|
|
 حمـادة بـت يتغني داخل ركشـه
|
اول الحكــي
هزي إليك بجذع النبع
واغتسلي
من حزن ماضيك
في الرؤيا وفي الإصرار
هزّي إليك
فأبراج القلاع تفيق
النحل طاف المراعى
وأهداك السلام رحيق
الشرق أحمر
والنعمى عليك إزار
نجرى ويمشون للخلف
حتى نكمل المشوار
الكـلام لـ : محمد المكي ابراهيم
لامجاد ايضا عيوبها كم للدفـارات
كنت اظنني اكره الدفار واحب امجاد ، لكن بعد اضطراري في كثير من الاوقات الى امتطاء صهوة الركشات ، عرفت ان لكل عيبه فالدفار تجده فرحان في موسم ماطر ومطين بستين طينه يخوض بك الاوحال ومن غتاته وحقده على امجاد والركشات ، ما ان يلمحهما على الشارع يترك كل الشارع وعلى رحابته ويعاين ليك لاكبر حفرة وتيييف يعفصها ، فتغرق امجاد ومن في داخلها في شبر مويه ، اما الحنينه الركشه ، فيضطر اهل الشهامة ان يخرجونها من حفرة عمقها اربعة امتار .
فامجاد بها كرسي الشهيد ،والكراسي الخلفية هم بالطبع رفقاء الشهيد ..
فعليه يبقى المثل المفضل لدى اصحاب التكاسي
العملتها امجاد في التكســي لقتها في الركشــه
فجو عاصف ومطين وماطر مثل هذه الايام ، يجب ان تتخير فيه وسيلة مواصلاتك مما ذكرته اعلاه ..
اتدرون سادتي ايهما العن من هكذا خيارات ؟؟
هو ان تجازف في ذات مطرة بتنقط بسيط والشارع ليس مبلولا بما يجعلك تخاف من المغامرة بايقاف ركشه ..
ومع ذلك يكون قمة دقســانك ان لا تعاين الى السماء ، فيفوتك ان تعرف ان هنالك براق قبلي يشلح وتلهيك اكثر الصوله الموسيقيه التي تقفل بها هذه الايام الاغنيه (ادروب شرد ، جاب لي مرض )) حتى يتمتع الناس وبمزاج ويردوحوا فيها رقصة ، شية رقصة القرد وشية رقصة الاعرج
..والمطره تعد في العلن لثورتها على الارض وبيوت الطين وبيوت الطوب الاحمر وحتى زفت الظلط لانها تعرف تماما كيف تقلعه ، تكون انت في غفلة عن كل مايجري مع انه امامك وعلى وضوح من الامر ..
فتصم
لكن نعمل ايه ؟؟
دا كلو من بتاع الركشه الزفت دا .. فتستبيح سياط المطر ، راس ركشتكم دون ان تعمل خاطر لك ، كونكما بنتان تعبتما كثيرا وانتما تسرحان شعركما وكريم مرقتكما .. .. شووووووووو ويتلاعب الريح بالركشه ..
وفوق هذا وذاك يكون الالعن ان تكون تلك الركشة ، صاحبها سارق الخط ..
وحتى لا تتهموني بانني اتكلم كتر او الوي بوزي وامطه مع انه اصلا لا يحتاج الى مط فهو خلقه مطوط مثل مطبقه ليبدو كلامي عجيبا وذو نكهة مطرطنة _ اي رطانة _ مثل مداخلات المثقفاتيه حينما يبتليك الله بهم في امسية شعرية او قراءات قصصية .. لديهم مقدرة عجيبة –هؤلاء المثقفاتيه _ على لوي عنق تدفق النص وبهتانه بما لم يقله حتى يجعلك وانت متبدع ذاك النص ان تضرب بيدك على صدرك مع تناغم جملة الانشداهه منك " سجمي انا قلت الكلام دا " ..
وحتى لا اعرج بكم سادتي الى زوايا اخري للهترشه ، وافقع مرارتكم التي هي اصلا موش ناقصة فقعان ، فمازالت مرارة احبابنا في امريكا وكندا ددمها ينقط من كهربتهم التي اصبحت مثل كهرباء ولاية الخرطوم ، مع انني فكرت في ذات مؤتمر صحفي وانا اعقد الشبه بين وزيرنا العوير الذي يعمل مهندسا برتبة وزير داخلية و الريس الامريكي الذي يعمل بليدا برتبة رئيس ، فسبحان الذي خلق الناس بعضهم يشبه بعض .
فرأيت عوارة هذا مطابقة لعوارة داك ، وقلت ليها حق الكهرباء تقطع والبتاع يطير في الهناي عشان يظهر هذا ليقول للشعب الامريكي والعالم اجمع انا سألت ناس الكهرباء يا ناس الشغلانة دي فيها ريحة ارهاب فقالوا لي ياشيخ ارهاب شنو ، دي شغلة بسيطة .
هذا ماقاله الريس الامريكي وترجمته انا حيث انني بت تفتيحه وتعرف تترجم من العربي الى العربي ، فكل الذي فعلته انني انتظرت ناس الجزيرة يترجموه وقمت انا ترجمته حتى افهمه ، اصلوا الفهم قسم يااخوان ..
دقيقة بـس هسع بجي
للهترشه بقية
|
|
 
|
|
|
|
|
|
|
|
Re: حمـادة بـت يتغني داخل ركشـه (Re: shiry)
|
ركشــه تحت رحمة المطــر
يقطعني ، من فتاة مهترشه ما الذي ادخلنا في غياهب هذا الهترشات التي زهجتني انا نفسي وابت ان تخلص ، فكل الذي اتذكره انني كنت بصدد على ما اعتقد شرح ايه يعني سرقة الخط .
هي دي !!!.. تذكرتها .. ايه يعني سرقة الخط
فاتنحنح واتقعد واقول مستعيذة بالله ثم من لغة اهل الانجاس التي مظهرها مضل ، وباطنها علقم ونهايتها ستين الف داهية وهي تعني ان لكل شيء في السودان نظام .
الا ترون سادتي كم هو رائع مشروعنا الحضاري مع اني لحدي هسع بحاول اعرف ايه يعني مشروع حضاري
واضطريت في كثير من الاوقات ان اتزاوغ من ولد بت خالتي الصنغتوتي الذي ترك كل العاب الدنيا وتشعبط على رقبتي باسئلته الكثيرة.
وحينما غلبتني حيلة معه في ذات مرة وهو يسألني : خالتو ايه يعني مشروع حضاري .. وتوقفت ليس لبرهة قليلة انما كثير من الوقت وانا انحت في راسي وادور عن كلام يشرح هذا القول . فلا كلام المثقاتيه الذي اكرهه وجدت عندهم مايفيد حيرته وحيرتي ولا كلام الحبوبات انقذني ولا كلام الشماشه فكني من هذا الشافع السعال .. اعمل ايه ماهو لازما وحتما اتصرف
فاضطريت ان انجـر له نجرة بت كلب
وبرضو للذين لم ينقشوا كلامي اقول ان النجر هي مدرسة النيجرزم ، قيل انها انشئت في زمن مر وكعب كعوبية شديده ، غايتو أها ، وهي تعني البدائل التخارجيه ، او التحايلية ..
ما علينا
واتوكلت على الحي الدائم وقت ليهو دي حاجة كدة زي السلام الجمهوري
وكنت سارحه وموش فاضيه لاسئلته واعتقدتني مررته .. لكنه اعاد الى السؤال لمن نطيت من الخلعة .
شكيتك على الله ياميدو مالك علي .
قالي لي : خالتو شنو يعني سلام جمهوري .. ودورت ودورت في كل الامثلة التي اعرفها ، ثم دنقرت فوق تحت ولم اجد ما يعينني على منهجي النجرزمي . وقلت ليهو بسيطه شفت كورة السودان وتشاد الاخيرة ؟؟
قال لي ااااي ..
