السراي الصفراء ..

Quote: ستفتتح الجلسة الأولى للإجتماع الربع سنوي للسراي الدكتورة عزوز شامي بورقة عمل عن "الشواكيش " ودورها في التأثير المباشر على الحالة النفساوية والدماغية لصاحبـ(تـ)ـها

الشاكوش لغة هو المطرقة البتعمل دنننننننننننننننن عند الطرق
اصطلاحاً: انتهاء العلاقة (فجعة) لانو الطرف التاني شبك في علاقة أخرى غالباً زواج
والطرف التاني ( الضحية) ما جايب خبر وما كان عارف وجاهو الخبر في صمة خشمو (على خوانة يعني)
وبقى يتلفت ... وعنصر المفاجأة هو البيدي الشاكوش ألقه و استثنائيته

الشاكوش و الجندر:

وهو بالمناسبة unisex وصديق للجندر ولا يفرق بين رجل و امراة .. كلو سيم سيم
و الله كاتبو بيحصل ولا راد لأمر الله وكم من شاكوش فيه خير كثير لو تعلمون
الشاكوش بيؤثر على المرأة ضحية الشاكوش اكثر، لان الرجل عندو مناعة
و افق العلاقات امامه اوسع في حين المراة أفقها محدود بمن يطلبها فهي لا تملك
زمام المبادرة في أغلب الاحيان و عليه، الامل في بكرة ببقى أقل اقل أقل أقل (كررتها حتى قالو ليتها تسكت)

الشاكوش و الفن:

الشاكوش غالبا ببدأ بـ ما اتعودت اخاف من قبلك
إلا معاك حسيت بالخوف (قلب المؤمن دليلو)
أعـمــل آيـه ما القسمه اختارت وكل الناس حاكماها ظروف (ده وقت تحس بالكفوة جاية عليك)
عارف وين خطواتك ماشه وآخري معاك هو المامعروف (بس ياهو خت الخمسة فوق الاتنين في انتظار دننننننننن)

من اشهر فنانين الشاكوش زيدان ابراهيم،
وفن الحقيبة دي كلها عبارة عن خلاصة شاكوش ضخم طقطق الناس كلها
للشاكوش مسببات و ظروف و حيثيات بتختلف باختلاف الشخوص و الظروف،
والناس حاكماها الظروف زي ما قلنا

آثارو تتراوح ما بين لقيط الورق و القيهي في المواصلات مرورا بالبكاء صامت
و النخجي في حضرة المقربين و بين ردود افعال عنيفة تصل حد موية النار اللهم احفظنا
من أبلغ ما تغنى به الشعراء في حال المشوكش عبدو تصف حاله وقت سمع خبر السواد:

وسألتَ والناس كلّموك
ملعون أبوك دنيا أم قدد
بقت البقت
ووقعتَ في شارع الزلط
تبكي وتجعّر
والعيون اتورّمت
يد القميص.. ضهر القميص.. كم القميص
حتى الفنيلة اتشرّطت

شريط الهدوم هنا مجازي الكعب شرّيط المشاعر و الاحلام
فجأة تصحى تلاقي (البامية ما ياها) كلو كلو و لسان حالك ( طول عمري بزرع في الورود وحصادي شوك آخر المطاف)

و تبقى تعزم في المحن و تقول:

هات يا زمن
جيب كل أحزانك
تعال جيب المحن
طول يا أسى
وكتر ينابيع الشجن
جرعني كأس
من لوعة من آلام
ما المحبوب خلاص
خلاني ليك الليلة راح

يتبع ~~~