مولانا عادل سمير ولا يهمك يا عزيزي ولا داعي للأسف..
من الطرائف الجميلة إن أقيم حفل ساهر في المدرسة لوداع الدفعة وكان هذا تقليد في القديمة.. و كان الحفل بالفنان الراحل عبدالعزيز داؤود وأثناء ما أبوداؤود بغني أن جاء أستاذ مصطفى حسن ( بوست) ولقد كان من أصحاب الوزن الثقيل جدآ ليبشر في أبوداؤود منتشيآ بإحدى الأغنيات وفجأة إنقطع التيار الكهربائي من المسرح و المدرسة ككل .. وهنا علق أبوداءود لمصطفى حسن ( يا أستاذ كدي زح لينا شوية إمكن تكون عفصت السلك).. وأنفجر الجميع ضاحكين بما فيهم بوست رحمة الله عليه.
تعرف يا تاج السر أنت عبرت بينا مرحلة كاملة من الذاكرة.. حاجة زي
Black&White.. و JB .... Sant James ..... وصينية الإتحاد الإشتراكي .. ورحلة اليونان .. والهروب من المعسكر و السفر ألى لندن لحضور حفل بوب مارلي هناك .. جنون أستاذ فتح الرحمن بجم عند إكتشافه للهروب .. ركوب الإنتركوزموز ترين القطار العالمي من أثينا .. ألى لندن .. ثم العمل في مطاعم لندن في الإجازة و العودة الظافرة للخرطوم.
في الذاكرة إيضا berry white (standing in the shade of love) ,, dona samer ( i know i know. we can make it) something in my mind
santaaaaaaaaaaana ya salaaaaaaaaaaaam يا تاج السر يا فنان
فعلا ( إيش لون الأحمسة ) ... شريط الندوة بالمناسبة كله مقطع رجائي الحديث مع ناس منتدى الجالية لإعادة ترتيب شربط الندوة.
نسيت الأضواء كيف؟؟؟ كنا بنمشي لى ( ابيض) ال(DJ) و نقعد اليوم كلو نسجل في الأغنيات الجديدة و معانا اسامة السيد ( اب نوز) و من هناك غشوة لى سمك الأتينيه و في دكيكين بتاع مزيكة كان ورا الخارجية، و بعدين الأنوار المقابل لى فرن سيحة، ابيض بالليل كان بلعب دسكوتيك النيل الأزرق، و ال( كيف) تحت اكسلسيور، و البلو ستارز كانو بلعبو في سطح صحارى، ,]و دي
Emperors of Soul..The Tempts.
09-18-2008, 04:51 PM
Tagelsir Elmelik
Tagelsir Elmelik
تاريخ التسجيل: 11-25-2004
مجموع المشاركات: 4028
تعرف خالد عبداللطيف وعصام علي ديل كنا دفعة طبعا واصحاب وشلة المسرح دي انا كنت قريب منهم شديد رغم اني ما مثلت وقدر ما تمعنت في صورتك ما قدرت اتذكرك اكيد السنين لعبت دورها
عندي كمية من الحكاوي والطرف ايام القديمة، ان شاء الله لو ربنا مد في العمر بحاول انزلها واسردها هنا
الصديق ياسر .... يازول أنا شنو جابني لناس خالد عبداللطيف وعصام على (بالمناسبة عصام ده وين ؟؟؟) ... أنا دفعة 85م خالد وعصام ديل قدامنا بكم سنة ... بعدين أنا زمان كنت ضعييييييييييف .... قريب حأنزل صورنا القديمة أيام المسرح لكن برضو أظن ما إتعاصرنا إلا في السنة النهائية ... راجين قصصك ...
09-18-2008, 00:39 AM
Tagelsir Elmelik
Tagelsir Elmelik
تاريخ التسجيل: 11-25-2004
مجموع المشاركات: 4028
شكرا اخى الرئع احمد موسى على هذا الموقع الذى اصبح هو الملاذ الوحيد لنا لاجترار ذكريات الزمن الجميل وايام قضيناها ولن ننسى ذكراها. نحن من جيل الوسط 80 _ 82 هذه سنين دراستى بالقديمه من عاشقى شعبة التربيه العسكريه وفى تلك الفتره حصلت المدرسه على كل جوائز التربيه العسكريه والموسيقى على جميع المدارس الثانويه بالسودان ولى عوده معكم بالصور عن هذه الحقبه الجميله من الزمن . مراحل الدراسه بالقديمه اولى ابوبكر /ثانيه ابوبكر/ ثالثه ابوبكر شق الاحياء ودمتم حتى قريب لقاء باذن الله
09-18-2008, 00:54 AM
فتحي الصديق
فتحي الصديق
تاريخ التسجيل: 06-17-2003
مجموع المشاركات: 6072
محمد عبدالمنعم التلب أهلا بيك في المنبر وفي بوست الخرطوم القديمة.. نفس الدفعة سبحان الله.... جزيل الشكر للباشمهندس بكري الذي يسر لنا أمر اللقاء بعد سنين البعاد..
عرفتني وللا لسة يا جنابو ؟؟؟
09-18-2008, 00:56 AM
فتحي الصديق
فتحي الصديق
تاريخ التسجيل: 06-17-2003
مجموع المشاركات: 6072
Quote: من عاشقى شعبة التربيه العسكريه وفى تلك الفتره حصلت المدرسه على كل جوائز التربيه العسكريه والموسيقى على جميع المدارس الثانويه بالسودان ولى عوده معكم بالصور عن هذه الحقبه الجميله من الزمن .
