الأنثى العورة والرجالة السودانية..يوجد سوط عنج

Quote: والله ما عارف أقول شنو يعني بحس مرات كدة أننا كسودانين ما بتنفع معانا ديمقراطية وانو نحن بنتشدق بشعارات من جوانا ما مؤمنين بيها ومنبر سودانيز ده أحسن تأكيد لأنو للكلام ده .. لأنو اي نقاش ببدأ جميل وممتع وبعد شوية يتحول لشخصنة وشكلة بين اثنين وتبدأ تتشكل معسكرات تأييد لكلا من طرفي الشكلة .. ولاحظو انو البيحصل ده بين ناس على قدر من التعليم والثقافة والعمر والتجربة .. يعني ما افتكر هناك ما يدعو إلى الإساءة والإقصاء لشخص ما لمجرد اختلافه معي في الرأي .. يعني هو الواحد بيخش منابر الحوار عشان يثبت للناس إنو أعلم زول وأفهم زول وإنو هو الشافو خلو وإنو لا يأتيه الباطل من وراءه ولا من خلفه ولا الحكاية شنو؟ .. (ما تقولوا لي شنو؟) يا خوانا ده منبر للتعلم والتعارف والحوار يعني الواحد مفروض يجي بقلب وعقل مفتوح عايز يتعلم ويعلم ويناقش ويحاور وكمان مفروض يخت في بالو إنو ممكن رأيه يكون غلط وممكن الصاح يجي من واحد/ة أقل منو (زي ما هو شايف) يعني بالعربي كدة ما في داعي يا جماعة الواحد يفكها في نفسو لأنه حواء والدة وفوق كل ذي علم عليم .. المهم دي ما محاضرة والله، فإنا عارف انه الكلام البقول فيهو ده بديهي ومعروف للكل .. بس ناقص التنفيذ .. يعني كل واحد يقعد في الواطة دي ويسمع كلام الزول التاني للآخر .. لو اقتنع فبها .. ولو ما اقتنع يقول وجهة نظره ويناقش ويجادل ويفند من غير إقصاء وتسفيه آراء وخروج من النص .. أقول ليكم حاجة الحاصل ده كلو سببه الكيزان آي والله سببه الكيزان عارفين ليه لأنوا من عشرين سنة اقصونا كلنا وانقضوا على أحلامنا في وطن جميل وسيع اخضر يشيلنا كلنا ويظلنا لكنا .. عشان كدة من اليوم داك اخلاقنا بقت ضيقة وماشة كل يوم ضيقة لحدي ما قربنا ما يكون عندنا اخلاق زاتو .. وبقينا الواحد قاعد على الهبشة ما بستحمل أي كلمتين ثلاثة ما يوافقو مزاجه عينك ما تشوف إلا النور .. في التنك طوالي .. وبالمناسبة يا بت قضيم كلامك عن أنو مجتمعنا بقى زي السعوديين الواحد/ة قدام الناس حاجة ووراهم حاجة تانية ، دة برضو سببه الكيزان تصدقي .. فخلال العشرين سنة دي ثقافة الكيزان ألقت بظلالها على مجمل الحياة في كل النواحي سياسية ، اقتصادية ، إجتماعية .. وطبعاً هم أحرف من يطبق منهج الإزدواجية والنفاق دة .. دي نقطة .. النقطة التانية بتفق معاك تماماً في الموضوع الأساسي للبوست وهو إنه ما في سبب يخلي الواحد يسيء الآدب في نقاشو مع البنات .. عيب والله كبير وأبسط ما يقال عنه إنو سلوك لا يشبه الرجل السوداني في شيء غير كدة المسألة ما بتستاهل لأنو مجرد نقاش مفروض الناس تراعي فيهو الحق في إبداء الرأي سواء عجبنا ولا ما عجبنا وبعدين بصراحة كدة أنا قاعد أخجل لمن واحد يسيء لبنت وبستغرب كيف ممكن دة يحصل .. ياخي لو الفي البورد دي أختك بتقبل واحد يتكلم معاها بالصورة دي؟ رحاب خليفة اثارت نقاط بشوف إنها صحيحة فالمرأة تضر بقضية المرأة أكثر من ضرر الرجل .. والشيء دة ظاهر فكثير من البنات المثقفات الجامعيات قبل الزواج تلقاها مدافعة مستميتة عن قضايا المرأة وبمجرد ما تتزوج تلقاها بقت زي أمها وأول حاجة تعملها تطهر بناتها.. يعني كأنوا كل الكلام الكانت بتقول فيهو دة عشان تظهر بمظهر الفتاة العصرية المستنيرة المثقفة إمكن استجداء للزواج وبعد ما تتزوج يبقى خلاص الاستنارة والثقافة دي لزومها شنو .. المهم الكلام كتير لكن في النهاية بتمنى من الأخوات ما ينسحبوا ويواصلوا طرحهم والواحدة لو قدرت ترد على شيء أثارها أو زعلها أو أساء ليها .. اضعف الإيمان تفضوا وترد على غيره .. وشكرا جميلاً ناذر جمال باهي