Quote: كدي أجدع لينا رابط الحفظ للاغنية (الواحد عامل فيها ما شغال بي سارة الشغلة)
كويس، يا الصادق ، ياخ فضل فيها رابط!! عموما أقول ليك إتجليت في مقولة ما شغال بي ساره الشغله، والله أهنئك على هذا المستوى من التصوف البالغ حد القطبيه ، رغم أن أهل الصوفية في الأصل ناس جمال ويتجلى لهم في كل مخلوقات الله ، ربنا يديك الفي مرادك ، سارة شنو كمان البتشغلك ، ياالصادق اخوي أنا لا أعرف كثيرا في الغزل لكن سمعت القال (بنظره بتذوب حجر) وهذه الظاهرة منتشره بين الشعوب الخطيرة الجمال، ناس الباراسايكولوجي عندهم ال Telekinesis ولو حصل لاقاك زول متمكن من الحاجه دي ممكن يجرِّدك من أي حاجـــــــه في أي حِتّه وهو قاعد في مكانو مرتاح البال وقرير العين وانت نيرانك تاكل في نيرانك. .
يا الأمرضنى وما طبانى .........في خديدك يلوح نور رباني نيران أشواقك لاهباني.............وسهام ألحاظك ناشبانى ومن ضمن الحاله التاعبانى...... ..مهضوم كشحك صدرك باني
كان لابد من تعديل الخطأ الفادح في كلمة (غرير) إلى (قرير)، الله يجازي الكان السبب
يا بكري رجّع لينا اسمنا القديم خلينا نكتب براحتنا !
الزّ حاجة مشينا هنا عرس و لقينا ليك ناسنا جايبين ناس سارة ديل نظام بيبي سيترس و ومبايل ميدز و كدة __ يمين الجماعة كلهم قبلو علي البيبي سيترز و نسوا ليك ناس الفلهمة و المكياج و البهرجة و ناس تعطيش الجيم و تجويع اللام ديك و زي ما بقول ابوحراز (قال تعطيش الجيم قال)
تحياتي
Manubia
08-09-2010, 11:42 AM
Tabaldina
Tabaldina
تاريخ التسجيل: 02-12-2002
مجموع المشاركات: 11844
يا مولانــا ألحقنا بالغنية ، دي الصفحة رقم 3 الناس ديل قضيت اربعة سنوات وسطم ما بقدر غير اقول الله يخلي ليهم الجمال الفوقم ده مش بس الوجوه والغنا ياخي حتى النضم ديل ناس ( فِقِر إسكا مقابر ) إنا لله
08-09-2010, 10:12 PM
haroon diyab
haroon diyab
تاريخ التسجيل: 06-20-2007
مجموع المشاركات: 23215
عزيزي ودالعجمي، الغنا والموسيقى بتاعت أهلنا الأنيقين ديل فيها حاجه غريبه، بدون تنظير أقول ليك من الآخر كده إنو لو سمعت غنا أستر أويكي ممكن واحد ينشلني حتى لو كنت في الربع الخالي أو جزيرة روبنسون كروزو، ياخ حاول اسمع صولو ساكس لقيتاشو ميكورا أو Yared Tefera ، أو كدي بالليل أسمع تالاهون قسّسا أو محمود أحمد أو ألامايو وراقب أي جرح في إيدك دعك عن الفي القلب ، داك ما بروح تب ، بوزنيش بيكيلي بتزيدو ، عليك الله خلينا ننوم.
الأناقه في البساطه Promise
08-09-2010, 11:49 PM
اشرف السر
اشرف السر
تاريخ التسجيل: 12-06-2003
مجموع المشاركات: 1563
شكيتك على منو يا مولانا! مما ربنا خلقني ما شفت لي وجه ضاحك كدا بأدق تفاصيله! الشعر و الحواجب والعيون و الأنف و البرد و المسبحتان بقدرة الخالق و الأذنان و ذاك المنحدر في الحنك( بسمو شنو؟.. ما نسينا العربي و دي تمت الباقي) والجيد الأطول من شهقة الغريق.. ياخي شبه الشامة ديـــك الفي شمال الجبهة تقهقه تقولوا لي ود الصايم و ضاحك و بشوش!! نودي بشاشته دي وين؟ والله الا للملك النوبي ,, عامل بطيخته و عراقيه الحايم بيهم أسافير الله السبعة ديل!
08-10-2010, 07:44 AM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
Quote: عزيزي عثمان عبدالرحمن محمدين كيفك يار اجل وكيفك مع اليمن السعيد افتقدناك في هذا المنبر لفترة طويلة لك التحية والود ورمضان كريم
تسلم يا د. أحمد القرشي ... ورمضان كريم للجميع ... مشغول كثير مع بوست الأبيض الثانوية إن شاء الله تكون متابعه ... ,وطبيعة عملي دوامين قاتلات الله يكون في العون ... الليله الرحمتات ... بكره رمضان ... خموا الرماد مع الخامين ... مع أهل ساره ... القيافة ... وفي الناس القيافة حبينا اللطافة ...
قيل بأن المرحوم أحمد بشير عتيق ... سئل عن الغزل المبالغ فيه في شعر الحقيبة والأغاني السودانية .. فأجاب بأننا إذا لم نفعل ذلك ما كانت في سودانية أتزوجت ... وخاطب المذيع ... يا ولدي الزمن كان سمح وبلادنا كانت غنيانة والسفر لمصروأثيوبيا والشام أسهل ما يكون ... والسوداني كان محبوب في مصر وغيرها من الدول .. . والنسوان البره ديل أحلى من نسواننا و لو ما كتبنا الكلام ده ما كان في سودانية بتتزوج ... دق شلوفة وشلوخ وطهوره وشنا ... كمان والجماعة أتغشوا وأتبعوا الغاوون من الشعراء ... بيني وبينك معاه حق ... ولولا ذلك كان 4/3 الشعب السوداني هجين ... يا ود شيشوق سؤالي لم يزل قائما ... بنوت الروصيرص عيبهم لي .... والله الباص المره دي ماشي الحبشة ... حتتعشلق فيه على طول ...عالم كاتلاها الريده وبث...
08-10-2010, 11:34 AM
محمد عبد الماجد الصايم
محمد عبد الماجد الصايم
تاريخ التسجيل: 10-16-2005
مجموع المشاركات: 35312
Quote: والله اتاريكم بكاين ... جنس بكا ... الواحد يخلى الولية فى نومها ويجى يزوزى بى هنا
يا نور الدين ، رغم إنو مافي زول ِببَكِّي ناسي ديل زي السودانيات لكن برضو ماشايف البكا بالمستوى المطلوب، بعدين يا نورالدين الزول المابيبكي ده بيحتاج يراجع الحكيم ، ياخ معقول؟ يا نور كدي بالله استمع لكل الأغاني والأشعار التي كتبت بالدم والشهيق والدموع والزفير النار منذ بداية التاريخ وحتى الآن بكافة اللغات وشوف مضمونا بعدين تعال احكي لي عن الغدد الدمعيه واشكي الماخلاّ ليك نصيب غير البكا والنحيب. ما تسمع التنظير الكتير ، أبكي بس ، شوف ليك أقرب كتف وابكي فيهو، وكان مالقيت قبِّل ليك على حيطه ، إنشالله تقع. هسه شنو الماببكِّي ، بِقَت على السماحه؟ خلاس ، لما تبكي أبكي على شيتن سمح، البكا مفيد للقلب ولعموم وضعك الصحي وللوطن الحبيب.
الراحل العظيم تالاهون قَسَّسا ، كان من الذين يذرفون الدمع عنما يبلغ بهم الطرب مداه.
08-11-2010, 00:01 AM
محمد حيدر المشرف
محمد حيدر المشرف
تاريخ التسجيل: 06-20-2007
مجموع المشاركات: 20358
Quote: صدقني بوستيك دا مما نزل انا ملاوز منه وما دخلته إلا هسع دي. افول ليك : "لوعت قلبي إذ..."" وما في داعي أكمل!! ذكرتني وأنا طالب كنت مسافر كسلا، في كسلا غيرت رايي وواصلت ، بالقطر طبعاً ، لحدي بورسودان!! إن شالله تكون قلت ليها: ""إنما اهلك جيران لنا إنما نحن وهم شيء أحد"" ديل نحن ما ناسهم ، وهمَّنْ كمان ما ناسنا، لكن تقول شنو ولي منو. تعرف إنه الجنرال أمان عندوم القام بالإنقلاب علي هيلاسلاسي من أولاد ديم النور؟ وهل تعرف إنه أخوه ملس عندوم أول سفيرلإثيوبيا في السودان برضه من أولاد ديم النور وكان قبلهامدرس في مدرسة الإتحاد الكنا بنسميها مدرسة الأحباش؟ أنا أقول شنو للحر؟؟ دحين البت دي ما سألتها قرت وين؟؟ صدقني بتشبه لي واحدة من بنات الهضبة كانت تلميذتي.
درديري سلامات ورمضان كريم وتصوم وتفطر على خير ، كنا نسمع أن هيلاسلاسي أطاح به واحد سوداني ، وبعد أن انجلى الموقف اتضح أن عندوم عاش في السودان ويتحدث بلهجتنا كأنه من أولاد أمدرمان ، وهذا واضح في شخص آخر كاسياسي أفورقي. الناس ديل ناسنا عديل يا درديري وهنالك خارطة أتمنى لو أجدها تضع السودان ضمن القرن الأفريقي وتزعم أننا اقرب خلق الله لأحبابنا إياهم، والعجب لو قالوا كده وجابوا لينا الموريتانيين وناس البوليساريو. أما عن سؤالك فالبت دي أنا سألت منها وقالوا قرت في نواحي اشتوجارت صنقعت وفي واحدين قالوا في ميونيخ باللفه.
طفولة جد جميلة
08-11-2010, 10:12 PM
Tabaldina
Tabaldina
تاريخ التسجيل: 02-12-2002
مجموع المشاركات: 11844
Quote: دحين البت دي ما سألتها قرت وين؟؟ صدقني بتشبه لي واحدة من بنات الهضبة كانت تلميذتي.
والله يا الدرديرى تعليق ود المرتضى دا رجعنا تانى ( اللهم انى صائم ) بمناسبة الشبه .. والله العظيم على ما اقول شهيد البنيه السمحه الكسرت طارق جبريل والابتسامه ولا كلها مبتسمه دى .. بتذكرنى واحدة كان اسمها ( سباء ) فى سودانا الاغبش دا حبشية امهرية .. وكانت واهلها جوا مهاجرين وسكنوا القوز .. ودرست بسستر اسكول .. سنه 99 يعنى قبل 10 سنوات كانت فى السنه الاخيرة .. والله بدون تفاصيل .. الواحد كان براقبها من تطلع من المدرسة وتجى بقدامنا لم تركب بصات القوز الحمراء ديك .. لمن ربنا سهل مع المساسكة الواحد بقى شريب قهوة مع امها وحبوبتها .. ولولا ابن عمها الذى تمسك واخذها الى امريكا .. كان حسي اولادو بقول ليهم يا اولاد الحبشية ..
------------
محيرنى مثل هذا الجمال ويصف هذا المجتمع السودانى منتجاته بابناء الحبشية .. بالله شوف الشينين ديل
اها الامساك فضل ليهو كتير ولا لسه ..
08-11-2010, 10:45 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
Quote: محيرنى مثل هذا الجمال ويصف هذا المجتمع السودانى منتجاته بابناء الحبشية ..
عزيزنا تبلدينا ، البركه في الشوفه، ياخ رمضان كريم وكل سنه وانت طيب وتصوم وتشوف وتفطر وتتسحَّر على خير، صدقت يا صالح، بعض الناس يستخدمون تلك الجملة للتقليل من شأن ذرية الأثيوبية وكأنما من يلفظها أو تلفظها لها أصل في الجنة وتجري في عروقها دماء نبعت من الفردوس. ياخ يجب على من انحدر من أصل أو فرع أثيوبي أن يفخر بذلك رغم أننا جميعا من تراب وإلى تراب.
الطرب الموهَّط
08-12-2010, 12:51 PM
ahmed haneen
ahmed haneen
تاريخ التسجيل: 11-20-2003
مجموع المشاركات: 7982
أحمد الحنين ، كل سنه وانت طيب ورمضان كريم، كنت أود الرد على المشاركين الكرام بالترتيب لكن مرات زي كلامك ده بنعتبرو مسألة عاجلة ومن ثم نحيله لقاضي الأمور الوقتيه، على الرغم من أنك سألت - كغيرك - مازحا وأجبت ، إلا انني أود القول بأنني لا أتبنى (بوستات) موسمية والذي لايناسب رمضان - في نظري - لايناسب أي شهر غيره، هذا البوست يهتم بصور اثيوبية جميله تشمل نسائهم ورجالهم واطفالهم وفنونهم وموسيقاهم وطعامهم وأزيائهم إلخ.. وددت إبرازها ودحر تنميط ظالم بليد ظل يرسمهم في زاوية فقيرة مزرية وأخرى سالبة تتوفر في كل الشعوب ولا أظن أن هذا يتعارض مع الشهر الكريم، بعدين يا أبوحميد يتوجب على الناس أن تتبنى سلوكا قويما طوال العام، مش يضبحوا وينهبوا ويشتموا 11 شهر ويعملوا رمضان هدنه لتنظيف (الأسلحه) وصيانتها وأصابعهم تكر المسابح ، رسالة رمضان أعظم مما يظن البعض. أخيرا يا العزيز ، الذي يعتقد أن الجمال والقيافه يتعارضا مع الصوم فعليه ألا يطرق باب هذا البوست الذي ينبئ عنوانه عن مضمونه. شكرا يا حنين..
(Beauty is in the eye of the beholder)
08-12-2010, 04:12 PM
سارة علي
سارة علي
تاريخ التسجيل: 07-08-2008
مجموع المشاركات: 4413
قادر الله . وقادر هو . كل يوم أفوت على البوست . أتمعن وأتمعن وأعاين . وأقيف . حولا عليك الله شوف أناقة ناس أهل الساره وشوف الأبتسامة الراضية واللون المجلي ده كيف . .. يا عزيزنا ود المرتضى يا أخى كل عام وأنت اكتر قيافة وكل عام والعالم اكتر أناقة وسلام
09-11-2010, 07:57 PM
Siddig A. Omer
Siddig A. Omer
تاريخ التسجيل: 04-06-2005
مجموع المشاركات: 3818
Quote: جيراننا ديل عندهم كلام عجيب في الأغنية السودانية حدثني بعضهم بأنه إذا قامت الحرب العالمية الثالثة فإن الأغنية السودانية كفيلة بإنقاذها ... وهذا مثل من صميم أمثالهم ... شفت الناس ديل بحبونا كيف ...
سبحان الله يا ود محمدين ، لاتجد دولتين في الكرة الأرضية تشتركان في الحدود وهما لا (يكجنان) بعضهما، الجزائر والمغرب مشاكلم بالكوم، فرنسا وبريطانيا كراهيه ما دايرا ضوء تتشاف بيهو، كندا وامريكا ، الهند وباكستان ، الكنغو يوغندا يحمِّروا لبعض في الضلام، السلفادور وهندوراس أشعلوا حربا راح ضحيتها كثير من أبنائهما بسبب مباراة في كرة القدم ووووو، لكن زي ما قلت ، جيرانا في أثيوبيا التقول قاصدم محمد ميرغني وهو يتغنى: ما جارتنا .. بت حارتنا .. وبنريييييييييييدا.. كل سنه وانت طيب وصاحبك ود القرشي يتوسد الحقيبة ولسان حاله يقول داوني بالتي كانت هي الداء.
09-11-2010, 11:03 PM
زهير عثمان حمد
زهير عثمان حمد
تاريخ التسجيل: 08-07-2006
مجموع المشاركات: 8273
أنا من عشاق المرأة الاثيوبية وولقد ذهبت لهذه البلاد يافعا وناضج ولي فيها أحلي الذكريات ولقد تذوقت طعم الانثي الاثيوبية في عدة مخابر فراشا وأنس وغناء بل ومساجلات فكرية ولازالت أكتب في بعض الاحيان مذكرات ( مهوس بنت من القوراقي) في جريدة العلم التي تصدر باللغة العربية في العاصمة أديس أبابا الانثي الاثيوبية يطعم العسل بكل شيء فيهامن لون البشرة و حلاوة الداعبة ولطف المعشر رقة الحاشية لكم هي عميقة في علائقها أن كانت عابرة أو دائمة رغم ما يقال أن عشقت تكون مدرسة للوفاء تسرق الرجل من خلال نظرة وتسوق المشاعر بأغنية راقصة أو بأيحاء جله الخفر والايماءات البهيجة ودوما تجدها ذات موضوع وخطة وبرنامج حتي في مخدعها متغيرة ليست بطعم الامس أو سلوك البارحة ضحوك مبسمها حضور أثيل قد تكون فقيرة ولكن من خلال أقل الامكانيات تلبس المبهر الذي يشرق بأنوثتها عند ما تغرق في الخمر تعطيك نفسها بلا حرج أو حدود تقن لغة الجسد رقصا ومضجعة بل في الحوار يتحدث الجسد لا الفم تعلمت منهن أن الرجولة هي نوعا راقي من العشق والرحمة بل تواصل بمعاني الاستمرار لبني البشر من أجل أعمار الارض والانجاب ,الغناء والرقص لوحات بديعة كلها شجن وتحكي عظمة الانسان عندما يعشق بعنف ويقوده العشق للعطاء بلا حدود.
أنها أخواني جزء من مفكرة سائح أكتشف ذلك في حانة صغيرة في ماركاتو بفجر ممطر وبعد أن مكث أكثر من عام
سوف أعود للمتابعة
09-12-2010, 09:43 AM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
مسوا نوركم شوفو المن جبينا صباح الصباح إن لاح .. لافائدة في المصباح ... هل أتاك حديث الكوكب النضاح قمره تمطر خمره وحارسها الفضاح لو تحيجنا محاسن الشمس للإيضاح مابتحيجنا محاسن محيها الوضاح ... نور جمالها دهشنا معشر الفصاح بين ناطق صامت وبين صامت صاح غانية غالية محاسن فيها شوف ياصاح الجمال الفيها كل معناو صاح ... ننظر الآيات من نور على ألالواح المعاني الخرد ومنية الأرواح في العيون المرض السحر لاواح يجذب الألباب ويفرح النواح ... القوام اللادن و الأريج الفاح من جسيمها الناعم الأثمر التفاح خلا عقلي وخلا في حشاي كفاح جيش هواها أحتل قلعة الأصفاح ... روضة غنا جمالها يجلب الأفراح حوره من الجنة فيها تسقيك راح كل هذا تراهو مابيزيل أتراح من يحبو تهالك أستراح وراح ... يا ليالى احبابي ماشفيتي جراح بل شقيتي فؤادي بمدية الجراح صرت أتلو حديثك في الوجود بصراح لوتليتبو كتابي سميت بالشراح ... فيك نظرنا مناظر يعلما الفتاح لوقفلنا قلوبنا كانت لها المفتاح أدرى أو لا أدري صرت كاللمتاح لورضاك هلاكي أنا للهلاك أرتاح ... ماجنيت في هواك وما علي جناح أشتكيت للقمري لو يعيرني جناح يكفيك لساني الغنى فيك وليك كم ناح لورثيتبو حياتي ما احتجت للمناح
....... مرتضى .. بعد تخلص , قول : هوووي يا ليلى هوووووووووي . و بالمرة أطفي النور معاك و إنت طالع .
09-12-2010, 11:36 AM
Emad Abdulla
Emad Abdulla
تاريخ التسجيل: 09-18-2005
مجموع المشاركات: 6751
Quote: معاى ام عبد الله من تحت راكوبتنا - قالت لي البنية السمحة دي منى؟ قلت ليها دي بت مشائخ وفقراء هدية ورضية بتصلي الخمسة اوقات وبتصوم عاشوراء . ام عبد الله قالت لي ان شاء الله تلحقنا وتفزعنا بالحيل والوش وش صلاح
نعم يا شيقا ، ساره دي من شيوخ الطرق الأمهريه، وأم عبدالله دي عندها فراسة، بس صحي هي القالت تلحقنا وتفزعنا؟
09-13-2010, 11:03 AM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
وكأنما التفتت بجيد جداية .... رشا من الغزلان حر ارثم
و المعبود بالحق لو عمنا عنتر شاف الامهريات ديل كان نسى ليك حنان عبله ذاتو
فعلاً كما قال الفلاسفة فان الجمال هو الشئ الذى يبعث النشوة فى الحس
اشهد الله انى ضعيف جداً امام الجمال
و بعيدة ... بعيدة يا السارة بقينا نشيل هموم اتنين ّّ!!!!!
يا ناس هوى : انا مقتول فى حوش عمى ميلس ود زناوووووووووووووووووووووووووووووى
يا اخى مالكم علينا ..... نحنا ناس قلبنا ارهف من " طرقة " الكسرة ما كنا قانعين بالقسمة جددتوا علينا المواجع يا مولانا و زمرته الابرار الله يبتليكم بريدتهن
09-13-2010, 07:41 PM
KOSTA
KOSTA
تاريخ التسجيل: 02-05-2002
مجموع المشاركات: 3138
الشاعر المرحوم ابو آمنة حامد قال فى احد اللقاءات الصحفية معه انه عندما يرى وجهاً جميلاً لا ( يبحلق ) فيه وانما يأخذ نظرة واحدة سريعة لذلك الوجه، ثم ينكفئ على ذاته و دواخله و يبدأ فى الاستمتاع و التمعن ( من الذاكرة التى حفظت ذلك الوجه و تفاصيله) فى ذاك الجمال. و ذكر انه كشاعر و فنان لا ينظر نظرة طويلة ( تلّيشة) مثل العوام ، و يكتفى بنظرته السريعة تلك.
حاشية: تفتكروا لو كان المرحوم حى و شاف الصور دى ما كان تلّش ؟؟؟ على النعمة ده كان (ريّل) عدييييل !! كعععععععععع
09-13-2010, 07:56 PM
KOSTA
KOSTA
تاريخ التسجيل: 02-05-2002
مجموع المشاركات: 3138
انظر لهذا الجمال الربانى ، و زى ما قال جنى فى تشبيه بليغ شوف البت تقول مسوّكه عيونها بمعجون سيجنال!!!
قرأت للكاتب اليرلندى الساخر برناندو شو مرة مقال يذكر فيه ان اجمل النساء التى رآهن فى حياته هن نساء القرن الافريقى و يقصد ( على ما اعتقد ) الاثيوبيات. و قد ذكر ان اهم ما لفت نظره فى ذلك الجمال هو طول العنق اوالجيد، و قال انه اجمل جيد يراه فى حياته. ( فلانة بعيدة مهوى القرط كما تقول العرب كناية عن طول العنق )
اذاً: اتفق الايرلندى مع الايطالى مع العربى و اكيد قبل كل ذلك السودانى على جمال هؤلاء الامهريات نحنا بنردد الآن فى واقع حاصل بس البيقنع جماعتنا ديلك شنو ؟؟؟ استغفرتك يا مالك روحى ..... زفرة طويلللللللة
09-14-2010, 00:45 AM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
يا ود الصايم، تتخارج وين؟ نحن في بداية طريقنا ، نتحرى الرؤية، ناس القرشي (ثبت) عندهم من زمان، زي ما قال كوستا ما عارف ناس زهير والأعشى كان شافوا كان قالوا شنو!! إحتياطي كده كان قفلوا عكاظ وأعلنوا الأحكام العرفيه. بالله شوف خفة الروح والبهجه المشتته دي؟ ياخ ليه الناس بتصرصر في الفاضي ساي كده؟
عيدك سعيد ومبارك
09-14-2010, 02:56 AM
أحمد الصديق
أحمد الصديق
تاريخ التسجيل: 08-12-2009
مجموع المشاركات: 600
طارق ميرغني، أمبارح في بيت الفنون غنت الفنانه الماخمج رشا بت الناظر شيخ الدين، قبال ما تغني كان في مطره وأعقبها رذاذ وبعدها (الجو صفا) وقامت قدمت روشتة (ناري انا) وقالت لينا البدور الفن يجي عندنا، وبرضو البدور الموت يجي عندنا، دي حقيقه ما كنت عارفا، إنا لله وإنا إليه راجعون.
ياخ عيدك مبارك،
الخبر الأكيد قالوا البطانه اترشَّــت وساريتن (تبقبِق) للصباح ما انفشت
09-14-2010, 02:34 PM
saadeldin abdelrahman
saadeldin abdelrahman
تاريخ التسجيل: 09-03-2004
مجموع المشاركات: 8857
رجعت تاني ياشباب معليش لو كلامي ما مشي أيقاع البوست
أحكي لكم عن سارة وأخواتها ودمعي يسبق مداد قلمي ولي بتلك البقاع أواصر ود عميق بل أقرب لصلة الدم وكأن ما رضعنا من ثدي واحدة ولعبنا معا في مراتع الطفولة والفة كانها حبل وداد متين واحلي سارة وأبدع مدنيتهن في كل المواسم سالت الله صادق أنا أظل مجذوب هائم بأرض سارة ورهطها ما تبقي من العمر ياربي أجعل قبري علي صدر أحدهن! اللغة الامهرية التي لا أفهمها بأحساسي ووجداني أترجم مغليقها وأسرارها وتساعدني أيماءات محدثاتي بها كانت أكثر فصاحةمن لغة الجسد والعيون و لكم أكثر لبقة من الاحرف المنثورة واللغة العربية أن ضجت بها ألسنتهن الاعجميةزدنها ألقا ومتعة لن أستطيع أن أفرق ما بين العسل عسل النحل الصافي ومجالسة سارة وأخواتها فأبدا يومي ببيت القهوة (بونابيت ) حيث طقوس القهوة علي طريقة البيوت الامهرية وكيف تشتم رحيق البن من النار لكي يعشش في قاع المزاج ونحاول نتجاذب أطراف الحديث قاتلا للوقت وتعزيزا لصداقة قد تموت بميلاد أو ظهور جميلة في الليل ولكن لاخوف فأنت هنا بينهن ملك متوج وفحل تحسن القيادة الي الاسحار قضيت نهار بحق رائع مابين ضحكات برئية وعيوني الجائعة تسافر مع كل ردف وخصر ومؤخرة بل أحاول أن أنظم بعض الابيات في رابعة النهار وأرنو لكل مبسم وثغر يحسن الابتسام نلعب الورق لكي تعلمني بعض الكلمات بلسان أهلها وهي في خفر وغنج كانها تشرح شيء ضفين بذات نفسها غير مفضوح سألتها أن نذهب لكي أختار لها عطر فقالت بكل لطف رائحة عرقي مزعجة دعنا نذهب للسونا (أي حمام البخار) في الفندق فأنا مهووسة سونا لك ياسميرة الروح و مشاعري تقول 0(يامن ليك الروح أتدللي ) ذهبنا لحمام البخار قضيت زهاء الساعة ونصفها علي ما أذكر وبعدها كان وقت وجبة الغذاء سألتها الانجيرة والزغنيه وشطةالدليخ تبسمت وكأنها خلقت لطاعتي كنت أمن النظر غزلا مرة وشهوة مرات وأدعب خصل شعرها طوال الوقت حملت بعض قوارير البيرة للهضم وفكانت زجاجاتنا واحدة أدمنت تقبيل هذا الوجه وحفظت تقاطيعه بل كأنها حرفت بعقلي و مخيلتي أنها جمال الوجه والروح ولطف الانس وظريف المزاح والدعابة سألت ربي أن أعيش ردحا من الزمن بين سارة وأخواتها أنشالله ياربي عودة
ونواصل
سوف أعود
09-15-2010, 02:06 PM
saadeldin abdelrahman
saadeldin abdelrahman
تاريخ التسجيل: 09-03-2004
مجموع المشاركات: 8857
Quote: ياجماعة عن اذنكم ختيت الصورة فى بروفايلى ...
عشان الاسم وكده
ساره كرودي سلامات ، سبق وقلنا ساره نورو تم تأميمها باعتبارها ثروة قومية يجب توظيفها لصالح قوى الشعب العامل، يلاّ شيلي أي صورة لبروفايلك زي ما ساره علي شالت البروفايل زاتو، نور في نور يا العظما المثلوا أعظم دور..
09-15-2010, 09:41 PM
Shams eldin Alsanosi
Shams eldin Alsanosi
تاريخ التسجيل: 12-18-2003
مجموع المشاركات: 2135
لمست موضع القيافه بل السماحة نفسها يا شمس متى يعرف العباد أن المسألة أبسط مما يعتقد البعض متى يعرف خلق الله إنو البسمه ال (بتطوِّل عمر) لها مفعول آخر على صاحبها أيضا وهي أن الآخرين يروه جميلا، بسمة فقط يمكنك أن تستعيض بها عن كل بيوت الأزياء والمجوهرات العالمية، سماحة النفس وطيبتها واللسان العفيف والحياء في محله نِعم لاتُشترى، جيتني في مكان أردت أن أنفذ منه إلى ما أريد يا شمس البساطه والصدق بعيدا عن جراحات التجميل و (عنكشة الدهب) البسمه والكلمه الطيبه يا شمس هما السحر بعينه، التبسم حتى في الحزن جمال لايُضاهى ، يا سلام عليك يا شمس. يا سلام،
ياسلام
09-17-2010, 01:30 AM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
يا مازن ، ما ضروري ترجع Manubia بالذات بعد كلامك عن تعطيش وتجويع الحروف، قول الدايرو والتحق بكتيبة الشفافية الحايمه تحمِّس بالجلاله دي و ( بلِّغ الأقوال يا هلال) بالله قلت لي البيبي سيترز كانن نجمات الحفل؟ ياخ الشعب السوداني دا مدهش بشكل،
دى الساحره عقول ... بروق في غيم ولا در فى لمى خدودك أم ازهار في حقول سقاني غرامك صافى حمى
09-17-2010, 02:43 PM
Mohammed Haroun
Mohammed Haroun
تاريخ التسجيل: 12-21-2005
مجموع المشاركات: 4836
Quote: والله يا ود المرتضى من عملت البوست دا الواحد بخش هنا ونفسو قايم .. فى ذمتك دا توقيت ليك ..
يا تبلدينا، برِّد نَفَسَك يا القطار، أتفق معك أني لا أتقن اختيار الزمن ولا أعرف مواقيت البَذر أوأيام التحاريق، بس يا صالح في حاجات كده لو جدولناها وتخيّرنا لها الزمان والمكان قد تأتي وقد لاتأتي ، وقد تأتي أيضا ولكن زال عبيرها، هنالك أشياء لاتعرف التأجيل والمواسم، عفوية تأتي كقبلة على الخد خالية من سبق الإصرار والترصد، قل ما بخاطرك ، إن طربت فاشركنا معك، إن رأيت جميلا قول عووووك، العمر أقصر مما نتوقع يا عزيز.
مش قال ليها : قبلي ثغري الظامي فقد لاتنفع الذكرى.
قد لاتنفع الذكرى
09-19-2010, 09:50 AM
saadeldin abdelrahman
saadeldin abdelrahman
تاريخ التسجيل: 09-03-2004
مجموع المشاركات: 8857
(هنالك أشياء لاتعرف التأجيل والمواسم، عفوية تأتي كقبلة على الخد خالية من سبق الإصرار والترصد، قل ما بخاطرك ، إن طربت فاشركنا معك، إن رأيت جميلا قول عووووك، العمر أقصر مما نتوقع يا عزيز.)
مش كدة بلاي !!!
رائع يا مولانا
09-24-2010, 00:47 AM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
Quote: يا جماعة الخير أنا خليت ليكم الجمكسين بس زيدو لي (الزغني) دا شوية ...
محمد هارون ، الجمكسين دا بيذكرني طرفة حكيت لي وهي أن جماعه كده من بلده معروفه يحضرون حفلا تغنى فيه وردي وغيره وعندما جاء دور فرقة الجاز قال أحد الحضور لصاحبه : العوض اخوي يلاّكا ناس الجمكسين جونا. الزغني يا محمد يتفق تماما مع النيران اللاهباني على حد قول أبوصلاح، ولا أشك أنك إذا تناولته في نهار لندني ثلجي وخرجت إلى الشارع فستستغني البلدية عن كاسحات الثلج.
إنت بس جرِّب.
كل سنه وانت طيب
09-22-2010, 02:39 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
Quote: الشاعر المرحوم ابو آمنة حامد قال فى احد اللقاءات الصحفية معه انه عندما يرى وجهاً جميلاً لا ( يبحلق ) فيهوانما يأخذ نظرة واحدة سريعة لذلك الوجه، ثم ينكفئ على ذاته و دواخله و يبدأ فى الاستمتاع و التمعن ( من الذاكرة التى حفظت ذلك الوجه و تفاصيله) فى ذاك الجمال.
رحم الله ذلك الجميل الأديب الساخر الشفيف فقد أمتعنا بأدبه أيما إمتاع، أبو آمنه حامد إنسان نادر قلما يجود الدهر بأمثاله، بالفعل هنالك جمال تختزنه الذاكرة ويُحفر فيها ويبقى هناك كالكتابة في حجر رشيد لآلاف السنين ، جمال يبقى في كياننا حتى البرزخ. له الرحمة والمغفرة، شكرا كثيرا يا كوستا.
09-20-2010, 09:58 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
(قادر الله . وقادر هو . كل يوم أفوت على البوست . أتمعن وأتمعن وأعاين . وأقيف . حولا عليك الله شوف أناقة ناس أهل الساره وشوف الأبتسامة الراضية واللون المجلي ده كيف ).
الشكر ليك يا عثمان و كل سنه وانت وساره وأهل ساره طيبين ولامين، ألفين سلام يا الحبيب
تصور من بداية البوست (غناويهم) مابنطلع عندي .. بس الصور كانت بتطلع .. دلوقتي في الصفحة التالته (سلك تشوف وسلك ماتشوف) زي ما قال ادروب .. الصور التي تشوي الجماعة عندي انا بالذات يطلع طرفها فقط .. واتابع آهات الفرّاجة كالذي (يقرّض) الرغيفه علي رائحة الشواء ..
يعني لو الواحد عايز يقول الا ليت الشباب كده ماحيلقي سبب ..
تجياتي وكل سنه وانت طيب
عمر علي حسن
09-18-2010, 05:40 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
Quote: يشهد الله بوست رووووووعه .. ياخ الناس ديل مبأاااالغة ..
لكن يا اخونا .... دستوووووووووور بـــ أدب ........ سمح ..
يديك العافيه يا عفاف
في ناس كده يا بت الصادق سيماهم في وجوههم من أثر الجُوه ، من عيونم بتقيسي مستوى المَحَنَّه ، تعابيرم بتوضح تاريخ الظُرف والطيبه، وهمسة منهم تغنيك عن سيمفونيات البشر الباذخة، ناس كده ، إبتسامتم تفوق أرشيف كل لوحات عصر النهضه، الله يرحمك يا دافنشي ويرحم موناليزتك،
اللوفر بي وين
09-19-2010, 08:55 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
كوستاوي، ياخ بدري على (الهجوع) بدري بدري على الوجل، بالله بمناسبة زيارتك لهذا البوست ، سلم لي على (معزه) وناسا وزغنيهم الفاره، وبمناسبة (معزه) دي ، سلام كتير للسيده الرائعة نائله ولعادل صالح ولسان حالي يُنشِد .. يا زمان هل من عوده هل..
وحات من صورك يا السمحةآية خدودك زى تلاصيف المراية رموشك نقرشوهن لى قراية بهضرب بيك وبتكلم برايا
؛؛؛؛؛؛؛؛ اشوفك سمحة واسمح من غنايا سماحة الطبعة والروح والقناية جمالك صورو المالك العناية بهضرب بيك تقول مطلوب جناية
الفرجوني
09-19-2010, 07:34 AM
وليد عبد اللطيف
وليد عبد اللطيف
تاريخ التسجيل: 08-09-2009
مجموع المشاركات: 6733
Quote: تعلمت منهن أن الرجولة هي نوعا راقي من العشق والرحمة بل تواصل بمعاني الاستمرار لبني البشر من أجل أعمار الارض والانجاب ,الغناء والرقص لوحات بديعة كلها شجن وتحكي عظمة الانسان عندما يعشق بعنف ويقوده العشق للعطاء بلا حدود.
ربما لم يف الكاتب إخواننا الأثيوبيين حقهم في النص المقتبس وربما كتب في جانب محدد وعن فئة محددة في أولئك الناس الذين تتجسد فيهم بساطة أضافت لجمالهم الأصيل ، قرأت وسمعت وشاهدت الكثير في أثيوبيا من خلال زياراتي لذلك البلد ولم أضف هنا شيئا لسيرتهم فقط أردت إبراز بعض الجماليات من صور البشر والغناء والطبيعة الأثيوبية وتمنيت لو أني كنت أديبا يستطيع أن يعكس القليل مما حبا به المولى أولئك الأشقاء من طيب نفس وخلق وتهذيب مكنهم من مجابهة الرزايا والإحن التي مدت إقامتها وكأنها بعض من الأرض. شكرا يا زهير وننتظر منك.
أهلنا
09-22-2010, 07:03 PM
Ahmed al Qurashi
Ahmed al Qurashi
تاريخ التسجيل: 08-28-2006
مجموع المشاركات: 4263
مولانا المرتضى بوست سمح والله والصور الفيهو تلوع الـch ــبد ولا ازيد
اما الترنيمة المصاحبة للصفحة دي، فهي لاشك ملائكية والحصين البنفرن فيها ديل ذاتم من نسل البراق دحين انا مغرود فيها بالحيل، رسلها لي ينوبك ثواب. قد اربطها في رقبة بعير العطفة او اعلقها طوال موسم الخريف في قمة اطول شدرة وعشمي فيها تنزل المطر وتنضرالزرع وتزيد الضرع وتحل نزاعات البدو على اراضي الزراعة المطرية
09-23-2010, 09:49 AM
Tabaldina
Tabaldina
تاريخ التسجيل: 02-12-2002
مجموع المشاركات: 11844
سعادة اللواء عمر علي حسن،، عيدك مبارك يا أبا أمير وعساك من عواده كما يقول أهلنا في الخليج، حزنت أنك لاتتلقى إرسالي بالوضوح والشفافية الكافيتين وأكلك الرغيف على رائحة الشواء ، كما تفضلت ، والله يا مولانا لو بإيدي كنت طوعت الميديا لأنه يعز علي ألا تتلقى إرسالي وأنت بكل هذا الفن والجمال، يا أمير الحُسن لو تسمح ظروفك ، رجاء شخصي أن تقدم الخدمة المطلوبة لسعادتو ، أمير بالله لاتتجاهل مناشدتي،
حاجه تحيِّر يا أمير
09-23-2010, 04:43 PM
علاء الدين صالح
علاء الدين صالح
تاريخ التسجيل: 08-11-2009
مجموع المشاركات: 1760
تحية متأخِرة حبَّة للرائع وصاحب الروائع محمد المرتضى دة البوست الوحيد الواحد ما بيقدر يحيِّي فيهو صاحب البوست من أول مُداخلة.. بصراحة كدة لو قُلتا ليك بوست رائع بكون غشّيتك والله يا مولانا.. البوست كان رائع في الصفحة الأولى.. هسّا دي ومع تباشير الصفحة الرابعة البوست بِقى أكتر من رائع.. بِقى حاجة خطيرة.. وبأمانة بِقى أليم ومُبكي مع سبق الإصرار.. فكُن شامخاً بروعتك كالمُرتفعات الأمهرية أيُّها العزيز.. واترُكنا قابعين في أسفل وديان الحسرة والألم أنا واخوي الكاشِف ود شيقوق
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة