أمر الحب مثير‘ و لكن الأكثر أثارة في أمره‘ أنه ينتهي دائما بكارثة‘ كارثة تتعدد أسماؤها و اشكالها و خصائصها‘ تسمى زواج مرة‘ و تسمى طلاق تارات‘ و انفصال‘ و لطمات عاطفية ( مجربة في بعض الأصقاع و تسمى الشاكوش)‘ و في حلات منعزلة نادرة‘ تنتهي الكارثة بالموت المحقق‘ بتناول السم أثناء تلاوة قصيدة عتاب للمحبوبة ( باللاتينية الفصحى)‘ كما ذكرت كتب السلف في شأن ( روميو وجولييت)‘ و قد فكرت مليا فيما لو أن المأساة أتخذت اتجاها آخر‘ و قدر للحبيبين تجاوز خلافاتهما و شكوكهما‘ و كللا قصة حبهما بالزواج‘ فساورني الشك في أن هذه الخاتمة لا تعني بأى حال من الأحوال ( العيش في تبات و نبات‘ و تخليف صبيان و بنات)‘ و لكننا كنا سنقرأ كتابا آخر ‘ عن مأساة روميو و جولييت‘ و مشاكلها مع الدائنين ‘ و محاولاتهم المستمرة للهجرة‘ و مشاكل لا حصر لها تدخل فيها ( خيلان) روميو‘ و شيخ ( عبد الباري)‘ و لذهبت جولييت لبيت الطاعة دون أن تقدر على العصيان‘ موسعة ضربا حتى بانت الكدمات على وجهها الجميل‘ و لكثر النقار و الشجار ( أنا عادل ده ما قلت ليك ما تضربي ليه؟؟) و لعلها تدس له السم هذه المرة من غيظ‘ حين تضبطه ( متجدعا في ( الفيس بوك) دون ضابط و بلا رقيب‘ او انها تدقش المنبر العام في ذروة رغبتها في الأنتقام‘ عملا بمبدأ ( و داوني بالتي كانت هي الداء)‘ و لسان حالها يقول ( بلا روميو بلا سيهان بيرد). و قد تحيرت سنين عددا في أمر هذا الحب‘ تحيرت في قدرته على تغيير أقنعته ‘ من النقيض الى النقيض‘ فمن قناع الوله و الهيام‘ الى المرارة و العدوان‘ و من أستغراق في الهمس الحميم و أهداء الأزاهير‘ الى النواح و السباب و قذف ( البراطيش)‘ فتوصلت في بحثي الى أن أول عرض من أعراض فصام الغرام‘ يبدأ بتوهم الحبيب رؤية أشياء خارقة في محبوبته‘ ليست حقيقية في أرض الواقع‘ و لكنها ( مانيفيستيشن) لرغبات في داخل نفس ( الرائد) و هو ( الرياد) في العامية‘ و يتجلى ذلك بوضوح في أدب كتابة رسائل الغرام السريالية‘ و عبارات مثل ( نار مجوسك في صحراء اتون تخومي‘ رعشة الكوكب في لمسة الدمع المعطون الى قرابين الدهشة الأولى و الصهيل) الى آخره الى آخره ‘ و ذا نوع من اللغة لا يفي و رب الكعبة بأى معنى‘ سوى التلميح برغبات معظمها ( ايروسي) المبتغى‘ و قد يلجأ بعض العشاق الى الوصف الصريح ( الغزال و طير الجنة و لون المنقة)‘ حتى يلتبس الأمر على الحبيبة ‘ فتصيح من دهشة ( الزول ده ما نصيح ولا شنو‘ ما شافني بقطف فى البلاعة ساي). وقد كان أن صحبت صديقي ( عزو)‘ في زمان مضى‘ لكى أشهد بنفسي تلك الآنسة ( الشرط) كما اطلق عليها‘ و التي توسل الى النوم رجاء لسبع ليال حسوما‘ فما آتاه عطف لحظة من وسن‘ رايتها و ما رايت من قواها الخارقة غير ابتسامة ( مفتولة)‘ فتأكد لى أن في الأمر مرض عصابي بائن‘ و تبين لى أن الناس يبحثون عمن يوليهم بعض اهتمام‘ و عمن يحسون في حضرته/ حضرتها ( بأسباشليتهم) ‘ حتي يظهر في الأفق شخص آخر اكثر ( اسبشالية) من الذي في رفقتهم ( دعنا نسميه عاطف)‘ فتتفكك اقواس المعادلة‘ و يستشرى الطرح و الضرب‘ و تنتقل السينات و الصادات الى مواقع جديدة عليها‘ و ( تنظبط) المعادلة بالتساوي كما كانت و تأتي بنفس النتيجة في كل الأحوال. أما الأذكياء فغالبا ما ينأون بأنفسهم عن هذا الأمر الشائك‘ بالأقتران بقريبات لهم‘ كما حدث في قصة صديقي الذي عاد من البلاد عريسا‘ و لم يكن له باع يذكر في التناشط الغرامي‘ و حين سألته عن اين و متى و كيف التقى بالعروسة‘ أجابني في هدوء ( و الله مشيت السودان و لا مفكر زاتو‘ لقيت بت عمي كبرت و بقت سمحة‘ قلت جحا اولى بلحم تورو)!!!! و ما أتم العام أستدارته‘ حتى خرجت ابنة العم الى الأضواء ‘ تقارن ما بين ما آتاها الله ‘ و ما آتى غيرها من النساء فطلقته‘ فصام ( جحا) عن اللحم حتى هذه الساعة. خرجت بتساؤلاتي الى الطريق‘ فحدثني بعض حكماء العشق و الغرام‘ بأن ( الرك) ليس على الحب‘ و لكن ( الرك) على الأحترام ( لا ازال ابحث عن معنى الرك حتى كتابة هذا المقال)‘ و لكن و بما انني تعودت على أعتماد فهم الكلام على عواهنه‘ افترضت أن ( الرك) أن هو حقيقته الا حجر ( تتكل) به باب الغيرة‘ حفاظا على صحتك النفسية و العقلية‘ يلجأ اليه من القوم ( المتربللين) من ( ليبرال)‘ للتغاضي عن سلوك أحبتهم الناشز في معظم الأحوال‘ حفاظا على مستقبل العيال و المركز الأجتماعي‘ و شعارهم ( ربللو ما بدا لكم ‘ و لكن الساعة عشرة تكوني في البيت) أو ( تكون في البيت) لا فرق‘ و قد حكى لى صديق‘ بأن رجلا و زوجته‘ اتفقا أن يعود من اى سهرة في الخارج في العاشرة‘ و كان منزلهما لصيقا بكنيسة‘ تدق أجراسها مقدم كل ساعة‘ دقات تشير في عدادها الى الوقت‘ و كان أن تأخر الرجل ذات مساء فدخل المنزل متخفيا في تمام الواحدة صباحا‘ و بمجرد دخوله و زوجته حاضرة في انتظاره‘ دقت أجراس الكنيسة نقرة واحدة .. ( كنغ)‘ فاهتاجت الزوجة في وجهه معلنة غضبها على مخالفته للأتفاق‘ بيد أنه اصر على أن الساعة هي العاشرة و ليست الواحدة‘ و حينما ذكرته بأن الجرس دق دقة واحدة‘ أجابها في انتصار ( الصفر ده عاد يدقو ليك كيف؟؟؟؟). و توالت كوارث الحب الناتجة عن طبيعته الشيزوفرينية‘ فاندلعت الحروب بين الأغريق‘ و تعقد ( اوديب)‘ و ظهر الى الوجود ( مجنون ليلى)‘ و مجنون سوق الخدار ( الماشي عريان و ياكل في موزة) ‘ و كتب شاعر أغنية اشتهرت و طبقت بشهرتها الآفاق ‘ أختار لها اسم ( الى مسافرة) فأصر الناس على تسميتها ب ( يا قلبي الكتول كمد) و اضاف المطرب الى الكلمة الأخير اربعة دالات من عنده فصارت ( كمددددد)‘ و أعلن آخر ثورته على العقائد جمعاء فقال ( لولا ربي و جهنم لعبدتك)‘ و لعمري ما الذي قاله فيها بعد ذلك بعشرين سنة‘ و هى ممددة ‘ لابسة ( القنلة) في عنقريب الحوش و تحت مخدتها ( حقة)؟؟؟ و رقص الناس كما اشار وزير اعلام سابق الى ( ماسوشية ) أمة على انغام ( عذبني و تفنن في الوان عذابي)‘ أما كوارث الحب التي عاصرتها شخصيا‘ و لعبت ادوار بطولة في بعضها‘ فكثيرة اذكر منها‘ قصة ( بت حلتنا)‘ الجميلة التي ذهب بها فارس أحلامها الى بلد عربي‘ حتى أتي خبر موتها محترقة بعد سنة من أغترابها‘ و قد سمعت العاشق السابق يتحدث في بيت الفراش عن الحادث‘و كأنه يحكي قصة عن فرخة ( البليدة ما قفلت تأمين انبوبة الغاز ‘ اها قامت فرقعت فيها حرقت شمامتها)‘ لم ينقض شهر الا و رايته في ( بارتي) ‘ ثم انه تزوج و رجع الى ديار غربته ( ياخي الواحد بقى ما بقدر على الشقة الفاضية). و في تراثنا الكثير من الحكم و المآثر و النصائح التي يمكن استغلالها اسوأ استغلال ‘ ‘ و خاصة من طرف الرجال‘ فبعد انقضاء شهور العسل‘ يتبادل الأوفياء نصائح و امثال من عينة ( المرا بدقوها باختها)‘ متناسين أمر الأولى‘ و غرام المتوسطة و الذي اشتعل في العالي‘ و دك الحصتين الأخيرتين للحاق بها في موقف بصات الكدرو‘ ثم الأغتراب‘ و الرسائل السريالية‘ و الشيلة و الختة والحريرة و الضريرة و النور الجيلاني و القدامنا ما انت و بس كيفن تكون انت و آخر مرة لاقيناك و آخر مرة لاقينااااااك و بس كيفن تكون انت و يا انت.
