|
|
 الاستاذ محمد ابراهيم نقد ماذا يقول عن حلايب هل هي مصريه أم سودانية جريدة الاخبار 20 ديسمبر2009
|
حوار مع الأستاذ محمد إبراهيم نقد
الكاتب/ أجرى الحوار: رئيس التحرير- لمياء الجيلي- عادل حسون
Sunday, 20 December 2009
السكرتير العام للحزب الشيوعي السوداني (2-2)
أطراف عديدة أصبحت طرف في اللعبة السياسية!
مافي مبرر حلايب تصبح عظمة نزاع، واقترح إدارة مشتركة بين مصر والسودان حسماً للنزاع..
نوستاليجا مصطلح يعنى الحنين إلى الماضي، أصل الكلمة يرجع إلى اللغة اليونانية، إذ تشير إلى الألم الذي يعانيه المريض إثر حنينه للعودة لبيته وخوفه من عدم تمكنه من ذلك للأبد. في محاولة منا لاسترجاع الماضي ومقارنته بالحاضر، في ظرف تعاني منه البلاد من كثير من الأمراض والأزمات، كان اختيارنا للحوار مع السكرتير العام للحزب الشيوعي السوداني، الأستاذ محمد إبراهيم نقد، حول السودان القديم، وأي الملامح والتجارب السياسية التي يمكن الإستفادة منها في معالجة حالة السودان الراهنة.. فكان الجزء الأول من الحوار يدور حول هذه الحالة، وعن أهم ملامح السودان الجديد لدى السكرتير العام للحزب الشيوعي. فدار الحديث في منزل الأستاذ نقد في جوٍ من المرح مشوب بكثير من الصراحة والشفافية حول القيم السودانية الحقيقية والعلاقات الاجتماعية الطيبة بين قادة الأحزاب السياسية على الرغم من اختلافاتهم السياسية والفكرية، فإلى الحلقة الثانية والأخيرة من مقابلة (الأخبار) مع السياسي والمواطن محمد إبراهيم نقد:
ما هي العلاقة التي ربطت بين السياسة والثقافة قديماً؟.
النهضة الوطنية، البلد كلها ناهضة لفوق بعد الحرب، لأن الحرب وعت كل شعوب العالم، لأنو المستعمرين، الانجليز والفرنسيين، وعدوا الشعوب بالاستقلال إذا وقفت معهم، وميثاق الأطلنطي، بين تشرشل وروسيا وَُقع في سفينة في وسط الأطلنطي، قالوا أنو الدول الديمقراطية ستمنح الشعوب التي تقف معها في الحرب، تمنح المستعمرات الحرية والاستقلال، بعدين دي حاجات كانت مؤثرة، السودان أيام الحرب ما كان جيعان، صحي في تموين وكدا، لكن البلد كانت مرتاحة جداً، لأنو بتجئ المؤن بتاعت الجيوش، وجيوش الإمبراطورية كلهم كانوا موجودين هنا، الهنود والآسيويين والإنجليز والأسرى الطليان كلهم كانوا موجودين هنا، وقوة دفاع السودان برضو..
كيف كان شكل المنابر السياسية؟ الآن، التلفزيون، الندوات، الصحف وغيرها؟.
مؤتمر الخريجين كان في كل مدينة من مدن السودان، ودا كان المنبر الأساسي، مافي اتحاد طلبة وإلا كان في الإجازة يعمل مسرحية، والعائد بتاعها بيُدفع لمؤتمر الخريجين، دا دخل ما كان ساهل.
هل من الممكن إجراء قراءة للواقع الحالي، تغيير اللُعبة السياسية، هناك أطراف مؤثرة جديدة ليس القادة السياسيين فقط؟.
طبعاً هناك تغيير، وأطراف جديدة ظهرت، ما عادت القوى الطائفية براها، هناك تغييرين أساسيين، صحي الأطراف نفسها تغيرت، عندك الجنوب، مهم بالنسبة لكل الدول الغربية، وتحقق للجنوب ما لم يحدث لكل الأقليات الأخرى، مصر دورها ما عاد بنفس الزخم، لانشغالها بغزة وفلسطين وإسرائيل، دارفور أنا تابعت شغل منبر دارفور وطبيعة الأزمة لغاية أمس، يعني مناوي جاء وبقى طرف في العمل السياسي، لكن عبد الواحد وخليل، ما بتحس بأنهم هنا، عندهم ناس بالتأكيد يعني، ما صدفة أنو صوت بونا ملوال رجع تاني يرتفع، ويشكلوا قلق للحركة الشعبية، وهم ناس عندهم نفوذ قبلي، وسياسيين، وقاعدين في البلد وعندهم علاقاتهم الدولية، بكل الوزن بتاعها، أنا لاحظت أن القوى الغربية بتأخذ كلامهم بجدية أكثر من كلام الحركة، لأن الحركة في فترة كانت مع اليسار وإثيوبيا، يبقى أنت محتاج لصيغة تطرح القضايا بكثافتها موش في ورقة، دي لغاية دلوقت لم نصل لها، ويمكن الوصول إليها إذا كان الناس كشفت أوراقها، أفتكر أنو هسه مافي زول رابح، الحركة والمؤتمر الوطني هم الحاجات بتمشي لهم باعتبار أنهم الماسكين المفاتيح الأساسية في التحول الديمقراطي والاستفتاء، الدول العربية ما فيش دور واضح، غائبة بالعكس أفريقيا أنشط ، أمبيكي، وفي الجنوب أكثر، الشقيقة الكبرى زمان كانت بتنجد الناس، هسه شغالة بطرف أصابعها لا أكثر من كدا، في موضوع حلايب، زي مشاكل الورثة في الشمالية، كل يوم والتاني ماشين الدامر في قضايا، أذكر أنا وعز الدين علي عامر دعونا ناس حسني مبارك سنة 88م ومشينا ليهم ومقابلات كثيرة عملناها وبعدين مشينا وزارة الخارجية القسم الخاص بالسودان، وسألونا ماذا نريد، قلنا ليهم عايزين حاجة بسيطة جداً، لما عملتوا العبور في قناة السويس عايزين البنطونات الاستخدمتوها، فنحن في منطقة الشمالية كل يوم الناس غرقانة، عايزين نوديها ليهم، الراجل قالي طيب، عايزين تعبروا بيها من الشرق للغرب ولا من الغرب للشرق؟، قال لي: أصلو السودان دا خازوق، تجيهو من هنا خازوق ومن هنا خازوق، قال لي نحن ما عارفين نعمل شنو مع قرنق دا، جاء من وين وعايز إيه، إيه المانع أنو تكون في معارضة سودانية في مصر، إزاي هو يروح إثيوبيا؟، قلت ليهو إثيوبيا لأنو عندها حدود مع الجنوب الوصول ليها ساهل، هنا صحراء العتمور دي يقطعها كيف، قال لي، لا هو بس يقول، نحن حنعرف ندبرها. هذه واحدة من المشاكل البتشغل الزول، لأنو مرات بتلاحظ أن الحركة السياسية بتتحرك لمجرد الحركة، يعني مافي العائد الممكن يقولو عليه، حركة مؤتمر جوبا وموكب أول أمس هذا كله كويس.
