أكثر ما أضحكني في هذا البوست أن د. أحمد القرشي - بمجرد قراءة مداخلتك - هاتفني قائلا: يا زول هوي ، أمشي جيب الأمانه هسه وأنا حا أوصلها لعبدالحفيظ بنفسي .. فثق أن التيمبتيشنز حاتكون معاك قبل نهاية الشهر.. كان ربنا مد في العمر. يا عزيزي شكري لك ولكن مشاركاتي هنا - في معظمها - مما نتعلمه منكم .. مودتي.
10-17-2011, 01:32 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
Quote: لولا اننا نعرف أن لك بعض الأع(ض)اء فى هذا المنبر يكفوا العين, لأشفقنا عليك من هذا البوست!!
د. بله الجلابي، طيب ، أنا ما عندي غير (خذيني باليمين وانا راقد شمال) زمان يا دكتور كنت بسمع عن عبارة (فوضى المصطلح) وما ناقِش أبو النوم ، هسه أبوالنوم زاتو ما ناقش أي شئ.. (ضبط مصطلح) وهو في حالة تلبس؟ تاني ما بكتب ليك لأنك ما بترد.. يمكن بترد الروح لكن ما كلامي..
زي صاحبك الطاهر ..
10-17-2011, 05:59 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
والله ترصدي (بالسوط) في أي مكان حق لك لايجد مني إلا قبولا وحبورا أيها الرسولة فبالعقوبة المطلوبة تغسلي بعض عقوقي فأسلِّم نفسي إلى النوم مرتاح الضمير بأن أستاذتي التي تدربت على يديها الطاهرتين ما زالت تقوم برسالتها بصبر لاينضب معينه. صبر لا أستحقه. لي عودة.. فقد أبكتني مداخلتك الثانية..
لي عودة إن ظل القلب يعمل.. لي عودة..
10-17-2011, 07:22 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
أبو أكرم ..... الواحد جاي ... ومتأبط أسلحة وعتاد لفظي، ومتسلّح بحق أيام مضت عشان (يهريك) ويتفشى فيك ......... يقوم يلقى كل الناس السمحين ديل يقولوا في الكلام السمح ده؟
هسي أنا أسوي شنو؟
Quote: الزول دا
حا يكون هنا دا
شكيتكم علي الله يا ناس مسقط ..... جايبين (ياني) ذات نفسو؟ مرة تانية ................ هسي أنا أسوي شنو؟
10-18-2011, 02:14 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
برضو السهر معاك له مذاق الليمون المنعنع يا وليم، بل أنا الذي يطلب إليك الخروج من اعتكافك لتثري المساحات بأيام (ناسنا) من زمن (بدور ارتاح .. خلِّي الليل يكون صباح..) شايف يا وليم ، ما كنا - حتى في أسوأ الكوابيس - نرى أن تمتلئ الشاشات والحفلات ب (قنبلة) وأخواتها.. آخر قولي (يا الزارعنك بلا خريف .. كان ما الصبر تكليف من "سودانيز" ما بقيف أندريه)..
تسلم.
10-18-2011, 02:18 PM
خالد المحرب
خالد المحرب
تاريخ التسجيل: 01-14-2007
مجموع المشاركات: 5705
مرة أخرى أعزيكم في رحيل صديقكم الراحل د. جباره فله الجنة ولك الصبر يا عزيز. لا أخفيك أن تعبير (القلم الرقم) عجبني بالحيل وسر بالي وخلاني في حالة إفوريا رغم أن الأرقام هنا عالية وفي ناس هنا يا دكتور كلامم زي مزيج برنت دايمن قافلين على ارتفاع ( إعذرني يا مولاي فأنا "منتفط" من رأسي حتى الكاحل).. يا مجيد ، قراءة مشاركات الأعضاء هنا تفيدني ولا أظن أني أضيف إلى القارئ شيئا فآثرت المتابعة الجميلة، بعدين يا مجيد أنا عندي نصيب من الأنانية يتمثل في المعرفة من خلال الآخرين ( والأخريات طبعا) دون الضرب على مفاتيح الكيبورد كثيرا، بعدين الكتابة هنا لها تبعاتها وثمنها الذي قد يكون فادحا على النفس والوقت وأشياء أخرى لو انكسرت مياه التغزل ، مثلا ، على حواشات الجيران وأنت لبيب بالإشارة تفهم.
يطول عمرك مع العافيه .. يطول..
10-18-2011, 05:18 PM
الفاتح ميرغني
الفاتح ميرغني
تاريخ التسجيل: 03-01-2007
مجموع المشاركات: 7488
البروف علي عوض يوسف مبسوط لي هسي ، الكلام القالو عن أيامه معك
خلاَّني منفوخ كالمنطاد تزبلن..طاير في السماء بدون هيليوم أو هواء ملهلب.
ياها المحريه فيك يا العزيز..
سلام يا محمد تعرف زمان كده قريت كتاب إسمو ( Treasure Island) لكني إكتشفت مؤخرا إنو ممكن يكون في كتاب إسمو ( The Human Treasure ). في ناس كده ممكن تلاقيهم لفترة وجيزة ومع ذلك، يتركوا في نفسك أثر خالد، زي عجائب الدنيا السبع، لا تطاله عوامل التعرية!.أها بروفيسور علي ده واحد من الناس ديل.
Quote: في حاجه سغيره عاتب عليك فيها ، كيف ياخ تعمل ليك بوست عن ملكات الجمال
وما تناغمني ولا تقول لي عُّوك لامن أسمع بيهو في الحله والكلام يجيبو لي الناس ،
مش كده وبس ، لا لقيت ساره نورو ولا وزيرة الخارجيه الباكستانيه روحانا رباني خار..
طبعا دا غير قائمه طويله من المواد المشعه التي أصدرتها ال IAEA
الكلام دا ما كويس لكن المره دي بنمشيها وبجيك بي غـادي .
لحظت من تواجدي قارئا أو مشاركا بالكتابة المتواضعة في هذا المنبر أن هناك ثوابت لا يختلف عليها حتى الزوار غير المنتظمين ، مضمون تلك الثوابت يتمثل في أن هناك أعضاء بعينهم لايمكن أن يسيئوا إلى زميل أو زميله ، وهناك أعضاء هم عنوان الموضوعية وهناك قائمة طويلة من أهل الخير يتمتعون بقلوب دفيئة (شايله هموم الناس عشان تفرح بيوم العيد) وفيهم من تملك أدوات التحليل المنطقي كقوانين الرياضيات ليطبقه على كل المسائل المتصلة بقسم الرياضة المعني ، شخصكم من الذين يمتلكون أدوات التحليل العلمي للأحداث داخلية كانت أو خارجية ولكن فوق هذا وذاك تدهشني قدرتك على الملاحة بين متلاطمات الأمواج في هذا البحر دون أن ينكسر مجذافك بطوربيدات المتربصين المتطرفين أحيانا أو الشعب المرجانية.. أقرأ كتاباتك دائما، وهذه ليست مجاملة لإعلانك أنك تقرأ بضاعتي المزجـــاة، لكن تصريح كهذا من شخص في قامتك يصيبني بقلق يعادل 6 لوَّايات في الربع، ربع بكري بالطبع، قلق سببه إنو تاني الواحد ما بقدر ينداح سااااي كدا والشارع فيهو رادار.
السلام يا روح البدن.
10-19-2011, 01:04 AM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
طبعا في أسماء في المنبر دا بتنسرب في خاطرك بشيش ، وبدون ما تقرر مسبقا شيئا تجاه تلك الأسماء تلاقي إنك ماشي معاهم أيا كان لونهم ، و(ماشي معاهم) هذه لاتعني التأمين على كل ما يقولون ، لكن تعني التثاقف معهم باعتبار أن ثمة أرضية مشتركة ، فيها مربعات مختلفة الألوان لكنها في النهاية أرضية مشتركة وليست رمالا متحركه. الكلام دا سببو إننا إتلاقينا في حوش هباني وكان الرأي مختلفا في ظاهره متحدا في مضمونه حول د. منصور خالد ، أنبسط جدا لامن أجد زول بيختلف ويتفق بإحترام لأن لا أحد يملك الحقيقة وقد علمنا التاريخ السياسي السوداني الحديث أن الثابت الوحيد عند ساسة السودان هو المتغير ..من ثم فإن المتوترين والذين يوزعون الشتائم والإتهام بالنفاق لمن يختلف معهم لايعرفون أنهم بسلوكهم هذا يعلنون على رؤوس الأشهاد أنهم من مستجدي السياسة، وبالطبع لا يستأهل هؤلاء مجرد الرد عليهم أو زيارة خنادقهم مرة أخرى.. كلامك وهدوء حوارك وموضوعيتك بتخلي الزول (يترصدك) ..
رغم بعدي برسل سلامي ..
10-19-2011, 08:57 AM
tayseer alnworani
tayseer alnworani
تاريخ التسجيل: 07-30-2007
مجموع المشاركات: 1500
مرة أخرى تهانينا الحاره للدكتور أحمد وأم احمد وصدق القائل: نعم الإله على العباد كثيرة وأجلهن نجابة الأبناء.. بس نسيتونا في الكرامه وما تنسونا في الباقي.. إنت قايل ال DHL والأرامكس ديل عملوهم لشنو؟
والله يا أب احمد ، كما قلت لعزيزي صاحب البوست (جني) ماعندي جديد، ما يجري حولنا أبلغ من أي كتابة ، زمان كانوا ناس الثنائي الوطني بيغنوا لمايو في صباها ( وريتنا جديد ما كان على بال) ولا شك أنهم - يطول عمرهم - هسه قاعدين ممحنين وتخطوا مرحلة (ما كان على بال) زاتا..
سنتواصل طالما النفس طالع وطالع..
محبتي يا شيخ العرب.
10-19-2011, 12:33 PM
وليد عبد اللطيف
وليد عبد اللطيف
تاريخ التسجيل: 08-09-2009
مجموع المشاركات: 6733
من فوائد هذا المنبر أن خلق لنا حالة من الحميمية مع أناس لم نلتقيهم من قبل و لكن ما يخطه يراعهم يعكس تماما ما بدواخلهم من نبل و سمو, و الأخ محمد المرتضى من هذا النوع الذي ما أن تقرأ له حرفا إلا و تشعر انه قد احتواك بالألفة و المحبة . تزامن انضمامنا لهذا الصرح غيابه و غياب رائعين آخرين أذكر منهم الأخ خضر حسين و الأخ هوارى نمر و الأخوات عزاز شامي و أميرة الشيخ والأخ قمر بوبا و و الذين بغيابهم غابت معهم مساحات واسعة من الاخضرار . وبرجوعه يعود بعض الألق للمنبر و كل العشم برجوع القمم الأخرى . و أنا من المتابعين لكتاباته و كثيرا ما ( ألبد ) له في بوستات الأخ و الزميل ( الحاضر الغائب ) د.أحمد القرشي عبد الرحمن و كذلك بوستات المستشار ( الأنيق ) الطيب شيقوق , فلديهم ( ون تو ) من النوع السهل الممتنع .
10-19-2011, 04:22 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
وليد عبداللطيف وين الحي بيك؟ الدنيا مقلوبه وحكومتنا أعلنت أنها بصدد إطلاق قمر صناعي وإنت غائب؟ يا الحبيب بوستات الناس الحلوين وأماكن تواجدم بتجيب لي مشاكل أنا في غنى عنها، ساره نورو والمعلومه بنت الميداح و بنات أودادن بوستات تكون ماشه كوييييس فجأة يجوك ناس كده مزودين ب galvanometers زي مفتشين الكهرباء إياهم وتاني عينك ما تشوف النور زاتو أها قلنا نترك ناس نورو ونشوف ناس ظلامو.
شكرا ليك يا وليد وبرضو حرَّم بزيارتك دي لازم نضبح ليك، ..
ملك الحيرة
-
10-19-2011, 05:03 PM
محمد عبدالرحمن محمد
محمد عبدالرحمن محمد
تاريخ التسجيل: 10-13-2010
مجموع المشاركات: 1556
يقال إذا كانت لك ذاكرة قوية ..وذكريات مريرة.. فأنت أشقى أهل الأرض ، لكني أرى العكس تماما فإذا كنت بذاكرة قوية وماض زاه وحاضر فادح السوء فأنت الشقاء نفسه،
لازلت أذكر مساجلات القبطان حسن عثمان المريخي المتطرف إذا ما تعلق الأمر بمسائل الكرة الداخلية وهو ذاته الهلالي الأزرق حين يلاعب الأهلة الفرق الأجنبية ، أذكر مساجلاته الأدبية مع أبوآمنه حامد بحروف يقطر من سطورها الذهب فتتدلى وتنسكب – وهي كلماته - وكنا نتخطف الصحف لنقرأ أولئك الأفذاذ وهم في قمة اختلافاتهم أصدقاء ، كنا نقرأ للطيب عبدالله والسماني ونتابع إداريين أفذاذ كأحمد عبدالرحمن الشيخ – لهم الرحمة ونحن بعد يفعا في المدارس ، ولايغيب عن ذاكرتنا سعادة اللواء عمر علي حسن وهو زعيم لأحد قطبي القوى الكروية العظمى المريخ والهلال (الترتيب حسب الأبجديه) ، كان كل شئ بيد رجال ( بتهد جبال هدَّارة زي رعد المطر) يقودون مؤسسات ضخمة تمارس كل النشاطات الرياضية والتربوية والثقافية وتشارك في بطولات السلة والطائرة والتنس والسباحة عبر المانش ، حتى غفونا بضع سنين لنصحو على أصوات التتار والملاكمين يضربون ويركلون ويحرقوا مكتبة بغداد ويغنوا لراجل المرا باعتباره حلو حلا ويتحرون رؤيته فإن غم عليهم دفعوا له ليظهر ويرقص على الواحده ونص. إنه زمن الكوليرا مصحوبا بنفاد المضادات الحيوية..
عمر علي حسن .. أدام الله عليك ثوب العافية فأنت خيمة أخيرة – كما يقول محمود درويش – يرتجى منها أن تؤوينا وتبث روحا في ما تبقى من مؤسسات شرطية ورياضية لأنك صاحب علم وانضباط وقلم قبل أن تنال منا ضربات هولاكو وجنكيز خان بالطول والعرض والإرتفاع ، ويقوم الحكم يعد لينا لعشرين ويلقانا شاخرين فيعلن إنتهاء الماتش ونطلع خشمنا ملح ملح..
10-20-2011, 07:58 AM
الرشيد شلال
الرشيد شلال
تاريخ التسجيل: 11-27-2006
مجموع المشاركات: 378
مشاركات (ممكونه) ، وهي من الأقلام المائزة في هذا المنبر وفي مدونتها الخاصة ، أراها واضحة وسهلة مع بيان يسعد العقل ويريح الدواخل ويتخلل كالأشعة السينية جلدك نافذا إلى العظام بعيدا عن الترميز والفذلكة. مفيده والله يا ممكونه في كتاباتك بهيجها وحزينها ، ولا أظن أنني قرأت لها مداخلة دون أن أخرج منها بفائدة وإضافة في الماعون والمحتوى ، تقدم كلامها في صحاف أنيقة حد البذخ ، عشان كده الزيي ديل مستحيل يقولوا ليها (لا والله ، شكرا .. عندي سكري) ، لازم نشيل وننهل من عندها فهي موسوعة تتدفق ثقافة وذكاء ومتابعة لكل حدث ، ربما لم أقل لها أن أول ما لفت نظري إلى مشاركاتها حديث عن الأم – جعلها المولى في عليين - فما زالت تلك الكلمات تلوب في الخاطر كمشفى متكامل للمواساة وتهذيب للحزن ورتق لما انفتق في أوزون الفؤاد.. شكرا لكتابات ممكونة الكرنفالية وأقول لها في صدد الحزن المشترك ما قاله أحدهم:
مواصلة لما انقطع.. تدرك جيدا يا أمين أننا هنا لأننا ارتضينا أن نلتقي ونتلقى بقدرما نعطي ومن ثم يبقى تلقي غير المرغوب من حديث لايكافئ المشاركة شئ شاذ لانبني عليه حكما ، هذه واحدة ، الثانية يقيننا بأنا وردنا سوقا فيه كل أنواع البضاعة والوجوه وجمبو مسجد وقصادو شفخانه ، فيه باعة جائلين مثلي وفيهو ناس المحلات المكندشه الماخمج، عشان كده يا سيدي الواحد بيتوقع يصادف كل شئ وكل شخص ويهيئ النفس لكل حادثة، هذه هي الحياة . لا أندهش أبدا أن يأتيني مشارك ويقرر هويتي دون أن يعرف عني غير إسمي ، ولا أستغرب أن أوصم بالنفاق لأنني أبديت رأيي في برتقال يافا أو طريق مدني الخرطوم ، من ثم يجب أن يكون التعامل مع تلك الحالات بما تستحقه من تحية على طريقة (سلاما) لا أكثر وفي هذا محافظة على بقاء السوق بدكاكينه وشفخانته والفارشين في البرنده وحملة الطبالي..
يا غايب عن العين دعواتك بالله ربنا يهيئ لنا من أمرنا رشدا ويستر عيوبنا..
ألفين سلام يا حبيب .
10-21-2011, 11:09 AM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
مرورك لاشك عزيز مضئ يسعد الروح المُعَنَى، ما اقتبستِه من كلامي ل (جني) هو ما أحسه فعلا، وكنت أود الكتابة عنه بتوسع في معرض ردي لأستاذتي الجليلة د. أسماء إلا أنني آثرت أن أكتب عن تلك (الحالة) في مساحة أخرى باعتبار أن موضوع البوست هنا ربما لايسمح بالإسترسال كثيرا في وصف ما نعيشه نحن الذين غبنا عن الوطن زمنا طويلا وفي الذاكرة صورة محددة عنه بنينا عليها كل شئ بينما الواقع أن تلك الصورة لم تعد إلا في أذهاننا..
المقارنة – ولو لثوان- تصيب الواحد منا بفزع حقيقي ، فزع الخروج من خميلة ودخوله إلى نفق إذا أخرج يده فيه لم يكد يراها.. خروج من (تمشي معايا وسط روحي ) والدخول إلى ( مغرزه) ..
- خارج البوست: يسعدني أن تحولي الأحزان إلى فعل ثقافي ، لم يتم ذلك بلمسة (ميدوزا) ولكن بجهد وصبر وجَلَد لايقدر عليه إلا أهل الخوارق ، وكما قال عبدالناصر :
ما بين الممكن والمستحيل تكمن إرادة الإنسان.
مودة مغربلة يا سيدتي
10-21-2011, 11:43 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
عارف لي زمن عايز أسألك ما إذا كنت حصلت على تسجيلات الشيخ عوض عمر عليه الرحمة، والله والله يا نصري صوت عوض عمر 6 صباحا مع شاي الصباح باللقيمات أو بسكويت ساتي لو وجدتهم في برد كالجري الغريب داك ممكن تطلع الشارع بعراقي الساكوبيس بس، الدفء دا الناس ما عارفنو ساي ، قايلنو ملابس صوف ، ياخ عصيدة دخن بحليب حار لو ضاقا ستيفن هاربر كان قَلَب من حزب المحافظين وبقى مع ناس (حق) زاتم.. يا حليلنا فيها الزايله..
سمعت إنو السنه دي جاي برد ما حصل قريبات دي ، فتزودوا بما يطرد نتائج تحت الصفر المعروفه وجيبوا أصلب العناصر لأقوى المواقف (زغني وأنجيرا) مع الدليخ وانسى النشره الجويه.
ربنا يحفظكم ..
10-22-2011, 07:57 AM
محمد عبد الماجد الصايم
محمد عبد الماجد الصايم
تاريخ التسجيل: 10-16-2005
مجموع المشاركات: 35312
الكتابة هنا يا ياسر لها إيجابياتها وسلبياتها ، وطبعن إنت عارف كويس إنو مع الزمن الممحوق دا لو الزول بيلقى وكت للبيع حايشتريهو ، زي الرصيد وكده، يعني ممكن تقول لزول بالله حوِّل لي ساعتين يضافوا ليومي ويبقى 26 ساعه وهكذا ، الحاصل يا ياسر إنو لما الأولويات تتعارض بنقوم نعمل سياسة تقشف زمني ونشيل من ميزانية المنبر العسل دا ونضيف لميزانية الحاجات التانية كالعمل والشلهتة والمساسقه ومعاودة المريض ثم الدفن وحضور العزاء ، عرس مافي ، ويبقى يومك ممحوق زي الجنيه السوداني ، وماهي إلا لحيظات وتلاقي (العمر ولَّى وعَبَر) زي ما قالت فيروز ، وهلمجرا ولله الحمد .. أها تقوم تجيك أوامر من (جني) وصحبه الكرام ما تقدر تخالفا، تقوم تبقى زي ناس حكومة الألغاز تلغي رحلة مسافرين للعلاج في اللُردُن وتدي الطائرة ل (مسئول) يتفسح بيها في دول الكوميسا أو يحلق بيها في الساحل والصحراء.. ومرات ملاوي.. - إنت يا ياسر طيفور ، زي ما قال حسن عطيه، حارِم وصلي مالك؟
10-22-2011, 03:02 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
في 10/1/2007 شرفني العزيز (طراوه) بتقديمه هنا، أحمد طراوه ...أهلا ومنذ ذلك التاريخ تغير شئ واحد وهو إحداثيات تواجده في أراضي أميركا لكن موضعه في القلب كحال قوانين الفيزياء، طراوه ، الطيـور الراحلة في ضُــل المسا تسأل عـليك ، فاقدك يا صاحبي المتمم كيفي ، وكنت عايز أسألك (كـيـف تفارق الضـفـة والنـيـل "الما" هـان عـليك ) لكن خجلت من سؤالي ومن نفسي ومن روحي زاتا.. فصدقني يا رفيق الطفولة يا الباسم الوريف:
(قدر ما ننسى العلينا برضو مشتاقين).
10-22-2011, 05:27 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
لعلي أقول: بلادي – بلادُكِ.. في غربةِ الدّارِ أنسجُها حُلّةً فالبسيها !! أفكّرُ في نكتةٍ أو طرائفَ إنْ قلتُها لاح من فيكِ برقٌ وراقَ الحليبُ بأسنانكِ العاجْ! أجدّفُ عبْرَ الشّواطيء في مقلتيكْ! وأرمِي بنفسي إليكْ فألقاكِ منِّي..وبعضِي وألقاكِ حزنِي وسعْدي! أراهِنُ نفسي بأنّ الوعودَ الجميلةَ.. تخبو إذا أنتِ لبّيْتِ وعْدي ! وأنسى جميعَ القصائدِ حين تطلّينَ كالمُهرةِ البكرْ صمتك شعرْ ووقْعُ خطاكِ قصيدة! أحاوِرُ ظلَّ الأماني العنيدة وأغرقُ في الحُلُمِ الحلوِ.. في الوهْمِ.. والأمنياتِ السعيدة وأصحو لألقاك.. في المدنِ البارداتِ خيالاً وألْقَى بلادي بعيدة!
ينطيك العافيه أستاذي فضيلي،
يعجبني الشعر الذي يجعلني أتزلج على الجليد الدفئ حتى أذوب ولا يذوب.. عندما توقفتُ عن الكتابة هنا منذ بضع سنين بادرت يا عزيز ببوست مناشدا إياي أن أعود، كنت أعتقد أن الكتابة هنا تخضع لقوانين الطبيعة ونظرية نيوتن وكذا أن لكل فعل ردة فعل تساويه في القوة وتتضاد معه في الإتجاه لكن ، عرفت أن الأمر عند بعضهم غير ذلك وأنه في بعض الأحيان يسود قانون العين بعينين والسن بالفك كاملة.. آثرت الإبتعاد الكامل ريثما يعرف البعض ، وقتها ، أن هناك قانونا يحكم المنبر وللأسف الشديد إستمرأ البعض ذلك الوضع الغريب ، ربما لغياب الرادارات ، وسدروا في غيهم لكن هذا حال الدنيا وقانونها الأبدي.. هذه المرة كنت غارقا في متلاطمات تعرفها لكن برضو أقر بتقصيري يا أبا شيراز، حديثك عن مظهر التعالي و (العجرفه) الذي شكل انطباعك الأول عني منذ خمسة عشر عاما أضحكني كثيرا..عارف أيها السَجيل ، إذا ظللت تستمع ولاتشارك في الحديث طالبا للمعرفة وليس ترفعا عن المشاركة ، يصفك الناس بما يمليه عليهم الظرف وأنت لست مخطئا لكن الحمد لله إنو عرفت إنو صاحبك الغنمايه بتاكل عشاهو وماشي العمر كلو بي ضل الحيطه.
وقال كل صديق كنت آمله ....... لا ألهينك إني عنك مشغول
فقلت خلوا سبيلي لا أبا لكم .......فكل ما قدر الرحمن مفعول مودتي.
10-22-2011, 08:36 PM
حيدر امين
حيدر امين
تاريخ التسجيل: 07-13-2008
مجموع المشاركات: 2881
Quote: ونصبوا له شركا لم يصطاده فقط بل اصطاد معه سمحا اذا قال وسمحا اذا كتب وسمحا اذا أكتتب الا وهو الصديق في جانب الكرة الأرضية الأخر أحمد طراوة طراه الله بالخير.
يا محمد الشيخ ، هي فوضى هي ؟ آي طراوه صاحبي ومطمورة غلاي و (فرده) بلغة عيال الفيسبوك بس كمان وين أنا لود علايل ابروف وسوق الشدره!! طراوه لما يكتب مرات بجيني إنو أخد كورسات من وراي في البرهتية والهوترية، كلام زي الآيس سكيتنق، ابوحميد المشاكلو بسيطه بالريده بتحل من قيادات التصوف ونحن حيران ودراويش في حلقته..
والله يا باشمهندس ليكم شوق ، ومن هنا ذهب من ذهب ورحل من رحل وما عادت الأيام تبهجنا كما بكى ابن زيدون،
ربنا يحفظ الجميع في غربته المضاعفة..
10-23-2011, 10:32 AM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
Quote: الواحد جاي ... ومتأبط أسلحة وعتاد لفظي، ومتسلّح بحق أيام مضت عشان (يهريك) ويتفشى فيك
والله ياهو زاتو "God defend me from my friends; from my enemies I can defend myself."
أبو الريش ، لن تجرؤ، وعليك بتمثُل الحكمة التي تقول (لاتتخلى عن أصدقائك فإنهم يعرفون الكثير) تظبظب يا رجل - كما قال محمد الماغوط في شقائق النعمان - وعلى رسلك يا هذا ، إن عنَ لك طرح تاريخي الردئ هنا فعليك بأقله سوءا .. يا رجل غيابك طال ، ما تشتغل بناس السني وحيدر ديل بس من باب الفضول تعال شوف التغيير المدهش في الفترة التي بعُدت فيها عن السلطنة ، والله يا محمد الواحد لامن يشوف الناس مشت كيف ونحن وقعنا عموديا كيف يغمره اكتئاب عديل رغم سعادته بتطور الغير.
أستاذنا محمد سني أفاد أعلاه بعرض آخر لعرس الزين عما قريب وياني العامل الدرب ساساقه. والله ناسكم سمحين.. برضو..
10-23-2011, 02:25 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
Quote: مجارطني في يني مالك؟ كُت قايلو هولي حصرياً بعد حِضرتلو ليله من ألف ليله في لاس فيجاس حا ارفع عليك دعوى هراسمنت، ومحامي، كان ترضى كان تابا، بتاع العنكوليب داك
يا محمد هسه أقول يا الله كارن قراي تكون جايه معاهو، البت دي بتعزف الفيولين زي ما صنعوها، Yanni دا يا محمد مُسكِر ، مقطوعه واحده منه بتخليك في حالة نعنشه والتانيه درجة الترتحه وتبدا تتكلم بالإنجليزي كما يفعل بعضهم في القعدات ، أما إذا حضرت ليهو حفل كامل أصحابك الماببيعرفو الطرب إلا يرجعوك البيت بعجلة الرغيف ، قالوا المسنسن في ذمة الواعي.. أنا لاأشك إنو عبارة ( سَكْرة يَنِّي) سببا الزول ده.. عموما تذكرتي قاعده ومساء يوم الأربعاء القادم موعدنا .. بتاع العنكوليب داك لو Yanni جاهو في بيتو بيمرق يخليهو ليهو لكن كان الحفله بعلي اللحو وفيها رقصة صقريه تلقاهو زي مكوك الفضاء تشالنجر ... هيييع.. علي الحرام في الصقريه دي بس مشير، تقول لي Within Attraction ؟
10-23-2011, 04:52 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
Quote: تزامن انضمامنا لهذا الصرح غيابه و غياب رائعين آخرين أذكر منهم الأخ خضر حسين و الأخ هوارى نمر و الأخوات عزاز شامي و أميرة الشيخ والأخ قمر بوبا و و الذين بغيابهم غابت معهم مساحات واسعة من الاخضرار
د. عبدالحميد سلامات، يبدو أن الوالده - أسكنها المولى عليين - داعيه لي، يعني لامن يجوك أخوان إتنين بقامتك ود. عبدالمجيد في مساحه زي دي تحمد الله على نعمائه ..
يا سيدي الكريم شكرا على كلامك في حقي لكن برضو كمان الأسماء التي أوردت إسمي معها دي عالية الكعب إذا ما كان الحديث يتصل بالكتابة والأدب وعموما نحن في جاه الملوك نتوهط سااااي..كدا زي لما تذكر الصحفي السيرلانكي إياهو مع محمد حسنين هيكل وعلي ومصطفى أمين في مكان واحد .. ما بتبقى مش؟ لكن عندنا مثل بيقول : كان قالوا ليك سمين قول آمين.. وعليه ، وبعد الإطلاع على حروفكم أناشد الأعزاء أعلاه ألا يحرمونا السقيا في زمن المحل والتصحر ..
شكرا ثانية يا المقابل وصاحبك القرشي بي غادي في عروس الرمال ودامت الأفراح..
10-23-2011, 11:01 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
مولاي العارف بالله شيخنا الشلال الرشيد شلال، ياخ أقول ليك أنا من صفاك مسحور تقول لي دعم باطني من جسد محته الذنوب؟ بالله يا مولاي أذكرنا والحقنا دعواتك فقد ورد بالأثر ( أدعوني بألسنة لم تعصوني بها)، سل المولى يرد غربتنا ويقيض لنا من يؤنس وحشتنا في ظاهر الأرض وباطنها.. ربنا يحفظك والأسرة الكريمة من كل سوء.
10-24-2011, 09:31 AM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
Quote: وليكون صوت مسقط صوتا واحدا موحدا اقف مع الاستاذ الرشيد شلال
مولانا عبدالحافظ صاحبي الفي طبعو دايمن هادي، وأنا في طريقي من البيت إلى العمل هذا الصباح كنت أستمع لأغنية صديق الزمن السمح محمد عبدالله شمو (مريم الأخرى) والتي كتبها ونحن بعد طلابا بجامعة الإسكندرية وللمرة الألف تأملت كيف كان (شمو) وكأنه يقرأ الغيب حين قال: ضيعتني مريم الأخرى بانتظار المجدلية وطرح أسئلة لم نجد إجابة عليها حتى الآن : هل أنا القاتل والمقتول حينا والرهينة وهل أنا البحر الذي لا يأمن الآن السفينة.. ما عرف شمو أن الأشياء ستُبتذل إلى درك تماهى فيه النضال والإبتذال والأمانة بالخيانة ، زمن أصبح فيه الواحد منا يوشك أن يخلع من وس خ الأيام حذائه كما قال مظفر .. أتعبتني (مريم) الأخرى هذا الصباح فجد لي العذر في ردي عليك بكلمات وأنت لايشبهك إلا ما يماثل طبعك من كلام.. محبتي..
10-24-2011, 05:22 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
من زمن عايز أرسل ليك صورك القاعده بي جاي ، تعال شيلا زي ما قال كوستاوي الخرده، والله صور في قندهار وبيت بكري بالتي شيرت مبالغه، بالطبع لايمكن تنزيلها هنا بسبب ربيع الثورات العربية والشعارات المتداوله يقوموا يلحِّقوك بن علي. عموما بعضهن يكفَّن العين لأنو صينية الغدا بقت عباره عن مصراته..
شكرا ياأبا ماهيتاب..
10-24-2011, 08:32 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
Quote: غايتو يا جني دخلتنا في حتة ضيقة! هسي نلاقي وين كلام قدر الزول دا؟!!!
كنت عايز أقول ليك في بـــاتــــا .. لكن مؤقتا كدا القميص 16 والبنطلون 36 يا ود الصائم .. والله يا ابوحميد يكفي أن تطالعنا بهذه الضحكة الكفيله بإعادة التوازن النفسي لمن يطالعها.. حقيقة لها أثر الرذاذ البيطفي الكتاتيح الحايمه في المنبر دي ونسأل المولى لها الإستدامة.. ما يجي يوم شكرك .. ول أقول ليك.. بدل أنتظر مية سنه تانيه هسه بقولا ليك.. شكرا ياخ..
10-24-2011, 09:32 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
هسه في داعي يا حيدر؟ ياخ خليها مستوره .. بالمناسبه ، ياتن؟ شايفك والسني مشغولين مع ناس قناة السويس ، عساهم ما يتلومو مع صاحبك ودالقرشي تاني، ياخ لم تتح لي فرصة اللمة الظريفه وأدام الله أيامكم أفراحا، بس التغيير مطلوب يا حيدر.. تسلم يا حبوب.
10-26-2011, 11:40 AM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
Quote: سلام يا محمد تعرف زمان كده قريت كتاب إسمو ( Treasure Island) لكني إكتشفت مؤخرا إنو ممكن يكون في كتاب إسمو ( The Human Treasure ). في ناس كده ممكن تلاقيهم لفترة وجيزة ومع ذلك، يتركوا في نفسك أثر خالد، زي عجائب الدنيا السبع، لا تطاله عوامل التعرية!.أها بروفيسور علي ده واحد من الناس ديل.
يا الفاتح ، أخي الصديق البروف علي عوض يوسف رجل نادر بكل ما تعني الكلمة ، علي - كجوهر صدر المحافل - يشرفنا جميعا كجالية أين حل بعلمه في مجاله وإسهاماته واهتمامه وإدارته ، هو عميد لعمادة الدراسات العلياوالبحث العلمي وعميد سابق لكلية العلوم بجامعة السلطان قابوس وهي من الجامعات المرموقة في الشرق الأوسط - رغم حداثتها النسبية - وأستاذ للفيزياء وهو رقم في الجامعة وشيخ عرب يده ممدودة وبيته مفتوح بسيدته الكريمة جد الفضلى هند بشير محمد سعيد.. تعال من طوكيو واقعد معاهو فليس من رأى كمن سمع.
زُره تجد ما يسرك
11-08-2011, 04:28 PM
عبدالرحمن إبراهيم محمد
عبدالرحمن إبراهيم محمد
تاريخ التسجيل: 10-02-2009
مجموع المشاركات: 2591
ولكنى لا أحـسـدك كالخـلـيـفـة، الذى مـن قـصـر نـظـره، بدلا من أن ينظـر إلى جمال الوجوه ومـتعـه الشـعـور عـليـها، سـقط الى درك بهـيـمـية الأنسـان مـن الـحـسـد والـذاتيـة.
فلك الشـكـر لأنـك ببوسـت واحـد يفـيـض نبـلا جـلـبـت إلينا الأمل فى شـهـده وخـيرة أهـل هـذا الموقع، وأطـرفـهـا حديثا، وأجـملهـا بـيانا من اللواء عمر علي حسن والدكـتور أحمد القرشى ومن يتسـمى بوليم اندريا ومحمد الكامل عبدالحليم والدكـتور أحمد طراوة ومحمد عبدالرحمن محمد (المطرطش).
ولكنى لا أحـسـدك كالخـلـيـفـة، الذى مـن قـصـر نـظـره، بدلا من أن ينظـر إلى جمال الوجوه ومـتعـه الشـعـور عـليـها، سـقط الى درك بهـيـمـية الأنسـان مـن الـحـسـد والـذاتيـة.
فلك الشـكـر لأنـك ببوسـت واحـد يفـيـض نبـلا جـلـبـت إلينا الأمل فى شـهـده وخـيرة أهـل هـذا الموقع، وأطـرفـهـا حديثا، وأجـملهـا بـيانا من اللواء عمر علي حسن والدكـتور أحمد القرشى ومن يتسـمى بوليم اندريا ومحمد الكامل عبدالحليم والدكـتور أحمد طراوة ومحمد عبدالرحمن محمد (المطرطش).
Quote: فلك الشـكـر لأنـك ببوسـت واحـد يفـيـض نبـلا جـلـبـت إلينا الأمل فى شـهـده وخـيرة أهـل هـذا الموقع، وأطـرفـهـا حديثا، وأجـملهـا بـيانا من للواء عمر علي حسن والدكـتور أحمد القرشى ومن يتسـمى بوليم اندريا ومحمد الكامل عبدالحليم والدكـتور أحمد طراوةا ومحمد عبدالرحمن محمد (المطرطش).
ياا بروف، إنت بي صِحّك ضامَنّي في زمرة الأبالسة ديل؟ بيني وبينك تار ولّا تقنت ياخ؟ كمان في بوست يخس المرتضى؟
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة