|
|
 أدُونْا ألنَصِيحه
|
ما أستشار من خاب
بالجنبه كده
يا Player ابعد من البوست دا و ما تقول خاص و ما خاص
|
|
 
|
|
|
|
|
|
|
 Re: أدُونْا ألنَصِيحه (Re: عبدالرازق الطيب يس)
|
نجى للكلام بعد ما عرفتو
انا و صاحبى وضعنا متشابه
هاجرنا من السودان لدول الخليج سوا فى بداية التسعينيات
الاتنين مهندسين اشتغلنا كويس و الحمد لله
اثبتنا و جودنا فى العمل وترقينا فى المناصب حتى وصلنا درجة مدير عام
دخلنا الشهرى لا يقل عن 5 الاف دولار
نركب عربات اخر موديل
اولادنا يتعلمو فى مدارس عالميه(منهج امريكى)
كل واحد عنده شقه فى السودان
الحساب فى البنك زيرو توفير بس بيوصل اخر الشهر بالراحه لانه مابنبخل على روحنا و الله ولادنا و الله بيتنا
ناس السودان حقهن رايح لهم كل شهر
العمر هسع فوق 45 و اقل من الخمسين
كل واحد عنده ولدين وبت
علاقتنا مع الخلق و الخالقنا ما بطاله
ما بنحب نأذى زول
بس
| |
|
|
|
|
|
|
|
|
|
Re: أدُونْا ألنَصِيحه (Re: عبدالرازق الطيب يس)
|
بعد ال Background دى نجى للموضوع
ظهر موضوع اللوترى فى البورد و بدا الفار يلعب فى راسنا مش عبنا
الغريبه فى الموضوع انو كل سنه بي نمر بالموضوع دا فى البورد و ما شاغلين بيه الشغله
بالمناسبه نحن الاتنين اعضاء فى البورد دا من سنة 2002
بس ما بنكتب انا غايته تقيان بس بحب حبيب نوره و عبد الغنى كرم الله
هو ذاتو عبد الغنى كرم الله دا جذوره من حلتنا ال حايغرقوها ناس السد
سد الشريك كان سمعتوبو يعنى عبد الغنى كرم الله دا جذوره حاتغرق
ولو غرقت حا يبقى كيس نايلو
يا حبيب نوره و الله انا كنت مجهز ليك صورة ولدى داير ارسله ليك
تتخيل هو عمرو سنتين و قاعد فى مصلايه زئ قعدتك ديك قال عاوز يصلى
لانه شايف امو بتصلى
ياااخ نسيت كمال على الزين اعذرونى بس انا زعلان منو بجيه راجع او بسوي ليه بوست براهو
لكن صاحبى قال ناس البورد ديل عاملين فيها شلليات
ياالهى النضم اخدنا من موضوعنا الرئيسى بس حا نرجع ليه بعدين
بالحنبه كده
الخلفيه دى كتبناها بالانجليزى عشان ما فى واحد يجى يقول بتعرفو انجليزى و الله لا
| |
|
|
|
|
|
|
|
|
|
Re: أدُونْا ألنَصِيحه (Re: عبدالرازق الطيب يس)
|
ان نسيت اقول لكم انو صاحبى دا
غير دول الخليج و مصر ما شاف ليه بلد تانيه
اما انا عووووك لى عند اليابان ديك الفيها 100 سودانى مشيت
و هسع هى عندى عادى ذى تقول ما شى سوق الاتنين فى الباوقه
لكن بينى و بينكم لندن قاطعه قلبى الاجازه الفاتت دى قلتا ياحبيب الاجازه فى الانجتيرا
قامت ظهرت ال swine flue يا زول لاوزت فىواحد شمتان و حاسدنى قال لى عشان انت قلتا ماشى لندن
بس امريكا دى ما بحبه مش قالو دنا عذابها الواحد يمشى بلد دنا عذابها
و بعدين بينى بينك ناس الانقاذ ديل كرهونا ليها
انتو عارفين الكلام دا بالجد سنة 89 شايف السودان دا احسن من امريكا ذاتها و ابيت امشى
لمان كان فاتحه تووووش بس جواز سفر و حساب بالدولار و التاشيره فى الخرطوم
لكن كانت المشكله كيف تتطلع جواز سفر ما ناس الانقاذ قالو لينا بلدكم دى جنه
عايتو غشونا غشه بت ابن كلب و الدخل ما مرق لى هسع
لكن انا مرات بقول انا شقى
عارفين يوم انقلاب الانقاذ دا انا يازول الساعه 5 صباحا شايل لى ناس موديهم
موقف شندى
يا زول معاى اخوى عسكرى
اها لمان جينا الكبرى بتاع برى قام العسكرى قال لينا الكبرى دا مقفول
امشو الكبري التانى قمنا مشينا الكبرى التانى كبرى النيل الازرق الزمن داك فى كوبريين بس
يعنى كان لى هسع اتنين ناس خليل كان ما اضربو الله انا قلتان هو ديك جو بي امدرمان
المهم مشينا كبرى النيل الازرق لقينا ليك ناس الشرطه فى نفق الجامعه سالناهم يا ناس الحاصل شنو
قالو لينا و الله ما عارفين نحن فى شغلنا حارسين الكبرى
قبل شويه جونا ناس الجيش قالو لينا امشو انتو هناك تحت النفق داك
و اى زول رجعو قام اخوى قال ليهم زميل قالو ليه خلاص فى ملازم
فى الكبرى داك امشيلو مشى لى الضابط و جانا راجع قال الضابط قال ليه
انتظر شويه يا رجعتو براكم يا خليناكم عديتو و الله انا كنتا درويش ساكت
يعنى كان داك الوقت اتحالفت مع الضابط دا كان هسع بقيت النائب الاول و لا احتجت لى مساعدة ناس امريكا و لا حاجه
المهم بعد شويه جانا الضابط و قال لينا عدو مشينا البص لقيناهو خلاص داير يمشى
بس احلى حاجه كانت الركاب ما جو كلهم و جماعتنا اتجدعو فى البص الفاضى
رعم انو اليوم الحجزنا فيه نشحد فى ناس البص ادونا الكرسى الوراء السواق و يتعززو
غايتو يالانقاذ ما طلعنا منك بى حاجه الا الكرسى الفاضى يوم الانقلاب داك فى البص
المهم نحن راجعين لقينا الدبابات ماليه كوبري الجيش
و فى ما بعد عرفنا الجماعه قلبوها
و الله الواحد شكلو بقى زى عبد الله الطيب يبدا الموضوع بتفسير القران و ينتهى بالمتنبى
بي نرجع لى موضوعنا بس ختو ال Background الاولى ديك فى بالكم
| |
|
|
|
|
|
|
|
|
|
Re: أدُونْا ألنَصِيحه (Re: عبدالرازق الطيب يس)
|
هسع الواحد كان واقف وين
ااه
المهم موضوع اللوترى ضارب فى نافوخنا اليومين ديل
الجماعه العندهم نحنا ديل اتعلمو و ما محتاجين لينا
بس شويه خجلانين و شايلين جمايلنا عشان كدا ما قادرين يقولو لينا
خلاص فكو دربنا و ادونا عرض اكتافكم
و كمان المدير التنفيذى ذاتو زمان لمان جا و كتار ومن القيادات العليا
انا و صاحبى دربناهم وو ريناهم المداخل و المخارج
هسع اسم الله عليهم بيوجهونا كان غلتنا
ربنا يطول عمرهم
بالجنبه كده
صاحبى قال فى ناس كتار فى البورد دا ما بحبهم
ويمكن يقول اسماهم هو و الله يقولن لى و انا اكتبن
بس ما فى زعل الزعل يكون منو هو بس انا بره الموضوع
| |
|
|
|
|
|
|
|
|
|
Re: أدُونْا ألنَصِيحه (Re: عبدالرازق الطيب يس)
|
بعدين يا اخوانا انا عارفكم دايرين تعرفوا النصيحه الدايره انا اشنو
قبل كم يوم كده ضربلى تلفون صاحبى مش ضرب لى هسع بتاعت طاش ما طاش ديك والله واجعه لى كنكوجى زى ما قال الفاروق
قالو جاييننا يوم الاربعاء فى البيت المهم الشفع حمبقو
لانه الاربعاء دى وعدناهم نوديهم البحر و منتظرينها من الاسبوع الفات
و كمان ولاد صاحبى دا هباشين و ممكن يخربو حاجاتن غايتو ان مرات قاعد اقول صحى ولاد المغتربين
قليلين ادب لكن برضو بقول بيكبرو و يخلو الحركات دى
لكن مرة(زوجة) صاحبى دا ما ها زولة بحر قاعده تقول بحر هنا دا عفنان
ما شفتو بحر اسكندريه كيف دا بحر هسع تقولو عليهو
المهم اها الاربعاء بعد صلاة العشاء جونا
فتحنا الباب الولاد جو داخلين تووش و على غرفة العيال الفيها البلى استيشن
هن اصلو عارفين مكانو
انا واقف لسع فى الباب الام جات داخله و كشفت وشيها من الشى الاسود اللابساهو دا لكن ما سلمت على فى ايدى
الغريبه لمان كنا فى السودان او اتقابلنا هناك تسلم على عادى فى ايدى
غايتو الحكاية دى براى انا ما عارفه منى انا و الله منها هى
المهم صاحبى جا يتقدل و شايل ولدن الصغير اصلو رضيع
عشان كدا فات طوالى يرقد الولد و يجى يسلم على
بس لقيتو ليك رجع تانى يا زول مالك نسيت العربيه مفتوحه
لا لا و الله ما جبت البزه
غايتو صاحبى دا كان شفتوه فى البلد فى الاجازه حاجه تحير والله
لا حول الله تانى الموضوع الاساسي ما جا
| |
|
|
|
|
|
|
|
|
|
Re: أدُونْا ألنَصِيحه (Re: عبدالرازق الطيب يس)
|
أنا و الله قلت الزول داللجماعه ديل مشغولين اليومين ديل يالفصل بعد ما يتم بعدين بنحدسن نحنا موضوعنا اشنو. لكن بي صراحه كدي طنطن وقال لي أنا بكره الكيزان والإنقاذ و الحركه الشعبيه و جيش الرب واوكامبو و المصريين والعرب و المعارضه و الشيوعيين انت الشيوعيين ديل قاعدين يصلو والله زي جماعة الاستاذ داك القالو ما بصلو وكمان بكره للديمقراطيه التالته مش هي الجابت الناس ديل. بعدين بجيب ليكم باقي الحاجات القال بكرهها انا ما قلتا ليكم الليله الاربعا ماشين البحر
| |
|
|
|
|
|
|
|
|
|
Re: أدُونْا ألنَصِيحه (Re: عبدالرازق الطيب يس)
|
عيييييييييك يا ناس امريكا
قلنا نمشى البحر و نجى نلقاكم رفعتو
اصلو صاحبى دا قال لى ناس امريكا ديل شغلن بالليل او الصباح بدرى ما زينا
نحن نشتغل النهار كلو
اجى القى البوست حتل و لا فى واحد منكم هببو و الله قال الناس ديل المساعده
اشنو الدايرنا ما فهمنا حاجه دا كلو كلام خارم بارم
اصلو كان ابرم من كدى كان معليش
لكن بصراحه بديت افكر فى كلام الزول دا قبييل قال لى المنبر دا شلليات
بس انا ما على يتشلو و الله مايتشلو انا بوستى برفعه براى
وعارف الكلام البرفع البوست و البودى الخور
قبل فتره قلت كدى اتاكد من النظريه دى
قمت فتحت بوست سميته للبالغثين +18 فى 5 دقائق كان العداد عيييك
لكن بالجد كان عندى موضوع داير اناقشه بالذات حكاية قلة الادب الكانت حايمه فى البورد
و عندى كتير من الكلمات زي سيد اللبن و الكان مقصود بيها حاجات تانيه
المهم الزول الكتب الكلام دا حاول يصلح لى صاحبه سقطة الشاطر فقام كتب سيد البلد و اتقلب
البوست هلال مريخ وصلاح ادريس وجمال الوالى و اللبن راح فيها
اها البوست القلتو ليكم دا بتاع للبالغين دا لمان لقيتو حايبقى موضوع كبير و كيتن على ناس الشمارات الدخلو يقرو قبال ما انا
ارفع البوست رحت سايبه يحتل ما قلتا ليكم انا زول تقيان و الله فد واحد قال بغم مافى و البوست حتل
وعم عبد الرحيم اتلافاهو القطر
بالجنبه كدى
و الله ياخى فى علاء الدينين ديل رجال و ولاد قبايل
كان كيزان و الله ما كيزان
يعنى وقفتم مع مياده دى غير الرجال ما بسوها
| |
|
|
|
|
|
|
|
|
|
Re: أدُونْا ألنَصِيحه (Re: عبدالرازق الطيب يس)
|
و الله يا ناس امريكا ان عازركم
لانه لقيت الناس لسع موضوع الانفصال و العنصريه
و درجه تانيه لسع شغاله
لكن بالجد نحنا ناس عنصريين
يعنى مثلا صاحبى دا خريج جامعة الخرطوم و انا خريج معهد
