خطوة شجاعة في طريقي (إلي السودان نهائي بنهاية هذا الشهر) (يوجد شوية خوف)

Quote: الأخ محمد يوسف حبينا نمر من خلال بوستك لكي نلقي التحية و نقول سر و عين الله ترعاك فأنت راجع الي بلدك و مهما كان فأنت ذاهب إلي الأهل و الأحباب و مرتع الصبا، عموما نحن السودانيين لم تتوفر في أغلبنا روح المغامرة و كلنا ننتظر أن نكرر نفس تجارب الآخرين لذلك نجد أنفسنا في محطة اللا عودة! فلذا اني لك من الناصحين استخر فاذا عزمت فتوكل بالتأكيد فأن ظروفك و تجربتك حتما حتختلف عن الآخرين و صدقني أنه كل المطلوب منك أن تعرف أن تضع أرجلك و عش اللحظة بما فيها و دع الباقي للخالق من غير مقارنة مع الآخرين .و لك ودي

Quote: اولا رمضان كريم ثانيا اتخذت قرار الرجوع الي السودان وهسع قاعده لي سنه وشهرين والله السودان جميل وتمام وفيهو مناظر ما بتلقاها في اي بلد تاني ضروري ما تفوتك سيول المتسولين وكبار السن خاصة ومن كل اقاليم السودان ما من مناطق الحروب والله من الوسط رجالا ونساء يصيبك الحزن والعبرات تخنقك مشردات يمارسن الامومه في الشارع تسمع كل يوم جريمه قتل --الصائغ واولاده الاستاذه فايزه --سميره --قتيلة الحاج يوسف ام بده مع انو اكثر العربات تواجدا هي عربات الشرطه --تيت --تيت --تيت في قمه الذروه المروريه ونضاير عشان ما يمشو عدا وعربات الشرطه متواجده لكن ما بينتبهو للجرائم لان معظم قعادن قصاد ستات الشاي وطالبات الجامعه --ديك لابسه بنطلون ودي بلوزتها ضيقه يلا كشه هنا وكشه هناك وعندما انتفضت النساء وعملن مبادرة لا لقهر النساء اظنك قريت كتبوا وقالو شنو --- والمجومين الحقيقيين قاعدين ويمارسوا في الجريمه بس بعد ما تحدث يجينا الاعلان طاير نجاح اخر للشرطه تقبض علي المجرمين --مش غريبه لو قمنا قلنا الظاهر المجرمين ديل هم زاتم --احسن ما نتم الكلام عشان الجلد هين هنا تجيب واحد متخصص في تنسيق الحدائق ومفروض يزرعو ليك شجر تلقي نفسك بنيت والحديقه راحت في حق الله اللغه اتغيرت في السودان واصبحت لغه عنيفه وهذا نتاج ثقافة العنف يعني بت حليوه وفارعه يسموها قنبله هل تصدق انو في احدي المقاطع سمعت الخشيم كاتم صوت والليدين كلاشنكوف والجرايد لغتها اصبحت مختلفه وبالمناشيت العريض --اللهم اني صائمه بس ما فهمت انو السودان بقي زي المملكه لكن المملكه فيها الكفيل دي دايره شرح يا خوي احسن تجي عشان الحاجات ما بتلقاها الا هنا welcome back

Quote: يامحمد القرار شخصي بحت يتوقف على ظروف كل زول براهو في الغربة او في السودان اسمع من الناس لكن في النهاية تجارب الاخرين الكويسة والكعبة ليست مقياس.مررت بهذه التجربة اغتربت لمدة 5 سنوات وكنت شغال وعندي سكن ...... الخ ولمن اصحابي قالوا لي ماشي السودان تعمل شنو ؟ قلت ليهم انا قاعد هنا بعمل في شنو ؟ سكتوا ! الشيء الطبيعي اكون في السودان و شلت شنطي وجيت والحمد لله ماندمت.

Quote: محمد الطيب اتوكل على الله وانشاء الله ماتلاقى الا الخير .. أفهم تماما وجهة نظرك واتفق معاك فيها ..

Quote: + أوعك تتأخر. +++ و ما تخلى حياة السودان تسرقك من الكتابة و مافى أى خوف عليك.

Quote: محمد سلام و رمضان كريم ضع نصب عينيك النجاح أجعل كل تفكيرك النجاح و لا شيء غيره ستصل لما تصبو إليه أطرد الخوف من دواخلك ... ستجد أن إصرارك سيسبقك لكل خطوة تخطوها .. و ستجد أن النجاح منجذب تلقائيا إلى عزيمتك موفق بحول الله

Quote: نعم الخطوة وربنا يخضر خطوتك والله اذا سالتني فى نفسي الافضل العودة الى السودان لان السودان هى الام وكل شئ لنا اذا لم يكن السودان فما كنا نحن عودتك ضرورية للتنميةوالعمران ونمؤ الاقتصاد بدل ما ندفع قروشنا ديل للدول التانية الافضل لبلدك واذا خسرت تكسب من اهل بلدك لكن الدول الاخري لايهمهم الا قروشك ويوم ما افلست ترى الويل والعذاب والذل والمهزلة من هولاء اهل البلاد الاخرى فالافضل العودة للوطن (السودان)نبيه ونعمر فيه حتى نكون اعظم الدول واذا بنيت عمارة فى الغرب كانك بنيتو فى السودان وهدفنا العمران والتنمية حتى نكون من اعظم الدول السياحية مع تحياتي لك