|
جيل ما بعد عصر الشحادين !!! قيقراوي تعال أحكي ليك ..
|
متأسفه لافراد بوست بس شايفه بوست أمجد عن مأساة جيلنا, ما بستحمل كلامي الكتير العايزه أحكيهو ليك يا قيقراوي عننا ..
قلت لي : شايف جيلكم محسود .. طبعا محسود .. مش انتو الجيل اللي كنتوا بتمشوا مراكز الشباب عشان تنموا مواهبكم وتتعلموا رياضه وموسيقي؟ مش انتو الجيل اللي اتعلم موسيقي وفن في قصر الشباب ؟ مش انتو الجيل اللي دخل السينما ؟ مش انتو الجيل اللي عمل روابط ناجحه درست الطلاب وعملت أيام علاجيه ورعت الناشئين لحد ما لحقوكم في الجامعه ؟ طيب نحن جيل لا مشي مراكز شباب لا دخل السينما .. عشان في زمننا السينما بقت أفلام هنديه هابطه وشماسه .. والفن بقي ما محتاج تعليم, أورغن زايد بتاع ساوند كفايه .. عشان كده ما عندنا فنان يستاهل يتسمي فنان .. ومافي فنان عمل حاجه حقتو ونجحت .. نحن الجيل ياقيقراوي اللي حتي في الغنا ما عارف يبدع .. ولسه مدور اسطوانات الرواد !!
بما انك حكيت عن جيلكم , خليني أحكي ليك عن جيلنا .. جيل ما بعد عصر الشحادين ...
|
|
|
|
|
|
|
|
Re: جيل ما بعد عصر الشحادين !!! قيقراوي تعال أحكي ليك .. (Re: Amany Elamin)
|
شوف يا سيدي ..
نحن الجيل اللي اتغيرت فيهو المقررات .. وجاطوا سلم التعليم .. كنت اخر دفعه متوسط .. اخر دفعه قرت النايل كورس .. بس في مدرستنا دمجوا دفعتين تالته متوسط زايد ثامنه ودرسوا الحاجه الاسمها اسباين .. وطلعت دفعه مابتعرف عن الانجليزي أي حاجه الي يومنا هذا ..
مدرستنا بحري الأميريه واحد .. خرجتني وخرجت أخواتي الكبار .. شعله في بحري ومصنع رائدات , مديرتها كانت علم علي رأسه نار .. كانت فيها داخليات !! حكوا لينا انه زمااااان قبل ما ندرس فيها كان بيسكنوا بنات الأقاليم فيها عشان يقروا في المدرسه.. اتخيل !! صفوا الدفعه الدمجوها مع بعض وجففوها واتحولت أعرق مدرسة بنات متوسطه في بحري الي ما يسمي بجامعة الزعيم الأزهري !!
نحن الجيل اللي أول ما جاء يدخل العالي .. فجأه عملوا سيستم المدارس النموذجيه .. وبقوا الناس كيمان .. الشطار مع بعض, والماشطار مع بعض .. عليك الله الكلام ده قبل كده سمعت بيه .. مدارس كتيره ممتازه هبط مستواها وظهر فقه المعاهد والمدارس الخاصه .. والدروس الخصوصيه .. وما حأحكي ليك عملوا شنو في المدرسين .. كفايه انهم بقوا مافاضين للحصص المجان حقت الحكومه .. تدفع ليهم .. بقرّوك زي الورد ..
المهم قلنا ما مشكله ندخل الجامعه و بتفرج ..
| |
|
|
|
|
|
|
Re: جيل ما بعد عصر الشحادين !!! قيقراوي تعال أحكي ليك .. (Re: Amany Elamin)
|
نسبنا الجبناها يا قيقراوي في امتحان الشهاده الثانويه ياها الدخلت جيلكم الطب والهندسه .. لكن في زمننا قالوا أبدا .. اخترعوا القبول الخاص وأبناء الشهداء .. وباعوا مقاعدنا البنستحقها بتعبنا وسهرنا لأولاد المغتربين وأولاد " الشهداء ".. نسيت أقول ليك في الاخر جاء الشيخ وقال ما شهداء ولا حاجه .. طيب مدي أولادهم فرصنا لييييه؟ والجامعه حقت منو فيهم عشان يدي مقاعدها لأولاد الشهداء وللا يبيعها بالقروش؟ عشان لما كنت ما بطلع من الخمسه الأوائل وزميلتي الماحأقدر أقول ليك اسمها بتجي التلاتين .. أدخل الجامعه ألقاها فيييييي المين رود حق الطب .. قالوا أبوها شهيد !!! واللي عندهم قروش كتاااااااار يزيدوا ليهم نسبهم 7% ومرات أكتر, ويختاروا الكليه العايزنها كمان !! وده كلوا من مقاعدنا اللي مفروض ندخلها بالمجان .. المهم جامعة الخرطوم حقتنا دي باعوها زي الترتيب للعندهم قروش كتار ولأولادهم واولاد شهداءهم .. ونحن طلعنا من المولد بلا حمص .. قلنا مامشكله دخلوها بقروشهم ودخلناها بمجهودنا .. مع فارق الكليات طبعا .. لكن في النهايه المشي لقدام ونجح يانا نحن ما هم .. هم قعدوا فيها لييي يومنا هذا !!...
| |
|
|
|
|
|
|
Re: جيل ما بعد عصر الشحادين !!! قيقراوي تعال أحكي ليك .. (Re: Amany Elamin)
|
المهم ياسيدي جينا ندخل الجامعه ونبدأ دراسه قالوا أبدا .. الأولاد يمشوا الجنوب بعد التدريب بتاع الخدمه الوطنيه.. القرايه الليهم شنو والبلد فيها حرب .. ساقوا الأولاد.. ساقوهم غدر ياقيقراوي .. كانوا ماشين يسلموا العهده حقت التدريب .. دخلوهم طياره وودوهم الجنوب .. سفر بالأكراه .. والما حيسافر ما حيدخل الجامعه !!! وقعدوا البنات سنه في البيت لغاية ما الاولاد يرجعوا .. عارف في كم من دفعتنا خلوا القرايه والجامعه وشردوا من البلد زاتها ..؟؟؟
فتحت الجامعه بعد سنه بالفضل من الأولاد .. بعد ما جزء منهم مات في الجنوب وجزء شرد .. المهم في الوقت ده كان في دفعه تانيه امتحنت شهاده , دفعتين في الحقيقه لأنه ديل الدمجوهم ناس الاسباين الحكيت ليك عنهم .. وفجأه بقينا بنسمع عن النسب بتاعت 99.9% اللي زمان أول السودان مابيجيبها .. ماتسألني عملوها كيف؟ ما عارفه , بس بقي التعليم فيهو حاجات غريبه وعجيبه ,, والناس بتجيب نسب ما مفهومه .. المهم قاموا جابوا لينا الدفعه الجديده دي بعد سيميستر واحد في الجامعه .. وعشان يلحقوهم بقينا نحن نقرأ سيميستر ونأجز أربعه شهور عشان هم يقروا سيميستر , ويأجزوا أربعه شهور عشان نحن ......الخ .. وبعد اعتصامات ومشاكل دمجوا الدفعتين وبقينا تلاته دفع في نفس ال Class ..
| |
|
|
|
|
|
|
Re: جيل ما بعد عصر الشحادين !!! قيقراوي تعال أحكي ليك .. (Re: Amany Elamin)
|
نسيت أحكي ليك انه فجأه الوزير طلع قرار انه الدراسه في الجامعات بالعربي .. لغاية هسي ما قادره أفهم ليييييه بالعربي ..؟ فتوه دينيه مثلا ؟ الانجليزي حرام؟ عايزه زول يتبرع يفهمني النقطه دي عشان لسه ما واقعه لي ... المهم شفنا الويل عشان نترجم المراجع والمصطلحات العلميه .. بالله مش جيل حقل تجارب .. أي فكره ما مفهومه اتطبقت فيه؟ بعدين مش جيلكم ده ياقيقراوي القرأ في الجامعه زمن الداخليات والصفره والعلاج والخدمات اللي ما بنحلم بيها ولا بنتخيلها؟ زمن طالب الجامعه قيمه ومحترم .. نحن ده كلوا سمعنا بيهو زي الأحاجي حقت الحبوبات .. وقرينا في وضع أسوأ من سئ , ومشاكل الداخليات ومراتبها ووفاة الطالب محمد عبد السلام ونحن في سنه أول جامعه .... الحمد لله بيتنا في بحري وماكنت بحتاج أسكن في الداخليه .. لكن كنت بحزن علي الناس المن بره الخرطوم والعذاب والمجاهده عشان الواحد يتخرج ويشيل شهاده ..
واتخرجنا ياسيدي ..
| |
|
|
|
|
|
|
Re: جيل ما بعد عصر الشحادين !!! قيقراوي تعال أحكي ليك .. (Re: Amany Elamin)
|
قبل أيام قرأت لقاء طويل مع د/ احسان عبدالرسول قالت كلاماً في غاية الحزن من محبسها بمستشفي الأمراض النفسية بعد جملة أفكارها التي طرحتها بشجاعة نادرة تفتقدها الساحة السودانية ، غض النظر عن اتفاقي او اختلافي مع مجمل طرحها لكن يبقي من الشجاعة أن نتلمس ما جاء في خطابها بكثير اهتمام ! طالبت الدكتورة احسان بعودة المستعمر عبر اليات الانتداب والشركات عابرة القارات كآخر الحلول لانقاذ وطننا من براثن (إستعمار اولاد البلد واليانكي)
جاءتني صور شتي تخص جميعها استقلال بلادنا والتضحيات ووووو الشهداء وكل ما يقوله تاريخنا الوطني (كثير الفجيعة) . لم نكن يوماً كما سطر التاريخ بل كنا دوماً كما سطر من قامو بتزييف حياتنا . وطن يحترق وجيش عرمرم من الساسة والكتبة والباشبوزق والجهدية وجيوش بغيضة تتمدد تمدد ولا مغيث ! نشهد علي الاقل أنا وصاحبي المذكور هنا أننا قاومنا وما متنا بحثاً عن خيار يبقي ذاك الوطن كما حلمنا به لا كما حلم به غرباء اليد والوجه واللسان . تضاءلت أحلامنا للغاية انكسرت مجاديفنا ونحن نبحث عن سبيل وطني يخصنا وئدت آمالنا ونحن نبحث عن مشروع يخص الوطن في عضمه !
كثيرون من ابناء جيلنا قتلهم الاحباط ومن لم يمت منهم اصبح يمشي مكسور الخاطر بعد ان استلب الناهبون بريق عيونهم ! نحس اننا ظلمنا أكثر كثيراً من ظلم الحسين ! نحن الجيل الذي خرج للشارع وما وجد الطريق نحن الذين فاجأتنا الحروب ونحن نغني للسلام والحياة ! نحن الذين مددنا للشمس ايدينا فلسعتنا عقارب الارض ووحوش السماء ! نحن الذين ما لمينا في أي حاجة في هذه الدنيا العريضة غير أحلام وحبيبات وذكريات تخص ماضينا العريق ! نحن أيها الناس ليس لدينا ما نقوله لكننا نقسم بأحلامنا أننا سنواصل ضاغطين علي الجرح والنزيف!
والله في !
وأقول قولي هذا واستغفر الله العظيم لي ولكم قومو الي إحباطكم يرحمكم الله
ــــــــــــــــ
دي جكتي معاكم يا أماني
محل إشتهيتك لقيتك عشم ! الي صديقي في عطالته النموذجية
| |
|
|
|
|
|
|
Re: جيل ما بعد عصر الشحادين !!! قيقراوي تعال أحكي ليك .. (Re: خضر حسين خليل)
|
نواصل يا قيقراوي ..
اتخرجنا يا سيدي وقلنا الحمد لله أدونا الشهادات .. قالوا أبدا تمشوا يالبنات تعملوا خدمه وطنيه ومعسكر .. زي ده لاقاك ياقيقراوي .. هسي قول الحرب ولعت فيييي الخرطوم .. نحن بعلمونا السلاح لشنو .. ما عندهم رجال يحمونا ؟؟؟؟ جيش مافي ؟؟؟
تمشي المنسقيه بعد صلاة الصبح بالضبط تلقي عسكري شايل سوط .. أي والله .. سوط عديل ..!!! تقعد تقول ليه لو سمحت !! يتعامل معاك كأنك شتمته .. طبعا لوسمحت دي بكون ما سمعها عمرو كله .. المهم ياسيدي اتصنفت ج .. لكن غيري كتار من بنات الدفعه اتصنفوا ألف ومشوا التدريب !!! في المنسقيه بتاعت الخدمه الوطنيه .. أسوأ مكان ممكن يمر بيهو الخريج في حياته , فرصه للعساكر الصغااااااار ديل والبنات حقينهم الفي المنسقيه الماعارفه اسمهم أخوات نسيبه ولا شنو ديل .. عشان يتفسحوا فيك فسحه .. بس لو عرفت الناس ديل كانوا زعلانين مننا في شنو ؟ ما حسيت بي اهانه وانه بلدنا بلد فيها البني ادم زيه وزي الحيوان غير في الايام ديك ..
طبعا زي ما عارف غالبا سنة الخدمه بتكون بدون مرتب !!..
| |
|
|
|
|
|
|
Re: جيل ما بعد عصر الشحادين !!! قيقراوي تعال أحكي ليك .. (Re: Amany Elamin)
|
قول ياقيقراوي شلنا الشهادات .. فجأه اتلفتنا لقيتا في ملايين تانين شايلين شهادات وعايزين يشتغلوا .. الحقبه مابعد عصر الشحادين .. كان أحد مميزاتها .. توفير جامعه لكل مواطن .. يعني وانت طالع من بيتكم, بتلقي البيت الجمبكم طوالي اتأجر لجامعة شنو كده ماعارفه اللي عندها مية مركز حاسوب وكلية تقنية معلومات .. وكل الدكاتره اللي عايزين استثمروا فتحت لهم الأبواب مشرعه ليتثمروا في التعليم تحديدا, والأفضل طبعا في كليات الطب.. عشان أي مواطن يكون عنده ولده أو بنته في مجال الطب .. "ومامهم انه بعد ده كله الشعب كله عيان ومافي زول بيتعالج" ..
المهم بقي في كل أنواع الشهادات اللي ممكن تخطر في بالك .. حتي جامعتنا جامعة الخرطوم .. فجأه قرروا لزيادة فرص الاستثمار, أقصد فرص التعليم .. يعملوا فيها مايسمي بالدبلومات .. وأي زول ما عندوا قروش كتاااااااار ولا أبوهو شهيد , ونفسو في جامعة الخرطوم تحديدا .. يدفع أكتر شوييييه ويقرأ بدل بكلاريوس دبلوم .. ويتجدع في نفس القاعات, والمين رود, والمكتبه بتاعت المين .. والكافتيريات .. وكده .. الحقيقه انه الحقبه مابعد عصر الشحادين متعت جميع من بنفسه هوي لدخول جامعة الخرطوم .. الا من أبي .. من أبي يمشي يقرأ في أي جامعه أو كليه جامعيه "شفت الأسامي دي كيف؟" من المليون Option المتاح لكل الطلبه .. الفاشلين منهم قبل الناجحين .. خصوصا انه مامهم قريت وين وللا قريت شنو طالما الفيصل الوحيد للحصول علي عمل هو الواسطه .. يعني الجامعه في جيلنا يا قيقراوي فتره لتمضية Nice time والبعديها ماعندو علاقه بيها ..
| |
|
|
|
|
|
|
Re: جيل ما بعد عصر الشحادين !!! قيقراوي تعال أحكي ليك .. (Re: Amany Elamin)
|
عشان ما أطول عليك يا سيدي.. نحن الجيل اللي تم اشغاله تماما مع سبق الاصرار والترصد بنفسه .. الجيل اللي تم فيه تنفيذ كل التجارب الفاشله باعتراف أصحابها بعد حين .. الجيل اللي ماكان ممكن يلقي فرصه يبدع أو حتي يتعلم الابداع .. الجيل اللي لما تم اقصائه من ميادين الابداع .. تم شغله بكافة الطرق للابتعاد عن حقل السياسه Stay away from politics وبعد ما كان في نظام عام وضبط وربط في بداية الرساله المابعد شحاديه .. بقي في ارخاء لجميع الحبال .. وسيب الحبل علي القارب .. واعلام مفتوح وأعياد حب ,, وحدائق في الشارع العام للاحتفال حتي في غير أيام عيد الحب .. المهم الشباب ديل يكونوا مافاضين .. عشان ما يفكروا .. ويظهر الجيل الحالي اللي ما عندوا أدني فكره عن الحاصل في البلد ولا الحيحصل فيها ..
كده ياسيدي أكون أوجزته ليك عن جيل مابعد عصر الشحادين ..
تحياتي واحترامي ..
| |
|
|
|
|
|
|
Re: جيل ما بعد عصر الشحادين !!! قيقراوي تعال أحكي ليك .. (Re: Amany Elamin)
|
الاستاذة امانى
لك التحية و الاحترام
كلامك فى المليان و بنبش الحقيقة من قبرها و ياليت قوى يسمعون .
سوف ارد عليك فى شئين :
الاول : صدقينى يا عزيزة انو الاستاذ قيقراوى ليست من ذاك الجيل .
قيقراوى من جيلك انت يا أمانى
Quote: نسيت أحكي ليك انه فجأه الوزير طلع قرار انه الدراسه في الجامعات بالعربي .. لغاية هسي ما قادره أفهم ليييييه بالعربي ..؟ فتوه دينيه مثلا ؟ الانجليزي حرام؟ عايزه زول يتبرع يفهمني النقطه دي عشان لسه ما واقعه لي ...
|
و لان اللغة الانجليزية لها اليد العليا فى البحث العلمى بكافة انواعه و لاهميتها القصوى لخلق جيل يواكب
هذه البحوث و تلك المستجدات كان لابد من لن تلغى فى الجامعات ليكون الخريج امى من الدرجة الاولى و جاهل بما يحدث
حوله من تطور فى كافة المجالات. و لانهم يملكون السلطة و المال ارادوا ان يوفدوا ابنائهم الى الخارج من ناحية
و تأسيس مدارس خاصة لهم و بمصروفات لا يمكن للغلابة الايفاء بها و بالتالى ان نكون حيل من الاميين و الجهلة و تكون
لهم العلياء و الرفعة و تولى كافة المناصب المهمة فى الدولة . و بوادر ذلك ظهرت الان فى كثير من المجالات
| |
|
|
|
|
|
|
Re: جيل ما بعد عصر الشحادين !!! قيقراوي تعال أحكي ليك .. (Re: الطيب رحمه قريمان)
|
الأخ الطيب : سلامات ومرحبا .. شكرا علي المشاركه القيمه .. الأخ قيقراوي ما عندي فكره عن عمره تحديدا لكن هو براهو قال سنة 81 كان بيجيبوهو في التلفزيون .. (وش أخضر)..
Quote: . و لانهم يملكون السلطة و المال ارادوا ان يوفدوا ابنائهم الى الخارج من ناحية و تأسيس مدارس خاصة لهم و بمصروفات لا يمكن للغلابة الايفاء بها و بالتالى ان نكون حيل من الاميين و الجهلة و تكون لهم العلياء و الرفعة و تولى كافة المناصب المهمة فى الدولة . و بوادر ذلك ظهرت الان فى كثير من المجالات |
ده اقصاء تعليمي يعني ولا شنو؟ تخطيط بتاع مية سنه لقدام؟ تدمير الشعب اكاديميا عشان يبقوا صفوه ورواد؟ ده يبقي أول تخطيط من نوعه بهذا الشكل .. جريمه مع سبق الاصرار والترصد !! بس ما أظن تولي المناصب الهامه حاصل حتي من غير تفوق أكاديمي وشهادات .. السيطره علي الوظائف وفرص العمل حصل في احالة الموظفين القدامي للصالح العام .. واستبدال الولاء مكان الكفاءه ..
أو يمكن كلامك صاح وأنا اللي أول مره أعرف انه ممكن بشر يفكروا بالطريقه دي !!! شكررررا علي اضافتك ومرورك ..
| |
|
|
|
|
|
|
Re: جيل ما بعد عصر الشحادين !!! قيقراوي تعال أحكي ليك .. (Re: خضر حسين خليل)
|
الصديق خضر ..
Quote: نحن الجيل الذي خرج للشارع وما وجد الطريق نحن الذين فاجأتنا الحروب ونحن نغني للسلام والحياة ! |
كلنا ياخضر .. نحن وانتو .. الفرق انكم واجهتوا المحنه وانتو أقوي عودا , وأقدر علي المخارجه أو المواجهه, أيهما أجدي.. لكن نحن غرقنا فيها من بدري ,, عودنا اتكسر قبل ما تقوم لينا قائمه.. انشغلنا بأنفسنا والبحث عن مخرج للأزمه .. عشان كده لاهتفنا ولا خرجنا .. ولا أنجزنا.. ولسه بنبحث عن مخرج ..
شكرا علي المساهمه القيمه.. قريت البوست واستمتعت بيه جدا..
تحياتي ..
| |
|
|
|
|
|
|
Re: جيل ما بعد عصر الشحادين !!! قيقراوي تعال أحكي ليك .. (Re: Amany Elamin)
|
الاستاذةأمانى
لك التحية مرة أخرى
تعرفى يا استاذة الاستاذ قيقراوى ده سنة 81 دى كان .......... و لا خليها فى سرك !!!
الغريبة هو ما شاف البوست ده و لا شنو ؟؟؟
Quote: بس ما أظن تولي المناصب الهامه حاصل حتي من غير تفوق أكاديمي وشهادات .. السيطره علي الوظائف وفرص العمل حصل في احالة الموظفين القدامي للصالح العام .. واستبدال الولاء مكان الكفاءه .. |
صحيح دى مرحلة و هى ان شاغلى المناصب ليست يالضرورة ان تكون لهم مؤهلات عليا و دونك امثلة لا حصر لها
أنت كلامك فى محله و لكن الذى قصده هو أنهم على المدى البعيد سوف يشترطون الدرجات العليا
و اللغات الاجنبية و اولها الانجليزية " بعد ما يفكوا البلد ده اصلا لو حايفكوها"
| |
|
|
|
|
|
|
جيل ما بعد عصر الشحادين !!! قيقراوي تعال أحكي ليك .. (Re: Amany Elamin)
|
Quote: الاول : صدقينى يا عزيزة انو الاستاذ قيقراوى ليست من ذاك الجيل .
قيقراوى من جيلك انت يا أمانى |
صديقتاذنا الطيب رحمة القيقراوي الجدجد استاذ انت ياخ انا قيقراوي ساي و بعد عفوكم و رضاكم كمان تعرف اتعمدت اقفز فوق زمن القيقر لزمن كوستي . . . و خالين الحكي عن القيقر لزمن جميل عن زمن جاي و زمن لسه داك موضوع صعب و مشبك لنسيج اجتماعي سليم و معافى و فكرة وطن كان على الاقل في منطقة جنوب النيلين من الجبلين لي ملكال و من ابو خدرة لي قيسان
معليش يا اماني الطيب رحمة اخوي الكبير و هديل الجيل الانتوا قاصدينه اما انا في الغالب بلا جيل غير الذاكرة الكتبت بيها دي و الروح باقي فيها شحتفة عن كل القلتيه عاليه . . . واصلي يا ستي و انا مستمتع جداً بانو اسمع . . . ذاكرتنا واحدة على الاقل للمكان جامعة الخرطوم او كما يحلو لكيكي " ام نخيل " نحن في هذى السفوح المطمئنة قاتلنا سنين و اقتتلنا سنتك الاولى في " ام نخيل " نحنا اتوزعتنا المنافي و دا كتاب براه . . . ام نخيل كتاب . . . و المنفى كتاب تاني . . . و الناس هاجرت و هُجرت و نصيبنا كان مدن الملح . . . شرقاً باتجاه الغرب . . . او شرق الله و غرب عدن . . . المهم واحدة من مدن الملح و في اتجاه الشرق و الاوراق الدخلنا بيها بتثبت هويتنا كرعاة " عامل تربية مواشي " تحديداً استقبلتكم الجامعة بإستشهاد " محمد عبد السلام " و استقبلتنا بإستشهاد " طارق " . . . سيم سيم لو طاوعتوني نحن ذات جيل المحنة . . . و برضو بقول ليكم جيلي و جيلكم دخلوا السيلخانة . . . محاصرين بالجنود و بالجنون . . . او احسبوني مخضرم خاطف جيلين طيب ياخ انا شاكر ليك جداً السياحة دي و ممنون ليك جداً . . . كم مرة كدا ( تكشف كل واحدة في حينها ) لكن انت زولة حساسة ساي كان تدوسي ساي في بوست امجد . . . انا ذاتي اتحسست لما حسيت اني احتليت بوستو لمن ضربت ليهو تلفون . . . و طمني انو البوست مفتوح على كل احتمالات الوجع الفاق الاحتمال دا يا ستي على كلامو هي سيرة و انفضحت
اها قشينا الدرب و كتير معزة ليك و لا عزاء غير الحكي دا
| |
|
|
|
|
|
|
جيل يحكي لجيل (Re: Amany Elamin)
|
جيل .. يحكي لجيل
نفس الوشم .. علي عضلة القلب
ونفس الجراح .
شكرا .. سيدتي
............
قيقراوي مشتاقين
الكبرك كده شنو ياخوي ؟؟؟
حتما مرجلة البخار وصافرة الموانيء
زيكو
| |
|
|
|
|
|
|
Re: جيل يحكي لجيل (Re: بابكر عثمان مكي)
|
الأخت العزيزة Amany Elamin
أحييك على هذا البوست الجميل، وأرجو أن تواصلي.
هناك فعلاً هوة خلقها النظام بين جيلين، كان هدفها الإستراتيجي تشريد الجيل الأول، و(غسل دماغ) الجيل الثاني، ليخرج جيل ثالث كامل الدسم للكيزان.
لكن صدقيني كتاباتك تثبت تماماً أن النظام كان ينقش على الحجر. وأن اللغة التي تجمع الأجيال هي واحدة لم تتغير بل زادها الصمت بلاغةًًَ،، وأن الأحلام هي نفسها لم تتبدل بل زادها الصبر وضوحا وجلاء.
إن هذا المخزون من الغضب الذي تحملينه وجيلك، هو المفتاح السحري للتغيير.
وكلما كان الهدف صعب المنال كان تحقيقه أروع.
| |
|
|
|
|
|
|
Re: جيل يحكي لجيل (Re: Elawad Eltayeb)
|
حبيبة القسى أماني
عفيت منك,,,
والله كلامك من عصب الجرح
مفروض ده كلو يتأرخ,,,
ياريت يتطبع ويتنشر ويتوزع لكل الاجيال,,,
أماني كنا حنكون في خندق واحد,,لكن الغربة مرقتني,,,ما نجتني,,,مرقتني وبس,,,صدقيني,,,
ده كلو أثر فينا,,,سواء بره ولا جوه,,, ولو بطرق مختلفة,,,وفي النهاية,,,
ياها بلدنا,,,أصلنا,,,مالينا غيره,,,
ومافي راحة بال غير فيها,,,لكن,,,
مافي أحر من مغصة "الابن العاق",,,
والله بس عالم الاجيال الجاية بتتلحق,,,؟؟,,,
لانه في جيل كثيرين منه عشان مصلحته يبيع الوطن عادي,,,ولا ضمير لمن تنادي,,,
عادي يقول ليك:" سودان شنو,,هي دي بلد دي أنا علي بروحي وبس"
والله شئ مؤسف ومحزن و,,,
وياللحسرة,,,
ولسه هم مصرين ومتمسكين,,,ويكابروا,,,
فوق كم؟
. . .؟؟؟؟؟؟؟؟؟؟؟؟؟؟؟؟؟
لك محبتي.
| |
|
|
|
|
|
|
Re: جيل يحكي لجيل (Re: Omayma Alfargony)
|
أهلا يا أميمه: كان لازم تحسي بكلامي ويوجعك طالما نحن في نفس المركب .. حتي لو الظروف أبعدتك , كونك حاسه ومتابعه بالحصل لجيلنا ده أكبر دليل علي مشاركتك لهمنا المشترك .. صدقيني جيلنا في البيتهموا بانه عاجز أو أناني .. اللي بيقولوا الكلام ده يمكن ما حاسين اننا أول من اتطبقت فيه كل النظريات الفاشله.. والنتيجه اننا لسه بنحاول نلقي مخرج .. بس للأسف المخرج فردي ما جماعي ..
وفي البعدينا زي ماقلتي لااتوجع لا هاميهو الوجع .. جيل يبحث عن الترفيه والمزاج.. أيا كان الوضع وسوءه.. وده طبعا مخطط ليه.. وديل أغلبهم حصيلة جيل المنافي !!
تحيه واحترام وموده ..
| |
|
|
|
|
|
|
Re: جيل يحكي لجيل (Re: Elawad Eltayeb)
|
الأخ العوض الطيب : كلماتك جميله جدا ومعبره ومشجعه.. شكرا عليها كتير ..
Quote: هناك فعلاً هوة خلقها النظام بين جيلين، كان هدفها الإستراتيجي تشريد الجيل الأول، و(غسل دماغ) الجيل الثاني، ليخرج جيل ثالث كامل الدسم للكيزان.. |
تلخيص جميل .. بس عندي اضافه أنو الجيل التاني ما اتغسل دماغه.. الجيل التاني حصلت ليه اباده عديل .. في حرب السنوات العجاف .. زمن الكشه ومحرقة الشباب في الجنوب ..
صحي عندي سؤال .. حرب دارفور دي ليه ماكان فيها استنفار وكشه زي حرب الجنوب ؟؟!! هل من مجيب؟
ألف شكر .. تحياتي ومودتي..
| |
|
|
|
|
|
|
Re: جيل يحكي لجيل (Re: بابكر عثمان مكي)
|
أهلا بيك أخي بابكر :
Quote: نفس الوشم .. علي عضلة القلب ونفس الجراح . |
كلامك صاح.. نفس الوجع .. بس نحن بنحكي عن جيلنا المتهم بانه عاش عصر رخاء وسعاده .. ومامر بمرحلة الشحده والصفوف .. بالله عليك صفوف الالزاميه دي براها مش أكبر شحده .. شحدة شهادات .. تقرأ لمن ربنا يرحمك وتتخرج, وأهلك يرجو يفرحوا بشهادتك .. عشان شهادتك تبقي في ايد العسكر .. وتتطرا تصحي كل يوم بدري من صلاة الصبح زي ماقال المستشار .. عشان تمشي تقيف في صفوف الخدمه, وتشحد شهادتك الجبتها بتعبك وسهرك .. وفي النهايه يوزعوك معسكر ويقولوا ليك مر علينا بعد سنه بدون مرتب .. عشان تدفع رسوم حاجات ماعارفه شنو وتتذله ذلة الحرامي لناس الخدمه ؟ سبحان الله ..
شكرا أخي الكريم علي مرورك ..
| |
|
|
|
|
|
|
جيل ما بعد عصر الشحادين !!! قيقراوي تعال أحكي ليك .. (Re: Amany Elamin)
|
Quote: جيل .. يحكي لجيل
نفس الوشم .. علي عضلة القلب ونفس الجراح .
شكرا .. سيدتي ............
قيقراوي مشتاقين
الكبرك كده شنو ياخوي ؟؟؟ حتما مرجلة البخار وصافرة الموانيء
زيكو |
زيكو اشواق من هنا لي رفاعة و شرق الله البارد كلو ياخ
و الله ما عارف الناس ديل لموا فيها توزيع اجيال و مع سيرة كوستي الظاهر كرت التموين بتاعي اتلخبت مع كرت كوستاوي ! ( و ش خردة صاري ) لكن النسألك سؤالك دا خوف من الجرد ؟ واحد بلدياتنا في زمن الانقليز شغلوه باشكاتب اها عدى 10 سنة برضو باشكاتب سأل المفتش يا اخوي شنو ما فيها ترقية؟ قال ليهو لما تفضى وظيفة اعلى بتترقى . .. المهم دارت الايام و الحاكم العام مشى صاحبنا الباشكاتب كلم المفتش اها الحاكم العام مشى ؟ طيب عاوزنا نرقيك حاكم عام يعني ؟ لا لكن انا بقول تتجاردوا و انا امشي لي فوق اها يا اخوي دحين اي جرد لسبحة الجيل دي ات ياكا القدامي
مشتاقين و الله يا ابو الزيك
تعال ياخ احكي عن الجرح . . . و الوشم العلى عضلة القلب
| |
|
|
|
|
|
|
Re: جيل ما بعد عصر الشحادين !!! قيقراوي تعال أحكي ليك .. (Re: Amany Elamin)
|
اماني.. تحياتي وعوافي.. ده اسمه..عرضحـــــــــــال معنون الي: الدكتور..الشيخ..مفتي الجهاد و الحور العين..وبعد98..طلع كلو مافي!!! وزير (التلته والتعتيل و البحث الماعلمي..) مستشار ما بعد زمن الشحده..وبلاد تخلو من السكر. المشير الريئس رئيس شعب..(بلوها و اشربو مويتها..و علي بالطلاق.. وتحت الجزمه) ... . ولك كل الود
| |
|
|
|
|
|
|
Re: جيل ما بعد عصر الشحادين !!! قيقراوي تعال أحكي ليك .. (Re: Hawari Nimir)
|
الاخت اماني تحية طيبة الله يكون في عونكم احييك على السرد الجميل والمؤلم نحن من الجيل الذي بدا فيه ايضا تطبيق nile course لكن حالنا احسن منكم لانوا فعلا افتقدنا كتب readers في المدارس لكن بالجهد الشخصي عرفنا من اراد ان يقوي لغته فليجعل nile course جانبا ويقر readers ليسد الفجوة وفعلا نوعا ما اتحسن لكن درسنا جيلكم وكانت الحسرة على مستقبلهم ومن ثم ابتعدنا من منتصف التسيعينات لنتيه في الارض لكن عندما قرات مقالك الان عرفت ان حسرتي كانت بسيطة والله يكون في عون الاجيال من بعدكم والله المستعان
متابع بشغف
| |
|
|
|
|
|
|
Re: جيل ما بعد عصر الشحادين !!! قيقراوي تعال أحكي ليك .. (Re: Amany Elamin)
|
Quote: الأخ هواري: لا لا لا .. نحن الناس ديل ما بنستجري نخاطبهم زاتو .. مالك عايز تطلعنا بنخاطب السلطات كمان .. أنا وقيقراوي ده بنتذكر في أيام زمان ساكت .. ده بوست ذكريات وحكاوي عن أيامنا الزمان , أيام مابعد عصر الشحده ..
ولك كل الود .. |
اخت اماني.. يا ستي..هم زاتو و الله ما سماعيننا.. يقولو حليهم يتذكرو ساي..الناس ديل..ما اصلا.. جو ا بعد عصر اللاسكر.. فدحين..اتذكري ساي...!! واتا زاتي بجي بتذكر معاكم... بس علييك لو تتذكري كان في صندوق كدي..اسمه دعم الطلاب و لا شنو ما عارف!! عندي صاحبي الله يرحمو و يحسن اليه..كات بدوه 3 الف جنيه في الشهر..بفطر وبرجع البين بكون في جيبه 500 جنيه.. علييك اتذكري لينا الفنره دييييييييك كويس!! تحياتي وتقديري
| |
|
|
|
|
|
|
Re: جيل ما بعد عصر الشحادين !!! قيقراوي تعال أحكي ليك .. (Re: Amany Elamin)
|
أماني وقيقراوي والضيوف الكرام واصلوا حكي عليكم الله خلونا نشبع حسرة
حتى الآن الحسرة كاتمة على قلوبنا وكاسرة سن القلم
نحن ولدنا مع هتافات أكتوبر ... وشبعنا في المظاهرات في نهايات مايو وبرضو ما شاركنا في الانتخابات وحتى الآن لا أعرف سبب سقوط أسمي بالرغم من أن عمري كان قد تجاوز العشرين صيفاً.
نحن حضرنا زمن المدرسة المتوسطة ولله الحمد وقرينا الريدرات من واحد لحدي سبعة وبجهد خاص تمانية.. كان عندنا جمعيات أدبية في الابتدائي والمتوسط وكان عندنا مكتبات ملحقة بالمدارس ولما دخلنا الثانوي كانت الداخليات عامرة بالفول والعدس والفاصوليا ولبن البودرة والأيام الاسبيشال الفيها ما فيها تصوري كان بدونا ساردين مع الفول، والله مرت علينا آيام في عصر ما بعد الشحتة كنا نشتهي الساردين وما نلقى تمنه.
كنا أيام الثانوية نوفر من المصروف عشان نشتري جريدة (كنت أفضل الأيام على الصحافة). في الجامعة ولله الحمد والمنة نفدنا من العربي وقرينا بالإنجليزي وعندما تخرجنا كان عصر ما بعد الشحدة قد بدأ للتو فقتلتني الحسرة مرات ومرات لأني لم استطيع أن أعمل في تخصصي الذي أمضيت سنين خمسا في دراسته (في الحقيقة كانت سبعا بفعل الحرب والتجميدات والإجازات المفتوحة) وكنت أحلم أن اشتغل في ذات التخصص ولو ليوم واحد ولكن هيهات.
.................................................................. الكلام كتير وبيوجع القلب
| |
|
|
|
|
|
|
Re: جيل ما بعد عصر الشحادين !!! قيقراوي تعال أحكي ليك .. (Re: قيقراوي)
|
بمناسبة كوستي و الانحناءة كشيب ظريف المدينة الناس قاعد تداعبة بظهره الذي حناه الزمن انو هيئتوا في مجملها بقى زي الحنكول . . . كشيب ما بكترث لاي شئ و مشوار السخرية ببداه بنفسه . . . برد ليهم ادوني كم سنة كدا و الله نلقوني بقيت ترتار بس . و كشيب هذا حسب شائعة غير متاكد من صحتها رياضي قديم لعب لـ " بري " و " المنتخب القومي " في السبعينات ، لكن المتاكد منه انو نوارة و مركز " قهوة اللعيبة " او قهوة حامد في السوق الكبير ذاك القادم من قباتي في نهر النيل و دي ميزة كوستي انها مدينة حديثة نسبياً و ما فيها صراع سكان اصليين و غزاة و بتستقبل أي زول و بتأسرو بانتمائها . . . كان ما كدا اسي السطور دي ذاتا كان ما ليها معنى الرياضة تحتل مساحات واسعة من ذاكرة مدينة كوستي و كرة القدم زيها و زي أي مدينة عندها تلاتة درجات و دوري ناشئين و دار رياضة و ميدان " ليق " اسموا في كوستي " ميدان الحرية " و هو غير انو ملعب الليق هو ساحة للحرية و نقطة تجمع المظاهرات و الندوات السياسية و الاحتفالات الوطنية و المناسبات الما وطنية و كنا قايلنها وطنية و كان يساق لها ابناء جيلنا بأسم طلائع و رائدات مايو و حتى الكشافة ، و كانت تقام فيه صلوات و احتفالات الاعياد الدينية و الحفلات العامة و المولد و بعض الاحتفالات و الاعياد الوهم برضو . . . عالق في ذاكرتي ندوة لد. حمودة فتح الرحمن في 1986 م . . . الساحة كانت حمراء و المسرح عبارة عن مجموعة كوارو ( جمع كارو ) مرصوصة بجانب بعضها . . . دكتور حمودة تعرض لابشع انواع التعذيب في المعتقلات على خلفية اضراب الدكاترة 1989 زيه و زي رفيقة الشهيد علي فضل نسيت اقول ليكم انو برضو ميدان الحرية ساحة لتجمع الكوارو و للتشاشات و الطبالي او الطبليات و فراشات بيع الذرة و مرتع لغنم عمك بله " الرقيق " ابو صديقي يوسف بله بس ما الرقيق – حقيقي الاتنين ما فيهم رقيق و هو لقب يقلب الواقع . . . احتمال يكون خوفاً منه لانه كان بوليس . . . غايتو فريشين العيش ما كانوا بطردوا غنموا خوف عديل . . . لكن بقتصوا في طرد أي غنماية و لا بشر ياكل حاجة ما حقتو " طير كدا تاكلك غنم بله " في الحقيقة ما يوسف براه الصاحبي اشلاق البوليس كلهم اصحاب و اهل اتربينا معاهم و زي ما قلت ليكم الرياضة كانت تحتل ذاكرة المدينة او على الاقل ذاكرة جيلنا و مقسمة على الاساس دا فريق الاشلاق " الفيصل " وهو اول زول في اصحابنا يغادر للدار الاخرة غريق و اول مواجهة لينا مع الاحساس دا . كل القدرنا عليه نسمي فريقنا باسمه ، بعدين حلة " العصام " عصام ابو دية فقيد آخر - حي النصر ، القمر – الحلة الجديدة ، المشعل – مربع 27 . . . في تقسيم تاني بناء على الجغرافيا بالنسبة لقطبان السكة حديد . . . التقسيم دا عامل استقطاب شديد جداً و مقسمنا لشمال و جنوب . . . فريق الشمال ( الاحياء القديمة ) . . . الحلة الجديدة ، الشاطئ ، الرديف ، الدريسة ، القشارات ، ابو شريف . . . اما فريقنا اغلب احياءه نتيجة احدى التوسعات الحديثة لو استثنينا المرابيع و النصر . طارق زهري باشا ( لاحقاً الشهيد طارق محمد ابراهيم ) كان كوستاوي شمالي بإمتياز و كان كاجمل ما يكون الشباب اجمل شئ كان بعيروا بيهوا الناس اللسانها طويل زي ناس صديقنا عبد العزيز الكنزي في ادبه و اخلاقه و شطارتو . . . و بقول ليهم ما تبقوا زيو ؟ كنزي و من لف لفه طويلي لسان لانو كانوا بعيرونا بانو جنوب القضيب ما في راجل غير جون قرنق . . . و ما دروا انو دي قامة فجيعة تانية نرجع لطارق الشال آماله في دراسة الطب و مشى بيها الخرطوم و رجع لأمة جثة تنقط منها موية ذوبان ثلجها لشدة ما عانت في مشوارها الاخيرة و بسرعة غير متخيلة ابداً و بدون شهادة طب . . . في فجيعة قدر دا يا اخوانا ؟ تعرفي مقتل طارق كان فعلاً مقتل امة . . . ياخ دا مسخ طعم أي حاجة لسنين بعد الحادث النساء بتعاملن مع خبر أي موت بلا مبالاة يقولن ليك " مات طارق الدكتور اب سماعة "
| |
|
|
|
|
|
|
Re: جيل ما بعد عصر الشحادين !!! قيقراوي تعال أحكي ليك .. (Re: قيقراوي)
|
صباحاتك فل يا اماني
راجعي الخيط دا على قول الجماعة التاية أبوعاقلة .. سليم .. بشير الطيب يشير طارق (شهداء جامعة الخرطوم)
و ح يكون اضاءة كويسة و محاولة توثيق لذاكرة فجاعية الدم في جامعة الخرطوم . . . و دي كلها احداث اثرت علينا و ما شهدناها . . . - عدالة الفرص - تصفية السكن - استشهاد طارق - مقاطعة الامتحانات - حل الاتحاد و تجميد النشاط - الفراغ الدستوري . . . و لجنة التسيير
و دي احداث حضرناها - فرض الدفاع الشعبي على المقبولين كشرط تسجيل - صندوق دعم الطلاب و محاولة تقطيع الاوصال - تعديل الدستور - تزوير اول انتخابات اتحاد - اعتصام مكتب المدير - ظاهرة الاكستيرنال - قفل ملفات العلاقات الثقافية و العودة الاجبارية لطلاب الخارج و الدمج غير المؤسس - التعريب
انا برجع ليك بكرة كان ربنا هون انا كلمتك اني سعيد بالتواصل دا ؟ طيب اعرفي اني سعيد جداً
ياخ اجمل حاجة انك ختيتي اسمي في العنوان فوق لمزيد من الشهرة
| |
|
|
|
|
|
|
Re: جيل ما بعد عصر الشحادين !!! قيقراوي تعال أحكي ليك .. (Re: Amjed)
|
Quote: اماني و فتحي الله يدينا خيركم يعني نحنا كنا ناقصيــــــــــــــــــن
اها اقعدو احبطوا فينا كدا لمن نحبط اكتر مما نحنا محبطين زاتو
قيقا الحاصل عندك شنو باحاول اتصل بيك ما بجمع معاي كلو زابط ولا شوية تاني |
سيرة و انفضحت يا فردة
يوم بكرة جميل و باكر ضواي
| |
|
|
|
|
|
|
Re: جيل ما بعد عصر الشحادين !!! قيقراوي تعال أحكي ليك .. (Re: Amjed)
|
هلا يا أمجد:
Quote: اماني و فتحي الله يدينا خيركم يعني نحنا كنا ناقصيــــــــــــــــــن |
أنا براءه والله.. صحبك هو البدا لينا عن وجع الذكريات ومشوار الاحباط..
أنا بكتب وبقرأ ولسه الحاجات بتوجعني كأنها حصلت الليله .. خلينا نفرغ شحنة الغضب دي يمكن نتحسن شويه .. وشاركنا مش انت سيد مسلسل جيل الاحباط ..؟
تحياتي ..
| |
|
|
|
|
|
|
Re: جيل ما بعد عصر الشحادين !!! قيقراوي تعال أحكي ليك .. (Re: قيقراوي)
|
بالمناسبه ازيكم كلكم دون فرز اليوم قراءت لا حد اصدقائي في الفيس بووك ان زكرياتنا هي اغنياتنا او العكس هو الصحيح الكل يحكي يا حليل زمن الرغيفه كانت بقرش ... وانتوالاكلتوا التفاح ونحنا ... والدولاب مدور شديييييييد .. اشكرك ايمان ... وضعتي يدك على الجرح ... وصرخ رجال كبار اهـ اهـ اهـ وجروح وطني متوارثة جيلا بعد جيل ... الجيل القراء ريدر ون وريدر تو .. وبان اند زا شنو كده ما عارف والنايل كورس .... والناس اللخصو ليهم علوم الدنيا كلها في الانسان والكون الازمة كبيرة اختي اماني ... وانا شاب يافع كنت اتلمس طريقي حول الاشتراكية ابوي قال الاشتراكية ماتت في بلدها .. بكل بجاحه قلت ليهو يا ايوي الاشتراكية في الاسلام في .. قال لي وين قلتا ليهو في كتاب الاحاديث في حديث اسمو ... الاشتراكية في الاسلام .... وقلت قال ابو هريره وقال منو ومنو الناس شركاء في ثلاثة .. الماء والكلاء والنار ... نطا قال لي ديل ناس محي الدين صابر العلمانيين والشيوعيين دايرين يسوا في الدين اشتراكية ... لف الزمن ودور وشهد ابي الاسلامي ثورة طفابيع الاسلام ... بكى بدموع الدم ... الشهيد جون قرنق وقال لي يا ابني ده اخر بريق امل وانطفى واعتكف في بيته يحفظ القران ويبتع خطواته كل يوم خمسه مرات الى زاويه في الحله يصلي ويرجع يكفي مصحفه على وجه ويسمع لنفسه ...
| |
|
|
|
|
|
|
Re: جيل ما بعد عصر الشحادين !!! قيقراوي تعال أحكي ليك .. (Re: معتصم ود الجمام)
|
صباحكم خير .. شاكره جدا للمرور والذكريات .. خلوني أبدأ مع قيقراوي ومواصلة حديث الذكريات .. أول حاجه عاجباني جدا فكرة ال BUZZLE اللي ممكن تتكون من ذكريات الأجيال المتعاقبه , وادي نموذج:
Quote: نرجع لطارق الشال آماله في دراسة الطب و مشى بيها الخرطوم و رجع لأمة جثة تنقط منها موية ذوبان ثلجها لشدة ما عانت في مشوارها الاخيرة و بسرعة غير متخيلة ابداً و بدون شهادة طب . . . في فجيعة قدر دا يا اخوانا ؟ |
ياسلااااام.. لازم يعني عشان تتذكر تصحي كل الوجع فينا .. كل الوجع اللي بدينا بيهو حياتنا وفضل معانا ..
طيب يا سيدي حكيت عن طارق خليني أحكي ليك عن سليم !! سليم ولد جيرانا .. وصاحب أخواني الكبار .. صاحبهم يعني من عمرهم ,اتربوا سوا ولعبوا سوا, وعاشوا كل الطفوله والصبا سوا .. ودخلوا جامعة الخرطوم ذاتها سوا .. وانت بتوصف في طارق جاني احساس انك بتوصف في سليم .. نفس المثاليه, التهذيب, بر الوالدين, المحبه اللي عند كل البيعرفوهو تجاهو.. عارف لما يقولوا ليك فلان ده عمرو ما غلّط علي زول .. أهو ده كان سليم ربنا يرحمو.. لما استشهد سليم نحن كنا بره السودان, كنا في بداية سنين التعليم, لكن أخواني كانوا معاهو في الجامعه .. واحد من أخواني كان معاهو لحظة وفاتو,,, لما كبرنا شويه ووعينا حكوا لينا انو العسكر منعوهم يعدوا بيهو سور الجامعه بعد الطلقه الجاتو.. سليم كان حي وكان ممكن يسعفوهو لاخر لحظه, لكن العسكر رفضوا .. لغاية ما أدي الروح لصاحبها في سور الجامعه,, وأصحابو وأخوي معاهم بيحاولوا يعدوا بيهو السور عشان يتعالج ..
عارف الجرح ده كبير قدر شنو في ذاكرتنا .. لما تسمع حكاية دفنو وكيف ضايق العسكر أهلوا.. بتتوجع ياقيقراوي.. تبقي حزين ومظلوم ومقموع كله عليك؟..
فضلنا ياسيدي سنه ورا سنه نتذكرو في يوم حولية وفاته .. الكل يجتمعوا ويتذكروا سليم .. الشاب اللي اتاخد ظلم .. أمو وأخواتو الشرخ الجواهم علي شبابه والأمل الكانوا راجنو فيهو فضل معاهم طول العمر .. ووجع فراقو ما راح منهم ولا يوم ..
حنواصل ..
| |
|
|
|
|
|
|
Re: جيل ما بعد عصر الشحادين !!! قيقراوي تعال أحكي ليك .. (Re: Amany Elamin)
|
Quote:
أنا من جيل الشحاتة
كنت أنام تحت شعاع القمر في ( حوشنا الوسيع ) متدثرا بثوب أمي و ملاءة قطنية الملامح .. احدد من (عنقريبي) المهتوك بالحب والملصوق بالمحبة وسط عناقريب إخوتي ملامح الطوب الذي يقبع في حائط بيتنا وركائز الباب وشجرة النبق و برغم خفوت ضوء القمر الا أنني كنت الحظ شكل زيرنا العتيق في الفناء وصوت تلك القطرة التي تسقط منه مبللة حيز الطين الرطب كان صمت الليل لغة أمان .. وضوء القمر رسالة حنان يومية وان غاب كان ثمة مايدعوا إلي الشعور بالحبور .. ربما هو الدفيء الأسري الذي يعم بيتنا والذي افتقدناه فيما بعد في كل مراحل حياتنا . كانت صلاتنا لا تحمل التناقض وكانت وجوهنا لا تعرف الخوف وكان ديننا ليس حكرا لسياسة وجهة كل الناس يؤمنون ويعملون . كان العالم يحضرنا من مذياع لايحمل المؤامرة ولا تسكنه الهواجس . كانت أرجلنا تحملنا إلي السوق في (مراسيل ) علي لظي نهار حار .. او صباح بارد فنستمتع بالسلام في الطريق .. ابواب تفتح .. وأخري مفتوحة لا احد يخاف من احد ولا احد يظن علي احد
كيف حالك آجنة .. ابوك شديد .. سلم عليه قوليهو حاج الطاهر بيسلم عليك ..
ومن لايعرفك يهديك السلام علي باقة اطيب منها ..
زودتني حاجة ميمونة ربطة ليمون كاملة وهي تحملني السلام لأمي .. وتطلب مني أن أسألها العفو لله والرسول .
حينما حدثت امي بكت ...
لم يمضي يوم او يومين الا وسمعنا بخبر وفاتها .. فارتبط الليمون الأخضر في ذاكرتي بوجه ميمونة الوضيء
لم يغشني ود الأغبش الجزار قط .. كان ينتهرني بحب وهو يضرب بساطوره رجل الخروف بدقة ثم يكيل اللحم دون أن يسألني عن ثمنه ..
قول لي أبوك ده عشان ملاح (أم رقيقة) يمشي فيها (السيوسيو ) كناية علي جودة الطبخ وحلاوة الطعم ، ثم انه كان يدرك مزاج أبي في الطعام جيدا
تلك المشاوير بقفة الملاح جعلتني رجل لا اعرف أن أجيد فن التجارة فليس لي دخل بالسعر قط .. الذي يدفع هو والدي وقد لايحاسبوه حيث ان الأمر كان تبادليا محضا ليس فيه رائحة مصلحة نفاذة وإنما كانت رائحة الإيثار والحب هي التي تملأ المكان . كنت أري الفقراء أغنياء وكنت لا أري أغنياء كان الجو العام كله جو عفة وتعفف ومحبة .. الخير يسكن الجميع .. الناس الأماكن ..
حتي العشق كان لايرهق عاشقيه ..
وأنت عابراً تنتقي زهرة برية وتسكنك إشارة ثوب مورد لبنت الجيران او لغريبة جاءت تحضر زفة عرس أقاربها ..
كان العشق بسيطا وغير ملوث
حتي عند الكوارث يسكن الحب ضفاف النيل .. فيفيض فياضانات 1988 .. أرهقتني الخضرة والجمال علي ضفاف رفاعة .. فحملت قلبي علي يميني وانا احمل شوال تراب لأكمم به فاه النيل المتمرد غير ان قلبي كان يصرخ من جمال آخر فاض حتي تدفق .
وبعد ذاك العام سكت النيل أن يفيض كما سكت عن الحب أيضا ..
وبدأ صوت الكنائس البعيدة يرن في الجوار وأصوات جوقة أسواق عكاظ ترن في الآذان ، تعرفنا علي جوازات السفر .. وعرفنا قيمة العملة ولم يعد يستدين أبي ولم يداعبني ود الاغبش بعباراته الضاحكة ..
حتي أنه لم أعد أحمل قفة الملاح .
فقد وضعتها .. وحملت حقيبة
ولا أزال
|
| |
|
|
|
|
|
|
Re: جيل ما بعد عصر الشحادين !!! قيقراوي تعال أحكي ليك .. (Re: بابكر عثمان مكي)
|
الأخ بابكر عثمان مكي: أجمل وأبسط ما يمكن أن يكون وصف حالنا قبل وبعد ..
Quote: كنت أري الفقراء أغنياء وكنت لا أري أغنياء كان الجو العام كله جو عفة وتعفف ومحبة .. الخير يسكن الجميع .. الناس الأماكن .. حتي العشق كان لايرهق عاشقيه .. كان العشق بسيطا وغير ملوث |
ما أجمل ايجازك لتغير الحال .. انت ايضا فرد من الجيل المحسود .. فنحن الجيل الذي عاصر تغيّر النفوس.. وانتشار الضغائن .. الشعب المشهور بطيبته وتسامحه, أصبح أسهل من يحمل السلاح في وجه بعضه البعض .. ويكيد المكائد ويضع العراقيل .. ليست هذه روحنا المتوارثه.. هذه حصيلة الحياه مع القمع والضيق وشظف العيش .. والحب أصبح دميه في يد الأطفال .. يلعبون بها حتي يسأموا.. فيتخلصون منها أو يكسرونها, ويبحثون عن لعبه أخري أكثر تسلية..
شكرا علي النص البديع ..
| |
|
|
|
|
|
|
Re: جيل ما بعد عصر الشحادين !!! قيقراوي تعال أحكي ليك .. (Re: Amany Elamin)
|
نواصل:
Quote: - عدالة الفرص - تصفية السكن - استشهاد طارق - مقاطعة الامتحانات - حل الاتحاد و تجميد النشاط - الفراغ الدستوري . . . و لجنة التسيير |
دي حكايات سمعنا عنها .. حكوا لينا عنها أخواني الكبار وعاصروها .. واتأثرنا بيها ..
Quote: - فرض الدفاع الشعبي على المقبولين كشرط تسجيل - صندوق دعم الطلاب و محاولة تقطيع الاوصال - تعديل الدستور - تزوير اول انتخابات اتحاد - اعتصام مكتب المدير - ظاهرة الاكستيرنال - قفل ملفات العلاقات الثقافية و العودة الاجبارية لطلاب الخارج و الدمج غير المؤسس - التعريب |
لما دخلنا الجامعه ما كان في اتحاد.. كان متوقف لسنين عددا .. وبعد مطالبات ومعارك خاضها الطلاب, تمت أول انتخابات في العصر الحديث, وفاز التحالف الديمقراطي كأجمل ما يكون الفوز .. كانت هزيمه قاسيه للاسلاميين .. وفرح التحالف فرحه داويه هزت الجامعه فرحا.. وكان أول احتفالات الفرحه مع الفنان محمد وردي أول رجوعه للوطن لما غني أكتوبر في الميدان الشرقي .. كانت أيام تاريخيه واستعاده لكيان الطلاب.. بعد ما استأثرت الاداره لمده طويله بالحل والربط في شؤون الطلاب .. طبعا لاأخفيك سرا اني ما صوّته للتحالف .. صوّته للمحايدين .. كنا نشعر بالغضب من التنظيمات السياسيه كلها وراغبين في التغيير .. عايزين جامعه فيها مصلحة الطلاب ونداءاتهم هي الأولي.. ومع ذلك فرحنا لفوز التحالف.. واستبشرنا بيه كل الخير .. مش دي الديمقراطيه برضو؟ لما تدي صوتك للانت مقتنع بيهو, لكن تشارك الأغلبيه رأيها واختيارها لما يفوزوا ؟..
العوده الاجباريه لطلاب الخارج والتعريب هم أكبر غصه في حلوقنا .. وأكبر جريمه في حق التعليم .. مستنيه أسمع منك عنهم ..
تحياتي .. وفعلا سعيده باجترار الذكريات ..
| |
|
|
|
|
|
|
Re: جيل ما بعد عصر الشحادين !!! قيقراوي تعال أحكي ليك .. (Re: معتصم ود الجمام)
|
يا هلا بمعتصم ود الجمام: سلامات ومرحبا .. سعيده بانضمامك لحديث الذكريات والحكاوي .. زي ما قال قيقراوي خلينا نركب الBUZZLE ونكمّل الصوره... عن الهنا اللي شفناهو بعد ما بطلنا شراب الشاي بالجكه, وأكل العصيده والهناي .. وزي ما قلت:
Quote: جروح وطني متوارثة جيلا بعد جيل ... الجيل القراء ريدر ون وريدر تو .. وبان اند زا شنو كده ما عارف والنايل كورس .... والناس اللخصو ليهم علوم الدنيا كلها في الانسان والكون
|
تحيات كتارات..
| |
|
|
|
|
|
|
Re: جيل ما بعد عصر الشحادين !!! قيقراوي تعال أحكي ليك .. (Re: جعفر محي الدين)
|
الأخ جعفر محي الدين: أقبض.. طيب انتو ما العصر الذهبي البنتكلم عنه زاااتوو.. شكرا لأنه في زول شجاع من الجيل المحسود أفصح عن نفسه, وعقبال الباقين كلهم ..
بعدبن ماتبقوا طماعين.. عايزين تقروا مدارس فيها كل المميزات دي, وتقروا متوسط وريدر, وتسكنوا داخليات في الثانوي اخر ترطيبه .. وتقروا بالانجليزي في الجامعه, وبعد ده تشتغلوا في نفس مجالكم؟ وفي ناس حاجه واحده بس من ده كله ما عاصروها؟
ياسيدي ألف شكر علي الذكريات الجميله.. وواصل وشاركنا عن ذكريات ما بعد عصر اكتشاف السكر ..
تحياتي واحترامي ..
| |
|
|
|
|
|
|
|