فرانسيس المهاجم الخطير يوقع للهلال غدا!!!!!!!!!!!!!!!!!!!!!!!!!!!!!!!!!!!!!!!

Quote: عن صحيفة النار مقابلة صحفية مع الخبير الكروي والمدرب السابق النور كشول أجراها عصام محب الدين المدرب والخبير الكروي النور كشول لعب في روابط العشش والديم ودرب في روابط العشش والثورة أمدرمان قبل انتقاله إلى أمريكا في منتصف الثمانينات حيث لعب في فريق النجوم وحاليا يقيم في فرجينيا أجرينا معه هذه المكالمة الهاتفية:. س: نسبة لوجودك في الولايات المتحدة هل يمكنك أن تعطينا فكرة عن اللاعب فرانسيس خميس الذي نتابع كلنا الضجة التي أثيرت حول انتقاله للهلال أو المريخ والذي كتب عنه نادر الفضلي في فرانسيس هداف أمريكا ونجم النجوم بالإتحاد الأمريكى السود.... يوقع لمريخ السودان أنه "فرانسيس هداف أمريكا" ج: هذا الكلام غير مضبوط وغير صحيح, ده زي ما تقول عن واحد يكون هداف رابطة المايقوما أنه هداف السودان. س: ما أعتقد أنه ممكن تشبيه دوري الجامعات الأمريكية برابطة المايقوما ج: ياتو دوري جامعات أمريكية فرانسيس عمرو ما دقاها في دوري الجامعات الأمريكية س: ممكن توضح كلامك ده يعني هل هو هداف دوري الجامعات الأمريكية أم لا؟ ج: عشان أوضح ليك دوري الجامعات الأمريكية ( (NCAA ده دوري قوي جدا وبغذي دوري اللاعبين المحترفين الأمريكي (في أحوال بسيطة يمكن للاعبين الشواذ الانضمام مباشرة من الثانوي لدوري المحترفين) و بيختارو ليهو أحسن لاعبين في الثانويات الأمريكية وبرضو بجو لاعبين شباب من بره أمريكا وعادة بتكون في زي تلاتة ألف منحة دراسية للاعبين الثانويات الكويسين كل سنة. ناس الكورة الما بتوفقو يلعبو في الجامعات عادة بلعبو في دوري الهواة أو الكليات المهنية ذات السنتين ( (NJCAA عشان الكويسين فيهم وفي حالات نادرة يلقو منح للجامعات وده الدوري البلعب فيهو فرانسيس والمقارنة بين دوري الجامعات بدرجاته الثلاثة ودوري الكليات ذات السنتين معدومة وزي مقارنة دوري رابطة الكدرو بالدوري الممتاز. س:أليس كونه أحسن لاعب في دوري كليات السنتين أنجاز نفتخر به جميعا ج: والله ده لو فعلا هو أحسن لاعب في دوري كليات السنتين هو حقيقة كان هداف دوري كليات السنتين وأحسن لاعب في النهائيات ودي حاجة تشرف لكن أنا شاهدت تسجيلا للمباراة النهائية لدوري لكليات السنتين ولفت نظري بشدة زميله جستن ميرام عنده لمسات فنية ممتازة وهو الفائز بجائزة أحسن لاعب في دوري كليات السنتين بعدها شفت تسجيلات لمباريات سابقة لفريق كلية يافابي وعملت تحقيق ففعلا نظري كان في محلو. س: رجاء التوضيح أكثر. ج: شوف جستن وفرانسيس ديل ممكن تشبهم (مع الفارق الكبير) بسامي عز الدين وزيكو أو جكسا ومزمل أو الدحيش والضو أو كمال وسالم وخاصة سالم بتاع الأبيض لأنه لعب فرانسيس بيشبه لعبه. عموما الأنا إكتشفته أنه في أول الموسم ده كان فرانسيس وجستن متشاكلين وجستن ما كان بلعب لفرانسيس وبجيب كل الأهداف براه لحدة ما إتدخل مدربهم وبقه جستن يلعب ليه باصات لو الناس ديل في السودان جستن ممكن يلعب درجة ثانية أما فرانسيس فلو لقى يلعب درجة رابعة كويس. س: هل فرانسيس هداف دورة الاتحاد السوداني بأمريكا أم أن هذا أيضا خطأ؟ ج: فرانسيس ما لعب في دورة الاتحاد السوداني في أمريكا ده لعب في دورة عاملاها شركة بتاعت واحد مليونير أسمه نادر مالك إسمها ساسل وأنا حضرتها لكن الزول ده ما كان هدف الدورة. س: لا, توجد معلومات أكيدة أنه الفائز بجائزة هداف الدورة. ج: والله دي حاجة تانية لكن الدورة دي كان فيها تلاتة مجموعات الأولى كانت قوية جدا فيها فرق ميريلاند وكلورادو وفريقنا بتاع فرجينيا ودي القينان كانت فيها بطلوع الروح. التانية كان فيها فريق نادر مالك أريزونا ومعاه فريقين تعبانات وفرانسيس جاب 6 قينان. المجموعة التالتة كان فيها فريقين قويات نيويورك وكان عندهم ولد أسمه حاجي جاب ليه 6 قينان برضه وناس تكساس كان عندهم ولد أصفراني حاب ليه 8 قينان, أصلو الفريق المعاهم بتاع أوهايو كان تعبان جدا والناس ديل أدوه سبعات ساكت . بعد داك ما في زول فيهم جاب قون. س: كيف؟ ج: أقول ليك الود بتاع نيويورك طردوه في كورة كالفورنيا وما لعب كورة فرجينيا في نص النهائي فناسو اتنفضو. الود بتاع تكساس لعب عشرة دقايق في كورة ألباني ولما ناس تكساس إتقدموا بقونين قعدوه برة راجين بيه كورة أريزونا (ناس فرانسيس) قامو ناس الدورة طردو ناس تكساس من الدورة, أها لما طردو ناس تكساس ناس ألباني رفضو يلعبو مع ناس أريزونا وناس أريزونا لعبوا الفاينل بدون ما يلعبو في نص النهائي وفرانسيس ما جاب أي قون في الفاينل (فرانسيس عادة في الكور الحارة ما بظهر كلو كلو, أي فريق عندو قلبين دفاع عندهم حبة لياقة بثبتو) أها يمكن أدوه هداف الدورة لأنو ناس تكساس طردوهم وبالتالي شطبو نتائجهم و لاعب نيويورك طردوه وبالتالي شطبو نتيجته. س: لا أعتقد, فقد ذكر أنه أحرز أكثر من عشرة أهداف. ج: والله يمكن لأنه بعد ما طردو ناس تكساس وناس ألباني انسحبوا ناس أريزونا لعبو مباراة ودية مع مجموعة من اللاعبين والمشجعين, فرانسيس جاب فيها يمكن 10 قينان فيكونوا دي حسبوها. س: لماذا ذهب فرانسيس إلى السودان؟ ج: والله ما عارف لأنه ممكن براحة يلقى منحة لجامعة في أمريكا وإن كان في صعوبة بسيطة بسبب سنه (الجامعات ألأمريكية وفرق المحترفين أصبحت لا تثق في وثائق الميلاد الأفريقية عموما) عموما كان عملوا معا لقاء في جريدة قال فيها أنه عايز يساعد والدته ماديا ويمكن دي سبب محاولته الاحتراف السريع وهذا شعور نبيل. س: في الأخير ما هو رأيك في فرانسيس فنيا. ج: فرانسيس لاعب قوي وسريع ولكنه متواضع جدا فني,ا يجيد التهديف برجلينه الأتنين ورأسه ولكن عنده مشكلة توقيت و قراءة للملعب والحركة من غير كورة, لا يجيد المراوغة أو التهديف على الطاير إطلاقا بعبارة تانية هو ممتاز في المهارات الأساسية كمهاجم ولكنه يفتقد للموهبة ولكل الفنيات التي تجعل من اللاعب لاعب شاذ يعني لو عايز تقارنه بناسنا هنا في فرجينيا فستايله أقرب لأنس النور منها لوهبة لكن لو فرانسيس لعب حياته كلها ما أظنه حيكون عنده نص كورة أنس. س: إذا لماذا كل هذه الضجة عن فرانسيس من أمريكا وساسل على وجه الخصوص ج: والله ده سؤال تسألو ليهم, أحنا هنا في أمريكا عندنا كمية ناس مساحين جوخ مبالغة ولو صاحب ساسل ده جاب ليهو حمار لبسو كدارة وفنيلة الجماعة حيقولوا ليك ده أحسن من رفس كورة في أمريكا. س: كلمة أخيرة ج: يا ناس الهلال والمريخ لو عايزين ليكم زول في أي خانة في الميدان من أمريكا هنا أو حتى من أمريكا الجنوبية ما تتغشو ساكت واتصلوا بي في [email protected]

(عدل بواسطة Yasier Elsayed on 12-24-2008, 00:34 AM)