Quote: ودالقرشي كيفك، ياخ الناس دي عندها خيال خصب بشكل، واحد زمان حلف بإنو أغنية ضابط السجن نُظِمت في واحده صاقعه وتلك الصاقعه كانت طالبة جميلة بجامعة( ...) من بنات الأبيض ماركة كروز توماهوك وووو. وظللت وزملائي كل تلك المدة على ذلك الفهم حتى سمعتها من خشم سيدا بالأمس بأنها كتبها معتقل سياسي أيام المرحوم نميري وفي شخص (غير). مبالغه.
التحية لسيدة البوست الأخ محمد رمضان كريم والجميع كل عام وأنتم بخير ... كانوا مجموعة من موظفي البيطري بمدينة سودري - في إنقلاب هاشم العطا - تعجلوا بإرسال برقية مهنئين بالانقلاب ونجاحه ومرحبين بالرئيس الجديد مع العلم أنهم لا ينتمون لأي تنظيم سياسي وفعلوا ذلك أملاً في ترقية أو وضع مميز يشملهم والنظام الجديد - تم إرسال البرقية صباحا بإسمائهم وفي العصر أتاهم أحد زملائهم حاملا خبر عودة مايو فكان الخبر كالصاقعة عليهم وتسارعوا جرياً نحو موظف التلغراف الذي أفاد أنه قد ارسل التلغراف ... وسادت بينهم حالة من الهلع والخوف ... لا توصف ... وشئ من السخرية المغلفة بالخوف ... ومحاولة إرجاع التلغراف أو نفيه ... ومن هنا بدأ حادثة السجن المشهورة ... تمَّ سجنهم بسجن الأبيض وحينما أكتشف بأنهم لا ترتبطهم مع التنظيمات السياسية أي شعره ... تم نقلهم من المعتقل السياسي للسجن العادي ورفضوا من قبل المساجين واللذين لا يخلون من قتلة مدانون بالإعدام بإعتبارهم شيوعيين حسب فهم البعض ... ومن ثم اعيدوا للمعتقل السياسي مجدداً ... وأطلق صراحهم ... وقمة التسامح حينما تمَّ إعادتهم للعمل مجدداً ... (الرواية نقلاً عن قريب لنا كان مسجونا مع المجموعة عليه رحمة الله ...)
أخي د. أحمد القرشي ... كاكوم ورد إسمه بإسم عبد الله كاكوم في البرنامج لا أدري هل لخطأ غير مقصود ... وأتمنى من أمثاله أن يدون أفكاره عن الشعر الغنائي في السودان والحقيبة .... دائما ما تستوقفني ردوده الجميلة فهو رجل مترع بالوطنية وحب الوطن, وفكر وحدوي بارع يربط غناء الشمال بالوسط والغرب وفي النهاية يخرج لك شكل ومزيج واحد لهذا الشعب الفنان بحق ,ما اجمل عباراته الداله ... على توحدي أمتنا وما أجمل حديثه عن شعراء الزمن الغابر وما أجمل حفظه وإلقائه وقصائد إبن الفارض ... نسأل الله أن يحفظه لنا وأن لا يتجاهله الإعلام...
08-15-2010, 10:22 PM
أحمد طراوه
أحمد طراوه
تاريخ التسجيل: 12-25-2006
مجموع المشاركات: 4206
ممكونة يا سليمة الذوق، يعنى ود حامد المرتضى جندِك قائم مقام في فيلقو بتاع الغناء الجميل
.. هدية ليك يا ود القرشي يا مستودع الحكاوى الذى لا ينضب : دي صورة زولك بتاع اسطوانة جمرو حرقني (الفيرشن الاول القديم) برضو الفاضل احمد غنى : غبت عن إنساني . .. (كلمنا عنها يا بديع .. في دروب المضاهاة مع رائعة كرومة : زيدني في هجراني) و الله يا احمد القرشي، انت مفروض تكون قاعد في كرسي حسين خوجلى الوثير دا ؟ ! لكن زى ما كان بقول عبد الوهاب الجعفري في دار الرياضة : معليش ما بتدي حريفا .. !
.. متابع بإهتمام سجال ود القرشي مع الرطاني الهُمام (ممثل شعوب السودان القديمة الأصيلة) عزيزنا ابوبكر سيد احمد مبدئيا وإلى حين ميسرة بسجل و في تعميم و إختصار ارجو ان يكون غير مُخل 3 نقاط :
- في تقديري ان موازير ايقاعات الحقيبة ( نقرزان و تم تم ) تحمل السيرة الطويلة لتمازج الإنتاج الفني لإنسان السودان في جهات البلد الاربعة ايقاع التم تم تخصيصا هو ايقاع عابر للأعراق و للجغرافيا، و بمثل سبيكة لعناصر موزارية على إمتداد حزام السافنا ذو التنوع الإجتماعي - العرقي و المتحرك من غرب افريقيا إنتهاء بهضبة الحبشة : نلاحظ ذلك في تم تم علي فاركا تور المُجسد لموازير الفولانى و الهوسا ( مثال اغنية Bonde او رباط الزواج الوثيق، و نلاحظ ذلك ايضا في تم تم الإسكستا الاثيوبي و كلها ضروب تم تم متلاقية مع تم تم العزو هات و بت العقاب ، قصدي تم تم إسمعيل عبد المعين و حسن عطية الاول )
- الليرك الغنائي للحقيبة فيهو صراع طويل وجاد للسودنة : العبادي، ود الرضى و البنا و ابو صلاح ثم عتيق على نحو اوضح ، صارعوا بقوة للخروج من اسر بحو ر الخليل بن احمد الفراهيدي، شعراء الحقيبة سعوا بحس سوداني فطري لتاسيس تفعيلة و اوزان متسقة مع جماليات العربي الدراج لاهل السودان، و وصلوا حد الكتابة في البحر السادس عشر اللافراهيدي المعروف ببحر العجم ، بحر المُتدارك ) نلاحظ ذلك في شعر التدويرة و النثر و الخروج عن ضوابط الفراهيدي بالتمام و الكمال لدى عتيق ، نلاحظ ذلك في قوافي ابو صلاح لمن يقول في اغنية يا من فاح طيب رياهو مستخدما كلمة (اُحيلاهو) توصيف الشى الحلو او المساح لمن استبدل كلمة عيناك بكلمة ( هاروت سحرو ماخوذ من سحر عينانيك) حفاظا على قافية سودانية لا علاقة لها بضوابط الفراهيدي
- نعم ، مركز الإستعلاء العروبي - الإسلامي تعامل بتهميش قاصد لبقية ثقافات السودان القديمة الأصيلة، و وجد ضالته الغنائية - الفنية في الحقيبة رغم ان اغنية الحقيبة برزت كتطور إنساني تصالحي و عقلاني لقبائل و شعوب السودان في تجربة الإمتزاج و الصهر الامدرماني الاولى لكن لا ننسى و من منظور علمي، حقيقة ان اغنية الحقيبة برزت ومن منظور علم التاريخ : في سياق تطور حتمى فرضته الهيمنة الإقتصادية لمركز الوسط النيلي و لا ننسى ايضا ان اغنية الحقيبة كانت ضمن مشروع الكفاح القومي الواسع لاهل السودان، قصدي سودان ما بعد غردون و كتشنر
عميق تقديري لكل يعاسيب و زوار هذا البوست الغنائي الذى يماثل المصباح المنير
08-15-2010, 11:55 AM
Ahmed al Qurashi
Ahmed al Qurashi
تاريخ التسجيل: 08-28-2006
مجموع المشاركات: 4263
كان حديث الأستاذ عبدالرسول ممتعا فهو إنسان مرتب وعارف بأمور كردفان خاصة وأنه وُلد ونشأ وترعرع في بيئتها وباديتها ، أما قصة مصنع الألبان فهي قصة لطيفة أوردها الأستاذ الفاتح النور في احد أعداد جريدة كردفان وضمنها كتابه عن كردفان حيث قال ... عند افتتاح مصنع ألبان بابنوسه بدار المسيرية في عهد الرئيس عبود الذي أنشاه الاتحاد السوفيتي قال الرئيس عبود للناظر بابو نمر ( عليكم الاهتمام بالخبراء الروس لتستفيدوا منهم ، نحن في الخرطوم بعيدين للعناية بهم ونحن على ثقة بأنكم سوف تحسنون ضيافتهم ومعاملتهم ...الخ ) فكان رد الناظر بابو نمر ( يا فخامة الرئيس إطمئن الروس ديل إخوانا وأولاد عمنا ، ما نحن كلنا حُمر) .
ومن القصص التي حكاها الناظر بابو نمر وذكرها الأستاذ الفاتح النور في كتابه إن أحد المسيرية أصيب بمرض عضال لا شفاء منه إلا بكيه بالنار كما قال حكيم القرية وامتثل للأمر الواقع ، وجاء الفكي الحكيم بنار في منقد ووضع عليها أربع مراويد على أن يكوي بها المريض وعندما أصبحت حمراء وكأنها قطعة من جهنم ، وقف المريض وأتحزم وقال واصفا المراود ( دا طويل ودا تخين ودا رقيق ودا حرم ما إنكوي بيهو وذهب مسرعا ) .
وأيضا ذكر الأستاذ الفاتح النور في كتابه إن الناظر بابو نمر قال له ( سمعت القالو فيك فرد عليه الأستاذ الفاتح النور خير ماذا قالوا ؟ فقال الناظر سأل احدهم الآخر " انت الأفندي الماشي مع النظار دا منو " فأجابه الآخر " دا بتاع جريدة كردفان " فرد السائل " بسم الله ، الزول قايله مأمور سكر تاري وراقي ساكت " فقال له " لا الأستاذ رايح يكتب يطالب الحكومة بزيادة نصيبكم من السكر والشاي " فرد " هاي كان كده الزول فيه فايده أنا والله قايلوا هداي ساكت " .
.وأيضا من الحكاوي التي ذكرها الأستاذ الفاتح النور إنه عندما كان فضيلة الشيخ علي عبدالرحمن قاضيا شرعيا لغرب كردفان بالنهود ، التقى بالناظر بابو نمر فقال له " أنا ألاحظ بان عربكم يقيموا السوق الأسبوعي يوم الجمعة فينشغلوا بالتجارة ويتركوا صلاة الجمعة مع أنها أهم ما في يوم الجمعة وهو يوم عظيم خلق فيه ادم وتقوم الساعة فيه وبه ساعة لا يرد فها الدعاء ..الخ " فقال الناظر بابو " طيب يا مولانا ما تزورنا وتقول ليهم الكلام السمح دا " فوافق على الفور وحدد يوم الجمعة القادم . وفي سوق بابنوسه جمع الناظر العمد والمشائخ والتجار ليحدثهم مولانا عن فوائد يوم الجمعة وقد حدثهم مولانا حديثا قيما بذل جهدا عظيما فيه لإقناعهم بفوائد يوم الجمعة ، وختم حديثه " اتخذوا يوم الجمعة المبارك للعبادة واختاروا يوما آخر للسوق " وسكت ليعرف رأيهم وهو مقتنع تماما بأنه أقنعهم ، فقام العمدة بلال وهو فصيح اللسان فقال " والله يا مولانا كلامك حلو وما كنا نعرف يوم الجمعة سمح قدر دا .. اها ننحن حدقناها لسوقنا أنتو شوفوا ليكم يوم آخر للجمعة.
بمناسبة ناس العرضحالات يا أحمد ، صديقي الأمين المبارك حكى لي عن عرضحالجي قاعد تحت شجره وحوله بعض الزبائن وكان بينهم شخصا ملحاحا ، ِشبك ليك العرضحالجي أكتب لي ..أكتب لي ياخ ..أنا مستعجل أخَّرتني .. . العرضحالجي زهج منو وقال ليهو : يا زول أطلع من مكتبي ، زولك ضحك ووضع يده في جبهته كمن يتقي الشمس متلفتا وقال للزبائن : يا أخوانا ورُّوني الباب وين شان اطلع.
08-15-2010, 12:44 PM
محمد علي شقدي
محمد علي شقدي
تاريخ التسجيل: 04-25-2010
مجموع المشاركات: 2730
يا أحمد يا أخى طلعتوا من الموضوع شنو ؟ يا أخى عليك الله أطلع من الموضوع كل يوم كل يوم . أعمل زى حركات عادل أمام وأحكى لينا عنهم . أحكى عن عطر كردفان . أحكى عن تلك البلاد الرائعة . أحكى عن عدسها وثومها وبصلها وشعرها أحكى عن الناس فيها وعن تواشيح انهارها . .. ومتابعين
08-15-2010, 02:33 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
يا أحمد ، لا أدري لماذا لم يرد ذكر الشاعر الراحل عبدالله الكاظم في حلقة الأمس ، عبدالله قدم الكثير لفناني كردفان كعبدالقادر سالم (اللوري) وأغنية ( عيني عليك بارده) لإبراهيم موسى أبا وكتب لصديق عباس وكثير من أغاني ودباره (شقيش قول لي يامروح) و(ست الفريق اللهيجا سكر) وهما من أروع أغنياته. كنت أنتظر أن يتحدث ودباره عن الكاظم عوضا عن الحديث عن عمر البشير وكيف أرسل يوسف عبدالفتاح ليصعد المسرح ويأمره أن يغني ضابط السجن كما هي. ياخ الناس ديل حصل ليهم شنو؟
شكرا يا هيثم على الشغل النضيف .. تم دورو اتدور دي يا هيثم زاتا البيقولو عليهو السهل الممتنع، كلام بسيط أي زول يقول ممكن يكتبو وما يقدر.. كابلي أجاد أيضا أداء تلك الأغنية التي تقبل ، لعذوبتها، أن يؤدها فرانك سيناترا ويطرب الخواجات وينوِّر قلوبم. زي بدر التمام.
08-15-2010, 07:50 PM
Ahmed al Qurashi
Ahmed al Qurashi
تاريخ التسجيل: 08-28-2006
مجموع المشاركات: 4263
سلامات ورمضان كريم رجعت بي الذاكرة إلى سنوات خلت ونحن طلاب في مدرسة البترول الابتدائية ولا تسعفني الذاكرة إذ كُنا في الصف الثالث أو الرابع ولكنني أذكر أن الأستاذ عماد طيفور قد قام بتحفيظنا نشيد يناير للفنان عبدالرحمن عبدالله ولقد كنا نقوم بأداءه أثناء المسيرات التي كانت تقام في مدينة الأبيض بمناسبة الإستقلال وأعرف إن ذاكرتك أقوى مني عزيزي عثمان وتستطيع تذكُر أدق التفاصيل وها أنا أحاول كتابة بعض الأبيات من الماضي البعيد ... شوف ناسنا فرحانين .... بالعيد الجديد المويه ومزارع الغله ... في الوادي البعيد وأسال أهالي الحله ....بالعهد الجديد وأولادنا خشوا تحت السنطة..... نارية المسيد نقول الليله ...ونحن كل يوم ماشين للسحاب نريد ونهوى ....المحبه في القلوب بالكيته والرباب نحن الكنا ... بنزرع الزرع وبنحصد السراب ونأكل التبلدي.... تبلدي في الشجر ونشرب التراب نريد في ريده .... وليك يا وطنّا بالسيوف والحراب ديل ناسنا ناس الأرض والخلا العطشان وناس الفريق إلفي الحجر وعدت يا يناير وياما وياما تعود وتجدد
هذا النشيد لا أحفظه جيدا وكتبت هذه الأبيات من الذاكرة أتمنى من الأخ هيثم لبيب أن يسعفنا بهذا النشيد وأنا اعلم إن مكتبته العامرة مليئة بكل الكنوز السودانية
مودتي
08-15-2010, 09:55 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
سهرة أمدرمانية خالصة ، يستضيف البرنامج الفذ الشاعر الموهوب زميل الدراسة عبدالقادر الكتيابي ، الفاره أحمد الفرجوني احد الممسكين برسن الجمال من آل البنا، الرائع الأمين البنا الرقيق في سلامه وكلامه وغنائه.. يعني حسين مشى جنوبا جاب أولاد الأهلية وعرج من ودنوباوي شرقا إلى أبروف حيث تلك العائلة الموهوبة .. سدنة حقيبة والفن من زمن عمر وعبدالله البنا. عليك الله يا أحمد أسمع ( حِن يا قمر) دي بسووها كيف. أرجوك يا صاحب العياده قليل مراهم من العياده.. حن يا قمر.
أستاذنا محمد المرتضى ... في أغاني بتخليك تتابعها زي الأفلام بتكون بتتخيل في الكلام ده قبل ماتفهم الجاييك وتم دورو أتدور من ضمنها ماتقدر تستمع بيها إلا تسمعها عشرة مرات علشان تفههم الحاصل فيها شنو .. ياخي ويقولوا ليك الحقيبة مصنوعة !!! .. ده كلام عجيب ..
ود المسالمة ياصديقي لقيتك خطير لكن في جدعاتك دي ذكرتني ناس أبو التوم يديك العافية ياخي ..
شكرا يا طراوه، والله شوفتك ترد الروح، تفتقدك مسقط في رمضان والنادي مررت به اليوم يسأل عنك، السهره الليله مهرجان للجمال، صاحبك الكتيابي وأولاد البنا جيرانك الحيطه بالحيطه، يعني كان مفروض تكون قاعد إنت في كرسي حسين خوجلي،
ممكونه يا أحمد في الأصل كادر سري في جماعة النقرزان ولاحقا تم ترقيتها إلى أدميرال في بحرية ابوصلاح اسطول ودالرضي السادس. الزوله دي بس ساكته،
بلاَّل زورني مره.
08-15-2010, 11:12 PM
Ahmed al Qurashi
Ahmed al Qurashi
تاريخ التسجيل: 08-28-2006
مجموع المشاركات: 4263
يا قرشي، الفرجوني غنى في الطيف أو في الصحيان بمزاجو بغير الترتيب الذي وردت به أبيات الغنيه ولا أدري هل الأمر كان مقصودا أم مجرد سهو أم (أنا الماجيت). يؤسفني إنقطاع التيار في (لوى) مما حال دون مشاهدتك طرب اليوم وأشعار الكتيابي القيافه، على أية حال أتمنى أن تشاهد الإعاده وتفيدنا في مسألة في الطيف دي.
08-16-2010, 09:08 AM
mohmmed said ahmed
mohmmed said ahmed
تاريخ التسجيل: 10-25-2002
مجموع المشاركات: 8822
الأخ عثمان محمدين، شكرا على التفصيل حول (سبب نزول) أغنية ضابط السجن، قيل لنا أن إنقلاب هاشم العطا تسبب في مصائب كثيرة سببها العجلة التي صاحبت إعلان التأييد لداعي الملق في أكثر الأحيان أو لإظهار الولاء اليساري عن صدق أو نكاية بنظام مايو، ما يهم هنا أن رواية قريبك - عليه الرحمة - هي الأقرب للصحة من غيرها. ياخ ناس الخيال الخصب الواحد يقول ليك والله البت كانت بتمشي زي ضابط السجن أو صدرها عالي زي شباك السجن أو ..إلخ ، لِم لَم يشببها بضابط آخر، إن شاء الله ضابط مظلات ، ياخ قول ضابط صيد أو ضابط إيقاع.. غايتو.. تسلم.
08-16-2010, 10:42 AM
Ahmed al Qurashi
Ahmed al Qurashi
تاريخ التسجيل: 08-28-2006
مجموع المشاركات: 4263
الأخ العزيز..شيقا رمضان كريم و كل عام و انتم بخير.
متين فطيتك يا شيخنا, انا اقدر ؟؟ ياخي من اول حلقة انا متذكراك و فاقداك.. من شفت الضيف اسمو كاكوم قلت يا ربي دا زاتو زولنا الماشين عليهو ؟ يلحقنا و يفزعنا ! :)
08-16-2010, 01:20 PM
Hussein Mallasi
Hussein Mallasi
تاريخ التسجيل: 09-28-2003
مجموع المشاركات: 26230
الكتيابي و مسادير الغربة و رزيم صدرو الاعلى من رزيم الطيارة, دوبيت الفرجوني و رمياته المميزة , الامين البنا و زهرة الروض, حن يا قمر , بلال تزورني مرة....و الهلال هلٌ .
سهرة الامس كانت كما قال حسين خوجلي , من القلب و إلى القلب .
08-16-2010, 02:16 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
لملم حر ندامتو .. وفات قطع شامة هواك من قلبو إلاّ هواك نبت تانى وعلى بابك وقف تانى
خمج، تقولي لي كريستيان برنارد ومجدي يعقوب!! يا سلام على كلامك السمح وأشعار كتيابي الوسيمة، ربما لاتصدقين ، يا أدميرال، أن عبدالقادر كان يقرظ الشعر وهو بعد تلميذ يافع في الثانية عشر من العمر وكان يلهب أكفنا البضة ونحن نستحسن ما يلقيه على مسامعنا – حينما كانت لنا مسامع – ونستزيده في الجمعية الأدبية بالمدرسة الأهلية الثانوية العامة بأمدرمان ، كان مجيدا في إلقاء قصائده وأشعار الشعراء العماليق، وكان الجميع يعلم يقينا أنه سيكون عبدالقادر الكتيابي، كيف لا وهو من ولد وتربى في أسرة كانت كبني شيبة التي توارثت إمساك مفاتيح الكعبة وهم تورثوا الأدب. يغشاك سلامي يا عزيزنا كتيابي.
والتي تحدث عنها الأستاذ حسين خوجلي ولم يجد فنانا يحفظها
لك الرحمة استاذنا بادي محمد الطيب
يا ليل السعادة يا نور البصائر جوك جو معطر بدرك ليله ناير يا ليل جات نسايمك حاملات البشاير اصدر لينا طيبن بالأفراح نشاير الكون بالتهاني يتبادل الاشاير ما بين القبائل وأفراد العشاير الغيث بقدومك يا ليل جانا زاير زار الساحة غيمك وأتقطع جزاير الشرد منامي وخلا فكرى حاير يا ليل ديل نجومك أم وز في غداير هاك إعلان سرورنا املابه الدواير بدل لي حرورنا وأيامنا الجواير يا ليل زى نسايمك ناسك ناس اخاير هم للدنيا زينه وللحوبات ذخاير يا ليل لنداك بأرواحنا بنبادر جيلك زيه مافى وحورك حسنه نادر قادل بين عفافه تالى كونه صادر من اطهر سلاله ومن اشرف مصادر يا ليل لي مثالك ترتاح الخواطر كونه سماك صافى وكونه شذاك عاطر طرفي أسباب هواه سيل دمعه قاطر يا ليل كونه سرح ما بين جيد وفاطر يا زهر الحديقة الفى أغصانه زاهر لونك من جماله يخلى الزول يظاهر أما المتلى هايم فيك يا ليل مساهر عارف أسباب هلاكه وبالسر ما مجاهر
الأغنية
برنامج جميل والمداخلات أجمل
مودتي
08-16-2010, 10:29 PM
mamkouna
mamkouna
تاريخ التسجيل: 12-05-2004
مجموع المشاركات: 2246
FIAT قسما عظماً، لو سمعت الشركة الإيطالية فابريكا إيتاليانا أوتومبيلي تورينو اللحو يؤدي السايق الفيات ولو أنها عرفت أن العبادي هو الذي قدم تلك السياره للشعب السوداني في عمل فني يضاهي أعتى شركات الإعلان لمنحته نصف أسهمها، بالدَرب التحت.
08-17-2010, 00:01 AM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
Quote: هاك إعلان سرورنا املابه الدواير بدل لي حرورنا وأيامنا الجواير يا ليل زى نسايمك ناسك ناس اخاير هم للدنيا زينه وللحوبات ذخاير
شكرا يا عمر على ما أتحفتنا به من عمل نضيف للشيخ طه حبيبنا الراحل، زي ما قال أخونا خدر ، بادي دا ما بيغني ، دا بيقوقي،
شركة الفولوكسواجن زمان كان عندها دعايه في إحدى قنوات التلفزه الأوروبية، يجيبوا صورة سيارة الفولوكس ، بعدين يكتبوا تحتها : هذه ليست سيارة ، ثم يكتبوا : إنها فولوكسواجن.
إنه ليس مطربا ، إنه بادي محمد الطيب.
مودتي.
08-17-2010, 04:24 AM
Ahmed al Qurashi
Ahmed al Qurashi
تاريخ التسجيل: 08-28-2006
مجموع المشاركات: 4263
أغنية سايق الفيات للشيخ إبراهيم العبادى لها قصة بروايات مختلفة حيث أورد الأستاذ مبارك المغربي في سفره القيم رواد شعراء الأغنية السودانية إن سرور كان سائقا ومعه أمين نابرى وزين العابدين كوكو وقد تحركوا من سنار إلى سنجة في عربة فيات خاصة عن طريق الرماش ....أما محمد الحسن الجقرفى كتابه روائع حقيبة امدرمان فلقد ذكر أن سرور خرج مع الخواجة مستر برسى لورين المندوب السامي في مصر ا لرحلة صيد في كنفوى من سيارات شركة الفيات العاملة في السودان في ذلك الوقت إلى سنجة ...وتخلف منهم سرور وانضم إلى العبادى والأمين برهان في ضيافة زين العابدين كوكو نائب المأمور و انضم لهم محمد البنا وأمين نابرى وكان سايق الفيات سرور...بينما ذكر معاوية حسن يسن في كتابه الغناء والموسيقى في السودان نفس قصة محمد الحسن الجقر مع إضافة أن العبادى كان يعمل في حسابات المقاولات المرتبطة بأشغال خزان مكوار (سنار) وحلّ عليه الأمين برهان ضيفا فتحركوا جميعا إلى سنجة مع سرور...أما مبارك حسن بركات فلقد ذكر لبرنامج ظلال التلفزيوني إن سرور كان سائقا بشركة الفيات وطلب منه أن يقوم برحلة من سنار إلى سنجة لعمل دعاية للشركة فاصطحب معه العبادى والتقيا في سنجة بنائبي المأمور زين العابدين كوكو وأمين نابرى وواصلا الطريق إلى سنار....والروايات لاتختلف عن بعضها كثيرا ومما لاشك فيه إن العبادى عمل بخزان مكوار والتقى بالشيخ محمد ودالرضى هناك الذي قال قصيدته المشهورة متى مزاري أوفى نذارى واجف هذا البلد المصيف فشطرها العبادى الذي انتابه نفس الإحساس في سنار..المهم ان القصيدة قيلت بين سنار وسنجة
08-17-2010, 04:35 AM
Ahmed al Qurashi
Ahmed al Qurashi
تاريخ التسجيل: 08-28-2006
مجموع المشاركات: 4263
في حلقة أول الأمس أعجبني الفرجوني وهو يؤدي أغنية يا حبيب لا تهجرني وهي من الأغاني الصعبة والغير مطروقة وكان أداء الكورس متناسقا وقويا مما أعطى الأغنية بعدا تطريبيا آخر، والأغنية من كلمات الشاعر عمر البنا ولقد سجلها للإذاعة الثنائي عطا كوكو ومحمود عبدالكريم (أولاد الموردة)، كما سجلها الفنان عوض الكريم عبد الله ، ولقد كانت معظم أغاني الحلقة من كلمات عمر البنا مثل أغنية زهرة الروض الظليل والتي تغنى بها الفنان الأمين البنا ولقد لحنها وسجلها على الأسطوانات الفنان عبدالكريم عبد الله مختار الشهير بكرومه .وكذلك أغنية في الطيف أو في الصحيان وأغنية الهلال هلّ وهي من أغاني الستينات حيث ألفها الشاعر عمر البنا عند زيارة الفنانة أم كلثوم إلى السودان بعد حرب حزيران 1967 ولقد سجلها للإذاعة أولاد شمبات ، وهنالك أكثر من أغنية ذكر فيها اسم فنانة مصرية أو قيلت فيها مثل أغنية يا حمامه مع السلامة للشاعر عبدالرحمن الريح والتي سجلها للإذاعة أولاد المأمون حيث قال الشاعر عبدالرحمن الريح انه قالها في الممثلة فاتن حمامه عندما رآها في احد الأفلام وكانت صغيرة في السن فأعجبته فقال فيها هذه القصيدة وفيها يقول .. الجمال يا حمامه فاتن فيه ألوان من المفاتن كل من يعشق المحاسن قلّ أن يوجد السلامة أما الجاغريو فلقد قارن رقص معشوقته بالفنانة تحية كاريوكا وذكر إنها تفوقت عليها وذلك في أغنية العوده العوده تاني حيث قال... يا قلبي العيوكا كتلوكا وحيوكا الشايف رقيصك إيه يعني كاريوكا أما ملكة الجمال البريطانية ماتريد فلقد ذكرها سيد عبدالعزيز في مطلع أغنية سيدة وجمالها فريد ... سيدة وجمالها فريد ... خلقوها زي ماتريد في خدودها وضعوا الريد
Quote: ولقد كانت معظم أغاني الحلقة من كلمات عمر البنا مثل أغنية زهرة الروض الظليل والتي تغنى بها الفنان الأمين البنا ولقد لحنها وسجلها على الأسطوانات الفنان عبدالكريم عبد الله مختار الشهير بكرومه .وكذلك أغنية في الطيف أو في الصحيان وأغنية الهلال هلّ وهي من أغاني الستينات حيث ألفها الشاعر عمر البنا عند زيارة الفنانة أم كلثوم إلى السودان بعد حرب أكتوبر 1967
يا أحمد أنا ملاحظ إنو أولاد البنا دايما يميلون لتأدية أغنيات عمر البنا وربما يعزى ذلك لمقولة زيتنا في بيتنا والتي يتفرع عنها تفادي صداع الملكية الفكرية والحقوق المجاوره وما إلى ذلك ، أو ربما تبني مقولة الزيت كان ما حاق ناس البيت حِرِم على الجيران.
حرب 1967 كانت في يونيو وسميت حرب الأيام الستة لأنها انتهت عمليا في ستة ايام وأما حرب أكتوبر أو حرب العاشر من رمضان فكانت في 1973 وطبعا يا أحمد الحربين ديل ما حضرناهم ، دا كلو سمعناه من الطيف والصحيان.
08-17-2010, 01:27 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
السمحه نوارة فريقنا يا العسل يا النشَّفتَ ريقنا، القوام من طبعو مايل والصدير رمانو شايل
ياخ كنت راجيهو يغنيها، لأنها تذكرنا بزمن كان كل مافيهو سمح ، حتى رطل السكر والصبحيه ومقاعد البصات الحادة الأطراف المضادة للملابس.
اللحو ، رغم أننا نعشق رمياتو وأغاني الحماسة التي تخصص في أدائها لكنه أحيانا يلغي كل ذلك ويغني لناس لاعلاقة لهم بالفن ، ناس كده ما عندهم غير الخج والرقص الأشتر والضحك الأصفر.
ممكونه معليش على التخريمات مش البوست دا حقنا!!.
08-17-2010, 03:09 PM
Ahmed al Qurashi
Ahmed al Qurashi
تاريخ التسجيل: 08-28-2006
مجموع المشاركات: 4263
Quote: حرب 1967 كانت في يونيو وسميت حرب الأيام الستة لأنها انتهت عمليا في ستة ايام وأما حرب أكتوبر أو حرب العاشر من رمضان فكانت في 1973 وطبعا يا أحمد الحربين ديل ما حضرناهم
لان الذاكرة حاولت ان تنسى تلك النكسة
ونتذكر فقط العبور في اكتوبر
فأختلطت التواريخ عندي ،
شهر من هنا وسنة من هناك
ربما للتخفيف من تلك المراره
سأعدل ان شاء الله
08-17-2010, 04:04 PM
الطيب شيقوق
الطيب شيقوق
تاريخ التسجيل: 01-31-2005
مجموع المشاركات: 28804
Quote: متين فطيتك يا شيخنا, انا اقدر ؟؟ ياخي من اول حلقة انا متذكراك و فاقداك..
ههههههههههها لا لا عفوا انا ما بقصد فطتي انا- انا بقصد الفط الهولوكوستي المافيهو فرز بين ناس الصعيد وناس بارا وناس بارا واولاد المسالمة .
Quote: من شفت الضيف اسمو كاكوم قلت يا ربي دا زاتو زولنا الماشين عليهو ؟ يلحقنا و يفزعنا ! :)
الايام دي اخوك قادل ومشنق الطاقية بعد ان اطمأن على رحيل العم قوني الى الرفيق الاعلى وترك ام عبد الله تتلفت زى اليتيمة .ملاحظ الايام دي في حراك نسوي على غير العادة يبدو في مشوارات لاختيار الخليفة المناسب للعم قوني .
08-17-2010, 07:40 PM
Ahmed al Qurashi
Ahmed al Qurashi
تاريخ التسجيل: 08-28-2006
مجموع المشاركات: 4263
اذكر واننا طلبة في جامعة الخرطوم كُنا في قافلة أقامتها رابطة طلاب الطب إلى الدمازين وكان ضمن القافلة طباخ يعمل بسفرة حسيب اسمه عم عوض وفي رحلة كانت ضمن برنامج القافلة تغنى بأغنية السمحة نوارة فربقنا فمنذ ذلك الحين أعجبتني هذه الأغنية وكل مرة أقابله فيها في سفرة داخلية حسيب أطلب منه هذه الأغنية وأكثر ما شدني إليها طرافة كلماتها وبساطتها خاصة المقطع الذي يقول ...
انت يا دهب الخزائن قادر الله الليكي صاين (تشبه الموز في الجناين) قصو دربي لقيهو باين أنا ما سرقت أنا جيت أعاين وأظن انه قد قبض عليه متلبسا يتسور الجدار ليرى معشوقته وهنا أتذكر أبيات الشاعر إبراهيم العبادي في أغنية تذكاره احرمني الهجود حيث يقول.... قالت ليهن من دا الجسور .... وسط البلد علنا يسور راكب على جنحات نسور ... كيف شافنا بينا وبينو سور ****** دائما تتطوف بحينا .... والفرصة يوت تتحينا يزداد غباءك حي أنا .... إيه البدر لمحينا والفرق هنا إن العبادي كانا يتسور نهارا ودائما يطوف بحي ملهمته ولكن شاعر أغنية السمحه نوارة فريقنا كان يأتي خلسة ومتخفيا فتم اتهامه بالسرقة فنفاها عن نفسه معترفا بجرمه وهو رؤية المحبوبه ، نص الأغنية كتبته من الذاكرة . لكني أسال هل هنالك علاقة بين لحن هذه الأغنية وأغنية قلبي الحزين لعثمان حسين ؟
السمحه يا نوارة فريقنا يا العسل يا النشفتي ريقنا ******* القوام من طبعو مائل والصدير رمانو شايل الذمام غير رشمه خايل والعسل من فمو سايل ******** زي الهلال حاجبك مدور قادر الله الليكي صور دا جمال طبيعي والله ما مزور بيك فريقنا يا السيدة نور ******* انت يا دهب الخزائن قادر الله الليكي صاين (تشبه الموز في الجناين) قصو دربي لقيهو باين أنا ما سرقت أنا جيت أعاين
ما للهوى بلد إفادة نهائية من فيصل عبداللطيف الممعن في القيافة المتطرف في تطريبه المتقن مولانا الطيب محمد سعيد العباسي..
ألهذا فالنهد مضطرب؟ ولهذا العيــــون تتقـــــــد؟ ولماذا هذا الصليب يا ترى بين نهديـــك راح يرتعــــد؟ أو غيرى هواك ينهبــــــــه وفؤادى لديك مضطهــد؟ لى كغيرى يا زهرتى أمل وفؤاد يهوى ولى كبــــــــــد
أسئلة مشروعة تنتظر إجابات قاتلة وتقرير صادر من الحجاب الحاجز.. يا اخوانا كلما نقول الفاونديشن ووصلنا العين نلقا الغريق لسا..
08-17-2010, 10:05 PM
Ahmed al Qurashi
Ahmed al Qurashi
تاريخ التسجيل: 08-28-2006
مجموع المشاركات: 4263
أغنية ذات الفراء قالها الشاعر الطيب محمد سعيد العباسي في مصر عندما قابل إحدى الجميلات في الجيزة بمصر تتهادى وتتمايل وعلى كتفها فراء ابيض وعلى صدرها صليب المسيح فأرسل الشاعر لها قبلة مع موجات الهواء فثارت وغضبت وامتزج الجمال بالغضب فكانت كما قال حميدة أبو عشر ( غضبك جميل زى بسمتك ) أو كما قال بعضهم (تغضبون فتزدادون جمالا ) ولكن هذه الجميلة ظهرت عليها العنصرية فقالت له دون إمعان لما تقول ( اخرس يا اسود يا بربري مد رجلك على قد لحافك ) فكانت قصيدة ذات الفراء ردا عليها....
ذات الفراء للشاعر / الطيب محمد سعيد العباسي لحن وغناء / الطيب عبدالله
يا فتاتي ... ما للهَوى بلد..... كل قّلبٍ في الحُب يبترد وأنَا مَا خُلِقتَ فـي وَطَـنٍ...... الهَوى في حِمَاهُ مُضطهَـدُ فلـمَـاذا أرَاكِ ثَـائِــرةً .........وَعَلاَمَ السِّبَـابُ يضطـرِدُ والفراءُ الثميـن منتفـضٌ....... كفؤادٍ يشقى بـه الجَسَـدُ ألأنَّ السَّـوَاد يغْمُـرنـي.......... ليس لي فيه يا فتـاةُ يـدُ أغريبٌ؟ .. أن تعْلَمي فأنا....... لي دِيَارٌ فيحاء ولـي بلـدُ كَمْ تَغنيـتُ بَيـنَ أرْبُعِـها........ لِحبيبٍ فـي ثغـرِه رَغَـدُ وَلكـمْ زَارنـي وطَوَّقنـي........... بذراعيـهِ فَاتـنٌ غَــرِدُ أيَّ ذَنبِ جَنيـتُ فانْدَلَعـت ...... ثورة مِنك خَانهـا الجَلَـدُ أو ذنبي في قبلةٍ خطَـرت........ مَع نَسيـمٍ إليـك يَتئـدُ؟ ألِهذا فالنهْـدُ مُضَّطـربٌ؟........ولهـذا العيـون تَتـقِـدُ؟ ولماذا هذا الصليبُ تُـرَى....... بينَ نهْدَيـك راح يرْتَعِـدُ؟ خبريني ذات الفراء فقـد ........جَفَّ جناني وأحْدَبَ الرَّشَدُ أيَمُّـر النُميـر بـي ألِقـاً .............وأنـا ظـامـئٌ ولا أرِدُ؟ أو غيري هـواكِ ينهبُـه ........وفؤادي لدَيْـكِ مُضطهـد؟ أليَّ الهَجْر والقِلـى أبـداً....... ولغيري الشفاهُ والجسَـدُ؟ لي كغيري يا زهرتي أمَـلٌ....... فؤاد يهوى ولـي كَبِـدُ لي بدنيايَ مثلمـا لهمـو....... لِي مَاضٍ وَحَاضِـرٌ وغَـدُ فالوداعَ الـوداعَ قاتلتـي........ هَا أنا عن حِمـاكِ أبتعـدُ سَوفَ تنأى خُطايَ عن بَلَدٍ...... حَجَرُ قلبُ حوائـه صَلِـدُ وسَأطوي الجراحَ فِي كبدي....... غَائراتٍ مَـا لهـا عَـدَدُ
08-17-2010, 10:22 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
والله يا أحمد، فيصل مجوِّد لدرجة بعيدة، زول ما بيحب الكلفتة أبدا ولعلك شاهد على ذلك حين إقامته القصيرة هنا، قال للسني أبوالعزائم والله لو نعيد البروفه ألف مره ما بخلي الحته دي، برضو من قلة من البشر التي ألغت مقولة (سمح الغنا في خشم سيدو).. يا سلام يا فيصل يا مهذب يا راقي ، زي الطيب عبدالله واحد، بس إنشالله يغني (لي في المسالمه غزال) رغم أن المقاعد محجوزة so far للطيب عبدالله. الله يديك العافيه يا فيصل.
08-17-2010, 10:25 PM
Ahmed al Qurashi
Ahmed al Qurashi
تاريخ التسجيل: 08-28-2006
مجموع المشاركات: 4263
إنت يا الأبيض ضميرك صافي زي قلب الرضيع.. يعني ركبنا آلة الزمن وعدنا إلى عهد كان وكنا فيه أجمل ما نكون.. زمن كنا (لاشايلين هم لا عارفين بُكره الجايينا)..
كنت شايلك في عيوني باني ليك أرفع مكانه، بس لقيتك إنت جائر تظلم الحب بالمهانه، اللهم تقبل صيامنا.. قولوا آمين.
08-17-2010, 11:06 PM
Ahmed al Qurashi
Ahmed al Qurashi
تاريخ التسجيل: 08-28-2006
مجموع المشاركات: 4263
قالوا لي أنساه .. وامسح من خيالك ذكرياتو وانسى كل الماضي .. وابعد عن طريقو وعن حياتو فات وخلاك للزمن ضاعت آمالك سُداً ليه تحن من تاني . . ليه تفكر في صلاتو ******* السنين العشت فيها معاك هنايا أقوى من قول العوازل .. واسمى من كلمة وشاية لو خلاص قلبك نسى الأيام معايا برضي راضي .. في الغرام كم من ضحايا بس تأكد يا حبيبي .. إنو حبك في دمايا ****** بالأمل صبرت قلبي .. وعشت في دنيا الأماني أهدهد الشوق بين ضلوعي .. واترجم الآلام أغاني أروي للناس سر عذابي .. واحكي ليهم ما شجاني لا نفع دمعي السكبتو .. ولا شفع عندك حناني
****** الغريب عن وطنو مهما طال غيابو مصيرو يرجع تاني لي أهلو وصحابو ينسى آلامو وشجونو .. ينسى حرمانو وعذابو إلا قلبي في هواك طال اغترابو
08-17-2010, 11:11 PM
الطيب شيقوق
الطيب شيقوق
تاريخ التسجيل: 01-31-2005
مجموع المشاركات: 28804
على ضفاف النهر الخالد اليوم , تجربة الفنان الطيب عبدالله شاعر الأيدي و العيون , تاج السر عباس شاعر ليل الفرح , الدكتور عبدالله محمد سليمان بالاضافة للمطرب ,المطرب جد جد , فيصل الصحافة
ود حامد وود القرشي امنعو الكلام !
08-17-2010, 11:23 PM
mamkouna
mamkouna
تاريخ التسجيل: 12-05-2004
مجموع المشاركات: 2246
من اجمل احداث السهرة , قراءة د. عبدالله سليمان للنص الكااااامل لقصيدته ..
"عود لينا يا ليل الفرح , داوي القليب الانجرح خليهو يفرح مرة يوم , طول عمرو ناسيهو الفرح"
ذكر د. عبدالله - بصراحة متناهية احترمتها فيه- انه لا يذكر اذا كان اهدى الطيب عبدالله النص كاملاً و قام الطيب بغناء النصف الاول منه.. ام ...كتب هو ما تبقى من القصيدة في الاعوام اللاحقة لظهور الاغنية.
في كلا الاحوال , القصيدة عميقة و حنيييييييييييييينة !
08-17-2010, 11:16 PM
Kabar
Kabar
تاريخ التسجيل: 11-26-2002
مجموع المشاركات: 18537
غايتو يا ممكونة حالتك تحنن..زي الزول الشال ليهو قضية وداها للمحاميين..و في المحكمة يعاين ليهم..و هو مشدوه..!! كتر خيرك يا صديقة..و تحياتنا لكل الأصدقاء الجهابذة هنا.. نقول منو و نخلي منو..!
يا احمد القرشي قطعت مصارينا بحكاوي الناضر دي..!
من حلقة الليلة..غايتو مسخت علينا الغربة ذاتو ياخي..!
البركة الواحد شاف فيصل الصحافة (اخر محطة كانت مسكين انا..و يا ود القرشي احكي للأمة دي مسكين انا كانت متين ..بس ما تكتب تواريخ.. نحن لسع في السوق يا عم)..!
و برضك فرصة نشوف الأستاذ تاج السر عباس..صاحب (قبال ميعادنا بساعتين)..و صدقني اتعودنا سمحة تب يا استاذنا.. لكن الصادق الياس برضك خطر..و العتب على حسين خوجلي الخطاك في الورطة اللذيذة دي..! التحية لدكتور عبد الله محمد سليمان..و بنقول ليه ..كتار يا صديقنا دايرين يغيرو فكرة الحزن و البشتنة في الغنا السوداني .. لكن الله غالب..!
Quote: حسين خوجلي عادة لا أحب برامجه.. تحسه يستضيف الضيوف ويحصرهم في الزاوية ليعضد وجهة نظره الخاصه !! ، ثم أنه يتكلم أكثر من ضيوفه!! السودان بلد عجيب.. أتاح لبعضهم كل شيء وحرم بعضهم من كل شيء !!
حرام يا مدثر اخوي حسين خوجلي دا رغم اختلافنا الفكري معه غير انه متميز عن غيره من مقدمي البرامج بالحضور الرائع والحوار الممتع بما يتميز به من عمق ثقافي وتداخل هادئي يمتعك اكثر من مطربي برامجه باستثناء خالد عبد اللطيف الرجل الظاهرة بحق وحقيقة .
لك منى اطيب الاماني
08-17-2010, 11:46 PM
mamkouna
mamkouna
تاريخ التسجيل: 12-05-2004
مجموع المشاركات: 2246
Quote: برضك فرصة نشوف الأستاذ تاج السر عباس..صاحب (قبال ميعادنا بساعتين)..
أهلاً بيك يا كبر , و رمضانك كريم كلامك صحيح , سهرة اليوم مسخت علينا الغربة , مع إني في بطن بيتي و في بطن بلدي لكن الحبايب المتغربين أكتر من الهمٌ على القلب ........ أعجبت للغاية بالشاعر تاج السر عباس عندما تمت إستضافته مع أحمد الصادق و حسين الصادق و هم من نجوم الغناء الجدد . أحد الأخوين عنده أغنية إسمها ( ما لقيتي غير صاحبي الوحيد؟ ).. تحكي الأغنية عن فتاة تربطها علاقة عاطفية مع صديقين في نفس الوقت , لكن الاصدقاء يختارو في النهاية صداقتهم و يتخلو عن الزولة التعددية دي ! الأغنية أثارت إستنكار ضيوف السهرة , لكن تاج السر عباس حكى للشابين أن أغنيته ( قبال ميعادنا بساعتين ) لاقت نفس الهجوم وقتها , لكنها الآن من أشهر الأغاني السودانية..
كل زمان بما فيه ينضح ( دا رأيي أنا ) !
08-17-2010, 11:19 PM
مدثر محمد عمر
مدثر محمد عمر
تاريخ التسجيل: 03-11-2008
مجموع المشاركات: 1434
حسين خوجلي عادة لا أحب برامجه.. تحسه يستضيف الضيوف ويحصرهم في الزاوية ليعضد وجهة نظره الخاصه !! ، ثم أنه يتكلم أكثر من ضيوفه!! السودان بلد عجيب.. أتاح لبعضهم كل شيء وحرم بعضهم من كل شيء !!
08-17-2010, 11:36 PM
Ahmed al Qurashi
Ahmed al Qurashi
تاريخ التسجيل: 08-28-2006
مجموع المشاركات: 4263
يا مدثر محمد عمر رمصان كريم ياخي حسين خوجلي ده اعتبره اية حسين تاني : حسين بازرعة حسين عبد الحفيط حسين التوم بس ماتبيخ السهرة ?نو فيصل الصحافة ده بنرجاه متين يطل فى التلفزيون عشان نستمتع بصوته الجميل وتطريبه. لوسمحت من غير مطرود . مودتي معاذ السر
08-18-2010, 00:16 AM
الطيب شيقوق
الطيب شيقوق
تاريخ التسجيل: 01-31-2005
مجموع المشاركات: 28804
Quote: عليك الله يا الطيب شيقوق راجع البوست دا من اوله لاخره
شوف ممكونه دي عبرتنا ولا ردت علينا
ولا قالت لينا كتر خيركم حارسين لي بوستي
يا احمد اخوي التعبير بالصمت والفطان - إن شئت - يكون احيانا ابلغ من الافصاح اللفظي . ولعل هذه واحدة من فنون ال communication التي عبر عنها احد عمالقة القضاة في واحدة من حيثياته بالقول I do appreciate the degnified silence of this witness
Quote: بالمناسبة كيف اخبارك وصحتك
والله تمام والحمد لله - والايام دي عدت من الريف الى الخرطوم الموعودة اليوم وغدا وبعد غد بامطار وفيضانات ربما يتجاوز منسوبها تلك التي اصابت الخرطوم عام 88 حسب تنبؤات هيئة الارصاد الجوي .
يا سلاااااااام لا عجب أن تكون أول قدلة لي بعد الإفراج ... حافي وحالق وحاسر الرأس ... في هذا البوست الجميل التحية للباشمهندس بكري وللحبيب ود المرتضى والتحية لأهل البوست الكرام ورمضان كريم وربنا يتقبل منكم ومنا يا سلااام تاني والله
08-18-2010, 08:30 AM
mohmmed said ahmed
mohmmed said ahmed
تاريخ التسجيل: 10-25-2002
مجموع المشاركات: 8822
الصديق طراوة لاتفاقى مع ما يطرحه الباشمهندس ابوبكر اود التعليق على مداخلتك كون ايقاعات الحقيبة ثمرة لتمازج لمختلف الثقافات والايقاعات الافريقية دى شى جيد غناء الحقيبة اذا ما ساعد فى خلق تمازج وجدانى هذا مما يصب فى اتجاه تصالحى اختلافنا فى ان اغنية الحقيبة اخذت حيز كبير جدا على حساب بقية انواع الغناء السودانى الابداع الغنائى لاى مجتمع من المجتمعات رهين بالمتغيرات الثقافية والاجتماعية والاقتصادية غناء الحقيبة نبع وسط عادات وعلاقات اجتماعية يتم فيها ممارسة الكبت والحجاب على المراة الرجل لا يشاهد المراة ولا يختلط معها الشعراء فصحاء وخطباء المجتع يحاولون اقتناص البرهة القليلة التى نادرا ما تتاح لهم لمعاينة جسد المراة يبدعون فى محاولة مستحيلة لتسكين المتحرك وينحتون صورة متخيلة تداعب الخيال لامراة بمقايس جمالية مطلوبة الديس والردف والنهد والليونة والانفداعة والضمير
فى مجتمعات سودانية اخرى عديدة وكبيرة وغالبة المراة متاحة ومتواجدة ومشاركة بفتنتها وقوامها وجمالها العادات الاجتماعية مختلفة التقاليد الثقافية مختلفة المزاج مختلف النظرة للمراة مختلفة كيف اذا نفترض ان غناء الحقيبة معبر عن كل هذه التبينات والاختلافات
08-18-2010, 08:12 AM
عبدالحفيظ حسن
عبدالحفيظ حسن
تاريخ التسجيل: 05-05-2009
مجموع المشاركات: 1436
لا أملك إلاّ أن أقف خاشعًا متبتلا ...فى محراب هذا الجمال... مشدوهاً و مندهشاً ومبهورا...أمام كل هذه الحلاوة والطلاوة.. من بدائع الكلام...وروائع المعانى و الأنغام...ممن امتلكوا زمام البلاغة وجوامع الكلم....من شعراء (الحقيبة الخالدة).. وود المرتضى...وودالقرشى...وأحمد طراوة....وكل المتداخلين.. إبهاراً وتطريباً....بحروفهم الأنيقة...وكلماتهم الرشيقة!!!! و ربة الدار....(ممكونة)...المتمكنة من البلاغة بمقدار!!!!
و يا ليل أبقالى شاهد !!!!!
.ً
08-18-2010, 09:27 AM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
Quote: ولعل هذه واحدة من فنون ال communication التي عبر عنها احد عمالقة القضاة في واحدة من حيثياته بالقول I do appreciate the degnified silence of this witness
[green]خمج والله، في ناس يقولوا ليك الصمت في حرم الجمال جمال وما إلى ذلك.. هم شايفين الظاهر وقايلين في (صمت) وما عارفين الحاصل جوه، يا شيقوق ، زولك خمجان، (ديقنيفايد سايلنس) دي بيحسُّوها ما بيشرحوها.
يا سلام ياخ.
08-18-2010, 11:04 AM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
ياخ المنبر دا في رمضان بدونك ناقص كتير والله افتقدناك في عدة (بوستات) كنت أدرك ان مشاركتك فيها كانت ستكون بطعم السفرجل أو امجنقر الميرم، الشكر لله وللأخ الحبيب بكري أبوبكر الذي لم يتأخر في الإستجابة والذي له دين في أعناقنا كثير. ننتظر (رمضانياتك) الراتب وتصوم وتفطر على خير يا الأمير. يا الغيابك شغل الضمير.
08-18-2010, 01:14 PM
الطيب شيقوق
الطيب شيقوق
تاريخ التسجيل: 01-31-2005
مجموع المشاركات: 28804
Quote: هم شايفين الظاهر وقايلين في (صمت) وما عارفين الحاصل جوه،
وحياتك كلامك صاح لكن الممكونة دي ممكن تجي وتكتب سطر واحد ومنو كلهم يعرفوا انها كانت تتضور شوقا للتعليق ولكن ....
Quote: يا شيقوق ، زولك خمجان، (ديقنيفايد سايلنس) دي بيحسُّوها ما بيشرحوها.
ههههههههههههههها ذكرتني جلساتنا العصرية تحت عمود الكهرباء بعد ما المطرة تقيف و يجن حسناوات الحي مارات بجوارنا ....... اخخخخخخخ والله الصمت فن يكون اكثر بلاغة عندما يبدع صانعوه في اختيار ظروفه وملابساته يعني باختصار عندما يلامس سقف الصورة المنتزعة من متعدد زى ما قال اهل الفصاحة والبيان .
08-18-2010, 01:45 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
جنابو عبدالحفيظ، ألفين سلام ، منزعج من كلامك الفات داك في بوستصور أهل ساره القيافه وغناويهم..القلت فيهو الغنا والصور مابيظهروا عندك، باعتبار أن مشاركاتي هنا في معظمها تتصل بالغناء والصور أصلو ربنا ما قَسم لي معرفة وفهم في باقي المسائل (الجوهرية) وتفريعا على ذلك أتمنى عليك إيجاد (صيغة) تواصل مع ( منتجاتنا) وتنزيل مشاركاتنا إلى أرض الواقع وترتيب برنامج توافقي بين كومبيوترك وكوم شقانا..، شكرا يا العزيز وننتظر مشاركاتك بعد سهرة التواشيح.
08-18-2010, 04:04 PM
Ahmed al Qurashi
Ahmed al Qurashi
تاريخ التسجيل: 08-28-2006
مجموع المشاركات: 4263
لا شوفتن تبل الشوق ولا ردا يطمّن أريتك تبقى طيب إنت ، أنا البي كلو هين قليبا لي رهيّف عارفو ماب يحمل حنيّن إنت ماب يغباك حالو الفيهو كل البيهو بيّن بقيت مالي غير أشعاري أكتبه فيك وأدوّن أقول يمكن تزيل ما بي ولاّ قليل تهوّن مالكن يا قماري بتشدن إيش لازمة تغنّن نغيماتكن تهيج أشواقي للعينين يبكّن بدّيكن وصية أمانة لي سيد روحي طيرن ترا الحال العي شفتنو قولن ليهو أحكن قوليلو السحب في روضو ما عادن يكبّن وأضحى محل خراب ما فيهو غير زهرا مضبلن قولن ليهو ليلو طويل .. طويل.. طولا يجنّن لا قمرا ظهر في سماهو ، لا نجمات يضوّن وكل ماليهو يتصبّر يقول أيام يعدن يمنّي لنفسو بي لقياك ولاّ ترد لو يمكن
الطيف دي يا أحمد لما سجلا ودكرم الله للإذاعه السودانية كانت تبث 1992 مره في اليوم، وكنا نتمنى أن تُبَث للمره ال 1993 وأكثر، الطيف يا عزيزي ( وأظن انها سجلت في نهاية السبعينيات) كانت برنامجا لحاله ولم تنافسها في الشهرة إلا أغنية محمد جباره ( بتذكرك يا يمه) ، على أية حال لو تداخلت علي التواريخ صححني، والحقيقة أغنيات الشايقيه مليانه حِنِّيه ، ياخي عندهم زول غناي إسمو صديق أحمد بنجض الغنا دا زي الماحصل شي ، لو كان حضر زمن كرومه لأدرج في زمرة الصِيَّع، عندو غنيه بقول فيها ( وريني شِن طعم الدروس ما دام مكانا في سفر .. زينوبه كُر من حالي كُر قاعِدلي فوق كيمان جمر .. غربه وكمان حالا فقر عذبني قبل اصل القَبُر) .. والله تسمعا ترجع بيتكم في أقرب وسيله. برضو قال متغزلا في السمحه ( كان تاجوج بقت بالرتبه مشهوره إنتي فوق تاجوج زادوك دبّوره).. شايف المنجهة كيف؟ قادر الله. لكن يبقى النعام الرقم الصعب في غناء الطمبور، (إكتشفنا) جماله في طفولتنا وكانت إفادته بأن (الزول الوسيم في طبعو دايمن هادئ) مدعاة لإشاعة الأمن والسكينة عند كل من صافحت تلك الأغنية مسامعه. له الرحمة.
08-18-2010, 11:23 PM
Ahmed al Qurashi
Ahmed al Qurashi
تاريخ التسجيل: 08-28-2006
مجموع المشاركات: 4263
Quote: والله الصمت فن يكون اكثر بلاغة عندما يبدع صانعوه في اختيار ظروفه وملابساته يعني باختصار عندما يلامس سقف الصورة المنتزعة من متعدد زى ما قال اهل الفصاحة والبيان .
مراسلنا في الدندر ، شيقا ، تحت تأثير الغمام ونعنشة الدعاش. أدام المولى تلك النعمة يا عزيزنا.
08-19-2010, 08:49 PM
mamkouna
mamkouna
تاريخ التسجيل: 12-05-2004
مجموع المشاركات: 2246
Quote: لا أملك إلاّ أن أقف خاشعًا متبتلا ...فى محراب هذا الجمال... مشدوهاً و مندهشاً ومبهورا...أمام كل هذه الحلاوة والطلاوة.. من بدائع الكلام...وروائع المعانى و الأنغام...ممن امتلكوا زمام البلاغة وجوامع الكلم....من شعراء (الحقيبة الخالدة).. وود المرتضى...وودالقرشى...وأحمد طراوة....وكل المتداخلين.. إبهاراً وتطريباً....بحروفهم الأنيقة...وكلماتهم الرشيقة!!!! و ربة الدار....(ممكونة)...المتمكنة من البلاغة بمقدار!!!!
و يا ليل أبقالى شاهد !!!!!
أخي عبدالحفيظ.. أشكرك على كلماتك لكن عندما يتحدث أهل العلم تجدني مع المنصتين، د. أحمد القرشي يعرف ماذا يقول حين يكون الحديث عن الأغنية ود. طراوه من الذين كان لهم سِفر معلوم في هذا الموقع إحتفى به آلاف القراء كذلك الذي خطَّه صديقه القرشي عن أغنية الحقيبة والدعم اللوجستي البيِّن من مولانا المرتضى. التواشيح جددت فينا الإحساس بأن هناك غناءا بعد أن ظننا أنا (نمشي في القفر اليباب).
08-19-2010, 09:54 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
لا أظن أن الغناء يمكن أن يُورَّث ، عندما كان أحمد الطيب يغني (أين يا وصلي) يسري في بدنك مزيج من الشلل والجنون والسُكر ، كنا نحسه ككهرباء خفيفة في الجانب الأيسر من الصدر باتجاه الظهر. صِرت ميت ميت ميت والدموع غسلي. في زول بيحضر جنازتو؟
- مع وافر إحترامي لمعجبي إبنه عماد
08-19-2010, 10:17 PM
Ahmed al Qurashi
Ahmed al Qurashi
تاريخ التسجيل: 08-28-2006
مجموع المشاركات: 4263
Quote: مراسلنا في الدندر ، شيقا ، تحت تأثير الغمام ونعنشة الدعاش.
لا يا المرتضى انا الان في امدرمانكم البقت الطماطماية الواحدة بتاعتها بريال عماني كامل
والله يا المرتضى البيعزمك في رمضان الايام دي وجاب ليك صحن سلطة فيهو طماطم زى الضبح ليك ناقة
مشيت شاطئ ابو روف ولقيت ليك اجمل عرض للخضراوات في العالم من حيث الرصة واللمعة وبالصدفة عيني وقعت في البطيخ ومشيت اشتري لي واحدة قمت دبلتها ليك دبلة المشتري الحريف وقلت لسيدها دي بكم قال لي ب 40 الف جنية اى ما يقارب 6 ريالات عمانية .
تخيل دا في بلد المليون ميل بنيليه الابيض والازرق .
ان عشنا ياما حنشوف
08-19-2010, 11:52 PM
Ahmed al Qurashi
Ahmed al Qurashi
تاريخ التسجيل: 08-28-2006
مجموع المشاركات: 4263
يا أحمد لازم نتونس ، يعني هسه شيقوق ، أو شيقا كما يحلو للشباب مناداته، ما ممكن يستمتع بالغنا وبرنامج التواشيح في وجود التماسيح، زول يبيعوا ليهو طماطمايه ب 2.6 دولار لازم بطنو تطُم، قال البطيخه ب 40 ألف ولك أن تعلم كان هذا ثمن التويوتا كرونا GL على الزيرو، في عام 1986، يعني قبل (الإلغاز) بثلاث سنوات فقط. شيقا ، أرجع الدندر، خليك سوداني.
08-20-2010, 09:17 AM
عبدالحفيظ حسن
عبدالحفيظ حسن
تاريخ التسجيل: 05-05-2009
مجموع المشاركات: 1436
Quote: جنابو عبدالحفيظ، ألفين سلام ، منزعج من كلامك الفات داك في بوست صور أهل ساره القيافه وغناويهم.. القلت فيهو الغنا والصور مابيظهروا عندك، باعتبار أن مشاركاتي هنا في معظمها تتصل بالغناء والصور أصلو ربنا ما قَسم لي معرفة وفهم في باقي المسائل (الجوهرية) وتفريعا على ذلك أتمنى عليك إيجاد (صيغة) تواصل مع ( منتجاتنا) وتنزيل مشاركاتنا إلى أرض الواقع وترتيب برنامج توافقي بين كومبيوترك وكوم شقانا..
أخى مرتضى....
تعرف أنا فى الغالب بعتمد على كمبيوتر المكتب فى التصفح و المشاركات....لأنو جل الوقت الواحد بيقضيهو فى المكتب.. وكلما تسنح الفرصة الواحد يشارك ويطالع النت.... فى البيت من الصعب الواحد يلقى فرصة لذلك ما عدا بعض الجمع والعطلات..... وقبل فترة كمبيوتر المكتب ضربو فايرس ضربة مانعة....ورغم إنو المختصين(فرمتوه)أو(فرمطوه)....إلا إنو ما استرد عافيتو تماما.....وبقت الصور و الغنا ما بيظهرن فيهو ...مش فى بوستاتك و بس....بل فى كل ما يتعلق بذلك فى أى حتة... ولما القى فرصة فى اللابتوب الخاص ....حتى يا دوبك اسمع و أشوف ....لكن بيكون TOO LATE..... موعد بث حلقات التواشيح متأخر جدا مما يصعب علينا متابعته.... ونحن السهر ده كملناهو زمان وبقينا مامن ناسو....وموعد الإعادة برضو صعب!!!!!
غايتو ....كتر خيركم ما قصرتو كتاباتكم وتعليقكم عنو....بيخلينا زى الحضرناهو!!!!
أريتك تبقى طيب إنت ، أنا البي كلو هين!!!!
.
08-20-2010, 09:30 AM
الطيب شيقوق
الطيب شيقوق
تاريخ التسجيل: 01-31-2005
مجموع المشاركات: 28804
Quote: ما ممكن يستمتع بالغنا وبرنامج التواشيح في وجود التماسيح،
هو تماسيح وبس يا المرتضى ؟؟؟؟؟ عليك الله تعال ماري العصرية بشاطئ اب بروف بلبستك الحلوة دي وارفع ليك بطيخة وقول ليهو دي بكم يا امير ؟ وطبعا بعد الهندمة والوجاهة برضو مهم بالنسبة لتحديد السعر ان يعرف الراكب معاك منو ودرجة قرابتو معاك شنو فكلما بعدت علاقتك بالحمام الراكب معاك كلما تهيأت الفرصة لمزيد من الابتزاز المستهدف للعواطف ونخوة انا سوداني انا. طبعا انا اكان معاى ام عبد الله بسل ليك روحو المسنوح يعني ممكن هو يقول البطيخة ب 40 وانا اقول ليهو ب 20 بس وادور ويروح لاحقني ب 30 انا بقول ليهو لا 20 بس واروح مدور وبعاين ليهو بالمرايا لحدي تصل تنزيلاتو العشرين .
Quote: قال البطيخه ب 40 ألف ولك أن تعلم كان هذا ثمن التويوتا كرونا GL على الزيرو، في عام 1986،
يا حليل الزمن الكانت فيهو الطرادة تتجدع زى عبد الله البعيو في خشبة المسرح
Quote: شيقا ، أرجع الدندر،
الشهور المقبلة دي حقو انتو ذاتكم يا المرتضى تلحقونا في الدندر - ارى تحت الرماد وميض نار ...
08-20-2010, 10:27 AM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
يا خليل اخوي البنية دي غيرت لحن الأغنية وابتعدت منو كتير
أخونا ياسر تمتام أجاد وأبدع في هذه الأغنية وحافظ علي لحن
عبدالرحمن الريح الفريد
إليك كلمات الأغنية
قلبي كلمات الشاعر / عبدالرحمن الريح مين علمك تهوي الجمال يا قلبي واستلمك العلمك ظلمك.... ظلمك .... مين علمك تهوى وتحب وتكون لأقرب جار محب من هجره تشكي وتنتحب إن لم يكن صدرك رحب يا قلبي أحسن تنسحب . ....... **** كم للجمال قبلك وهب قلباً بصدر الحب نهب نهب الغرام صدرك نهب كلما نسائم الليل تهب نيران غرامك تلتهب ******* خليتني حيران محتجب كلما أراك خافق تجب أجد الصواب عنك حجب ما إني عارف كان يجب وصل الحبيب المحتجب
08-20-2010, 08:28 PM
mamkouna
mamkouna
تاريخ التسجيل: 12-05-2004
مجموع المشاركات: 2246
الشكر مبذول لكل الأعزاء المشاركين والذين هم لحمة هذا البوست وسداته.. جينا بعد الفُرقه نسأل.. بعد أن غيبنا المطبخ بموياتو وتبايخو والبرنامج اليومي ( ما يطلبه الصائمون)، محمد سيد احمد شرفتنا وسعدت حقا بمشاركتك ووجهة نظرك ، هيثم لبيب ، واحده بس؟ عوينت ام صالح؟ أعرف أن لديك مستودعا فجُد من خزائنك واتحفنا، خليل ، يعني إلا ننتظر حلقة زيدان؟ شكرا على اللينكات وأنا من المداومات على مراجعة سودانيزسونقز ومعظم المشاركين هنا من أعضائه واسأل القرشي والمرتضى وطراوه ، كما قال القرشي، زولتك دي غيُّرت لحن الأغنية وطريقة أدائها لدرجة أني لم أعرفها، إلى حين عودة..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة