|
|
 الألفة
|
الألفة
بفتح الألف التانية
طبعا يا جماعة مافي زول في الدنيا دي بحب الالفة مش
المهم
كدي تعالو اسمعو قصتي مع الألفة
انا طبعا خوافة وجبانة وجني وجن الشكل والمشاكل
المهم زمان في المدرسة لما البنات يجو يدقوني ولا يشيلو فطوري
كانت اختي الكبيرة بتعمل لي ساتر في الفسحة
- هي هي دي ما تدقيها دي اخت .......
- طيب مالا ما زي اختها
اها القصة في الفسحة ونهاية اليوم اتحسمت فضل موضوع الفصل
وبالتالي استراتيجيتي اهم حاجة انك تصاحب الألفة
تصاحب دي بقى على حسب نقاط ضعفها وبتكون المهمة ساهلة لو كان عندها مشكلة في الرياضيات
نعقد صفقة من اول اسبوع في السنة
يا زولة ما عندك مشكلة انا بحل ليك الواجب وعلى كدة الامور تمشي تمام
ولو ما عندها مشكلة رياضيات المهم تحاول بجاي بجاي عزومة قنقليز بشطة ولا عجور بشطة ولا اي حاجة اخر اليوم
المهم
في مرة من المرات
في مدرستنا في الابتدائي
كانت عندنا مديرة صعبة شدييد
زولة ضخمة
وصوتها قوي
والله لما تقيف في الحوش وتقول يا بت ارفعي الورقة في ثانية واحدة المدرسة تعدم حتة الورقة
ونحن فصلنا قريب لمكتبها
في يوم المدرسة غايبة
وصوت الازعاج وصلها في مكتبها
جات من هناك وشايلة صوت العنج
- يا بت
وتم ولا نفس ولا حركة
- ايه الفوضى والازعاج
- هاتي الورقة بتاعت المهرجلات
وتقرا في الاسامي وتنادي
قامت واحدة محروقة نادو اسمها ومكتوب عليها عاصية
المديرة بتسال دي مالها
كانت بتضحك ترد الالفة
وتسالها المديرة بتضحكي ليه
والله يا است ......
صفية مساعد بتقعد تحت التربيزة وتعمل لينا حركات نحن بنضحك
والألفة ما بتكتبها بتكتبنا نحن بس
وووب عليك يا صفية
- وين صفية مساعد تسال المديرة
- نعم
وقلبي يرجف وعيوني منططة وعينا علي صوت العنج
- قرد انت ، قرد
المهم عدت اكتفت االمديرة بالتوبيخ اللفظي والله نجاني من الصوت
اها السؤال الان منو الفة المنبر دي عشان الزول يصاحبه او يصاحبها
ويا حبذا لو كانت عندها مشكلة مع الرياضيات
اما اذا كانت مهندسة تبقى كارثة دي يصاحبوها كيف
المنبر لا فيه قنقليز بالشطة ولا دياولو
بالله ورونا الألفة منوممكن الزول يصاحبا كيف عشان لما تجي المدير/ة ما تلقة اسمي مكتوب في لستتة المهرجلين والمهرجلات
؟؟؟؟؟؟؟؟؟؟؟؟؟؟
|
|
 
|
|
|
|
|
|
|
|
Re: الألفة (Re: Safia Mohamed)
|
Quote: والله لكن يا دكتورة بتبالغي عديل كده
بالمناسبة مشتاقين وكده |
لا حول الله
حمد الله على السلامة
وينك يا زول ليك سنين
ببالغ في شنو سؤال موضوعي الألفة منو؟
عشان ما نتكتب في لستتة المهرجلين والمهرجلات
| |
|
|
|
|
|
|
|
|
|
Re: الألفة (Re: Safia Mohamed)
|
صفية..
سلامين وحتة
حكاية الألفة منو بتعرفيها مع الوقت
لكن أنا بعرف لي أستاذ لغة عربية
الأيام دي لافح سوطو وحايم يدي في الناس
دروس ويصحح ليهم ..
لو شاطرة في العربي ما بهبشك، لكن برضو ما بيسيبك
في حالك فانتبهي شديد الأيام دي لبوستاتك..
