|
|
 Re: بعـد عامـين مـن الإسـتـقرار بالسـودان "الشـقـيـق"..تجـربـتـي مـُهـداة للمتردّدين (Re: الطيب بشير)
|
.
أهم حاجة نسيناها يا جماعة..الأكل برّة البيت كيف؟؟
يعني لازم كمان كل شوية تاخدو طلعة، موش؟؟
طيب بعض الأماكن و الأسعار بلمحة سريعة..و مؤكـّـد هناك خيارات تانية كتيرة
نبداها بالأغلى سعرآ و أجمل منظرآ...
** برج الفاتح..طبق المشوي بي مائة ألف جنيه قديم..لووول
** مطعم الساحة اللبناني..اللي هو جزء من بيت الشيخ مصطفى الأمين في بداية شارع إفريقيا و ما بعيد من السفارة الهندية و ترانزأرابيان زمان.."المهم"..الطلب بي خمسين ألف جنيه..الديكور بلدي سوداني و الخدمة رائعة..و فيهو شيشة..
** باقي الفنادق بين السعرين أعلاه و بالقرب منهما...
** أمواج في شارع المطار و سيدي بيه في محطة البلابل شارع عبيد ختم بيتنافسوا مع بعض ..المشويات بين تلاتة و عشرين ألف جنيه و خمسة و تلاتين..و لمن تطلبtake away بتفقد الشوربة و السلطة و القعدة الجميلة و بتكسب تلاتة أربعة ألف جنيه..
** شعيب بتاع السمك الفاتح على خور أبو عنجة ظهر ليهو منافس خطييييير و هو إبن عمه هاشم في مركز شباب الربيع، جوار بوليص النظام العام، و الاتنين ممتازين..سمكهم في حدود عشرة ألف للطلب، فيهو فطور زول أكـّـال أو اتنين مساكين، معاهو بصل و شطة، الغريبة العيش عليك..هاهاها..
** الكسرة بالبامية و القراصة بالرايب و التقلية و الفول المصلح بي عيشتين، شامل ثمن بروميد البوتاسيوم، و بمبر جديد أو كرسي مكسور بحسب الحال، لا زالت تراوح مكانها بين ألفين و نص إلى تلاتة ألف جنيه..البارد بين خمسماية و ألف و نص..
** أقل من كدة عيلا كيس المدمس بي ميتين و كوز موية بي تلتماية..تكون جهجهت الجوعة بنصف ألف جنيه..مين زيـّـك..إبتسم..أنت في السودان..ناس بتاكل في برج الفاتح و ناس بتشتري المدمس ..
.
| |
 
|
|
|
|
|
|
|
|
Re: بعـد عامـين مـن الإسـتـقرار بالسـودان "الشـقـيـق"..تجـربـتـي مـُهـداة للمتردّدين (Re: الطيب بشير)
|
Quote: العوجة بايتة و مقيـّـلة يا نزار..و الغلط الحصل بعدكم بالحيل كبير
ع شان كدة أنا ذكرت إنو خروجهم بدوني قلّ كثيرآ..
لاحظ أن أم بشير كانت تقود سيارتها من منيابولس إلى ملواكي نحو ست ساعات غير الراحة و البنزين ع شان تزور شقيقاتي في مناسبات الحريم التي لم يك وقتي يسمح بتلبيتها كلها..بيكون معاها (المجني عليه) بشير ذاتو مع فارق أن عمره كان أربع سنين..و أنا بكون مطمئن عليها جدآ..
الآن هي لو خرجت السوق الشعبي أو سعد قشرة لتشتري له شنطة مدرسة أنا أكون في قلق!!
دحين دا السودان البنعرفو يا نزار؟؟!!
|
ثق يا الطيب اخوي انني اصبت باحباط سيظل ملازمني الي ان نستعيد خاصية وشخصية
السوداني الذي اعرفه...(الفضول ساكت راح من الناس؟ الناس البشنكتو في الفارغة
والمليانة برضو اختفوا؟؟ شكيتكم شكية لا تتباطأ ولا تقع في الواطة يا ناس الانقاذ
معقول شغلتو الناس في عيشتم لامن عدمو طفاي النار والحجاز؟
اقول ليك حاجة يا الطيب...وانا جادي جدا...لما اجي السودان ...ممكن تمشوا
معاي بي ام بشير لي محل الكفوف دي؟ طبعا اكيد في اسياد محلات ثابتة هناك
وكانوا موجودين عايز اسألهم بس....يا ربي بكونوا سودانيين...
والله ناسا دخلو علينا وما كلموهم...وبعدين ليش ناس التلفزيون ما يمشوا
ويزوروا الاماكن التي انقطع فيها العشم من السودانية التي نعرفها؟؟؟
بدل كراسيهم الحمراء في الاستديوهات!!!
بي طبايعنا...غايتو المتأكد منو تماما...لو حصل ما حصل لبشير وام
بشير هذا التعدي في سوق شندي...لرأيت ود رزق وود الحارث أول المكفتين لهذا
المتعدي...
| |
|
|
|
|
|
|
|
|
|
Re: بعـد عامـين مـن الإسـتـقرار بالسـودان "الشـقـيـق"..تجـربـتـي مـُهـداة للمتردّدين (Re: nazar hussien)
|
.
