمات شنو ..عليك الله ما تشكر لى الراكوبة فى عز الخريف ، وتقلب علينا مواجع تانية ..ما ناقصين .
هسه ناس المنظمات ديل تفتكر ما قروا موضوعي دا من زماااااان ، وكثيرون منهم أعرفهم معرفة جيدة ...فليييييييييه ما قالوا بغم ..ولا حتى سألوني عن الحاصل ؟!
________________________
نقطة سطر جديد /
أذكر إنى حكيت عن هذا الأمر فور حدوثه ..لصديق مقرب مني جدا ..
فقام شاكلني شكل شديد
وقال لي : (إنتي الغلطانة ..البوديكي شنو براكي ليهو فى مكتبه ..بدون ما تسوقي معاكي زول ؟
إنت قايلة فى بت بشغلوها بدون واسطة قوية ، أو دون أن تعرف صاحب العمل معرفة شخصية ؟
والمعاينات دى إنت قايلاها شنو ..
المعاينات فى العهد دا ..للشكل والمظهر وليس المؤهلات )
الأمر الذى جعلني أنا ذاااتي (ألوم نفسي ) مدة طويلة على تعرضي لهذه التجربة ..
ولكن كان هناك شئ فى داخلي يقول لى إننى لم أرتكب جرما ..بالبحث عن عمل دون واسطة أو معرفة .
.........
وهذه الحادثة المريرة ..جعلتني أتعقد من العمل فى الصحافة حتى هذه اللحظة ..مع إنها كانت أول مهنة عملت فيها فى حياتي .
| |
|
|
|
|
|
|
|
|
 Re: صقر الحزب (الجمهوري الأمريكي) يهددني بالفضيحة ..وبوليس كيس . (Re: AMNA MUKHTAR)
|
طالب أجنبى يتعرض للاغواء والتحرش الجنسى :
قبل سنوات فى الخرطوم ، فى هذا العهد ، عهد المشروع اللاسلامي ولا حضاري ..
تعرض طالب دراسات عليا فلسطيني الجنسية ، لمحاولة إغواء من قبل أحد رجال الأعمال ( المعروفين ).
فى يوم كان يسير فى شارع المك نمر ، فتوقفت الى جواره سيارة فارهة ، عرض عليه صاحبها أن يوصله فى طريقه .
رحب الشاب بالعرض بكل حسن نية ، لأنه يدرس فى السودان ويعرف إن السودانيين متعودين على التنقل بأسلوب ال(أوتوستوب) أو فضل الظهر ،
لذلك لم يجد غضاضة فى أن يركب الى جوار هذا الرجل الغريب .
أصر الرجل على أن يوصله الى حيث يقيم ، بل وعزم نفسه على فنجان شاي فى بيت الطالب الذى رحب بذلك بكل سرور ردا للجميل ، وقال له : تفضل البيت بيتك
ويبدو ان صاحبنا صدق فعلا ان (البيت بيته) ، فصار يعزم نفسه كل يوم الى بيت الطالب ، محضرا معه مالذ وطاب من أطعمة ومشروبات ..
وعندما زاد الأمر عن حده ، أشتكى الطالب لاصدقائه وزملائه السودانيين من أن هذا الرجل صار يضايقه هو وزميله فى السكن بزياراته المفاجئة وغير المرغوب فيها ..
فأقترح عليه أحد الأصدقاء أن يستدرجه ليعرف منه ماذا يريد بالضيط ..
وتحديدا إقترح عليه أن يطلب منه خدمة كبيرة أو مبلغا من المال ..
وعندما نفذ الطالب الخطة ، لم يكذب الرجل خبرا ..ووجدها فرصة سانحة ليطرح رغباته الدنيئة بكل وضوح مقابل عرض مادي مغر ..
فما كان من الطالب الا أن شتمه وطرده ، وههده باللجوء الى الشرطة لو تجرأ وعتب دارهم مرة أخرى .
*
| |
|
|
|
|
|
|
|
|
 Re: صقر الحزب (الجمهوري الأمريكي) يهددني بالفضيحة ..وبوليس كيس . (Re: AMNA MUKHTAR)
|
أغرب مافى هذا الموضوع..
إن صديقا أسر لى ، بان زوجته تصر على ممارسة الجنس معه (كل يوم ) ..
حتى لو كان مرهقا ، أو ليس لديه أى رغبة ، وإنه يشعر أحيانا بأنها تغتصبه ..
ظننته يهذر وغير جاد ..ولكنه أقسم لى بهذا الأمر .
وقال لو لم يكن بينه وبينها عيال ، لكان طلقها منذ سنوات .
وإنه يفكر جديا فى أخذها للعلاج من مرض ( إدمان الجنس ) ...!
