يا ناس المؤتمر جاييكم زول تقيل وسعو ليهو:أعلن إنسلاخي التام من المعارضة ودعمي للبشير

Quote: السؤال ده ناس الحكومة ممكن يجاوبوك عليهو أحسن مني عاطف يا أخوي أنا كنت بالفعل معارض و للأسف معارض نشط جداً أنا عارضت الإنقاذ منذ البيان الأول ،في وقت إختبأت فيه كل الخفافيش القاعدة الآن بتقدل في الساحة عارضت الإنقاذ وهي في عنفوان سلطتها وجبروتها في ذلك الوقت هرب من هرب واختبأ من إختبأ وكنا الوحيدين المعارضين في الساحة المعارضة يا أخوي في الوقت داك ما زي هسع ،كيبورد وكم بيان أنا يا عاطف أعتقلت وزرت ما يسمى ببيوت الأشباح وأحلت للصالح العام وإنت بتقول لي "انت متين ما كنت زول حكومة" وعشان كده قلت ليك اسأل ناس الحكومة لأنهم بعرفوني على كلٍ دي فترة تحتاج لي توثيق وربما أفرد ليها بوست لو ربنا هون لأنها ح تسلط الضوء لفترة غائبة عن معظم الناس وأنا بحكم عملي في تلك الفترة مهندس بالتلفزيون السوداني وسكرتير لنقابة المهندسين وتجمع الهيئات النقابية بالهيئة القومية للإذاعة والتلفزيون آنذاك أعلم عنها الكثير انا احترمك واحترم كتاباتك وانت من الكتاب القلائل الجيدين في المنبر والكتبتو ده ما بشبهك آمل أن أكون أجبت على سؤالك ولك الود والتحية