|
|
 Re: بتوووول ست الطــعمــــــية ( أهداء للموجودين الان والجــايين هســـة) (Re: حبيب نورة)
|
هووووي دا شنو دا يا بت ؟ مالك انكشحتي فيني كدا ؟ برااحة برااحة أ الحنينة , انا ما بقدر علي جنس دا ,أأأأي قليبي رهيف وما يقدر علي الهبباي في عز الصيف ,لكن بي الطريقة دي انتي حاتضيّعي مستقبلي الثقافي والله ,عشان كدا انا بقترح انك ,تدّفقي فيني حبّة حبّة , وتختي جواي الّرحمن ,شيلي الهم الساكن جوفي , أرمي الوجع العاش في قليبي ,, واجدعي فوقي الغنية بشارة , ادّيني شوية فال لي بكرة , انا بديك في الدنـيا السترة , يا مليانة قصيد واغاني يا رويانة كلام ومعاني , انا كلمتك وانا حدثتك ,انتي الغنية وانتي المنية انت الدنيا ,.. وانت رجوع جنيات قمرية , تعبت حاضنة العش وتنادي , دايرة جناها الشالو غباهو, شالو رماهو في حفرة هم .
أها نتفق ... ونقعد في الصقيعة دي ونشوف الحاصـل علينا , وعشان تعرفي الريد , وزول أتمحّن كاتلا محنّة و.. داك يا الشوق الما خمج !! عاد يا يمة شوق اليابة و شوق التابة , دا الخلاني ألفح توب الحشمة , واخش في نبضك حافي الراس ,وينو غطاي ؟ وينا طريحة حاجة زكيــــــــــة , الكتبت فينا نداوة الحال وراحة البال فرح الاطفال . اها نقوم يا بنية والا نواصل قعدتنا ؟ونلز الشافعة القليصة دي تمشي تشحد ليها راس سكر من ناس ست النساء , وتجي تتحكر للجبنة المتنتنة , والله القعدة غلبتنا وكمان الوقفة غلبتنا , قهر وفراق أهل , وعلي العلينا بشتنة ورقاد واطـــــــة.
وبعد دا كلوا اّ السمحة , تجي تدخلينا تااااني في وجع الشوق ؟ أها انا كان قلت كدي وضربت السكلي والردحي , و أترمّدت و سفيت التراب ,ولميت علي امة لا اله الا الله  , وكل ناس الفريق عليك الله خاتي ,؟ في زول بقدر يلومني ؟ أأأأي بسوي ليك فضيحة , لي متين انا اقعد انادي عليك وانتي ساّدّة دي بي طينة ودي زاااتة بي طينة ,يعني بتوفري في حق العجين ؟ بعد ما وفرتي الفرح الفيك؟.
فكي قيود البسمة النسمة , خلي غرورك يسطع نورك يملا الفجة شعاع النجمة .. هو انا عليك الله الا امشي بي عكاز عشان انتي تعرفي اني اتكسرت وأتحسرت ؟ ما خلاص انا قصتي باظت وحالي بقي للخلا والشدر  .
اّخر هـــام ,تعالي وشيلي من اساي , تعالي وأبقي ليا شعاعا للضلام غلاب , أمشي مني لكن ليك , أتدفقي وأبقي ليا الطل , أمسحي عني سجم الفكرة والاحساس , شخبطي فيني ,قصــة جديدة في الخاطر ,بشتني همي بي شوفتك , أكشحي فيني روح الوردة تبقي ليا أرهاص زول كتب بالهم مساديرو ,وسرح بيك وسافر ليك , وعشمو يرجع ليك , زي النيل يفارق ضفة الميعاد , يجيبو مخاضوا بي المطرة ,يربي جروفو بي ضمّة وكلام فنان ,نشاف حلق الدريبات ديك , بسقيهن , نجيلة ريد جداول جارية حنية وبتسقيهـن..
  
|
|
 
|
|
|
|
حبيب نورة
فيس بوك
تويتر
انستقرام
يوتيوب
بنتيريست