لأنها تفتعل معه مشكلة كل يوم بسبب هذا الموضوع وتهدده بالذهاب الى أهلها ..أو بخيانته ..!
| |
|
|
|
|
|
|
|
|
 Re: صقر الحزب (الجمهوري الأمريكي) يهددني بالفضيحة ..وبوليس كيس . (Re: AMNA MUKHTAR)
|
مداخلة للأخ أشرف الباقر ..فى بوستي (أن تكوني مغتصبة ) /
Quote: اخت امنة تحياتي
الأغتصاب العشوائى العنيف موجود بس بصورة محدودة جدا
الأفظع فى نظرى هوى الأغتصاب الهادى المبرمج. وما اكثره هذه الأيام
يعني
من يستغل وسامتة او لباقتة وحتي قروشو فى خداع بريئة ساذجة محتاجة باسم الحب ووعد الزواج
انتي قايلة اطفال المايقومة ديل ابناء عاهرات؟
صديقينى ما فى عاهرة بتحمل. |
| |
|
|
|
|
|
|
|
|
 Re: صقر الحزب (الجمهوري الأمريكي) يهددني بالفضيحة ..وبوليس كيس . (Re: AMNA MUKHTAR)
|
قبل سنتين تقريبا كتبت فى مدونتي .. كلاما غاضبا بعنوان ( يا بنات السودان إحردن الزواج) غضبا من ظاهرة إستغلال البنات بوعد الزواج..
ولكني لم أجرؤ على نشره خشية أن أتهم باننى أعادى الزواج كمؤسسة شرعية لها قداستها..
( ومع ذلك شتمت شتائم مقذعة فى تعليقات لو نشرت مضمونها هنا لحذف البوست ....علما إننى لم أكن أحذف التعليقات فى مدونتي حتى لو كانت شتائم )
.............
والذي دفعني لكتابة هذا الرأي ملاحظتي إن
( بعض ) الرجال يرون ان ذكورتهم فى حد ذاتها إستثمار ..ما بعده إستثمار..
ويستخدمونها أسوأ استخدام ، فى إغواء الراغبات فى الزواج ..كأن لسان حالهم يقول : عشمونهن ، إستغلوهن ، ثم إرموهن ..
......
المرأة صارت ( تعاقب ) على رغبتها فى الزواج..
مع إنها من الطبيعى أن ترغب وتسعى للزواج لأساب كثيرة..
من ضمنها إن المجتمع لا يسمح لها بالتنفيس عن رغباتها الطبيعية خارج نطاق الزواج..
إضافة الى غريزة الأمومة الجامحة التى تستبد بها وتلح عليها فى أن يكون لها أطفال ..
كما إن المجتمع ينظر اليها ك(المعاقة) إذا فشلت فى( إقتناص بعل )..
غايتو ..
| |
|
|
|
|
|
|
|
|
|
Re: صقر الحزب (الجمهوري الأمريكي) يهددني بالفضيحة ..وبوليس كيس . (Re: ناصر جامع)
|
Quote:
والله يا قيقا نفس الاحساس ... سؤالها ده فهمت منو نفس الفهمتو إنت في شكل رجاء ده !!
|
حننتني .. وقطعت نياط فؤادي الشمال عديل كدا ياخي
والله يا بروف بقيت تنافس هيثم (ساي) في متاهته الاخيرة والبارانوايا!
لكن في مطعم الباشا الظالم اهلهو دا احسن الزول يلعب على المضمون ..
بس لو ابصلعة يساعدا بايقونة للنوايا نرفقا مع المداخلات بدل الوشوش الخدرا دي يكون ما قصر كلو كلو
------------
يا امنة الناس قاعد تشتغل في ظروف قاسية جداً .. وبتحاربوا من الجهات الرسمية (!!) .. للأسف
لكن الانبياء ديل بعملوا بنبل خرافي!!
| |
|
|
|
|
|
|
|
|
|
Re: صقر الحزب (الجمهوري الأمريكي) يهددني بالفضيحة ..وبوليس كيس . (Re: قيقراوي)
|
التحية لك أستاذة آمنة على فتح هذا الموضوع الهام جداً
وكم أتمنى ان تكون هناك قوانين رادعة تجاه الاغتصاب
وقبل القوانين نحتاج الى توعية شاملة تحث الجميع على تجنب مثل هذه الأمور
وأن نرتقي جميعاً حفاظا على ابنائنا وبناتنا
قصة مؤلمة جدا ومؤثرة وتنم عن اعاقة نفسية بكل ماتحمله الكلمة من معاني موجعة
أحببت ايضا ان انوه الى ان الآية الكريمة هي من الايات الأخيرة في سورة { الكهف } وليس سورة آل عمران
قال اغتسال قال !!!!
وكمان شنو قال تيمم قال !!! دي شفافية عجيبة جداً !!!Quote:
حكمت صوت العقل أو الطفولة و في النهاية رضخت لهذا الوعيد .... لدهشتي بعد ان فرغ من غسله أمرني بالإغتسال إستعداداً لصلاة الصبح و تعللت بالبرد و أمرني ان اقوم بالبديل وهو التيمم .....
بعد تكبيرة الإحرام و قراءة الفاتحة تبعها بأحد أياته المحببة و هي (قل لو كان البحر مداداً لكلماتي ربي و الخ)
| |
|
|
|
|
|
|
|
|
|
Re: صقر الحزب (الجمهوري الأمريكي) يهددني بالفضيحة ..وبوليس كيس . (Re: ابوحراز)
|
العزيزة امنة،
القومة ليكي حقيقة.
فخور بيكي او بي جراتك، او ثقتك الكبيرة بي نفسك.
البتسوي فيهو ده حاجة ما ساهلة ولاعابرة اطلاقا، في ظروف مجتمع ابوي، ذكوري، بطريقي، عشائري، قبلي، جهوي، ابارثيدي، اسلاموي، المراة فيه الان تمر باحط وارذل مراحل تطورا او وجودا علي الاطلاق بطول وعرض اكثر من 40,000 سنة، عمر ثقافتنا الوضعت اساسو المراة تحديدا، وليس نوع الذكور، يا للتفرد!!
حالنا كشعب مائل، لانو حال المراة في مجتمعنا مائل، وهذه حقيقة لم نتبينها بعد.
المماليك انتبهو الغريبة للخاصية دي في مجتمعنا، او تعمدو يختطفو الملكة الام، والدة احد ملوك كوش في دنقلا، فتوسل الرجل اعداؤ في انكسار او قال ليهم، ما معناه، من دون دورا، فملكه لن يدوم!
انجع سلاح علي الاطلاق في يد المراة في مجتمع بطريقي ذكوري زي مجتمعنا بحكم الاستلاب، ان تمضي المجني عليها في طؤيقا الي اخر الشوط بتعرية الجاني، والرهيفة تنقد!
مافي مخرج اخر.
المنحط ملاسي جاييك يا اب نفسا صغيرة، بحق، حايم بي بقج غباينك!
| |
|
|
|
|
|
|
|
|
|
Re: صقر الحزب (الجمهوري الأمريكي) يهددني بالفضيحة ..وبوليس كيس . (Re: Bashasha)
|
كتب الفنان التشكيلي طلال ناير
هذا الستيتوس المر
فى الفيسبوك /
Quote: Talal Nayer
أقشعر بدني وأنا استمع لتفاصيل جريمة إغتصاب طفلة تبلغ من العمر 13 عاماً. الجاني يبلغ من العمر 29 عاماً، قام خدر الطفلة وإغتصبها بعنف، وتم القبض على الجاني بعد 3 ساعات فقط من جريمته وهو يستمتع بحفلة موسيقية في نادي الضباط( وبيرقص بأعلى مزاج كمان). قامت المباحث بالقبض عليه وقام بتمثيل الجريمة وسجلت الوقائع على CD وسجل الجاني إعترافاً قضائياً كاملاً، وأثبت الطب الشرعي حدوث الإغتصاب، وقام بدقة بتحديد ساعة وقوع الجريمة. رئيس مباحث ولاية الخرطوم أشرف بنفسه على عملية القبض على الجاني.
حكم القاضي علي الجاني القضاء بسبع سنوات فقط لأن القاضي قال بأن الطفلة أغوت الرجل بإغتصابها!!!
يفترض؛ حسب قانون رعاية الطفولة، أن يحكم القضاء على هذا الرجل بالإعدام. اليوم كان من المفترض الحكم في القضية في محكمة الإستئناف، ولكن تحت ضغط فكرة الفضيحة والعار قامت الأم بشطب القضية من دون إخطار المحامية أو حتى والد الطفلة، وقامت بالعفو عن مغتصب إبنتها بعد تدخل أسرته والتي عرضت فكرة زواج المُغتصِب من المغتصَبة كحل للمشكلة، وأصيبت البنت بحالة هيستيرية عند معرفتها بهذا الشئ، وأنهار عرض الزواج، وأنطلق الجاني حراً طليقاً لم يخسر فيها إلا الأيام التي لم يستطع فيها الرقص في حفلات نادي الضباط. ولاحقاً عرفنا بأن الأم تقوم بتعذيب البنت وضربها بشكل يومي على مدار الساعة بإعتبارها الجاني الذي جلب العار للأسرة.
وكل يوم نرى فيك يا سوداننا ما يقطع نياط القلوب |
| |
|
|
|
|
|
|
|
| |
AMNA MUKHTAR
Mohamed Yassin Khalifa
بدر الدين احمد موسى
قيقراوي
Imad Khalifa
أمين محمد سليمان
محمد المسلمي
ابوحراز
Bashasha
فيس بوك
تويتر
انستقرام
يوتيوب
بنتيريست