عارفة
مرة مدرسة الإنجليزي - كانت بتحبني شديد -
قامت وقفتني ألفة على الفصل, بالجد الموضوع
ضايقني شديد لأني ما بحب أكتب زميلة أو زميل
وفي نفس الوقت ما ممكن هي تسمع الصوت العالي
والإزعاج وأجي أقول ليها ما في حاجة..
قمت عملت عيانة وعندي صداع وما قادرة أقيف
ودي كانت الطريقة الخارجتني من الإحراج...
تحياتي
:ــــــــــــــــــ
أبعدي عن الفتاوى ما بتجيك عوجة
| |
|
|
|
|
|
|
|
|
|
Re: الألفة (Re: Safia Mohamed)
|
اميمة
الله يسلمك يا ختي وحتتين
شفتي كريمين كيف
| Quote: حكاية الألفة منو بتعرفيها مع الوقت |
وفت شنو انا لي قريب سنتين ما عرفتها!!!!
دايرة جواب مباشر ، انا جادة
Quote: لكن أنا بعرف لي أستاذ لغة عربية
الأيام دي لافح سوطو وحايم يدي في الناس
دروس ويصحح ليهم ..
لو شاطرة في العربي ما بهبشك، لكن برضو ما بيسيبك
في حالك فانتبهي شديد الأيام دي لبوستاتك.. |
لا كان كدي انا صيد ساهل للاستاذ دي
العربي دة من زمان عندي معاه مشكلة كبيرة
لاني لما كنت في سنة خامسة وهي السنة ال بدوا يدرسونا فيها مبادئ النحو وشنو كنت عيانة بعيد عنك راقدة في المستشفى 3 شهور
اها المواد ديك كلها لحقتها الا العربي دة دخلتني منه عقدة ليوم الليلة ما دايرة تنفك
الله يستر
غايتو انا استراتيجيتي مع مشكلة العربي
اولا بالتبادي بكتب بالدارجي افتكر مافي مصحح لكل الدارجي كل ناس يكتبو دارجيهم البعرفوه
ثانيا بكتب تنويه في حال استخدامي للعربي لزوم القشرات وكدة واشير لقناعتي التامة بضعفي اللغوي واشير لانه المهم الكلام يكون مفهوم وبعد داك باي لغة دي ما مشكلة ما الناس كلها بتسمع الموسيقى وبتسمتع بيها يعني هي نوع من التواصل رغم حاجز اللغة
Quote: عارفة
مرة مدرسة الإنجليزي - كانت بتحبني شديد -
قامت وقفتني ألفة على الفصل, بالجد الموضوع
ضايقني شديد لأني ما بحب أكتب زميلة أو زميل
وفي نفس الوقت ما ممكن هي تسمع الصوت العالي
والإزعاج وأجي أقول ليها ما في حاجة..
قمت عملت عيانة وعندي صداع وما قادرة أقيف
ودي كانت الطريقة الخارجتني من الإحراج... |
بتبالغي في حد القى سلطة واتنازل عنها بكل سهولة
والله لكن انتي ما عارفة السلطة بتجيب الثروة
حقو تاني لو اتيجت ليك فرصة سلطة ما تضيعيها لانك حتقدري تحققي منها مكاسب كتيييرة
Quote: :ــــــــــــــــــ
أبعدي عن الفتاوى ما بتجيك عوجة |
لا لا اصلوا انا وهي ما بنتلم
الداير يفتي يفتي علي كيفه
هو نحن نصدق فتاوى ياتو تيار ولا ياتو
غايتو
نصيحة ليك حاولي اكتبي بالدارجي
ما بتجيك عوجة
فتك بعافية
صفية
| |
|
|
|
|
|
|
|
|
|
Re: الألفة (Re: Safia Mohamed)
|
Quote: بتبالغي في حد القى سلطة واتنازل عنها بكل سهولة
والله لكن انتي ما عارفة السلطة بتجيب الثروة
حقو تاني لو اتيجت ليك فرصة سلطة ما تضيعيها لانك حتقدري تحققي منها مكاسب كتيييرة
|
الأخت العزيزة صفية
سلام
زغت من البوست ده مرتين..
قلت البت دي مالها والإلفة.. يمكن قصيدة نرجع ليها في الآخر...
أتاريكي فاتحا بوست يذكرني بوجع سوط العنج.. ذكرى حلوة ومرة..
الألفا أو الألفة دائما يتم الإختيار لهذه السلطة بصورة لا ترضي غالبية الفصل..
والألفا وان كان محبوبا فأول ما يتسلم هذه السلطة يواجه بمعارضة من قيادات
المعارضة.. والشخصيات ذات الزعامة في الفصل..
زي عبدالله قوش كده يعني..
فالألفة حقيقة هي سلطة ولها ثروة كذلك.. الهدايا من المدمس والطعمية والزلابية..
النبق والفول المسلوك وهلماجرا..
تحياتي
عبدالعزيز
| |
|
|
|
|
|
|
|
|
|
Re: الألفة (Re: Abdlaziz Eisa)
|
Quote: الألفا أو الألفة دائما يتم الإختيار لهذه السلطة بصورة لا ترضي غالبية الفصل..
والألفا وان كان محبوبا فأول ما يتسلم هذه السلطة يواجه بمعارضة من قيادات
المعارضة.. والشخصيات ذات الزعامة في الفصل.. |
اتفق معاك على انه دوما لا يتم استشارة المرؤسين او المرؤسات في من سيراسهم/ن
ومن هنا يتراكم افتقارنا لثقافة الديمقراطية ةالغاء الاخر
يعني زول لقى سلطة خلاص يعمل ما بدالو من غير اي محاسبة حتى على مستوى الالفا في الفصل
يعني المفروض المديرة بدل ما تعاقب المهرجلات في المثال الذمرته تسال الالفة ليه ما سجلتني في القائمة
عشان تظهر الحقايق وما اي زول عندو سلطة يعمل ما بدالوا لا بد من تفعيل القوانين
قوانين غير مكتوبة او غيره من دساتير ولوائح
غايتو المهم دي الحاصل
يا ربي ناس الزمن بعلمو شنو مع الالفة ولا امكن مصطلح الالفة ذاتو انتهى؟؟؟
كدي النسال الباب حقني واجي اقارن
شكرا على المرور
خارج النص:
بالمناسبة يا عبد العزيز الشباب بسالوك قالو ليك لمن كنت ما عارف المريخ من الهلال كنت قدر شنو
يعني لمن كنت بتشجع عبد العزيز
| |
|
|
|
|
|
|
|
|
|
Re: الألفة (Re: salah awad allah)
|
Quote: و أشار لأفخرنا جسداً أن كن ألفة ... كان الألفة
أتذكرهُ إن جلس فمجلسه أوسع
إن قام فقامته أرفع
إن فهم فأطولنا إصبع
و لذا فينا كان الألفة
كم كان كثيراً لا يفهم
لكن الناظر لا يرحم
من منا خطأهُ الألفة
كنا نهديه قطع العملة و الحلوى
لتقربنا منه زلفى
مضت الأيام ... و مضت تتبعها الأعوام
أرقاماً خطتها الأقلام
انفلتت بين أصابعنا
و سياط الناظر تتبعنا
و اللحم لكم و العظم لنا
و مخاوفنا تكبر معنا
السوط الهاوي في الأبدان ضرباً... رهباً ... رعباً ... عنفا
الباعث في كل جبان هلعاً ... وجعاً ... فزعاً ... خوفا
|
ها هو الالفة كم دارت بينى وبينها المعارك اخر اليوم وانحنا ماشين على البيت
| |
|
|
|
|
|
|
|
|
|
Re: الألفة (Re: tayseer alnworani)
|
Quote: و أشار لأفخرنا جسداً أن كن ألفة ... كان الألفة
أتذكرهُ إن جلس فمجلسه أوسع
إن قام فقامته أرفع
إن فهم فأطولنا إصبع
و لذا فينا كان الألفة
كم كان كثيراً لا يفهم
لكن الناظر لا يرحم
من منا خطأهُ الألفة
كنا نهديه قطع العملة و الحلوى
لتقربنا منه زلفى
مضت الأيام ... و مضت تتبعها الأعوام
أرقاماً خطتها الأقلام
انفلتت بين أصابعنا
و سياط الناظر تتبعنا
و اللحم لكم و العظم لنا
و مخاوفنا تكبر معنا
السوط الهاوي في الأبدان ضرباً... رهباً ... رعباً ... عنفا
الباعث في كل جبان هلعاً ... وجعاً ... فزعاً ... خوفا
ها هو الالفة كم دارت بينى وبينها المعارك اخر اليوم وانحنا ماشين على البيت |
تيسير سلامات والله لكن اختصرتي القضية في الابيات دي
فعلا الالفة ما بتحب والناس بتتقرب ليه ويكملو قريشاتهم عشان يكسبو رضاه
ي الزمن الحسع دة في الفة ولا مافي
والاهم الفة المنبر منو
صفية
| |
|
|
|
|
|
|
|
|
|
Re: الألفة (Re: bent-elassied)
|
الألفه عامة لها أجندتها التي ليست بالضروره تبحث في موضوع السلامة..قد تكون لها أجندة الانتقام..
الألفه ربما كانت شخصية تبحث عن مكان لها وسط الآخرين ولا تستطيع ان تجده الا بالوصايه وحمل العصاة!
.........
.........
علي العموم في المدرسه كانت اختيار الألفه يتم علي اسس محدده..
منها الحجم العالي والعقل الفارغ..
منها قسوة الشخصيه ..
ومنها الشخصيه التي ترغب في الظهور وممارسة بعض الأهميه..
علي كل حال لا تصمد أي من الألفات في هذه الوظيفه التعيينيه بدون مرتب الا ذوات الحجم العالي والعقل الفارغ!
أما في الحياه..فان اصحاب الاجندات أمرهم مكشوف حتما..حتي لو تأخر قليلا..
يازوله وين زايغه؟؟
| |
|
|
|
|
|
|
|
|
|
Re: الألفة (Re: khaleel)
|
ازيك يا صفية ..
بغض النظر عن تنميط خليل الفوق ده البيستفز الفوات سابقين زيي كده فاحب اقول ليك انو انا و بكل فخر كنت الالفه
و السبب ما كان شطارة او بلادة
البقاني الالفة هو الشغب.
كنت مشاغب جدا فقرر واحد من الاساتذة انو احسن طريقة للسيطرة على شغبي اني ابقى ألفة.
و بعد داك كل سنة دراسية كان بيكون السؤال منو الألفة بتاعكم السنة الفاتت ؟
فيتم تعييني من جديد.
لاحظي طبعا انو اسلوب تعيين المشاغب الفة اسلوب مؤصل للحركات المسلحة وانو اكثر المعارضين فوضى بيقنعوهو بانو يدوهو وزارة عشان يضمنو سكاتو.
و التجديد للألفة كل سنة كمان فيو انعدام للتداول السلمي للسلطة.
فممكن ناس بوستات السياسة يشيلو المداخلة دي كنموذج لاسباب فساد الحياة السياسية.
بالنسبة لشكل الممارسة بتاعتي فلازم اعترف انها كانت غير نزيهه.
لأني كنت فاعل اساسي و اصيل في الفوضى و كنت بعمل ورقتين للمهرجلين.
واحدة اكتب فيها اي زول بيهرجل و ارقعوا ليك صلايب قدام اسمو كل ما يعمل فوضى.
و ورقة تانية فيها تلاتة او اربعة بس من المشاغبين من الانا ما بدورم و دي هي البتمشي للاستاذ.
اما الورقة الاولى فكانت بتكون نوع من الضغط على الناس و محاولة لاظهار انو انا زول كويس وعادل.
طبعا اسعد لحظة في حياة الالفة لما يشرط الورقة و يكتب في السبورة : الفصل كله.
و يجي الاستاذ يمسك الفصل من طرف و هاك يا دق.
يا سلااااااااام.
متعه مبالغة.
الله يرحم ايام الابتدائي ياخ.
| |
|
|
|
|
|
|
|
|
|
Re: الألفة (Re: حمور زيادة)
|
صفية سلامات ياخ
الألفة دي كنت بصاحبها لانو بخاف منها أكتر من الدق !
كانت أطول من شول صحبي ماشاء الله ( وش ضاحك)
| |
|
|
|
|
|
|
| |
Safia Mohamed
هاشم أحمد خلف الله
Abdlaziz Eisa
salah awad allah
bent-elassied
Muna Khugali
khaleel
حمور زيادة
فيس بوك
تويتر
انستقرام
يوتيوب
بنتيريست