تعرف يا التلب .... برغم التناقض بين الفن والعسكرية إلا أننا كنا بنحب جداً شعبة التربية العسكرية وكان جُل وقتنا مع الصول بابكر وكانت الخرطوم القديمة متميزة دوماً في التربية العسكرية وتخرج منها عدد من الطلاب من الكلية الحربية أذكر منهم أمين محمد محجوب وكان كديت القديمة جواز مرور للكلية ومسرح القديمة جواز مرور لمعهد الموسيقى والمسرح
09-18-2008, 01:22 AM
علاء الدين حيموره
علاء الدين حيموره
تاريخ التسجيل: 08-08-2006
مجموع المشاركات: 5689
ايام حسن عبيد رحمه الله واذكر ونحن في ثالثة توفي ابنه الطالب معنا في المدرسة لا اذكر اسمه في حادث مروري عندما كان يقود دراجته النارية ( عليهما رحمة الله )
استاذ مصطفى بوستي ( والطريقة الفريدة لتبسيط شرح الكيمياء والجدول الدوري الحديث ) ..رحمه الله استاذ اللغة العربية كدودة .. استاذ عصام .. انجليزي ونحن في تالثة انتقل الى المكتبة على ما اعتقد .. ومن الطلبة صديقي عادل حسن نجيلة .. الصحفي ابراهيم عوض .. الدكتور جمال جادين .. مصطفى عبادي .. معتصم حسن موسى ( ركن انصار السنة ) ..
بعد الحصص كنا نذهب انا وصديقي عادل حسن نجيلة لاركان الجامعة وكنا مشدودين لخطاب دالي ( الجمهوريين )
كدي نتذكر شوية شوية ونرجع ..
09-18-2008, 01:32 AM
محمد عبدالمنعم التلب
محمد عبدالمنعم التلب
تاريخ التسجيل: 09-13-2008
مجموع المشاركات: 155
الاخوه الاعزاء احمد موسى _سيد الحوش فتحى الصديق _ الدفعه اولا: الاخ احمد لاتناقض بين الفن والعسكريه واضرب ليك مثل حى من الخرطوم القديمه امين عبد الرحمن خلف الله دفعتى وابناء ذلك الجيل يذكرونه جيدا كان صول الموسيقى وصول بالكديت ومحب للموسيقى واول الدفعه 35 بالكليه الحربيه وضابط مميز الى ان ترك الخدمه وامثاله كثر وفى عقيدتى ان بكل فن يحسه العاشق له. اخونا فتحى . . والله ايام يازمان . انا مازلت بالسودان ولدى كميه من الصور حانزلها بعد رمضان باذن الله عن تلك الفتره واسمعك اخبار الحبايب. اخبارك شنو واراضيك وين ؟
09-18-2008, 01:30 AM
Ahmed musa
Ahmed musa
تاريخ التسجيل: 07-08-2007
مجموع المشاركات: 16669
أيام منذ ( wc يغادر العاصمة القومية) ... يا ممسوخ ...
تعرف يا علاء من فرحتي بالبوست لقد نسيت أن أشكر القديمابي أحمد موسى
وليك ألف شكر .. وشايف أخونا القديمابي عبدالحليم قد نوه لبوست إزالة القديمة ... هنالك أهداء ياحيمورة لكم صورة لإنعاش الذاكرة .. رجائي عمل صورة لك و إنزالها هنا.. ودمت
09-18-2008, 05:23 PM
علاء الدين حيموره
علاء الدين حيموره
تاريخ التسجيل: 08-08-2006
مجموع المشاركات: 5689
أيام منذ ( wc يغادر العاصمة القومية) ... يا ممسوخ ...
ووقفة صغيرة مع صديق الصبا اخوي عادل حسن نجيلة حتى قبيل الدخول للثانوي فمن الطرائف انه كان لنا خياران في محطات الباصات ( محطة النجيلة ... ومحطة الزهرة ) الخرطوم 2 ولما كان والد الاخ عادل عليه رحمة الله (نجيلة ) ووالدته رحمة الله عليها ( زهرة ) فكنا نسال الاخ عادل من وين الركوب يا عادل محطة ابوك ولا محطة امك ....
ومن النكات التى كانت ولا تزال في خاطرة الاخ عادل هي نكتة المسطول والذي دخل الى مرحاض بيتهم فوجد الكثير من الصراصير فنظر الى يمناه فوجد جالون بنزين .. صب كل الجالون في الصراصير واشعل النار وبينما هو واقف يترقب نهاية النار فاذا به ينظر الى سقف المرحاض طائرا من اثر الحريق .. فذهب الي جريدة الصحافة مطالبا بأنزال خبرا عنوانه (W C يغادر العاصمة القومية ) ..
وراجع ليكم
09-18-2008, 07:22 AM
Adel Sameer Tawfiq
Adel Sameer Tawfiq
تاريخ التسجيل: 10-05-2006
مجموع المشاركات: 1074
Quote: علاء الدين حيمورة بالله إنت قديمابي ؟؟؟ و(دالي) ده هل هو (دالي رحمة الله المحامي) ؟؟؟
تصدق يا اخوي احمد .. الخرطوم القديمة فيها عاطر الذكريات ..
اما عن المتمكن دالي خطيب جماعة محمود محمد طه( الجمهوريين ) ((بليغ الكلام)) .. كان خوف الطلبة كلهم انه سوف يقنعهم ..
نعم لانهم لا يستطيعون رد حججه وكان يمتلك ناصية اللغة وادب التخاطب والهدؤ فكان المميز بين كل الكوادر الخطابية في ذاك الوقت .. السيخ كان سلاح الاخوان المسلمين .. وكان السيخ في وجه كل من هو ضدهم فتاثير اركان نقاش الجمهوريين على الطلبو وسياسة الدولة كان اخطر على الاطلاق من اي سلاح آخر ..
اتمنى ان يكون بعافية الاخ دالي ..