الحبيب الغالي نزار حسين
الله يخليك
أحييك و أنت تنتشل البوســت من وهدته كلما هوى في الصفحة الأخرى
Quote: ثق يا الطيب اخوي انني اصبت باحباط سيظل ملازمني الي ان نستعيد خاصية وشخصية
السوداني الذي اعرفه... |
بيوجعني إحباطك، بالحــيــــــــــــل، لكن أحســن (لي) من أكون سبب في تقديم معلومات مضللة عن البلد و رسم صورة وردية..التغيير الحصل جد كبير، و "المجنون" دة وقف جنبهم في الأول..قلع العصير من الشافعة..قرطعو..بحلق في بشير مرتين..حتى مـدّ يدو الآثمة من ثم و كأنه يتابع إن كان سيتدخل أحد أم أن هؤلاء الضعفاء all alone .. و حتى بعد أن قامت أم بشير بتكفيته مثنى و ثلاث و رباع..لم يتحرك (الشارع السوداني)!! و هذا تحديدآ ما جعلنا نحرص على تضييق خروجهم من دون حماية..
Quote: بي طبايعنا...غايتو المتأكد منو تماما...لو حصل ما حصل لبشير وام
بشير هذا التعدي في سوق شندي...لرأيت ود رزق وود الحارث أول المكفتين لهذا
المتعدي... |
طبعآ أقاليمنا لا تزال محافظة، و ليس ذلك لخيابة أولاد العاصمة، لا و الله، لكن لأنو وتيرة التغيير في الخرطوم طايرة طيران غريب، و نحن في الأقاليم عندنا ثبات نسبي..يعني العمالة الأجنبية من الحبش زمان و انتهاء بالبنغالة و الصينيين الآن، كلهم في الخرطوم و معسكرات الإنتاج بالخارج، و قيل إن بعضهم جاءنا من السجون..
دي كلها عندها آثار سالبة
تقديري
.
| |
|
|
|
|
|
|
|
|
|
Re: بعـد عامـين مـن الإسـتـقرار بالسـودان "الشـقـيـق"..تجـربـتـي مـُهـداة للمتردّدين (Re: Elawad Eltayeb)
|
.
مرحبتين عزيزي العوض الطيب
شكرآ ليك كتير على المرور و المساهمة
| Quote: هل أديت الخدمة الوطنية |
البارح في النشرة جابوا لينا خبر إنو موضوع الخدمة الإلزامية دة ح يكون فيهو تخفيف كبير..بمعنى إنو الناس ممكن تستخرج الشهادات و تتوظف بمزاااااج و later on ناس الخدمة ينادوهم..لكن خليني أتأكـّـد ليك من الممارســة الفعلية لأنو الوالد مرة قال لبتاع الجباية في سوق طابت:
ياخ الرئيس قال أورنيك خمسطاشر بس هو المفروض تتجمع بيهو القروش
الموظـّـف قال ليهو:
ياخ "دة" بيتكلـّـم ساي!!
لكن قول لي يا العوض..هل أديت الخدمة الوطنية؟؟
لووول
.
| |
|
|
|
|
|
|
|
|
|
Re: بعـد عامـين مـن الإسـتـقرار بالسـودان "الشـقـيـق"..تجـربـتـي مـُهـداة للمتردّدين (Re: الطيب بشير)
|
.
ما أظني تعرّضـت لموضوع الإحتيال...
"تعال ياخينا..معاك الأمن"...لازم تسألو بطاقة و تبحلق فيها كويس..و ما تكتفي الـflashing البيعملو مخصوص لبطاقة صاحبو..أو بطاقة مسروقة أو لقاها واقعة..إلخ..الجرايم بتاعة الإحتيال كترت جدآ..و لازم الناس تفتح عيونها كويس..
معظم الـcases بتحكي عن أن المحتال بيعرف جزء من المعلومات عن الضحية..فإنت قبل ما تسلموا القروش ..أو مفتاح العربية أو حتى اللستك الإسبير لازم تسالو أسئلة كتيرة..و تحرجو عدييييل كدة..ع شان تتأكـّـد..و لو في أي إمكانية لإتصال بالزوول الهو بيتكلم عنو..ما تتردّد إنك تقوم بالإتصال..
زوجة العقيد...........قاعدة في البيت في أماااان الله وقف في بيتها البوكسي بتاع التعاون نزل ليها شوال سكر كالمعتاد و مشى..بعدها بربع ساعة قام عواطلي مراقب الحي إستأجر/شحت بوكسي و جا خبـّـط على الباب، بسـُـلطة و قوّة عين، و قال ليها:
يا مدام الشوال دة مشتركين فيهو ضابطين ع شان الكوتة جات ناقصة و جنابو قال يجيبوهو راجع سريييع ع شان يقسموهو..قالت ليهو خلاص جدآ، و بالمرة أرفع معاك الجنريتير دة و قول لي محمد إنت نيست إنو واقف من البارح..السخانة كتلتنا..
قال ليها:جدددددددآآآآآآآ
.
| |
|
|
|
|
|
|
|
|
|
Re: بعـد عامـين مـن الإسـتـقرار بالسـودان "الشـقـيـق"..تجـربـتـي مـُهـداة للمتردّدين (Re: الطيب بشير)
|
Quote: البارح في النشرة جابوا لينا خبر إنو موضوع الخدمة الإلزامية دة ح يكون فيهو تخفيف كبير..بمعنى إنو الناس ممكن تستخرج الشهادات و تتوظف بمزاااااج و later on ناس الخدمة ينادوهم..لكن خليني أتأكـّـد ليك من الممارســة الفعلية لأنو الوالد مرة قال لبتاع الجباية في سوق طابت:
ياخ الرئيس قال أورنيك خمسطاشر بس هو المفروض تتجمع بيهو القروش
الموظـّـف قال ليهو:
ياخ "دة" بيتكلـّـم ساي!!
لكن قول لي يا العوض..هل أديت الخدمة الوطنية؟؟
لووول |
والله أنا مغترب من 94 ولا خدمة إلزامية ولا دفاع شعبي
لكن المزعلني عملت بطاقة إعفاء من جهاز المغتربين زي عشروميت مرة، وكل مرة يشيلوها في المطار ويقولوا لينا أعملوها تاني لما ترجعوا! بالله ده مش جزء من الخدمة الإلزامية المستمرة، حقو يحسبوهو لينا في الساعات المعتمدة.
بعدين الله بيسألك نحن جينا قلنا للعسكريين ديل تعالوا أدوا خدمة مدنية؟ ما براهم بيجوا يعملوا انقلاباتهم دي لما تغلبهم العسكرية في زول قال ليهم تعالوا أقلبوها؟. ياخ مالم ومالنا.
ده غير عندي رأي في المؤسسة العسكرية في ظل الأنظمة الديكتاتورية لأنها بتكون مستخدمة في أجندة لا تخدم وحدة الوطن.
لكن أبداً ما عندي رأي في الخدمة الوطنية بل نحن فداء للوطن (بس ما للكيزان).
| |
|
|
|
|
|
|
|
|
|
Re: بعـد عامـين مـن الإسـتـقرار بالسـودان "الشـقـيـق"..تجـربـتـي مـُهـداة للمتردّدين (Re: Elawad Eltayeb)
|
Quote: بعدين الله بيسألك نحن جينا قلنا للعسكريين ديل تعالوا أدوا خدمة مدنية؟ ما براهم بيجوا يعملوا انقلاباتهم دي لما تغلبهم العسكرية في زول قال ليهم تعالوا أقلبوها؟. ياخ مالم ومالنا.
|
العوض يا حبيب كيفك
ذكـرتني بالزوول القاعد قدام بيتو بالليل أول أيام الإنقاذ..جاهو عسكري معاهو دورية..قال ليهو:
يا زول أدخـل بيتكم .. إنت موش عارف إنو في حظر تجول?
عمك ببرووود قال ليهم:
و الله يا أولادي إنتو المتجولين..أنا قااااعد قدام خشم بابي..
.
| |
|
|
|
|
|
|
|
|
|
Re: بعـد عامـين مـن الإسـتـقرار بالسـودان "الشـقـيـق"..تجـربـتـي مـُهـداة للمتردّدين (Re: محمد الأمين موسى)
|
.
مرحبا أخي الكريم محمد الأمين موسى
تقدير أكيد لمتابعتك و الإسهام
| Quote: ليتك تعطينا لمحات عن ممارسة العمل الإعلامي في السودان مع بعض المقارنات |
لا أستطيع وصف زياراتي الأكاديمية/التدريبية المتباعدة و التعاون المتقطـّـع مع الإعلام في أمريكا بأنها ممارسة مهنة إعلامية خارج السودان كما تفضلـّـلت في سؤالك..لكنها، بشكل أو بآخر، أعطتني فكرة عن العمل بالخارج أزعم أنني أستطيع من خلالها المقارنة مع فترة عملي في الميديا بالسودان..
** التعيين..يقوم في السودان على الوااااااسطة، بنسبة كبيرة، و الشللية و مؤخـّـرآ نظرية (الولاء قبل الكفاءة)..و تبقى نسبة (من رحـِـم ربـّـي) موجودة لكنها ضئيلة!! و هم الموهوبون القلائل الذين عملوا بغير واسطة..
فيما يقوم التوظيف في معظم الميديا بأمريكا على الموهبة بالأساس..و التدريب من ثم..و قليل جدآ من الـnetworking الذي لا يدخل في الواسطة البجحة مثل التي نراها في السودان..
** ملكية الجهاز الإعلامي نفسو..و طبعآ بالولايات المتحدة لايحق للحكومة، قانونيآ، أن تبث داخل أمريكا!! لذا فإذاعة (صوت أمريكا) موجهة بعشرات اللغات للجمهور المستهدف Target audience و لا تستطيع إلتقاطها داخل أمريكا..و الإعلام الحر يبدأ بهذه الملكية اللعينة..طبعآ ليس هناك أحد حرّآ بنسبة مائة بالمائة، لأن ملاّك هذه الأجهزة يعانون من تدخـّـل الـsponsors في عملهم باعتبارهم هم من يدفع القروش..لكن ممارسة العمل الصحفي في حد ذاته فيها حرية كبيرة جدآ..ليس مثل الهامش الذي نصبو إليه هنا و يصادره وكيل عريف أمن!!
في السودان الإذاعة كانت واحدة و التلفزيون كان واحد، زي ملعقة بيت العزابة، يشار لها بالألف و اللام فيقال (وين الـــملعقة)...و بالمثل يقال الــإذاعة و الــتلفزيون.. .و ظهرت الآن بعض المحاولات الفردية الناجحة مثل هارموني و أخريات..و بعض إذاعات البث محدود المدى أو ما يعرف بإذاعات الإف إم..و كل هذه الإذاعات زائدآ الصحف السودانية، ذات الهامش الأفضل من الحريات، كلها تتقيد بنشرة وكالة سونا للأنباء و تنتظر الإجازة من ذات الوكيل عريف أمن الذي يراجع النسخة الســوفــت من المادة قبل نشرها/ إذاعتها!!
طبعآ كلام زي دة لو قلتو لصحفي أمريكي ممكن يموت من الغبن!!
نحن في إذاعة الأمم المتحدة بالخرطوم، كتجربة محايدة و مميزة داخل السودان، لا رقيب علينا إلا الضمير المهني..لذا تجد إذاعتنا مغضوب عليها من المؤتمر الوطني و الحركة الشعبية والحركات المسلحة ..و كثيرآ ما نسمع ألقاب مثل (جلابة) من البعض..و (عملاء) من البعض الآخر,,و الشباب هنا يضحكون فقط و لا يزيدهم إلا إصرارآ على المهنية و التجرّد..معانا ناس هنا تابعين للمؤتمر الوطني و كثيرين حركة شعبية و بعضنا يناصر الأحزاب الوسط و غيرهم أقرب لثوار دارفور..لكن صدّقني المحرر المسؤول هو الذي يحدّد خط النشرة لليوم المعني..و أهمية الخبر فقط هي التي تجعله خطآ رئيسيآ أو تفرض بقاءه للنشرة التالية أو تجديده بمزيد من المتابعة لو كان خبرآ متحركآ..
الإعلام عندنا مخنووووق بالسياسة و السلطة
و في العالم الحر..الإعلام هو الذي يخنق الساسة بالسلطة التي يخولها له الشعب و الممارسة المعافاة..
تقديري
.
| |
|
|
|
|
|
|
|
|
|
Re: بعـد عامـين مـن الإسـتـقرار بالسـودان "الشـقـيـق"..تجـربـتـي مـُهـداة للمتردّدين (Re: الطيب بشير)
|
| Quote: التعيين..يقوم في السودان على الوااااااسطة، بنسبة كبيرة، و الشللية و مؤخـّـرآ نظرية (الولاء قبل الكفاءة)..و تبقى نسبة (من رحـِـم ربـّـي) موجودة لكنها ضئيلة!! و هم الموهوبون القلائل الذين عملوا بغير واسطة.. |
أخي الفاضل الطيب... هذا بالضبط ما يحول دون اتخاذ قرار العودة للسودان، إلا على أسنة الرماح (كأن تضيق الدنيا أو يتم ترحيل المرء)... اعتقد أن الهدف من العودة والعمل في الوطن هو التمتع بحقوق المواطنة كاملة غير منقوصة والالتزام بواجباتها... وعندما يتقدم الولاء الكفاءة، يصبح الوطن منفى وتصبح أرض الله الواسعة هي المقبرة... وتصبح النوستالجيا هي الطاقة السلبية التي تحرك الإنسان... ومن اعتاد على العمل في شتى بقاع المعمورة وفقا لكفاءته، سيصاب - بعد عودته للسودان - بجرح نرجسي لن يندمل.
والحمد لله على نعمة التفاؤل..
شكرا لك على التنوير.
| |
|
|
|
|
|
|
|
|
|
Re: بعـد عامـين مـن الإسـتـقرار بالسـودان "الشـقـيـق"..تجـربـتـي مـُهـداة للمتردّدين (Re: محمد الأمين موسى)
|
الأستاذ الطيب بشير
لك التحية والتجلة
لقد اتحفتنا بهذا البوست الهام والذى كنا منذ امد ندفع الناس دفعا للحديث عنه وعن الحياة بعد الغربة هنالك لا سيما لمن طال امده فى الغربة وانقطع عن السودان حتى اصبح يحتاج لمترجم يرافقه فى حله وترحاله فى السودان ولم تخيب رجائى فقد وفيت وكفيت واتيت بكل ما على الخاطر والبال
ولكن
بكل صدق وبكل صراحة اراك تتحدث زى ناس الحكومة حينما يخاطبوا المغتربين
فهم وانت تستهدفون شريحة الصفوة من المتعلمين ودليلى قولك اعلاه بأنه يكفيك (ماجستير الله والرسول)
ولافتراضى انك تحدث الصفوة فسافترض انك لم تحتك بغيرهم من انصاف المتعلمين وهم أكثر من الصفوة بكثير الا اذا اعتبرتك مثل الحكومة تسقطهم من الحسابات وتستعوض الله فى عددهم الكبير والوفير بلا فائدة ....
ولكنها حقيقة يجب ان تواجه
وهى ان اكثر من ثلثى المغتربين لا سيما فى دول المهجر العربى ( كما استهدفتهم أنت ) هم من هذه الشريحة التى لم تحمل حتى دبلوم ناهيك عن بكالوريوس .....
ترى هل فعلا اسقطت هذه الشريحة من حساباتك وترى انه لا فائدة للوطن من عودتهم ؟؟؟
وليموتوا بأشواقهم خارج الحدود تحت وطأة البغض من اصحاب تلك البلاد؟؟؟
نعم هم لا يحملون مؤهلات علمية عالية ولكنهم يشاركونكم الشعور بحب الوطن والوجد الى ذكراه وشغف العودة ولو يعيشوا عيشة الكفاف ولكن مشاكلهم اكبر من مقدرة عودتهم وذلك حديث آخر والحديث ذو شجون..
عموما لا ابخسك بوستك فهو هادف وجميل ورائع للشريحة المستهدفة وبكل صدق جعلتنى مقهيا طوال الصفحات الثلاث وانا اقرأ ترف ابناء الوطن وبذخهم واكاد لا اصدق تلك الارقام التى تكتبها من مدارس عالمية ومصروفات لم نحلم بها حتى فى الغربة فكيف بها فى الوطن ولكنى عدت لعقلى وقلت هؤلاء ليس نحن انما اولئك طبقة اخرى أثرت وعاشت كما ينبغى لها ان تعيش واللهم لا حسد وهنئيا لكم بهذه الحياة المترفة فى سودان العز ....
| |
|
|
|
|
|
|
|
|
|
Re: بعـد عامـين مـن الإسـتـقرار بالسـودان "الشـقـيـق"..تجـربـتـي مـُهـداة للمتردّدين (Re: قرشـــو)
|
أخي الفاضل قرشو... أشكرك على المداخلة، ودعني أتداخل في الاتهام (الودي) الذي وجهته للأخ الطيب... اعتقد أن تجربة الأخ الطيب في غاية الأهمية، لأنها تقول بصراحة: إن الحد الأدنى للعيش الكريم في السودان هو أن تكون من صفوة الصفوة، بمعنى أنه لا يكفي أن تكون من أصحاب الشهادات العليا - كالماجستير والدكتوراه - بل لابد من أن يحالفك الحظ بأن تعمل في جهات بعينها كالأمم المتحدة أو شركات الاتصال وغيرها من الجهات التي تعطي رواتب بالملايين التي تعادل آلاف الدولارات... الطبقة التي تتحدث عنها تم طردها نهائيا من السودان ولا أحد يرغب في عودتها وهي تعامل معاملة العدو... تفرض عليها الجزية فقد لكي تتمكن من زيارة أقاربها، وليس من حقها أي خدمات مقابلة... وأحيانا يساورني الشك في وجود فتوى خفية تبيع أكل أموالها من لدن الجميع!
يجب ألا نقارن أنفسنا بدول كمصر والمغرب التي تستثمر في مغتربيها.. تبحث لهم عن فرص الاغتراب وتسعى لحمايتهم في الغربة وتستقبلهم استقبال الفاتحين بشعار طلع البدر علينا لأنهم يأتون بالخيرات... في المغرب: الملك شخصيا ومؤسسة تابعة له تستقبل يوميا الآلاف من المهاجرين العائدين دون أية مضايقات، لا يطلب منهم أي شيء إذ ينظر إليهم كالغيث.
| |
|
|
|
|
|
|
|
|
|
Re: بعـد عامـين مـن الإسـتـقرار بالسـودان "الشـقـيـق"..تجـربـتـي مـُهـداة للمتردّدين (Re: محمد الأمين موسى)
|
.
| Quote: يجب ألا نقارن أنفسنا بدول كمصر والمغرب التي تستثمر في مغتربيها.. تبحث لهم عن فرص الاغتراب وتسعى لحمايتهم في الغربة وتستقبلهم استقبال الفاتحين بشعار طلع البدر علينا لأنهم يأتون بالخيرات... في المغرب: الملك شخصيا ومؤسسة تابعة له تستقبل يوميا الآلاف من المهاجرين العائدين دون أية مضايقات، لا يطلب منهم أي شيء إذ ينظر إليهم كالغيث. |
الله يخليك أخي العزيز محمد الأمين موسى
أين نحن من قهم كهذا؟؟
شكرأ للحديث الضاف
.
| |
|
|
|
|
|
|
|
|
|
Re: بعـد عامـين مـن الإسـتـقرار بالسـودان "الشـقـيـق"..تجـربـتـي مـُهـداة للمتردّدين (Re: قرشـــو)
|
.
مرحبتين الأخ الكريم قرشـــو..قدامى المحاربين ..أعضاء 2002 بالبورد ..
و الله أنا مبسووط بالحيل من مداخلتك، لأنها تعكس إهتمام و متابعة لدرجة (التقهـّـي) في صفحات البوســت باسرها..و الحمد لله الذي وفقني لكتابة شيء يستحق القراءة..
Quote: بكل صدق وبكل صراحة اراك تتحدث زى ناس الحكومة حينما يخاطبوا المغتربين
فهم وانت تستهدفون شريحة الصفوة من المتعلمين ودليلى قولك اعلاه بأنه يكفيك (ماجستيرالله والرسول)
|
** أنا يا قرشــو من بداية البوســت حريص، كل الحرص، إني ما أقـدّم صورة كاذبة للبلد في إطار ترغيبي للعائدين، و الفرق بيني و بين ناس الحكومة في هذه الجزئية هو أنني أُسـهب في سرد العيوب حتى أكاد أكون متناقض..بمعنى (كيف تدعو الناس ليعودوا لبلد أنت تذكر لهم عيوبه و المعاناة المتوقـّـعة)..
** أنا لا أقـدّم حلولآ..و لا عروض عمل..بل هي تجـربـتـي مـُهـداة للمتردّدين و الناويين يرجعوا البلد..و هي تجربة شخصية تنطبق على ظروف شريحة محدّدة كانت خياراتها و ظروفها متشابهة مع خياراتي و ظروفي لكنهم مترددين من أن يفقدوا امتيازات الغربة إن عادوا للبلد....
| Quote: ولافتراضى انك تحدث الصفوة فسافترض انك لم تحتك بغيرهم من انصاف المتعلمين وهم أكثر من الصفوة بكثير الا اذا اعتبرتك مثل الحكومة تسقطهم من الحسابات وتستعوض الله فى عددهم الكبير والوفير بلا فائدة .... |
الإفتراض الأول صحيح أنا أتحدّث عن فرص المتعلمين بالبلد الآن ليعملوا في القطاعات التي أشرت لها و تحتاج لمؤهلات محدّدة، الإفتراض الثاني غير صحيح، فأنا أحتك بمن إختاروا العمل و فضلوه على التعليم، أو أجبرتهم ظروف على ذلك الخيار، لدي وسطهم صداقات و علاقات، أستفيد من آرائهم النيرة و بعضهم يراجع لي لغة أبحاثي، بلغة إنكليزية طوّرها بي ضراعو، لكن لا يمكن أن أتعوض الله فيهم، و لا يمكن أن أعدهم بفرص عمل غير موجودة!! أنا قلت إنو الإستثمار نصايبو كتيرة، و هو المجال الكان مفروض يستوعب الشرائح المهنية..لكن المنافسة فيهو مااااا شريفة..أنا وضـّـحت إنو ناس الحكومة هم المحظوظين في الفرص الزي دي..و ناس الله بدأ إنصافهم بالشركات الأجنبية و المنظمات و دال على وجه التحديد و بعض شركات الإتصال التي أعادت الروح للكفاءات السودانية و فرصها..
| Quote: ترى هل فعلا اسقطت هذه الشريحة من حساباتك وترى انه لا فائدة للوطن من عودتهم ؟؟؟ |
** أنت هنا تظلمني في حصر البوسـت في فرص التوظيف و العمل!! ناسيآ أنني كتبت عن محاور كثيرة أخرى يتساوى فيها كل الناس، و هي التعليم، الصحة، السكن، الترفيه و الأكل برة البيت، البنوك..المواصلات..تعامل الناس مع المغترب..السواقة في الخرطوم..ناس الحركة..محلات الشيشة..أسعار الأراضي..
يعني إنت ركـّـزت جدآ في مداخلتك الهامة دي على استعراضي لفرص العمل لشريحة المتعلمين و نسجت عليها تمييزي ضد غيرهم في كل البوســت..ألا ترى أنك غمطتني حقي في التوضيح لهم في مناحي الحياة الأخرى؟؟..بمعنى آخر لو أن غير المتعلمين وجدوا فرص عمل بالسودان يمكنهم أن يعتمدوا، كثيرآ، على البوســت شأنهم في ذلك شأن المتعلمين..
والله كيف؟؟
| Quote: نعم هم لا يحملون مؤهلات علمية عالية ولكنهم يشاركونكم الشعور بحب الوطن والوجد الى ذكراه وشغف العودة ولو يعيشوا عيشة الكفاف ولكن مشاكلهم اكبر من مقدرة عودتهم وذلك حديث آخر والحديث ذو شجون.. |
قـرشــو يا أخي..
معظم المغتربين عاوزين يرجعوا البلد..أفإن وجدنا طريقة لعودة بعضهم نهملها و نسكت عنها لحين إكتمال الحل الأمثل؟..برأيي أن البداية يمكن أن تكون بمن أسميتهم أنت صفوة..و نسأل الله أن يكون مقدمهم فاتحة خير للباقين من المغتربين..أما الحديث عن شجونهم و ما إليه فهي أحاسيس لا يرقى إليها شــك و لا تحتاج لدليل..
** في الوضع الطبيعي، زي ما قال الأخ محمد الأمين في مداخلتو الفوق، الشريحة الإنت ذكرتها هم بالأساس مسؤولية الدولة..هي التي تخلق لهم سوق عمل و تساهم في تسهيل عودتهم و استقرارهم....و أنا لا أملك لهم سوى الوداد و هو لن يجلب حليبآ لعيالهم..
.
| |
|
|
|
|
|
|
|
|
|
Re: بعـد عامـين مـن الإسـتـقرار بالسـودان "الشـقـيـق"..تجـربـتـي مـُهـداة للمتردّدين (Re: محمد الأمين موسى)
|
.
| Quote: هذا بالضبط ما يحول دون اتخاذ قرار العودة للسودان، إلا على أسنة الرماح (كأن تضيق الدنيا أو يتم ترحيل المرء)... |
مرحبا بالعزيز محمد الأمين موسى
ملأتني العبرة..و سـدّت الغصـّـة سقف الحلق و أنا أقرأ النطق بالحكم في ردّك هذا..
و المصيبة أن كلامك صح..العودة للسودان تجعلك تضغط على "مكاسب" كثيرة..هي بالخارج من أبسط حقوق الإنسان..و في السودان مكسب كبير..وحيح نبض الحنين الذي يشكو منه المهاجر لا يمكن له أن يهدأ إلا في السودان..و السودان لن يوفـّـر الرغيف و اللبن..و اللبن تحت البقر ..و البقر عاوز حشيش..و ننتهي دائمآ بالشكوى لله..أوليست أقصوصة حياتنا أشبه بأحاجي الحبوبات؟؟
أشكرك بالحـيــل
.
| |
|
|
|
|
|
|
|
|
|
Re: بعـد عامـين مـن الإسـتـقرار بالسـودان "الشـقـيـق"..تجـربـتـي مـُهـداة للمتردّدين (Re: الطيب بشير)
|
.
واحدة من حاجات السودان الســمممممحـة..
كان منتدى الحروف، النسخة الأصلية، محتفي أولتمبارح بعودة الفنان عادل التجاني، العضو المؤسس و راعي نسخة الدوحة للمنتدى، و كانت الجلسة الحلوة بضيافة الرائع بشرى سليمان بداره العامرة بالصافية بحري..و أذكر من مشاهير الحضور:
الفنان عادل التجاني
الفنان مصطفى السني
د/ الماحي سليمان
د/ أنس العاقب
لواء أبو قرون عبد الله أبوقرون
أستاذ تجاني حاج موسى
أستاذ سعد الدين إبراهبم
أستاذ بشرى سليمان
الموسيقي يوسف حسن الصديق
الفنان ناذر الخليفة
و الطيب بشير
و آخرون من دونهم لا تعلمونهم..الله يعلمهم..نزجي لهم التحايا من الحنايا و نشكر الحبيب الشاعر الرائع بشرى سليمان على الضيافة الحلوة و إعادة الروح لمنتدى الحروف..
.
| |
|
|
|
|
|
|
|
|
|
Re: بعـد عامـين مـن الإسـتـقرار بالسـودان "الشـقـيـق"..تجـربـتـي مـُهـداة للمتردّدين (Re: الطيب بشير)
|
تعرف يا الطيب اخوي...جياتي السودان كلها..ما قعدت لي مع لمة ناس
الا في كوتشينة...واكون انا الجايب الكوتشينة...شفت يا سيدي الحظ
دا كيف....حكمة الله اصحابي البعرف اماكنهم...امشي ألقي المحلات...
تحولت الي بنشر سيارات ويقولوا لي وين يا عمك الراجل دا فرتق
من زماااان وكان قريب يكون في امريكا...
يوم من ايام الاجازة الطوعية قررت ما ارجع بخفي حنين...وقصدت صديقي
عماد الطيب...(مش عماد أحمد الطيب ود عمك مع انو برضو صديقي) لكن
زي عماد الاخير دا ما قاعد اعشم في ملاقاتو في السودان...فقمت قصدت
عماد صاحبي الاول داك وهو دفعتي ورجل فنان وأنا متأكد من وجوده في
السودان لارتباطه بسكرتاريا نادي الهلال...(مشيت نادي الهلال ما لقيتو
ومشيت مكتبو قالو لي والله الراجل طلع هسي لما يرجع نقول ليه منو؟
قلت ليهم قولو ليه جاك حنين هنا ورجع بخفيه.
| |
|
|
|
|
|
|
|
|
|
Re: بعـد عامـين مـن الإسـتـقرار بالسـودان "الشـقـيـق"..تجـربـتـي مـُهـداة للمتردّدين (Re: smart_ana2001)
|
| Quote: nazar hussien ابسط يا عم....ح يجيبوا ليك عماد احمد الطيب شخصيا... |
بالله شفتي اخوك حا يوصلوه ياتو درجة يا سمارت...دي درجة وزير عديل كدي..
وانا عارف ابو بشير ما حا يقصر...ومع ذلك يا الطيب...كلامك دا ذكرني بي
حكاية صلاح النبيه...وهو رجل بسيط جدا...كشخصية الزين وهو مؤذن الحي..
في نهايات رمضان المسافرين بيرجعوا الي قراهم...للعيد...اها صلاح دا.
في الايام العادية...بأذن ويصلي بي الناس واغلبهم صغار ومسنين...
في مرة وانا كنت حاضر وفي نهايات رمضان رجعوا المغتربين داخليا...
ناس نضاف وكلونيات وجلاليب تلمع وشالات...وجابو فطورات رمضان الما
كان بجيبوها لينا...تقليات وشي شيات...وقمردينات...(ديل كلهن نحن
وناس صلاح دا ما بنشوفن الا بعد رجوع المغتربين ديل...اها بعد ما
فطرنا رمضان...الجماعة اقاموا الصلاة...وقالوا لي صلاح...صلي..
وصلاح كان جائي من البحر...هدومو ملانة لوبيا...وكم عراقيه فيه
طين بحر...عاين علي قفاه وقرقرقرقر بدأ يضحك بعد الاقامة...
قال ليهم انتو آ ناس الله ما ليكن انا اصلي بي فلان...وتاني
يعاين قرقرقرقر...انا...اصلي بي علان...؟؟؟
دحين انا المسيكين دا تجيب لي عماد احمد الطيب في بيتي...
الا يكتب في جلابيتو (انا عماد احمد الطيب وما جابني الدرب)
| |
|
|
|
|
|
|
|
|
|
Re: بعـد عامـين مـن الإسـتـقرار بالسـودان "الشـقـيـق"..تجـربـتـي مـُهـداة للمتردّدين (Re: عبد الحميد عوض)
|
الطيب البشير كلامك ما قريتو كلو لكن داير اقولك والله العظيم الرجعه بندورا بلحيل لكن فى حاجات
وقبل ما اقول الحاجات البلد بتودر منك حاجات كتير قولى شنى اول حاجه الفتر وجع الضهر وانا شخصيا
شعر راسى بقوم. نجى السبب الحمانى العيد هناك احضرو اول حاجه التعليم تعليم الاولاد داير قروش وناس الحركه
اناشخصيا بكرهونى فى السودان قولى ليه اول حاجه بطالبوك بى النظام ودا لاخلاف عليه لكن الشارع والواقع كلو مانى نظامى .
انا عارف فى ناس مشو والله فى شهور بس بقا الواحد يغنى فوق بولو من الشبع والمساله تحسين وضع لكن والله انا برضو خايف
بس بعاين بعيونى . يازول الكلام كتير فى الموضوع دا لكن انشاء الله نتحزم ونتلزم ونقول
مادام الرزق من الله موبى ضراعنا
نرضى ونبسطو ونرجع نشوف اوضاعنا
| |
|
|
|
|
|
|
|
|
|
Re: بعـد عامـين مـن الإسـتـقرار بالسـودان "الشـقـيـق"..تجـربـتـي مـُهـداة للمتردّدين (Re: خالد المحرب)
|
.
الأخ الكريم خالد المحرب
مرحبتين حبابك في البوســت
و يا ريت تلقى فرصة من وقت لآخر تمر على البوســت لأن فيه كلامآ عن ناس المرور ..و تعليم الأولاد و كل ذلك..أبقى زورنا كلما تلقى وكــت..طيب؟؟
Quote: البلد بتودر منك حاجات كتير قولى شنى اول حاجه الفتر وجع الضهر وانا شخصيا
شعر راسى بقوم. |
هو يا داب وجع ضهر..و الله قعدتك في البلد تودّر منك وجع القلب ذااااتو خلي الضهر الهين دة
ياخ قلوة قهوة خالتي خادم الله بت سليمان براااها تعادل كل ما شممناه في قهاوي الغربة المسيخة و المليانة بهارات كأنهم يدارون طعم الغربة الماسخ بزيادتها..
أي و الله..الرجعة للبيت القديم لا تعادلها إنجازات الغربة بكاملها..
Quote: والمساله تحسين وضع لكن والله انا برضو خايف
بس بعاين بعيونى . |
لا تخاف
هم ناس التجارة موش بيقولوا هامش مغامرة؟؟
أهو العودة للبلد فيها حاجة زي دي
بس لازم تعمل خط رجعة
و حبابك تاني
.
| |
|
|
|
|
|
|
|
|
|
Re: بعـد عامـين مـن الإسـتـقرار بالسـودان "الشـقـيـق"..تجـربـتـي مـُهـداة للمتردّدين (Re: smart_ana2001)
|
.
مرحبتين العزيزة سمارت_أنا 2001
مشرّفانا جدآ بمشاركاتك..
| Quote: عارف انا ناس طابت ديل صحبتى من المتوسط رانيا صديق ما لميت فيها لما مشيت السودان....خلى عماد احمد الطيب . |
رانيا هي الأخرى بنت عمي
و قد توفيت جدتها لأبيها، عمـّـة والدي، بالأمس القريب..و كنا في بيتهم بالحلفايا أمس و اليوم..يعني لازمك تلفون طالما غدا البكا مافي ليهو طريقة..
أما عماد أحمد الطيب فموضوعو سهل جدآ ان شاء الله ..بس نزار يوصل البلد..
و إنتي لما تجي بالسلامة برضك أدينا خبر و قولي عاوزة منو من الفنانين..و نجيب ليك رانيا و زوجها الدكتور إبن الشهيد البطل الكدرو..
تقديري
.
| |
|
|
|
|
|
|
|
|
|
Re: بعـد عامـين مـن الإسـتـقرار بالسـودان "الشـقـيـق"..تجـربـتـي مـُهـداة للمتردّدين (Re: محمد الأمين موسى)
|
.
| Quote: إنتو البديتوها بجلد الفنانين وقبلتو على الصحافيين، ما باقي ليكم إلا لعيبة المريح تدوهم محطة محطتين!!! |
و الله يا محمد الأمين موسى ما عارف أقول ليك شنو
صاح البلد حيكومتها (مترهلة)..لا تعلم يمينها كم روحآ أزهقت شمالها..
لذا نحن ننتمي للناس لا حاكمهم..
للوطن لا جلاّديه
للنيل و ليس اليخت الرئاسي أو حتى الفيلل الرئاسية
للمطر و ليس من ينتظر خراج سحائبه
للفقراء و ليس لمن تعمـّـد إفقارهم
للملح و ليس لآكلي (الملح) السـُـحت
للجرح، أخي الكريم، و ليس للسـكـّــين..
لذا..و..لغير ذا..دعه يأتي ..دعه يمر..أعني موصلي..
لكن بتاعين المريخ موافقين على جلدهم :)
.
| |
|
|
|
|
|
|
|
|
|
Re: بعـد عامـين مـن الإسـتـقرار بالسـودان "الشـقـيـق"..تجـربـتـي مـُهـداة للمتردّدين (Re: الطيب بشير)
|
.
مرحبتين شباب
بعد المتوالية المخيفة التي إرتفعت بها نسبة جرائم القتل العمد بالخرطوم..فكـّـرت في تنبيه القادمين بغرض الإسـتـقرار بالسـودان الشـقـيـق و قلت أوضـّـح ليهم الصورة..
العدد ماشي زايد..و كل يوم نمط جريمة مختلف عن الآخر..و كلما نحاول ننسبها للوجود الأجنبي، هروبآ من الواقع بطريقةState of denial نكتشف أن المجرم سوداني (أصيل) و أن الجريمة من واقعنا بل من أكتر يا بلادي..و أن محاولات نفينا لها يشابه مقولتنا (الله ينعلك يا إبليس) عقب كل مصيبة (نختار) الوقوع فيها و نسـبّ الشيطان بعد تبيان عواقبها..
الأجانب ليسوا هم السبب حتى الآن
و ليس لدى الجهات المسؤولة إحصائيات و لا دراسات تفيد
ألا هل جوبـكـت؟؟؟
.
| |
|
|
|
|
|
|
| |
الطيب بشير
nazar hussien
Elawad Eltayeb
محمد الأمين موسى
قرشـــو
smart_ana2001
Elmosley
nadus2000
Haydar Badawi Sadig
فيس بوك
تويتر
انستقرام
يوتيوب
بنتيريست