الموقف من قضية حلايب، ومسيرة أول أمس، لم نلمس تدخل، يعني هل يمكن القول إنو المؤتمر الوطني يتغاضى عن هذه القضية؟.
-نحن لمن مشينا ليهم، طلعوا فايلات قديمة من أيام محمد علي باشا، طبعا بصبر ودم بارد، أخرجوا وثيقة، جواب مرسلاه الحكومة المصرية للحكومة السودانية بتاريخ معين، بتطلب من حكومة السودان أن تشرف على حلايب لأنها بعيدة من أقرب مركز مصري، وكلام عن أنو إنتو حبايبنا ومفيش حد حيعتدي عليكو، إذا كنتم عايزين القاهرة خدوها، ولكن حلايب نحن لن نفرط فيها، نحن رسلنا جواب يوم كذا عشان يشرفوا عليها لأنها بعيدة عن المركز، بس، دا كل الموضوع، السودان أحيانا بيدخل في معارك من غير (دوكيومنتس)..
لا يعني أنت كلامك دا، إنو حلايب مصرية؟.
حلايب بالوثيقة دي، وحكومة السودان عندها نسخة منها،
هل الوثيقة دي تقيم حجة؟.
هو بيتحجج بيها، وقال هم متأكدين أنو النسخة الأصلية عندهم، يعني حكومة السودان، أتذكر أبو سليم راجل دفعتنا وأصحاب، فقلت ليهو المصريين قالوا كذا كذا، فقال لي شوف يا شيوعي أوع تقول الكلام دا لأي زول، قلت ليهو يعني إنت عارف، قال لي أنا ما يهمنيش عارف ولا مش عارف، سيبنا من مصر دي بعيد، ياخي أنت راجل بتاع دار الوثائق، قال لي نحن ساعدنا المصريين لمن حصلت مشكلة بينهم والإسرائيليين حول طابا طلعنا ليهم الوثائق البتثبت حقهم، ما يحترموش العملية دي، إيه حلايب اللعايزين يعملوا منها قضية، الشاهد، هي طبعا حلايب داخل فيها أمن البحر الأحمر، اللأصبح عندو وضع استراتيجي كامل، وداخل فيها النزاع الحدودي بين مصر والسودان، السودان موقفه ضعيف، ولو من باب كمية السودانيين الموجودين في مصر، ودي ما عملية بسيطة، فاكر لما يتلموا السودانيين في ميدان عمر مكرم، المصريين قالوا نحن ما عندنا مشكلة، طبعا هم دولة من أقدم الدول في العالم.
الآن بعض الأصوات ترتفع، سواء كان المعارضة أو بعض التيارات المتحالفة مع الحكومة، ترتفع مطالبة بإعادة استعادة حلايب؟.
شنو الضاغط؟، تبقى زي حبن إنت عايز تزيلوا، أنا لا أفتكر أنو دي أسبقية، في شنو؟، دي أول انتخابات في ظل الإنقاذ، على أي حال ما لم تحل، في أكثر من حل، تكون منطقة إدارة مشتركة، منطقة حدود مشتركة، ممكن تكون منطقة تجارية مشتركة، أي شئ يؤدي إلى نزع فتيل الأزمة، لكن ستكون بإستمرار عظمة نزاع ولكن كيف تحل مافيش حد عارف.
*لكن نقل عنكم أنكم أكدتم أن حلايب مصرية بالوثائق الموجودة في القاهرة والخرطوم، يعني ألا يخشى السكرتير العام للحزب الشيوعي، إتهام الشيوعيين بالعمالة في هذه القضية التي لديها جزء من الحساسية الوطنية، يعني عندما يقطع سكرتير عام الشيوعيين بأن حلايب مصرية ألا يخشى على موقف حزبه وصورته ورصيده وسط البيئة السودانية؟.
-لا أنا وريتك جانب واحد من الصراع، قالوا إنو حلايب مصرية من واقع الوثيقة التي لديهم، الأنحن رسلناها للسودان لإدارة حلايب لأنها بعيدة من أقرب مركز مصري، حكومة السودان ردت شنو؟، ما عندنا وثائق، جائز تكون موجودة في الخارجية، أو في (الفورين أوفيس) في انجلترا، واضح ليك، في نزاع زي دا ما بتاخد رأي زول واحد، هل استلمت الحكومة الخطاب؟.
*هناك تصريح سابق نسب إليكم عند لقاءكم بوفد من أبناء المنطقة أنك قلت لهم، عاملين مشكلة في شنو، حلايب دي مصرية، سألوك كيف مصرية، قلت ليهم من خلال الوثائق الموجودة في السودان ومصر، ولذلك أسال عن كيف ستكون صورة الحزب عند وجود رأي مثل هذا؟.
-أنا قلت بناء على التوثيق الأنا شفته، عايزك تشرف لي على حلايب، معناها أنا صاحب الحق، هل حكومة السودان ردت؟، ما حد عارف، هل في وثائق عند حكومة السودان بالمعنى دا؟، ما فيش حد عارف، يعني هو عبد الله خليل أثار المسألة في زمن الصراع بين دعاة وحدة وادي النيل ودعاة استقلال السودان،
(أنفورشنيتلي - لسؤ الحظ) هي الآن بتطرح في نفس السياق بالمناسبة، يعني في 57م أثاروها ناس حزب الأمة عشان يضغطوا على الاتحاديين، الآن أيضا كل ما تكون في جهة عايزة تزايد على المؤتمر الوطني، بتطرح موضوع حلايب؟.
أنا كل البهمني أنو مافي مبرر حلايب تصبح عظمة نزاع، مرة تثيرها مصر ومرة يثيرها السودان، الأخطر من حلايب، تتعمل لجان مشتركة، رسمية يعني، تدرس، بعدين إنت عندك مشاكل كتيرة جداً، بعدين القذافي عندو مشاكل في الحدود الليبيبة المصرية والليبية السودانية، تشاد عندها مشكلة، أكوبو مع إثيوبيا والفشقة، فإذا هذه المشاكل ما وُضعت على مستوى الجامعة العربية ومنظمة الوحدة الأفريقية يكون في منهج، في لجنة ثابتة (ستاندنق كوميتي)، ماسكة المشاكل الحدودية دي، ممكن تولع أزمات حدودية كثيرة جداً جداً، من الناحية دي المصريين طلعوا وقالوا نحن رسلنا هذا الخطاب، طيب حكومة السودان ردت، حتى لمن حصلت أزمة عبد الله خليل هل حدث (اكسيجينج) للوثائق، (نوو بودي نووز)، بعدين خلينا حلايب بورانا ومشينا لقضايا تانية..
