|
|
 حكومة رشيدة يجب تأييدها .. بلا معارضة بلا قرف !!!
|
حكومة رشيدة يجب تأييدها ... بلا معارضة بلا قرف كرهتونا ياخ ..
مما يصبح اليوم ويمسي الواحد يجي جاري على المنبر .. حكومة الانقاذ الفاسدة .. الحرامية .. القتلة .. عايزنها تمشي .. عذبتنا ..
افرضوا صحينا الصباح لقينا عمر البشير مطلع بيان بيقولوا استقلنا من الحكومة دي نحن وحزبنا وخليناها ليكم .. وفرحتوا وجيتوا راجعين السودان وكل واحدعمل فيكم حزب ورشح نفسو للانتخابات .. عايزين تقولوا للناس شنو عشان يدوكم اصواتهم ؟؟ لينا عشرين سنة مناضلين ورا الكيبوردات بتاعتنا عشانكم ؟؟ حنوصل لي كل زول نت في بيتو ونديه باسوورد في سودانيز اون لاين ؟؟ القبلكم سوا شنو عشان محمد احمد واوهاج ودينق وغيرهم يدوكم اصواتهم ؟؟
الشعب السوداني عليه بالحاجة اليشوفا قدامو وبس ..
شايف مدارس وجامعات ماكانت في ..
شايف طرقات وإنشاءات ماكنت في ..
شايف علاج وتأمين صحي وأدوية ماكنت في ..
شايف كهربا وموية ماكنت في ..
شايف إبتداءا من الأثاثات لغايت العربات قدامو وبالاقساط .. وماكنت في ..
حتنطوا تقولوا لي :
جامعات ومدارس أفرزت عطالة مافي ليها شغل ؟ أمريكا بتعاني من العطالة ومالاقية ليها حل ..
طرقات ومحمد احمد ماعندو قروش لعربية ؟ بنوك وشركات قطاع خاص وعام بتملك عربات وزمان كانت العربات بالعدد حسي الا تقوم الصبااااح بدري تلحق شغلك من شدة الزحمة ...
حتقولوا ديل ناس الانقاذ الحرامية ؟؟ يعني ناس الانقاذ ديل كتاااار للدرجة دي ؟؟ طيب منو الماانقاذي في السودان ؟
حتقولوا وينا قروش العلاج ؟؟ اتذكر زمان الناس بتشحد وتجيب علاجاتها ومن برة السودان لانو اصلا ماكانت العلاجات دي موجودة والحمد لله راااااااااقدة وباقل من نص القيمة .. تسهيلات في كل حاجة .. مشاريع دعم للاسر الفقيرة .. مشاريع للخريجين .. لجان للايتام ..
حاجات قبل العشرين سنة دي ماكانت في .. حسي بقت موجودة .. دي بس عشرين سنة ..
خليهم يكملوا الحاجة البدت .. وجهوههم .. ارشدوهم .. عشان الخير يعم وكلنا يصلنا .. مايبقى همنا نظهر كمعارضين .. محمد احمد واوهاج ودينق مابيستفيدوا حاجة من معارضتنا دي ...
ابسط حاجة حق النت البتدخل تعارض بيهو ده شارك بيه في أي عمل خيري .. أكفل ليك يتيم ياخ .. خلي محمد احمد ده يحس انك لمن زهجت من وضع البلد دي وهاجرت خليت البلد نفعتو بي حاجة ..
حرامي نافع اخير من حرامي مانافع .. البيسوي للناس حاجة الناس بتقيف معاهو حتى لو حرامي ونصاب بيتقاسم معاهم الحاجة اليلقاها واخير عندهم من البيشيلها كلها ...
وناس الدنيا كلها بتعارضهم مابيقدروا يكملوا الحاجة البدوها .. نصبر ونشوف .. عشرين سنة ماكفاية .. من 56 – 1989 كم سنة ؟؟؟ شفنا فيها شنو ؟؟
بلا معارضة بلا قرف ...
ملحوظة ( ماكوز ولا انقاذي سوداني بسيط وبس )
|
|
 
|
|
|
|
|
|
|
|
Re: حكومة رشيدة يجب تأييدها .. بلا معارضة بلا قرف !!! (Re: فتح الرحمن محمد)
|
البيقرأ الحاجات البيكتبوها مناضلي الكيبورد في المنبر ده يقول الناس الفي السودان ديل ماعايشين نهائي ...
البلد ماشة والشكر والحمد لله .. مانكون منصفين ونعكس الحاجة الجميلة برضو !!
والذي نفسه بغير جمال ... لايرى في الوجود شيئاً جميلا
قد تنكر العين ضوء الشمس من رمد وينكر الفم طعم الماء من سقم
| |
|
|
|
|
|
|
|
|
|
Re: حكومة رشيدة يجب تأييدها .. بلا معارضة بلا قرف !!! (Re: فتح الرحمن محمد)
|
Quote: تسهيلات في كل حاجة .. مشاريع دعم للاسر الفقيرة .. مشاريع للخريجين .. لجان للايتام ..
حاجات قبل العشرين سنة دي ماكانت في .. حسي بقت موجودة .. دي بس عشرين سنة .. |
| Quote: بسط حاجة حق النت البتدخل تعارض بيهو ده شارك بيه في أي عمل خيري .. أكفل ليك يتيم ياخ . |
Quote: كُنت أحكي قصة يتيمة ويتيمة أُخرى تم طردهم ومنعهم من الجلوس للإمتحان
كانتا يتيمتا أب
أًم إحداهن وهي والدة زوجتي بذات الوقت لا تعمل وتعيش بناتها على الإعانات
والأخرى بائعة شاي توفر ليتيمتها مصروفها بحسب تغافل المحلية عنها
كنت أحكي عنهن وتواصل الحكي أخي عمر
وأسمع القصة الأُولى :
أرملة .... تعمل في البيوت ... تسكن أُمبدة ... تسكن وأبنائها الأيتام في منزل
المنزل عبارة عن غُرفة واحدة ... عرشها بشكل قوس للداخل
يجمع مياه الامطار بالخريف بوسطه
وكانت الأرملة حين تنزل الأمطار ... تُخرج أبنائها إلى العراء .... وسط الأمطار
وتغطيهم بمشمع ثقيل بعض الشئ وتُدفيهم بدعائها للمولي عز وجل أن يحفظهم هذه اللحظة
كانت تخرج لغسيل الهدوم ولنظافة البيوت وتأتي لهم بالطعام
وحين تتأخر لأان أصحاب المال أحياناً متطلبين
كان أطفالها ينتظرونها بظل خارج المنزل ويفرحون لخيال ياتي من بعيد
علها أُمهم وهي تحمل الطعام وكان جارهم يحاول مساعدتهم فكانت ترفض بأباء وكانو في غيابها يرفضون بأباء علمته لهم
هذه الأرملة أخرجت إبنها من المدرسة في السنوات الأُولى كي يساعدها في تربية أخوته
وكان بحسب الجيران متفوقاً في دراسته
وصار متفوقاً في مسئولية مبكرة
أخي ......... كنت أسمع وأنا أرتجف .... من أخمص قدمي وحتى أعلى رأسي ...
وكان المولى يراقبنا ويحاسبنا عن شبابنا ماذا فعلنا به ....
وقلت الحمدلله أنني لم أكن رئيساً
وقلت
ليتني كنت تُراباً .........!!!!! |
Quote: في أُمبدة نفسها (شيخ) تجاوز الستين من العمر
يسير بصعوبة ... فقد كانت حياته السابقة قاسية (جداً)
قام فيها بتربية بناته ...فلم يرزقه الله بإبن
هذا (الشيخ) فشلت كل مساعية لإدخال خط المياه من الشارع لبيته ...
لضيق ذات اليد ...
ولأنه أب لبنات .... فإنه يصر على الذهاب لعدة بيوت
حيث بيت تفضل صاحبه بالإذن له بأخذ (المياه) ....
فكان ومازال يذهب ويأخذ (المياه) ... في ظهره المحدودب أصلاً
ويسير المسافة في زمن أكثر ثلاث مرات من المعتاد
بسبب السن
والحمولة
والشعور بالقهر
ويرفض طلبات بناته الملحة لجلب (المياه) فإنه لايأمن عليهن زمناً لم يحترم شيخوخته !!!!!
...
...
...
وليتني أخي مِتُ قبل سماع هذا وكنت نسياً منسيا ....
ليتني كنت تُرابا ... ليتني .... |
Quote: لشيخ (موسى) مسئول الطريقة التيجانية بالخرطوم
وصاحب مبادرة (أهل الله) لإنقاذ أهل دارفور
في معسكرات النازحين
و بحسب روايته لصديقي الذي روى لي بحزن
أنك قد تكرمت مشكوراً بدعم المبادرة
هذا الدعم الذي لم يتحصل إلا على(10%) منه فقط !!!
فخرج إلى الدول العربية لمزيد من الدعم
سألوه عما يريد لأهله في المعسكرات
فأجاب : أواني !!!!
إندهشو بحسب روايته فقال لهم : أن أهل دارفور يأكلون (العصيدة) علي أيديهم لعدم وجود أواني
تخيل اخي ... (إنسان) كرمه الله ياكل (العصيدة) ساخنة بيده لعدم وجود أواني !!! |
هنا يا استاذ فتح الرحمن سوداني اخر ما كوز ولا معارض من الخارج كتب من داخل العاصمه من ام بده من البراري
عن الايتام والفقراء الذين قلت في معرض حديثك ان الدوله قد انشاءت لجان ومشاريع لدعمهم يبقي يا انت كاذب او احمد موسي كاذب .
وان كانت هناك مشاريع لدعم الفقراء وكفاله الايتام فلما تطالبنا بكفالتهم او دعمهم ؟؟!!
قروش النت البندخل بيها عرق جباهنا وخدمه ايادينا لا نستقطعها من مال الفقراء ولا اليتامي
ولسنا مكلفين لاننا لا نصدر البترول ولا الذهب ولا نجبي الاتاوات ولا ضرائب المغتربين ولا ضرائب الصادر ولا الوارد
حر مالنا نفعل به ما نشاء .
هناك دوله تجبي الضرائب وتسيطر علي كل الموارد حتي الكارو البجره حمار عنده رخصه اي عليه ضريبه
ومن حقنا ان نطالب بالشفافيه وبالمحاسبه عند التقصير واللجوء الي القانون .
لانسالهم صدقه او حسنه بل حقا مشروعا
فثروات البلاد هي ملك الشعب السوداني من اقصي شماله الي اقصي جنوبه ومن اقصي شرقه الي غربه .
وعليك السلام
| |
|
|
|
|
|
|
|
|
|
Re: حكومة رشيدة يجب تأييدها .. بلا معارضة بلا قرف !!! (Re: doma)
|
Quote: كُنت أحكي قصة يتيمة ويتيمة أُخرى تم طردهم ومنعهم من الجلوس للإمتحان
كانتا يتيمتا أب
|
لا احد ينكر أن هنالك محتاجين ودون خط الفقر في السودان .. الناس ديل ماكانوافي قبل89 ؟؟ يعني السودان ده كلو كان مرتااااااااح ؟؟ كنا بنشرب الشاي بحلاوة كراميلا ..
لك التحية الأخت / الخالة / دوما
وانا هنا لست مدافعا ولا متحيزا بل الحق يقال نحن بالداخل نرى التنمية ونحسها .. نحس بان السودان يتغير والى الاحسن والافضل .. لذلك ننادي بتأييد من أعطونا هذا الاحساس ..
و زي ماقلت 20 سنة ماكافية عشان كل الأمثلة الذكرتيها دي تختفي والناس تعدي خط الفقر ..
ولك مودتي
| |
|
|
|
|
|
|
|
|
|
Re: حكومة رشيدة يجب تأييدها .. بلا معارضة بلا قرف !!! (Re: فتح الرحمن محمد)
|
| Quote: وانا هنا لست مدافعا ولا متحيزا بل الحق يقال نحن بالداخل نرى التنمية ونحسها .. نحس بان السودان يتغير والى الاحسن والافضل .. لذلك ننادي بتأييد من أعطونا هذا الاحساس .. |
سلام للحضور هنا جميعا:
أولا من أنتم؟؟؟
فأنت هنا تتحدث بصيغة الجمع ...
ثانياً: من قال لك أن كل المعارضين موجودين بالخارج...
وعلى أي أساس أتيت بفرضية أن كم حرامي في الداخل أحسن ليك من كم كده في الخارج
ياخي دي مسألة مخجلة ناس الخارج ديل سواء كانوا معارضين أو مؤيدين أو ما عندهم شغلة
بي ساس يسوس فهم أحد دعائم الإقتصاد بإعتبار تحويلاتهم للأسر بمعنى آخر إن كل أموالهم التي
يتحصلوا عليها في نهاية المطاف تعود الى الداخل تجي أنت بي جرة قلم تخلي الحرامية أحسن منهم؟؟؟
والحق الذي يجب أن يقال:
هو أن نسبة الفقر تعدت الحد المعقول لتشمل أغلب الشعب ما عدا قلة قليلة
وهو أن التنمية التي تتحدث عنها لا يمكن فصلها من تنمية الإنسان نفسه ...
فما معنى أن يكون هناك شوارع وإتصالات في حين أن البني آدم نفسه يعاني من عدم
الأمن ومن الانفلات الأخلاقي والقيمي ومن الفقر والجوع والمرض والجهل.
وأما عن القرف يا عزيز ..
فالقرف من حكومة تعجز عن حماية حدودها
والقرف من حكومة تقتل مواطنيها
والقرف من حكومة تعج بالفساد كل مؤسساتها حسب تقارير المراجع العام
والقرف من حكومة ضيعت كل ما هو جميل داخل هذه البلاد بدءاً بالاخلاق والقيم والضمير.
والقرف من حكومة أسست للمحسوبية والرشوة حتى صارت عرفا.
| |
|
|
|
|
|
|
|
|
|
Re: حكومة رشيدة يجب تأييدها .. بلا معارضة بلا قرف !!! (Re: بشري الطيب)
|
الناس القاعدين جوة السودان .. ننكوي بناره ونرى تنميته مع قلتها ونحس بآلامه ..
| Quote: ثانياً: من قال لك أن كل المعارضين موجودين بالخارج |
ضربت مثل بعددهم .. بالخارج ولا بالداخل أنا المواطن ده بستفيد من معارضتهم شنو ؟؟
Quote: ناس الخارج ديل سواء كانوا معارضين أو مؤيدين أو ما عندهم شغلة
بي ساس يسوس |
لم أقصدهم بكلامي وكلامي واضح .. لي اقارب في الخارج ويقومون بتحويلات لاهلهم بالداخل وليس لهم شأن بالسياسة وتشغلهم لقمة العيش عنها .. أقصد معارضي الكيبورد الذين لايسمن كلامهم ولايغني من جوع لمحمد أحمد ...
Quote: هو أن نسبة الفقر تعدت الحد المعقول لتشمل أغلب الشعب ما عدا قلة قليلة
وهو أن التنمية التي تتحدث عنها لا يمكن فصلها من تنمية الإنسان نفسه ...
فما معنى أن يكون هناك شوارع وإتصالات في حين أن البني آدم نفسه يعاني من عدم
الأمن ومن الانفلات الأخلاقي والقيمي ومن الفقر والجوع والمرض والجهل.
|
من بدري الكلام ده موجود فمافي داعي نوجه كامل نقدنا لحكومة بالرغم من تقصيرها ( الكمال لله وحده )
Quote: فالقرف من حكومة تعجز عن حماية حدودها
والقرف من حكومة تقتل مواطنيها
والقرف من حكومة تعج بالفساد كل مؤسساتها حسب تقارير المراجع العام
والقرف من حكومة ضيعت كل ما هو جميل داخل هذه البلاد بدءاً بالاخلاق والقيم والضمير.
والقرف من حكومة أسست للمحسوبية والرشوة حتى صارت عرفا. |
البديل أخي العزيز
ولك مودتي وتقديري
| |
|
|
|
|
|
|
|
|
|
Re: حكومة رشيدة يجب تأييدها .. بلا معارضة بلا قرف !!! (Re: الرفاعي عبدالعاطي حجر)
|
| Quote: الناس القاعدين جوة السودان .. ننكوي بناره ونرى تنميته مع قلتها ونحس بآلامه .. |
أنا مثلا واحد من الناس القاعدين جوة البلد الأداك الحق تتكلم بي إسمي منو؟
| Quote: ضربت مثل بعددهم .. بالخارج ولا بالداخل أنا المواطن ده بستفيد من معارضتهم شنو ؟؟ |
ياخي رياضيا ساكت أي حكم لا بد من وجود معارضة ليهو ؟؟ بعدين المعارضين ديل ذاتم مواطنين
بعدين يا عزيز إنت ما ضربت مثل ولا حاجة العنوان واضح بلا معارضة بلا قرف تجي تقول ضربت مثل ؟؟؟
| Quote: لم أقصدهم بكلامي وكلامي واضح .. لي اقارب في الخارج ويقومون بتحويلات لاهلهم بالداخل وليس لهم شأن بالسياسة وتشغلهم لقمة العيش عنها .. أقصد معارضي الكيبورد الذين لايسمن كلامهم ولايغني من جوع لمحمد أحمد ... |
طيب الموجودين بالخارج وشغالين بالسياسة ما بيحولو لي أهلم مثلا؟؟؟ طيب بي نفس فهم معارضي الكيبورد القلتو ده هل ممكن إنت تكون من مؤيدي الكيبورد أو مطبلي الكيبورد.
| Quote: من بدري الكلام ده موجود فمافي داعي نوجه كامل نقدنا لحكومة بالرغم من تقصيرها ( الكمال لله وحده ) |
يا عزيز ده ما كلام عقل كل من يخطئ في مال عام أو في إدارتو لأحد مؤسسات الدولة يجب أن يعاقب وهذا مالا يوجد بسبب من تفشي المحسوبية وإعلاء شأن الولاء الحزبي على باقي المؤهلات؟
لذلك في داعي نوجه نقدنا لهذه الحكومة ... ومن بدري لم تقم الحكومات بتحويل الحرب في الجنوب الى جهاد ولم تقم بقتل مواطنيها في بورتسودان وفي كجبار وفي أمري..
بعدين مقارنتك القبيل بي العطالة الهنا وإنو أمريكا ذاتها فيها عطالة ده زي المقارنة بين حلاة السكر وجري الحصان لأنو أمريكا الفرص للعمل فيها متساوية لا محسوبية ولا غيرو أضف لذلك فيها نظام ضمان إجتماعي وقبل فترة قصيرة أجاز الرئيس الأمريكي أكبر خطة للضمان الصحي تجي أنت ساكت كده تقارن ده كلو بي الجبايات المفروضة من قبل حكومتنا على مواطنيها؟؟؟
بعدين والله موجعني كلامك عن إنو أخير ليك 100.000 حرامي في الداخل من 20.000 في الخارج .... إنت زمان ما قالولك الراجل ما بيعيبوا الا إتنين (حرامي ، ومو ياهو) ... تجي تطلع الحرامية كويسين بي ياتو دين؟ وبي ياتو فهم وبي ياتو عرف وبي ياتو رجالة.
| |
|
|
|
|
|
|
|
|
|
Re: حكومة رشيدة يجب تأييدها .. بلا معارضة بلا قرف !!! (Re: بشري الطيب)
|
تحياتي صاحب البوست
تحدثنا وكأننا غياب أو موتى
يا أخي بفضل الإنقاذ أصبحت ( الكسرة) ضربا من ضروب الماضي وذكرى مؤلمة تخيم في عقول الفقراء وسواد الشعب السوداني
شوال العيش ب 160 ألف الآن ونحن في الموسم
شوال السكر ب 180 ألف ( 7 ) مصانع شغالة
شوال اللوبيا العدس 270 ألف
شوال الويكة 450 ألف
شوال البصل 230 ألف
لا نتحدث عن أشياء تباع بالكيلو مثل الخضر والفاكهة فهي للغلابة لا شيء
النفرة الخضراء مليارات ضلت طريقها واستقرت في جيبوب منسوبي اللا وطني
السدود والطرق والأنفاق طلعت مضروبة ( 3) مطرات في 2009 فضحت الوالي والولاية
التأمين الصحي والأدوية الهندية الفاسدة ومستشفيات لا توجد بها لا كوادر ولا خدمات
منسوبي اللا وطني يتعلمون ويتعالجون بالخارج
مشروع الجزيرة والمناقل والرهد وعسلاية المطاحن والنسيج والغزل والمعاصر اصبحت أثر بعد عين
وكمان حكومة رشيدة ؟؟؟؟؟؟؟؟؟؟؟؟؟؟؟؟؟؟؟
كان الله في العون
الشفيع ابراهيم
| |
|
|
|
|
|
|
|
|
|
Re: حكومة رشيدة يجب تأييدها .. بلا معارضة بلا قرف !!! (Re: Alshafea Ibrahim)
|
الإخوة الأكارم
أتحدث هنا عن مناضلي ومعارضي البورد ( أو كما يصفون أنفسهم ) ..
من حقك تعارض ..
معارضة تنعكس ظلالها على مواطني الداخل أمثال محمد أحمد ودينق وأوهاج ..
معارضة الكيبورد الأنا شايفها دي لابتودي لابتجيب ولابتغير حاجة .. كل زول متضايق من حكومة الإنقاذ ( الأنا شايفها رشيدة ) جاي يعارض :
البشير جبان .. حكومة قرف .. قرفنا .. الانقاذ حرامية .. وذكر ألفاظ ( كلمة قرف ) دي بالنسبة ليها محمدة ..
سؤالي والذي لم أجد له إجابة ( انا كمواطن مغلوب على أمري بستفيد شنو من المناضلة والمعارضة دي ؟؟ )
مابقول الانقاذ كويسة خلاص ريحتنا .. بس بقول الحاجة الحتى المعارضين لمسوها وببغضهم للانقاذ يتغاضوا عن ذكرها .. ( أذكر محاسن أخيك ) .. شايفين فيها خير ( ولا احسن اقول شااايف فيها خير ) احسن من كل الحكومات الجات قبلها ..
منفعجية .. لكن عملوا القبلهم ماقدروا يعملوه .
حرامية .. على الاقل بيقسموا لينا ولو جزء بسيط بنشوفوا ماثل قدامنا ماحكاوي .
وقس على ذلك ..
فأرجو أن لايفهم كلامي على أساس غير الذي ذكرته في مداخلتي هذه ..
وأكرر ...
والذي نفسه بغير جمال ... لايرى في الوجود شيئا جميلا
نبين المحاسن زي مابنبين المساوئ ( كل البشر خطاؤون ) ..
نقول الحقيقة بدون تدليس ومكايدات ( راجع جميع بوستات مناضلي الكيبورد والسادة المعارضين وحتشوف فيها من الكذب والافتراء الحاجة التخلي محمد أحمد يتمسك بالانقاذ ( محمد أحمد ده انا عشان ماتقولو اتكلم باسمنا ) ..
ولكم جميعاً مودتي وتقديري
أسأل
| |
|
|
|
|
|
|
|
|
|
Re: حكومة رشيدة يجب تأييدها .. بلا معارضة بلا قرف !!! (Re: فتح الرحمن محمد)
|
| Quote: بلا معارضة بلا قرف كرهتونا ياخ .. |
فتح الرحمن السلام عليكم ورحمة الله وبركاته
يا اخوى انت جديد فى المكان ده دحين الاندفاع مابنفع، اعتنق ماشئت
من مذهب وتنظم حيث يحلو لك وتعال بكلام المنطق اقل شى الناس تاخد
وتدى معاك وتقبلك فى بوستاتك بخيرها وشرها،لكن ناس قرف وعواليق وتافهين دى
كل زول عنده مخزون يكفى مدن.
| Quote: لينا عشرين سنة مناضلين ورا الكيبوردات بتاعتنا عشانكم |
بعدين مناضلى الكيبورد دى مسخت شوف ليك بضاعه جديده باهى بيها بين الامم
وهى لم تعد تخيف احد..هسه انت جيت هنا شايل ذوالفغار وراكب البراق ؟غير
الكى بورد عندك شنو؟ ،وبعدين ياهو السلاح الوحيد الذى يلجم ويقهر وحضارى
ولعلمك هذه العبارة ماتت اختناقا تحت دخان ناس كتار قبلك وبقت زى منديل
التشوز المستعمل من شدة ما علكوها الجماعه هنا.
Quote: شايف مدارس وجامعات ماكانت في ..
شايف طرقات وإنشاءات ماكنت في ..
شايف علاج وتأمين صحي وأدوية ماكنت في ..
شايف كهربا وموية ماكنت في ..
شايف إبتداءا من الأثاثات لغايت العربات قدامو وبالاقساط .. وماكنت في |
ديا نجيك ليهن واحده واحده
اول شى الجامعات الكتار ديل يا اللخو مايغشوك بثورة التعليم دى ساكت
بلاضافه للجيوش العرمرم من العطاله ودى فى ارقى بلدان الدنيا فى كما ذكرت
لكن قرار انشاء جامعه والدراسات التى تسبق ذلك لا طائل للسودان بها لانها
دى ما اكشاك ليمون يقفلها المحافظ متى شاء ياخى انت افتكرت المدرج والاستاذ
بخرجوا دكتور اين المستشفى التعليمى الملحق بالجامعه؟ واين المكتبه؟ واين
المعامل؟ واين الكادر البشرى من الاكفاء؟
ياخى قرار انشاء جامعات السودان دى كانت قرارات سياسيه اول شى عشان
كانو محتاجين لكادر بشرى للحرب الجهاديه التى كانت معلنه وعشان يغروا
الطلبه كان لابد ان يربطوا شهادتها بالخدمة الالزاميه ولا اظن ان ذلك
سر حيث رائت بام عينك كمية الطلبه الذين نفقوا كالاغنام فى العيلفون
وفى الميل اربعين وكمية الرمم المجدعه فى الاحراش دون قبور.
وعشان يضمنوا الامن المدرسى حتى جامعة الخرطوم فرتقوا داخلياتها
لانهم قالوا لاتلد الحية الا الحية وهى مبعث الخطر والطلاب هم ترمومتر
الشارع طوال تاريخ السودان المعاصر.لهذا السبب خلعوا لافتات المدارس
الابتائية والثانويه ووضعوا مكانها لافتات تشير الى اسم تلك الجامعات.
بعدين اسالك بالله اذا اثبتت اى من تلك الجامعاتعدم جدواها فهل من السهل
ان تقنع بان تلك الجامعه غير ذات جدوى ويجب اغلاقها،لانها اصبحت عند
اهل المدينه مكسب مثل الطاحونه والدونكى ولايمكن التخلى عنه،لذا تسمع
بان اساتذة الجامعه الفلانيه لم يستلموا مرتباتهم لعدة شهور وطلاب الجامعه
العلانيه متوقفين عن الدراسه لعدم وجود اساتذة. فهذه نقمة كبيرة
الطرقات صحيح هنالك طرق انشئت ولكن اين جدواها؟
زمان قيل اعطنى طريق اعطيك تنمية واين هى التنميه لان التنميه اول ما تنعكس
على المواطن فياكل من بصلها وعدسها وفومها وثومها،اظنك سمعت ان كيلو
الطماطم وصل 16000 جنيه سودانى ونحن فى هذا الخليج والذى هو غير ذى زرع
منذ عشرات السنين ولم يزيد سعر الطماطم عن الفى جنيه سودانى.
عليه هذه طرق للبروبقاندا وللدعايه والشو وليس طرق من اجل التنميه.
بعدين يا الحبيب الثلاجات والطائرات والسلع التى تتحدث عنها انت افتكرت
البضائع دى ديكور برصوها يتفرجوا فيها،السلع لوما قدر خالى الفراش وعمك
الغفير يشتروها بتبقى فى حكم النادرة ، دحين ما تعدها من الانجازات.
وبعدين العلاج حدث ولاحرج غايتو المرض مافيه شماته
| Quote: ملحوظة ( ماكوز ولا انقاذي سوداني بسيط وبس ) |
دى لما اصدقها بجى ارد ليك عليها،ويبقى الود يازول،،،
| |
|
|
|
|
|
|
|
|
|
Re: حكومة رشيدة يجب تأييدها .. بلا معارضة بلا قرف !!! (Re: عاطف مكاوى)
|
يا صديق الموج اخوي باااالغت عديل
زول زي دا بالفهم دا تدعو الله ان يكملو
بي عقلو الان ح يجيك ويستمرأ الحديث السابق
ويهرينا خليهو يعني فتح الرحمن دا اسم كبير
لكنه اراد ان يكون من مواليد الانقاذ فدعه يرى
بمعينه وينقل لنا المشهد ... ياود الموج ادعو
لابنك العاصي فالله كفيل بأن يصلح حاله ودحين ولدنا
دا محتاج الدعاء وبس بالحليل انت والعزيزة دومة
تعبتو لكن صدقوني بدون فايدة .
فتح الرحمن كمل يا ولدي كلامك كلام عقل ومنطق قول العندك
........................................................حجر.
| |
|
|
|
|
|
|
|
|
|
Re: حكومة رشيدة يجب تأييدها .. بلا معارضة بلا قرف !!! (Re: الرفاعي عبدالعاطي حجر)
|
الأخ / الرفاعي عبد العاطي
بعد التحية والتقدير
ماأي زول يقول عايز الانقاذ يبقى إنقاذي وكوز ..
بكرر مابقول الانقاذ خلاص كويسة .. ومافي حكومة مافيها حرامية .. منفعجية ..
بس زي ماكعبة عندها الحاجة الكويسة ليه مانذكرها ؟؟ ولمن نذكر المساوئ دي بنكون خدمنا قضية ؟؟ خلاص ريحنا محمد احمد وقدمنا ليه خدمة ؟؟ حاجات عايشا وشايفا قدامو ..
**من أخطر الأمراض القلبية التي يُصاب بها العبدُ أن يرضى عن نفسه، ويرى كمالات نفسه، ويغفل عن عيوبه، مع أنه لا يخلو إنسان من نقص وعيب وذنب وخطيئة (خُلِقَ الإِنْسَانُ مِنْ عَجَلٍ)(الأنبياء:37)، (إِنَّ الإِنْسَانَ خُلِقَ هَلُوعًا . إِذَا مَسَّهُ الشَّرُّ جَزُوعًا . وَإِذَا مَسَّهُ الْخَيْرُ مَنُوعًا . إِلا الْمُصَلِّينَ)(المعارج:19-22)، (وَحَمَلَهَا الإِنْسَانُ إِنَّهُ كَانَ ظَلُومًا جَهُولا)(الأحزاب:72). **
لا تكشفن مساوي الناس ما ستروا فيهتك الله سترا عن مساويكا
واذكر مـحـاسـن ما فـيهم إذا ذُكِروا ولا تَعِـبْ أحـدا منهم بما فيكا
وده القصد ..
| |
|
|
|
|
|
|
|
|
|
Re: حكومة رشيدة يجب تأييدها .. بلا معارضة بلا قرف !!! (Re: فتح الرحمن محمد)
|
تعرف يا فتح الرحمن إنت زول متناقض بي شكل عجيب
مرة تقول بلا معارضة بلا قرف وقبل اليوم يتم تجي تقول من حقك تعارض !!!!!
أثبت فوق رأي ....
الشي التاني انت قلت
اتحدث هنا عن مناضلي ومعارضي البورد (أو كما يصفون أنفسهم)
أها عشان التناقض ما يبقى معاهو كضب ممكن تورينا واحد وصف روحو بالوصف القلتو إنت ده والله هو وصف نجروهو من يؤيدون الحكومة؟؟؟
قلت:
الناس القاعدين جوة السودان .. ننكوي بناره ونرى تنميته مع قلتها ونحس بآلامه ..
الأداك الحق منو تنضم بي أسمي أنا مثلاً
وكما إنك بتسأل عن فائدة محمد أحمد من معارضة المعارضين ممكن تورينا إستفادة هذا المحمد أحمد من تأيدك للحكومة؟؟؟؟
* المرة دي حرصت ألا أسلم لأنك لا ترد السلام كما وضح في ردك السابق فخفت أن أثقل كاهلك بالذنوب !!!!!!!!
| |
|
|
|
|
|
|
|
|
|
Re: حكومة رشيدة يجب تأييدها .. بلا معارضة بلا قرف !!! (Re: بشري الطيب)
|
الاخ / بشرى
بعد التحية
يااخي انا لااتحدث باسمك .. اتحدث باسمي أنا ( راجع المشاركات حتلاقيني كاتب كده ) ..
مامنعت زول يعارض ولابقدر ولا عندي صلاحية بس معارضة تفيدني وتقدمني اخير من كلام لابيجيب لابيودي ( ولا رايك شنو ؟ )
واسف على رد السلام فلم الاحظ ..
ولك مودتي وتقديري
| |
|
|
|
|
|
|
|
|
|
Re: حكومة رشيدة يجب تأييدها .. بلا معارضة بلا قرف !!! (Re: فتح الرحمن محمد)
|
Quote: البيقرأ الحاجات البيكتبوها مناضلي الكيبورد في المنبر ده يقول الناس الفي السودان ديل ماعايشين نهائي ...
البلد ماشة والشكر والحمد لله .. مانكون منصفين ونعكس الحاجة الجميلة برضو !!
والذي نفسه بغير جمال ... لايرى في الوجود شيئاً جميلا
قد تنكر العين ضوء الشمس من رمد وينكر الفم طعم الماء من سقم |
كلام صاح الحياة ماشة عادي ..
قبل اسبوع اشتريت نص ربع بصل بسته جنيهات واليوم 15 نوفمبر ب 25 جنيها
ورطل السكر بالفين جنيه..
كدي ورينا موظف في الدرجة التاسعة ، خريج جامعي وليس عامل ماهيته 100 جنيه
بعيش كيف ..
هسع انت الكلام الفارغ بالنت دا بي كم ، وبعيش كم اسرة..؟
كيلو اللحمة الضان ب 16 والعجالي ب 10 ،اها ممكن الناس تاكل ربع عجالي
ب الفين ونصف ، طيب ومافي داعي للطماطم ب 15 الف جنيه..يكفي خدار بامية
كل يوم ب 3 الف جنيه..وخمسة قرون شطة بالف جنيه..ونص رطل زيت ب الف وخمسمائة جنيه..
طيب كم للمدرسة الجغرافية(ليست الخاصة) واذا عندك خمسة اطفال..؟
كم الكهرباء والموية والنفايات ..كم حق اللبن والشاي ..كم كيس خبز (الكيس بالف جنيه)
كم مجاملات ومواصلات..(استبعاد الحاجة الباردة لانها ترف )..ماعايزين بهارات
من شطة وفلفل وثوم الخ..وماعايزين لبس جديد! وماعايزين نشارك في مجاملات
فارغة بتاعت زول مات وزول عرس وزول نجح !
وكلنا ساكنين في بيوت ملك ماعندنا ايجار!
وناس البيت كلهم شغالين مافيهم عاطل سوي الطلبة بالمدارس !
ماعندنا موبايلات عايزة رصيد!
وماعندنا زيارات للحدائق ! ولا الاهل !
ولا عندنا ناس بموتوا في الولايات عشان يكلفونا قروش سفر!
طبعا مافي طلبة جامعات ومصاريف مليونية!
كل مشكلتنا ناكل وجبتين بس ، الاولي فول كل يوم والتانية غداء بسيط يبقينا
علي قيد الحياة!
شوف لي دي بكم في الشهر لعامل بسيط في الحكومة مرتبه 150 الف جنيه
وبلا معارضة وبلا قرف !
| |
|
|
|
|
|
|
|
|
|
Re: حكومة رشيدة يجب تأييدها .. بلا معارضة بلا قرف !!! (Re: بشري الطيب)
|
سأل مبتدر البوست
"انا كمواطن مغلوب على أمري بستفيد شنو من المناضلة والمعارضة دي "
ولو أنه علي قدر من الجدية في سؤاله نكون علي نفس القدر من الجدية في الإجابة.
جاء في الأثر أن أفضل الجهاد كلمة حق في وجه سلطان ظالم. وهذا بالضبط ما يفعله هؤلاء المعارضون. يقولون كلمة الحق في وجه السلطان الظالم. أما ماذا تستفيد منها فهو التالي: إنها تعمل لاسقاط سلطة المفسدين في الآرض. والتي سيقوم علي أطلالها سودان قوي منيع عادل، وهذا بالضبط ما تستفيده. إذا كنت قد أستكنت فالآخرين لم يستكينوا وإذا كنت قد إستطبنت القهر وقبلته أمر واقعا فآخرين كثيرين لم يفعلوا. سمعنا مثل هذا الكلام في زمن نميري. كان قليلون قد أستكانو لقهر ديكتاتورية نميري وأرادوا أن نقبله كامر واقع. ولكن ملايين ناضلت وكافحت وتحدت الموت فأسقطت السفاح نميري وأرسلته لمزبلة التاريخ وبئس المصير.
لم تصبر الجبهة الأسلامية 3 سنين علي الديمقراطية وهاهي بعد عشرين سنة وبعد أن تطاولت عمارتهم في الرياض وفي ماليزيا ودبي، من أموال البترول والدهب والجبابات وضرائب المغتربين، ما زلوا يطالبون بمزيد ما الوقت. إنت بصحك عشرين سنة ولسه دايرين زيادة؟؟؟؟؟
فكما قالت دوما هي أموالي أصرفها في الأنترنت لأعلم نفسي وأبصر الآخرين بما يجري لوطن نحبه ولولا أنهم شردونا منه لعملنا أكثر مما نستطيع علي رفعته. كثيرون من هؤلاء الذي تصب عليهم غضبك يحولون أموال لذويهم وذلك مصدر دخل لكل المجتمع السوداني، ولولاه لزاد الضغث علي إبالة الإنقاذ. وكثيرون يدفعون ضرائب تستأجر السلطة بدخلها عديمي ضمير ليشتموا كل من يقول لا في وجه السلطان الظالم. وكثيرون يبحثون ويقرأون ويكتبون في خير الوطن.
وبعدين السؤال المحيرني. عارفين أنو المعارضة بتصيب الحكومة بذعر وقلق شديدين. لكن وريني ضررها شنو علي المواطن البسيط (الذي تسميه محمد أحمد). هل سيتضرر أن قلنا له أن ما يصرف علي القصر الجمهوري من أموال دافع الضرائب تفوق ما يصرف علي الصحة والتعليم لملايين من دافعي الضرائب أنفسهم؟؟؟
فتح عنيك
ولازم تعرفوا الظلم جاي من وين عليك
| |
|
|
|
|
|
|
|
|
|
Re: حكومة رشيدة يجب تأييدها .. بلا معارضة بلا قرف !!! (Re: Nasr)
|
Quote: كيلو اللحمة الضان ب 16 والعجالي ب 10 ،اها ممكن الناس تاكل ربع عجالي
ب الفين ونصف ، طيب ومافي داعي للطماطم ب 15 الف جنيه..يكفي خدار بامية
كل يوم ب 3 الف جنيه..وخمسة قرون شطة بالف جنيه..ونص رطل زيت ب الف وخمسمائة جنيه..
طيب كم للمدرسة الجغرافية(ليست الخاصة) واذا عندك خمسة اطفال..؟
كم الكهرباء والموية والنفايات ..كم حق اللبن والشاي ..كم كيس خبز (الكيس بالف جنيه |
عبداللطيف نسيت اهم حاجة الليمون عشان الطمام البجي لما الواحد يقرا كلام الزول ده
| |
|
|
|
|
|
|
|
|
|
Re: حكومة رشيدة يجب تأييدها .. بلا معارضة بلا قرف !!! (Re: محمد إبراهيم علي)
|
الاخوة المتداخلين
تحية طيبة
زيي وزيكم بعاني من ارتفاع الاسعار .. من الفساد الشايفو قدامي .. من التشرد والجوع ..
من حق اي زول يكتب عن الشايفو وحاسيه .. مافي زول يقدر يمنع زول .. بس يكون كلام هادف ..
المعارضة والمناضلة الانا شايفا دي لابتجدع ولا بتجيب الحجار ولا بتغير في الوضع ده بي حاجة .. كلها اكاذيب .. ومكايدات لابتخدم ولا حاجة بالعكس بتساعد على تأييد حكومة الانقاذ ( زي ماانا مؤيدها كده ) لانها بتسوي وتنجز مازي الحكومات المتعاقبة القبلها .. كل حكومة ليها ايجابياتها وسلبياتها .. زي مابنبين السلبيات دي وشاطرين فيها .. ننصف الناس الشغالة وبتتعب عشان محمد احمد ونبين انجازاتها .. بنغش في محمد احمد ده ونملاه اكاذيب هو شايف عكسها ليه ؟؟
ولكم مودتي وتقديري
| |
|
|
|
|
|
|
|
|
|
Re: حكومة رشيدة يجب تأييدها .. بلا معارضة بلا قرف !!! (Re: فتح الرحمن محمد)
|
| Quote: ماأي زول يقول عايز الانقاذ يبقى إنقاذي وكوز .. |
يعلم الله اخر مشاركة لي ما متذكرها متين لكن كلامك مستفز ياخي ..
اي زول عاوز الانقاذ مستفيد وانت اولهم ولو ما مستفيد تبقي ( كالحمار يحمل اسفاراً) ...
الظاهر ما عندك زول رفدوهو من الصالح العام ولا سجنو ليك قريب ولا اخو ..ولا قتلو ليك زول بتعرفو ولا كانت وجبتك الوحيدة في اليوم (بوش ) بي موية جبنة .....
يا زول صوت لي انقاذك دي وانتظر بعدين ربناوكتر الشرح بالله ....
| Quote: زيي وزيكم بعاني من ارتفاع الاسعار .. من الفساد الشايفو قدامي .. من التشرد والجوع .. |
ما ممكن تقول كلام زي ده وتصوت للانقاذ انت قايل (معارضين الكيبورد ) ديل عندهم قنابير .....
| |
|
|
|
|
|
|
|
|
|
Re: حكومة رشيدة يجب تأييدها .. بلا معارضة بلا قرف !!! (Re: فتح الرحمن محمد)
|
سلامات يافتح الرحمن
لو الكلام التحت ده انت ماحاسى بيهو فى السودان معناها انت لاتعيش فى السودان.
كتب احدهم...........................................................
عايز تموت بشنو
لو عاوز تموت من الحسره؟
- ياتتفرج على اعضاء المجلس الوطني وهم يمارسون (فضيلة الصمت) تجاه مشاكل المواطنين
(يا تتفرج عليهم وهم يمارسون (حق) الكلام عن (زيادة مخصصاتهم
لو عاوز تموت مفرووووس ؟
- يا تقرأ لـ(عبدالرحمن الزومة) الذى يكتب عمودا يوميا (بين قوسين) يعدد
فيه حسنات وإنجازات (النظام)
- يا تبحث عن (مردود) ما يسمى بعائدات النفط .
لو عاوز تموت شهيد ؟
- يا تسافر عن طريق أحد شوارع (الموت) التى لا تصلح حتى كشوارع (داخلية
- يا تخرج فى مظاهرة (سلمية
لو عاوز تموت بالسرطان ؟
- يا تتناول الخبز المحسن (بالبرومايد) الذى يباع (عينى عينك) أمام نظر السلطات
- يا تتناول (المواد الغذائية) منتهية الصلاحية المفروشه (عينى عينك
برضو) على الأرض فى
الأسواق .
لو عاوز تموت من الغيظ ؟
- يا تسمع لتبريرات (الحكومة) حول قوات (الهجين
- يا تستمع لتبريرات (الداخلية) حول إطلاق النار على المواطنين فى (كجبار
لو عاوز تموت مغبون ؟
- يا تتعين وزير (حركة شعبية) فى حكومة (الوحده الوطنية) وممكن موظفك يهزئك
- يا تقارن بين قيمة (معاشك) وعدد السنوات التى قضيتها فى الخدمة المدنية
لو عاوز تموت من الجوع؟
- ياتنتظر (الدوله) توفر ليك (شغل) تسد به رمقك
- يا تحرى ليك (قريشات) من (بيت مال المسلمين
لو عاوز تموت من الهبل ؟
- يا تستمع لما تبثه (الإذاعه والتلفزيون) من إعلانات (ساذجه
- يا تستمع لإحدى مذيعات النيل الازرق في برنامج مشوار المساء
لو عاوز تموت مرعووووب ؟
- يا تقرأ عن عدد ونوع الأسلحة والعتاد الذى تمتلكه (المليشيات) داخل العاصمة
والتى تجاوز عددها 47 حسب شهاده مسئول كبير
- يا تضع عينة من مياه الشرب تحت مكبر (مايكروسكوب)وتنظر لما تحتويه من
(كائنات (غريبة الشكل !!
لو عاوز تموت من الضحك؟
- ياتقوم تتذكر إنو نحنا (دوله بتروليه)
- يا تقوم تتذكر أيام قبل ما يتم (إنقاذنا
لو عاوز تموت مليونير؟
- يا تكون مسئول وعندك (بيزنس)
- يا تكون عندك (بيزنيس) وأخوك (مسئول
لو عاوز تموت من الإندهاش ؟
- يا تسأل روحك (مرتبك ده مكفيك إنت والأولاد كيف؟)
- يا تسأل روحك (المسئول ده عمل العمارات دى) من مرتبو كيف؟
لو عاوز تموت من الحزن ؟
- يا تعود إلى البلاد من أى سفرية (خارجية) وتقارن بيننا وبين الناس البره
- يا تقيف أمام إحدى المستشفيات (الحكومية) وتشاهد المواطنين الذين
يتسولون قيمة الدواء
لو عاوز تموت على الحديده ؟
- يا تعمل ليك مشروع تجارى و(يجوك ناس الجبايات التركية
- يا تدخل ليك مرابحة مع (بنك إسلامى
لو عاوز تموت قبل يومك ؟
- يا تقوم بإجراء عملية جراحية (دقيقه) فى أحدى (المستوصفات الخاصة
- يا تقوم بإجراء عملية جراحية (غير دقيقه) بأحدى المستشفيات (الحكومية
لو عاوز تموت من الإستغراب؟
- يا تشوف مواطن عاوز يعمل ليهو عملية تتوقف عليها حياتو (بشهاده
الأطباء) وديوان (الزكاه) يديهو (ملاليم
- يا تشوف عدد حالات (إلى ذوى القلوب الرحيمة) التى تنشرها الصحف فى دولة
(المشروع الحضارى)
لو عاوز تموت من الزهج ؟
- يا تنتظر الكهرباء المقطوعه (من الصباح) تجى راجعه
- يا تنتظر دورك الـ 96 فى عيادة الأخصائى الكبير
لو عاوز تموت مخنوق؟
- يا تقيف فى صف العربات الطويل المتوقفه فى إنتظار العبور للخرطوم من
(أم درمان) بكبرى النيل الأبيض (الما معروف يتصلح متين
- يا تكون واقف فى (صف دفع الجمرة الخبيثه) يوم نهاية (الدعم
لو عاوز تموت مزهووووووول؟
اسمع قاضي المحكمة العيا بتكلم عن لون لباس لبنة في حيثيات قضية البنطلون
لو عاوز تموت مليونير؟
- يا تمارس (تنزيل)
- يا تكون قريب (وزير
لو عاوز تموت وفى نفسك سؤال ما لاقى ليهو إجابه؟
- يا تسأل عن (خلوها مستورة دى لمتين ح تكون مستوره) يا تسأل روحك (طيب
ليه ما يخلونا فى الصورة) ؟
لو عاوز تموت مبسوط في الواقع الحالي دا؟
- (صدقنى ( يا بتحلم
- يا …….. بتحلم
كسرة :
لو عاوز تغير الواقع العفن دا قوووم سجل اسمك في اقرب مركز تسجيل
اي الانتخابات مزورة بس دي خطوة للتغير
ولا شنو؟؟؟؟
| |
|
|
|
|
|
|
|
|
|
Re: حكومة رشيدة يجب تأييدها .. بلا معارضة بلا قرف !!! (Re: فتح الرحمن محمد)
|
فتح الرحمن السلام عليكم ورحمة الله وبركاته
| Quote: من حق اي زول يكتب عن الشايفو وحاسيه .. مافي زول يقدر يمنع زول .. بس يكون كلام هادف .. |
كويس إنه خليت كوة صغيرة يمكن أن يدخل منها كلام هادف
كنت أود الرد على استفساراتك ... لكن وجدت أن الأخوة الذين سبقوني على الرد عليك ما قصروا وأهي فائدة عظيمة تلقاها من المعارضين ... تخليك تغير رأيك فيهم .
ياخي إنت يا فتح الرحمن لو بتشوف إنه عشرين سنة غير كافية لتغيير حال البلد حتى مع تصديرها للبترول وكثرة الجبايات الفيها ... ليش ما قلت للإنقاذ دي تصبر شوية على الحكومة المنتخبة بواسطة الشعب السوداني المحترم والتي لم يتعد عمرها الثلاث سنوات عندما انقلبوا عليها بحجة أنها أضاعت زمن البلاد في الكلام وغيره.
المعارضة طبعا غير مسؤولة عن تعبيد الطرق ولا توفير الصحة للناس ولا بناء المدارس والجامعات لتعليم الناس فهذه مسؤولية الحكومة التي تبيع لمواطنيها الفورمات لتقديم أي طلب.
| |
|
|
|
|
|
|
|
|
|
Re: حكومة رشيدة يجب تأييدها .. بلا معارضة بلا قرف !!! (Re: جعفر محي الدين)
|
الاخ الكريم / جعفر محي الدين
وعليكم السلام ورحمة الله
حقيقة لم يفهم حتى الان الاخوة المتداخلون ماقصدت توضيحه في هذا البوست .. لم اقل ان المعارضة ليس لديها الحق فيما تكتب وتقول .. الوضع الان يحتم على الجميع الكتابة ( فان لم يستطع فبلسانه ) والقلم يمثل اللسان .. ومن حق الجميع الكتابة وابداء الراي والمشورة حتى ينصلح الحال ، ولكن هل ترى ان الاسلوب المتبع للمعارضة الكتابية التي امتلأ بها البورد تساعد على تغيير الحال ؟؟ هل تخدم قضية ؟؟ الموجودة الان كتابات تعكس الخواء الفكري الذي يمر به معارضي البورد فهم يحاولون تصفية حسابات فقط مع الانقاذ وبكتابات واساليب اقرب الى لغة الشوارع ..
بالطبع لا اقصد الجميع .. ولك ان تقرا وتقارن ..
ولك تحيتي
| |
|
|
|
|
|
|
|
|
|
Re: حكومة رشيدة يجب تأييدها .. بلا معارضة بلا قرف !!! (Re: فتح الرحمن محمد)
|
يا فتح الرحمن
سلام
انت قايل السودان بس الخرطوم؟!
ولاية الخرطوم كانت اصغر ولاية
الان اصبحت اكبر ولاية سكانية
75 % من المال المتداول فى السودان يوجد فى الخرطوم, مع انو الخرطوم فيها 12 % من سكان السودان
ركز معاى كويس. انسانا من معناة الاقاليم هسع.
و 75 % من المال اللى فى الخرطوم متسيطرين عليه اقل من 5% من سكان الخرطوم .
خمن باقى المعناة لباقى اقاليم السودان تكون كيف براك؟ بعد كدا شغِّل رياضياتك.
التنمية الانت شايفها سمحة دى فى الخرطوم, تنمية استهلاكية قشرية سلبية مظهرية ليس الا. يعنى ما انتاجية.
التعليم الانت شايفو دا الخريجين بسوقوا بيه رقشات.
واى واحد لو أمين وفاهم بى بترول قدر دا كان ممكن يبقى السودان اعظم دولة فى افريقيا والوطن العربى.
يا زول انت بتتكم كيف!السودان مازال فى لستة افقر دول العالم.
| |
|
|
|
|
|
|
|
|
|
Re: حكومة رشيدة يجب تأييدها .. بلا معارضة بلا قرف !!! (Re: محمد النيل)
|
الاخ فتح الرحمن محمد
أنا بي كل ود بحاول افهمك .. يا اخي مافي شي منطقي
كلامك متضارب و انتا ذاتك ما قادر تفهم و تقيف
علي ثوابت عشان كدا بقول ليك و اكرر ( الابلم مو شقي شقي البتكلم معاو )
والساكت عن الحق شيطان أخرس و ما حا اقولك اخرس ذي ما قالوها لينا الجماعة البتلمع فيهم
ديل .. لاكن من حقي كمان اتكلم بي الكي بورد
ومن حقي اقول ليك انتا عامل ذي (الجلابية الانصارية لا معروف ليك قلبة لا عدلة)
لف لفهم واتسلق كتفهم واندرش لامن تعمل ليك كرش ما انتا في حوش الحرية دا اتمهل و اكتب
وابقي فوق للحِبن تالوووله
( وش خاطف لونين)
الله معاك
محمد الفاتح قريب الله
| |
|
|
|
|
|
|
|
|
|
Re: حكومة رشيدة يجب تأييدها .. بلا معارضة بلا قرف !!! (Re: فتحي الصديق)
|
الأخ/فتح الرحمن
والله لو لم تقل إلا هذا لكفى
| Quote: وانا هنا لست مدافعا ولا متحيزا بل الحق يقال نحن بالداخل نرى التنمية ونحسها .. نحس بان السودان يتغير والى الاحسن والافضل .. لذلك ننادي بتأييد من أعطونا هذا الاحساس .. |
أقول لك وبكل أسف ناس المعارضة في البورد لا يحتملوا الرأي الآخر
يريدون من كل من يكتب أن يعارض الحكومة أو لا يكتب
نسوا أو تناسوا أنهم في المنبر الحر
مرحباً بك أخي في حوش بكري الواسع ، مرحباً بك قلماً حراً يكتب و يكتب بكل صدق واقع حال أهلنا في السودان
جهز درقتك يا أخوي
فكل من يدافع أو حتى لا يهاجم الإنقاذ فهو كوز وأمنجي ومصلحجي وحرامي ومنتفع
لي عودة ووقفة مع البوست المهم القادم من واقع الحال السوداني من الأغلبية الـ(كانت) صامتة ،ولا بأس من بعض الرود على عجالة
قلت:
Quote: حتنطوا تقولوا لي :
جامعات ومدارس أفرزت عطالة مافي ليها شغل ؟ |
وفعلاً قالوا:
| Quote: بلاضافه للجيوش العرمرم من العطاله |
صديق الموج يا أخوي رحب بالزول في الأول بدل الهجوم الكاسح ده
Quote: يا اخوى انت جديد فى المكان ده دحين الاندفاع مابنفع، اعتنق ماشئت
من مذهب وتنظم حيث يحلو لك وتعال بكلام المنطق اقل شى الناس تاخد
وتدى معاك وتقبلك فى بوستاتك بخيرها وشرها،لكن ناس قرف وعواليق وتافهين دى
كل زول عنده مخزون يكفى مدن. |
وين قال "عواليق وتافهين"
هو قال "قرف" فقط
وانت عاف منو الابتكر المصطح ده وحتى أصبح شعار للمعارضة "قرفنا"وشوف مشاركة مصطفى محمود، لماذا لم تنتقدها؟حلال عليكم حرام علينا؟
| Quote: دى لما اصدقها بجى ارد ليك عليها،ويبقى الود يازول،،، |
وليه ما تصدقوا،موش المؤمن صديق
وشنو البجبرو يكذب؟
ومع إني لا أرى أن يكون الشخص إنقاذي تهمة، ولكن ليه أي مدافع عن الانقاذ يكون كوز وأمنجي وإنقاذي حتى يثبت العكس، لو ثبت كلامك فهنيئاً للإنقاذ بالملايين
ويبقى الود كما قلت ولنا عودة
| |
|
|
|
|
|
|
|
|
|
Re: حكومة رشيدة يجب تأييدها .. بلا معارضة بلا قرف !!! (Re: الشفيع وراق عبد الرحمن)
|
alakh sa7ib alpost
belahi inta garfan min almo3arada almabitwadi wo bitjeeb wo ma garfan min albalawi al7asla fi baladak
aha mo3areedi alkeyborad dail khaleehom asilom ma biyadeefo laik
wareeni inta jayii hina ta3mal shno be keyboardak
wo wareeni 7atsali7 min a7wal albalad shno bardo be keyboardak
I really wish i have an Arabic keyboard
By the way,,,how do you know with this confidence that all the members of oppositions in this website
ma binadlo ila bel keyboard
really
YOU ARE GOOD AT THIS
| |
|
|
|
|
|
|
|
|
|
Re: حكومة رشيدة يجب تأييدها .. بلا معارضة بلا قرف !!! (Re: Omayma Alfargony)
|
الكلام البي إنجلوعربك بتاع أختنا أميمة ده متعب لكن ترجمتو
فتح الرحمن عشان أريحك والقراء ح أترجمو ليك
Quote: الأخ/صاحب البوست
بالله إنت قرفان من المعارضة المابتودي وتجيب وما قرفان من البلاوي الحاصلة في بلدك
أها معارضي الكيبورد ديل خليهم اصلهم ما بيضيفوا ليك وريني إنت جاي هنا تعمل شنو بي كيبوردك ووريني ح تصلح من احوال البلد شنو برضو بي كيبوردك
وبالمناسبة كيف لك أن تتأكد من أن كل أعضاء المعارضة ما بناضلوا إلا بالكيبورد فقط
حقيقة أنت جيد هنا |
| |
|
|
|
|
|
|
| |
فتح الرحمن محمد
Mustafa Mahmoud
doma
بشري الطيب
الرفاعي عبدالعاطي حجر
صديق الموج
عاطف مكاوى
فيصل محمد خليل
عبداللطيف حسن علي
Nasr
محمد إبراهيم علي
Osama Mohammed
Shawgi Sulaiman
عمار عبدالله عبدالرحمن
أحمد أمين
جعفر محي الدين
محمد النيل
محمد الفاتح خالد حسون
فتحي الصديق
الشفيع وراق عبد الرحمن
Omayma Alfargony
فيس بوك
تويتر
انستقرام
يوتيوب
بنتيريست