|
|
|
 Re: العدد الحقيقى لمن فاتهن قطار الزواج مع شرح خطة الحكومة لحل هذه الأزمة(توجد محنة وربة وهجيج) (Re: الامين موسى البشاري)
|
الجزء الثانى
- خمسة شنو البسيطة دى ؟ أكان عاوزات خمسين أجيبهن ليكم إنتن ما سمعتن بالخبر
- خبر شنو؟ كمان
- الحكومة فتحت الإستيراد !
- بتاع الكريمات
- كريمات شنو يا غبيانه .. بتاع العرسان .. وحاتكن قالو تانى بت تفضل عانس بلا زواج مافى
- ويجيبوا لينا عرسان قدر ده من وين؟
- والله قالو إستوردو ليكن جنس عرسان يا حلاتن ذى (حجارة البطارية) ده من ده ما تفرزيهو !
- اوع بس يكونو ذى بضاعتم الفى السوق دى الحاجه تشتغل يومين وتقيف!
- والله غايتو دى مشكلة ناس المواصفات السوق كلو بضاعتو ضاربه يا بتى
- وديل يمه يعنى نقدم ليهم وين؟
- والله لسه الحكومة ما ورتنا الحاصل شنو لكن الظاهر ح يوزعوهم ليكن ذى (التموين) !
مؤتمر صحفى :
طبعا يا جماعة كلكم عارفين إنو عرس بقى مافى فى ظل إرتفاع تكلفة المعيشة وإنعدام فرص العمل وضآلة المرتبات وإنو تبعاً للحاصل ده إرتفعت مشكلة العنوسة بشكل رهيب وده طبعن ح يكون عندو آثار سالبه على المجتمع على المدى البعيد عشان كده يا جماعه الدولة فكرت فى إنو تحل المشكلة دى حل جذرى !
نحنا إتفاهمنا مع أخواننا المسئولين الصينيين ولقينا إنو عندهم نسبة عنوسة كبيره وشباب كتيرين ما قادرين يتزوجو عشان الزواج هناك تكلفتو باهظة وبتحصل ليها 75 ألف دولار قلنا ليهم خلاص مافى مشكلة نحنا أصلو علاقاتنا مع بعض (سمن على عسل) وإنتو أصلو عندكم شركات كتيره شغاله هنا عندنا نقوم بالمرة نستورد منكم عرسان يعرسوا مننا ويشتغلو فى الشركات دى ! بس على شرط يكونو (مسلمين) والحمدلله الأخوة المسئولين الصينيين وافقوا على القصة دى وطوالى وقعنا إتفاقية (زواج مشترك) وح نبدأ المسالة دى بى (ألف عريس) كمرحلة أوليه لحدت ما نقضى قضاءً مبرماً على مشكلة العنوسة دى ! - يلملم أوارقو ويلتفت للحضور - :
- ده كل الكلام العندنا فى الوكت الحاضر .... فى أى زول عندو أى سؤال أو إستفسار
- أيوه سعادتك الحقيقة سؤالى هو : (ألف عريس) دى يا سعادتك ما شويه ؟ نحنا فى (حلتنا بس) بيكون فى ألف عانس !
- الألف ديل بس دفعة أولى وإن شاء الله تكون فى دفعات تانية وتالته ورابعه لحدت ما نقضى أقصد نعرس لى آخر عانس !
- والله الحقيقه انا عاوز أسأل سعادتك يعنى هل برضو ح تحلو مشكلة العنوسة بالنسبة للأولاد ذى ما حليتوها بالنسبة للبنات !
- والله أنحنا (الأولاد ديل) عملنا ليهم إعلان فى الصحف الأجنبية عشان نصدرهم بره (كعرسان) لو فى زول محتاج ليهم لكن لسه ما جاتنا أى طلبيات!
- سؤالى سعادتك هو : هل الدولة وحدها هى الح تتبنى المشروع ده وإلأ ح يفتح للقطاع الخاص ؟
- والله نحنا قلنا ضربة البداية دى نقوم بيها نحنا وبعدين الشركات الخاصة ممكن تكمل المشوار
ودخلت الشركات :
إمتلأت الصحف بإعلانات الشركات التى دخلت مجال إستيراد العرسان (شركة نصف الدين لإستيراد العرسان المرطبين) ، وقد تخصصت فى إستيراد (عرسان) ذوى كفاءة مالية تتناسب مع عوانس (الطبقات العليا) ، شركة (ليسكنوا) للعرسان العاديين العاوزين (يسكنو وبس) ، شركة (عريس السرور) وكذلك شركة (عريس الكرور) والتى تقوم بإستيراد عرسان (قدر ظروفك) وقد فضلت بعض الشركات أن تقوم بالإستيرا فقط على أن تتولى شركات تجزئة القيام بمهمة البيع للجمهور !
وأكثر الشركات شهرة هي (شركة قدر ظروفك) والتي بدأت في استيراد باخرة كاملة من العرسان تناسب كل الأذواق
فى سوق (سعد قشرة) تجمهر عدد من المواطنين أمام شخص يصيح بواسطة مايكرفون محمول وهو يضع أمامه عدد من العرسان الصينيين .. على عشرة .. على عشرة .. على عشرة صينى مية المية وأهو ده الباسبورت .. والواقف داك المأذون .. عريس ميه الميه وأهى دى الشهاده الصحية .. لا بساهر (بره) لا بجيب ليك (ضره) .. علينا جاى ..
- عليك الله يا ود أمى قول للواقف فى النص ده قبل جاى خلينا النشوفو كويس
- ده ؟ اللابس الجينز ده ؟
- ..............................
- الوليد ده شغال شنو؟
- ده يا حاجه ما وليد ما تشوفيهو (سغيرونى) كده .. ده إسمو (وانغ يانغ ليو) وعمرو 39 سنة وشغال(فنى بتاع تبريد وتكييف) !
- أريتو عريس الهنا شوف الشعر نازل لى جبهتو كيفن - تلتفت نحو بنتها التى تقف خلفها - تعالى يا بت شوفى العريس ده بنفع معاكى !
- (تنظر إليه متفحصة) : قصير يا ماما .. قصير
- ويجيبو ليكى صينى طويل من وين؟ ما ياها دى البضاعة الفى السوق !
- (البائع يلتفت نحوها ) : خلاس يا حاجه ما مشكلة بكرة تعالى جايانا بضاعه (Xlarge ) بكره !
على مقربه من البائع السابق كان آخر يصيح (بدون مايكرفون) وقد تجمع حوله عدد كبير من السيدات تتوسطهن (نفيسة أم البنات)
- تعالااا بص ... بإتنين ونوص .. تعالااا بص ... بإتنين ونوص .. جابوهو بالطيارة وباعوهو بالخسارة .. أهو ده المأذون وأهم ديل الشهود .. تعالااا بص ... بإتنين ونوص .. تعالااا بص ... بإتنين ونوص
بينما عدد من (العرسان) يجلسون القرفصاء على الأرض ينظرون فى وجوه التى إزدحمت لتراهم ...
- ما بدتدينا يا ولدى (الخمسة) البى جاى ديل بى عشرة؟
- يا حاجه والله ده ما راسمالهم !
- (بناتها الخمسة يتشعبطون من خلفها فى محاوله لرؤية العرسان) : يا حاجه والله أخير لينا بورتنا دى .. عرسان شنو ديل الواحد قدر أنبوبة الغاز!
- (البائع) : إنتو يا حاجه عاوزين تعرسوهم وإلا تشدو فيهم (حلة) ؟ ديل أقل عريس فيهم (مهندس بترول) دخلو فى اليوم الشئ الفلانى .. قايلنهم ذى اولادكم ديل الواحد قدر الحيطة واليوم كلو نائم !
على واجهه شركة (راسين بالحلال) للإستقدام تم تثبيت لافتة قماشية كبيره كتب عليها بخط جميل ملون (يا ناس يا عسل العريس الصيني وصل) , تزاحم وهرج شديدين أمام مدخل الشركة مما دعا البوليس لتنظيم الصفوف
- والله أخير لينا بورتنا من الزحمة والمدافرة دى
- يا بت إنتى جنيتى؟ بورت شنو الأخير لينا والله كان قالو ليا أقيفى فى السراط المستقيم الليله أقيف ! هو نحنا صدقنا نلقى لينا عريس
- والله أنا خايفه يكونو مضروبين ذى بضاعتم الفى السوق دى !
- مضروبين ما مضروبين أنا حالفه الليله ما أرجع إلا شايله معاى عريس قابضاهو فى أيدى دى !
خلينا نلحق لينا بطن بطنين بعدين أولادي بينفعوني كان كبرته
بعد 40 سنة :
سيداتى أنساتى سادتى من إستاد الخرطوم الدولى يسرنا أن ننقل إليكم وعلى الهواء مباشرة المباراة الختامية لكأس الدورى الممتاز والتى تقام بين فريقى (التنين الاحمر) و(نجمة بكين)
كما تعلمون سيداتى وسادتى أن فريق (التنين الاحمر) قد وصل إلى هذه النهائيات بعد فوزه على فريق المريخ 5/صفر كما أن فريق (نجمة بكين) قد وصل بدوره إلى هذا النهائى بعد تغلبه على فريق الهلال (6/1) .. يدير المباراة حكمنا الدولى (شانغ فونغ لى) يعاونه فى الخطوط ( فينغ فو دان) و(وانغ فو لينغ) بينما يجلس كحكم رابع الحكم الدولى (شنغ فانغ شانغ) .. الآن سيداتى وسادتى يتقدم السيد (ليانغ لى فونغ) وزير الشباب والرياضة يصحبه السيد (شونغ فانغ لى) معتمد العاصمة القومية لمصافحة اللعيبة ...
الآن فى هذه اللحظة يطلق الحكم الدولى (شانغ فونغ لى) معلنا بداية المباراة .. الكورة مع فريق التنين الأحمر ... اللاعب فونغ وانغ (زرديه) بيلعب باص طويل جهه شونغ فانغ (طحنية) بيقطعا اللاعب شان لى فونغ (نملية) وبيعمل معاهو (فاول) ، الحكم بيديهو بطاقه (حمرا) ، ، يتوقف اللعب الآن وحتى يتم إخراج اللاعب من الميدان سيداتى آنساتى سادتى أشكر إنابه عنكم الفريق الإذاعى العامل الذى يقوم بنقل هذه المباراة لكم على الهواء مباشرة :
فى هندسة الصوت : شينغ شي تاو
على عربة النقل الخارجية : يانغ ياو شانغ
فى الإخراج : دونغ يونغ شاو
وينقلها لكم .. محدثكم : هوانغ ليانغ لين
كسرة :
هتافات الجمهور تتعالى : شانغ تشيو شونغ تشاو ....(التحكيم فاااااشل)
| |
 
|
|
|
|
|
|
|
|
Re: العدد الحقيقى لمن فاتهن قطار الزواج مع شرح خطة الحكومة لحل هذه الأزمة(توجد محنة وربة وهجيج) (Re: الامين موسى البشاري)
|
واحده بايره بوره شديده جاتا ملاريا
وخلاص راقده في سرير الموت
امها سألتا: اها يا بتي عندك وصيه
البت قالت ليها :لما اموت شيلوني في سرير دبل
*****************************
واحده بايره لمن غلط مشت لشيخ
عشان يشوف ليها عريس صاحبنا
طلب منها اتنين مليون وقالها اجيبو
ليك عريس مغترب عديل كده
زولتنا مشت باعت كل العندها وتمت
القروش وجات الشيخ قالها بعد اسبوع
بس حيجيك عريس من اروبا
زولتنا قعدت تبكي
الشيخ سألا: مالك بتبكي الاسبوع كتير ؟
قالت ليهو : لا لكن شايله هم ولادة الغربه
بعيد من امي
********************************
في واحدة بايركس مسافرة مدني بالحافلة
وفي النص كده اخدت ليها غفوة (نومة) صغيرة كده
المهم مع النومة يا زول جاتها ليك حلمة وبدأت تحلم
انو البت خطبوها وجابوا ليها قولة خير
وحددوا ميعاد العقد .. والمأذون جاء
وخلاص بدأوا في اجراءات العقد
وطبعا صحباتها جو القريبين والبعدين
أها في نص الحلم ده وهي مستغرقة في النوم
فجأة كده تسمع ليك صوت قوي
طاااااااااااااخ طاااااااااااااااااخ
صاحبتنا المسيكنة قامت مفزوعة من النومة
وطواااااالي التفتت لجارها وقالت ليهو:
أها عقدوا؟
جارها: لا والله طرشق
(طبعاً كان اللستك بتاع الحافلة طرشق)
ههههههههههه ههههههههههههههه
******************
قالوا واحدة بايرة برضو بورة شديدة
اها قاموا سألوها ليك:
يا فلانة تعرسي ولا تمشي الحج السنة دي؟
قالت ليهم : بس بسسسسسسسسسسس
هي الكعبة دي طاااااااااااايره
| |
|
|
|
|
|
|
|
|
|
Re: العدد الحقيقى لمن فاتهن قطار الزواج مع شرح خطة الحكومة لحل هذه الأزمة(توجد محنة وربة وهجيج) (Re: الامين موسى البشاري)
|
رد الشباب على البنات البايركس وقالوا:
Quote:
للرب شـــــكوانا بنرفع *** والبايـــر كله بيســـــــــــمع
في دربك يامـــا جرينا *** والعين الســــــاهرة بتدمع
كم مرة ايدينا اتمـدت *** والرد الجــــــارح اقنــــــــــع
احلامكم والله غريبــة *** وللعـــــــين بتزغلل وتذلــــع
طلباتكم لينا تحيــــــر *** جايين تتواضعوا هســــــــــع
ما جينا زمان شن قلتو *** يافقير يامقطـــــــع أرجــــع
***
ما عندك حق الســــــــفة *** لابس دمـــــــور ومرقع
دايرين العنــــــــــدو مصانع *** لو كان لي غيروا بيسمع
ما جينا زمان شــــــن قلتو *** يافقير يا مقطـــع أرجع
في جيوبك ساكنة عناكب *** لو كان باعوك ما بتنفع
دايرين العنـــــــدو الفـــــلة *** لو كان حنكوش ومدلع
ما جينا زمان شـــــن قلتو *** يا فقير يا مقطـــع أرجع
***
لو ماشـــي لآخر الدنيا *** تركــب رجليك تتبرطــــــع
دايرين العنــــــــدو البنز *** لو يبقى عجـــــــوزاً أصلع
ما جينا زمان شن قلتو *** يافقير يامقطع ارجـــــــــع
يا البيتـــك مبني زبالة *** ومن غير فيضــــان يتزعزع
دايرين العنــــــدو الفيلا *** لو كان صغيـــــر بيرضــــع
ما جينا زمان شن قلتو *** يا فقير يامقطـــــع أرجــع
***
وموكيتاً فخـــماً فاخــــــــر *** ونجفاً بالـــدر مرصــــع
والكندشة فريون ضــــاربة *** وثلاجة فريــــــزر تجمع
بي فيديو كاسـيت وأتاري *** نتسلى لو وكتنا نضيع
ما جينا زمان شـــن قلتو *** يافقير يامقطع أرجــــع
***
دايرين زنقيل ومقنــــــدل *** لو كان تمســـــاحا يبلع
والعملة الحرة ضــــــروري *** والمهر دولارا يدفــــــــع
وبشرط الشــيلة العامـرة *** والكرسي الجابر يلمـــع
وذهباً مختوم وأســـــــاور *** مليانة الإيد للأصـــــــبع
وضروري الحفــــــلة بوردي *** والكابلي اللحنو موقـع
ونقضي عسل في أوروبــا *** ونطوف العالم أجمــــع
بي لندن وروما وموســـكو *** وفينا المدن الأربــــــــع
نلبس ف ي الكاسي العاري *** ولو طلعت موضة بنتبع
وناكـــل فاكهة طـــــــازجة *** وبالخير نتمتع ونشـبع
أفلامـــكم والله عجيبـــــــة *** خلونا نحمض ونطبـــع
ماجينا زمان شـــــــن قلتو *** يامبهدل أوعك تطمـع
***
مد رجليك قـــــدر لحافك *** وشوف ليك طـورية وأزرع
لي مين تتقــــــــدم انت *** يا قرد ياقبيح يا مبرقـــــع
كيفن بتحـــــب يا أغبش *** من غير شاكوش تتفرقع
لو كان بنحــــــــب الزيك *** ما أخير الموت الأســـــرع
لو مت وفاتك تفــــــــــرح *** ولو عشت حياتك تفجـع
ولو تبقي ضراعي الأيمن *** في لحظة بنقطع ونجدع
***
ما قلنا الدنيا دي فانية *** وآمالنا مظاهـــــر تخــــدع
اختاروا العندو ديانـــــة *** الديمة وشـــــــو بيلمـــــع
قلتولنا خلاص انتظـــرو *** الحــور في الجنة بتنفـــــع
الليلة قطـــــــركم صفر *** والعمـــــــــــــــر ولى ودع
عجزتو قعــــــدتو تقولوا *** واشبابنا الأغبـــــش أجدع
ماجينا زمان شن قلتو *** يافقير يا مقطــــع أرجــــــع
***
ما جينا زمـــان ليه كنتو *** جاهــلننا زي الشــــــــفع
ما خلاص الليلـة وقعت وا *** من قد القفة الأوســـــــع
والليلة قطركــــــــم دور *** وقعتوا في وش المدفــــع
رافعين الراية البيضـــــاء *** لكن هيهــات ما بتنفــــــع
رافعين لعرس جماعي *** وفي العشرة ألف ما بنطمع
وهنياً ليكم كبدة وشية *** بعـــد الأضراس تتخلــــــــع
|
| |
|
|
|
|
|
|
| |
الامين موسى البشاري
د.يوسف محمد طاهر
Tragie Mustafa
isam elzein
nada ali
فيس بوك
تويتر
انستقرام
يوتيوب
بنتيريست