لكن يا أستاذ الموضوع دا ما تصاعد إلا في ظل الحكومة دي؟ رغم انو آخر انتخابات كانت في دائرة في حلايب وكان لديها ممثل في البرلمان؟.
-لكن يا أستاذة، ما هي طالما بقت عظمة نزاع كل مرة والتانية حيجي واحد يثيرها، فنحن قلنا الموضوع دا يصلوا لنتيجة، خلاص هي حتة متنازع عليها بين مصر والسودان، معناها منطقة حدودية، كيف ننزع فتيل الانفجار دا، تتكون لجنة من حكومة السودان، ولجنة من مصر، يعني ما يقولوا لي نستفتي السكان، دا ما الموضوع، الموضوع كيف ننزع فتيل الأزمة، ودا ممكن.
يمكن الوصول لحل إداري؟.
-آيي، حل مشترك.
المعارضة بعد سنوات طويلة لم تطور في آلياتها، يعني لسه المسيرة، المظاهرة، المذكرة، لم تبتكروا آليات جديدة؟.
عايزين نعمل محطة تلفزيون،
الكلام دا صاح ولا إشاعة؟.
آيي صاح، نحن عايزين نعمل محطة حقتنا نحن..
*انتو الحزب الشيوعي؟.
-آيي،
عشان تقدموا فيهو شنو؟.
غنا وإعلانات أمال عايزننا نجيب محمد لطيف يتكلم..
*لا حقيقة نحن محتاجين للتغيير والمعارضة..
يا بت الناس نحن ما قادرين نطلع صحف..
*أود سؤالك عن ما بدأ به الاتحاد النسائي في تذويب الفوارق الاجتماعية، ورفع هذا الشعار لماذا تراجعتم أنتم، هل تفتكر أنو المرأة تراجعت أم تطورت؟.
الصراع الحزبي، ألقى بظلاله في حاجات كتيرة، الصراع السياسي لمن يبدأ بيكون بادي في اتجاه الفوارق الاجتماعية ودي واحدة من المشاكل، في حتت كتيرة جداً في كل التنظيمات في السودان، الأداء البرلماني لكل حزب من الأحزاب، لكن برضو الأنظمة العسكرية الثلاثة، العملت شكل من أشكال البرلمانات، عطلت التطور السياسي ووقعت في أخطاء سياسية كتيرة جداً، أنا أفتكر الشئ المغفل والمسكوت عنه، أنو لدينا حرب أهلية استمرت كذا وعشرين سنة، فمهما حاولت لن تغفل هذا، كل الأطراف متهمة، من الأنقسنا لدارفور للجنوب للشرق وللشمال، إنتي عارفة سكان أم بدة أكتر من سكان المديرية الشمالية، دا في كتاب الإحصاء بتاع الحكومة، طيب المديرية الشمالية كانت هي مركز الوعي والحضارة في السودان، أكتر مديرية متقدمة في التعليم في الإدارة في وسائل الإعاشة، حاجات كتيرة جداً، لكن النزوح من الريف إلى المدن هلك الريف وهلك المدن، لمن إدريس دبي زار السودان أيام نميري،
دا ما إدريس دبي، حسين هبري..
حسين هبري، بعدين جابوا ليهم العربات دخلوها في المطار عشان توديهم بيوت الضيافة، بعدين في واحد (صول) مرافق للوفد، قالوا ليه تركب في العربية دي، قال ليهم لا أنا ماشي أم بدة أشوف أولادي وأجي، دا حقيقة بالمناسبة، فالتداخل اللحصل دا عمل فينا حاجة مش معقولة أبداً، يعني نحن لا نعرف ما تبقى من الإريتريين والإثيوبيين الدخلوا مناطق الشرق دي، بدخلوا ويمرقوا العمال الزراعيين، بيجو بالبيوت المتحركة دي، إسمها شني؟،
*الكرفانات..
أيوا، يعني بلد مخترقة من كل جوانبها، بعدين عندهم قروش موش ساكت، البنوك بتاعت نيجيريا عندها مساهمين قاعدين هنا في السودان، ما مساهمين في البنوك السودانية مساهمين في نيجريا، وعندهم (سيي) في السياسة النيجيرية، وعندهم شبكات رابطاهم في نيجيريا، نحن العرب ونحن ونحن، وما فيش أي حاجة.
كيف كان تأثير الشقيقة الكبرى؟.
مؤكد غزت الاتجاه للإنقلاب، في أثناء الحديث عن وحدة وادي النيل، عبد الناصر كان في الحكم، وصلاح سالم كان وزيرهم هنا، واشتغلوا في الجيش، ساعدوا الضباط، غذوا فكرة الضباط الأحرار وسط الجيش، ومصر لهسه عندها نفوذ كبير لا يمكنك أن تتخطاه، هسه هم بقوا أكثر دبلوماسية عشان كدا أكتر فعالية، يعني هسه علاقتهم مع كل القوى السياسية سمن على عسل، الميرغني عندو بيت في القاهرة والصادق المهدي عندو بيت في القاهرة..
*انت ما عندك بيت في القاهرة؟.
ما لقيت وقت، ما قعدت في مصر، كلها ماشي جاي، جاي ماشي،
*دائماً يحمد ليك، إنك بلدي..
داير تجيب خبري يا محمد لطيف؟.
لا، لكن السؤال ليه؟، ما انت واحد من النخبة المتعلمة المثقفة، دخلت في السياسة في وقت مبكر جداً..
نخبة بائسة جداً..
نخبة بائسة جداً، لذلك انت هربت منها؟.
أنا ما هربت منها، أنا نخبة أهو لابس (قميص وبنطلون) وعندي لوحات معلقة في الحيط..
لكن برضو رأي الناس، إنو نقد دا زول ود بلد، وتلقائي جداً..
تعرف ليه؟ لأني ما بشارك أي زول، ما دخلت في شراكة مع أي زول، لأنو أي شراكة، في واحد أكل التاني، فلا أكلت زول ولا زول أكلني،
حصل اشتغلت بيزنس؟.
-ما لقيت فرصة، ما من اعتقال لإختفاء..
ممكن تكون مختفي وتدير بيزنس؟.
ما لازم تأسس في الأول..
وما أسست؟.
أأسس بوين، ياخي عليك الله خليني من البيزنس.
إنت ما جاوبت على السؤال الأساسي، يعني السحنة السودانية دي جاتك من وين؟.
ما أنا سوداني لكن،
ما في سودانيين كتار لكن تشعر إنهم، مثلا ممكن ألاقي الشفيع خضر تشعر أنو مختلف، ودا ما رأي، أنا وإنما رأي ناس كتار إنو نقد ما بتشعر إنو في حاجز بينك وبينه؟.
-تعرف ليه؟ لأني مفلس زيهم، لو عندي قروش كنت بسلم عليك ولا كنت قعدت القعدة دي، ما عارف إمكن هبة من رب العالمين..
يعني يا أستاذ كل الناس تخيلوا أن الشيوعيين السودانيين حيتخلوا عن هذا الإسم في مؤتمرهم الأخير؟.
برضو كان حيقولوا ليك ديل الشيوعيين
*لماذا لم تفكروا في مسمى الديمقراطي أو الاشتراكي؟.
ما خلاص دا بقى اسمنا، وفي حاجات كتيرة جداً عملنا فيها تغييرات، لكن لما جينا للإسم، قلنا الحيحصل شنو؟، برضو حيقولوا ليك ديل الشيوعيين، الصادق المهدي عمل ما لا يعمل عشان يقول حزب الأمة الجديد،
*كان في تيار قوي ضدك في المؤتمر؟.
لا ما عندي فكرة.
هي معلومة لدينا، وأنا كتبت رشحت نقد فضربوا لي ناس وشتموني دا الحرس القديم وكذا، يعني أصلوا ما في زول قال ليك ما تترشح وانت حرس قديم؟
أبداً وأنا لم أتدخل في الترشيح أصلاً، اللجنة العملت الترشيحات وشاورت الناس بالداخل والخارج أنا ما كنت فيها، الحاجة التانية أنا ما زعيم، أنا كادر حزبي.
*كيف يعني؟.
يعني بأدي مهامي في أي موقع حزبي، ما عندي مشكلة.
إنت زعيم؟.
أنا كان زعيم هسه انت بتجئ تشرب القهوة قدامي وتتبجح، لا جد ما كنت (انتر رستد) في الجانب دا، بعدين أنا حياتي كلها مختفي مع الشيوعيين، هذا غير صحيح، يعني عملية الانتخابات، اللجنة المركزية بتقدم الترشيحات وفي المؤتمر الترشيحات بتكون مفتوحة برضو، فترشحت كمية كبيرة من الناس، بعدين تم الاتفاق على عدد معين وجرى التصويت وجمعت الأصوات في لجنة فيها الزملاء القدامى والجدد بعدين جمعت الأصوات، وحزبنا دا ما كنيسة.
بعد المؤتمر الخامس، فاروق أبو عيسى قال أنا ما عضو لجنة مركزية؟.
طبعا هو كان سكرتير اتحاد المحامين العرب وبنديهو اعتبار يعني ولكن هسه هو رجع وقعد خلاص.
*تاني منو رجع للمؤتمر العام؟.
رجع محمد لطيف.
لدي خالي وهو من رباني وهي مشكلتي طبعاً، كنا من أسرة فقيرة، وهو (كوز)، بتذكر وأنا صغير سنة68م قعدني جمب الرادي وماشي يصلي العصر وقال لي أول ما تسمع إسم أحمد سليمان قول لي، وسمعت الإسم، وبعد ما رجع من الصلاة قلت أقول ليهو أنو أحمد سليمان إسمو قالوه عشان يفرح وكدا، فقام ضربني، فترة طويلة ما كنت قادر أفهم الحاجة دي، الشاهد إنو سنة 88 أو 89م في البرلمان هو كان قاعد معاي في البيت عيان وموديهو الأردن يتعالج، وفي التلفزيون جايبين وقائع الجمعية التأسيسية وجابوا مرافعة حقتك انت عن الاقتصاد وكلام كتير، بعدين وهو راقد بيسمع ساي، وبعد ما انتهت قال لي الراجل دا تمام كلاموا تمام بس عيبوا انو شيوعي، قلت ليهو هو لو ما كان شيوعي ما كان قال الكلام دا..
-انت مالك، الراجل مشى خطوة نحونا تقوم تجروا بعيد؟،
*الشاهد، أنو الخطاب بتاعك مقبول لكل الأطراف، هي ليست مسألة قبول حتى تقول إنها مسألة قبول من ربنا، انت لديك خطاب سياسي مقبول من كل الأطراف؟،
بتوفيق من الله، كدي قول لي لا في الحتة دي؟.
*الله غالب والله،
*في مرة وبحضور كادر حزبى قال أحدهم انو شيخ نقد دا أنا بحبو والله، فقمنا قولنا ليهو لكن هو ما شيخ..
شايف يعني تجئ علينا البركة وأولاد الحرام يشيلوها مننا، إنتِ مالك، نعمة من ربنا، نحمد ربنا وش وضهر زي ما بقولوا المصريين.
*طيب يا أستاذ بصفتكم التنظيمية والرسمية، في مجموعة بحثية اسمها مجموعة الأزمات الدولية ومقرها أميركا، تقترح أن يتم تأجيل الانتخابات إلى نوفمبر 2010م، فكيف يعلق الحزب الشيوعي السوداني على هذه الدعوة؟.
في وجاهة في كلامهم، لأنهم مدركين أنو الاستعداد للانتخابات ما ماشي، والشريكين مشغولين باليومي، مشاكلهم اليومية ودا بيؤثر على إذا موش النتيجة النهائية، على الجو البتمضي فيهو الانتخابات، شفت أنا الخبر ولكن هل دا بيحل المشكلة إذا هم عندهم برنامج وخطة عمل لحل المشكلة ويكونوا قريبين من الطرفين ويحاولوا يقربوا بيناتهم، يختوهم في (تراك) يؤدي إلى انتخابات في جو (ريلا كس) دا ممكن يتم، لكن في الأنا شايفيوا الخلاف بين الشريكين ممكن يصل إلى حد أن يتضاربوا، لأنو في حاجات هي معقدة بحكم نيفاشا ذاتها كانت (كومبرومايزد) في أكتر من مكان، بعدين في علامات استفهام حول حاجات كتيرة جداً، رئاسة الجمهورية، البشير حيترشح، حيكون في مرشحين آخرين فرصهم قدر إيه؟، دي لغاية دلوقت ما واضحة، في فرصتين، فرصة أنو يفوز واحد من المعارضة، الفرصة التانية أنو يزاحموا واحد من المعارضة، يعني هو حيفوز فوز على (الحركرك)، دا حيترك أثره لقدام، طيب بما أنهم هم شريكين، الشئ الطبيعي أنو يدعم البشير ويدعم المؤتمر الوطني في الشمال، والمؤتمر الوطني يدعم الحركة في الجنوب ودا ما حاصل، يبقى الطريقة الاتعملت بيها نيفاشا بتفاؤل وباستعجال، وقفوا الحرب وأدوا الجنوب حقوقوا، لكن كل يوم بتجيك عيوب نيفاشا، وهي (تو ليت) لأنك لا تقدر أن تغير أي من نصوص نيفاشا، زمان نحن اقترحنا لجنة قومية مشتركة، فيها الحكومة والحركة وكل الأحزاب، عشان تتغلب على كل قصور نيفاشا، ما تغير أي بند من البنود لكن بند واحد نجيبوا نمرة خمستاشر والبند خمستاشر يمشي لنمرة واحد، مداخل يعني، لأنو السودان (مباصرة)، لا تقدر بطريقة (البلدوزر) تجيبوا يعني، سالفا كير دعانا في بيتو، والله بيت أنيق أناقة، يعني لو الله أداك فرصة لقدام اشتركت في حكومة أمشي البيت دا طوالي، بس أدوني بيت أسكن فيه، أشم الهبوب بس يعني، بيت أنيق أناقة ونضيف نضافة، في بيتو قاعد معانا بالكسكتة، والله السودان دا جننا ذاتو، الحركة هسه شوية بعد مؤتمر جوبا بالذات، وشافت الناس شاركوا معاها من موقع المسئولية موش الهجوم ولا من موقع التنازل، فحست أنو تقترب، يعني أمس ونحن قاعدين مع سيد الصادق جاء فاقان أموم ..
وتحدثوا عن أنهم لسه محتاجين يتعاملوا مع الحركة السياسية، لكن أفتكر أنو المؤتمر هو المالي يدو تمام، وهم في حالة ضعف، ومن الجانب الآخر ما تستهون بدور ناس بونا ملوال، ديل سياسيين، اشتغلوا الجنوب دا مع نميري وضد نميري وعندهم وزن في قبائلهم .
ولكن هل يقف الشيوعي مع انتخابات في أبريل أم نوفمبر 2010م؟.
-هو شوف، ممكن تتم في أبريل وممكن تتم في نوفمبر، وهي ما اتقالت ساكت يعني، لأنو الأطراف الخارجية المرتبطة بنيفاشا دا تفكيرها.
*ولكن يا أستاذ إذا تأجلت الانتخابات إلى نوفمبر سيتأجل الاستفتاء إلى عام آخر؟.
شنو يعني؟، دي خطة خمسية حتفشل يعني؟، ما في مشكلة، مشاكل السودان انت بتحس بيها كل يوم، لكن داير ليك منبر أو (فوكس)، يجيبك يختك مع ناس آخرين عشان تطلع بحاجة، يعني لو كلامكم معاي دا عملتوه مع سياسيين آخرين حتطلعوا بحاجة كويسة جداً لقدام، وحتعملوا أرشيف ضخم ممكن يكون مادة ودا كلام من خشم كل زول وما يقدر ينكر، يعني تساعد في التحليل السياسي، بعدين شوف انت السياسة دي تدخلها من غير أي هواجس لا شيخ فلان ولا أستاذ فلان، شغل، اشتغل بوضوح،
نحن شاكرين يا استاذ..
-على الأيمان أنا في القبر ما حيسألوني زي ما انتوا عملتوا،
ياخي نحن من ما جينا داخلين انت البتسأل فينا..
أدوني يوم أنا أجيكم أسألكم في الجريدة..
*جداً ومرحب بيك في أي وقت.
|
|
 
|
|
|
|
|
|
|
|
Re: الاستاذ محمد ابراهيم نقد ماذا يقول عن حلايب هل هي مصريه أم سودانية جريدة الاخبار 20 ديسمبر2 (Re: ثروت سوار الدهب)
|
مقتطفات :
هل الوثيقة دي تقيم حجة؟.
| Quote: هو بيتحجج بيها، وقال هم متأكدين أنو النسخة الأصلية عندهم، يعني حكومة السودان، أتذكر أبو سليم راجل دفعتنا وأصحاب، فقلت ليهو المصريين قالوا كذا كذا، فقال لي شوف يا شيوعي أوع تقول الكلام دا لأي زول، قلت ليهو يعني إنت عارف، قال لي أنا ما يهمنيش عارف ولا مش عارف، سيبنا من مصر دي بعيد، ياخي أنت راجل بتاع دار الوثائق، قال لي نحن ساعدنا المصريين لمن حصلت مشكلة بينهم والإسرائيليين حول طابا طلعنا ليهم الوثائق البتثبت حقهم، ما يحترموش العملية دي، إيه حلايب اللعايزين يعملوا منها قضية، |
Quote: 2 عن حلايبب
على أي حال ما لم تحل، في أكثر من حل، تكون منطقة إدارة مشتركة، منطقة حدود مشتركة، ممكن تكون منطقة تجارية مشتركة، أي شئ يؤدي إلى نزع فتيل الأزمة، لكن ستكون بإستمرار عظمة نزاع ولكن كيف تحل مافيش حد عارف. |
...........
Quote: أنا وريتك جانب واحد من الصراع، قالوا إنو حلايب مصرية من واقع الوثيقة التي لديهم، الأنحن رسلناها للسودان لإدارة حلايب لأنها بعيدة من أقرب مركز مصري، حكومة السودان ردت شنو؟، ما عندنا وثائق، جائز تكون موجودة في الخارجية، أو في (الفورين أوفيس) في انجلترا، واضح ليك، في نزاع زي دا ما بتاخد رأي زول واحد، هل استلمت الحكومة الخطاب؟.
|
........
| Quote: أنا قلت بناء على التوثيق الأنا شفته، عايزك تشرف لي على حلايب، معناها أنا صاحب الحق، هل حكومة السودان ردت؟، ما حد عارف، هل في وثائق عند حكومة السودان بالمعنى دا؟، ما فيش حد عارف |
.........
| Quote: أنا كل البهمني أنو مافي مبرر حلايب تصبح عظمة نزاع، مرة تثيرها مصر ومرة يثيرها السودان، الأخطر من حلايب، تتعمل لجان مشتركة، رسمية يعني، تدرس، بعدين إنت عندك مشاكل كتيرة جداً، بعدين القذافي عندو مشاكل في الحدود الليبيبة المصرية والليبية السودانية، تشاد عندها مشكلة، أكوبو مع إثيوبيا والفشقة، فإذا هذه المشاكل ما وُضعت على مستوى الجامعة العربية ومنظمة الوحدة الأفريقية يكون في منهج، في لجنة ثابتة (ستاندنق كوميتي)، ماسكة المشاكل الحدودية دي، ممكن تولع أزمات حدودية كثيرة جداً جداً، من الناحية دي المصريين طلعوا وقالوا نحن رسلنا هذا الخطاب، طيب حكومة السودان ردت، حتى لمن حصلت أزمة عبد الله خليل هل حدث (اكسيجينج) للوثائق، (نوو بودي نووز)، |
.........
Quote: لكن يا أستاذة، ما هي طالما بقت عظمة نزاع كل مرة والتانية حيجي واحد يثيرها، فنحن قلنا الموضوع دا يصلوا لنتيجة، خلاص هي حتة متنازع عليها بين مصر والسودان، معناها منطقة حدودية، كيف ننزع فتيل الانفجار دا، تتكون لجنة من حكومة السودان، ولجنة من مصر، يعني ما يقولوا لي نستفتي السكان، دا ما الموضوع، الموضوع كيف ننزع فتيل الأزمة، ودا ممكن.
يمكن الوصول لحل إداري؟.
-آيي، حل مشترك. |
..........
| |
|
|
|
|
|
|
|
|
|
Re: الاستاذ محمد ابراهيم نقد ماذا يقول عن حلايب هل هي مصريه أم سودانية جريدة الاخبار 20 ديسمبر2 (Re: كمال عباس)
|
Quote: والمشكلة أنو حدودنا موروثة من زمن أسرة محمد علي والأتفاقات والوثائق مبرمة منذ حكم أسرة محمد علي باشا!!!
والسؤال هل تلك الوثائق ملزمة أم لا??
.......أرجو أن يتم إستقراء كلام نقد بموضوعية وبلا تحامل ومناقشة
الخلاصة التي وصل لها...هل ستشكل حلاأم لا |
ايوة يا كمال ده الاهم الآن.
والله كويس انه اخيرا اتكلم اعلاميا وقال حاجة.
رغم انا تصريحاته الخلقت التساؤلات كانت ناقصة وزي دخلت فيها دار الوثائق السودانية عشان كده انا قبل كده قلت انه لم يتريث وياريت لو كان قال:(القال ليكم منو حلايب سودانية بالنسبة للمصريين مصرية لوجود خطاب في زمن محمد على باشا..الخ القصة الوردت في الحوار). كان تفادينا الحصل ده كله. بس برضو كويس انه حصل عشان الناس تاخد باله والماعارف يعرف ويحصل تحرك.
كويس انه قال ماعارف اكتر من مرة لانه دي بتثبت حاجات في صالحه والله.
وفي نهاية الامر بهمنا الحل حيكون كيف.
تحياتي.
| |
|
|
|
|
|
|
|
|
|
Re: الاستاذ محمد ابراهيم نقد ماذا يقول عن حلايب هل هي مصريه أم سودانية جريدة الاخبار 20 ديسمبر2 (Re: Abureesh)
|
Quote: فكرة كويسـة...
بكرة ممكن نرسل رسالـة لإثيوبيا نقول ليهم (خلو بالكم من إقليم أوقادين وواصلوا إدارته) وبعد بكرة
نطالب بإقليم أوقادين بناءً على هـذه (الوثيقـة)، وواحد رئيس حزب إثيوبى يؤيـد أحقيتنا بأوقادين بناء
على هـذه الرسالة أيضاً!!!!!
نقد دا يلعب بعقول الناس أم بعقله؟!!
هل هـذه الرسالة هى وثيقته التى إعتمد عليها ليقرر مصريـة حلايب فصفقت له العضوية هنا؟
سأتى لنقاش هـذا الحوار بتفصيل (ما يخص حلايب منه). وشكرا لصاحب البوست. |
والله يا ابوالريش فكرة
علي الاقل ديل ممكن نقيف في الحرب قدامهم شوية
سير ونحن من خلفك
| |
|
|
|
|
|
|
|
|
|
Re: الاستاذ محمد ابراهيم نقد ماذا يقول عن حلايب هل هي مصريه أم سودانية جريدة الاخبار 20 ديسمبر2 (Re: عبد الحكيم نصر)
|
..... سلام عبد الحكيم نصر
Quote: علي الاقل ديل ممكن نقيف في الحرب قدامهم شوية
سير ونحن من خلفك |
............التحية لك ياحكيم وأنت تفتح الملف وتثير خبايا حلايب
في الهواءالطلق وذلك بإيرادك لأقوال نقد والباحث والمؤرخ أبو سليم
في هذا الصدد.......
وهاهو الأستاذ نقد قد فصل رؤيته وبسط كافة حيثياته......
ونرجو أن يتم التصدي له بموضوعية وعبر الحقائق والمعطيات التاريخية
وبالحوار العلمي بعيدا عن الإثارةوالهتافيةوأساليب التخوين و التجريم
فاالتناول السطحي والتعاطي الفج أسلوب يخصم من رصيدمن يقوم به!
| |
|
|
|
|
|
|
|
|
|
Re: الاستاذ محمد ابراهيم نقد ماذا يقول عن حلايب هل هي مصريه أم سودانية جريدة الاخبار 20 ديسمبر2 (Re: كمال عباس)
|
Quote: فكرة كويسـة...
بكرة ممكن نرسل رسالـة لإثيوبيا نقول ليهم (خلو بالكم من إقليم أوقادين وواصلوا إدارته) وبعد بكرة
نطالب بإقليم أوقادين بناءً على هـذه (الوثيقـة)، وواحد رئيس حزب إثيوبى يؤيـد أحقيتنا بأوقادين بناء
على هـذه الرسالة أيضاً!!!!! |
ليه لا يا ابو الريش .
المصريين ديل نحن اتعلمنا منهم حاجات كتيرة و دي ممكن تكون من ضمن الحاجات دي .
واخد بال حضرتك... طبعا يا ابو الريش الرسلوا الرسالة هم المصريين مش السيد/نقد و دي واحدة
من مستنداتهم زي ما قالوا هم .
يعني السيد/نقد هنا نقل الفكرة فقط..فلو في هدف مناسب هنا للهجوم عليهو يبقى هو المصريين
يا ابا الريش يا عزيزي .
| |
|
|
|
|
|
|
|
|
|
الرأي الأخر .........ماذا تقول وجهةالنظرية حول حلايب? (Re: سيف النصر محي الدين محمد أحمد)
|
Quote: ملفات الأهرام
44896 السنة 133-العدد 2009 نوفمبر 7 19 من ذى القعدة 1430 هـ السبت
مشكلة حلايب.. أبعاد الموقفين المصري والسوداني
كتب : هانئ رسلان
تثور مشكلة حلايب بين حين وآخر كمؤشر علي وجود ازمة في العلاقات المصرية ـ السودانية, إلا أن هذه الأزمة سرعان ما يتم احتواءها لصالح الحرص علي هذه العلاقات ومحاولة دفعها الي الامام حفاظا علي المصالح المشتركة بين البلدين الشقيقين, لاسيما في المرحلة الحالية التي يمر فيها السودان بمرحلة من التحول الخطر المتمثل في استحقاقات حق تقرير المصير لجنوب السودان وتداعيات ازمة دارفور.
ويمكن للمراقب أن يلحظ أن رد الفعل المصري تجاه الأزمة الاخيرة التي اثارتها مفوضية الانتخابات السودانية وبعض المطالبات السودانية التي دعت للذهاب الي التحكيم, قد اتسم بشكل عام بالهدوء وعدم الرغبة في التصعيد, وعلي الناحية الاخري عاد الجانب السوداني إلي محاولات التهدئة والاحتواء, عبر التصريحات التي أطلقها الدكتور مصطفي عثمان إسماعيل والتي أكد فيها علي أن حلايب لن تقف عقبة في طريق العلاقات المصرية ـ السودانية وأن هناك اقتراحا سودانيا بان تكون كل المدن الحدودية بين البلدين مناطق تنمية مشتركة.
غير ان هذا لايعني في الحقيقة ان ملف حلايب قد أغلق أو تم تجاوزه, إذ أنه باق إلي إشعار آخر, حيث من الواضح أنه قد تم دمجه في الحساسيات المعروفة في العلاقات المصرية ـ السودانية, وأصبحت النبرة السائدة في تناولة تعتمد علي التعبئة والاثارة في الداخل وتميل إلي اعتبار الموقف المصري تعبيرا عن التعالي دون النظر إلي الإطر الموضوعية أو الأسانيد القانونية أوالتاريخية. كما أصبحت حلايب أداة في الصراعات والمزايدات السياسية الداخلية حيث يسعي البعض لتوظيفها سعيا وراء اهداف لا علاقة لها بحلايب, ومن ثم تحولت هذه المشكلة الي ما يشبه مسمار جحا أو حصان طروادة في العلاقات بين البلدين الشقيقين. لذا لزم تحرير الخلاف بين الموقفين المصري والسوداني من أجل إعادة القضية إلي إطارها الطبيعي ومناقشة وجهتي النظر بهدوء وروية في إطار من الحرص المتبادل علي تجاوز هذه المسألة وعلي علاقات الاخوة والتاريخ المشترك.
1 - يعتمد ترسيم الحدود بين مصر والسودان علي اتفاقية1899 التي تقول بأن خط العرض22 شمال خط الإستواء هو الحد الفاصل بين البلدين, وبما أن مثلث حلايب يقع شمال هذا الخط, فانه يقع بالكامل داخل الحدود المصرية, لاسيما ان النص الوارد في الاتفاقية واضح وقطعي الدلالة ولا يقبل التأويل.
2- علي الناحية الاخري تقول وجهة النظر السودانية ان هذا المثلث كان يدار بواسطة الحاكم العام للسودان منذ عام1904 وان مصر لم تعترض علي ذلك وان هذه المدة الطويلة المستقرة من الادارة تعد دليلا علي سودانية حلايب, إلا ان وجهة النظر هذه تتجاهل عمدا ان تحويل التبعية الادارية للحاكم العام في السودان, قد تم بقرار إداري داخلي من مصر, من أجل تسهيل الوصول إلي هذه المنطقة النائية لإدارة إمور السكان المحليين, وأن القرار الإداري الداخلي لاينشئ سيادة ولا تترتب عليه أي إلتزامات ذات طبيعة دولية, خاصة وأن السودان في ذلك الوقت كان يقع تحت السيادة الإسمية لمصر طبقا لقواعد القانون المعمول بها حينذاك, ومن ثم فهو لم يكن ذا شخصية دولية مستقلة حتي يقال أن مصر قد قبلت ولم تعترض, الامر الذي يوضح تهافت وعدم منطقية هذه الحجة,
فضلا عن أن الحاكم العام( لبريطاني الجنسية) الذي خولت اليه ادارة هذه المنطقة كان يتم تعيينه بقرار من السلطات المصرية طبقا لاتفاقية1899 نفسها, ومن ثم فان تحويل التبعية الادارية المشار اليه هو أقرب ما يكون الي تفويض صلاحيات داخليه بين المحافظات أو المديريات في نفس الدولة, فاذا تحول الحد الإدري إلي حد سياسي تتم العودة بشكل بديهي إلي خط السيادة, وهو ماينطبق علي حالة حلايب, حيث حصل السودان علي حق تقرير المصير عام1953 ثم الاستقلال عام1956, ومن ثم تكون الحدود هي خط العرض22.........
3- هناك حالة اخري شبيهة بحلايب, تتعلق بمنطقة' إبيي' التي من المعروف أنها منطقة جنوبية, غير أنه تم تحويل تبعيتها الإدارية إلي شمال السودان في عام1905( لنفس الاسباب المتعلقة بحلايب: اي تسهيل الوصول وادارة شئون السكان), وحين حصل الجنوب علي حق تقرير المصير طبقا لاتفاقية نيفاشا الموقعة في عام2005, اتفق الطرفان المتفاوضان علي أن إبيي منطقة جنوبية, وكان الخلاف علي تحديد او ترسيم حدود المنطقة, وليس علي تبعيتها من حيث المبدأ. وهنا يمكن ملاحظة أن الجانب السوداني يعتمد هنا معيارا مزدوجا, فقد سلم بجنوبية إبيي, وفي الوقت نفسه يرفض الإقرار بمصرية حلايب ـ رغم تطابق الحالتين- علما بأنه لاخلاف علي حدود مثلث حلايب فهو شمال الخط22 ومن ثم لا حاجة للتحكيم لتوضيح معالمه كما حدث في إبيي.
4- يقول الاخوة في السودان أن السكان في حلايب هم إمتداد لقبائل سودانية وبخاصة البجا أو بعض العشائر الاخري, الا أن هذا القول- حتي لو كان صحيحا_ لايقدم أي حجة من أي نوع, ولاينعكس بأي شكل من الأشكال علي مبدأ السيادة علي الارض, وعلي سبيل المثال: هناك26 قبيلة مشتركة علي الحدود بين السودان وتشاد, ومن أشهرها قبيلة الزغاوة التي ينتمي الرئيس ادريس ديبي إلي فرعها التشادي, فهل يحق للسودان ان يطالب بالاراضي التي يقطنها الزغاوة في تشاد, أو تطالب تشاد بتبعية أراضي الزغاوة في دارفور مثلا.. بطبيعة الحال لايجوز. وهذا أمر غير وارد في العلاقات الدولية, وفي هذا السياق فان معالجة قضية السكان يسيرة, ويمكن التوافق حولها, فمن أراد اللحاق بالجانب الاخر من الحدود يمكنه ان يفعل.. ومن يريد البقاء فله الحق في ذلك.
5- كلما ثارت قضية حلايب ترتفع بعض الأصوات السودانية التي تطالب مصر بقبول التحكيم كما حدث في طابا, رغم أن المثالين مختلفين تماما بحيث لا يمكن المقارنة بينهما, فما حدث في طابا هو خلاف علي التحديد الدقيق لموقع العلامة الحدودية رقم91 علي خط الحدود بين ولايتي مصر وفلسطين تحت السلطة العثمانية, وكان الفارق بين وجهتي نظر الطرفين المتنازعين هو كيلومتر مربع واحد, وتمسكت مصر بموقفها ولم تقبل التفريط في شبر واحد من أراضيها, وكانت استعادة هذا الكيلومتر شغلا شاغلا للدولة والراي العام, وكما هو معروف فقد حسم الأمر لصالح مصر في النهاية بما قدمته من اسانيد واستدلالات. أما في حالة حلايب فلا يمكن لمصر ان تقبل الذهاب الي التحكيم علي سيادتها علي هذه المساحة من اراضيها البالغة20 الف كيلومتر مربع, دون وجود سند قانوني واضح لدي الطرف الآخر يستوجب ذلك, فالسيادة ليست موضوعا يمكن طرحة للتحكيم بمثل هذه البساطة.
6- في هذا السياق يثور التساؤل عن الموقف السوداني والاجراءات التي تم اتخاذها تجاه مثلث' إليمي' علي الحدود السودانية ـ الكينية, وعن الاراضي التي استحوذت عليها اثيوبيا في' الفقشة' شرق السودان والتي تبلغ مساحتها2 مليون فدان, الامر الذي يطرح تساؤلا آخر عن الدوافع والمبررات الكامنة خلف اصرار البعض علي تحويل مسألة حلايب الي' خميرة عكننة' بين مصر والسودان دون وجود سند واضح أو معقول.
7- تبقي نقطة اخيرة هي أنه إذا كانت هناك قناعة حقيقية بالمصالح المشتركة وبالمصير المشترك.. ومطالبات بشراكة استراتيجية, فانه لا أهمية لمشكلة حلايب التي يجب ان يصل الطرفان الي حل وفاقي لها, كما كان حادثا علي عهد الرئيسين نميري والسادت, باعتبار مثلث حلايب منطقة تنمية مشتركة, وهو ما تم انهاؤه عمليا من جانب واحد بواسطة سلطات نظام الانقاذ قي عام1992 عبر منح عقود تنقيب في هذه المنطقة لشركات أجنبية, الأمر الذي رفضته مصر, فكان رد الفعل هو التعبئة والتجييش والتظاهر عبر هيئة الدفاع عن العقيدة والوطن, ثم إثارة هذه القضية الآن مرة أخري لأسباب غير مفهومة بهذه الطريقة المفتعلة.
إن البحث عن حل لايمكن ان يتم من خلال الاثارة والتعبئة بل بالحوار الهادئ في اطار الوعي الكامل بالروابط العميقة بين الشعبين التي يجب ان تتعالي وتسمو عن التوظيف الوقتي المضر علي المدي البعيد.
|
http://www.ahram.org.eg/Archive/2009/11/7/FILE4.HTM
(عدل بواسطة كمال عباس on 12-21-2009, 05:24 AM)
| |
|
|
|
|
|
|
|
|
|
Re: الرأي الأخر .........ماذا تقول وجهةالنظرية حول حلايب? (Re: كمال عباس)
|
| Quote: أنا كل البهمني أنو مافي مبرر حلايب تصبح عظمة نزاع، |
أحترم الأستاذ نقد وأستغرب لهذا المنطق المتهاون في مسائل تخص أرض الأجداد وسيادة الوطن . . إلخ
لا في مبرر وألف مبرر يا أستاذ نقد- إن كانت حلايب سودانية فلن نفرط في شبرٍ منها، وإن لم تكن كذلك دعونا نفهم ذلك بالوسائل المشروعة ونحن لا نريد أرضاً من أحد.
إحترامي،،
| |
|
|
|
|
|
|
|
|
|
Re: الرأي الأخر .........ماذا تقول وجهةالنظرية حول حلايب? (Re: ثروت سوار الدهب)
|
Quote: المتشوعن الاصم
بكتاش
Quote:
الاخ ثروت
كدي بالله ورينا واستدل من حديثه ... اين اللف والدوران ؟؟
ما عليُ إن لم تفهم البقر |
الاخ ثروت
من الذي اوهمك بأنني(متشوعن) !! وان كنت كذلك ما الذي يضيرك انت !!
لا تتوهم انني سأجاريك في هترك هذا وسؤالي مازال منتصبا امامك ...اين اللف والدوران في حديث الاستاذ محمد ابراهيم نقد...اجب او ارفض الاجابة دون تجريح واساءات وسباب فهي بضاعة مردودة لاصحابها
| |
|
|
|
|
|
|
|
|
|
Re: الرأي الأخر .........ماذا تقول وجهةالنظرية حول حلايب? (Re: BAKTASH)
|
| Quote: ما دفع الأستاذ نقد للحديث عن الإدارة المشتركة أو إعتبارها منطقة تجارية .......أو مادفع بعض الأصوات بالمناداة بإعتماد حلايب منطقة تكامل!! |
لا طبعا
ما دفع نقد للكلام المتهافت
هو اليأس و الضعف و الهوان السياسي الخاص به و بحزبه.
و ربما إنشراع الابواب بين ما هو وطني و غير وطني بدون فواصل.
تحاياي كمال
تذكر لو كانت في مخيلة نقد حلايب سودانية لما وافق بمبدأ الإدارة المشتركة أصلا.
كيف تدار أرض ذات سيادة وطنية بواسطة دولتين؟
| |
|
|
|
|
|
|
|
|
|
Re: الرأي الأخر .........ماذا تقول وجهةالنظرية حول حلايب? (Re: ثروت سوار الدهب)
|
سلام ثروت
تذكر Quote: لو كانت في مخيلة نقد حلايب سودانية لما وافق بمبدأ الإدارة المشتركة أصلا.
كيف تدار أرض ذات سيادة وطنية بواسطة دولتين؟ |
ولو كان نقد يري أن كل المعطيات والأسانيد والموازين في صالح مصر وأنه
لايوجد حق سوداني في حلايب فلماذا لم يقل بتبعيتها سياديا وإداريا لمصر?
إن كان يري بسيادة مصرالكاملة علي حلايب فلماذاأقترح إدارة مشتركة?
.............صدقني ياثروت أن هذه القضيةبالغة التعقيد ويتفرق فيها
دم الحقيقة بين القبائل وتحتاج لحلول عقلانية تنأي عن الهتافية والإثارة
والمزائدة وتجنح للحقائق التاريخية الباردة وتراعي المصالح وطبيعة
التشابك والتبائن !! .........
| |
|
|
|
|
|
|
|
|
|
Re: الرأي الأخر .........ماذا تقول وجهةالنظرية حول حلايب? (Re: Marouf Sanad)
|
Quote: طبعا يا ابو الريش الرسلوا الرسالة هم المصريين مش السيد/نقد و دي واحدة
من مستنداتهم زي ما قالوا هم .
يعني السيد/نقد هنا نقل الفكرة فقط |
لا يا دكتور سيف،
الأستاذ نقد صدق الرسالة وإعتمد عليها وأصدر فورمان أن حلايب مصرية، بل تحدى من يقول أنها سودانية.. وقال فى وثيقة
تثبت ذلك، ولم يقل فى رسالة تدعى ذلك..
لو الموضوع موضوع نقل رسالة فقط، لما قمنا بنقد (الذات الشريفـة).
| |
|
|
|
|
|
|
| |
عبدالوهاب همت
ثروت سوار الدهب
Omayma Alfargony
كمال عباس
BAKTASH
Abureesh
عبد الحكيم نصر
محمد عثمان محمود
Marouf Sanad
فيس بوك
تويتر
انستقرام
يوتيوب
بنتيريست