أين يذهب كل ذلك‘ هل يتحول الناس ام تتحول الأشياء‘ أم أن اللوم يقع على الماء الذي نشربه‘ ام الهواء الذي نتنفسه‘ أم أن هذا الحب كائن مريض مصاب بداء الأنفصام‘ حين تنكر بعض ( المغرمات) كل شيء جملة و تفصيلا عندما يتوسل اليهن ( عزو).. ياخي انتي ما قلتي لى و قلتي لى‘ حتى تجيبه في دهشة ... متييييين الكلام ده؟؟؟؟ يصبح الحب على امر و يمسي على شأن آخر‘ كائن لا يعرف الوفاء و لا يرعى ذمة‘ عابث متلاف وقح‘ لا يعتد به و لا يعتمد عليه‘ وهم في حقيقته من صنع انفسنا‘ او لعله هروبنا المستمر من فكرة الموت‘. فقط أود أن أعرف‘ اين هي الآن ( جميلة و مستحيلة)‘ و تلك التي كان الشاعر ( يخاف) أن يسأل عليها الناس ( تكون هسة قاعدة في ماي اسبيس و الناس كلها عارفة)‘ و التي استعطف شاعرها النسيم ( يروح لها و يغطيها)‘ و التي لم تكتب ( حتى رسالة وااااحدة) و لا ايميل و لا يحزنون‘ دائما في حال ( دقيقة دقيقة) و في افضل الأحول BRB
09-15-2009, 04:48 PM
وجن
وجن
تاريخ التسجيل: 07-30-2002
مجموع المشاركات: 1796
أسمح لي أن أدلو بدلوٍ لا زال ممتلئا رغم أنه دلو مهتريء الأركان لما مر به من تضاريس البئر التي إحتفرتها في صحراء حياتي.
أستوقفتْني هذه الجزئية :
Quote: فتوصلت في بحثي الى أن أول عرض من أعراض فصام الغرام‘ يبدأ بتوهم الحبيب رؤية أشياء خارقة في محبوبته‘ ليست حقيقية في أرض الواقع‘ و لكنها ( مانيفيستيشن) لرغبات في داخل نفس ( الرائد) و هو ( الرياد) في العامية‘ و يتجلى ذلك بوضوح في أدب كتابة رسائل الغرام السريالية‘ و عبارات مثل ( نار مجوسك في صحراء اتون تخومي‘ رعشة الكوكب في لمسة الدمع المعطون الى قرابين الدهشة الأولى و الصهيل) الى آخره الى آخره ‘ و ذا نوع من اللغة لا يفي و رب الكعبة بأى معنى‘ سوى التلميح برغبات معظمها ( ايروسي) المبتغى‘ و قد يلجأ بعض العشاق الى الوصف الصريح ( الغزال و طير الجنة و لون المنقة)‘ حتى يلتبس الأمر على الحبيبة ‘ فتصيح من دهشة ( الزول ده ما نصيح ولا شنو‘ ما شافني بقطف فى البلاعة ساي).
معظم المتداخلين مروا مندهشين من النص لأن تجاربهم/ تجاربهن ومض فيها جزء من الحكي المنساب في صدق و عفوية و لكنهم لم يبتدروا التشريح و التعمق الذي كنت أتوقعه من هكذا موضوع.
في إعتقادي الجازم بأن الأشياء الخارقة التي يراها الحبيب في المحبوبة هي جذوة تنطلق من ما وراء القلب و تتجاوز الروح ، بل هي تنطلق من مكامن الغريزة الموغلة في العقل اللاواعي الذي يختزن صورة معينة للأنثى/الذكر ، و عند التلاقي الأول تنطلق هذه الجذوة كقرون الإستشعار ثم يتطلب الأدب و تقاليد المجتمع و ( التقلان ) بأن نبدأ بأتيكيت مبرمج لنصل في النهاية إلى المبتغى الأخير مهما كان نوعه و صنفه. و نجد أن رسائل الغرام و التأوه و عد النجوم بالليل و السهر ، كل هذه أدوات لإختزال الوقت لحين تلاقٍ ، و ما أن يلتقي الحبيبان و تنطفيء ثورة تلك الجذوة حتى تخمد براكين تلكم الإنفعالات التي كانت تغلي كالمرجل لتستكين و تجري في جداول روتين الحياة.
دمتم
جلال داود
09-15-2009, 07:01 PM
الطيب العامرى
الطيب العامرى
تاريخ التسجيل: 03-29-2009
مجموع المشاركات: 408
Quote: في إعتقادي الجازم بأن الأشياء الخارقة التي يراها الحبيب في المحبوبة هي جذوة تنطلق من ما وراء القلب و تتجاوز الروح ، بل هي تنطلق من مكامن الغريزة الموغلة في العقل اللاواعي الذي يختزن صورة معينة للأنثى/الذكر ، و عند التلاقي الأول تنطلق هذه الجذوة كقرون الإستشعار ثم يتطلب الأدب و تقاليد المجتمع و ( التقلان ) بأن نبدأ بأتيكيت مبرمج لنصل في النهاية إلى المبتغى الأخير مهما كان نوعه و صنفه. و نجد أن رسائل الغرام و التأوه و عد النجوم بالليل و السهر ، كل هذه أدوات لإختزال الوقت لحين تلاقٍ ، و ما أن يلتقي الحبيبان و تنطفيء ثورة تلك الجذوة حتى تخمد براكين تلكم الإنفعالات التي كانت تغلي كالمرجل لتستكين و تجري في جداول روتين الحياة.
أتفق معك أخي جلال ابوجهينة و لكن بنفس المستوى الذي تشتعل به هذه الجذوة في الأتجاه الموجب في العلاقة بين الذكر و الأنثى‘ تنحرف لسبب ما و في لحظة ما‘ وفي معظم الأحيان يأتي الأنحراف الى الأتجاه السالب رغما عن ان بعض الناس يعتبرون مشاكل العلاقات بمثابة الملح الذي يغذيها‘ الا ان مثل هذه التحولات تكون سالبة لدرجة مجرمة في كثير من الأحيان. سأعود لتفصيل رؤيتي قريبا تحياتي.
09-15-2009, 11:25 PM
Tagelsir Elmelik
Tagelsir Elmelik
تاريخ التسجيل: 11-25-2004
مجموع المشاركات: 4028
Quote: بأن ( الرك) ليس على الحب‘ و لكن ( الرك) على الأحترام
الاحترام في رقبتو فيهو طبقات و فروق و مقسم صغار صغار في احترام انسانية شريك حياتك و احترام خياراته و احترام قرارته الناتجة عن خياراته و احترام خصوصيته من خاص و تشمل الاسرار الدقاقة و ماضيه و في احترام تفرده كالبصمة وعدم تشابه مع أي آخر ولدتو حواء الوّلادة ...
الرك على معدن (الانسان) الحقيقي لو حب يا تاج ... أو لو كان طرف في أي علاقة انسانية بدء من الابوة و الامومة البنقول انها فطرة مرورا بالصداقة و الجيرة و علاقة الوطن و انتهاء بالحب و الكسير و الدشدشة ...
ابقى عافية ...
09-15-2009, 09:36 PM
Muna Khugali
Muna Khugali
تاريخ التسجيل: 11-27-2004
مجموع المشاركات: 22503
Quote: و قد تحيرت سنين عددا في أمر هذا الحب‘ تحيرت في قدرته على تغيير أقنعته ‘ من النقيض الى النقيض‘ فمن قناع الوله و الهيام‘ الى المرارة و العدوان‘ و من أستغراق في الهمس الحميم و أهداء الأزاهير‘ الى النواح و السباب و قذف ( البراطيش)‘
وتحيرت انا عند كل كل جملة! ويجب علي حقا ان اردت ان اقتبس كل ما أثارني في كتابتك هذه ونقاط تتحدث عن أمور يصعب الحديث عنها..أقول..يجب علي ان اقتبس كل ما كتبت أعلاه.. الا انني اكتفي بما هون لي الله..لأستغرب حقا كيف تصير الامور علي طرفي نقيض علي غفله او دون تصور سابق أو ملاحظة منا لتدهورها أو بداياتها الخطأ..
الا انني ايضا اتسائل..هل لشيزوفرانيا الغرام علاج؟؟ اعتقد أن الاجابة قد تكون نقاشا في شكل العلاقات وقيودها واحلامها وتصوراتها بجانب..وارتباطها بالواقعيه من جانب آخر..
شكرا يا ملك..ومازالت الاحمسة تثير في دواخلي ما تثير من ذكريات وضحكات نحن لها هنا باذن الله بعد الأرشفه أو بعد رمضان..
تحياتي..
09-15-2009, 11:41 PM
الجندرية
الجندرية
تاريخ التسجيل: 10-02-2002
مجموع المشاركات: 9450
الجندرية و الله ده أخطر ستيتمنت سمعته تماضر الوااحدة دي قالتو؟؟ انتي عارفة انا فورا اتخيلت العطر لمن يطش بعد ساعتين تلات من جسم الأنسان ولا يمكن انوفنا بتكون اتعودت عليه؟؟ تحياتي
طرقت العديد من الاسئلة التي تمور في داخلي ولا أجد لها اجابة فاضطر لتجاهلها مجبرا وانااغرق في دوامة الواجب والعزاء والمجاملات وحموضة المعدة وسفة قبل النوم وتوب العيد وقروش الحنانة
اندهش عندما تتحول اهات الغرام الي طماطم الصلطة وبطاطس القيمة وصرفة الصندوق
يجازي محنك يا التاج انت بتجيب الكلام ده من وين
09-16-2009, 03:30 AM
تبارك شيخ الدين جبريل
تبارك شيخ الدين جبريل
تاريخ التسجيل: 12-04-2006
مجموع المشاركات: 13936
Quote: تحيرت انا عند كل كل جملة! ويجب علي حقا ان اردت ان اقتبس كل ما أثارني في كتابتك هذه ونقاط تتحدث عن أمور يصعب الحديث عنها..أقول..يجب علي ان اقتبس كل ما كتبت أعلاه.. الا انني اكتفي بما هون لي الله..لأستغرب حقا كيف تصير الامور علي طرفي نقيض علي غفله او دون تصور سابق أو ملاحظة منا لتدهورها أو بداياتها الخطأ..
الا انني ايضا اتسائل..هل لشيزوفرانيا الغرام علاج؟؟ اعتقد أن الاجابة قد تكون نقاشا في شكل العلاقات وقيودها واحلامها وتصوراتها بجانب..وارتباطها بالواقعيه من جانب آخر..
شكرا يا ملك..ومازالت الاحمسة تثير في دواخلي ما تثير من ذكريات وضحكات نحن لها هنا باذن الله بعد الأرشفه أو بعد رمضان..
تحياتي..
العزيزة منى خوجلي علاج الشيزوفرانيا الغرامية دي ‘ علمو عند رب العالمين الأطبا و الكاونسلرز و شيوخ الجوامع و الفكيا‘ خدمو خدمة السنين عشان يرجعو حليمة و عبد الصادق الى نقطة البداية و بكل الحيل‘ حقن و بخرات و تمارين ( بوش اب)‘ بدون فايدة‘ التلج لمن يسيح ياكا الكادي النشارة. انتظر بوست الأحمسة القادم في شوق تصومو و تفطرو على خير
09-16-2009, 03:09 PM
Tagelsir Elmelik
Tagelsir Elmelik
تاريخ التسجيل: 11-25-2004
مجموع المشاركات: 4028
Quote: الاحترام في رقبتو فيهو طبقات و فروق و مقسم صغار صغار في احترام انسانية شريك حياتك و احترام خياراته و احترام قرارته الناتجة عن خياراته و احترام خصوصيته من خاص و تشمل الاسرار الدقاقة و ماضيه و في احترام تفرده كالبصمة وعدم تشابه مع أي آخر ولدتو حواء الوّلادة ...
الرك على معدن (الانسان) الحقيقي لو حب يا تاج ... أو لو كان طرف في أي علاقة انسانية بدء من الابوة و الامومة البنقول انها فطرة مرورا بالصداقة و الجيرة و علاقة الوطن و انتهاء بالحب و الكسير و الدشدشة ...
كاتمة على ألبك من زمان .... هههه
يا عزاز شوفي الله واحد و الأحترام واحد ‘ يا أحترام يا ما أحترام‘ يعني ما بتصور اقول لى زول ‘ ياخي عدم الأحترام ليك شنو؟؟ يقولى لا ياخى انت ما فهمت‘ ده احترام من طبقة تانية‘ ولا لا ياخي ده أحترام سغيروني شوية‘ يخيل لى الأحترام ده الشي الوحيد ( البتحسا) دون أن يصحبو اعلام‘ أنا ما مشكلتي في دي‘ انا بعرف ناس انفصلو و الأحترام لسة قائم بينهم‘ مشكلتي التلج الأتكسر عشرة سنه داك مشى وين ؟؟؟ في ناس بيقولو love evolves وفي ناس بيقولو الناس بتمشي في اتجاهات مختلفة بعد فترة‘ و في ناس بيقولوا‘ في ناس مشيهم اسرع من رفقاءهم‘ يعني سرعتهم ما واحدة‘ فبقوم واحد يكسح التاني‘ سؤالى‘ هل الحاجات دي ما ممكن تتشاف من الأول‘ زى ما اشارت ( منى خوجلي)؟؟؟ تحياتي الملك
Quote: تبين لى أن الناس يبحثون عمن يوليهم بعض اهتمام‘ و عمن يحسون في حضرته/ حضرتها ( بأسباشليتهم) ‘ حتي يظهر في الأفق شخص آخر اكثر ( اسبشالية) من الذي في رفقتهم ( دعنا نسميه عاطف)‘ فتتفكك اقواس المعادلة‘ و يستشرى الطرح و الضرب‘ و تنتقل السينات و الصادات الى مواقع جديدة عليها‘ و ( تنظبط) المعادلة بالتساوي كما كانت و تأتي بنفس النتيجة في كل الأحوال
الكلام الفوق دا فيهو ملخص كافي وافي لحقيقة و معنى الحب و الغرام. ........... زي ما قال واحد ترك زوجته من اجل واحدة اكبر منها عمراً و أقل منها جمالاً و علماً و لا تنافسها في اي مجال.. طيب ليه؟ رد قائلاً It's the way she makes me feel when i'm with her !
09-16-2009, 05:45 PM
Tagelsir Elmelik
Tagelsir Elmelik
تاريخ التسجيل: 11-25-2004
مجموع المشاركات: 4028
Quote: خرجت بتساؤلاتي الى الطريق‘ فحدثني بعض حكماء العشق و الغرام‘ بأن ( الرك) ليس على الحب‘ و لكن ( الرك) على الأحترام ( لا ازال ابحث عن معنى الرك حتى كتابة هذا المقال)‘ و لكن و بما انني تعودت على أعتماد فهم الكلام على عواهنه‘ افترضت أن ( الرك) أن هو حقيقته الا حجر ( تتكل) به باب الغيرة‘ حفاظا على صحتك النفسية و العقلية‘ يلجأ اليه من القوم ( المتربللين) من ( ليبرال)‘ للتغاضي عن سلوك أحبتهم الناشز في معظم الأحوال‘ حفاظا على مستقبل العيال و المركز
يا سلام يا الملك تعرف مباصرتك ل( الرك )دي عجبتني !! لا كيفتني بس زي ما بكيفني آخر جوقمتين شاي في كباية ظريفة تلمع وتحتها حتاريب السكر وحتاريب السكر التحت دي . دا الحكي بتاعك يا خي كيفتنا بشكل ... وصراحة حكيك جميل زي صورك يا ملك .. تسلم علي الجمال والذوق
شكرا لهذه الكتابة التي تجوس بعيونها في أمر علائقنا الملتبسة بكل شئ. ويا ليتنا نقدر على رد جميل العاطفيين والعاطفيات الذين شحذوا، في معمعة تلك العلائق، غنائنا بالدر المالي مثيل. آمل أن نتوفر قريبا على الكتاب الثاني والذي به تبني فوق الجمال. مع تقديري
09-17-2009, 02:55 PM
Tagelsir Elmelik
Tagelsir Elmelik
تاريخ التسجيل: 11-25-2004
مجموع المشاركات: 4028
رد جميل العاطفيين و العاطفيات‘ تجاى فى ارث الشعر و النثر و الرسم و النحت وعلوم الفضاء من عباس ابن فرناس الى الدرين‘ الباقي علينا رد جميل عاطف انيس هههههههه تحياتي للبنيات الملك
09-17-2009, 02:52 PM
Tagelsir Elmelik
Tagelsir Elmelik
تاريخ التسجيل: 11-25-2004
مجموع المشاركات: 4028
Quote: يا سلام يا الملك تعرف مباصرتك ل( الرك )دي عجبتني !! لا كيفتني بس زي ما بكيفني آخر جوقمتين شاي في كباية ظريفة تلمع وتحتها حتاريب السكر وحتاريب السكر التحت دي . دا الحكي بتاعك يا خي كيفتنا بشكل ... وصراحة حكيك جميل زي صورك يا ملك .. تسلم علي الجمال والذوق
Salam Ya Aisha hhhhhhh
Alrak do shno sa7i??
Happy to see here my Flickr partner Elmelik
09-16-2009, 05:51 PM
Tagelsir Elmelik
Tagelsir Elmelik
تاريخ التسجيل: 11-25-2004
مجموع المشاركات: 4028
Quote: الحب حاله من العواره , تصيبك لما تقرر تكون عوير .
لا وانت السادقة من ناحية عوارة دي ثابتة ، لكن مسألة القرار دي ما بييديك
شاعرنا الجميل ابو آمنة حامد الله يرحمو و يبشبش الطوبة التحت رأسه . . عاش جميل و كتب حروف انيقة : وشوشني العبير فانتشيت و ساقني الهوى فما ابيت
في سهرة تلفزيونية مع هلاوي و كانوا بتكلموا عن الاغنية دي - غناها صلاح بن البادية - اتفلت عليهو كدا و قال ليهو : يا ريتني لو ابيت !!
و لاحقاً كشف انها اتقالت عن محبوبته سابقاً زوجته لاحقاً و قال لو قدر ليهو يعيد كتابتها ح يقول : وشوشني العوير Homepage[/URL]
ما تخنقوها ياخ . . . فكوا الزرارة الفوق شوية ياخ !! خلوا فيها رقراق لعبور الضوء
ناس اميرة و الموشوشهم ( العبير ) ديل ينتحروا و لا كيف ؟ غايتو في حالة شاعرنا ابو آمنة دي ممكن تتلايق بانو الشاعر متمرد بطبعو و ما برتهن للواقع . . . لكن الباقين الموشوشهم ( العوير ) كيف ؟
Quote: ناس اميرة و الموشوشهم ( العبير ) ديل ينتحروا و لا كيف ؟ غايتو في حالة شاعرنا ابو آمنة دي ممكن تتلايق بانو الشاعر متمرد بطبعو و ما برتهن للواقع . . . لكن الباقين الموشوشهم ( العوير ) كيف ؟
عزيزنا سرالختم الملك سلامات .. اها قام عمك على ميرغنى . بعد ما كتب . ( أول غرام ) قال لجنريتر الغناء محمد وردى . ياوردى اشحنها شحن . ... أول غرام يا أجمل هدية يا أنبل مودة يا نور يانور يانور عينيه
حبى ماهديتو وغيرك ما اصطفيتو وأجمل من عيونك فى الكون ما رأيتو
لونك أبهى لون وكفاك العيون أه للأبتسامة النغم الحنون نظراتك لهيب وتثير الشجون ليه قلبى سليتو وبالا لام رميتو .. زولك يا تاج شتت فيها كم شوال غرام وكسر العود وكان ماش التجانى الماحى من شدة شيزوفرانيا الحبوكانا . يا تاج . على ميرغنى . بعد ما سمع أول غرام الأغنية الليلتو كان عايز يضرب 911 بس الزمن دأك ما كان فى 911 فكتم . هههههههه
Quote: انا نفسي نتوصل لاجابه شافيه على تساؤل الملك المحيرني اكتر منو ,
وهو انو الحب ده بيمشي وين ؟؟
أنا بالذات عندي فكرة بيمشي وين بس منتظر اراء الناس العاملين ما عارفين و مطنشين و عشان ااكد ليك كلامك في علاقة الحب و العوارة‘ انو الناس مرات بيبكوا عديل و يتنهفوا ( و نخرين) كابة‘ و سهر ماليه اى مبرر‘ و يشاكلو ناس تانين كانو صحبانن او اهلهم في سبيل الحب ده‘ يعني ( عبلة) دي‘ رفضت تغسل العدة نهائي‘ و بعدين فلنفترض انو ( عنتر) قام عرسا‘ ما حتمر سنة بالكتير قبل ما تكورك فيهو تقوليهو ياخ اهلك الحبش ديل تاني ما يجونا‘ و تقعد تقارن بين شعر بتها و شعر بت اختها و أحتمال كبير تقوليه ( عفا الله عما سلف) ‘ شيل سيفك ده و اتخارج. ولا شنو؟؟
ده بالضبط العناه الشاعر ( اين من عيني هاتيك الليالي) يا قيقا و يا بت الشيخ دي المداخلات ولا بلاش ههههههه تمسك المدعو حب ده و تناقشوا في كل فعايلو (شعور بأنا عالي جدا , هو البيتسبب في الغيره وبيفرتق القصه) الكلام ده حكمة العدد عديل و الله ما طالباني حليفة يا دكتورة‘ في واحد صاحبنا كان فاقد ايون المدارات كلها لقاها موزونة ‘ و ملانة‘ اتضح مؤخرا انها كانت ملانة وهم ساكت بوضع اليد‘ عموما انا بتفق معاك في ان البحث عن ايون هو اعظم متعة من العثور على ايون. تحياتي و شكري الجزيل على اهتمامك بالبوست الملك
09-17-2009, 02:59 PM
Tagelsir Elmelik
Tagelsir Elmelik
تاريخ التسجيل: 11-25-2004
مجموع المشاركات: 4028
حجر القيقا البنقع قيقا روي ابن السهروردي قيقراوي ال- للتمساح بلاوي و شوشة العبير لا للحبيبة دخل فيها و لا تلام عليها ولا تضاف الى مآثرها وشوشة العبير عند الطيب الأسكافي هي البنقو و كذا ( حنتوبي) ‘ فأن ابى فعليها و أن ابت فالصبر الجميل ‘ أو أن يدقها بأختها حتى و لو كانت في سنة ( ساتة ) و ذلك اقوى للباءة . تحياتي و سعادتي بحضورك الملك
09-18-2009, 02:39 PM
Tagelsir Elmelik
Tagelsir Elmelik
تاريخ التسجيل: 11-25-2004
مجموع المشاركات: 4028
Quote: نار المجوس والصحراء ديل مالك عليهم ياتاج؟ ده قاصدنى عدييييييييييييييييل
انا شايت على جهة بومباي‘ البخليك تتخززي سنو؟؟ ههههههههه
موضوع مشى وين ده الخلاني اقوم من فطور ( رمضان ناس عمر بانقا) اقعد في عربيتي في الضلمة و اكتب الكلام ده كلللللو ‘ و على السقيد واقف هناااااك مستغرب‘ التلج بيدوب في اول ( اشراقة) شمسية‘ يحفظ في صناديق حديدية مع مراعاة خلق عازل ( تجويف) ‘ او عليكم بالترامس‘ النشارة دي ما هي الا بقية مشاعر الخشب الخام ‘ الما عندها شخصية ...... الكلام ده بيجر تحياتي الملك
09-17-2009, 08:59 PM
قيقراوي
قيقراوي
تاريخ التسجيل: 02-22-2008
مجموع المشاركات: 10380
سلامات يا ملك قلبي الشمال ياخ سعيد شنو ياخ ؟ ما قالو لينا اتبجحوا كان التقتطوه ساي !!!!! بس ما لقط اهلي ناس البطانة . . . الغجر ديل نبوءاتم صادقة مرات مرات كدا لكن
Quote: تأملات في علائق الحب و الفصام
زماااااان زمن الناس بتقشر قدام الجكس بانهم بقروا " الكرمِل " اخوك كان بشتريها يقشر بيها هي ذاتا . . في عضُما دا اها يوم جات على عقل بالي ، قلت يا ود يا قيقا ما تقوم تسغف نفسك شوية ؟ اسي كان اتوكلت و فتحتها ما بتلقى ليك موضوعن يتلايق ليك ؟ ما معاك
و قد كان لقيت لي موضوعن شماراتو طازحة و خدرا و حاارة . . ما تديك الدرب ذاتو عنوانه قريب لي دا . . . شنو كدا و الاتصال و الانفصال . . . الوكت داك سامعين بي " جان جاك روسو " و مبهورين بعبقريتو و عقدو الاجتماعي . . و من كترة اللخبتة كانا حاسبنو تالت اشهر عقد بنعرفو لحدت الوكت داك ، بعد العقد الفريد و عقد اللولي بتاع البت السمحة . . . لمان استاذ الاجتماع فرز لينا بلغة الترك انو Contract المهم عمك دا - لما ما يكون بكتب في كتابو - اتاريهو بهناك صايط الواطة صواطة ، بحب ليهو واحدة طلّعت دينو - ما قاعد اسب دين انا ياخ - جد جد الشغلة دي ، كان عندهم مشكلة تعارض اديان . فت كدا قام غير ليك دينو على دينا لمّا موجتم ظبطت . لما الجماعة الشيوخ - جماعتو - جاطو فيهو و قالوا ليهو كيف الكلام دا يا الغبيان ؟ ويحك ! . . اصبأت عن دين الاجداد ؟ بعض خبثاءهم كانو شايفين غباهو في انو وكت لازم الكفر ؟ طيب اقنعا تكفر هي . . و مال الحنك دا سوه لشنو ؟ قام قال ليهم : يا اخوانا روقوا المنقة شوية ياخ ! . . دين مبشرينو زي الزولة دي ، اكيد بدخّل الجنة !!
وحاتك لي يوم الليلة دي الشمار كاتلني ما عرفت زندقتو دي خابت ولّا جابت نتيجة ؟ اسي دي ما عوارة يا نبراس ؟ و خناتة عبقري عديل كدا كمان
بالمناسبة شنو " قيقراوي " حافة كدا ساي ؟ مافي عمو و لأ اي حاجة ؟ و تاجو دا اختي دربو انتي و أميرة احسن ليكن . . . خلوه لينا نحن ديل كان لقيت فرقة بجي احكي ليك عن حب ناس زمان جدك شيخ الدين و عمي بلة " الشاويش "
يديكم الف عافية كلكم و من يقرأ ليكم بوست عسل بس يا تاجو
عشة المبارك و الله لمن قريت دي حسيت بى تشة في لساني ولغاليغي انتي ظنيتك النوع البقرمش الكباية الفيها زهور ديك بتكوني قايلاها تبع الحترب سلامي ليك و للبطان الملك
09-17-2009, 10:01 PM
Hadeer Alzain
Hadeer Alzain
تاريخ التسجيل: 07-13-2008
مجموع المشاركات: 3530
الواحد بقى ما عارف يحب ولا يحب زاتو قبل كمين يوم كدا في موضوع نحن بنتجوز ليه؟ كتبت: الزواج حالة من حالات الانتحار الجميل ويبدو الحب أيضاً هو انتحار لذيذ فيا أيها الملك مت معنا على الأقل شنو دا موت مدفوع الأجر
ولا شنو
09-18-2009, 02:45 PM
Tagelsir Elmelik
Tagelsir Elmelik
تاريخ التسجيل: 11-25-2004
مجموع المشاركات: 4028
Quote: وذلك، لعمري، قولٌ لا يدع مجالاً لخطلٍ بنظريّة تأقلم. دحين وريني آخوي وريني فوق عديلك وعديل ود مدني وعديل رمضان زايد.
هو ده كان أقل من شعر فيس؟؟؟؟ الندية دي في حالة شاعرنا السوداني، قطع شك قاصد بيها البنية البتكون بت خالتو لكن على اليمين القصيدة دي لو كان كتبها في بت الجيران ساكت، لي يوم الليلة كان يكون شغال ( محلك سر)، او غير ذلك من بلاوي ( الأدارة الداخلية)، و يقفو ليه ( صول) للمراقبة خليك قريب الشاكوش الهيدروليكي بنزل في الأيام القادمة. الملك
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة