عقبال جــنــوبـي يحكم السودان

Quote: الاخ زول واحد وكل الاخوة والاخوات المتداخلين عجبني النقاش في البوست دا فداير اساهم برايي انا غايتو بفتكر انو المشوار عندنا في السودان لسا طويل شديد عشان نصل للمرحلة الوصلتها امريكا محتاجين اول حاجة نتعلم قبول بعض يعني كيف نقبل الآخر كما هو ودا ممكن يحصل اذا بدينا من داخل بيوتنا نعلم اولادنا عن السودان وعن الاختلافات العرقية والثقافية والدينية الموجودة فيه واننا في النهاية ناس واحد مهما اختلفت الواننا او لغاتنا فالاطفال لمن يتربوا على الفهم دا ما افتكرت بيكون عندنا مشاكل التعالي والنظر للآخر بدونية واذا قدرنا نربي اجيال بالفهم دا بعداك بيبقى ساهل ومقبول لمن يترشح شخص من الغرب او الشرق او الجنوب للرئاسة واذا عنده برنامج انتخابي قوي وذات شخصية كاريزمية ممكن يفوز في انتخابات حرة ونزيهة يعني ما تكون انتخابات كلها تزوير وعنتريات ورغما عن انوف الناس لكن زي ما قلت نحن عايزين في المقام الاول نغير مفاهيمنا عن بعض لحدي هسا في المواصلات العامة الناس بتلمس جيوبها لو قعد جنبهم زول اسود واحكي ليكم قصة حصلت لي انا شخصيا ايام كنا في الجامعة وتحديدا في عام 2001 كنا بنمشي نشتغل بنيان في الاجازات فمرة مشينا اشتغلنا في طيبة الحسناب في طريقة جبل اوليا وبعد نهاية اليوم كنا راجعينا بيوتنا معاي اولاد عمي واثناء مررونا في الشارع صادفنا طفلين اعمارهم زي ست سنوات الاولاد ديل بمجرد ما شافونا صرخوا طوالي ماما ماما حرامية حرامية طبعا ديل اطفال ابرياء فهموهم انو اي زول اسود معناته حرامي عشان كدا انا قاعد اقول محتاجين لشغل شديد لتحقيق الحلم دا. تحياتي دمبيك