عزيزي القارئ عضواَ كنت ام متصفح .. عاجل

Quote: From: طيبان خالس aata ([email protected]) Sent: Sat 12/20/08 2:31 PM To: [email protected] الأخ العزيز خدر (طارق كما أظن) السلام عليكم .. كل سنة وحالك بهجة .. جيتك من الطاقة دي مستجيبا لدعوتك لقراء سودانيز أون لاين للإجابة علي اسئلتك فرأيت طالما لقيت لي فرقة أقول رايي في مجمل الحاصل ..فاعذرني علي الدخول بمدخل عادي كما يدخل بيتك صديق قديم .. قد تلاحظ ان عنواني البريدي معنون بتام زين ..وهي صدفة محضة كماتعلم ..ولاعلاقة لها بما سأقول .. أتابع سودانيز اون لاين علي فترات منذ 2005 تقريبا ..لست مداوما ولست مجافيا ..يقودني إليها بعض الفضول أحيانا ..وقوقل في أحيان كثيرة .. الجديربالذكر أنني لم أحدّث نفسي بالإنضمام إليها (بافتراض أنها أنثي كما تساءل مناكف لطيف) إلا مرة واحدة لم تتعد مرحلة التفكير لفعل إيجابي باتجاهها..وقد فقدت حتي هذه الرغبة بعد أوان قصير ..لأسباب لاأعرفها ..كما لا أذكر أسبابا لرغبتي الأولي .. فضلت أن أكون قارئا علي فترات ..أأخذ ما أريده أو أشبع نهمي لكتابات معينة أو ملاطفات متوقعة أومشاكسات بريئة وغير بريئة ..حسب الحالة المزاجية التي تطابق ما أطلبه كمستمع..وقيل كقارئ غير حصيف (فالحصافة تطير ).. في الفترة الأخيرة (قبل أزمة الهكر بقليل مرورا به - حمانا الله- ومابعده)لاحظت الآتي :- يتحول المنتدي لبيت بكـا عجوز هالك ماتت مباشرة بعد مباراة تاريخية لهلال مريخ أوماتت بعد حفلة رابّة لندي القلعة وأخري لعقد الجلاد أوماتت بعد خطاب تاريخي حاشد للبشير أو ندوة كاربة للمهدي بحضور ممثلي الأحزاب بدار حزب الأمة.. وجوقة المعزين وعاصري الفراش ..أغلبهم جاء من الإستاد أو من الحفلة أو من مكان الحشد أو من دار حزب الأمة علي بيت البكا عديل ..فصار بإمكان أي زول لافي تخمين طبيعة النقاشات الدائرة .. كل شئ يتم تناوله بطريقة طق الحنك إضافة للشاي وربما المررو ... كل شئ ماعدا سيرة وتاريخ وصلاح والدعاء لهذه العجوز الهالك ..إلا من فئة موجوعة بي الصح علي الحاجة (خدر..وخضرحسين ومني خوجلي وآخرون نماذجا).. أها ياسيدي (بالله مرّر حكاية إني عامل البساط أحمدي دي ) .. طبيعة الحوار الدائر هي في الغالب طبيعة جدلية دائرية بحتة ..وبحتة خالص ..تعجب أصحابها لأنها تحل كربة ما بطريقة ما ..هذه الكربة قد تكون فك القرفة ..أو فك القريفة للكجار والجدال السوداني الشهير لزمرة مغتربين يشتهون النضمي السوداني ..أو فك الرقبة لآخر لايحبونه أو فك الركبة لمن لايجيد اللعب علي طريقتهم ... حاصل الحاصل هو فعل تراكمي ..سببه عدم وجود رؤية واضحة من البداية للناس البخستكوا بالوضع (ماكل الناس أكيد فالبعض يستفيد جدا من حكاية إنو يتحول البورد لشات كبير حسب تعليق موفق لأحدهم ).. وحسب وجهة نظري المتواضعة فإن لصاحب سودانيزأون لاين السيد بكري باع في هذا ..فهو ورغم إني بظن فيهو الخير ..فشل في إدارة المنتدي (ولا أتحدث عن وصاية)ولكن في ظني فإن حوش كسودانيز أون لاين كان - لاحظ كان دي - يحتاج لإدارة بها أعضاء ما أقل من عشرة -ماتشتغل بي الرقم دا كتير-لتثبيت مبادئ حوار معقول ..ولا أقول معافي .. هل تعلم إنو أكتر بوست عاجبني اليومين ديل هو بوست عصام جبر الله عن الحوارات المأزومة ؟؟؟ دا بوست بتلقي فيهو كل شي ..بشرح ليك جزء كبير من مسببات الوضع الراهن ..يسوقك لحكايات الهكر..وللصراع القديم المفتعل بين زمرة المبدعين وزمرة اللامبدعين..يديك لمحة عن خلاف ملاسي وعصام ومحسن خالد من جهة ..وخلاف محمد سليمان ومحسن خالد ومجموعة اللامبدعين من ناحية وعدة نواحي كمان .. بوست يوضح قدرات كيكي العظيمة في عتيل البوستات (وهو يفعل ذلك بمتعة وإقتدار)..وهو أي البوست من حيث عددية لطفاء البورد لاينقصه شئ سوي عدم وجود تمبس ..وهذا الأخير أعترف لك إني من أشد المعجبين بيهو وكت أكون قرفان ..وصراحة كدة موجعني غيابو لا يبقي شطبوهوا كمان .. أقترح ياأخ خدر إنك تضيف للإستبيان بتاعك دا إنو الناس تقول رايا بناءا علي بوست الحوار المأزوم دا لانو بيختصر المنتدي كلو في خمسة صفحات لاغير(دا إذا كيكي مالحّقن ستة وانا بكتب في رسالتي دي ليك)... ياخ شكرا لطولة بالك ..واقبل ونستي دي ..وارجو ما أكون عصرت علي واحد من الجماعة الفوق ديل ..فهم بالنسبة لي زيّهم وزي أبطال مسلسل تركي طويل (ومافيهو مهند) يعني لابيعرفوني لابعرفهم ..ومرات بقول يمكن فعلا هم بمثلوا ..ودا برضو وارد .. أما عن اسئلتك التلاتة - لماذا تتصفح سودانيزاولاين ؟ - ماذا تتوقع ان تجد في الصفحة الاولي يوميا ؟ - متي تقفل سودانيزاولاين غير نادماَ ؟ فأظن أنا جاوبت عليها بطريقة غير مباشرة ..حال الإجابات بالبورد في مثل هذه الأيام من السنة سلام يا أخي العزيز ... اضافة :- أرجو إعتبار هذه الفضفضة من مجهول وهو الحاصل فعلا ..استجاب لنداء كريم من زول كريم ..وأظنك ستفعل دمت بخير ..