ونواصل مع الاخ عادل حسن نجيلة
09-18-2008, 02:33 AM
Ahmed musa
Ahmed musa
تاريخ التسجيل: 07-08-2007
مجموع المشاركات: 16669
كان غالبية الطلاب السياسيين هم إتحاديون من منطقة بري وأمدوم و العيلفون .. وكانوا يتداولون خطب الشريف حسين الهندي في سرية تامة وكان طلاب الجبهة الديموقراطية معظمهم من الخرطوم شرق و العمارات والخرطوم وسط .. وكان طلاب الإتجاه الإسلامي من العيلفون أم دوم و بري إيضآ.. لكن التيار السائد كان إتحاديآ.. ثم تأتى الجبهة الديموقراطية في المرتبة الثانية.. لذا جاء الجو العام في القديمة ذو مسحة ليبرالية وبيئة مسامحة خالية من العنف .. وكانت كل التنظيمات سرية فيما عدا الإتحاد الإشتراكي و الذي كان التنظيم العلني الوحيد ..
09-18-2008, 06:27 AM
عابدون محمد عابدون
عابدون محمد عابدون
تاريخ التسجيل: 07-30-2008
مجموع المشاركات: 2607
ياهو زاتو شكرا ليك كتير، الخال ده اتاريوه عجووووووز مفهمني انه الفرق بيني وبينه 10 سنين بس، عشان كده افتكرته دفعتكم لك الشكر عزيزي
العزيز احمد موسى خالد طبعا رجع السودان قبل سنتين واستقر هناك، لكن عصام ده آخر مرة قابلتو امكن سنة 95 وكان شادي الرحال الىاروبا، لكن سمعت من خالد انه قابله قريب. لكن كنت اقصد طال ما مثلت معاهم اكيد اكون شفتك، لأنه صلتي كانت لصيقة بدفعة التمثيل وبحضر معاهم دايما بحكم صداقتي بخالد
لك الشكر عزيزي
العزيز محمد عبدالمنعم التلب اكيدي تقصد 80 - 83، ولا انا غلطان لأننا دخلنا سنة 80 واتخرجنا 83، لأنه لو كده معناتو انحن دفعة عديل كده وفي فصل واحد، انا ياسر محمد عثمان، لكن عليك الله نزل لينا صورة قديمة شوية خلينا نقدر نتذكرك ، عارف طبعh السنين فعلت الافاعيل فاصبحت الذاكرة خربة جدا
مع اني من الامتداد لكن كنت مباري اولاد بري وكلهم كانوا اصدقائي وبالاخص محمد احمد عبدالماجدالاحمدي، خالد عبداللطيف ساتي، عصام علي، بدوي محمود العاص، هشام (مولانا) الكان رئيس الاتحاد
تعرف يا مولانا عادل إلا أجيب صورة الجنسية أو الشهادة .. لكن دي أحدث صورة في (الكبر) .. تم أخذها رمضان 2006 في دعوة إفطارية وفي آخر يوم في رمضان 29 .. وكنا نحتفل بالختمة ذلك اليوم وكنا مهيئين لصيام الثلاثين .. وعند التاسعة مساء جاء من يخبرنا بثبوت العيد غدآ .. فأخذنا هذه الصور إحتفائآ بالعيد وفرحآ بإتمامنا الصوم..
09-18-2008, 12:48 PM
Adel Sameer Tawfiq
Adel Sameer Tawfiq
تاريخ التسجيل: 10-05-2006
مجموع المشاركات: 1074
Quote: تعرف يا مولانا عادل إلا أجيب صورة الجنسية أو الشهادة .. لكن دي أحدث صورة في (الكبر) .. تم أخذها رمضان 2006 في دعوة إفطارية وفي آخر يوم في رمضان 29 .. وكنا نحتفل بالختمة ذلك اليوم وكنا مهيئين لصيام الثلاثين .. وعند التاسعة مساء جاء من يخبرنا بثبوت العيد غدآ .. فأخذنا هذه الصور إحتفائآ بالعيد وفرحآ بإتمامنا الصوم..
الدالي رحمة الله كان صديقاً للأستاذ الفنان الحبوب المحامي .... وكان ذكياً وحاضر البديهة والنكتة في جلسة أمام المرحوم القاضي( البشاري) بالجزئية الخرطوم ... وكان يحاول جرجرة المواعيد لصالح موكله وكان المحامي الآخر المرحوم (كامل عبدالرازق) المحامي فطلب ميعاداً قريباً جداً ... فرد الدالي : ها يامولانا الشفقة بتطير النفقة .... فضحك المرحوم البشاري بعد أن فشل في إخفاء الضحكة وكان المرحوم البشاري مشهور عنه الوقار ... رحمهما الله
09-19-2008, 00:37 AM
محمد عبدالمنعم التلب
محمد عبدالمنعم التلب
تاريخ التسجيل: 09-13-2008
مجموع المشاركات: 155
الاخ ياسر محمد عثمان كيف احوالك الاسم ماغريب على انحنا امتحنا الشهاده السودانيه فى ابريل 82 ومن دفعتى بالقديمه مؤنس محمد بشير الوقيع_وليد احمد على الطيب_عبد الماجد عمر محمد الطيب امير محمود زروق_ وائل على شبيكه_وليد عبد الرحيم سعيد انا حاولت اديك اسماء من فصول مختلفه عساها تنعش الذاكره الاخ ممدوح عثمان اظنك الدفعه الورانا من سؤالك عن الاسماء التاليه: المعز محمد بشير الوقيع بالولايات المتحده وكان قبل شهر بالسودان ومامتاكد انه رجع والا مازال بالسودان على العموم هم رحلوا المنشيه شرق السفاره الصينيه. الاخ طارق الامين البدراوى هو دفعتى بكليه الشرطه ويعمل بجامعه الرباط(كليه الشرطه سابقا) عقيد شرطه ولكم التحايا
أشهر خريجي الخرطوم القديمة وأساتذتها منذ الإنشاء :
طبعآ ماحتصدقوا دي : عمر حسن أحمد البشير / رئيس الجمهورية .. المساق
الأدبي .. قال عنه أستاذه في اللغة الإنجليزية .. محجوب عمر باشري أنه كان طالبآ مجدآ و مكافحآ .. كان يسكن في منطقة كافوري مع والده الذي يعمل هنالك .. كان يجيد اللغة الأنجليزية .. كما كان يحرز درجات عالية في بقية المواد .. كان يعمل طلبة في إجازته الصيفية ليساعد والده في منصرفات المنزل و بقية أخوته .. تمكن من أحراز نسبة كانت ستؤهله لدراسة الإقتصاد ولكنه فضل الدخول للكلية الحربية لأنها كانت رغبته فضلآ عن أنها تدفع أعانات شهرية لطلبتها تبلغ 31 جنيهآ في الشهر.
