تتصور يا مازن لم أجد هذا النوع من النبق فى أى مكان .. لا داخل السودان لا خارجه .. وكلما وجدت فواكه من أنحاء العالم المختلفة بحثت عنه .. يعرف بالنبق المصرى .. وبعض الأوساط النبق الهندى .. والإسم المحلى له بين أهالى ود الشافعى وما جاورها "تمر الصين"
يوجد بكثرة فى "جنينة المدير" .. ورغم نجاحه وغزارة إنتاجه .. وروعة طعمه .. وقِدم وجوده .. لم يفكر أحد فى نشره وجعله محصول قومى ..
توجد أشياء فى بلادنا لا نبالى بها ولا نطورها وقد تكون ثروة .. مثال ذلك فى الجزيرة الخرووب والضريسا وعيش الغراب "ود الواطة" ومثلآ "القضّيم" فى الغرب ..
شكرآ على الذكرى الجميلة
مودتى
02-18-2008, 10:38 AM
othman mohmmadien othman mohmmadien
تاريخ التسجيل: 12-13-2002
مجموع المشاركات: 4732
إنت من المسالمة .. ومن مدنى .. ومن الديم .. ومن بورتسودان كمان ومن كل السودان وبتعرف أم أحمد الدقت المحلب ... بس ما أكلت الأكعب شئ ؟؟؟؟ وهو ليس بالحمت رمت ... إذا عرفته تكون أخطر مني ...
02-18-2008, 12:57 PM
رأفت ميلاد رأفت ميلاد
تاريخ التسجيل: 04-03-2006
مجموع المشاركات: 7655
Quote: بس ما أكلت الأكعب شئ ؟؟؟؟ وهو ليس بالحمت رمت ... إذا عرفته تكون أخطر مني ...
ياخوى أنا البدخلوا الناس يدهم فيه بلبعو .. ماغلبى إلا التركين والفسيخ النى .. ويوم فى بورتسودان عند جماعة أقباط بعملو "أبوجلمبو" بالملوخية "فى شوربتو" .. شفتهم بختوهو فى الحلة فى النار حى وهو بحاول يطلع .. عملية مجرمة ياخ .. رغم بررورها كان مات يبقى سام وسمه زعاف .. طبعآ غلبنى آكلو لا هو ولا ملخيتو .. أها أنت أكلت شنو يا مقطوع الطار دى ما كانت الحجة بتقولا ليك ؟
مودتى
02-18-2008, 03:18 PM
othman mohmmadien othman mohmmadien
تاريخ التسجيل: 12-13-2002
مجموع المشاركات: 4732
أصلو الحكاية يا رأفت ... خالاً ظريف لينا... عليه رحمة الله صاحبه أبوه كاتم الهواء عليه شوية ... ومجلدها عليه ..... جنهم الأكعب شئ ..... يوم جاء لأبوه .. يا أبوي عايز أشتري ... أقاشي ... أبوه ما داير يديه القروش ... قال ليه: طبعا درسوكم الحروف السايلنت في بعض الكلمات في اللغة الإنجليزية.... في المدرسة رد لأبوه: أآي يا أبوي ...درسونا ليها أبوه قال ليه: طيب الأقاشي ده إصلو الأكعب شئ .... بس الآي والبي سايلنت .... فصار أقاشي ....عايز تاكلو برضو
طيب لو أكلته ... ماأحلى أكعب شئ في كل من المدن التي أنت منها ... ما تغلط وتقول لي اقاشي المسالمة .... لأن
ظبية المسالمة الفي الخمائل هايمة يا حالمة يا ظالمة ياظالمة ياظالمة
يستحيل تكون شمت ريحة الأكعب شئ ... لك ودي .. (الميم والتاء سايلنت = مودتي)
02-18-2008, 04:11 PM
رأفت ميلاد رأفت ميلاد
تاريخ التسجيل: 04-03-2006
مجموع المشاركات: 7655
تعرف ناس خالك ديل جلدة خلاس .. أوع تكون عليك قصة "الولد خال"
تعرف أول مرة أكلت الأقاشى كان كادقلى .. الزمن داك ما وصل الخرطوم .. ما عارف كان أحلى حاجة فى الدنيا ولا الجوع كافر .. الحصل قبلها كنا فى ليلة صاخبة فى رأس السنة .. ونومنا بدون عشا .. صحينا لقينا الناس مشوا رحلة .. فتشنا ما لقينا غيروا فى التلاجة .. يعنى بارد كمان .. نحن نفرين ضربنا وجبة تسعة .. ونطينا فى لورى مشينا الدلنج .. فى الدلنج أكلنا أبو شوك "العجل" حاجة رهيبة .. الجراد ما عجبنى .. من المكوم فى السوق .. قالوا المعمول على أصلوا مظبط والله أعلم .. فى بورتسودان .. الصيادية والمخبازة والسلات فى مدنى النيفة بتاعة العشير .. فى أفران حرارية تحت الواطة .. بدخلوا فيها الخروف كامل .. بطلع شكلو زى النى .. تخت صباعك تصل العضم .. زى الفرصة فى الأبيض عصيدة الدخن باللبن والعسل .. بعد المطرة فى سواكن "الزرمباك المجفف .. وده حيوان القواقع الحلزونية فى المسلمة طرشى بشارة لا يعلو عليه وطعمية حى العرب وباسطة عم بين .. ولازم يسدرك قبال تفوتو فى ود الشافعى النيق الهندى زى ما قال ليك الجمال فى كوستى السمك العجل والبياض طعمو براه فى الدمازين جداد الوادى .. وبلطى عجيب فى القضارف الشاى باللبن بالكباية الشب وفى الجريف الشاى الصاموتى بالحلة المقننة فى زرايب الزبالة وفى الدبة الجداد المجفف زى ورق الكراس .. طبقات طبقات .. تنسل وما تقيف فى فلاتة لحمة التيوس على الفحم فى الجديد خليف تتقدا ويكاب .. فى الجزيرة الموليتا بالليمون والشطة ام نويورا .. وكان أديتا شوية دكوة ولوبا عفن ما بتخلص
والمشتهى الحينيطير .. يطير
02-19-2008, 08:38 AM
othman mohmmadien othman mohmmadien
تاريخ التسجيل: 12-13-2002
مجموع المشاركات: 4732
تعرف يا رأفت إنت روحك خلقت منذ أزل سحيق منذ أن قرر الله أن يخلق البشر ... ثم رمى بها في هذا السودان .... الجميل منتظرة مقدم الجسد ... وقد كان .. وأعتقد أنها تقيم هناك في السودان .. مرتبطة بك أثيرياً ... رغم بعدك عن السودان بصراحة كده ... إشتهيت زيارة كل هذه المدن ... ولن أجد نفس الطعم الذي تذوقته ... الكول والمرس شايفك ما جبت سيرتهم رأفت العجيب ....
***** غفر الله لأخونا الشهيد سليمان وحفظه في علياءه ... بكل صدق لم أكن أعلم عنه شيئاً وبذكرك له بصورة ثابتة في ردودك ... جعلني أبحث عنه فوجدته في سيرة لم يحوطها شئ سوي شذى ًفواح من كل جنب وحب الناس العاديين له لأنه زرع الحب قي قلب من قابله وهاهو يزرعه في قلب كل من سمع عنه وسيظل هكذا دوما... له الرحمة ... وحفظ الله أسرته الكريمة ..
02-19-2008, 10:26 PM
رأفت ميلاد رأفت ميلاد
تاريخ التسجيل: 04-03-2006
مجموع المشاركات: 7655
الكول أكلتو .. الغريبة .. فى الخرطوم .. أكلتو كتير جاهز .. قالوا قبل الطهى ما بتقابل .. المرس لحقنا لحدى هنا .. وتصور البتجيب لينا المرس سويسرية .. عايشة فى السودان منذ أكثر من أربعين سنة حتى الآن .. متزوجة سودانى ولسة هناك .. بتجى فقط زيارة .. وبتظبطو على أصولوا أهاةشن ليك
Quote: فوجدته في سيرة لم يحوطها شئ سوي شذى ًفواح من كل جنب وحب الناس العاديين له لأنه زرع الحب قي قلب من قابله
شكرآ على الكلمات الطيبة عن شقيقى المرحوم سليمان .. كان تركيبة كتب لهاأن لا تعيش .. لديه القدرة لولوج القلوب .. خاصة الأطفال وذو العاهات العقلية .. لدية قدرة ممنوحة لمواصلتهم .. وكان يوصفهم .. بأنهم أنقياء من شرور البشر .. مرح يحبور .. مداعبته حميمية .. شرس فى مواقف القوة ..
مرتبط بإدمان بأركان السودان .. أذكر فى صبانا ظهرت له منحة لدراسة الهندسة فى موسكو .. ذهبنا لوداعه فى المطار .. وقبل الدخول الى صالة المغادرة إختفى .. بحثنا عنه ويئسنا بعد إقلاع الطائرة .. غضب والدى ولم يأذن لى بالبحث عنه إلا بعد عدة أيام .. ذهبت الى مدنى وأنا أعرف أين أجده .. وجدته مسترخيآ منتشى .. عاتبته على فعلته فرد بحبور "حد يسيب مدنى يمشى موسكو"
ولكنه ترك مدنى وعشق الدمازين ومن قبلها بورتسودان ..
رحمه الله وسأحكى عنه كثيرآ .. كان شعلة من المتناقضات المقبولة .. مليئ بالحياة يداعبها ولا يسفهها..
مودتى
02-19-2008, 03:44 PM
badr alkalika badr alkalika
تاريخ التسجيل: 02-25-2007
مجموع المشاركات: 974
تعرف يا رافت بعد مليون تحية تداعب بسمتك الاريحية هذه وتلامس الوقار في شيبات شعراتك ولك تحياتي تعرف انت من وين انا حاسي انت من بيتنا ومن بيتهم انت من هنا ومن هنالك انت من النيل ومن النخيل ومن دارفور وملكال ودبايوا حبي ومودتي
02-19-2008, 10:35 PM
رأفت ميلاد رأفت ميلاد
تاريخ التسجيل: 04-03-2006
مجموع المشاركات: 7655
يارافت انا مازلت ابحث عن الحقيقة ومازلت الهث خلفها والضوضاء من حولي لم تخدعني المني زيادة الرغيف في البلد والانثى الغائبة التي تقلق كثير من المتزوجين ( ان شاء الله انت ما منهم ) تعرف كثير من الناس حولي وحولك يبحثون عن انثاهم الغائبة رغم العيال
فالبحث عنها ارهقني أقرأ بوست طلتك العزيزة فيهو بث لشكواي
تعال الليلة البيت بدري وجيب الرغيف الولد عندو حمى التطعيم المدرسة الكراس القلم احبك مفردات داير احسها في بيتي انا وين البيت وين الانثى اين انا اين البلد وين الرغيف اماه اماه اماه اماه ( تعرف في زول غيرت الصورة اللي انا خاتيها صورة السيد محمد عثمان لقيت صور ناس ما بعرفهم نضاااااااااااااااااااف شكلهم في اوروبا اها براجع في البوستات امكن الغير الصورة اساء او قل ادبو وهذه ليست من شيمي فتك بعافية
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
رأفت ميلاد
othman mohmmadien
فيس بوك
تويتر
انستقرام
يوتيوب
بنتيريست