الوعي نبيلٌ وقويمٌ بأصله قبل طَبْعِ الواعين

Quote: يا أساسي، زيادة إيضاح: هل في اختلاف حول القتل؟ السرقة؟ الكذب؟ قطع الطريق؟ دي ياها الأخلاق العالمية الحقيقية. لكن بمجرَّد ما نتوغل في الأديان والأعراف والتقاليد بتجي الاختلافات. نعم هناك اختلاف حول (الزنى). ما يراه المسلم المتدين والمسيحي المتدين واليهودي المتدين أيضاً (زنى) لا يراه غيرهم من علمانيين وصين ويابان "زنى". ومتى يحتك الجنس بالأخلاق العالمية!؟ عندما يتحول إلى (عدوان) إلى (اغتصاب)، أو عندما يتحول إلى (خيانة) كأن يخرج أحدُ الشريكين على المعاقدة بينه وبين الشريك الآخر ويدخل الكذب والخيانة. أها عشان كدا مواثيق الأمم المتحدة (الأخلاقية) بيراعوا فيها العالمية دي، بالتالي هي ما قضية لُغوية جغرافية وإنما قضية جوهرية وإنسانية في العموم. تُبنى على الفلسفة وليس على الأهواء والنحل والملل الجغرافية. بحيث تقوم على الأساس الذي لا غنى للإنسان عنه في أن يعيش حراً ويعبّر عن عيشه في الوجود بكل حرية. يعني الأمثال دي فوق حتى لو كانت من تأليفي –فرضاً- فما من حق أي زول يمنعني أعبّر عن روحي بالطريقة التي أراها مناسبة. زي ما من حقك تحمي جنوبيين يمشوا عرايا مثلاً، دي ثقافتن كدا ودا تعبيرن عن وجودن الذي يرونه مناسباً بهذه الكيفية. وهم بذلك لم يعتدوا عليك، لو هم قالوا ليك لازم تملص يا زول وتمشي معانا عريان، اعتدوا عليك. ولو إنت قلت ليهم ألبسوا يا ناس وبلاش فضائح اعتديت عليهم. الشارع دا مفروض يشيلكم الاتنين. و"ممكونة" سألتني عن العراء واللبس كأنها مسألة معجزة بالله؟ وكأنّها ما شافت الآلاف –في بوست بريمة الشهير- من الناس ديلك الطلعوا عرايا وأهانوا شرف القماش في مقابل شرف الضمير. المعتدي هو الشخص الذي يخلع نفسه من شأنه ويُلقي بها في شؤون الآخرين. الزول العايز يعمل فيها "ألفا" على البشرية، ومحدِّد لما يجب أن يكون عليه الآخرون من رؤى وسلوك ونطق، دا ياهو بالضبط المعتدي.