بروفسور مصطفى حسن إسحق .. من خريجي القديمة و رئيس شعبة الكيمياء بجامعة الخرطوم تقاعد الآن .. أحد واضعي منهج الكيمياء العضوية للثانويات
بروفسر عبدالوهاب أبوجديري .. أستاذ علم الحيوان الشهير وأحد واضعي منهج الأحياء للثانويات .. بروف أبوجديري إيضآ عمل أستاذا للأحياء في القديمة قبل أن يحرز الماجستير و الدكتوراة ويتحول لجامعة الخرطوم.
دكتور تاج السر العراقي .. عمل بشعبة التاريخ بالقديمة وأحد منقحي وواضعي منهج التاريخ للثانويات .. إنتقل للتدريس بجامعة الخرطوم بعد ذلك .
الدكتور زهير الطاهر عبدالرحمن المقبول .. وزارة المالية قسم التخطيط
توفي ألى رحمة مولاه عام 1993 .
بروفسر : المعز عمر بخيت .. المخ و الأعصاب .. أكتشف علاجآ لجرثومة مرض النوم والذي تسببه ذبابة التسي تسي عدة أبحاث عالمية في أمراض المخ و الأعصاب .. عدد من الجوائز العالمية .. مزيد من التقدم يا بروف.
الدكتور عبد الحافظ خضر .. أستاذ القانون الدولي بفرنسا.
الأستاذ/ محجوب عمر باشري .. الرجل الأنيق بدلة كاملة و كرفته صيفآ و شتاءآ .. عمل أستاذ اللغة الأنجليزية بالقديمة ثم رأس الشعبة قبل أن يتحول لجامعة الخرطوم آداب.. مؤرخ و مؤلف لعدد من الكتب أهمها كتاب النميري الإمام و الروليت.. ثم كتابه الأخير في سلسلة أعلام السودان من شعراء الحقيبة. متعه الله بالصحة و العافية .. أعود لمزيد من التوثيق .. إيضآ أرجو من القديماب التصحيح إذا وردت معلومات خاطئة هنا.
الأستاذ / حسن عبيد الشايقي أستاذ العلوم بالمدرسة تخصص كيمياء أحياء نال درجة الماجستير في لندن في الكيمياء المولارية.. عمل بجامعة الخرطوم لكنه عاد ألى التدريس في القديمة لعلة أصابته .. سبقت شهرته كأستاذ أنه كان محررآ للصفحة العلمية العدد الإسبوعي بصحيفة الرأي العام وبعد مصادرتها تحول بصفحته العلمية ألى جريدة الصحافة العدد الإسبوعي يشاركه في التحرير الأستاذ أبوجديري.. رحم الله حسن عبيد الشاقي .. أواصل
ماشـــــــاء الله ذاكرتك تمام..عندي صور تاني لكن مامعاي الآن..إن شاء الله لما أرجع الخرطوم بطلعها..
مولانا عادل سمير سلامات مستقر بأمريكا حين من الدهر.
دفعات السبعينيات دى دايرة ليها فرز، من مداخلات بعض القدامى شايف زى فى لخبته.
الصورة التى أنزلتها لزملاء المرحوم عبد الكريم ، هى دفعة سنه أولى للعام الدراسى 74/75 وقد يكون الأخ حسين ملاسى معاه حق تكون الصورة أخذت عام 75 وليس 74. أذكر أننى ربطت وفاة عبد لكريم بوفاة سيدة الغناء العربى السيدة ام كلثوم والتى توفت فى فبراير 1975. كدى راجع التاريخ.
دفعتكم(سنة اولى) هى دفعة جمال الشلالى، وهشام محمد عبدالرحيم، وحسن مكى أبو (جيمس)، هشام المفتى، مالك شريف طاهر، هشام عتيق، عادل سمير، مهند جابر، معتصم بخارى، نوارى عمر نوارى، ويحى إبراهيم سعيد. (نوارى زميلنا بالبورد)
قدامكم دفعة سنة ثانية: كما ذكر الأخ تاج السر الملك تضم شخصه، معز بخيت، عمر كبس، عادل عبدالله رابح، حسام كمال، المرحوم أمين الجزولى، أحمد نادر محمد خير
دفعة سنة ثالثة: الكشيف حسن (بطل الجرى)، حسن النجومى (التنس)، على جمال توفيق (كرة قدم _ لاعب النيل)،أسامة ميرغنى (رئيس الإتحاد)، حسن على الطاهر، الرشيد الصادق (كرة طائرة وقدم)، سبف الدولة محمد التوم التجانى، إيهاب أحمد محمود (فريق الطائرة)، الفاتح التوم، أحمد فضل الله، مروان محمدانى، نجيب فضل المولى (طائرة)، المرحوم الزهاوى عمر نوارى.
الدفعة الأمامهم: الأمين ميرغنى، المرحوم مأمون أبو، هشام عوض الكريم، عبد العظيم حسب الرسول، ضياء المفتى، صالح حمدى القبانى
الدفعة الأسبق: محمد سيد (أعزف عازف درمز) عزف فى فرقة البلو ستارز ( وفرقة المرحوم وليم أندرية - نسيت أسم الفرقة). وأحمد آدم (عافية) حارس مرمى الهلال.
(عمار خالد لاعب المريخ أيضاً من طلاب القديمة بس ما متأكد من دفعته)
الدفعة الأمامهم: محمد الفضلى، محمد أبو، كمال شرف، أحمد محمد الشريف البكاى (الشنقيطى)، أسامة عوض الكريم (عالم الفيزياء، وأول إفريقى أسود مستشاراً للخارجية الأمريكية)، وبروفسور محاضر بجامعه بنسلفينيا. (سأحاول الإتصال بالدكتور الباشمهندس محمد أبو بكندا فله ذاكرة قوية فى تذكر أسماء الكثيرين ممن درسوا بالقديمة قى السبعينات)
وفى دفعات أقدم (متفرقة): عمر حسن الشيخ، ميرغنى بابكر قبانى، لام كول، سعيد محى الدين
وتسألنى دفعتى ياتها، الزمن ده أى زول عاصرناه بنقول كان الدفعة القدامنا
.... سنواصل
09-19-2008, 12:30 PM
Adel Sameer Tawfiq
Adel Sameer Tawfiq
تاريخ التسجيل: 10-05-2006
مجموع المشاركات: 1074
Quote: الصورة التى أنزلتها لزملاء المرحوم عبد الكريم ، هى دفعة سنه أولى للعام الدراسى 74/75 وقد يكون الأخ حسين ملاسى معاه حق تكون الصورة أخذت عام 75 وليس 74. أذكر أننى ربطت وفاة عبد لكريم بوفاة سيدة الغناء العربى السيدة ام كلثوم والتى توفت فى فبراير 1975. كدى راجع التاريخ.
تمام كدة..الصورة أخذت في فبراير 1975 وليس 1974 ، العتب على الذاكرة !! أهو كدة وفرنا سنة يا ملاسي !!
على ما أعتقد ظهر في الصورة جلوسآ على عبدالوهاب مقلد أو شقيقه محمد عبدالوهاب مقلد.. محمد درس في رومانيا جامعة كرايوفا Food Technology وحينما عاد ألى السودان أنشأ أول مزرعة للأسماك في منطقة الكلاكلات .. ألى أن المزرعة ضمها النميري للإحتياطي المركزي .. وبعدها غادر محمد مقلد ألى رومانيا مرة أخرى.. وأنقطعت أخباره عنا..أما شقيقه عادل فلقد درس في مصر ويعمل بالسعودية الآن.
09-19-2008, 01:34 PM
Adel Sameer Tawfiq
Adel Sameer Tawfiq
تاريخ التسجيل: 10-05-2006
مجموع المشاركات: 1074
مرة و انا مزنوق في بلاغ في القسم الشمالي بسبب تحقيق عملتو في الجريدة التقيت عادل سمير لابس زى القضاة ففرحت فرحا شديدا و طمأنت نفسي بانني في سبيلي الى النجاة فصحت بأعلي صوتي يا عادل سمييييييييييير heeeeelp و لدهشتي الشديدة تجاوزني عادل سمير و كأ،نه لا يعرفني ثم انه بعث الي بعسكري ووقف ينتظرني ( جنب الشجرة) ، شنو يا عادل عافص لى؟؟ فقال لي ..انا هنا مولانا عادل سمير..شنو الشابكني عادل سمير عادل سمير .. ده هناك في القديمة.. نحن دفعة 73 عادل ورانا لكن سنة 73 دى كانت اخطر سنة في تاريخ البشرية و تخرجنا 76 القديمة كانت تغذي الجامعات و الكلية الحربية بأفضل الشباب صول بابكر يتذكر كل الضباط الذين تتلمذوا علي يديه ( يشهيك فى الغسكرية) كان هنالك طلاب بيننا شكلهم عساكر من سنة اولي..التكينة...معتصم كبارة و عبد العال سليمان و التجاني وأذكر محمد الأمين الخليفة و موتر الفسبا و منصور الطاهر وامين و مامون الملك و خالد محمد عثمان و كرسني و البلولة الألفة ( كان ماخد الموضوع سيرياس) صلايب و حلايب و ممكن كان يضاربك عيسى الجعيلي من الجريف و عبد الرحيم من الله كان شيطاااان ، و قراصة سلاح الأسلحة مبالغه اها ( كمال بجبوج) يا معززززز تتذكر بجبوج؟؟ و بعدين محمد الأمين التاني داك من الجريف برضو اخوهو كان رسام مشهور المرحوم استاذ المكتبة الحسين الحسن ( يا نسيم ارجوك) ويك يا صادح في ظل الأراك صه رويدا و استمع نغمي الحزين طارق الطيب قالي حصة المكتبة الجاية حتكون في بيتكم يا تاج السر ( ما كنت برجع الكتب بعد الأستلاف) بعدين ياسين محمود عباس ( أحمد ربشة)، اتكسرت ترقوتو في رحلة الجنوب ( انقلب بينا اللورى جنب طمبرة) من عمايلنا و شايلين صفايح عسل و بلاوي و سن فيل ، رجعونا تاني بى مجروس واحد تاني الي ضيافة الزعيم يوسف طمبرة كنا شفع يا رجل، سواق اللورى كان اسمو منووووو؟؟ كان مصقوع ( هنت)
09-19-2008, 02:49 PM
Adel Sameer Tawfiq
Adel Sameer Tawfiq
تاريخ التسجيل: 10-05-2006
مجموع المشاركات: 1074
Quote: مرة و انا مزنوق في بلاغ في القسم الشمالي بسبب تحقيق عملتو في الجريدة التقيت عادل سمير لابس زى القضاة ففرحت فرحا شديدا و طمأنت نفسي بانني في سبيلي الى النجاة فصحت بأعلي صوتي يا عادل سمييييييييييير heeeeelp و لدهشتي الشديدة تجاوزني عادل سمير و كأ،نه لا يعرفني ثم انه بعث الي بعسكري ووقف ينتظرني ( جنب الشجرة) ، شنو يا عادل عافص لى؟؟ فقال لي ..انا هنا مولانا عادل سمير..شنو الشابكني عادل سمير عادل سمير .. ده هناك في القديمة..
معقول أنا أعمــــــــل كــــــــدة يا السر ؟! والله العظيم ما بتذكر !!
إن شاء الله بعد دا أكون خارجتك ؟!!
Quote: مائة دولار لمن يتذكر الأسم الكامل ( ستة اسماء) لعادل وليم
Hint عادل وليم قلادة (اكمل)
معقوووووولة بس يا السر ؟؟!!
09-19-2008, 04:58 PM
Abdulmageed Gorashi
Abdulmageed Gorashi
تاريخ التسجيل: 02-11-2008
مجموع المشاركات: 218
معذره الاخ تاج السر. انما يدل هذا ان الاخ السمير يتمتع باخلاق مهنيه عاليه واحترام للقانون.. الكل عنده سواسيه امام العداله وهذا مفخره لكل خريجي الخرطوم القديمه...
كل الود.
09-20-2008, 10:36 AM
Adel Sameer Tawfiq
Adel Sameer Tawfiq
تاريخ التسجيل: 10-05-2006
مجموع المشاركات: 1074
Quote: معقول أنا أعمــــــــل كــــــــدة يا السر ؟! والله العظيم ما بتذكر !!
إن شاء الله بعد دا أكون خارجتك ؟!!
اولا اديتني نصيحة اشوف محامي ، لأنو لو دخلوني الحراسة يوم الخميس ( و اليوم) كان يوم خميس ما بطلع تاني الا يوم السبت ( انا كنت ملاحظ الضابط اللئبم بيأخر في الأجراءات عشان الساعة اكناشر تجي) و قلت لى على كل حال انا بمر يوم الجمع دايما و بفك الناس المحبوسين بسبب من غتاتة بعض الضباط
بعدين يا شباب القصة دى ليست قدحا في مولانا عادل، علاقتي بعادل علاقة اسرية اوسع في ماعونها من علاقة القديمة تمتد الى اليوم و الساعة، لكن مولانا ( يمكن نسي و يمكن قسا و يمكن ظروف المدرسة)..اذكرك..الكيس بتاع شركة فرانكو بنتو.
حل المسابقة الأولى
عادل وليم قلادة مليكة متى ابو ضباب.
09-20-2008, 08:48 AM
Adel Sameer Tawfiq
Adel Sameer Tawfiq
تاريخ التسجيل: 10-05-2006
مجموع المشاركات: 1074
اول ناظر (مدير) كان المربي الكبير الاستاذ محمد احمد عبد القادر رحمه الله .. ومن اوائل مدرسيها الاساتذة : الاستاذ ميري للرياضيات الاستاذ علي توفيق للرياضيات الاستاذ اوتس لغة انجليزية الاستاذ عمر لغة انجليزية الاستاذ الهادي احمد محمد صالح لغة عربية الاستاذ كرف لغة عربية الاستاذ جاويش تاريخ الاستاذ سميث جغرافيا الاستاذ البيلي دين مد الله في عمر الاحياء ورحم الاموات رحمة واسعة
بدأت المدرسة بالمباني قرب داخليات الطب شمال شارع الطابية او الامام المهدي ثم انتقلت الي قرب البركس نافست المدارس المعروفة (الوادي وحنتوب وخور طقت ) بعد مرور 4 سنوات علي انشائها تعلم فيها كثير من الذين اثروا في تاريخ السودان سياسيا وثقافيا ورياضيا خاصة الذين دخلوا القوات المسلحة
09-28-2008, 08:50 AM
Adel Sameer Tawfiq
Adel Sameer Tawfiq
تاريخ التسجيل: 10-05-2006
مجموع المشاركات: 1074
وصلتني هذه الرسالة من يوسف الصادق (يوسف كوبر) ... وأصريت أنزلها كما هي دون تعديل ...
بالامس كنت أتحدث بدار الجالية السودانية في Turinto عن مدرسة الخرطوم القديمة ذلك الصرح الشامخ ورغم إني من القراء المتابعين لـ sudaneseonlne من بعيدد .. إلا أنني لم أرى هذا البوست ود أخطرني احد الاخوان بوجود بوست عن الخرطوم القديمة بـ sudaneseonlne ونسبة لظروف عملي أرسل إليك هذه البوست ولك حرية التصرف وتصحيح الأخطاء يوسف الصادق (كوبر) اولى تانية عمر ثالثة عثمان أحياء 1980ــ1983م المدير حسن عبيد الشايقي الأساتذة جرجس , مصطفى بوست , عبدالمنعم , مولانا السمح كدودة الفاضلابي ميرغني يوسف الطيبعمر الحميدي إسكتش عبداللطيف الكافتيريا عمر بشير المخزن عم قسمالكديت بابكر الصول أذكر من دفعتي أبناء بري عادل محمود أبراهيم عبدالحليم(المانيا)ابوالعزائم ناصر عبدالرؤوف ومن ابناء الرياض المنشية والجريف غرب فيصل عباس عصام الترابي عمان احمد عثمان عثمان صلاح الدين شبيكة أحمد عثمان لؤي ابراهيم ومن ابناء الجريف شرق الكرام محمد أحمد عوض (عميد شرطة) عمر صاحبي (الجمارك) أبوالقاسم (الخليج) ...والشاب الدكتور الخلوق فتح الرحمن (اليابان) ومن أبناء الصحافة والإمتداد .زعادل عبدالرحمن (بنك الخرطوم)عادل عبدالجليل (الشرطة) عبدالماجد حاج السيد (قطر)...(الإمارات) عثمان السيد أمجد محمد أدريس (أستاذ ...)
.... .... .... جزء من الكلمات راح لي بسبب العطش والجوع ....هههه
09-19-2008, 04:35 PM
Ahmed musa
Ahmed musa
تاريخ التسجيل: 07-08-2007
مجموع المشاركات: 16669
تعرف يا تاج السر أنا كنت شغال بمجال المحاماة منذ 1992م وماحصلت إشتغلت يوم قادم مولانا عادل .... وكان في 1992 تقريباً بالجزئية مع مولانا الرائع نادر أبوالعلا ..؟؟؟ ومولانا البشاري رحمه الله ومولانا قاسم حامدالذي أحببته ومازلت في الله ... ومولانا طارق محمد عثمان أظنه بعدهم ... ولكن برغم ذلك هناك (سر) خفي جعلني اترصد جزء من حركته ... وعمله لفترة تقريباً بإستثمار القضائية ؟؟؟... ربما كان هذا (السر) هو الهوى القديمابي ؟؟؟
09-20-2008, 08:58 AM
Adel Sameer Tawfiq
Adel Sameer Tawfiq
تاريخ التسجيل: 10-05-2006
مجموع المشاركات: 1074
Quote: اولا اديتني نصيحة اشوف محامي ، لأنو لو دخلوني الحراسة يوم الخميس ( و اليوم) كان يوم خميس ما بطلع تاني الا يوم السبت
والله برضو خدمك ... هو طبعاً مولانا مابقدر يتدخل مباشرة في الموضوع بدون طلب من محامي أو صاحب الحق ولأنك محبوس فالمحامي حركته أسرع .... الكلام ده إلا بدري شوية لأن القبض والفك ده من اختصاص النيابة الله ؟؟؟ دايرين نبوظ البوست ؟؟؟ أها نرجع للشجن ... نخلي السجن
09-19-2008, 11:43 PM
محمد عبدالمنعم التلب
محمد عبدالمنعم التلب
تاريخ التسجيل: 09-13-2008
مجموع المشاركات: 155
الاخ احمد موسى العقيد شرطه طارق الامين البدراوى من اولاد برى وهو دفعتى بكليه الشرطه الدفعه 52 وبيتم يقع شمال اخر محطه لمواسلات برى القديمه ويفتح فى الميدان غربا
09-19-2008, 11:50 PM
Ahmed musa
Ahmed musa
تاريخ التسجيل: 07-08-2007
مجموع المشاركات: 16669
Quote: الاخ احمد موسى العقيد شرطه طارق الامين البدراوى من اولاد برى وهو دفعتى بكليه الشرطه الدفعه 52 وبيتم يقع شمال اخر محطه لمواسلات برى القديمه ويفتح فى الميدان غربا
عرفته ومشيت بيتهم كم مرة .... ولي علاقة قوية بجهاز الشرطة حيث عمل والدي عليه رحمة الله (موسى عمر) قصاص أثر بعدد من اقسام الشرطة وتخرج شقيقي عمر موسى عمر من الدفعة 50 ومعهم من أبناء بري وقتها الرشيد علي مساعد ومن ابناء بورسودان محمد موسى عمر
09-20-2008, 00:31 AM
محمد عبدالمنعم التلب
محمد عبدالمنعم التلب
تاريخ التسجيل: 09-13-2008
مجموع المشاركات: 155
لآ اتذكرت تماما، انتو كنتو الدفعةالقدامنا، حتى كان معاكم خالد حسين، وشقيق صديقي امير عبدالله حسن سالم (والله نسيت اسمه) ما قلت ليك الكبر حصل والزهايمر بدا ، وقدامكم كان ابو صوفة، ما عارف اسمه منو لكن كان بيقولي لينا ده ابو صوفة
Quote: أشهر خريجي الخرطوم القديمة وأساتذتها منذ الإنشاء :
ما تنسى:
علي عثمان محمد طه، نائب رئيس الجمهوية
حسب ماذكر لما درس في القديمة كان الوقت داك فيها داخلية
صورة من الزمن الجميل، جوائز قيمة لمن يتعرف على من بالصورة:
شكلها كده ح تفرشخ البوست ده
لأني ما قدرت اصغرها
09-20-2008, 07:56 AM
Dr. Moiz Bakhiet
Dr. Moiz Bakhiet
تاريخ التسجيل: 05-20-2004
مجموع المشاركات: 9044
Quote: القديمة كانت تغذي الجامعات و الكلية الحربية بأفضل الشباب صول بابكر يتذكر كل الضباط الذين تتلمذوا علي يديه ( يشهيك فى الغسكرية) كان هنالك طلاب بيننا شكلهم عساكر من سنة اولي..التكينة...معتصم كبارة و عبد العال سليمان و التجاني وأذكر محمد الأمين الخليفة و موتر الفسبا و منصور الطاهر وامين و مامون الملك و خالد محمد عثمان و كرسني و البلولة الألفة ( كان ماخد الموضوع سيرياس) صلايب و حلايب و ممكن كان يضاربك عيسى الجعيلي من الجريف و عبد الرحيم من الله كان شيطاااان ، و قراصة سلاح الأسلحة مبالغه اها ( كمال بجبوج) يا معززززز تتذكر بجبوج؟؟ و بعدين محمد الأمين التاني داك من الجريف برضو اخوهو كان رسام مشهور المرحوم استاذ المكتبة الحسين الحسن ( يا نسيم ارجوك) ويك يا صادح في ظل الأراك صه رويدا و استمع نغمي الحزين طارق الطيب قالي حصة المكتبة الجاية حتكون في بيتكم يا تاج السر ( ما كنت برجع الكتب بعد الأستلاف) بعدين ياسين محمود عباس ( أحمد ربشة)، اتكسرت ترقوتو في رحلة الجنوب ( انقلب بينا اللورى جنب طمبرة) من عمايلنا و شايلين صفايح عسل و بلاوي و سن فيل ، رجعونا تاني بى مجروس واحد تاني الي ضيافة الزعيم يوسف طمبرة كنا شفع يا رجل، سواق اللورى كان اسمو منووووو؟؟ كان مصقوع ( هنت)
ياااااااااااااااه يا تاج السر بالله اتذكرت الناس ديل كلهم
ويا سلااااااااااااااااااام على كمال بجبوج
ياخ الزول الرائع ده من القديمة ما شفتو تاني
بعدين سواق اللوري الإتقلب بينا في الجنوب كان اسمو هلالي
وجايييك تاني
09-20-2008, 11:18 AM
Adel Sameer Tawfiq
Adel Sameer Tawfiq
تاريخ التسجيل: 10-05-2006
مجموع المشاركات: 1074
وصلني الإيميل التالي من الأخ حاتم حسن عبيد الشايقي إبن المرحوم الأستاذ حسن عبيد الشايقي !
حاتم إتخرج من القديمة و عمل ضابطا بالشرطة و هاجر الى أمريكا !
Quote: Dear Adil Salam to you,your family. My young sister referred me to a post about khartoum high school and it was one of those moments you really wish you can reel the time back to enjoy them all over again. I been living in the US for decades now and so glad to be able to get in touch with you. salam to all my fellow graduates from high school and I wrote them this message in arabic which took me 3 hours hehehe. Please post in on my behave. السلام عليكم ورحمة الله وبركاته لاخ عادل سمير والاخوة الاعزاء تحياتي وسلامي واتمني ان تجمعنا الايام مرة اخري في اروع لحظات كعهدنا بالخرطوم القديمة.. اخوكم حاتم حسن عبيد الشايقي
09-20-2008, 10:47 AM
محمد أبوالعزائم أبوالريش
محمد أبوالعزائم أبوالريش
تاريخ التسجيل: 08-30-2006
مجموع المشاركات: 14617
Quote: من افضل لاعبى الكرة بمدرسة الخرطوم القديمة اللاعب محمد عقيد لاعب الهلال السابق ولاعب منتخب الناشئين الذى صعد الى نهائيات العالم بماسا الايطالية عام 1990-1991وحينها كان يدرس بالخرطوم القديمة وهو لاعب فى منتهى الادب والاحترام والفن الكروى الراقى وهو الآن بالدمام بالسعودية
رسالة إلكترونية وصلتني على إيميل البوست [email protected] من الأستاذ : عمر مصطفى شكراً له وبإنتظار مزيد من الإفادات حول المدرسة الصرح وليت لو وجدت صور ....
09-21-2008, 01:45 AM
علاء الدين حيموره
علاء الدين حيموره
تاريخ التسجيل: 08-08-2006
مجموع المشاركات: 5689
المعمل مكتظ بالطلبة .. دخل الاستاذ مصطفى ( عليه رحمة الله ) وكتب على السبورة
الموضوع : الكلور CL الرقم الذري 17 المدارات 3 تتوزع ب 2 _ 8 _ 7
ببقى يا اخوانا عشان يتشبع هذا العنصر فانه سيجذب ( يعني تختو في بالكم العنصر اب 17 ده زي البنت الحلوة عمر 17 سنة تجذب الشباب وتكون تقيلة ويجو جارين عليها مش تفقد وتجري هي على العواجيز ... هي عايزة واحد بس عشان السبعة الفي المدار الاخير تتشبع ولما يقوم يجيها العجوز الخفيف اللفيف الصوديوم طوالي بقوم يشبعها بواحد عشان يحصل الاتحاد ويتشبع المدار ل 8 ويكونو لينا كلوريد الصوديوم او ما يعرف بملح الطعام ..
صفافير وكوراك من الطلبة وفرصة ضحك حبة وترجع الحصة لموضوعها الاساسي ويكونوا الطلبة قد فهموا ما يرمي اليه الاستاذ مصطفى ..
09-21-2008, 06:19 PM
علاء الدين حيموره
علاء الدين حيموره
تاريخ التسجيل: 08-08-2006
مجموع المشاركات: 5689
أحمل لك تحايا دكتور مؤمن محمد حسن جابر من أريزونا .. كما أحمل لكم إيضآ تحايا الباشمهندس ماهر نوري .. ولكل الدفعة و خريجي القديمة.. تقابلنا أمس في منزل الأخ بكري أبوبكر في إفطار بورداب أريزونا.
09-23-2008, 02:46 PM
Ahmed musa
Ahmed musa
تاريخ التسجيل: 07-08-2007
مجموع المشاركات: 16669
أحمل لك تحايا دكتور مؤمن محمد حسن جابر من أريزونا .. كما أحمل لكم إيضآ تحايا الباشمهندس ماهر نوري .. ولكل الدفعة و خريجي القديمة.. تقابلنا أمس في منزل الأخ بكري أبوبكر في إفطار بورداب أريزونا.
مررت بالقديمة كسروها وخلو حيشان العسكر ...تخيلو ولا طوبه من سلاح الاسلحه ما شالوها فقط المقرن ومريدي الجيش القابض على نفس النيل ما اصعب أن يتغول احد ما على جزءا منك تاريخك
طبعا الناس الموجودين ديل (ابواتنا) عدييل كده دفعة 1991
09-23-2008, 06:44 PM
Dr. Moiz Bakhiet
Dr. Moiz Bakhiet
تاريخ التسجيل: 05-20-2004
مجموع المشاركات: 9044
بعض من الذكريات حول المعلم الفذ حسن عبيد طيب الله ثراه
اذكر أن منزل الأستاذ حسن عبيد كان عند المدخل الخارجي واذكر أن بعض الطلبة وعند خروجنا في نهاية اليوم الدراسي كانوا يقذفون منزله بالحجارة ( انا لست منهم ) شقاوه بس ....
ولنا عودة
09-24-2008, 11:48 PM
محمد أبوالعزائم أبوالريش
محمد أبوالعزائم أبوالريش
تاريخ التسجيل: 08-30-2006
مجموع المشاركات: 14617
العجب لما كانو بالرداء الصباح ... وبالليل الشالستون ..
اتخيل مرة سرقو بنطلوني وانا بتمرن سباحة في حوض الجامعة وكان عاجبني شديد .. اها قصة امشي للسجانة وانا بالمايوه كانت مشكلة كبيرة .. في النهاية وجدت احد زملاء القديمة وكان ضيف في داخلية الخرطوم التجارية .. مشى الداخلية جاب لي بنطلون حليت بيه المشكلة لغاية التمرين التاني ...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة