|
فاطــــــــنة
|
صباحنا القيل تحت الضليل الرامى منك شايل شمسه فى ايدو ومباريكى
وفرحنا الميل فات حد الخفوت مرق حاضن غناهو ويحكى عنك نفض شرك السكوت ووسط البلد واقف يناديكى
يا فاطنة سألتك بى دم الروح المدفق نيل امرقى على الخلوق الشاته تشحد فى سماك الفوق مغطيكى يا فاطنة ندهتك بى لسان شغفى الأساهو طويل فكى جداول إسمك المسحور واسقينا شوفى بلية الولد المرق مجبور ونادينا اربطى جبيرة الخاطر الدوام مكسور وداوينا نرسم ليك شمس محروسة بالأفلاك نلون ليك قمر فى حضنو رك ملاك نحلب ليك غنا الليل المحين ريد تشربى بى كفوفنا لما تتكفى وتنهلى من قلوبنا لما تدفى
يا فاطنة
هاكى الفينا فضل من غنانا بعد عشرق علينا الصوت وهاكى الدنيا مزروعة مرسفة بالشدر والناس تسبح ديمه بى نونك لا بتفوت ولا بنفوت لا بتموت ولا بنموت هاكى رحيح ارواحنا كايسك يوت شيلى الباقى من فضلة منانا
يا فاطنة
راوى الحلة غناكى بالفا فرح يغشاكى يملاكى بالأ أرض مكسيه بى خدرة بهاكى
بالطا طعم اشهى من الشهد الساكن جواكى
بالنون نعيم يغمر رباكى
بالها هيام ماسك تلابيب البريدك ومن زمن سادر وراكى
|
|
|
|
|
|
|
|
Re: فاطــــــــنة (Re: أبوذر بابكر)
|
بالفاء فوق مشارع الري الأمة راجياكي بالأ أرحكي أنكربي ما تتلفتي بي وراكي بالطاء طال سهر الغريب مهموم أرح لوليهو بي غناكي بالناء نام فرح البعيد مهضوم حزين باكي بالهاء هادي القعدة في أحلام رباكي بعاين العقبات خاتماني وعاقباكي أتختريها قبال ماتتختراني تالاكي هادي القعدة حلف بالله ماني ناطاكي هادي قعدة لا حولا الأمة راجياكي ... أبوذر من كأس فاطنة تسقينا بكل الأمزجة
دمت بقامة الوطن
| |
|
|
|
|
|
|
Re: فاطــــــــنة (Re: سمية الحسن طلحة)
|
انت عارف يا ابا ذر انا بحب العنواين التي تتكون من كلمه واحده
وجيت داخل .. رايت ثم قرات...
فاطنه......... وكفي..... لك الحمد يالله علي نعمة إبداعك التي تجرجرني للقراة لمثلك
شكرا علي فاطنه بالمناسبه هو نفس إسم الوالده عليها رحمة الله بت حسن !
| |
|
|
|
|
|
|
Re: فاطــــــــنة (Re: ibrahim kojan)
|
تقيف تحلف تخلي الدنيا بالفيها قلوب خلق الله تتشهد عشان فاطنه الحلم بطلع قوافل هم تسافر في زمن ابعد تحد الحد وترسم بي خطا الراحلين حدود اوطان وتتجدد بتسال فاطنه في الراجعين وفي الابسين وما لابسين وما ناسين وناس امين فاطنه السمحه تتوحد...
ابا ذر...لك التحيه....هذا الفيض من الجمال...والروعه والحضور...واصل
| |
|
|
|
|
|
|
Re: فاطــــــــنة (Re: salah ismail)
|
Quote: يا فاطنة ندهتك بى لسان شغفى الأساهو طويل فكى جداول إسمك المسحور واسقينا شوفى بلية الولد المرق مجبور ونادينا اربطى جبيرة الخاطر الدوام مكسور وداوينا |
صديقي المطر أبو ذر
ها انت تطلق جداول السقيا وتسقينا..
وتربط جبيرة خاطر المنبر المكسور ..
أرجو الا تفيب طويلا عن هذا المكان يا مطر
حتى لا يعود جديبا قاحلا..
| |
|
|
|
|
|
|
Re: فاطــــــــنة (Re: أسامة عبد الجليل)
|
اسامة عطر الحضور اصل الوسامة
كيفك يا ابا مهيار الجميل
بى جيتك بتنبل اراضى الفرحة والله وتخضر اللحظات معاك
وطالما إنتو قاعدين ومفرهدين
ما بصيب المحل "محل" ولا بغشاها يباب
| |
|
|
|
|
|
|
Re: فاطــــــــنة (Re: ibrahim kojan)
|
كوجان
شفت ضوك من شمس حرفك وقد والباب دقته الغيمة ورذاذ عبيرك كلمت بيهو البلد
من دخلت داره يا إبراهيم
فهو آمن
والريدة ليك
والرحمة كاملة للوالدة الحبيبة
| |
|
|
|
|
|
|
Re: فاطــــــــنة (Re: سمية الحسن طلحة)
|
سمية
إسم السمو الأجل الأعلى
نضمك معنكش بالنضار لا فالصو لا بيعة بوار حسك مغمس فى الشمس بت النهار يجهر تقول ضو الفنار
وبالسا سعد عم الديار بالما مسيد مداح وطار باليا ينبوع كرم اهلى الكبار بالها هلال عيدنا الطلع فرحنا زار
| |
|
|
|
|
|
|
Re: فاطــــــــنة (Re: عبدالله داش)
|
أهلا بالزول الدعاش
كيفك
وحاجاتك السمحة ديك
بقيت زى حالنا كده تغيب يا داش
إن شاء الله جيتك دى تصبح عينة كاملة المطر والدسم والرشاش
وخلى همبريبك يملا الفجة
ومرفق ليك
محبة وود كتير
| |
|
|
|
|
|
|
|