تتخيلو يقول لى انت ما مهندس انت فنى
لكن و الله انا دبلومتى دى و الله بالزمن دا بروف و بالتسعينيات ممكن نرضى بي دكتور
يعنى هسع لو ما عنصريه ناس الهندسة بتاعة جامعة الحرطوم يعملو ليهم دوله اقصد بورد براهم
و ناس معهد الكليات ما لاقين ليهم زباين
انا من زمان عارف ناس جامعة الخرطوم ديل عنصريين بس فوق الفنقوقه
هو الضيع السودان اشنو غير ناس جامعة الخرطوم و الجامعات المصريه
زمان كان بيقولو القارى طب فى اوروبا الشرقيه و الله روسيا
دا زى و زى التمرجى بس لكن انتو كان واعيين شوفو مشكلة السودان دى من و ين
تلقوها طالعه من جامعة الخرطوم و فوقه شوية جامعات مصريه
| |
|
|
|
|
|
|
|
|
|
Re: أدُونْا ألنَصِيحه (Re: عبدالرازق الطيب يس)
|
نرجع لى موضوعنا
قلنا ياباشا الوضع كدا ما معروف
و السودان حايقسمو
و العمر ما شى و الشقق حقتنا ذاته
ما معروف تتبع ياتو دوله
يعنى ممكن تقع فى دوله يجو يقولو ليك ياخى انت
من السودان الشمالى و الله الجنويى والله
و عشان تقيم هنا نحن ممكن نتسامح معاك
ونعتبر شقتك دى استثمار
بس لازم تشوف ليك واحد كفيل عشان نعمل ليك اقامه
او اذن او بيرميشن
و طالما الوضع كذلك بالاضافة الى ما ذكر فى اول الكلام
داك كان بي تتذكرو اصلو انا عارف الناس هنا فى البيت
دا بيتذكرو اشنو و ما بتذكرو اشنو
المهم قررنا نقدم للوتري
ولكن قبل ما نقدم قلنا ندرس الحكايه كويس
عشان ما تبقى زى موضوع العرس
الواحد يتمقلب و يجى يقول ليك
الجماعه القدامنا ما قالو لينا
اها بدينا نناقش الموضوع برانا
و قام قال لى يا اخى امريكا بتاعة شنو
نمشى نتمرمرط تانى
بعدين ما شفتا الحقايق البحكوها الناس دى فى البورد دا
و الله عاجبك قريبنا داك مرته(زوجته) طردته من البيت
و الله اخونا داك زاغ من مرته وو
ياخى خليك من دى الحاجات دى عادى بتحصل فى اى بلد
بس الشغل كيف و المصاريف
قالو الزول اول شى يبدا بتوزيع البيتزا
بعدين مرافق لى عجوز او مكسر
بعدين سواق تاكسي
يا خى انتا وين فى حاجه جديده
انت ما شفت موضوع البوست الرافعو بكرى دا
الرافع الله غايتو
موضوع المغسله دى اصلو ما فى زول فتاهو لينا قبل كده
اتارى الجماعه الكبار هنا ديل كلهم اشتغلو فيها
| |
|
|
|
|
|
|
|
|
|
Re: أدُونْا ألنَصِيحه (Re: عبدالرازق الطيب يس)
|
أديك النصيحه ياعبد الرازق ؟
أمريكا والغرب عموما بدأت فيها
هجره معاكسه الآن .
طالما إنت وصاحبك ده عندكم أولاد
لسه صغار مابنصحكم تمشوا تربوهم
هناك .
وطالما إنتو مهندسين فيمكنك الدخول
على مواقع الشركات القطريه ففيها الكثير
من الوظائف التى ستتناسب معاكم .
وقطر دوله يادوبها ناميه وقد تكون فيها
فرص توظيف طويلة الآجل وبرواتب مغريه .
أمنياتى لكم بالتوفيق .
| |
|
|
|
|
|
|
|
|
|
Re: أدُونْا ألنَصِيحه (Re: كمال سالم)
|
اخوي كمال شكرًا علي نصيحتك فعلا ما بعرف ليه قطر دي بحبها من زمان المهم كان في واحد قنصل قطري في جده الزول دا كان صاحبي شديد اسمو حاجه كده الكواري مره عزمني ليك رحله سياحيه بتاعه غوص في شرم الشيخ الجماعه أصحابي خوفوني و من ديك و عيييييك
| |
|
|
|
|
|
|
| |
عبدالرازق الطيب يس
عبدالله كع
كمال سالم
فيس بوك
تويتر
انستقرام
يوتيوب
بنتيريست