|
Re: فى مارس: مابين الفعاليات النسائية و Hunder Kosmatik {يوجد حوار مصور} (Re: Ishraga Mustafa)
|
على سيرة الوجع سمعت طقطقات روحى وروح البنية الروسية التى شاركتنى الكنبة لا تتكلم الالمانية ولا الانجليزية وبالطبع لا اتكلم الروسية ولا تتكلم العربية ومع ذلك فهمنا بعضنا, ذكرتنى السيدة بتروفيتش التى لجأت مع بنتها الى فيينا بعد تلك الحرب اللعينة فيماعرف الآن بيوغسلافيا القديمة
انقبضت روحى وصوت بعيد جاى من مستقبل غامض وغريب بيقول لى- السودان القديم- اى قبل تقسيمة الى خمسة دويلات تقسيم ليس بارادة الناس ورغبتهم,,,, الله غالب!!
كنت اعرف بانى لو استمريت فى تقليب ملفات الوجع دى يانى الما قمت من الصداع النصفى, قلت اغير الموضوع... تصفحت كتلوج بتاع كوافير.. تسريحات وروجات ومناكير وبدكير واتذكرت المناكير ابو لون اسود اللى كنت بطلى بيهو اظافرى لمن كنت فى طور الحب..
النقلة الذهنية والنفسية كانت قوية, قوية جدا...
بقدرة فتحة خشم غيرت حرف ال إى الى إيه الكلب الصغير يكلف حمامو,وتجفيفو وتسريح شعرو تشذيب اظافرو وتنظيف اضنينو وكل الباقى يكلف ثلاثين ايرو...
ثلاثين ايرو وحسب الاعلان الآخر الخاص بفقر عالمنا النامى ان ايرو واحد يكفى حاجة طفل فى افريقيا يعنى كوزمتيك كلب صغير يكفى حاجة طفل افريقى لمدة شهر...
تذكرت لحظتها ام على العراقية, كانت تعمل 12 ساعة فى احدى مطابع الاعلان فى فيينا, كانت تصرخ من الالم فى كل جسمها المهدود بالنزوح من دولة الى اخرى ابان حرب العراق الاولى الى ان استقر بيها واسرتها الكبيرة فى فيينا... كنت قد عملتها ايضا فى سنواتى الاولى, مادفع لىّ رحم ابى من خلال بخاخة الازمة التى اشتريتها بسعر كلفنى الآم فى كتفى الايمن مازلت بعد ثلاثة عشرة عاما ادفع ثمنه مع كل زفرة شوق لابوى..
فتحت الصفحة التانية للاعلان...
ياحليلك با ام على
فلايت عذاباتنا وشقانا تحتاج الى بقية العمر حتى تنفرّ عضلة واحدة خليها مكومة زى الاحزان الفينا يا ستى ام على..
ناس عايشة وما اجملها من عيشة وناس دايشة وما اتعسها من عيشة...
بين العيشتين تقوم كل استفهامات الدنيا, فهى قطعا بكل اللغات موحدة...؟؟؟؟؟؟؟؟
فى مارس... فى آذار... فكرت فى الكلاب والنساء الحسناوات فى الروسية وعيونها اللى بتشبه سمواتنا بعد صبة مطرة صباحية وام على التى تقرأ ماتيسر من القرأن الكريم والادعية الشيعية لابنى حين تسمع تعليقا عن جمال عيونو
شتان مابين نساء ونساء وشتان مابين عوالم وعوالم وشتان مابين آذار وأخر...
--------- Kosmetik هى المفردة الاصحّ ولكنى كتبتها بقصد حسب نطقى لها وكان ذلك فى الرابع من مارس.. مطيتها حسب زفرات الوجع اللى بتطلع داشرة قدامها عذابات وشجون,,, وبعدين ياشجن...ياخ ماتفك دربنا!!
|
|
|
|
|
|