الكتاحة والحيكومة

Quote: الكتاحة والحيكومة تشهد ولاية الخرطوم وبعض مدن السودان موجة من الاتربة والاغبرة المتواصلة ليل نهار طوال فترة الاسبوع الماضي وحتى لحظة كتابة هذه الورقة ، جرت العادة عند حصول اي كارثة او معاناة من شيء ما ان تتوجه اصابع الاتهام نحو السلطة التنفيذية للدولة او كما يحلو لنا تسميتها "الحيكومة" ، الملاريا: بسبب الحكومة لا يوجد صرف صحي تتراكم مياه الامطار يتوالد البعوض اذا هي مسئولية الحكومة ، الدوء ما في او غالي: هي مسئولية الحكومة رفع الدعم عن قطاع الصحة و... الكهربا قاطعة: السبب الحكومة لانها لم تستعد لموسم الصيف وازدياد الاستهلاك، نسبة عطالة زايدة: الحكومة لم تضع سياسات تعليمية ولا خطط تنموية تستوعب بها الخريجي/ات وا.......وهلم جرا. ولكن حين ياتي الامر "للكتاحة" هل يكننا ان نعيد نفس السيناريو بمعنى هل ستكون الحكومة هي المسئولة عن هذه المعاناة والتي طالت الكثيرين منهم من مات جراء الحساسية او لحوادث حركة لانعدام الرؤية ليلا او او.....خطر ببالي هذا السؤال هل هناك علاقة بين "الحيكومة" "والكتاحة" ووجهته لعدة افراد: فاجاب احدهم: - آي الحكومة هي السبب المباشر في الكتاحة - كيف؟ - سد مروي - بسم الله السد علاقة شنو بالكتاحة؟ - دقيقة النشرح ليك: طبعا السد زاد من مساحة المسطحات المائية هو بالاضافة الى بحيرة السد العالي عملو تغيير في جغرافية المنطقة زيادة المسطحات المائية ومع رتفاع درجات الحرارة ادى الى تبخر المياه وتكثفها في شكل سحب مما ادى الى هطول امطار في الشمال عمرك سمعتي بمطرة شهر خمسة في الشمال ، عمرك شفتي كتاحة بتجي للخرطوم في شهر خمسة من جهة الشمال ما يا اما بتجي من الشرق او الجنوب الغربي مع بداية فصل الخريف. وطبعا الحكومة هي السوت سد مروي اذا هي السبب في الكتاحة. -!!!!!! وأفاد آخر: - ايوا الحكومة هي السبب عدم التشجير والجفاف والتصحر لانعدام سياسات استثمار الاراضي الشاسعة مما ادى لتصحرها، وكمان الحرب لانها ادت الى نزوح او هجرة الانسان وهروب الحيونات وبكدا ادت مجال للتصحر ...عشان كدي بتجي الكتاحة وانكر احدهم: لا لا ديي من الله ، الحكومة ما عندها فيها يد يعني الحكومة قالت للكتاحة قومي، دة كلام دة. - وقاطعه آخر ها عاين العوير دي قال ليك الحكومة بالعاني جابت قصة الكتاحة دي عشان الناس تنسى موضوع الكهربا وناس الكهربا يقولو للناس نحن قاطعنها تفاديا للحوادث التي قد تنشا من تقطع الاسلاك وحرصا على سلامة المواطنين. - طيب وكيف الحيكومة عملت الكتاحة - قال ليك الحكومة وبالاستعانة بجهات اجنبية استجلبت طائرات لديها المقدرة لاثارة الاغبرة والرياح ... ناس الحكومة ديل ما هينين. !!!!! ويفيد أخر - لا لا ياخي صاح الحكومة جابت الغبار لكن ما عشان تقطع الكهربا عشان ترفع معاناة الحر ودرجات الحرارة المرتفعة عن كاهل المواطن - يا زول اليخلونا في حرنا ويرفعو المعانة في حتات تانية صفية مساعد - الخرطوم مايو 2009

Quote: غايتو : حيكومات تجي وحيكومات تغور !

Quote: كيفنك .. ليك مدة مختفية ...

Quote: ايوا الحكومة هي السبب عدم التشجير والجفاف والتصحر لانعدام سياسات استثمار الاراضي الشاسعة مما ادى لتصحرها، وكمان الحرب لانها ادت الى نزوح او هجرة الانسان وهروب الحيونات وبكدا ادت مجال للتصحر ...عشان كدي بتجي الكتاحة

Quote: This is completely true

Quote: ســت الكتاحـــة ..

Quote: موضوع البيئة ده موضوع مؤرق فعلا حكومة لا تهتم بالانسان نفسهلا يتوقع منها ابدا الاهتمام بالبيئة

Quote: وشكرا علي المقال الرائع الذي يكشف عن قدرات صحفية هائلة يمكن ان تسبب كتاحة في السياسة والاعلام والطب كمان

Quote: والله دي ما وقعتلي كدي ابن افصح ياتا اللابسة اصفر بنفسجي ولا احمر؟؟

Quote: عرفتيك بيها مع بتهــا الناجحــة الجابــة 255

Quote: السلام عليكم ورحمة الله وبركاته ..

Quote: يا صفية الف سلامات ياخ الشوق كتاحة مساهرة مالك ؟؟؟!!!! انا حاسة شوية و القصة دى عاملة لى أرق نشوف كان نحننك و تجى بالسكة كما وعدتى من قبل سلام

Quote: دكتورة كيفنك ياخي

Quote: االكتاحه كتاحة ناس الجبهة اقطعوا في الاشجار ويبنوا في العمارات انظري للحزام الاخضر الان اصبح مدن اسمنتية وشوفي حي المجاهدين والفردوس والرياض وحرص قيادات الهوس للتباهي بحضور صلاة الصبح بمسجد سيده سنهوري ومن بعده يذهبون لاكل الاموال بالباطل الكتاحه اتت من قطع الغابات في القضارف والدمازين والنيل الازرق ويجبوها طلح وفحم للبيع اعرف من يعمل ذلك بالغابات بدلا من التشجير هم نشاط في التصحر والجفاف وشطار في لغف المال العام ليه ما تجيكم \ن كتاحه ودي الحكومة ربنا يعلم ما تعمل فيه في عا 99 حسن مكي يزعجه ازدياد الحزام الاسود في العاصمة وينبه لخطره لا يريد اللون الاسود ويعتقد انه ابيض انجلو ساكسوني غايتو الامر في غاية الصعوبه مع كتاحة الجبهة الاسلامية شديده الخرب لك التحية الدكتوره صفية واري كيزان المنبر يتظارفوا في المنبر والاختشي مات

Quote: لكن ما قلت لي رايك شنو في حكاية السد والكهربا والكتاحة

Quote: الكتاحة والحيكومة

Quote: سوف ارجع لك ونشوف كتاحة الجبهة التي لا تجعل للاخر مدي رؤية

Quote: قال ليك الحكومة وبالاستعانة بجهات اجنبية استجلبت طائرات لديها المقدرة لاثارة الاغبرة والرياح ... ناس الحكومة ديل ما هينين.

Quote: قال ليك الحكومة وبالاستعانة بجهات اجنبية استجلبت طائرات لديها المقدرة لاثارة الاغبرة والرياح ... ناس الحكومة ديل ما هينين.

Quote: كلهم عليكم؟؟ الله يكون في العون.. لانه شكلهم الاتنين مافي طريقة خلاص منهم! ازيك يا صفية..

Quote: يا دكتورة ســلامات ... مافي اي شك بان للحكومة ضلع في هذه الكتاحات بعد إزالة الحواجز ولكن ليست الحكومة وحدها بل ما سبقها من حكومات أيضاً ... أما الكهرباء فالمهندسين غطسوا حجرا ... كان من الافضل ترك العمل فيها للكوريين أو الصينيين الذين لهم باع طويل في هذا الأمر .. والسد يعتبر إنجاز تاريخي يحسب لحكومة الانقاذ ......... وبس ..

Quote: مفروض التحدي والصراع يكون حول الجهة القادرة علي تركيب (مكيفات هواء) كبيييييييييييييرة في كل اركان وكراكير الخرطوم الاربع... تركب مكيفات ل جي ممكن تلقا اصوات الاقاليم المجاورة برضو..

Quote: طيب يا دكتورة الهمبريب حق الصباح دا حركة شعبية ولا شنو .. مودتي ...