صور أهل ساره القيافه وغناويهم..

Quote: كدي أجدع لينا رابط الحفظ للاغنية (الواحد عامل فيها ما شغال بي سارة الشغلة)

كويس،
يا الصادق ، ياخ فضل فيها رابط!!
عموما أقول ليك إتجليت في مقولة ما شغال بي ساره الشغله، والله أهنئك
على هذا المستوى من التصوف البالغ حد القطبيه ، رغم أن أهل الصوفية
في الأصل ناس جمال ويتجلى لهم في كل مخلوقات الله ، ربنا يديك الفي
مرادك ، سارة شنو كمان البتشغلك ، ياالصادق اخوي أنا لا أعرف كثيرا في
الغزل لكن سمعت القال (بنظره بتذوب حجر) وهذه الظاهرة منتشره بين
الشعوب الخطيرة الجمال، ناس الباراسايكولوجي عندهم ال Telekinesis
ولو حصل لاقاك زول متمكن من الحاجه دي ممكن يجرِّدك من أي حاجـــــــه
في أي حِتّه وهو قاعد في مكانو مرتاح البال وقرير العين وانت نيرانك
تاكل في نيرانك.
.



يا الأمرضنى وما طبانى .........في خديدك يلوح نور رباني
نيران أشواقك لاهباني.............وسهام ألحاظك ناشبانى
ومن ضمن الحاله التاعبانى...... ..مهضوم كشحك صدرك باني

Quote: الغنية رجعتنا للزمن الجميل وشوقتنا لذوى القربى

عزيزي ودالعجمي، الغنا والموسيقى بتاعت أهلنا الأنيقين
ديل فيها حاجه غريبه، بدون تنظير أقول ليك من الآخر كده إنو لو
سمعت غنا أستر أويكي ممكن واحد ينشلني حتى لو كنت في الربع
الخالي أو جزيرة روبنسون كروزو، ياخ حاول اسمع صولو ساكس
لقيتاشو ميكورا أو Yared Tefera ، أو كدي بالليل أسمع تالاهون
قسّسا أو محمود أحمد أو ألامايو وراقب أي جرح في إيدك دعك عن
الفي القلب ، داك ما بروح تب ، بوزنيش بيكيلي بتزيدو ،
عليك الله خلينا ننوم.




الأناقه في البساطه Promise

Quote: والله اتاريكم بكاين ... جنس بكا ... الواحد يخلى الولية فى نومها ويجى يزوزى بى هنا

يا نور الدين ، رغم إنو مافي زول ِببَكِّي ناسي ديل زي السودانيات لكن برضو ماشايف البكا بالمستوى المطلوب،
بعدين يا نورالدين الزول المابيبكي ده بيحتاج يراجع الحكيم ، ياخ معقول؟ يا نور كدي بالله استمع لكل الأغاني
والأشعار التي كتبت بالدم والشهيق والدموع والزفير النار منذ بداية التاريخ وحتى الآن بكافة اللغات وشوف
مضمونا بعدين تعال احكي لي عن الغدد الدمعيه واشكي الماخلاّ ليك نصيب غير البكا والنحيب.
ما تسمع التنظير الكتير ،
أبكي بس ، شوف ليك أقرب كتف وابكي فيهو، وكان مالقيت قبِّل ليك على حيطه ، إنشالله تقع.
هسه شنو الماببكِّي ، بِقَت على السماحه؟
خلاس ، لما تبكي أبكي على شيتن سمح، البكا مفيد للقلب ولعموم وضعك الصحي وللوطن الحبيب.



الراحل العظيم تالاهون قَسَّسا ، كان من الذين يذرفون الدمع عنما يبلغ بهم الطرب مداه.

Quote: صدقني بوستيك دا مما نزل انا ملاوز منه وما دخلته إلا هسع دي. افول ليك : "لوعت قلبي إذ..."" وما في داعي أكمل!! ذكرتني وأنا طالب كنت مسافر كسلا، في كسلا غيرت رايي وواصلت ، بالقطر طبعاً ، لحدي بورسودان!! إن شالله تكون قلت ليها: ""إنما اهلك جيران لنا إنما نحن وهم شيء أحد"" ديل نحن ما ناسهم ، وهمَّنْ كمان ما ناسنا، لكن تقول شنو ولي منو. تعرف إنه الجنرال أمان عندوم القام بالإنقلاب علي هيلاسلاسي من أولاد ديم النور؟ وهل تعرف إنه أخوه ملس عندوم أول سفيرلإثيوبيا في السودان برضه من أولاد ديم النور وكان قبلهامدرس في مدرسة الإتحاد الكنا بنسميها مدرسة الأحباش؟ أنا أقول شنو للحر؟؟ دحين البت دي ما سألتها قرت وين؟؟ صدقني بتشبه لي واحدة من بنات الهضبة كانت تلميذتي.

درديري سلامات ورمضان كريم وتصوم وتفطر على خير ،
كنا نسمع أن هيلاسلاسي أطاح به واحد سوداني ، وبعد
أن انجلى الموقف اتضح أن عندوم عاش في السودان
ويتحدث بلهجتنا كأنه من أولاد أمدرمان ، وهذا
واضح في شخص آخر كاسياسي أفورقي.
الناس ديل ناسنا عديل يا درديري وهنالك خارطة
أتمنى لو أجدها تضع السودان ضمن القرن الأفريقي
وتزعم أننا اقرب خلق الله لأحبابنا إياهم، والعجب
لو قالوا كده وجابوا لينا الموريتانيين وناس
البوليساريو.
أما عن سؤالك فالبت دي أنا سألت منها
وقالوا قرت في نواحي اشتوجارت صنقعت
وفي واحدين قالوا في ميونيخ باللفه.




طفولة جد جميلة

Quote: محيرنى مثل هذا الجمال ويصف هذا المجتمع السودانى منتجاته بابناء الحبشية ..

عزيزنا تبلدينا ، البركه في الشوفه،
ياخ رمضان كريم وكل سنه وانت طيب وتصوم وتشوف وتفطر وتتسحَّر على خير،
صدقت يا صالح، بعض الناس يستخدمون تلك الجملة للتقليل من شأن ذرية
الأثيوبية وكأنما من يلفظها أو تلفظها لها أصل في الجنة وتجري
في عروقها دماء نبعت من الفردوس. ياخ يجب على من انحدر من أصل
أو فرع أثيوبي أن يفخر بذلك رغم أننا جميعا من تراب وإلى تراب.




الطرب الموهَّط

Quote: يا ود المرتضي واحمد القرشي هل مطالعة هذا البوست تفطر .. وتوجب الكفارة ..؟؟ ولا تكون نوع من العبادة وشكر لله علي بديع صنعه..

أحمد الحنين ، كل سنه وانت طيب ورمضان كريم،
كنت أود الرد على المشاركين الكرام بالترتيب
لكن مرات زي كلامك ده بنعتبرو مسألة عاجلة
ومن ثم نحيله لقاضي الأمور الوقتيه،
على الرغم من أنك سألت - كغيرك - مازحا وأجبت ،
إلا انني أود القول بأنني لا أتبنى (بوستات) موسمية
والذي لايناسب رمضان - في نظري - لايناسب أي شهر غيره،
هذا البوست يهتم بصور اثيوبية جميله تشمل نسائهم ورجالهم
واطفالهم وفنونهم وموسيقاهم وطعامهم وأزيائهم إلخ..
وددت إبرازها ودحر تنميط ظالم بليد ظل يرسمهم في زاوية
فقيرة مزرية وأخرى سالبة تتوفر في كل الشعوب ولا أظن أن
هذا يتعارض مع الشهر الكريم، بعدين يا أبوحميد يتوجب على
الناس أن تتبنى سلوكا قويما طوال العام، مش يضبحوا وينهبوا
ويشتموا 11 شهر ويعملوا رمضان هدنه لتنظيف (الأسلحه) وصيانتها
وأصابعهم تكر المسابح ، رسالة رمضان أعظم مما يظن البعض.
أخيرا يا العزيز ، الذي يعتقد أن الجمال والقيافه
يتعارضا مع الصوم فعليه ألا يطرق باب هذا البوست
الذي ينبئ عنوانه عن مضمونه.
شكرا يا حنين..



(Beauty is in the eye of the beholder)

Quote: جيراننا ديل عندهم كلام عجيب في الأغنية السودانية حدثني بعضهم بأنه إذا قامت الحرب العالمية الثالثة فإن الأغنية السودانية كفيلة بإنقاذها ... وهذا مثل من صميم أمثالهم ... شفت الناس ديل بحبونا كيف ...

Quote: معاى ام عبد الله من تحت راكوبتنا - قالت لي البنية السمحة دي منى؟ قلت ليها دي بت مشائخ وفقراء هدية ورضية بتصلي الخمسة اوقات وبتصوم عاشوراء . ام عبد الله قالت لي ان شاء الله تلحقنا وتفزعنا بالحيل والوش وش صلاح

Quote: وكما قيل كل الجمال غذاء وجهك مجملا ولكن عند العالمين مفصل وقيل ايضا ان المرأة هى الجمال والانفتاح الاول للانسان وتشابه الطبيعة عند خلق الكون الا ترى الكمالات الالهية فى الطبيعة وهى تتحمل تلك التجليات ونحن نتأملهامن غير تمعن لنا ان نضع المرأة فى تلك المرتبة فهى ليست ذات وجود من غير الرجل ولن يرى كمال الرجل ان لم تكن المرأة تتحمل تجلياته فهو الخليفة والصورة المصغرة ولنا جميعا ان نسعد بهذا الجمال ولكن بشرط الوصول الى الجمال المطلق .

Quote: غايتو بس ياها حقنة أحمد القرشي دي! أدينا ياخ .. أدينا حقنة النتخارج!

يا ود الصايم،
تتخارج وين؟
نحن في بداية طريقنا ،
نتحرى الرؤية،
ناس القرشي (ثبت) عندهم من زمان،
زي ما قال كوستا ما عارف ناس زهير والأعشى كان شافوا كان قالوا شنو!!
إحتياطي كده كان قفلوا عكاظ وأعلنوا الأحكام العرفيه.
بالله شوف خفة الروح والبهجه المشتته دي؟
ياخ ليه الناس بتصرصر في الفاضي ساي كده؟



عيدك سعيد ومبارك

Quote: ياخي بعض البوستات تجي خاشيها شدييييييييييييييد الحبة ما عليك تطلع منها عندك خمّة نفَس وقشّة روح

نادر النور، معاك حق، نسيت وضع التحذير في العنوان تفاديا ل (خمّة) النَفَس،
مثل هذه الحالات يُنصح فيها بالكورتيزون وإذا استمر الوضع أقع الجردقه والحرجل.



الشعر الغجري المجنون يسافر في كل الدنيا

الله يرحمك يا نزار