لا الصابر ولا الباكي غايتو حكايتي بين أمرين وراضي أتشاقى في ريدك وأعيش بدل العمر عمرين شوقي كتير وفرحي لرؤيتك أكتر وحالي أخير تخليه هو حال الحبَ بتشكر إذا اتشاغلت عن الناس يقولوا اتناسى واتنكر وإذا إتشاغلت عن الناس يقولوا اتناسى وإتنكر وإذا إتشاغلت عن جرحي يزيد في ضلوعي ويتوكر
خيالك عندي يوماتي صباح خيري ومسا أفراحي أعد ميعادو باللحظات وسهري معاهو صباحي عيونك فوق عيوني تنوم وفوق آلامي ترتاحي وريدك من عواتي الريح ألمو وأضم علي جناحي منو العزاك زيي أنا ومنو المن قلبو غناك خلاك فرحة للحزنان وخلاك بسمة للشاكي وطار بيك فوق مكان ومكان وطاف بيك وين وداك يقابل بالمحنة جفاك ويشيل أشواقو ويرجاك
الرحمة و المغفرة للشااعر حسن الزبير
و سلاااااام لكل الاحباااااب.....
06-02-2007, 08:08 AM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
ماك طالبني حليفه ، لكن والله متابعة الأمور الدنيوية بتهد الحيل ولاشك لها أولوية على الأمور الإسفيرية ، الشلهته واللهاث والمحاحاه وملاعبة البيضة بالحجر والتأني بالضجر هلكتنا، جدول اليوم الينتهي في فراش من هموم أصبح مكلفا فأصبحنا نمشي بأيدينا لأن الأرجل ما عادت تصلح للوظيفة ذاتها ( وتسير رجلي وهي تخبط ... لا أعي فتسارع اليسرى فتركلها اليمين.. وتثاقل اليمنى فتدفعها اليسار) ، غايتو ما فضل لينا إلا بضع مخزون من المحبة نرجو ألا يصبح مآله ككهرباء الخرطوم.
06-02-2007, 11:34 AM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
هل تشفينا الأيادي الحنينه بلمستها لجباهنا المحمومه؟
ام يشفينا شعورنا بملامسة ايادي من نحب فقط؟ ان لامست جباهنا يد انسان يحبنا ولا نحبه..وكانت يده كلها حنان وحب وشفقه علينا.. هل تشفينا تلك الملامسه النبيله اللطيفه؟ هل نشعر بها كما نشعرها من الذي نحب فنشفي أيضا؟؟
صباحكم ورد جميعا..
06-03-2007, 05:28 PM
خالد علي محجوب المنسي
خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: غايتو حكايتي بين أمرين وراضي أتشاقى في ريدك وأعيش بدل العمر عمرين
محمد عثمان، التقيت الراحل حسن الزبير عدة مرات ولا أغالي إن قلت لك أنه من أرق نسل آدم ولا يُدانَى في شفافيته وصدق مشاعره وجمال قلبه ، إنه رجل محب برتبة فينوس ، وقيس بن الملوح أحد تلاميذه ، يعرف الجمال ببصيرة لاتتوفر للكثيرين ويعبر عن مجموع مستقبلاته الشفيفة بكلام مهذب عذب رقيق يوازي جسده النحيل . لاشك أن الشعر الغنائي افتقده كثيرا وكذا أصحابه وتلاميذه الحزانى ومنهم أخي عاصم البنا ود. أحمد فرح شادول وآخرين. زول بيقول ( انت السماح لابسك وشاح) ده ما زول ساهل. الله يرحمك يا حسن الزبير العفيف النظيف . شكرا يا محمد
06-03-2007, 06:54 PM
أحمد طراوه
أحمد طراوه
تاريخ التسجيل: 12-25-2006
مجموع المشاركات: 4206
... يا سلام يا خالد ! جميلة بحق قصة ( قتيل الحجر ) هذه !! كنت اتابع مساجلة ود حامد و بت الاولياء اللُحق ، و شاقنى فرح بدخول بوست الحب مرحلة ( العلاج بلمسات من نحب و نعشق ) ! لكن قصة الاصمعي تنقل البوست جهارا نهارا الي مرحلة جديدة اخرى وهى مرحلة ( الموت حبا و عشقا) .. الاصمعى كان مفروض يوسع الخيارات امام الفتى و ينصحو بالبحث عن مداخل للحوار و عرض فيرامانو علي نهج ود الرضى : قصتى إن لم تعلمانى .. هاك شرحى و هاك فيرامانى ! او نهايتو الطفشان بالاودية ودا برضو خيار معقول ! لكن واضح برضو انو خيار روميت ( الموت حبا ) هو الخيار الاشد دراماتيكية .. لذا فهو الاجمل .. ! وقال عبيد عبد الرحمن : ماسليتِك وانتي كيف تسلى .. صِرت ميت و الدموع غُسلى ! و صدق العمري وهو من قال : يا الهواكم اذى في البداية .. النهاية كيف تبقى خير .. المجد لشهيد الحجر .. المجد لمن سبقوا .. ومن ينتظرون وما بدلوا تبديلا ...
06-04-2007, 10:50 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
أخونا محمد و الاخوان و الله المراد الواحد من جنبكم ما يزح لكن الله غالب و إنشاء الله نواصل المشوار معكم زمان و بالتحديد في السبعينيات و أول وظيفة كانت مدرس مدرسة وسطي و لكن المظهر العام لشخصي لم يتغيير نفس مظهري و أنا طالب يوم الوالد علية رحمة الله ناداني و قال لي بالحرف يا ولدي إذا عاوز تعيش عيشة سمحة و تتقدم لي قدام و لكون ليك مستقبل[B/] حب و كان صادق في قوله و انا اوصيكم بالحب أبقو عشرة عليه
Quote: هل تشفينا الأيادي الحنينه بلمستها لجباهنا المحمومه؟ ام يشفينا شعورنا بملامسة ايادي من نحب فقط؟ ان لامست جباهنا يد انسان يحبنا ولا نحبه..وكانت يده كلها حنان وحب وشفقه علينا.. هل تشفينا تلك الملامسه النبيله اللطيفه؟ هل نشعر بها كما نشعرها من الذي نحب فنشفي أيضا؟؟
والله يا منى أسئلتك مشروعه ومحرجه لإنسان مسكين زيي تعوزه القدرة على الشرح
والتفسير مع شح مكشوف في قاموسي اللغوي لكن أنا عايز أقول ليك إنو حقو نتفق من البدايه انو
الزول البنريدو ده لازم يكون بريدنا كشئ طبيعي وتلقائي وقصة ( الحب من طرف واحد ) دي يمكن
موجوده في الطرف الأغر لكن ما عندنا هنا لأننا نشأنا أطفالا على سماع أغنية (ما بنمشي لناس
ما بيجونا ...) بالتالي أي يد من تلك الأيادي المعنية التي تلامس حين الحمى جبهتك ( جبهة
الصمود والتصدي) هي يد إنسان نحبه ويحبنا وما أظن يكون في إنسان بيحبنا ونحن ما بنحبو ، أما
سؤالك عن مدى قدرة تلك الملامسة النبيلة اللطيفة على شفائنا فهذا أمر أثق فيه أكثر من
المضادات الحيوية وكل منتجات أسترا زينيكا وأخواتها ، يمكنك وصفي بالشعوذة كخيار بديل زي
ما بيقول طراوه ، لكنني أومن بمثل ( أسأل مجرب وما تسأل طبيب ) ، معليش يا أحمد ، أنسى
المهنه في الحته دي ، وبحق يا منى اللمسة الشفوق مع الكلمة الطيبة والبسمة الحانية لايمكن أن
تأتي إلا من إنسان (إنسان) غض النظر عن (التوجه الأيديولوجي العاطفي) لصاحب اليد على خلفية
( خذيني باليمين وانا راقد شمال) ، لكني أكون أكثر واقعية إن قلت لك أن هناك من يمسح على
جباهنا وهو لايفعل سوى المجاملة و دي برضو مقبوله وهناك أيضا لمسة حنان من ناس جميلين لكن
ما (إياهم) وهذه بنقول عليها نيران صديقه. لكن يا منى مافي زي لمسة الأم لأنها غير مشروطة وليس
لها فاتورة آجلة الدفع من أي نوع.
مناشدة: بالله يا زوار (بوست) محمد من كان منكم رائحا أو غادِ ألتمس أن توالوا البوست بالرعاية لاحتمال الغياب بسبب إعصار (جونو) الذي سيضرب سلطنة عمان اليوم ويستمر لأيام وقيل لنا أن (كاتارينا) بالنسبة له مجرد بروفه أو دافوري في أبوروف.
وساده:
( وأنا الصاحي أرى في النور أشباح الظلام وغدت كأسي على راحي بقايا من حطـــــام)
الفنان محمد المرتضي متعك الله بالحب طبعا أخوك لقاها فرصة يجكس أقرب بت و كانت بني الجيران و فعلا بعد أيام شعرت الواحد العصرية يستحمي و يتريح و يقشر و الكرسي قدام الباب طبعا ده كله لزوم لفت الإنتباه قلت في نفسي الحاج ده كان خطير العارف ده كله مشيت سألته يا أبوي الوراك الحب بيغيير الزول منو؟ حبي لي أمك إنتهي كلام الوالد الحب شعور وأحاسيس من كل أعضاء الجسمو تكون هذة الاحاسيس جزئية إذا لم يكن التوافق كاملا مع الطرف الاخر و إذا كان التوافق كاملا يتم برمجت أعضاء الجسم للطرفين علي نظام واحدز و جه مجرد إجتهاد
... تعرفي يا بت الاولياء اللُحق .. ( في وداعة الاولياء اللُحق دى من اغانى الشيخ العدار العاش في المهدية و اواخر العهد التركى ) الحصل لناس مسقط دا دخل علينا جوه الجوه و وصل ذات الحتة البزغرد فيها صوت الناي ! ظليت مع ابو اكرم علي هاتف الاثير فما وجدت منه إلا جميل القول و حكمة الحياة و مشاوير ذات الفرح اللى ما اظنو كان في الدنيا او كانت صِلة .. مكالمات منحنى فيها دِف الاخوة ونداوة اللحظات وهو الذى يعانى قسوة الوديان و عبث الطبيعة و جفوة البحر الهندي الكبير ! ولانى عارف معزتو عندك ، خلينى اسجل ليهو باسمك يا منى كلمات حدباى لسيد عبد العزيز يوم محنتو تلك :
" .. قابل بى شجاعة تنوع الآلام .. و ابذل ما استطعت لهن كل كلام .. من مكنون قصيدك يجلو عنك ظلام .. و حرّك يبقى هيف و ماواك يبقى سلام .. عهدي بيك القديم كان ثغرك البسام .. تقتحم الامور لو كان وراها السام .. "
... تعرف يا محمد شارع الحب الممتد من شاطي القرم حتي نواحيكم في العُذيبة ، كان عندنا برضو زيو زمان في مجمع مدارس بحري الشعبية الخلف بيت احمد المرغنى ! وقيل ان البنات و الاولاد كانوا يكتبون علي كل حيطانه عبارة : شارع الحب يا احلي طريق .. عطفا علي تلك الاغنية الاثيرة ! و صدقنى الاعاصير وقوى الشر و الظلام ممكن تهدم شوارع الحب باشجارها و كافتيرياتا و اوكارا .. غير ان العشاق و المحبين ذات نفسهم ان بقيوا علي قيد الحياة فسرعان ما تنهض حركتهم و اشواقهم و شجونهم و غناهم من الرماد ! فهم مثل طائر الفينيق النارى .. و صدقت تلك الطالبة الجسورة التى وقفت امام كومر البوليس في مظاهرات شعبان 1973 و بعد اعتقال طلاب ثانوية تلودى بمدينة المهدية و هتفت قائلة : انا ما بسيبو صلاح .. لو عبوا ليا سلاح .. وياها بالضبط الحنينة السُكرة !
06-13-2007, 10:03 AM
Muna Khugali
Muna Khugali
تاريخ التسجيل: 11-27-2004
مجموع المشاركات: 22503
Quote: ... تعرف يا محمد شارع الحب الممتد من شاطي القرم حتي نواحيكم في العُذيبة ، كان عندنا برضو زيو زمان في مجمع مدارس بحري الشعبية الخلف بيت احمد المرغنى ! وقيل ان البنات و الاولاد كانوا يكتبون علي كل حيطانه عبارة : شارع الحب يا احلي طريق .. عطفا علي تلك الاغنية الاثيرة ! و صدقنى الاعاصير وقوى الشر و الظلام ممكن تهدم شوارع الحب باشجارها و كافتيرياتا و اوكارا .. غير ان العشاق و المحبين ذات نفسهم ان بقيوا علي قيد الحياة فسرعان ما تنهض حركتهم و اشواقهم و شجونهم و غناهم من الرماد ! فهم مثل طائر الفينيق النارى .. و صدقت تلك الطالبة الجسورة التى وقفت امام كومر البوليس في مظاهرات شعبان 1973 و بعد اعتقال طلاب ثانوية تلودى بمدينة المهدية و هتفت قائلة : انا ما بسيبو صلاح .. لو عبوا ليا سلاح .. وياها بالضبط الحنينة السُكرة !
آخد تنهيده عميقه..وااقنع اصابعي بان تتخلي عن حالة عشقها المباغت وسرحانها فيه وارجع لكم لأكتب بهم..شكرا محمد وشكرا طراوه علي النخيل وشارع الحب..
06-13-2007, 10:39 AM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
الوفية ، كنت أوصيت الأحباب على حراسة هذه المساحة ورفدها بالنرجس والياسمين استقطابا لمواكب ( الريده) والجمال والعاشقين وتوجيه خط سير تلك المواكب كيما ينبض بمرورها أكبر عدد من القلوب الدفيئة وغير الدفيئة وتكتحل بالنظر اليها العيون التي في طرفها كافة مشاريع العشق التي أحيلت للصالح العام ، زورا كما يقال. لله درِّك فقد كفيتِني استجداء العون وطلب الغوث مع أخونا عاصم وهو يشدو يا رشا .. غيثني.
06-13-2007, 11:02 AM
Muna Khugali
Muna Khugali
تاريخ التسجيل: 11-27-2004
مجموع المشاركات: 22503
Quote: " ولانى عارف معزتو عندك ، خلينى اسجل ليهو باسمك يا منى كلمات حدباى لسيد عبد العزيز يوم محنتو تلك :
.. قابل بى شجاعة تنوع الآلام .. و ابذل ما استطعت لهن كل كلام .. من مكنون قصيدك يجلو عنك ظلام .. و حرّك يبقى هيف و ماواك يبقى سلام .. عهدي بيك القديم كان ثغرك البسام .. تقتحم الامور لو كان وراها السام ..
شكرا يا احمد علي كرمك الجميل..
06-13-2007, 01:13 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
i will come back to this post later i just called to say hello to you and your honourable guests
thanks mustafa
شكري يا عزيز على كلماتك التي تقلل من هول ما جرى، تعرف يا المصطفى كل ما يمكن أن يشريه المال لا يُُحزن عليه، لكن ما يفجعني حد الدوار أن أفقد كل الصور والخطابات وأشرطة وكتبا أهدانيها من ألَّفها، أقول لك صور الطفولة البهيّة والصبا الألِق والكهولة المهزومة ، ياخ عندي إحساس بأن تاريخي كله ولّى وعبر كمركب ريح زي ما بتغني الشاهقة فيروز. ننتظر عودتك إلى هنا بالجميل، مودتي
06-14-2007, 10:54 AM
ضحيه ابراهيم
ضحيه ابراهيم
تاريخ التسجيل: 12-28-2005
مجموع المشاركات: 2103
عاد محمد المرتضى ليعتلى منبر الحب خطيبا مفوها كما عهدناه وعاد المحبون لمحرابه يلملمون أشتاتهم ، ومنهم من ظل معتكفا مافتىء يشدو لإستدعاء الربيع وعاد العشاق هنا فى مسقط لشارع الحب ، كعادتهم مساء كل خميس ، لم يثن إعصار جونو وشائجهم الصلبة فتعلمنا منهم أن الحب يقتله الجفاء ويحييه الوصل .... فهلا فعلتم معشر المحبين ؟
06-16-2007, 10:22 AM
ياسر ميرغنى عبدالرحمن
ياسر ميرغنى عبدالرحمن
تاريخ التسجيل: 10-25-2005
مجموع المشاركات: 529
كيف يحب انسان انسان آخر ويستمر في حبه حتي دون أن يبادله نفس الحب؟ كيف يستمر الحب دون احساس متبادل؟ هل الحب من طرف واحد حقيقه؟ ام حقيقه اصبحت وهم يسكن المحب؟
في الحب.. الفكره ..الأحساس تحتاج لمشاركه.. الكلمه تحتاج لمن يسمعها ويعيها بنفس القدر من الوعي.. الهمسه لمن يرددها معك بنفس الأحساس.. الم يزول بالمفاسمه ارتياح في وجود من نحب واحساس مشترك يصبح فرح.. نظره في العيون تفهمنا مايوده الآخر دون كلام.. فان غبنا فانه الخوف الذي يجعلنا نسأل لما الغياب..وليس غيره وان ضللنا الطريق فالاطمئنان مازال موجودا..فنصفنا في الحب مازال موجود.. وان زاد حزننا..فهو الملاذ وكل الايمان.. حبيب يشاركك كل شيء وبدون حب متبادل ليست هناك مشاركه.. يفهمك دون ان تشرح كثيرا أو تضطر للتبرير.. تفاخر به الدنيا وتتكأ عليه فيتكئ عليك..
و...........
و...........
سلام آل ياسر
06-16-2007, 06:51 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
ضحية ابراهيم، كيفك يا ودود، شكرا على المشاعر الطيبة يا أمير ، (جونو) ده ماعندنا معاهو مشكلة وسنخرج من آثاره أكثر قوة والذي يأتي من السماء لايجد عندنا غير القبول والتسليم. نحن نتجاوز ما حدث بتؤدة وثبات لكن في حاجات ما بترجع وحارقاني لكن بحاول أتنساها حتى أنساها. سلامي كتير لأحبابي حسن وحسين أولاد الناظر الماخمج عمنا علي نمر وكل أهلنا في دوحة الجميع وربنا يحفظكم جميعكم من كل مكروه.
06-16-2007, 07:17 PM
Mustafa Mahmoud
Mustafa Mahmoud
تاريخ التسجيل: 05-16-2006
مجموع المشاركات: 38072
Quote: وعاد المحبون لمحرابه يلملمون أشتاتهم ، ومنهم من ظل معتكفا مافتىء يشدو لإستدعاء الربيع وعاد العشاق هنا فى مسقط لشارع الحب ، كعادتهم مساء كل خميس ، لم يثن إعصار جونو وشائجهم الصلبة فتعلمنا منهم أن الحب يقتله الجفاء ويحييه الوصل .... فهلا فعلتم معشر المحبين ؟
صدقت يا سمية ،
حقيقة النازلة التي حلّت بهذا البلد لم يكن بمقدور دولة من دول العالم الثالث أو غيره
تجاوزها لولا أن العمانيين أظهروا مقدرة على التكاتف والتواد والتجرد جد نادرة ، لو لم
يملأ قلوبهم الحب لوطنهم لبقوا شهورا ينتحبون و يندبون حظهم العاثر الذي رماهم في مسار
(جونو) الفي العصر مرورو . لم يكتف أولئك المحبون بتقديم العون لبعضهم بل كانوا أول من قدم
لنا العون منذ اليوم الأول للإعصار وحتى هذه اللحظة وبصدق تراه في عيونهم . يأتيك بعضهم لترحل
الى منزله أنت ومن معك ، يمد أحدهم يده اليك بمبلغ مالي كبير يساعدك في تجاوز المحنة وتعتذر
مع الشكر و يسلمك أحدهم مفتاح سيارة لتبقيها معك حتى ترضى وأناس ياتونك بالوجبات الجاهزة
وبزاد يكفيك شهورا وعددا من (كراتين ) المياه تكفي قرية. يا سميه نحن نعرف معدن الناس في
الشدائد وأحمد الله أن غيّض لنا أن نشارك هذا الشعب العماني العظيم أفراحه وأتراحه وأنت شاهدة على
ما جرى ولو لم يكن أهل عمان بهذه الصفات النبيلة لربما كان مصيرنا ، نحن الضيوف ، كمصير من مر
بهم (كاتارينا). الحب يفعل المعجزات يا سمية ، اللهم احفظ عمان وأهلها وهم أهلنا وعمِّر قلوبنا
تغيبت كثيراً ولم آت لأقول عوضكم الله بخير العوض في حينها فمعذرة .. وعفواً .. والعفوُ لديكمُ مأمول ومثلك لا تزيده الابتلاءات إلا طيباً . وإن الله إذا أحب عبداً ابتلاه لك وللمرهفين والمرهفات من حجاج هذا البيت أصدق المودة
06-17-2007, 12:36 PM
د.محمد حسن
د.محمد حسن
تاريخ التسجيل: 09-06-2006
مجموع المشاركات: 15194
كتب لها يقول.. احضرت طعامي ووضعته امامي.. نظرت له دون احساس.. ولم استطع ان اتناوله! طعم الوحده سخيف..فارغ كالفضاء.. كيف يمكن لكل هذه الحركه حولي ان تكون ساكنه سكون الموت في داخلي؟
كتبت له سميه..
وحشتني موت!
06-21-2007, 01:59 AM
Osman Musa
Osman Musa
تاريخ التسجيل: 11-28-2006
مجموع المشاركات: 23082
له التحية مشارك أساسى فى بوست الحب فى المنبر الأستاذ على ابراهيم محب للشعر محب للجمال محب للفن. ( انشاءالله تعيش يا على ) _ اعلم انك تعانى . واعلم انك ( تلوك الصبر) لك التحية
06-21-2007, 05:45 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
د. محمد حسن، أتمنى تكون مازلت معطون أو على الأقل مبلول في الأشعار والرسم، صدقني الإتنين مريحين جد ، لو بقيت ماشي الصيف ده سور الأزبكيه أو مكتبة مدبولي كلمني. ما تهتم كتير للأعاصير ، (غيب وتعال تلقانا نحن يا نا نحن لا غيرتنا ظروف ولا هزتنا) صروف. سنظل في ريدتنا سواء كنا جوار نهر (بَرَدَى) أو في نهر البارد.
06-21-2007, 09:00 PM
أحمد طراوه
أحمد طراوه
تاريخ التسجيل: 12-25-2006
مجموع المشاركات: 4206
... عاين وردة منى يا محمد ! و الالوان دلالات ! وفى الحب الالوان ليها سُنن و فروض ! هل اتاك جمال البمبى معطوف على الاخضر الزاهى ! فقد قال كجراى .. متجاوزا قبائل الشرق كلها لينضم لقبيلة العشق السودانى الكبيرة : قلبي اخضر ! وذلك في اغنية وردى اللي اسمها مافي داعي ! مدد يا معاوية ويا محمد عثمان ، بالله انتو وين ؟ ! و الحب عابر للقبائل و الطبقات و القوميات ! لذا فهو مدخل لسودان الوحدة والقيم الجديدة ! ولم ينجو شرحبيل احمد ( منسوب الفلاتة السودانين ) من طغيان رونق البمبي البديع وقد كان وقت ذاك يسعى جاهدا لتوطين الهارد روك بلونية هارى بلافونت في تراب الوطن العزيز ! فاطلق شعار البمبي في ستينات القرن الماضى لتمشى تحت راياته مواكب العُشاق الغُر الميامين : مِيل يمين .. مِيل شمال .. و دوِر .. دوِر يا الابس البمبى ! وصار المحبين دعما للتواصل و توسيع مواعين العمل العاطفى يسالون بعضهم البعض عن لونهم المفضل ! وقيل ان البنت السمهرية التفتيحة منسوبة الطبقة الوسطى ، قد ردت على الولد الطيب الولهان : لونى المفضل ياهو لون زينب ! فهرول الولد الغشيم الى جدته قائلا : يا حبوبة زينب انتى لونك المفضل شنو ؟ فردت عليه : لونى ياهو لون الراية الكان تحتها جدك يوم حرابة كررى ! و هكذا اتسعت محنة الوليد العاشق المخلص و طفق يسال العارفين بالتاريخ و حكاوى ذلك اليوم الذى عرف ب ( سد الفرقة و تسوية الصفوف ) .. !! و صدق الفنان الجبلابى محمد ميرغنى وهو يترنم بقول صلاح حاج سعيد الموشى و المقفى : ما قلنا ليك .. الحب طريق .. قاسى و صعيب من اولو .. !
06-21-2007, 11:30 PM
Osman Musa
Osman Musa
تاريخ التسجيل: 11-28-2006
مجموع المشاركات: 23082
أحمد طراوه العاشق الشفاف اكتب كما شئت ___ وكما قال الشاعر المحب . نزار قبانى ( اكتب كما شئت باسم الهوى والعدالة ، باسم النجوم التى لا نراها وباسم الزمان الذى عشت تحلم حتى تراه ... تحياتى
06-22-2007, 11:14 AM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
... دمت يا عثمان ! دمت مُحبا و مظفرا .. فقط اسندوا حبيبكم ود حامد ! اسندوه بابا" باب ، حتى يجف الشراب في حافة الكأسِ ! و تذكر .. هؤلاء قواريرهم لا تنطب فهى معباة بالمطلق ، و بينابيع الحنان السرمدي ..
06-22-2007, 00:04 AM
Muna Khugali
Muna Khugali
تاريخ التسجيل: 11-27-2004
مجموع المشاركات: 22503
( مادام هاجرنى ... رسلى نسيمك كلام ياتى مثل الضوء الشاعر ده يا د / أحمد يرى كل ما لا نراه غزل سودانى اصيل مورق بالمحبة والشوق والأمنيات الطيبات . والامل فى العودة الى تلك الجنة المفقودة تحياتى
06-22-2007, 04:40 AM
أحمد طراوه
أحمد طراوه
تاريخ التسجيل: 12-25-2006
مجموع المشاركات: 4206
... بالضبط يامنى ! هو المساء عند شواطى المسيسبى مترامية الاطراف ! المساء الذى حرك زخم العواطف و الاشواق لدى حسن عوض ابوالعلا فقال : ولىّ المساء .. الواله المحزون في جوف الضباب .. وانا اُهيُُى زينتى و اعُدُ مفتخر الثياب ! آملا ُلقياك الحبيب .. يصدنى زهو الشباب .. محمد المرتضى كان كثيرا ما يتوكأ على قول ابو العلا : و وسادتى ، بللتُها بالدمع و الدمع السخين ! شوفو بالله جمال التكرار ! حقا الدموع انواع .. خفيف و تقيل ، زى النقرزان البرقصوه البنات .. سوى الخفيف و تقيل يا بت البلد ! بل عند النعام آدم فالدموع دم عديل : ابكى يا عيونى دمع الدم .. الزمان بعذابي حكم .. اشد اوتارى و اترنم .. و اجرو مع الخيال النم .. دليب شديد يا حفيدات مهيرة ! ! و قديما كان كرومة قد اطلق كلماته تلك : دمع المحاجر سال .. و التى صنفته ضمن جماعة الشيخ البكاى ! ورغم اهتمامي الشديد بحضارات الانهار الاربعة القديمة : السند ، و النهر الاصفر في الصين ، و حضارات المسيسبى ، و نهر النيل .. الا ان شواطى بحر ابوروف هى مهد كل الحكاوى و القصص بالنسبة لنا .. يشدو ندماء الشاطى و يشق صوتهم اثير البحر الي توتى و شمبات قائلين : بحثنا سألنا عليهو الطير .. و ما بنستحمل يوم بلا .. العندى انا ما بدى .. و بحر ابوروف انا بعدي !!
... عمر البنا يا عثمان ، هو اول من استخدم مفردة ( الإقليم الجغرافى ) في الغناء السودانى ! ففى ذات الاغنية بصوت اللحو ، يقول : يا اماني حياتى .. البيك نور إقليمك .. يتمنى البدرى يظفر ب لِيمك .. يا نعيم الدنيا ! اناشد احمد القرشى وعاصم البنا ان يحكى اى منهم قصة البنت الشكرية الجميلة اللتى طلبت من عمر البنا ان ينزل بحر ازرق و يجيب ليها عود (الكليت) الشايلو التيار ! وعود الكليت عزيز عند النساء في السودان ! بس مشكلتو الوحيدة انو بمشى وراه تمساح الكبلو !
الجميل محمد المرتضى...الف حمدا لله بالسلاااامة الجميع هنا تحبااات عاطرات و سلااام ليكم و للمعااكم فى......قاعدين...
هذا البوست هو ترياق البلسم..الذى يشفى جراحاتنا شكرا لكم و انتم تسكبون علينا كل هذا الرحيق الذى ينزل بردا و سلااااما على لهيبنا الدااخلى.. و امسكوا على هذا البوست لا يضيع مع الارشفة...
الاستاذ احمد طراوة جاب سيرة كجرااى و وقت سيرتك يجيبوها.....خلااص نحن بنتلبش.. الشااعر الفذ عاش فترة طويلة بمدينة بورتسودان اتذكرها جيدا رغم فارق السن طبعا....
ساعود اليكم اكثر منعة وقوه..لاكتب لكم عن كجرااى و عن امسيااات و زمن جميل و عن مافى دااعى و عن يخااصم يوم و يرجع يوم التى ابدع فيها ابراهيم حسين...
مافي داااعي تقولي مااافي يالربيع في عطرو دافي لهفة الشوق في سلااامك في كلاااامك وسر غرااامك ماهو خافِ
إرتعاااشاتااك بتحكي قصة أحلاااامك معااااي وكل خفقة في قلبي نغمة تحكي ليكي شوقي وهواااي إنت في بهجة شبابك وحبي ليك من غير نهاية مافي داااعي ..
قلبي أخضر ولسة في ريعااان شبابو في حرااارة شوقو بيسطر كتابو شوفي كيف نشوااانا بتتراقص حروفو كل لحظة شوق بتتجدد ظروفو مافي داااعي ..
أخى محمد عثمان والله فى داااعى .. وفى الف دواااعى انك تكتب عن كجراى قلب الشرق ارجو أن تكتب عنه شاعر الكلمات المترعة بالحب كلمات ( تنشاف ) فى الظلام. والله يا محمد عثمان نحنا فى الغربة دى (متوكين تب) بالحزن والوجع والخوف اتمنا أن لا تصادر الغربة أحلامنا( فترنا.
06-22-2007, 09:47 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
... لله درك يا محمد عثمان ! جزيل شكرنا .. عندك لنا دائما ابتداءت الفرذق في مقاطع جرولِ .. حدثنا بالله عن كجراى حديث النعمان عن ماء السماء .. او كما روى مالكُ عن انسِ .. بوستك يا ود حامد متل خام برنت عالي الإغلاق .. بودينا لي دنيا الصبابة .. و السعادة الفاتحة بابا ..
06-23-2007, 06:49 AM
د.محمد حسن
د.محمد حسن
تاريخ التسجيل: 09-06-2006
مجموع المشاركات: 15194
أحمده حمدا كثيرا أنك سادر في الهوايات القديمة. ل (صبا) وأخواتها منى السلام ، ولأم صبا بعد التحايا وسام النيلين من الطبقة ( العليا) زي ما بيقول عادل مختار ولك سلام محمدالفاتح. مودتي يا حبيب.
Quote: إرتعاااشاتااك بتحكي قصة أحلاااامك معااااي وكل خفقة في قلبي نغمة تحكي ليكي شوقي وهواااي إنت في بهجة شبابك وحبي ليك من غير نهاية مافي داااعي ..
عليكم الله دا كلاااام نصاااح..؟؟؟
الحبيب عثمان موسى و الجميل احمد طراااو.. رااجع ليكم و معااى اشوااقى ما وحدى بس شوية كدا..
و على ذكر اللون و الالواان كما ذكر طرااوة فى مدااخلته السااابقة كان لاسماعيل حسن منحنى اخر و هو يقول في اللون الأسمر ذوبت شبابي وعشقت الجنة وفي الجنة عذابي.. و وااصل عشقه للون الاسمر فى الليلة يااا سمرا لونك بديع وطبعك وديع وخدك يفوق زهر الربيع و لم يصدق ود الامين فخرجت منه اسمر جميل فتاان فكاانت اغنية الموسم وقته..
و نبقى نحن هناااك مع الخدود الشاربة من لون الشفق عند المغارب ديل خدودك سيدي .. وسيد الناس .. يا سيد الحبايب ووووو لونك أبهى لون وكفاك العيون آه للإبتسامة كالنغم الحنون نظراتك لهيب وتثير الشجون
و مااافى دااااعى......!!!!
06-23-2007, 01:10 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
والله يامحمد صحي الكلام الفوق ده ما كلام نصاح، يا محمد كلمة (إرتعاشاتك) اللي عملت ليها ألف ألِف طالعه دي لما ارتعشت حروفا ذاتا كلمه ما هينه وهي من قاموس المفردات التى لاتشرح بل تُحَس فقط. وهي من الكلمات اللي مجرد قراءتها يُسري في جسدك موجة سريعة مركزها تحت الأذنين تتجه من الرقبه إلى الصدر لزوم الترجمه في منطقة العمليات ، شباب اليومين دي يسمي تلك المنطقه (حنانك) ، ثم تتجه تلك الموجه ب U turn إلى الظهر لتقوم بتعديل أي إنزلاق غضروفي أو أي حالة عدم إنتباه أو سهو ( والرعشة هنا تسمى انتفاضه ). لاحظ انو دي إرتعاشة واحده دعك عن عدد من الإرتعاشات . وبالطبع أبوصلاح كان عالما في جراحة الأعصاب ولم يك صعبا عليه متابعة ممرات تلك الأحاسيس حين قال : من هواك أنا جسمي دايما في ارتعاد ، والإرتعاد و الإرتعاش كلمتان تفيدا الحال التي يكون عليها زولنا ورغم تقاربهما في المعنى إلا أن ناس وأهل اللغة عندهم كلام تاني عن المصطلحات التي تستخدم لحركات أعضاء جسم الإنسان دون تحريكه لها كارتعاد الفريصة ونبض العرق وضربان الجرح وخفقان القلب واختلاج العين وارتعاش اليد الخ... . والغريبة كل تلك الحركات تلازم حالات الحب الجديد لنج بالذات أيام الثانوي العام ، مش كده يا طراوه؟ ياسلام على ( الوعي المبكر والعاطفه النبيله) ، نرجع للإرتعاش ، وطبعا ما أظنك ناسي صلاح بن البادية في أغنية وشوشني العبير حين يصل الى : يد الحرير ارتعشت ، إرتعشت بكيت من رعششششتهااااا ، بكيييييييييتُ .... تن تارا تن تارا تن تارا تان تارا تان تارا تان تان ، ووردي رجع لقصة الرعشة مره تانيه في قصة البت (هاله) وقال لمن شفتك شعرت الرعشه من راسي لي كرعي. من ثم فإن الإرتعاش يكون لليد ، زي قالب الجلي يعني ، أما الإرتعاد فيكون للفريصة وهي لحمة عند الكتف تضطرب عند الخوف كما يقول أهل اللغة وقال حسان بن ثابت: شك الفريصة بالمدرى ، فأنفذها ... طعن المبيطر إذ يشفى من العضد مقذوفة بدخيس النحض بازلها ... له صريف ، صريف القعو بالمسد
والمعنى واضح .
أغرب حاجه يا محمد إنو ناس المويه عندهم خبراء بيتحسسوا وجود أنابيب المياه تحت الأرض في منطقه ما بسلك في شكل 7 ويرتعش السلك في يدهم بشده عند وجود أنبوب ماء تحت الأرض ، برضو في واحد صاحبي كان لما يجي ماري ببيت بيعرف من خارج السور انو البيت ده فيهو بت سمحه ولاّ لا ، وده سببو المجال المغنطيسي لساكني البيت والقصه دي بيسموها ناس( الباز) وناس ( ناسا) Remote Sensor أو التحسس من البعد بواسطة الأقمار الإصطناعيه ، شوف بالله يا محمد ، زمان كنا بنراقب الأقمار هسّه الأقمار بقت تراقبنا.
محمد عثمان، يوم السبت ده الحاجه الوحيده الكويسه فيهو ليلة السبت نفسها. أغنية ليلة السبت دي ومعها (كلمة) لمحمد يوسف موسى كانتا من مقدسات صديق عزيز وظلتاعنده لزمن طويل كميثاق العمل الوطني عند الإشتراكيين العرب ، لكن يا محمد أغنية سال من شعرها الذهب دي عندها مكانه خاصه في القلب هي وشاعرها أبوآمنه رحمه الله. والله أبوآمنه ده يتحبّ في كل إتجاه.
06-24-2007, 12:36 PM
د.محمد حسن
د.محمد حسن
تاريخ التسجيل: 09-06-2006
مجموع المشاركات: 15194
Quote: محمد عثمان، يوم السبت ده الحاجه الوحيده الكويسه فيهو ليلة السبت نفسها. أغنية ليلة السبت دي ومعها (كلمة) لمحمد يوسف موسى كانتا من مقدسات صديق عزيز وظلتاعنده لزمن طويل كميثاق العمل الوطني عند الإشتراكيين العرب ، لكن يا محمد أغنية سال من شعرها الذهب دي عندها مكانه خاصه في القلب هي وشاعرها أبوآمنه رحمه الله. والله أبوآمنه ده يتحبّ في كل إتجاه
ود المرتضى...
غاايتو ما تذكرنا سبت المدرسة زمااان..!!! الحاااجة المحيرااانى ليه الشااعر اختار يوم السبت..؟؟؟ شرة يوم السبت...حاااجة تحير..! ليلة السبت شااعرها فلسطينى و ليس محمد يوسف موسى انا شخصيا كنت حتى زمن قريب اعتقد ان من كتبها هو محمد يوسف موسى..حتى صححنى احد الاخوان... محمد موسى كتب الكثير من الاعماال الجميلة..للفنان ود الباادية...برواااقة كدا بنجيها راجعين و ايضا هناك يا صوتها لما سرى والفنان سيد خليفة و طبعا للاغنية قصة طويلة........بنرجع ليها برضو..!! عذبنى و زيد عذابك..و زى ما نسانى قلبك يمكن قلبى ينسى...وردى طبعا وايضا محمد يوسف موسى... معليش الظااهر سرحنا بعيدا مع محمد يوسف...
طال انتظاار ليلة السبت.. و قبل ميعاادنا بسااعتين و رجيتك فى انتظار عينيك كملت الصبر كلو و راح الميعااد و زمانى راح و اوعك تخلف الميعااد
عليك الله شوف كم شااعر كتب الكلاام الفوق دا و كلها موااعيدو لقاءات... و المحيرنى الزول القال: اغالط نفسى فى اصرار و اقول يمكن انا الما جيت كلاااااااااااااااااام و بس...
تخريمة: شكرا سوسن على انتشال البوست من الاعماااق لى يومين بفتش عليهو..
شكرا كتير...
06-26-2007, 04:25 PM
الطيب شيقوق
الطيب شيقوق
تاريخ التسجيل: 01-31-2005
مجموع المشاركات: 28804
اقسم بالله انا بقرأ في المداخلة بتاعتك دى يا المرتضى وكنت زى الانسان المنبطح لعملية مساج ولما وصلت الحتة بتاعة يد الحرير ارتعشت وتن تار وتن تار وتن تار وقفت على طولى وانا في المكتب و بديت اعمل في حركات لا ارادية بعد شوية فتّحت وقلت استغفر الله .
وحياتك يا المرتضى كب الحب كلوووووووووووووو في الهواء الاسفيري ده قبل اعصار باكستان ما يجينا .
06-26-2007, 07:01 PM
أحمد طراوه
أحمد طراوه
تاريخ التسجيل: 12-25-2006
مجموع المشاركات: 4206
... الي كل من يجمعون باقات الورود و يُعدون مفتخر الثياب في انتظار ليلة السبت .. كتب القصيدة شاعر اسمو ( محمد حسيب القاضى) ! لا ادرى ان كان فلسطينى او من الشوام عموما او من فلسطينيى غزة الذين عاشوا و تعلموا في مصر ! و واضح انو يوم الخميس و منذ عهد السودان التركى ، هو يوم (الحفلة و الرقيص ) .. اذ يقول الحردلو (محمد احمد ابوسن) : الزول السمح يوم الخميس واعدنا .. ومن ديم كسلا كان فتنا منو بِعدنا .. يا عبد الامين ما شفتو كيف واددنا .. ترا دا المنسينا العقاب و بلدنا ! وصدق من قال : خاصمت الكل علشان حِبانى ..
06-26-2007, 09:55 PM
Muna Khugali
Muna Khugali
تاريخ التسجيل: 11-27-2004
مجموع المشاركات: 22503
( ضرب بموت الشاعر المحب مضاض المثل فى زمانه . قال رجل من أهل الطائف يقال له بهنان ، كان من أهل هزان بن سكسك : ____ أموت اذا جد الفراق بيثرب . كما مات من حر الفراق مضاض فتى لم يخن لكن ردى الدهر خانه . تولى وللأيام فيه عضاض فباد ويحيى ذكره بعد موته . حديث على طول الزمان مفاض وخاض ببحر لم يكن منه مصدر . بعيد على الوراد ليس يخاض دعاه وقد قضى من الموت نحبه . بنات الثرى من دونهن رياض ___
لقد مات مضاض وهو يشكو ظمأ المسامحة . وماتت فى أثره مى تشكو ظمأ الندم وكان أول الذين ماتوا عشقا فى الجاهلية . ( يا سلام ع .....
06-28-2007, 02:14 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
Quote: صدقوني إن عدد القصائد هنا لاتكفي لتنفس عاشق واحد كتمبس ، والكلمات الورود والتعابير الأزاهير أصبحت في السوق السوداء
نعم..أيها الصديق الـ "ما بينهبش باليد"..محمد المرتضى حامدالأجواء في المنبر سوداوية إلى حد كبير..وممتلئة بمعارك وهمية ...وعرسان مختلفين لقضة واحدة أو لقضايا متعددة ..ما فرقت ..لكنها في الخلاصة..عرسة لا تقدم جديدا يغير في واقع حياتنا ..بقدر ما هي تعكر صفونا وتخرب أمزجتنا الصباحية الرايقة ... بدل ما الواحد يدخل المنبر بحثا عن كوتته الإيجابية ..ليبدأ بها يومه ... يلقى الكتاحة قايمة ..بين زعيط ومعيط ..
شكرا لك ..وللمتداخلين ...على هذه الروح الحية ..المنعشة التي تعطر هذا الحوش... ..عن الحب ...والورود ..سيأتي كلام...لو مد في الأجل...وظل بابكم متركشاً.. ودي وتقديري ...مزيج بمزاج ...
Quote: ... الي كل من يجمعون باقات الورود و يُعدون مفتخر الثياب في انتظار ليلة السبت .. كتب القصيدة شاعر اسمو ( محمد حسيب القاضى) ! لا ادرى ان كان فلسطينى او من الشوام عموما او من فلسطينيى غزة الذين عاشوا و تعلموا في مصر ! و واضح انو يوم الخميس و منذ عهد السودان التركى ، هو يوم (الحفلة و الرقيص ) .. اذ يقول الحردلو (محمد احمد ابوسن) : الزول السمح يوم الخميس واعدنا .. ومن ديم كسلا كان فتنا منو بِعدنا .. يا عبد الامين ما شفتو كيف واددنا .. ترا دا المنسينا العقاب و بلدنا ! وصدق من قال : خاصمت الكل علشان حِبانى ..
الجميل احمد طرااوة...
والله ما قصرت تب و شكرا للمعلومة و لتحية و التقدير للشااعر محمد يوسف موسى..
[تخريمة: شكرا سوسن على انتشال البوست من الاعماااق لى يومين بفتش عليهو..
شكرا كتير...]
الاخ محمد عثمان
قادر تتخيل لمن تكون في ضيقه والفرج يفتح ليك باب اهو البوست ده بحسه مفتاح فرج!!! كل مايختفي برفعه لكن الله غالب الناس فيه ما بقدر علي حروفهم بنقراءها وبنزوق ممكن نحاول لكن المحاوله ذاتها صعبه عشان كده هو ذي البحر تمشي ليه وتونس في صمت وامكن تغني وامكن تشكي وتبكي وترجع خايف يشوفك زول وتبقي في السؤال مالك وتغلبك الاجابه.......
قادر تتخيل لمن تكون في ضيقه والفرج يفتح ليك باب اهو البوست ده بحسه مفتاح فرج!!! كل مايختفي برفعه لكن الله غالب الناس فيه ما بقدر علي حروفهم بنقراءها وبنزوق ممكن نحاول لكن المحاوله ذاتها صعبه عشان كده هو ذي البحر تمشي ليه وتونس في صمت وامكن تغني وامكن تشكي وتبكي وترجع خايف يشوفك زول وتبقي في السؤال مالك وتغلبك الاجابه.......
لك التقدير
سوسن...
التسجيل هنا فى هذا البوست اتوماتيكيا...البيدخل هناااا لن يستطيع الخروج و يلا ابقى ماسكة لوحك...و البيت بيتك.. و الحب ديدن الجميع هناا فى هذا البوست الذى تمكن من فك شفرة ارتعاشناا اصبح لنا واحة نستظل بها من هجير حاااجااات كتيرة و اصبح الملاذ الامن الذى نهرب اليه حتى لا تصيبنا الشظاايا التى تنطلق من هنا و هنااك عشوائيا..!!! نذكر لو المرتضى و بقية الناس الحلوين الهناااا انهم كسروا لنا ا شفرة لغة الجان فاتاحوا لنا مداخل كنوز وادى عبقر .. وفتحوا لنا عوالم الليل.. وكما قيل ان خاويت الليل فتح لك مغاليق صمته..
لن نتركك تذهبين للبحر وحدك..و البحر ايضا لم يتركه الشعرا وحيدا و حدربى محمد سعيد فى راائعة محمد ميرغنى: ياا الناااااازلة ماشه على البحر.. سااعة الحلب سااعة الشمس ياادوب بتطلع.... و الشعااع من بين فتيحاات الغصون رقرق على قش الدرب....
و قبله جعل ابن الشرق بااازرعة البحر شااهدا على حااله و هو يحكى عن ايااام خلت: يا ربا البحر أشهدي هاهنا كان موعدي وهنا كان مقعدي أنا والنجم والمساء
الراحل مصطفى سيد احمد ايضا كان له صولاات مع البحر عندما غنى: وفى البحر .. إنتظزنى .. أنتظرنى فى حفيف الأجنحة والمساءات الطيور النازحة حين تنهد المزارات و تسود سماء البارحة.. إنتظرنى..إنتظرنى و ايضا اغنيته المشهورة عجاااج البحر: يراقصني عجاج البحر .. ترعد داخلي الأمطار يكلمني تراب الأرض .. تشدو قلبي الأوتار .. أغنيكم .. أغنيكم .. أغني جذوة النار التي فيكم ..
و عتيق لم ينسى ليلته فى شاطئ النهر: ما بنسي ليلة كنا في شاطي النهر نتعاطي خمر الحب بكاسات الزهر والبدر مزق ظلمته و سفر ازدهر في النيل سطع بي نوره واتقطع بهر
و ننتظر الجميل احمد طرااوة يتم لينا الباااقى...ان كان فى الكاس باااق..
شفتى البحر كيف..؟؟؟ على وزن اغنية فيروز.. شايف البحر...!!!
يديك العااافية....
06-29-2007, 10:32 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
عثمان موسى، أخونا أحمد ده لما يتكلم عن الغنا وتاريخو بيكون في الأصل بيتكلم عن تاريخ الحب والجمال ، كدى خليهو يقول ليك قصة الشاعر اللي جا ولقي المحبوبه نايمه قال فيها شنو ، ما تخلط بين حالة ناعس الأجفان والناعسات عَيوني ، أنا باتكلم عن السمحه وهي نايمه وفي مرحلة من النوم بيحصل frequent blinking للجفنين ناس طراوه ديل في الطب بيسمو الحاله دي ال Rabbit Eye Movement ونحن بنسميها حركات التحرر.
تذكرت قصة صديقنا المقروح والذي كان منوما بمستشفى الجامعة كان يعاني من القرحة ومن احدى حسناوات الجامعة الامريكية ، وكانت متنزة بعض شئ ونسبة لتفاقم القرحة قرر صديقنا ان يقلع نمرها وكانت هذه فرصة لاخونا عادل ان يتقرب ويركب ليها لوحة جمرك اسكندرية واتته الفرصة ونحن في طريقنا لزيارة المقروح بالمستشفى وكان في معيتنا زميلاتنا الصدوقات قابلتنا الحسناء وقد زاد اكتنازها وكانت تنتعل بنطالا بالزيت نظر اليها عادل وبعد السلام قال ليها والله سمنت يافلانة ردت عليه بسذاجة عرفتني كيف تنلجلج عادل وترجرج ثم قال لها
؛( جضومك كبروا)
تحياتي للوالد الاستاذ حامد عبد الله والعقد الفريد
07-15-2007, 11:50 PM
Osman Musa
Osman Musa
تاريخ التسجيل: 11-28-2006
مجموع المشاركات: 23082
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة