|
الليلة يا المرشح الرئاسي و يا نانسي عجاج الله قال بي قولكم ..
|
أولاً و قبل كل شيئ إعتذاري الشديد للمبدعة الفنانة / نانسي عجاج إن أقحمتها في هذا البوست وهي لا ناقة لها فيه و ربما و لا حتى معاينة أو مداخلة .. ـ و حقيقة الأمر أن أخاً كريما و زميلاً و صديقاً صدوقاً فاضلا من أعضاء هذا المنبر نبهني بلطف إلى واحدة من خطرفات و ( محن ) و ( وهمات ) المرشح الرئاسي الدكتور ـ و الله العظيم يا جماعة أنا هسع بكتب و ناسي إسمو رغم إني عارف أسم أبوه و جده و جد ابوه كمان ـ أقصد الدكتور بتاع القواعد الإنتخابية و الموية الأبت تنزل من الماسورة ، الزول بتاع الجاكات الغريبة داك ياخي .. كتب هذا الموهوم وهمة السنين ..
Quote: لقد قام المدعو عصام دياب بعمل بوست فى موقع سودانيز اون لاين وقام بأنتحال شخصية نانسى عجاج بعلم وموافقة صاحب الموقع ، ادعى فيه انها تكذب مقالتى بأنضام بعض الفنانين لمجموعاتى لرئاسة الجمهورية بموقع الفيس بوك ، مع العلم ان الفنانة نانسى عجاج منضمة لأكثر من 7 جروبات لى فى موقع الفيس بوك وهى من اقوى الداعمين لها، يمكنكم التأكد من ذلك بالضغط على مجموعاتى بالفيس بوك اعلى الصفحة . |
و تابعوا ..
|
|
|
|
|
|
|
|
Re: الليلة يا المرشح الرئاسي و يا نانسي عجاج الله قال بي قولكم .. (Re: عصام دهب)
|
و من هسة دي يا جماعة عشان ما في زول يجيئ يشبكنا ليك باركوها و أركنوها و بركنوها و الذي منو ، و عشان ما في زول يجيئ يقول ليك انتا ( متلقي حجج ) و ( كايس ليك سبب ) و حركات و هناي و إسمو شنو .. و عشان ما في واحد يجيئ يتفلسف و يقول ليك الزول دة قال ( عصام دياب ) و ما قال إسمك ..
أهة انا من هسع دي إسمي عصام دياب ..
و عصام دياب الدين ذاتو كان عايزين !!
موش على كيفي ؟؟
ـ بالله خلونا نشوف شغلنا ..
رزقاً تكوسو !!
| |
|
|
|
|
|
|
Re: الليلة يا المرشح الرئاسي و يا نانسي عجاج الله قال بي قولكم .. (Re: عصام دهب)
|
الزول المدهش / حمور
Quote: العار و الشنار لمن يتداخلون باسم الفنانة نانسي و بعلم بكري ابو بكر لدعوا ان الفنانة لا تؤيد المرشح الذري رغم انها على قمة مجموعاته الداعمة في الفيس بوك و عددها 7 مجموعات في عين العدو و الصلاة على النبي |
و كدة يا حمور أنت أكدت لي شكوكي بشان علاقة المثقف بالسلطة ـ بفتح أي حاجة ياخي ـ ما صدقتو إنو الراجل خلاص قرررب ، قمتو تشتغلوا ليهو بي ( تقلكم ) .. لدرجة ( النيل ) من ( سيد الشي ذاتا) أخونا / بكري خليك من عصام العامل فيها نانسي دة ..
ـ الله في .
| |
|
|
|
|
|
|
Re: الليلة يا المرشح الرئاسي و يا نانسي عجاج الله قال بي قولكم .. (Re: طارق جبريل)
|
أهة يا شباب .. أنا زيي و زيي خلق الله في البورد دة قمت قريت المداخلة بتاعت / نانسي عجاج في البوست داك ..
و صنننننننن صنيت ، زي التقول قشطوني كف صاموطي كدة ..
فتحت خشمي لمن ( ريلت ) عدييييل كدة ..
اتخيلت ليك نفسي في محل أخونا القال نانسي ( دعمتو ) دة ..
طوالي قمت بكيت ..
أعاين لي صورة نانسي أقوووم ( أبكي ) زيادة ..
زيادة يا حمور ..
فجاة أعاين لي صورة الزول داك ..
و أتخيلوا و هو بيقرأ في الرد بتاع نانسي ..
أحس نفسي زي عايز ( اريل ) تاني ..
و فجأة كدة القى ليك روحي بقيت عوير .. ــ الله يصبركم علي ..
| |
|
|
|
|
|
|
Re: الليلة يا المرشح الرئاسي و يا نانسي عجاج الله قال بي قولكم .. (Re: حمور زيادة)
|
كدي قبل الرئيس العويص يا عصام ليه يعني ما بتبارك لينا مولودنا زعلان مننا يعني ولا ايه يا ابو النسب؟ ====================== بعدين السيد المرشح لو قال نانسي معاهو و ما هماه تبقي معاهو و لو قال عصام دياب عمل حركة في شكل نانسي يبقي عصام دهب و عمرو دياب عملوا الحركة الما لذيذة دي حقد منهم علي السودان شخصياَ مع انه عمر دياب داعم المرشح دا لبلدية مرسي مطروح،، دي انا مالي يدي منها الله و الرسول نقول قولنا هذا تحوطا و تحسبا من ان نطر لقضاء عمرنا في المعارضة و المجابدة كومو انه فوز المرشح اقرب من حبل الوريد يقوم يحيلنا للصالح العام ايميل ساكت ما نقدر نكتب
| |
|
|
|
|
|
|
Re: الليلة يا المرشح الرئاسي و يا نانسي عجاج الله قال بي قولكم .. (Re: مزمل خيرى)
|
رويدكم و حنانيكم يا شباب ..
وسعوا المنقة و روقوا اللعب و خلوا الربشة دي ..
أديني المايك دة بالله يا دفع الله ..
و حقيقتن الواحد زي عايز يستغل البوستي دة و شهرة المرشح الرئاسي لأغراض شخصية ..
و عائلية بحتة ..
يا جماعة أول حاجة عايز أقول ليكم باركوا لي ..
( مواهب ) بت خالتي جابت ولد ..
و الولد دة ولد زميلنا و أخونا / نصار ..
و يا علاء الدين و الله يطرشني و يقدد إضنيني كان سمعت قبل كلامك دة ..
و ياخي ألف حمد لله على السلامة و ألف مبروك و إن شاء الله ربنا يجعلو من الأخيار و يبعد المعارضة من سكتو ، و يرشحو في نفسو دي و يفوزو بالتزكية و الإجماع الجهري الما خمج ، و نشوفكم كدة في التلفزيون تحكوا لينا عن نشأة السيد الرئيس و إهتماماتو و إعتمادو على نفسو من ما هو سغنتوتي و إصرارو على تغييير ( حفاضاتو ) براهو من يوم ولدوهو .. و بصفتي ( خال ) الرئيس يبقوني ليك مدير التلفزيون ويمسكوني معاهو وقاية النباتات زي الما حصل شيئ .. مبروك يا أبو النسب و مبروك لبتنا و للسيد الرئيس و يحفظكم كوللكم .. و بجيكم بي رواقة .. ــ شكراً جماهير ..
و خليكم معانا ..
| |
|
|
|
|
|
|
|