|
|
|
 Re: شخبطات على جدار ذكرى رحيل مصطفى سيدأحمد (Re: Adam Omer)
|
ما بين زمنا متمنّيهو ..وزمنا زادنى اسيّة
طفت الدنيا عشان القاكى ..وانسى الحزن الطارد ليّ
كان البحر الما خلاّنى ..اعيش فرادى
كان اخوان فى الانسانيّة
قعدت معاهم واتفاكرنا .. وكم غنّينا وكم ساهرنا
وكم مازحنا ليالى الصيف ..وكم غنّينا للحريّة
كم دارينا الحزن الاكبر
بين الطيف وجما المنظر
كنتى بتطلعى من عينيهم
وكتين يفرحوا ..او يندهشوا
او يفترشوا سواعد بعض
او يتكلموا عن الارض وسلام العالم
وكنت غريب الوجه معذّب
ما احـــلاهـــم
شالوا معاى الهم بالجملة
وهـــتـــفـــوا
الــبــحر ...الــبــحــر ...الــبــحــر
وجوه المركب فضلوا يغنوا
شويّة ... شويّة ... سكت المركب
كل الناس اتنين ...اتنين
فرح اتكلم بلغتين
كنت برايا وجانى حنين الكون ..اتكوم
غــوّر ..غــوّر .. جوه فى صدرى
واتمنّيت لو كنتى مــعــاى
* لك كامل الود يا مصدّق
انور
| |
 
|
|
|
|
|
|
|
|
Re: شخبطات على جدار ذكرى رحيل مصطفى سيدأحمد (Re: مصدق مصطفى حسين)
|
أخي العزيز مصدق ،
تحياتي ،
رحم الله فنان الشعب الراحل المقيم
مصطفى سيد أحمد ، فلم يكن ومازال
لأرواحنا إلا رياحينا .. نسأل الله
أن يسكنه الفردوس الأعلى مع
النبيين والصديقين والشهداء
وحسن أولئك رفيقا .
عـم عبدالرَّحيم
رائعة المبدع دوماً :
محمد الحسن سالم (حميد)
فتَّاح يا عليم .. رزَّاق يا كريم ..
صلَّى على عَجَل .. هَمْهَمْ .. هَمْهَمَه ..
وحصَّن للعباد .. وهوزز سبحتو ..
دنقر للتراب .. هَمْ فوق هَمْ ، هَمَا ..
صنقع للسما .. وكان في الجو في غيم ..
وكم نجمات بُعاد ، وكان الدنيي صيف ..
لا قالتلو كيف .. كيف أصبحت كيف ..
لا لمسة حنان .. لا لمسة وداد ..
لا رمشة طريف من قلباً وفي ..
زي أيام زمان .. أيام الدفي ..
وكانت ماها في .. كانت في المراح ..
شدتلو الحمار ..
تحلب في الغنم لي شاي الصباح ..
والطير ما نضم .. ما رسَّل نغم ..
عم عبدالرحيم إتوكَّـل نزل ..
في المشرع لِقَى .. زُمْلان الشقا ..
الجا من الجريف .. الجا من الجبل ..
علَّ الناس بخير ..
صبَّح هاظرُم .. نقنق ناقَرُم .. غاظوه ونَعَل ..
عم عبدالرحيم ما بيخَبِر زعل ..
كل الناس هنا .. ما بتخبر زعل ..
تزعل من منو .. وتزعل في شنو .. ؟
كل الناس هنا ..
كل الناس صِحاب .. كل الناس أهل ..
والماهُم قُرَاب .. قَرَّبـُم العمل ..
الطاق اليطق .. عشت أبو الزمل ..
بالحال العليك .. بالفال بالأمل ..
عم عبدالرحيم كُت فلاح في يوم ..
في إيدك تنوم .. على كيفك تقوم ..
لا دفتر حضور .. لا حصة فطور ..
تقرع بالقمر .. تزرع بالنجوم ..
لكن الزمن دوار آ بدوم ..
وعم عبدالرحيم ماشي على الشغل ..
في البال القديم إتعارض تكل ..
تنشايح جراح يا .. كيف الغسل ..
الدنيي أم صلاح .. تبدأ من التُكل ..
من حجة صباح .. في حق الملاح ..
في اللبس الجديد .. في القصد القديم ..
وبيناتن عشم .. في الفرج البعيد ..
أمونة الصباح قالتلو النعال ..
والطِرق إنهرن .. ماقالتلو جيب ..
شيلن يا الحبيب ..
غَشَّهِن النقلتي ، والترزي القريب ..
بس يا أم الحسن ..
طقهن آ بفيد .. طقهن آ بزيد ..
وإنطقن الزمن ..
وإنطق الزمن لازمك توب جديد ..
وبأية تمن ..
غصباً للظروف والحال الحرن ..
شان يا أم الرحوم .. ما تتكسفي يوم ..
لو جاراتنا جَنْ .. مارقات لي صُفَاح ..
أو بيريك نجاح ، ده الواجب إذن ..
وإيه الدنيي غير ..
لمَّة ناس في خير ، أو ساعة حزن .. ؟
عم عبدالرحيم يا حُر .. ماك حر .. !
يا ريت التمر ..
يا ريت لو يشيل كل تلات أشـر ..
والأيام زمان كانت ما تمر ..
كان ماجاك هوان .. ما لاقاك ضر ..
كان لا ضقتي ضيق .. لا إنقرقر صبر ..
لا شابيت غريق .. لا طلوح فقر ..
وكان .. ماكان وكان .. كان أكسيك در ..
حيكومات تجي .. وحيكومات تغور ..
تحكم بالحجي .. بالدجل الكجور ..
ومرة العسكري .. كسار الجبور ..
يوم باسم النبي ، تحكمك القبور ..
تعرف يا صبي ..
مرة تلف تدور .. ولا تقول بري ..
أو تحرق بخور ..
هِم يا الفنجري .. يا الجرف الصبور ..
كل السقتو ما .. باقي على التمور ..
وأرضك راقدي بور ..
لا تيراب وصل .. لا بابور يدور ..
والماهية أف .. عيشة هاك وكف .. ؟!
في هذا الزمن .. تُف يا دنيا تُف .. ؟!
يا العبد الشقي .. ما إتعود شكي ..
لكن الكفاف فوقك منتكي ..
والسوق فيك يسوق .. حالك ما بتسر ..
إلا كمان في ناس فايتاك بالصبر ..
ساكنين بالإيجار، لا طين لا تمر ..
واحدين بالإيجار ما لاقين جُحُر .. !
سلعتم الضراع والعرق اليخر ..
عمال المدن .. كلات المواني ..
الغُبُش التعاني ..
بحارة السفن .. حشاشة القصوب ..
لقاطة القطن .. الجالب حبال ..
الفطن الفرن .. الشغلانتو نار ..
والجو كيف سخن ..
فرقاً شتى بين .. ناسا عيشه دين ..
مجرورة وتجر ..
تقدح بالأجر .. ومرة بلا أجر ..
عيشن كم أهو .. وديشن هان قدر .. ؟!
وناساً حالا زين .. مصنع مصنعين ..
طين في طين وين .. ما مَرَّا با مُرْ ..
بارد همَّها .. لا يعرق جبين ، لا وشن يَصُر ..
عين والله عين ..
كلها كمها .. وعزها هان قدر ..
في الجنة أم نعيم .. في الجنة أم قصر ..
يا عبدالرحيم إلا ورا القبر .. !
ويلكد في الحمار .. لا تسرح كتر ..
فتاح يا عليم ..
وإن كان الفقر يا عبدالرحيم ..
أشبه بالكفر ..
حيكومات تجي .. وحيكومات تغور ..
تحكم بالحجي .. بالدجل الكجور ..
ومرة العسكري ، كسار الجبور ..
يوم بإسم النبي .. تحكمك القبور ..
تعرف يا صبي .. مرة تلف تدور ..
ولا تقول بري .. أو تحرق بخور ..
هم يا الفنجري .. يا الجرف الصبور ..
كل السقتو ما .. باقي على التمور ..
وأرضك راقدي بور ..
لا تيراب وصل .. لا بابور يدور ..
ونقرط للحمار .. ونقريطة الحمار ..
لا تنسي النعال .. الطرقي ، الخضار ..
اللبس الجديد ..
تسريح السفر للماشي الصعيد ..
ماشي الديش نفر ..
والبال إنشغل .. والبال إشتعل ..
والبال إشتغل بالأبا ما يعيد ..
الحول ما إشتغل ..
الغبن الشديد .. السابا ورحل ..
الضيق المحل .. والفرج القريب ..
الجا وما وصل ..
زي الحال ده يوم لا كان لا حصل ..
والبال إشتغل ..
السكة الحديد يا عمو القطر ..
يا عبدالرحيم قدامك قطر ..
وسال الدم مطر ..
وطارت دمعتين ، وإنشايح وتر ..
يا طاحن الخبر ..
ما بين القضا ، ومرحاكة القدر ..
الشهدو الدموم .. والدمع الهدر ..
إيدهم في التراب .. والعين في القطر ..
عارفين الحصل .. عارفين في حذر ..
الخبر اليقين ، بوخ وإنتشر ..
أطفال القرى ، وعمال الحضر ..
أدوه الطيور ، ودنوا البحر ..
إنصاعد سحاب ، وإندافق مطر ..
عم عبدالرحيم في الشارع عَصَر ..
لي تالا اليسار متفادي الكَجَر ..
دورية الكجر .. عربية الكجر ..
جفَّلت الحمار ، وطوح زي حجر .. !؟
وعم عبدالرحيم إتلافا القطر .. !
فتاح يا عليم ..
سال الدم مطر ..
جرتق بالتراب ..
منشور بي كتاب ..
روشتة وجواب ..
وماهية شهر ..
مفتاح أب غراب ..
أورنيكين سهر ..
جنب لبدة حمار ..
مقطوعين ضهر ..
عم عبدالرحيم ..
يا كمين بشر ..
صحي الموت سلام ..
ما يغشاك شر .. !
مودتي ،
( ليمو )
| |
|
|
|
|
|
|
|
|
|
Re: شخبطات على جدار ذكرى رحيل مصطفى سيدأحمد (Re: abdulhalim altilib)
|
أخى الحبيب ليمو
عاطر التحيات
شكرى الجزيل لمرورك ،
لى صديق يعمل محاسب فى مكتب حكومى بمدنى ، يوميا يستقبل عددا من المراجعين ،
هذا الصديق مدمن سماع هذه الملحمه ( عم عبدالرحيم ) ، فى كل سانحه يخرج
برفقة كاسيت و يجلس فى السياره يستمع لها ثم يعود راجعا ( محمر العيون ) لمكتبه ،
بعض المراجعين إكتشفوا ذلك الأمر ، و لذلك كلما تأخر عليهم فى تخليص
إجراءاتهم أو علا صوته متضايقا يقولون له :
اليوم ما أخدت الحبه بتاعة دكتور مصطفى سيداحمد و لا شنو ؟؟
صادق الود و المحبه .
| |
|
|
|
|
|
|
|
|
|
Re: شخبطات على جدار ذكرى رحيل مصطفى سيدأحمد (Re: مصدق مصطفى حسين)
|
الأخ مصطفى والإخوة المتداخلون
لكم التحية
لى مع العملاق مصطفى سيداحمد حكاية يمكن ان اسميها عجيبة
وانا اعيش فى نيويورك كنت احتفظ بعدد غير قليل من تسجيلات الموسيقى السودانية ,,
بنتى وكانت فى الثالثة من عمرها او اصغر كانت لاتنام ليلا الا اذا وضعنا شريط مصطفى سيداحمد وعلى وجه التحديد الأغنية التى يقول فى شطرة منها(وسكت المركب) وكانت بنتى تسمى الشريط شريط المركب ,, واذا حدث وراح الشريط فى زحمة الشرائط كانت لاترضى بديلا عنه ونظل ننكش فى الشرائط حتى نجده ,,
واستمرت على هذا الحال حتى دخلت المدرسة ,, فاكتشفنا لازمة جديدة وهى انها تصحو فرحة وبحيوية اذا شغلنا الشريط لإيقاظها للمدرسة والا نقعد فى التحانيس والجرجرة اما اذا شغلنا الشريط تقوم بكل همة ونشاط ,, استمرت بها الأيام والسنون فى المدرسة وفى يوم جاءت الى البيت وهى تحمل معها كمنجة ,, وبسؤالها اجابت انها اعطيت لها بواسطة مدرسة الموسيقى لتتدرب عليها فى البيت لأنهم اختاروها ضمن مجموعة الموسيقى فى المدرسة ,, ومن يومها ولغاية اليوم نحن فى الويط وييط ,,
المهم البنت اصبحت ماهرة فى عزف هذه الآلة ولم اشأ ان احجر عليها رغم تحفظى وصارت تمثل مدرستها فى كل المنافسات المدرسية ,,
سألت نفسى من أين لبنتى ان تبرع فى هذه الآلة وانا على يقين ان اسلافها من جهة الأب وان علوا ليس فيهم من يجيد ضرب الشتم حتى?
قلت ربما من جهة امها النوبية ,, فهم قوم ذووا حس مرهف ,, رغم عدم علمى بوجود شاعر او فنان من ذوى امها الأقربين.
أهو التأثر بسماعها لمصطفى سيداحمد منذ نعومة اظافرها? ربما
أهى شطارة اليانكى ? لا أدرى
تخريمة
للفنان مصطفى سيداحمد اغنية يقول مطلعها:
قلنا ليهم..
البنادق لما تسكت مابترتاح فى سكونا..
ليلها مليان بالهواجس نومها اوهاما وظنونا,,
كلما اصواتنا تعلا تصحى تتحسس سكونا
ليلهم الخوف والخيانة ونحنا قدامنا الصباح
ارجو ممن لهم دراية بالكمبيوتر رفع هذه الأغنية كاملة ,, ولو امكن الأشارة الى الشاعر ان لم يكن مصطفى نفسه ,, وشكر مقدما والشكر مكرر على البوست الجميل,,
| |
|
|
|
|
|
|
| |
Adam Omer
abdulhalim altilib
سمرية
عبدالعزيز الفاضلابى
فيس بوك
تويتر
انستقرام
يوتيوب
بنتيريست