لقـاء السحاب ( ثروت عكس الريح) ــ (حبيب نورة)

عزيزتي..ثروت..





الجوع ما بنطق الشهادة لا بقول بسم الله!

كافر زي عبادة ناس عقـيدة شوقـــا .. لي كسرة!

والفول ترقرق موية عيونو في قدرة فوراوي

تقرقـــِر سنون الحِلة

تفرح بي نضمي الكتاتيب و الروادي

لا غـــادي يا المحَـــــــل البِشــَوشــِو لي خشم بنوتة تلعب في حجيلة!!

لو ضبح جزارنا كان لعبت شليل!!!!

لكن شليل الليلة أصبح مقرشة

الجوع يلخبت كل أفكــار القبيلة ويشخبت برضو أفكارنا القديمة

ماعون ساســاق في الحِلَّة .......

ما بغرف الا الزلـّة

والكورَة البترسـخ ملامحــا عند شفع الجيران!!

بترجع مكسوفـــــــــــة .. شان شافوها الناس من غير توب!!

الكـــيزان لازم تلبس طرحــــــــــــــــة!!

والمواعين تتغطــَّي تستر حالا تب!


النيل كان يتدســَّي في حشــا السنابل!

ما يتضــــــــــاري لو عطش القمــح!

هسة الأزرق مادِّي قرعــــــــــــــــــة علي الغمـــــــــــــام

و أبيض موية لابـِد في جـزرو

يتلاقوا آخر الليل في سكـوت

بي ورقـــــــــــــــــــــة زواج عرفـي ما شهدت عليه السحابات لا السيول

لا كان الدِندِر ود حــرام!!

لا أتلقي الرهـــــــــــد مجدوع قدام باب الخريطـــــــــــــة!!

النيل بكــون شرعـــي لما القمح يبطــِّل أنطلاقـــتوا !!

يصنقـــِر يبقي كسرة في بطون ملايين الجـيـــــــــــــاع!!

النيل يستاهــل البطـــاقة الشخصية ... والجنسيـــــــــــــــة!

لكن ممنوع من السفـــــــــر !!

في غربــة الجغــرافيـــات البعيدة علي جناحـــات الروافد والسواحل


النيل بكون شرعـــي في كل الظروف !!


لو يشيل مغس السنين ... ما يبقي هدَّام للجروف