|
|
 Re: تعـالوا نسـتبيـــح حـرمــة البـاندويـث شوقــاً ونوقـّع علي شريان الحنين (Re: حبيب نورة)
|
ما اشتاق ليك كيف دام اتوجهت عليك وفت وقلت :
غيابك حقيقة أصل وجودك بعيد هناك في قلب قاسمتو مع بقية حب وحنين ..
لسّاني بقعد لي أنصاص الليالي إنتظار لحبيبة قد تطل من ركن الشاشة , ولما تطل اقعد ارجى واترجى وصالا , وتحرن , ولامن تحرن ...
كلهن حرن يا قبيح كلهن ,
نفس الطلاسم والوجع ويخلق من الشجن شوق سنين ..
ناديتو من خلواهو الدرويش جالسني وقلنا كتير عنها شبيه افتراض خيال , سائلني عن محياها , وريتو مواصفات شاشة ال جي 17 بوصة , ضحك منها شبكة الشبكة .
حكيت ليهو رحلة الشوق , تتمدد كلمات الحب لي صفر واحد , يدخل السلوك , يتسامى ويشيل خليط روحنا والشوق , يصلها الشوق وترتد الروح وترميك بدن لا هو قادر يصلهاولا ملّ تكرارات الترجّي .
مش يمكن تكون حبيب نورا ؟ قالا الدرويش بإعتبارية إنها حبيبة افتراض , وما لقيت ليهو منطق اقدر عليهو بيهو , وفعلا مش حبيبة يمكن تكون انت ؟!! ,أو يمكن تكون هي زي ما بتمنى تكون ؟!!! .
لكن الحقيقة الواضحة زيها قمر دورين , الحقيقة انهاصنعت جواي انسان , مشاعرو تشتاق ويشتاق , سهرو كتر سهدو سهر , زهدو سكر , يزفر حنين ويشهق حين تطل دهشة .
قال الدرويش اهل الله , ناس الله , القوم يصلوا لي لوعة مشابهة , شوق لي حبيبنا المصطفى عليه وعلى آله أفضل الصلاة والسلام , بس فرقهم شوقهم بوصل ويوصل بيهم عندو , وضرب الدرويش مثل بيهو في الحين داك , إنو شوقو يضرب جواتو في جنباتو ويصل صداهو الصوت لي جدر السمع , فيخال لي حلبات الذاكرين ان النقر ناقز من بطن النوبة , وما عرفوا انو الجسد القدامهم خواء من كل روح , جسد روحو وصلت بيهو في تسامي لي أطراف من إشتاق ونشتاق ليهو .
هكذا يتسامى الشوق جواتهم فيقفون ضد نيوتنات فيزياء ثالثة ثانوي , ويثبتوا أن لا أصل للمادة , كما الشوق .
أناديها نص الليالي , تطل وتقول فارق التوقيت عندنا ما بسمح بي اكتر من نص ساعة . ماشية تجيب لبن من المزرعة , حليب طازة زي فطرة حبها , تشرب حليب , ونشرب رحيق ريدها ونلعن سرّا وجهراً فوارق التوقيت وسكني الجزر .
مرة سألت منك وينو الممسوخ , سرحت , وقبل السؤال بيني بين الشاشة كان ما يسمح بغمض جفني من الشعاع , وبعد السؤال وقعت في ضهر الكرسي وإنزلقنا , انا والكرسي , يمكن مترين , ولامن جيت صادي فقدت كل لذّة تجاه حبي الشاشي وعملت ساين اوت برة شوق المشاعر , مشاعر الشوق .
كدة يا قبيح تسكن معانا جوانا حتى في لحظات خلوة حلوة ؟
لحظات حسبتها قد تسقي ناشف أديمي ؟
ما كفّاك رحيل وشوق ؟
تقاسمنا حتى اللحظات دي ؟
صدق المثل اللي قال إنك ود ممسوخ فعلاً .
وقبل ختام الشوق :
في أي خبر من فتحي ساتي (الحاج متولي ) ؟
مشتاق ليهو لسة , وما ليهو علاقة الشوق هنا بي نضميك الحلو عنها الساكنة الضفة التانية .
|
|
 
|
|
|
|
فيس بوك
تويتر
انستقرام
يوتيوب
بنتيريست