مع انني متاكدة مليون في الميه انه لم يشاهدها لانني وانا نفسي لست متاكدة من السودان لعب مع تشاد لسببين اولهما انا لا اتابع اخبار الكورة في السودان بصورة (لصيقة) وايضا هو الحال مع والدته .
والسبب الاخر ان في كل الشهور التي انصرمت ، لم نكن نعرف شيئا عن الكهرباء لانها تخرج في الصباح ولا تعود الا في صباح اليوم التالي وهكذا عرفت انه ايضا نجر لي رده ، وواصلت نجارتي
موش كان في ناس بعزفوا موسيقي قال لي اي الكانو لابسين حمر حمر ديل وشايلين صفارات ؟
قلت ليه بس ، الله يفتح عليك جالك الفرج ياشـيري وهانتي ارتحتي من ميدو وسعالاته ..
وقام قال لي سلام جمهوري يعني صفارات ..
فعلى العموم نحن اكثر من يقوم بتنظيم حركات مواصلاتنا لذلك كل الركشات تتحرك في اتجاه عرضي وماعارفه ليه عرضي يعني
ومن الذي حدد العرضي هذه ..
اها جايااكام في الهترشه
من يعتدي على الطريق الطولي من الركشات يعتبر سارق الخط وياويله وثبوره من ناس المرور مع اني ماحصل شوفت لي بتاع مرور قدر يقبض ليه ركشه .
عارفين ليه .. ؟؟
عشان هي مجرد ركشه لا راحت ولاجات ، معقول بكس كبير وعوير كده يقل عقله في مطاردة هذه الكتاكيــت .
...
مازلت سادتي
اهترش ضمن الباندوث
الذي مسموح له به
شوية كده وراجعة تاني
| |
|
|
|
|
|
|
|
|
|
Re: حمـادة بـت يتغني داخل ركشـه (Re: shiry)
|
حمـــادة بــت
ومع ذلك وانت تستقل احدى الركشات فلا تتوقع ابدا ان تستمع الى غناء مختلف ، فكل الركشات اتفقت على توحد الازواق .. فحينما تطلع في الكفر
فتحيه محلبية ، فكل الركشات وعلى امتداد اسواقها ، ليلها ونهارها تهري زبائنها بفتحية محلبيه هذه .. وساعة ان ياتي الدور على زبيدة الانقاذ ، تلوك كل مسجلات الركشات حمراتها وخضراتها اغاني زبيدة الانقاذ ، فالغريب في الامر ان مني ابو روف تشبه هاجر كباشي ، وهاجر كباشي تغني مثلما تتغني به سمية امبدة ..
وحينما سألت بتاع الركشة وانا احاول ان اشبع شماراتي ، دي منو ؟ .. خفض صوته المسجل الذي كان يؤانس وحدة من هم داخل البيت الثالث من الشارع الذي نسير عليه .. واجابني بابتسامه
لا دا حمــادة بـــت ..
حمادة بــت ؟؟
سألت انا بلايقه كيف يعني حمادة بت
حمادة بت يعني حمادة بت ، يعني واحد بغني اسمه حمادة بـت .
من منكم من استمع الى حمادة بــت وهو تغني ، اقصد وهو يغني ..
اللابسه بودي ، والبودي شــده ..
والبودي شده وانا بريد شمار امبده
واللابسه طرحة والطرحة راحة
والطرحة راحة وانا بريد شمار الواحة
كدي لو سمحت اقلب الشريط ..
حنانه لو سبتو انا اكون جبانه
لقاني بابا واقفه على البوابة
بابا قام علا البوابه
تتجازي يا يابا الخلاني اتشابا
خلاني اتشابا لارد لا استجابه
...
ياخالتو يا خالتو لو تدري بي حالتو
حمادة البريدو كتم نفسي بي سجارتو
..
وقالوا لي امو نضامه
بريدها انا وبريد كلامها
انا حبيت وليدك
عشان خاطر الوسامه
وحنانه النسي اهلوا ما نسانا
ويييييين حنانه
يقوم بتاع نفس الركشة الذي مازال صوت حمادة بت يملأ ركشتنا ويتدفق من بوابات ركشته الى رحابة الكون ، يقوم يفتح معاك حوارا يتحير منه المثقفاتيه :
عارفه يا اخت التغريرية البتمارسها معانا حملات المرور تكنيكها استعباطي اكتر من كونها
تنظيمية ، عشان كدة لازم بتاعين الركشات يلجأوا الى التحايل على ظروفهم بالاستماع الى حمادة بت ولا قدوره
لكن يلقوها عند الداقـس
وعندما اجبته وانا نصف مشدوهة ونصف داقسه
عــادي
نط لي في حلقي فرد نط اطارت استدراكي ونصف فهمي ونصف مشدوهيتي يا اللة ويامين قدرت احبس نضارتي بين عيوني حتى لا يغرفها الهواء الذي على الدوام يعتبر ان راكبي الركشة هدف مباح فيهاجمهم من الطرفين .
لا ماعادي ، كيف عادي دا خطاب طرشوي من وزارة الداخلية ونبرته استعلائية
تدقيسيه اكتر من كونها حقانية بتأسس لمفهوم معليشي ، دا خطاب تحنيسي عشان ننسي واقع الزفت اللي نحن غرقانيين فيهو .
طبعا كان لازم ما افهم حاجة اولا لان الخط مسروق مع انني لست معنية بهذه السرقة انما الخط والركشة هما المعنيان الاولين بهذه السرقة
وثانيا لان الشعار الذي رفعته حركة التنقلات على اخر المحطات العرضية في محاولة لكسر جمود سيطرت الركشات على سوق الطلب :
جات الركشة ونسينا الشغل معاها ..
واما وانه موسم الامطار الان كان لابد ان تنتقم الدفارات وتشمت في الحافلات والحافلات بدورها تشمت في التكاسي وامجاد ، وتعزي نفسها بان كراع البقر جييابا ..
والاثنين الاخيرين امجاد والتكاسي يشمتان في الركشة فهي الخاسر الاكبر في هذه الامطار ، ويبرد حشاهم ويفش كبدتهم هذا المثل ( الدنيا سدايه ورضاااايه ) .
ومع اقترابنا من بقعة ماء كبيرة ومع اصرار سواق الركشة على الحديث .. زاد خوفي وزادت شحدتي وتضرعي لله ان الا نغرق في شبر ميه
وتتم الناقصة .فاكتحلت عيني من خلف زجاجهما المبلول .. بجي الخريف وامجاد بتقيف .
خفت اكتر ان تكون كرع البقر فعلا جييييابه ..ويا شماتة العدويين فيك ياشيري .. خاصة بعد رفضك انت وام مازن ان تستقلا امجاد
الم اقل لكم ان الدنيا سدايه ورضايه
اخر الحكــي
كثيرة هي الامنيات
التي نرتق بها ذاكرتنا
ينقصنا فقط ان ندعو الله
ليعطينا اياما نعيش فيها
التوقيع :شيري بعد ان عاودت صديقتها المريضه
| |
|
|
|
|
|
|
|
|
|
Re: حمـادة بـت يتغني داخل ركشـه (Re: shiry)
|
شيري
تحياتي و مودتي
كلو كوم و حمادة بت كوم براهو.
و حمادة كمان كوم و غناهو كوم تاني.
يعني أدبيات غنا مفصلة على الركشة كما و كيفا ( طبعا لحنا ما سمعناه ) و لكن أكيد حيكون من جنس ناس شعبان عبدالرحيم ، بعد كل ربع كوبليه يتمو ( إإإإإإإإإإإإإييييييييه
تسلمي شيري
| |
|
|
|
|
|
|
|
|
|
Re: حمـادة بـت يتغني داخل ركشـه (Re: HAMZA SULIMAN)
|
سلام مربع
ابو جهينه
يا ريت يا ابو جهينه لو كان زي شعبان
اهو راجل بتعاور ،
لكن الله ماوراك لما ولد يكون بتنســون
سلمت ياسيدي
الموسيقار : حمزه سليمان
لا ، لازم ياسيدي تحاول تسمعوا
لانو من جد مبااااااالغة
سلمت ياسيدي
ملاذ افكار
لا دي جديدة ، ما سمعتها
مباااااالغة لكن
هااااههاهاها ،
الله يازاهو ، الكان ازانا
دي ماسمعتها امي ، كانت كسرت الاستريو فوق راسي
| |
|
|
|
|
|
|
|
|
|
Re: حمـادة بـت يتغني داخل ركشـه (Re: shiry)
|
هىىىىىىىىىىىىىى الصفقة وين
الماتصفق انشاء الله مايعرسوها
يلاااا ارح النقدة النقدة
دا حماد بت ياشيرى والله شوف عين وسمع اضان
للصباح بجى اكملو ليكى
وبالتالي اقرأ البوست بمزاج
| |
|
|
|
|
|
|
|
|
|
Re: حمـادة بـت يتغني داخل ركشـه (Re: ملكة سبأ)
|
الزولة جدا شيري
نيلينك والابنوس
بااااااااااالغت ما بتعرفي حمادة بت
قصرت عديل كدا
لا أود الخروج عن جمال الهترشة
لكن كنت دوما اتسال عن مثل هذه الأغاني و عن مصدرها ؟؟
في كثير من الاحيان تبدو بالنسبة لي كأنها خطاب متماسك لحالة محددة ضمن فئات مفتوحة جدا
اعني ان مثل هذه الاغاني ليست مقتصرة علي فئات بعينها كما هو الحال في كثير من الدول ..
عموما ظاهرة أغاني البنات تحتاج حقيقي للوقوف عندها
بالمناسبة سمعتي
لقيت اختك في الحيطة
وحالا حالا حبيتا
لكن طلعت مخطوبة
وفكتني بالطوبة
والريد نيلين
| |
|
|
|
|
|
|
|
|
|
Re: حمـادة بـت يتغني داخل ركشـه (Re: زوربا)
|
سلام مربع
ملكة سـبا
وين مشيتي ، منتظرة الشمار .
انت عارفاني ، شمارات زي دي كيف تفوتيها مني
تعالي يا ملكة منتظرنااااك
زوربا السوداني الشفيف
على العموم انا احب جدا اغاني البنات ، كونها تعبر
عن همومنا ، وعن مشاكلنا ومشاكل الجيل بحاله
فيها بعض الاخطاء الاخلاقية ، لكن تبقي في النهاية
عنوان لهموم جيل
سلمت ياسيدي للطله
ود البلد
الله يخليك يادكتور ، وانا لو بيدي اشيل من همومكم
واضعها مع همومي حتى تخف همومكم وتبيتوا
سعيدين
سلمت مرة اخري يادكتور
| |
|
|
|
|
|
|
|
|
|
Re: حمـادة بـت يتغني داخل ركشـه (Re: shiry)
|
منك لله يا شيرى
شلتى حس العدادات فى حالهم
ما هم بيسعدوا أهل المجتمع الحزينين من الجبهة
وأنتى تسعدين أهل البورد الزهجانين من الغربة
وكلو من بعضو زهج فى زهج, يفكها الله
| |
|
|
|
|
|
|
|
|
|
Re: حمـادة بـت يتغني داخل ركشـه (Re: WadalBalad)
|
والله كلام يا شيري
كنت مخنوق من البورد
وقربت انقلب اساسي
لو ما لقيت هترشتك دي
انا يتخيل لي انك بتكتبي من السودان
فموضوع انك في السعودية
بعد معرفتك لهذه التفاصيل والاسماء
انا استبعدو
فمعقول يا جماعة في ذاكرة بتحتفظ بتفاصيل حبات رمل خريطة الطريق
وقبل ان استرسل اقول ما شاء الله خوف عين الصبي
لكوني اعرف الكثير مما قلتيه هنا
ومقدرتك علي التصوير بعدسة زوم شيري
خاصة هو سر هذا السحر في البيان
والوصف البفرح
محمد بت هذا او هذه لم اسمع به او بها
ولكن لزبيدة الانقاذ طعم خاص في حفلات الحناء
وهي بنت لذيذونة وتحترم فنها كثيرا فقد سمعتها عن قرب
| |
|
|
|
|
|
|
|
|
|
Re: حمـادة بـت يتغني داخل ركشـه (Re: nazar hussien)
|
سلام مربع
الزول الرائع
نزار حسين
سلمت ياسيدي ، والله انا حقيقي ماقدر اودي جمايلكم وين
وحقيقي وحقيقي من غير مجاملة . كلامكم العسل وتشجيعكم هو الذي يكتب استمراريتي
زبيدة فعلا ، صوتها وغناؤها عسل
ندي القلعة ، هاجر كباشي ، كلها اصوات حلوة
العمدة 4
اقرب شيء ياعمدة ، التغيير في السودان بسير بخطى سريعة جدا
عكس التغيير الايجابي الذي يعني التطور في الاقتصاد ، والتنمية
خمسة سنين كتيرة على شوفة السودان واهل السودان
ربنا يرد غربتك يا طيب
بنية الفنجرية
والله ياستي ، كان عندي من امبارح مشكلة في الكي بورد
ابتدات بفيروس ، كرهني الكي بورد والمونيتر ،
كلما اكتب لي حرف واحد يطلع معاهو عشرة حروف وهكذا
غير ان الانجليزي لقيت انو اخف شوية كده ، يعني حرف بمرق معاهو ثلاث حروف
فاضطريت الى استخدام الانجليزي في كتابة الاعتذار دا
ومعليش مانجحت في شطب بعض الحروف الزائدة
وهسع انا بكتب على كي بورد من غير حروف
بمساعدة من تلمس قلم الرصاص
| |
|
|
|
|
|
|
|
|
|
Re: حمـادة بـت يتغني داخل ركشـه (Re: shiry)
|
شيري مليون سلام مربع
شيري معقولة بس كنت دايرة تحرمينا من الابداع دة كلو؟؟
لك التحية والاحترام
وشنو حكاية حمادة دة؟؟؟
بالله الخمس سنوات البعدنا فيها من السودان
يحصل فيها دة كلو؟؟
ربنا يهون ساااااكت
| |
|
|
|
|
|
|
|
|
|
Re: حمـادة بـت يتغني داخل ركشـه (Re: benyya)
|
...
ياخالتو يا خالتو لو تدري بي حالتو
حمادة البريدو كتم نفسي بي سجارتو
..
اها خالتك جات
اشكى لى
عشان حمادة دا نوديه الالزامية
قلتا ليك سمعت انه فى مغنية مشهورة عندها شريط وصورتها بالتوب
وفاسخة وشها
قالو طلعت راجل
وقبضوها ناس البوليس
| |
|
|
|
|
|
|
|
|
|
Re: حمـادة بـت يتغني داخل ركشـه (Re: bayan)
|
سلام مربع
خالتو
د/بيان
انشاء الله تجيك العافيه
لا ابدا ما عندي شماره الغناية دي
بت اختك الشمار
قرب يقتلها
اها خاليني بي الشمار دا
لاحظي انني اكتب في ظروف استثنائية
مستخدمة قلم رصاص على كي بورد
يخلو من اسم المفتاح
سلمت ياخالتو
| |
|
|
|
|
|
|
| |
shiry
ابو جهينة
HAMZA SULIMAN
ملكة سبأ
زوربا
WadalBalad
nazar hussien
benyya
bayan
فيس بوك
تويتر
انستقرام
يوتيوب
بنتيريست