نعى اليم ...... سودانيز اون لاين دوت كم تحتسب الزميل فتحي البحيري فى رحمه الله
وداعاً فتحي البحيري
|
|
 راس حربة في تيم الشعب الثوري الغالي- هاشم صديق
|
ها هو ذا المبدع هاشم صديق يطل علينا برائعة جديدة بعنوان أنا لا وارغو ولا إفياني
(1)
التكوين
إسمي خميس ود كوة العاتي
كان عجلاتي
وأمي مهيرة وأبوها بشارة
كان ساعاتي
أبوي من بارا
وأمي إتولدت في حلة غميسة
ما بتنشاف في أي خريطة
بأي طريقة بأي شطارة
كان بي عين أو نضارة
أمي وأبوي صدفة اتلاقو
في الدنيا الشاسعة والرحمة الواسعة
في قطر الهم الدرجة الرابعة
كانو عوايل في السفر الصدفة
ملح وملاح ونسة وعرفة
تسالي وترمس وقهوة بقرفة
وفي الونسة السمحة في قطر الزحمة
قلب الوالد حن ورف
وقلب الوالدة اتخج وخف
بعد شهرين صبحو اتنين
زوجين طيبين اتلمو في اسرة
في بيت (البقعة) وسط ( العرضة)
ونواصل
|
|
 
|
|
|
|
|
|
|
|
Re: راس حربة في تيم الشعب الثوري الغالي- هاشم صديق (Re: خالد الجبل)
|
أبوي فقران لكن بدبارة
مهر الوالدة كان سحارة
تلاتة جنيه.. سعفة ووردة
وفركة وفردة
تبروقة ومصحف .. وبمبر ومبخر
تربيزة يتيمة .. نص دسته كبابي
كفتيرة قديمة .. وكم هبابي
جابونا تلاتة.. بتين ووليد
ربونا بكسرة.. كسونا السترة
شربنا اللبن الصافي الاصلي
ما اتمطقنا اللبن البدرة
شبينا كبرنا.. فهمنا نطقنا
وكسبنا القدرة
وأنا كنت مقرم .. وود تفتيحة
والدنيا دي كانت طيبة فسيحة
سينما (برمبل).. باسطة (بيَن)
الترماج
حبوبة عجوبة
والنفاج
قصبة سكر وعنكوليب
نبلة قوية وقلوبية.. شرك الطير
رحلة عيد لجزيرة توتي .. أو الباقير
شدر كافوري سواقي الحاج
جنينة النزهة..
زنكي اللحمة ..السوق الزحمة
وقهوة نوري
والدافوري قيامة عجاج
ونواصل
| |
|
|
|
|
|
|
|
|
|
Re: راس حربة في تيم الشعب الثوري الغالي- هاشم صديق (Re: خالد الجبل)
|
أنا كنت حريف والكورة شراب
أحاور نملة في جحر الضب
وأبهدل أجندل أشطر باك
أو هباك
أفرشو رررب
روضت الكورة
بدل مأسورها بقت مأسورتي
المجنونة بت الكلب
وأترقيت للتيم الاول
وكبرت بقيت مفتل شاب
اتنورت عن الأوطان
وإتفتحت علي الاحزاب
العرضة جنوب .. العرضة شمال
خور ابو عنجة .. بيت المال
شارع الطابية.. تيم الطاغية
كار المافيا .. جنينة سيدي
سور القبة ..ضرايح بحري
شرايف بري
رافع الراية
تيم القعدة والانداية
ناس شاشاما.. نادي شليل
الحولية .. دق النوبة
في حمد النيل
الشامراب .. نادي الكاب
....... والخ .. والخ
بخا بخ في العجن اللخ
ونواصل
| |
|
|
|
|
|
|
|
|
|
Re: راس حربة في تيم الشعب الثوري الغالي- هاشم صديق (Re: خالد الجبل)
|
الاعزاء هشام الطيب
وحبيب نورة شكرا علي المرور
ونواصل
ولأني حريف وود لعاب
سكنتني عيون من باب لي باب
إتسجلت في تيم مغمور
مرقت سريع لي تيم مشهور
والبلد أتيام والناس أقسام
شارع خاص .. شارع عام
أتيام فارعين .. أتيام أقزام
أحزاب فارغين .. أحزاب أعلام
دروب وحروب .. صدام وكلام
وأنا كنت خميس ود كوة العاتي
بقيت موضوع تصفيق وشيوع
مرات محبوب أحس بسلام
ومرات أتخاف .. تقول بعاتي
مرات إخلاص لشعار التيم
مرات معدود في الحال متواطي
ونواصل
| |
|
|
|
|
|
|
|
|
|
Re: راس حربة في تيم الشعب الثوري الغالي- هاشم صديق (Re: خالد الجبل)
|
(2)
الوعي
من تيم الشوف الضيق ضقت
إتأملت الحال المايل
وشفت الناس في خصام وقبايل
فكيت تسجيلي بايدي وعقلي
وأتسجلت في تيم الشعب الثوري الغالي
وأنا أصلي مصحصح وود تفتيحة
ولاعب فقري
مرقت سريع من ضيق الحارة
للميدان الواسع دوغري
أنا لا وارغو ولا إفياني
لا ود طمبل لا مساوي
إتسجلت بحق طعمية
شراب مقدود ..وكدارة هدية .. وكيس تمباك
وإتفننت أكون رأس حربة
وإتجننت عديل في المحور
وإتقطعت أكون مساك
إتراقبت كتير بالصف
وإتكعبلت كتير من خلف
ولأني خميس ود كوة العاتي
أقع وأقوم كمكان سداري
تقول عجلاتي
ونواصل
| |
|
|
|
|
|
|
|
|
|
Re: راس حربة في تيم الشعب الثوري الغالي- هاشم صديق (Re: خالد الجبل)
|
وقعت كتير لكني وقفت
حاورت دفرت بعزم الشعب
وصلت المرمي
كم سددت ..كم سجلت.. كم دافعت
كم مررت .. كم قومت نفس عراضة
مع اني مراقب ديمة بلاعب
لاصق فيني كأنو قرادة
ومرات ممسوك بي زول عتالي
جابوهو عشاني خصوص من مالي
شعارو الغالي لا باص لا بصة
يتابع يراقب تقول مرسال من جهة مختصة
لكني طرحتو .. جمعتو .. قسمتو
جدعتو بعيد في برة الخط
إتمدد يقنت زي ضكر البط
ونواصل
| |
|
|
|
|
|
|
|
|
|
Re: راس حربة في تيم الشعب الثوري الغالي- هاشم صديق (Re: خالد الجبل)
|
ولأتو الكورة والدنيا الصعبة
بحر ممدود لا حد لا شط
إتعذبت في درب الواقع
أكتر وأكتر
التحكيم الفاشل ياما
شهر في وشي الكرت الاصفر
ومرة الاحمر
وجرايد النقة كانت أخطر
ألف إشاعة وكم شماعة
سموم وحراب .. دمار وخراب
كم سووني بعت وخنت
أو ساومت وإتقاعست
بعت قضية قبضت رهاب
وإتهافت عديل لي والي
أو دقيت في السر لي باب
وإتوسلت عيون أرباب
مع إني خميس ود كوة العاتي
ود تفتيحة .. مصحصح وفقري
مرقت عديل من باب الحارة الضيق ضايق
للميدان الواسع دوغري
فكيت تسجيلي بإيدي وعقلي
وإتسجلت في تيم الشعب
الثوري الغالي
ونواصل
| |
|
|
|
|
|
|
|
|
|
Re: راس حربة في تيم الشعب الثوري الغالي- هاشم صديق (Re: خالد الجبل)
|
حقيقة لي علاقةمتميزة مع الأخ/ هاشم صديق
وقد زرته في اجازتي الأخيرة للسودان للعزاء
في وفاة شقيقته شقيقته الخالة/ بدور صديق
وقد وجدته في صومعته (عفواً) بيته وحيداً
كالعادة ولكن الغريب أن بدت عليه علامات
السعادة ولا أعرف سر تلك الإبتسامة التي
قابلني بها رغم أنني فاجأته برفع الفاتحة
ويمكن أن تكون مجاملة السودانيين هي السر
وراء ذلك ، عموماً آجرته ولم اجلس معه كثيراً
للأمانة فقط فترة قليلة لزوم المواساة والملاقاة
وقد وعدته بزيارة أخرى ، وقد اخبرني بصدور
مجمعته الشعرية الكاملةوقال لي أنهالا توجد
إلا بالدار السودانية للكتب بشارع البلدية
وبالفعل وجدتها هناك ، وبعد ذلك قال لي
شوف مجموعة الدواوين التي لا تحويها المجموعة
لأعطيك لها ولكني ظروف سفري لم تمكني من الرجوع
إليه ثانية.
ولكني أقول أن الوحدة التي يحيط بها نفسه
والضاربها حوله ، إضافة لتوقفه عن العمل والكثير
من المعاناةالتي يعيشها هي التي ولدت فيه هذا
الاحساس العالي بما حوله وجعلته يركز فيه
ويخرج هذا الإبداع وتلك الدرر التي يتحفنا بها
بين الفينة والأخرى
متعك الله أخي هاشم بالصحة والعافية وطول العمر
مع تحياتي
أبو الجزل
| |
|
|
|
|
|
|
|
|
|
Re: راس حربة في تيم الشعب الثوري الغالي- هاشم صديق (Re: خالد الجبل)
|
(3)
الجمر
صباح يوم داكا
يوم ما وارغو باع كرعينو بالدولار
وسعر التيوة صار مليار
صحيت ملسوع قرصني الجوع
فركت عيوني شفت الدار
صباح الخير علي ماسورة نازلة شخير
صباح النور علي الاسلاك
من امبارح وقاطع النور
صباح الخير علي الرادي وكت ورجق كلامو نزل
تقول هسع رماهو جمل في نص الخور
صباح الخير علي الثورة
وكت صبح الهتاف في الكورة والتحكيم
صباح الخير علي الفيلا
علي المليار وجيب الشعب
صام ايامو من مليم
وصار هلكان وياكل نيم
صباح الخير صحيت كحيان
مشيت كسلان علي الكنتين
لقيت في غفلة زادو الشاي
دقيق الفينو طار لي فوق
عديل رفرف علي الهبباي
تبنت الزيت لقيت الزيت
يقول يا ريت صبح حاوي
يقيف ويرقص عديل في الخيت
والفتريتة رفعت راسا واتنفشت
تقول زرعوها في لاهاي
تقول جابوها من امريكا
| |
|
|
|
|
|
|
|
|
|
Re: راس حربة في تيم الشعب الثوري الغالي- هاشم صديق (Re: خالد الجبل)
|
صعب اصبح سواد الناس
يضوقو الكسرة بي ويكا
صباح الخير علي الاحزاب
فك تسجيل وهجرة عديل
ولعبة شليل
ضحك بدموع ودمع الشعب
ما صافح عيون منديل
صباح الخير علي التوزير
علي التنطيط علي التبديل
صباح الخير علي الامثال
علي الاعراف علي الجوكية والصراف
شكيتكم انتو لا الفيفا لا الكاف
شكيتكم للذي ماا رد يوم مظلوم
ولا اهمل نصوص انصاف
ونواصل
| |
|
|
|
|
|
|
|
|
|
Re: راس حربة في تيم الشعب الثوري الغالي- هاشم صديق (Re: خالد الجبل)
|
التوقيع
إسمي خميس ود كوة العاتي
كان عجلاتي
وأمي مهيرة أبوها بشارة
كان ساعاتي
أنا ود تفتيحة من الدافوري
ولاعب فقري
مرقت سريع من تيم الشلة
علي الميدان الواسع دوغري
واتسجلت في تيم الشعب الغالي الثوري
أنا لا ساركوزي لا اوباما
لا اوبينا لا كامارا
انا لا سيدا لا مساوي
لا ود طمبل لا ايفياني
اتسجلت بي كيس طعمية
شراب مقدود وكدارة هدية
وكيس تمباك
واتفننت أكون رأس حربة
وإتجننت عديل في المحور
واتقطعت أكون مساك
هاشم صيق
7/11/2008
| |
|
|
|
|
|
|
| |
خالد الجبل
حبيب نورة
خالد حامد الجزولي
فيس بوك
تويتر
انستقرام
يوتيوب
بنتيريست