|
Re: الشخصية المنبرية ..جوة زول .. وبرة زول !! يوجد ( إعتراف) !! (Re: نادية عثمان)
|
الجبيبة نادية .. ..
فى كل يوم بتاكد انو حقيقة ممكن تعيش برة زول وجوة زول من خلال معايشتى لى ناس كتار .. .. ..
تفتكرى انو الواحد فينا بكذب ليه بعيش بى قناع للناس البرا .. ..
عارفة يا نادية .. ..
مرات بقعد بفكر وبسرح فى تكوين النفس البشرية غريب
فى النوع الصادق حتى مع الجماد الحولينه وفى النوع البغش حته نفسه وفى النوع التايه وبفتكر انو وصل وفى النوع البحاول يخلق حاجات
من خيالو وفى النوع الانانى المابعرف يعيش لى غير نفسه وفى وفى .. ..
تفتكرى انو مقياس النجاح بالنسبة للانسان الجوة زول وبرة زول ممكن يكون شنو .. ..
نادية بوستيك مريح زيك .. .. ..
كونى كما تتمنى وعيشى كما نريد ( رائعة دومأ)
| |
|
|
|
|
|
|
Re: الشخصية المنبرية ..جوة زول .. وبرة زول !! يوجد ( إعتراف) !! (Re: نادية عثمان)
|
حبيب بلدو العزيز
سلامات يازول يانيل
Quote: نادية سلام وتحية من جديد وكل البورداب والبوردابيات في رياض الخير بخير وياريت لو أمتدت أيام تواجدك في الرياض كا قمنا بواجب الضيافة على المستوى الذي يليق بالمتألقة الإنسانة الرقيقة نادية عثمان. نعود لموضوع البوست. أنا مع رأي الأستاذ عمر الصديق. في بدايات سودانيز اونلاين أو قبل انطلاق سودانييز أونلاين كنا نلتقي في (شات)(Sudannet.net) وكنا نصادف بعض المنفلتين من خلف الكي بورد طبعا يكتبون أحيانا كلام غير لائق. وأستمر الوضع حتى في منبر سودانيز اونلاين. من تحليلي لهذا السلوك ولمعرفتي الشخصية ببعض المنفلتين منبريا لاحظت أن شخصياتهم تختلف تماما في الواقع عن شخصية البورد. ربما كانت ملاحظاتي وتحليلي ورصدي لمثل هذه السلوكيات أكبر دافع لي للسعي لجمع البورداب وإعطائهم فرصة للتعارف خارج إطار المنبر وفعلا بعد تكوين جسم بورداب سودانيز اونلاين بالرياض كأول بورداب يستنون هذه السنة الحسنة أختلف الوضع تماما في سلوكهم وكتاباتهم في المنبر والذي كان يعادي الجميع ويكتب ما يشاء بدون حسيب أو رقيب أصبح يعمل ألف حساب قبل أن يكتب اي عبارة لأنه أصبح معروفا لدى فئة من البورداب وربما يجد اللوم والعتاب لو تهجم على زملائه دون مبرر أو ربما فقد إحترامه أمامهم. حتى لو حدث أختلاف في وجهات النظر أدى لقطيعة أو خصومة يجد من يسعى للإصلاح بينهم. ملخص هذا الكلام بعض الناس لديهم ضعف في الشخصية ولا يستطيع الإفصاح بما في دواخله أمام الناس ولكن حينما يختلي أمام شاشة الكمبيوتر يظهر سلوكياته الشاذة لأنه يشعر بالإمان وأن أحدا لم يصل أليه. |
يلا دي مداخلة مهمة شديد بتعضد فكرة البوست كلو وبتفق معاك فيها جداً
وفعلاً مسألة المعرفة وتقليل التخفي ومعرفة البورداب لبعضهم البعض بالتأكيد بتكسر حاجز الغربة والعداء والحدة والمبالغة في ردة الفعل نتيجة مجرد الإختلاف في الراي أو التوجه !
وبتخلي الناس تتفق وتختلف في محبة وأحترام وده المطلوب !
تسلم ياحبيبو وخليك قريب سمح ؟
| |
|
|
|
|
|
|
Re: الشخصية المنبرية ..جوة زول .. وبرة زول !! يوجد ( إعتراف) !! (Re: نادية عثمان)
|
الاخت نادية مساء النور .. ..
بوست جميل وموفق .. ..
حكاية بره زول وجوة زول الواحد بكون عارف شخصيتو الداسيها دى فيها من العيوب مايكفى .. ومن التناقض ما يحير بلاحظ الحاجة دى بكتره
لمن يكون فى بوست فيهو شكل ومهاترات بلقه ناس مشهورين بى ضيق الاخلاق وضيق الصدر بعملوا فيهاهم حمامات السلام ..
على ما اظن الواحد فيهم بمارس الشخصية الكان بتمنه يخت نفسو فيها وماقدر والله واعلم .. ..
ودى الاكيد.. ..
| |
|
|
|
|
|
|
Re: الشخصية المنبرية ..جوة زول .. وبرة زول !! يوجد ( إعتراف) !! (Re: سارة كرودى)
|
أستاذة / نادية
تحية وتقدير -------------------------------------------
بالتأكيد أى زول في شغلوا / في بيتو / قدم مجتمعوا ما حيكون نفس الشخص لانوا لازم يكون مستوعب لكل نوع من التعامل وشكلوا وحدودوا وعلى كده بعمل المحددات الخاصة بي لكل وضع وحالة
المنبر تصنيفوا وضع عام / أقرب للإجتماعي وبالتالى حتاخد كل سمات تعاملك الاجتماعي وتحاول تطبقوا من خلال تعاملك بالمنبر يعني حتجي بالشخصية الما ليها أى أرتباطات بحالتك المزاجية مافي زول لى داعي أن كنت مبسوط ولا زعلان ساخط ولا رأضي في كل الاوقات لازم تتعامل هنا بأحسن ما عندك و تحاول تدي الانطباع الايجابي عنك كأنسان وطبعا من غير ما تخت في بالك أنك عوز ترضي الجميع لكين في كل الاحوال حتتعامل التعامل الحيخلي الاحترام بينك وبين الجميع متوفر حتى في خلافاتك معاهم
----------------------------- عني شخصية التعليق الوحيد الاتلقيتوا في الحته دي أني ما بكل التهذيب الموجود بيهو في المنبر وكان المقام عملي بحت وما كان بيني وبينوا أى معرفة شخصية غير إننا بنكتب في منبر وأحد وكل وأحد مننا قبل يلاقي التاني كان خاتي في بالوا شخصية التاني من خلال المنبر فاكيد الصورة حتختلف
تقديري
| |
|
|
|
|
|
|
Re: الشخصية المنبرية ..جوة زول .. وبرة زول !! يوجد ( إعتراف) !! (Re: عبد الناصر الخطيب)
|
المحترم عبد الناصر الخطيب
تحية وتقدير
Quote: المنبر تصنيفوا وضع عام / أقرب للإجتماعي وبالتالى حتاخد كل سمات تعاملك الاجتماعي وتحاول تطبقوا من خلال تعاملك بالمنبر يعني حتجي بالشخصية الما ليها أى أرتباطات بحالتك المزاجية مافي زول لى داعي أن كنت مبسوط ولا زعلان ساخط ولا رأضي في كل الاوقات لازم تتعامل هنا بأحسن ما عندك و تحاول تدي الانطباع الايجابي عنك كأنسان
وطبعا من غير ما تخت في بالك أنك عوز ترضي الجميع لكين في كل الاحوال حتتعامل التعامل الحيخلي الاحترام بينك وبين الجميع متوفر حتى في خلافاتك معاهم |
صدقت ذكرتني بروحي وأنا في حالة تصوير لقناة هارموني بالحتة بتاعة مافي
زول ليهو داعي بحالتك المزاجية مبسوط ولا زعلان دي !
اليوم داك أنا عيانة وتعبانة ومحبطة شديد وكان عندي تصوير ولازم أبتسم
في وش المشاهد الداخلة بيتو لانو ماليهو ذنب في مرضي وحالتي المعكرة دي !!
لكن برضو يا أستاذ عبد الناصر هنا الوضع بختلف لأنو في ناس بيكونوا زهجانين من ئ
خارج المنبر ده وتلاقيهو جاي داخل شمال وفي أول بوست يفش غبينتو وزهجو ويتشاكل
مع زميل ولا زميلة في أقل كلمة وبيظهر نرفزة الزول وإنو جاي مسخن لأنو بتكون
الحاجة بسيطة ومابتستاهل ليها شكلة !
وده البجيب حرقة الدم ..غايتو ربي يهدئ نفوسنا جميعا يارب !
| |
|
|
|
|
|
|
Re: الشخصية المنبرية ..جوة زول .. وبرة زول !! يوجد ( إعتراف) !! (Re: نادية عثمان)
|
سلامات يا نادية
من الحاجات البتحصل هنا انو الناس الهنا بسيطرو على تلوين صورة الاخر وشيطنته
قبل فترة اتصل بي صاحبا لي لي سنين طويلة منو.. بعد قالي هو منو قاعد يضحك بصورة هيسترية قال زول قاليه بيان دي نجاة محمود ما صدق كلو كلو اسع ضرب يتأكد قال ما خلا زول بعرفنا ما سالو من تلفوني عشان بس يعرف الحقيقة انه بيان تساوي نجاة
المهم بعد كثير من القرقرات في موضوع كوزة وجبهجية وامن كمان
قلت ليه تابع الموضوع بيبدأ كيف وينتهي كيف مع اي مناضل كيبورد بالفعل بقى يتصل دائما في كل دوقشمان ولا قلة ادب وقالي المحل دا امرقي منو
بعداك بقينا في نقاشات دائمة حول الشخصيات الشريرة هنا
وقديتو ليك بقصة العقلية الذكورية دي حتى قال الروب قال تاني اجيب سيرة عقلية ذكورية بقطع الخط.. قال ديل ما شخصيات ذكورية ولا حاجتين ووصفهم بوصف لا يمكن كتابته هنا...
يلا بقى يتابع اي حوار لما خلاص يزروا الجماعة وحججهم تنتهي بيتصل يقولي خلاص بعد شوية يجيك عكاز الغريبة الى الان ماحصل قالي في موضوع اطلعي منو والا تحول الى معركة حامية الوطيس فيها تلميحات وسخة ومن اليوم داك بقى وداعيتي .. يا بيان البوست دا خارجي روحك كلامك كلو قلتيه حيكون لف ودوران لا طائل منه رسالتك وصلت.. من الحاجات النصحني بيها مااخش مع اي بت سمحة في مخاشنة لانه ناس البورد ديل بكاين قرقرقرقرر المهم خلاصة الكلام انه هنا الناس هم برسمو شصيتك ما انت..
وشكرا لنزار وشكرا لنادية لظنهم الحسن في شخصنا وان شاء الله يانزار يارا تجي تدرس هنا اوعى تقول عييييك
بناتي قربن يتخرجن وقبل كم شهر كدا عمرهم كان 4 سنة السنين تجري هوا
ويا نادية تعالي لينا هنا اعملي برامج البلد دي التقولي الشمالية مليانة نخل..
فيها شتلات يانعات
محبتي للجميع
| |
|
|
|
|
|
|
Re: الشخصية المنبرية ..جوة زول .. وبرة زول !! يوجد ( إعتراف) !! (Re: د.نجاة محمود)
|
الأستاذة نادية تحيات طيبات
أتابع هذا البوست المتميز فى موضوعه وفى نهجك فى طرحه وإدارة الحوار فيه. ويبدو أن طبيعة مهنتك وحاستك الصحفية كان لها دوراً فى ملاحظاتك عن تباين الإنطباع عن بعض الشخصيات من خلال كتاباتها وتفاعلاتها فى المنبر، وبين واقعها. وأعتقد أنه بحث هام تقومين فيه بإستطلاع وإستقراء الآراء لسبر أغوار ما سميتيه بالشخصية المنبرية، والذى سيقود لمعرفة أكثر بالشخصية أو الشخصيات السودانية التى فى رأيى تركيبة معقدة رغم ظاهرها البسيط ..
كما أرى أن الموضوع بطريقة غير مباشرة سيدفع الأعضاء سواء قارئيين أو مشاركين بالبوست مراجعة وتقييم أنفسهم وكيفية تعاملهم وسلوكياتهم بالمنبر .. والتعريف أو التذكير بضرورة الإلتزام بأعراف حميدة للتعامل والإحترام .. وإن لم تسطر قوانيناً ملزمة بالمنبر .. وأن نهاية الدنيا ليست فى إنتصار فى نقاش سواء بحق أو باطل .. وإن كان على حساب الإساءة أو التجريح .. أو الإحراج .. أو قتل الشخصية ..
تقدمين يأسلوب ذكى نفسك نموذجاً .. وتقدمين إعترافاتاً .. وإن كنت أعتبرك من الذين طبعاً لا تطبعاً يلتزمون بآداب التعامل والنقاش وأحترام الغير والرأى والرأى اٍلآخر.
الموضوع كبير و شيق .. وكما أسلفت فهو بحث قيم لك حق السبق فيه!
سأعود إن أتيج لى الوقت للإدلاء بدلوى عن الشخصية المنبرسودانية!
| |
|
|
|
|
|
|
Re: الشخصية المنبرية ..جوة زول .. وبرة زول !! يوجد ( إعتراف) !! (Re: نادر الفضلى)
|
أستاذة / نادية
-------------------------------------------------
Quote: لكن برضو يا أستاذ عبد الناصر هنا الوضع بختلف لأنو في ناس بيكونوا زهجانين من ئ
خارج المنبر ده وتلاقيهو جاي داخل شمال وفي أول بوست يفش غبينتو وزهجو ويتشاكل
مع زميل ولا زميلة في أقل كلمة وبيظهر نرفزة الزول وإنو جاي مسخن لأنو بتكون
الحاجة بسيطة ومابتستاهل ليها شكلة !
وده البجيب حرقة الدم ..غايتو ربي يهدئ نفوسنا جميعا يارب !
|
ملاحظة جديرة بالاهتمام لكن ( عدم معرفة ) البعض بالتعامل مع المقام العام يظهر في كثير من الاحيان لكن في النهاية لا يصح إلا الصحيح
علي أى حال الغالبية العظمي هنا من أصحاب الادراك والنضج الذي يجعلهم قادرين على تفهم حدودهم بكل شي فش الغبينة ليس هنا مكانه إطلاقا
ولك التحية
**
| |
|
|
|
|
|
|
Re: الشخصية المنبرية ..جوة زول .. وبرة زول !! يوجد ( إعتراف) !! (Re: نادر الفضلى)
|
الأستاذ الكريم نادر الفضلي
تحيات باسقات تليق بجلال تهذيبك وقدرك العالي
Quote: كما أرى أن الموضوع بطريقة غير مباشرة سيدفع الأعضاء سواء قارئيين أو مشاركين بالبوست مراجعة وتقييم أنفسهم وكيفية تعاملهم وسلوكياتهم بالمنبر .. |
أنا عن نفسي بعتبره نقد ذاتي وتصليح وتقويم لنفسي وإعتراف بما كان للمنبر فضل إضافته لشخصيتي وأيضاً ماكان خصماً على روحي من خلال تواجدي فيه وبين أعضائه الكرام وعضواته الكريمات ..
Quote: والتعريف أو التذكير بضرورة الإلتزام بأعراف حميدة للتعامل والإحترام .. وإن لم تسطر قوانيناً ملزمة بالمنبر .. وأن نهاية الدنيا ليست فى إنتصار فى نقاش سواء بحق أو باطل .. وإن كان على حساب الإساءة أو التجريح .. أو الإحراج .. أو قتل الشخصية .. |
لله درك ! كلام زي الورد متفقة معاك فيهو تماماً ولو التزمنا بيهو كلنا كأعضاء في المنبر والله لأصبح هذا المنبر جنة الله في الأسافير ولكن !!
Quote: تقدمين يأسلوب ذكى نفسك نموذجاً .. وتقدمين إعترافاتاً .. وإن كنت أعتبرك من الذين طبعاً لا تطبعاً يلتزمون بآداب التعامل والنقاش وأحترام الغير والرأى والرأى اٍلآخر. |
شكراً جميلاً على الثناء العاطر في شخصي الضعيف ! ونعم اقدم نفسي نموذجاً لأن إستشعرت التحولات في شخصيتي المنبرية أولاً فأحببت أن أعرف كيف هم الزملاء والزميلات ولنطرح الامر للنقاش عسى أن تفيد المكاشفة الطيبة عن شئ نجهله في شخصياتنا !
Quote: الموضوع كبير و شيق .. وكما أسلفت فهو بحث قيم لك حق السبق فيه!
سأعود إن أتيج لى الوقت للإدلاء بدلوى عن الشخصية المنبرسودانية! |
الشخصية المنبرسودانية ؟!!
مصطلح جميل وجذاب لك قصب السبق فيه ! وبدوري أضيفه لقائمة المصطلحات العديدة التي تعلمتها وأتعلمها يومياً في هذا المكان النافع والمفيد !
ننتظرك حضورك دوماً فهو ثر ومفيد وموضوعي سمح ؟
| |
|
|
|
|
|
|
Re: الشخصية المنبرية ..جوة زول .. وبرة زول !! يوجد ( إعتراف) !! (Re: د.نجاة محمود)
|
الحبيبة د. بيان
تحياتي
Quote: من الحاجات البتحصل هنا انو الناس الهنا بسيطرو على تلوين صورة الاخر وشيطنته
قبل فترة اتصل بي صاحبا لي لي سنين طويلة منو.. بعد قالي هو منو قاعد يضحك بصورة هيسترية قال زول قاليه بيان دي نجاة محمود ما صدق كلو كلو اسع ضرب يتأكد قال ما خلا زول بعرفنا ما سالو من تلفوني عشان بس يعرف الحقيقة انه بيان تساوي نجاة |
عايني :
الحتة دي بتسوقنا لسؤال مهم يادكتورة
يعني الزول الصاحب ده ماعرف إسلوبك ولا إسم بيان عمل ليهو لبس وتشويش ؟
قصدي الزول في المنبر لو كتب باسم مستعار موش إسلوبه بيكون حقو ؟
يعني الصاحب لو بيعرف إسلوب نجاة كويس في الكتابة كان ممكن يشبه عليك
حتى لو ماعرف انو بيان تساوي نجاة موش كان ممكن مثلا لما يقرأ ليك قصة
أو مقال أو قطعة أدبية أو نقدية يقول مثلا ياخ إسلوب
د. بيان ده بشبه إسلوب صاحبتنا نجاة محمود ؟ ولا الاسم الحركي بيعمل تشويش لدرجة الآخر البيعرفنا من أصحابنا مايتعرف علينا مثلاً ؟
Quote: المهم بعد كثير من القرقرات في موضوع كوزة وجبهجية وامن كمان
قلت ليه تابع الموضوع بيبدأ كيف وينتهي كيف مع اي مناضل كيبورد بالفعل بقى يتصل دائما في كل دوقشمان ولا قلة ادب وقالي المحل دا امرقي منو |
عارفة؟ أصحابنا القراء بيشوفوا ( شجر الشر ) وهو يسير نحونا أكتر مما بنشوفه نحنا ونحنا وسط العجاجة القائمة دي ! عشان كده مرات لما زول من أصحابي القراء يقول لي البوست الفلاني حايحصل فيهو كده بتصدق النبؤة بتاعتو طوالي تصدقي ؟ لكن أقول ليك شئ ؟ غايتو حتة إنك كوزة وأمن دي بندهش لأنو إنتي بالذات زولة مسرح ونقد وكوميديا ياخ !
غايتو البتقع من السماء تتلقاها الواطة معليش والجاتك في إنتماءك سامحتك ياغالية !
Quote: بعداك بقينا في نقاشات دائمة حول الشخصيات الشريرة هنا
وقديتو ليك بقصة العقلية الذكورية دي حتى قال الروب قال تاني اجيب سيرة عقلية ذكورية بقطع الخط.. قال ديل ما شخصيات ذكورية ولا حاجتين ووصفهم بوصف لا يمكن كتابته هنا... |
ديل ناس منو ديل ووصفهم قال شنو مممكن توريني في ( الباسنجر ) ( وش حلاتو ) !
Quote: يلا بقى يتابع اي حوار لما خلاص يزروا الجماعة وحججهم تنتهي بيتصل يقولي خلاص بعد شوية يجيك عكاز الغريبة الى الان ماحصل قالي في موضوع اطلعي منو والا تحول الى معركة حامية الوطيس فيها تلميحات وسخة ومن اليوم داك بقى وداعيتي .. يا بيان البوست دا خارجي روحك كلامك كلو قلتيه حيكون لف ودوران لا طائل منه رسالتك وصلت.. |
والله يادكتورة صديقك ده ود حلال ومستشار ممتاز أمسكي في كلامو قوي تتكافي بلاوي المنبر وحرق الدم وعكاكيز نص الليل خاصة سمح ؟
Quote: من الحاجات النصحني بيها مااخش مع اي بت سمحة في مخاشنة لانه ناس البورد ديل بكاين قرقرقرقرر |
ممممممممممممم!! برضو في ( الباسنجر ) بالله ( وش شمشار) !!
Quote: المهم خلاصة الكلام انه هنا الناس هم برسمو شصيتك ما انت.. |
في ناس بترسم شخصيتها المنبرية براها بي ايدها وشديدها وفي ناس بتترسم ليهم شخصياتهم لا إيدهم لا كراعهم !
Quote: وشكرا لنزار وشكرا لنادية لظنهم الحسن في شخصنا |
ياحبيبة نحنا قلنا الأقل كتير من حقك وإنتي كريمة وبت كرام وتستاهلي كل خير ..
Quote: وان شاء الله يانزار يارا تجي تدرس هنا اوعى تقول عييييك
بناتي قربن يتخرجن وقبل كم شهر كدا عمرهم كان 4 سنة السنين تجري هوا |
ربي يحفظ بنياتك وتشوفيهم في أرقى المراتب يارب ويانزار لازم تودي يارا ماليزيا ياخ ..
Quote: ويا نادية تعالي لينا هنا اعملي برامج البلد دي التقولي الشمالية مليانة نخل..
فيها شتلات يانعات |
من ناحية جاية جاية باذن الله بس متين دي اللسة عايزة تحديد ( وش مابعرف يتكلم ماليزي ياخ) !هههه وعارفة انو في نخلات يسدوا عين الشمس وإنتي على رأسهم وربي يحفظ كل بنات السودان نخلات باسقات ويستحقوا التكريم والإحتفاء ..
شاكرة حضورك الطاعم يادكتورة وخليك قريبة سمح ؟
| |
|
|
|
|
|
|
Re: الشخصية المنبرية ..جوة زول .. وبرة زول !! يوجد ( إعتراف) !! (Re: نادية عثمان)
|
الاخت \ نادية
تحية واحترام
شغلتني شواغل من المتابعه واعتقد ان هذا البوست مراية لشوف روحنا فيها
اسير الي ان احقق قول الاستاذ المفكر الشهيد محمود
يقول الفكر والقول والعمل يكونو متسقات
فكرك وقولك وعملك تكون برا بالاحياء والاشياء
ان صدق هذا تصدق كافة التعاملات
لكن ليس المنبر فقط
تجد الانسان في البيت شخصية وفي المكتب شخصية وفي الشارع شخصية
تحياتي اعود تاني لك
| |
|
|
|
|
|
|
Re: الشخصية المنبرية ..جوة زول .. وبرة زول !! يوجد ( إعتراف) !! (Re: علاء الدين يوسف علي محمد)
|
الإنسان الجميل علاء الدين يوسف علي
تحية تليق بحضورك البهي والمحبب لدي دوماً
Quote: أول حاجة عايز أشهد ليك بإنك إنتِ تحديداً شخصية لا تقبل التلُّون يعني وش غير الباسم العرفناهو فيك ما بنفع معاك ولا أظن بتقدري تقدمي غيرو و أشهد لك بالحكمة و الطيبة و الإحترام تاني حاجة |
عندي صحبتي من خارج المنبر لكنها من أكتر المتابعين ليهو
وحافظة ناسو كلهم .. مرة قالت لي :
عندكم فلان وفلان مجاملين لكن فلان وفلان والله لو جات حبوبتو
إشتركت معاكم في المنبر مايجاملها ..لأنو مابقول إلا المقتنع بيهو
وكلامو في معظمه حاااار ومابعرف يكسر تلج لي بت ، وبقول المقتنع بيهو بس
أها الزول الفلان الأول ده كنت إنت ده !
التاني بقوله ليك في ( الباسنجر ) ! ههههه
الخلاصة :
رأيك الإيجابي حول شخصي الضيف يشرفني والله ياعلاء وهو أكثر مما أستحق بكتييير !
أنالاقيتك برة المنبر وسعدت بيك وحقيقة لقيتك غير الزول الفي المنبر
جوة المنبر كلامك حااار لدرجة الزول يتخيلك (جهامة) كده ومن النوع البتدق وتكفت طوالي داك!
وبرة المنبر لقيت رجل طيب الملامح وشديد التهذيب وبشوش وكريم وجدع وصباح خير عديل والله
وبي كده إنت فعلا ياعلاء
Quote: أنا غايتو معترف إنو عندي لونين أحمر و أخضر في النص ماف و لكلاهما ظرفٌ و حالة |
لكن أحمر أخدر ديل شنو وليه اللونين ديل بالذات ؟
مرورك فيه إثراء للحوار
و
في إنتظارك سمح ؟
| |
|
|
|
|
|
|
Re: الشخصية المنبرية ..جوة زول .. وبرة زول !! يوجد ( إعتراف) !! (Re: Sabri Elshareef)
|
المحترم صبري الشريف
تحية وإحترام
Quote: لكن ليس المنبر فقط
تجد الانسان في البيت شخصية وفي المكتب شخصية وفي الشارع شخصية
تحياتي اعود تاني لك |
تمام فعلاً في بعض الناس بيكونوا في كل الاماكن
التلاتة الذكرتهم ديل زول مختلف في تعامله وطريقته !
طيب لو قلنا المنبر ما بيت ولا مكتب ولا شارع يبقى مكان رابع للتعامل ؟
وأنت شخصياً بتتعامل في المنبر زي تعاملك في البيت ولا المكتب ولا الشارع ؟!
مهم نعرف طرق تعاملنا في المنبر وهو بيعني لينا شنو !
تعود في أي لحظة مرحب بيك أخ كريم ابن أخ كريم
| |
|
|
|
|
|
|
Re: الشخصية المنبرية ..جوة زول .. وبرة زول !! يوجد ( إعتراف) !! (Re: نادية عثمان)
|
الأستاذة نادية والمشاركون الكرام
تحية وتقدير لهذا الطرح التحليلي العميق للشخصية المنبرية داخل وخارج ساحات المشاركة ... ولكن دعوني أختلف قليلا مع فكرة ورأي الصديق إسماعيل عباس ... فكثير من الشخصيات التي سمحت لي الظروف بمقابلتها أجد حقيقتها الطبيعية خارج المنبر ... إختلاف جوهري وليس ظاهري فقط وكنت أود الخوض في بعض التفاصيل وضرب الأمثلة ولكن ترددت في ذلك خوفا من إساءة الفهم ( المنبري ) !!! علما بأنني أسمعت بعضهم رايي في اختلاف شخصياتهم عما هي عليه داخل المنبر ووجد رأي القبول لديهم ... بقي أن أقول أن الشخصية المنبرية في الخارج أوضح وأجمل بكثير من نفس الشخصية داخل المنبر والذي تغلب عليه أحيانا كثيرة المجاملات والبروتوكولات في الجانب الإيجابي بينما يتشكل الجانب السلبي في إساءة فهم الآراء والقراءة الخاطئة للأفكار ومن ثم الرد غير المتوازن ...
موضوع شيق وعميق .. وشكرا للجميع
| |
|
|
|
|
|
|
Re: الشخصية المنبرية ..جوة زول .. وبرة زول !! يوجد ( إعتراف) !! (Re: عادل جبارة)
|
الأستاذ الفاضل
عادل جبارة
Quote: تحية وتقدير لهذا الطرح التحليلي العميق للشخصية المنبرية داخل وخارج ساحات المشاركة ... ولكن دعوني أختلف قليلا مع فكرة ورأي الصديق إسماعيل عباس ... فكثير من الشخصيات التي سمحت لي الظروف بمقابلتها أجد حقيقتها الطبيعية خارج المنبر ... إختلاف جوهري وليس ظاهري فقط وكنت أود الخوض في بعض التفاصيل وضرب الأمثلة ولكن ترددت في ذلك خوفا من إساءة الفهم ( المنبري ) !!! |
سوء الفهم المبري دي مسألة مهمة جداً بالمناسبة وأنا شخصياً عانيت منها كتير شديد ! وتمثل ذلك في عدة حاجات مثلاً دخولك لبوست فيهو إختلاف وجهات نظر بين زول وزول أها لو دخلت بس
تقول رأيك اللي هو تطابق أو إتفق مع وجهة نظر وأحدة من المختلفين فمعنى ذلك أنت مع الجهة دي ضد الأخرى ! ومرات مثلاً تكون عامل مداخلة معنونة باسم زول معين يقوم يجيك زول تاني يرد عليك بعصبية وسوء ظن وكأنك قاصدو هو شخصياً ويصر على كده !
ومرات ومرات ومرات وكلو سوء فهم منبري !!
Quote: علما بأنني أسمعت بعضهم رايي في اختلاف شخصياتهم عما هي عليه داخل المنبر ووجد رأي القبول لديهم ... بقي أن أقول أن الشخصية المنبرية في الخارج أوضح وأجمل بكثير من نفس الشخصية داخل المنبر والذي تغلب عليه أحيانا كثيرة المجاملات والبروتوكولات في الجانب الإيجابي بينما يتشكل الجانب السلبي في إساءة فهم الآراء والقراءة الخاطئة للأفكار ومن ثم الرد غير المتوازن ... |
في شخصيات منبرية في الخارج بتكون أجمل وفي العكس كمان مرات
لأنو في ناصية ربنا أداهم مقدرة الكتابة الرائعة والمؤثرة جدا في القارئ لكن ماعندهم ملكة فنون التعامل مع الغير خارج إطار الكتابة وفيس تو فيس كده ..موش بتحصل مرات ؟
Quote: موضوع شيق وعميق .. وشكرا للجميع |
تسلم يارب وبالمناسبة الموضوع ده طرحتو من خلال سهرة كاملة مع بعض شخصيات من المنبر
حاتشاهدها على هارموني قريبا باذن الله سمح ؟
| |
|
|
|
|
|
|
Re: الشخصية المنبرية ..جوة زول .. وبرة زول !! يوجد ( إعتراف) !! (Re: نادية عثمان)
|
صديق الموج
عرفتو برة المنبر قبل جوة المنبر
شخصيتو جوة وبرة فيها إختلاف لكن ماكبير
برة المنبر لاقيتو في التلفزيون القومي وفي السعودية
لما كنت هناك زيارة
ولما لاقيتو برة لقيتو زول مرح جدا
بحب الفرح والرقص وزول عاشق لأغنية الحقيبة بجنون
حافظ إسم أي أغنية وأي شاعر
طريقة تعامله مع أولاده عجبتني شديد
خاصة زوجته وبته السمحة ، مشروع المذيعة ديك
لقيتو برقص مع بتو كأنها الجكس بتاعو وونسة وقرقراب شديد
يعني أب جميل ومتصاحب على بناتو وأولادو بشكل حلو
صديق الموج داخل المنبر عرفتو من خلال مداخلتو المرحة والقفشات اللذيذة
لكن كمان لقيتو فيما يتعلق بقضايا الوطن زول جسور ومابخاف ولايووق مرات
خاصة لمن يمسك قضايا الفساد عاد كان ماخرب بيت المفسد ودخلو السجن مابرتاح ..هههه
صديق الموج
إن شاء الله لا تفوت لا تموت يازول ياسوداني جميل
قول آآمين
| |
|
|
|
|
|
|
Re: الشخصية المنبرية ..جوة زول .. وبرة زول !! يوجد ( إعتراف) !! (Re: نادية عثمان)
|
منى عوض خوجلي
دي بعرفها من زمااااااااان
زمن كانت بتجي جريدة الخرطوم في القاهرة وتجيب المقالات الرهيبة بتاعتها للنشر
هي ماكانت بتعرفني شديد الزمن داك
كانت بتجي سايقة ليها بت صغيرونة ولذيذونة ماسكاها في يدها
ياها ذاتها البت دي هي آية حبيبتنا الكبرت هسة وبقت أم وخلت منى حبوبة قبل آوانها !
منى أحلى أم وأنضر حبوبة الله خلقها .. حبوبة مودرن وشيك وراقية وآخر جمال ولطافة
تتسم بالموضوعية الشديدة في كتاباتها داخل المنبر
وتتسم بالذكاء الوقاد والدم الشربات وخفة الظل المبالغة
منى جوة عسل وبرة باسطة بالمكسرات عديل
ربي يحفظها ياااارب
| |
|
|
|
|
|
|
Re: الشخصية المنبرية ..جوة زول .. وبرة زول !! يوجد ( إعتراف) !! (Re: نادية عثمان)
|
في زول كده محيرني كان جوة المنبر ده !
ولمن لاقيتو برة المنبر زادت حيرتي !
زول عجيب ياخ !
إنه الرجل الخلوق والمهذب والمحترم جداً إسماعيل عباس
ياخ ده زول مكمل الإنسانية لي حدها والله
جوة المنبر زي برة المنبر
مافي مرة سمعت زول قال عنو شئ سلبي ولا شفتو قال عن زول شئ سلبي !
ملاك في شكل رجل وقور كامل الإتزان والأدب والأخلاق
خدوم وأخو أخوان ووبلد وشهم وكريم وأي صفة سمحة فيهو
ياخ هو زول ( شكرو ) عمر الفاروق تاني فيهو كلام ؟!
ربي يحفظك ويخليك يااااارب لوليداتك وأمهم وأحبابك
قول آمين
| |
|
|
|
|
|
|
Re: الشخصية المنبرية ..جوة زول .. وبرة زول !! يوجد ( إعتراف) !! (Re: نادية عثمان)
|
هالة حسن
ماكنت بقرأ ليها كتير جوة المنبر لأنها مقلة في كتاباتها أساساً
وبعدد الكتابات البسيطة القريتها ليها والمداخلات
هي إنسانة لطيفة وحبوبة ومرحة
ولما لاقيتها خارج المنبر في رحلة قندهار بتاعة البورداب لقيتها بت جدعة وشهمة
من النوع البحلف إلا يوصل كل من ليس له ضهر لتكسب أجر فضل الظهر بعربتها الجميلة
بشوشة وذات جمال سوداني هادئ وطلة وجه مريحة .. وتخجل الزول بي كرمها الزائد
بعد كده لاقيتها في مكتبها الفخم بشركة الاتصالات
ومابقول إسم الشركة عشان مايبقى إعلان وكده هههه.. وتوالت المعرفة وتعمقت من خلال المنبر وخارجه
إنسانة يتشرف المرء بصداقتها والله
ربي يحفظها
| |
|
|
|
|
|
|
Re: الشخصية المنبرية ..جوة زول .. وبرة زول !! يوجد ( إعتراف) !! (Re: Shams eldin Alsanosi)
|
شمس الدين حبابك
Quote: من خلال اتصال هاتفي مع الاخ عادل بلير الان أكد انه لا يستطيع الدخول ولا دخل له بالبوست المكتوب بخصوص خبر باقان وسلفا
نادية اقري بسرعة قبال بكري يجي |
أقري فين ياجدع .. أنا ما أجريش بالساهل ياأخويا ..ههه
ماهو عشان كده أنا رديت على زول في البوست المسحوب إنو بلير صديقي
صاحب الحكم الحكيمة لم نعرف عنه كذاباً ولا مروج إشاعات فكان المفروض
بكري على الأقل يعبرنا بكلمة ويورينا إنو القصة هكر موش يسحب في البوستات
وأحد ورأء التاني لمن قطع نفسي ياخ !
| |
|
|
|
|
|
|
Re: الشخصية المنبرية ..جوة زول .. وبرة زول !! يوجد ( إعتراف) !! (Re: انعام حيمورة)
|
نعوم
Quote: يعني قستي شخصيتي دي كلها بالضحكة بس ؟؟!! |
وماهي الضحكة دي أهم سماتك الشخصية !
الضحكة دي يانعوم مميزة وإنتي من زمن الجامعة بعرفوك الناس بي ضحكتك ويعلقوا عليها
ضحكة كده ضاحكة ومن جووووة القلب !
شفتي ليك ضحكة بتضحك ؟
ياها دي ضحكتك بتضحك تصدقي ؟!
و
نعوم
عرفتك جوة المنبر وبرة المنبر وإتعمقت المعرفة
بقت بيتنا وبيتكم وأهلي وأهلك
وملاح غدانا وصينية فطوركم
بقت حنانة أمي وعثمان أبوك
بقت إالهام شقيقتي وإنتصار شقيقتك
بقينا وأحد والحالة وأحدة والروح وأحدة والله اللمانا بالصدق
والمحبة والمعزة البينا بي أحلى الصلات وأحد
تسلمي وتظل شهادتي فيك مجروحة ياحبيبة قساي وياصديقتي الغالية
نعوم
أضحكي ياخ !
| |
|
|
|
|
|
|
Re: الشخصية المنبرية ..جوة زول .. وبرة زول !! يوجد ( إعتراف) !! (Re: نادية عثمان)
|
Quote: مداخلتك سمحة عديل برجع ليها بمزاااج بس أخلص حلة البطاطس الفي يدي دي سمح ؟ |
الأستاذة الفاضلة نادية بصراحة رفعتي معنوياتي ... دا أولا .. تانيا ... أنا برضو والله عندي شوية أشغال بالمكتب أخلصها وأرجع لمداخلتك الدسمة إياها ثالثا ... أخجل أن أقول أنني كنت ولا زلت موجود بالرياض أثناء وجودك هنا ولم أتمكن من مقابلتك والأحتفاء بك .. ولكن الحمد لله بورداب الرياض لم ولن يقصروا
ولي عودة مسائية بإذن الله ... من البيت بمزااااااج برضوا !!!
| |
|
|
|
|
|
|
Re: الشخصية المنبرية ..جوة زول .. وبرة زول !! يوجد ( إعتراف) !! (Re: نادية عثمان)
|
Quote: الأستاذة نادية والمشاركون الكرام
تحية وتقدير لهذا الطرح التحليلي العميق للشخصية المنبرية داخل وخارج ساحات المشاركة ... ولكن دعوني أختلف قليلا مع فكرة ورأي الصديق إسماعيل عباس ... فكثير من الشخصيات التي سمحت لي الظروف بمقابلتها أجد حقيقتها الطبيعية خارج المنبر ... إختلاف جوهري وليس ظاهري فقط وكنت أود الخوض في بعض التفاصيل وضرب الأمثلة ولكن ترددت في ذلك خوفا من إساءة الفهم ( المنبري ) !!! علما بأنني أسمعت بعضهم رايي في اختلاف شخصياتهم عما هي عليه داخل المنبر ووجد رأي القبول لديهم ... بقي أن أقول أن الشخصية المنبرية في الخارج أوضح وأجمل بكثير من نفس الشخصية داخل المنبر والذي تغلب عليه أحيانا كثيرة المجاملات والبروتوكولات في الجانب الإيجابي بينما يتشكل الجانب السلبي في إساءة فهم الآراء والقراءة الخاطئة للأفكار ومن ثم الرد غير المتوازن ...
موضوع شيق وعميق .. وشكرا للجميع |
كلام زى الدهب........والله فى شخصيات هنا لا منبريه ولا غير منبريه..دى شخصيات برزخيه....ما تقدر تصنفهم خالص.....ليه مالناس تكون متوازنه وتكون واضحة وتبطل الغمز واللمز والتنكيد على الناس..والعجيب نحلل الناس من غير مانشوفهم أو نعرفهم جيدآ ونحكم عليهم..التأنى سمح..والبوست ده برضو سمح......
مودتى..وإحترامى للجميع.............إسماعيل محمد احمد عباس....
| |
|
|
|
|
|
|
Re: الشخصية المنبرية ..جوة زول .. وبرة زول !! يوجد ( إعتراف) !! (Re: ismeil abbas)
|
شقيقي الغالي إسماعيل عباس
Quote: كلام زى الدهب........والله فى شخصيات هنا لا منبريه ولا غير منبريه..دى شخصيات برزخيه....ما تقدر تصنفهم خالص.....ليه مالناس تكون متوازنه وتكون واضحة وتبطل الغمز واللمز والتنكيد على الناس..والعجيب نحلل الناس من غير مانشوفهم أو نعرفهم جيدآ ونحكم عليهم..التأنى سمح |
عارف ؟
كان عندي بوست قبل كده ماعارفة موجود في ياتو أرشيف
عن العداء المنبري والإنطباعات الخاطئة بتبادل المعلومات المغلوطة عن شخص بعينه بين
بعض العضوية في لقاءاتهم وونساتهم الماسنجرية وغيره !
بالجد أنا كنت ومازلت وسأظل مستغربة وسؤالي قائم .. ليه وكيف زول يعادي زول مابعرفو ؟!
وهل المنبر والتعامل من خلالو كفاية عشان تكره ليك زول وتكوّن عنو فكرة كعبة
وتبدأ تتعامل معاهو على إنو عدو حقيقي ؟
عاين
لو بتقدر تجاوب لي على الأسئلة دي بتكون ريحتني كتير وبجيك بأسئلة تانية سمح ؟
| |
|
|
|
|
|
|
Re: الشخصية المنبرية ..جوة زول .. وبرة زول !! يوجد ( إعتراف) !! (Re: نادية عثمان)
|
ناديه أختى الرائعة.....كيفنك..
بصراحة البوست ده مفيد جدآ جدآ لآنو من خلال التحاور قد تعم الفائدة...
Quote: بالجد أنا كنت ومازلت وسأظل مستغربة وسؤالي قائم .. ليه وكيف زول يعادي زول مابعرفو ؟!
وهل المنبر والتعامل من خلالو كفاية عشان تكره ليك زول وتكوّن عنو فكرة كعبة
وتبدأ تتعامل معاهو على إنو عدو حقيقي ؟
عاين
لو بتقدر تجاوب لي على الأسئلة دي بتكون ريحتني كتير وبجيك بأسئلة تانية سمح ؟ |
أولآ ليه تجيبى لى أسئلة صعبة ما عايزة تنجحينى...؟؟
لاتستغربى من طبيعة البشر يا ناديه..وربنا لما خلق البشر صنف نفوسهم...
الشخصية المنبرية إنطباعية شديد..تترك إنطباع عن شخص وتدور فيهو كأنو لم يحصل شىْ...وبعدين لما تكتشف الزول الدورت فيهو تبدآ فى ألأعتذارات..وما اكثر ألأعتذارات هنا فى هذا المنبر..
العداء فى بعض الشخصيات مؤصل لآسباب كثيرة..والعامل النفسى لحظة الكتابة مهم لطرح جيد...
نسأل الله ان يبعد بيننا الكراهية والبغضاء والحسد..................مودتى.إسماعيل محمد احمد عباس....
| |
|
|
|
|
|
|
Re: الشخصية المنبرية ..جوة زول .. وبرة زول !! يوجد ( إعتراف) !! (Re: ismeil abbas)
|
الجبيبة نادية .. .. فى كل يوم بتاكد انو حقيقة ممكن تعيش برة زول وجوة زول من خلال معايشتى لى ناس كتار .. .. ..
تفتكرى انو الواحد فينا بكذب ليه بعيش بى قناع للناس البرا .. ..
عارفة يا نادية .. ..
مرات بقعد بفكر وبسرح فى تكوين النفس البشرية غريب
فى النوع الصادق حتى مع الجماد الحولينه وفى النوع البغش حته نفسه وفى النوع التايه وبفتكر انو وصل وفى النوع البحاول يخلق حاجات
من خيالو وفى النوع الانانى المابعرف يعيش لى غير نفسه وفى وفى .. ..
تفتكرى انو مقياس النجاح بالنسبة للانسان الجوة زول وبرة زول ممكن يكون شنو .. ..
نادية بوستيك مريح زيك .. .. ..
كونى كما تتمنى وعيشى كما نريد ( رائعة دومأ)
| |
|
|
|
|
|
|
|