|
|
 Re: يوم في حياة أم... (مطرطشة) (Re: maia)
|
Quote: الاخت الحبيبة غادة
حمدالله على سلامة هاشم ( باثر رجعي)
ياريت يا غادة تواصلي تكتبي عن تجربة الابن هاشم في السنة الاولى الدراسية باسلوبك الجميل الشيق
سؤال واجب : تمنياتي تكوني بخير رغم اني اتابع البورد من بعيد لبعيد لكن لاحظت قلة مشاركاتك
تسلمي يا غادة وتحياتي لهاشم والصغير شهاب |
يا إلهي.. مايا شخصيا بيننا..
مشتاقين يا مايا.. ووين الحي بيك يا صديقتي؟؟
سعيدة أن كتبت البوست حتى أراك وأتحدث معك
والله يسلمك،، بالنسبة لهاشم وبرضو بأثر رجعي -وجه باسم-
طبعا هو في حاجة اسمها (كيندر جاردن) Kindergarden
يعني حتى السنة الأولى ما دخلها عديل..
شفتي الطرطشة دي كلها.. فوق ما قبل السنة الاولى حتى
-وش خجلان-
لكن سأواصل الكتابة باذن الله ما دمت ساراكي بخير معي
انا فعلا مقلة في مشاركاتي في خلال الفترة السابقة..
كثير من التزامات تجاه صحيفة الصحافة..
واخرى تجاه قناة النيل الأزرق..
وطبعا (كمية) تجاة الأسرة..
بالإضافة إلى -شعره- ساعة تروح وساعة تجي
على قول أحد الأصدقاء الذي صارحني في مرة:
-تعرفي يا غادة، فيكي حاجة بوهيمية لكن ما معترفه بيها
وربما كان حديثه وفيّ حقيقة شئ من ذاك
لكنني أتشوق دوما للمنبر ولناسه الحلوين
محبتي لكي وشوقي الكثير
| |
 
|
|
|
|
|
|
|
 Re: يوم في حياة أم... (مطرطشة) (Re: Halema2)
|
Quote: دائما ينسى الاباء والامهات الاستعداد لهذا اليوم ويكونوا هم اخطر واجرس من الاطفال
لان الطفل يتعود بسرعه ويندمج فى جوء المدرسه بسرعه شديده لكن المشكله فيكم انتو وحنيتكم الشديده دى |
سلامات يا حليمة..
تعرفي.. لما كنت بأخذ هاشم او شهاب
لمواعيد الطبيب...
كنت بعرف أن من المفترض أن يأخذ حقنة التطعيم..
وبقعد اعاين ليها انا واكون خايفه..
وبكون مقلقة.. مضطربه..
وأول ما بيأخذ الولد الحقنة بيبكي شديد
ولكن ثواني وخلاص.. بينسى..
وأنا بقعد بعد كده الوم نفسي..
يعني كان لازم تبكيهو؟
وأرد -برضو على نفسي-
طبعا كان لازم، ده تطعيم.. ووجع ساعة ولا كل ساعة
وهو بيكون نسي الحقنة.. ونسى التطعيم
وبيكون بيجري ويلعب وانا لسه بلوم في نفسي مره
وأتمنى لو كانت في طريقة اسهل للتطعيم..
شفتي جنس المحن دي..
وجنس الطرطشة الأنا فيها دي؟
تقبلي شكري ومحبتي يا حليمة
غادة
| |
|
|
|
|
|
|
|
|
 Re: يوم في حياة أم... (مطرطشة) (Re: Raja)
|
Quote: ويا سناء شفًع المصريين بيجوا المدرسة بعدد 6 سندويتشات + العصائر + الشيبس والشيكولاتات
وبعد ده تلاقي الواحد يجيني قبل نهاية اليوم يقول لي: مس، أنا جعان. وطبعا يا مؤمن يا مصدق سندويتشاتي البكون جايباها معاي وما لمستها من الصباح بقت ملكهم بقدرة قادر.. وبقيت رسمي أعمل حسابي وأزيد السندويتشات حتى تتخيلي إني فاتحة كافيتريا |
لا حولا يا رجاء بعد البيجيبوهو دا كلو
حوش المدرسة ما فيهو نيم؟
| |
|
|
|
|
|
|
|
|
 Re: يوم في حياة أم... (مطرطشة) (Re: ودقاسم)
|
Quote: وفي حياة كل منا أحداث صغيرة أو كبيرة مثل هذا الحدث أو غيره ، لكن ما أريد أن أقوله هنا هو توجيه الدعوة للجميع لتوثيق الأحداث التي تكون أجزاء من فصول حياتنا ..
|
ود قاسم شخصيا يزورني في بوستي..
بعد أذنك دقائق،، (أنفض) كنبة الشرف
وآتي أمام باب البوست لإستقبالكم
تعرف يا ود قاسم.. حينما بدأت أكتب عن التجربة
كنت أظنها ستكون نصف صفحة.. صفحة..
بضعة أسطر متناثرة هنا وهناك..
لكنني وجدت نفسي أسترجع في الأحداث وأكتب
حتى وصلت الصفحة الخامسة..
ثم نظرت إلى ما كتبت وتأملت فيه.. وفكرث
ترى، هل سينال أعجاب القراء.. هل سيشعرون بيّ؟
أفكار كثيرة كانت ببالي تدور..
لكن الكتابة هي أحداث نمر بها.. تجارب نتعرض لها
عبر نستخلصها ونكاتا عبيرا ننثرها..
وأسمح لي أن أهديك مقالا كنت كتبته قبلا عن تجربة بسيطة مرت بي
لكنني أستخلصت أيضا من طياتها الكثير
فهاهو المقال.. لك الآن أهدى..
مودتي
غادة
.
.
.
| |
|
|
|
|
|
|
|
|
 Re: يوم في حياة أم... (مطرطشة) (Re: غادة عبدالعزيز خالد)
|
مقال الإهداء إلى ود قاسم
مع التحية
غادة
______________________
الصغيرة أم كضوم!
بدأ الطقس يميل إلى الاعتدال خلال الأسابيع الماضية بالولايات المتحدة، وبدأت الأسر تخرج من بياتها الشتوي، فازدادت أعداد الأشخاص التي ترتاد الحدائق العامة، وبدأ يتناثر على مرأى العين منظر راكبي الدراجات وهم «يبدلون» بكل قوة. ولم أكن أنا بحالة شواذ، فقد نشطني اعتدال الجو وفتح شهيتي للمشي، فصرت أسير على قدمي معظم أيام الأسبوع لزوم تحريك الدورة الدموية واستنشاق الهواء النقي «وكده يعني». بعد فترة من المشي أجدني أركن لأحد المقاعد المنتشرة في أنحاء الحديقة «ألم نفسي شوية». وفي إحدى جلساتي تلك، وجدت شابة أنيقة «مطقمة» ملابسها الجميلة ومسدلة خصلات شعرها الذهبي على ظهرها، بجانب تلك الشابة مقعد صغير يوضع به الأطفال حديثي الولادة وحتى سن العام، بحسب القانون، في المقعد الخلفي للعربة. كان مقعد الأطفال ذلك مغطى بشال مخصوص، جميلة ألوانه وتتناسق مع أناقة الأم التي تجاوره
التقت عيناي مع تلك الأم الجميلة وتبادلت الابتسامات مع الأم المهتمة بنفسها وحسدتها. فآخر ما كان يدور بذهني وأنا أم لطفل حديث الولادة هو تنسيق ملابسي أو صف شعري و«ضرب المانكير» الذي يبدو أن طبقته ربما حديثا غطت أظافر محدثتي، فلونه الغامق لا يزال لامعا. وبدأنا نتبادل الحديث عن الجو الجميل وعن فوائد المشي، وسألتها عن طفلها فعرفت أنها أبنتها الأولى، وأن عمر أيامها في هذه الدنيا لم يتجاوز الثلاثة أشهر بكثير. وباغتتني الأم بتعقيبها:
-ولكنها طفلة سمينة...!!
وارتبكت للحظة، فلست متعودة على أم تنعت طفلها بالسمن، ووجدتني أهمس لنفسي «يا الأم: الله أكبر عليك». وبدأت أسرد عليها بعضا من ملاحظاتي بأن هنالك دهونا في جسم الأطفال وغالبا من تتلاشى بمجرد أن يبدأ الطفل في الحبو والمشي ثم الجري. ولكن يبدو أن حديثي لم يعجب الأم كثيرا، إذ تابعت بكل استنكار:
-لكنها سمينة جدا...!!
وبدأت في سريرتي أقرأ القرآن «قل أعوذ برب الفلق» وأردفت سريعا «قل أعوذ برب الناس» وكأنما أحاول أن أحصن تلك الطفلة من عين أمها التي بدأت تزيح الغطاء عن طفلتها وهي تقول:
-أنظري إليها لكم هي سمينة...!!
ولم أجسر على النظر، فقد خشيت على الطفلة من عين تصيبها فأكون من الملامين. فتظاهرت بإلقاء نظرة سريعة وأنا أقول للوالدة:
...!! -لديك طفلة جميلة
وأردفت في سري «ما شاء الله عليها». ولكن يبدو أن نظرتي السريعة وتعليقي الإيجابي على الطفلة لم يرض الأم الحزينة على منظر أبنتها ذات الثلاثة أشهر السمينة.. فبدأت تميل المقعد بصورة أكثر حدة لكي ألقي نظرة على الطفلة «أم كضوم»..!! وهي تصر قائلة:
-بالله عليك أنظري إليها...!!
ولكنني كنت أنظر للأم ذاتها ولسان حالي يقول «يا مرة، بتك دي بتنجهيها». وتجلى اختلاف الثقافات وصار في هذا الموقف بائناً، فبينما نخاف من العين أن تصيبنا ونتعوذ دوما من جهة، نحرص على ذكر اسم الله على كل ما نراه لدى الآخرين جميلا أو غريبا من جهة أخرى. وتركت تلك الأم المعتدة بنفسها وهي لا تزال بمقعدها، من يدري، لربما كانت تنتظر صيدا ثمينا آخر تقص عليه نبأ طفلتها السمينة «أم كضوم»
| |
|
|
|
|
|
|
|
|
 Re: يوم في حياة أم... (مطرطشة) (Re: شادية عبد المنعم)
|
Quote: سؤال يا سناء خالد
الأطفال في اليابان في المدرسة بيقعدو أم قللو ولا في كنب؟؟ |
شادية ياخي انا قلت انا بت اقاليم... ما ضهاري!
ام قللو يعني شنو؟
غايتو في الروضة بيقعدوا في الكراسي الصغيرة الراصينها قدام المسرح فوق ديك!
الكنبة دي لزوم الصورة الجماعية نهاية اليوم!
لكن يا شادية لحصة الشاي الياباني (برضو في الروضة) بيقعدوا في الواطة قعدة غلبتني كلو كلو
أظنها ياها ام قللو دي!
| |
|
|
|
|
|
|
|
|
|
Re: يوم في حياة أم... (مطرطشة) (Re: Sana Khalid)
|
Quote: لحصة الشاي الياباني (برضو في الروضة) بيقعدوا في الواطة قعدة غلبتني كلو كلو
أظنها ياها ام قللو دي! |
وانا والله ما كنت فاهم ام قللو دي يعني شنو برضو يا سنوية
لكن افترضت انها القعدة..
اللهم لا تحرجنا بين عبيدك وتقعدنا ام قللو امامهم
يا رب العالمي
| |
|
|
|
|
|
|
|
|
|
|
Re: يوم في حياة أم... (مطرطشة) (Re: بابكر عثمان مكي)
|
Quote: طرطشتك طرطشة عميقة .. جدا وذات (مداليل) حساسة
مقارانات مابين عوالم وعوالم
ومابين ماض قديم وواقع قادم
الصفة المشتركة مهما اختلف الزمن والمكان هي شفقت امهاتن السودانيات
التي لا تتغير ابدا لهذا انعكاس سلبي علي تربية رجالنا دائما فكثرة الحنان
يجعلنا لانزال اطفالا وان تقدم العمر . |
سلامات يا بابكر..
بالرغم من انني كنت اقص و(أرص)
واحكي تجربة مرت بي..
لكن يبدو ان المقارنان تبرز ما بين السطور
التفاصيل تجعلنا نقارن احيانا بين ما نراه في واقعنا
وما بين معاشرتنا لواقع غيرنا..
في كثير من الأحيان تكون المقارنات محزنة.. ولا أدرى على من هي مجحفة..
الأم السودانية هي أم أصيلة.. نخلة باسقة.. وشجرة ظليلة
لا أظن اثرها كثير السلبية..
خصوصا حينما نكبر.. لكم أتمنى أن أعود صغيرة..
تعرف يا بابكر لو عاد بي الزمان..
أكيد،، سأبقى في حضن أمي أوقاتا أطول
حتى اليوم حينما أراها.. أتمنى لو أنني بقيت بجوارها
لو عدت طفلة أنام في رحابها..
انها لحظات من العمر.. تبقى معنا كسحابة
تغيم وتخفف علينا من هجر الدنيا وتجاربها المؤلمة..
Quote: هو يتذكر جيدا" ذلك اليوم الذى حمل فيه حقيبته لأول مرة وكيف ان أمه ودعته عند الباب وهى ملثمة بثوب اسود فبدت كالقمر الآفل من قطعة ليل
اخذت بطرف الثوب وانحنت لتأخذ حفنة تراب من تحت قدمه ، تقليدا" حنينا" بان ذلك سيحافظ لها على ابنها من مصائب الحياة ويضمن لها عودته سالما .لقنته الشهادة (لا اله الا الله ) فلم يكملها نهرته بشدة ان يقول محمد رسول الله فقالها وهو يضمها فى احترام (محمد رسول الله )
انه يذكر ان حمل تلك الحقيبة كان بداية فوبيا السفر وجرثومة الغربة
تحسس جواز سفره كمن يتحسس جرحه ....
ومضى داخل بوابة المجهول الى الابد ............... |
لا أدري لماذا جعلتني كلماتك ساهمة؟؟
ربما لأنني حملت كذلك جواز سفري إلى المجهول
ولا زلت أبحر في عبابه منذ ذاك الوقت..
شكرا كثيرا يا بابكر ان اشركتني في خواطرك
دمت لي..
غادة
| |
|
|
|
|
|
|
|
|
|
Re: يوم في حياة أم... (مطرطشة) (Re: Raja)
|
Quote: بوست حلو.. ذكرني أول وظيفة في حياتي كانت مدرسة في مدرسة إبتدائي..
كنت مسئولة من سنة أولى.. أحلى عمر ممكن تتعاملي معاهو. عايزين يتعلموا كل شئ، وبيعلموك كل شئ..
ما كانوا بيقعدو في مقاعدهم. طول اليوم أنا وهم قاعدين تحت التربيزة الكبيرة وبنلعب. |
رجوية.. أين أنتي يا صديقتي ومشتاقون كثيرا والله
تعرفي، زمان وقبل هاشم وشهاب..
كانت عندي رغبة قوية أن أفتح روضة للأطفال
وأدرس فيها وأكون مديرتها.. وألعب من الأطفال وأجري
لكن الله لا يوريك.. من لحظة ما ولدتهم وكبروا
قررت أبعد تماما عن هذا المجال..
معز أحيانا بيقول لي.. "طيب كنتي ناوية تفتحي روضة كيف؟"
بقول ليهو بصراحة.. كانت حتكون غلطة عمري..
بحبهم موت.. لكن لو ما بيمشوا مني المدرسة
كانوا حيعذبوني برضو موت..
__________
وحياتك وحشاني طلتك البهية.. برضو موت
| |
|
|
|
|
|
|
|
|
|
Re: يوم في حياة أم... (مطرطشة) (Re: شادية عبد المنعم)
|
Quote: تعرفي من نوع بتاعتك دي حصلوا لي كميات كدة
لكن أكبرها
مشيت أجيب نتيجة ليم وكانت في رابعة إبتدائي
المهم وقفت في الصف وفي سانفرانسيس كل معلمة صف بتسلم النتيجة في صفها
المهم الصف كمل وهي ما أدتني النتيجة
قمت هجت ليك فيها وقلت ليها ياخ أنا واقفة لي تقريباً ساعة أي زول يجي تمشيهو
وأنا منتظرة
قالت لي يا مدام أنا ما لاقية إسم بتك
ومن بداية الساعة ليم واقفة تناديني من بعيد
وأنا أقول ليها إنتظري خليني أجيب النتيجة
المهم في الآخر جاتني ليم قريب وقالت لي في أضاني يا ماما لكن ده فصل ثالثة
قلت ليها عارفة
قالت لي طيب تجيبي نتيجتي من هنا ليه؟؟ |
غايتو يا شادية.. قعدت أضحك بشكل غير عادي
أنا طبعا وضعت رجلي على أول طريق في الطرطشة..
يعني هذا كان اول يوم دراسي.. ولازلنا في البداية
يعني لا توجد امتحانات ولا دراسة ولا واجبات كثيرة جدا
حتى الآن كله مقدور عليه..
لكن بعد هذه الفترة ستمر بي قضية الامتحانات وكمان النتائج
الله يستر بس يا شادية
بعد كم سنة كده تعالي وشوفي طرطشتي حتكون شنو..
Quote: لكن بوستك وسيم وجميل بشكل ما عادي
وتحت تحت فيهو دروس هامة لنا كأمهات
شكراً عليهو |
وشكرا ليكي يا شادية.. مداخلتك اضحكتني..
اسعدتني جدا..
تقبلي المحبة
غادة
| |
|
|
|
|
|
|
|
|
|
Re: يوم في حياة أم... (مطرطشة) (Re: Hussein Mallasi)
|
Quote: كانت فكرتها إنه تدخلنا المدرسة صغار
وحسب تاريح ميلادي وعشان مايفوتني العلام نصيبي كان أدخل اولى إبتدائي وانا عمري خمسة سنوات وخمسة شهور بالظبط
Rawia |
يعني ما براي
ياخ الحركه دي كعبه, جربتي يفططوك سنه علي العليك؟
و كمان جربتي حكايه يدخلوك مستمعه دي؟ يعني طالبه درجه تانيه في اي حاجه،
الكراسات قطعت، ما ضروري ما هي مستمعه، الكتاب القديم، ادوهو للمستمعه دي.
بخصوص السندويتشات البتتاخد دي, احنا كان عندنا بنت جيرانا، امها متوفيه،
تقيف قدامي تقول لي اديني سندويتشيك ده، اقول ليها و انا اكل شنو، تقول لي
انتي يتيمه؟ و انا طواااالي اديه ليها
اها انا في امي ماتت و انا يتيمه دي لحدي ما خلصنا سنه سادسه و مصروفي و
سندوتشاتي و كراساتي الجديده كلها و قصص المكتبه الخضراء و الواني و بلابلي
الجديده و و و، كلهن بقن حقات بت جيرانا
و يقولو الكعكه في ايد اليتيم عجبه!
يا ربي انتي وين اسي يا سامية?
--------
غايتو يا غادة رجعتينا ورا زي دعشمية سنه كده
ربنا يخليك لاولادك و يخليهم ليك
ذكرتيني بت اخوي قليصه كده، قبضتني بتكلم انا و امها عن جنة الاطفال و عم جحا،
قالت لي، انتي يا عمتو رحاب، علي ايامكم كان في تلفزيون؟ قلت ليها اجي يا بتي حبوبتك
في زمنها كان في تلفزيون، خليني انا، طبعا ما حاولنا نشرح ليه قصه الابيض و اسود
دي كله كله، كنا ما خلصنا
قالت لي امها، اها جنه الاطفال دي شنو؟ قالت ليها شفتي برنامج الهاي فايف حقكم ده،
بس شبهو، قلت ليها يا سلمي استغفري ربك! 
| |
|
|
|
|
|
|
|
|
 Re: يوم في حياة أم... (مطرطشة) (Re: Rihab Khalifa)
|
نرجع لي موضوع الصورة دي تاني ..
نبدا بالتفاح .. ظاهر وزي ما قالت غادة مقطع بي طريقة حلوة ..
بالله دا طلع رز .. سمح عرفنا !!
| Quote: نمشي فوق الرز طوالي.. دا بيض مقلي و ملفوف زي السويس رول |
اها الله بعلم انا كنت قايلاها باسطة ومفسحة كمان بتعرفي الباسطة المفسحة يا سنوية دي الباسطة البكون عمو جاريها في عربية (بترية) بدور بيها في الشوارع والله كانت حلوة حلاة !! ههههه
| Quote: تصوري يا انعام انو اللون الوردي الوديع دا و الابيض بداخله عبارة عن سمك! و برضو طعمو حليو حليو !! |
والله قلت الناس ديل بأكلوا الاولاد من هم صغار (فجل) (هههههههههههههههههه)
قلت يكون عندهم الفجل بفتح المخ ...لانه قاعد جنب الطماطمة الحمراء دي نظام سلطة يعني !!!
هههههههههههههههه
| Quote: جنب جمبري مقلي بالبقسماط .. |
اها دي كنت قايلاها كفتة بطاطس ..
حكمتك يالله !!
هههههههههههههههههههههه
| |
|
|
|
|
|
|
|
|
|
Re: يوم في حياة أم... (مطرطشة) (Re: انعام حيمورة)
|
Quote: خي عبدالرحمن الحلاوي
تحياتي يا صديقي.. وأين الحي بيك
كتبت عن تجربتي في إرسال أول أبنائي
إلى المدرسة...
وكانت تجربة عجيبة..
لعلها كانت من القلب...
فوصلت إلى القلب..
يا لسعادتي بك..
تقبل التحية |
أختي غادة نتمنى أن نعيش معك طرطشة من داخل الحلفاية ..تحياتنا لك ولهؤلاء الأشبال ..نسأل الله أن يحفظهم ويجعلهم قرة عين لك .
تحياتي
| |
|
|
|
|
|
|
|
|
|
Re: يوم في حياة أم... (مطرطشة) (Re: عبدالرحمن الحلاوي)
|
العزيزة غادة،
أنا لو كنت مكانك كنت عملت اكتر من كدة،
ووقفت امريكا كلها على رجل،
مش بس البص و ناس المدرسة،،،
فى الحالة دى،
كلنا نبقى مطرطشين،،،
عشان كدة أحسن طبعااشهد لصالحك
و أقول ليكى دى ما طرطشة!!!
الله يديكى العافية و يخلى ليكى الحلوين،،
| |
|
|
|
|
|
|
|
| |
غادة عبدالعزيز خالد
ودقاسم
بابكر عثمان مكي
الطيب شيقوق
Hussein Mallasi
Rihab Khalifa
انعام حيمورة
عبدالرحمن الحلاوي
فيس بوك
تويتر
انستقرام
يوتيوب
بنتيريست