عاصم البنا ، أدهشتني..

Quote: سفيان يا وديع..أو يا صاحب..طبعا ما قاصد وديع الصافي:-) يا حبوب خليني في الأول أشيل ليك فهم مغلوط من راسك..أبدا ما قلت التقليد لأني أول مرة أسمع عمل سوداني بي الطريقة دي ..نوووو يا حبوب.انا سمعت فنانة مغربية ما متذكر إسمها بس أول ما خشت قلبي كان بي سماعي لي أغنية زييييي حقت عاصم دي تجربة جديدة بي لغة عربية فصحى بي سلم سباعي بي طريقة حقت عرب الخليج والشام.. الزولة دي من بداية الأغنية ليييي نهايتا ما إتقمصت دور أي فنان أو أيييي شخصيية غير شخصيتا.. كلامك الفوق ونصيحتك دي كانأحلى لو قلتها لي عاصم لأنو هو الوقع في شرك السمع للاخرين وبقا ما قادر يلغي وجودهم من أضانو... انا أكاد أجزم يا سفيان..عاصم لما قرر يخوض التجربة دي ردم شوالات بتاعت أشرطة عربية وسمع كتيييير لكن للأسف ده ضراهو وخلاهو بيغني وجواهو الجماعة ديل لأنو قرر إنو يكون ليهم ند ويقول انا بقدر أعمل زيييكم وااااحد.. بالمناسبة وعشان أوريك التناقض أو خلينا نقول نفي أول مرة نسمع شغل سوداني بي الطريقة دي..ليييي ما إتذكرت معاك تجربة خالد حسن بتاع نجوم العرب داك؟؟؟غير أغاني الناس غنو شغل حقهم بي نفس الموسيقى ونفس الألحان بس أبدا ما حسيتو بيقلد.. تجربة عاصم ما الأولى بكل تأكيد وقبلو سمعت سودانيين يا سفيان.. عاصم تاه مش قلد..عاصم في الأغنية غلبو يمسك خط واحد فلا هو مسك في الخليجي ولا المصري ولا الشامي..إستعجل التجربة والنجاح فقرر يختهم كللللهم في عمل واحد.. بالمناسبة صدق أو لا تصدق أكتر موسيقى حبيتا هي موسيقى كردفان و الإنقسنا ديل...عاصم ده عبقري ومبدع انا ممكن أسمعو اليوم كلو قوالبو الموسيقية غريبة وبتدخل القلب.. عبدالقادر سالم لو خت الرحمن في قلبو وساب النطيط ده وهذب ليهو فرقة متكاملة ح يضرب شغل موسيقي غريب.. يا نابري ممكن تديني سبب وجيه يخلي عاصم في لحظة صوتو يشبه طلال مداح؟؟؟؟هل دي طبقة عاصم البيغني فيها؟؟؟ هل من سبب وجيه يخلي عاصم فجأة يبقا كاظم الساهر؟؟؟هل دي مساحات عاصم؟؟؟ عاصم غنى الأغنية دي بي فهم عنصري وزول موجوع وعايز يقول نحن بنعرف نعمل زييييييكم لكن ما فكر يقول نحن بنعمل أحسسسن منكم عشان كده عمل ليهم حاجاتهم هم ما حاجاتو هو.. نجي للإنكسار ..انا ما قصدت السلم طش لكن عاصم كتتتتر التحويل والقلبات اللحنية بي صورة النص الشعري ما كان محتاج ليها.. انا ما ملحن لكن مرات الملحنين لمن يقررو يدو كوبليه جملة لحنية مختلفة بيكون لأنو فعلا الكوبليه بيتناسب معاهو القالب ده مش لأنو انا لاااازم أحشر لي تنوووع موسيقي رجااالة كده.. يا مان كلامي ده ما هجوم على عاصم لكن الفكرة اللي على أساسا قرر عاصم يخوض التجربة كانت باطلة عشان كده جاء كلام ما بني على باطل فهو باطل...