سودانية قبيلة الهوسا ليست مِـنـَّـة ً من أحد

Quote: كلامي حيكون للفلاته الناكرين قبيلتهم وللهوسا الناكرين هسواتيهم ظللتم متفرجين في هذه المنابر وسودانين كثر اصيلين شتموا واهدر حق انتمائهم لهذه البلاد وانتم متفرجين!! الي ان جاءكم الدور هذه ليست اول مرة ولن تكون الآخيره. قتلوا الهوسا في غرب القاش ايام السيول وانتم ضابين باسو ورداتكم ومتفرجين على شنو كان سألوكم؟؟؟؟؟صمتم على دماء كثيرة اريقت....وما النتيجه؟؟؟ يجي واحد زي البشير يتفاصح وكمان البحير مجموعه من مدعي الثقافه عايزين يفتوا.....حول سودانية الهوسا و الفلاته!! اولا للمدعين..... انتو منو القال لكم انه الهوسا اصلاهم غرب افريقيا؟؟؟؟؟ مش يمكن اصلهم شرق افريقيا وهاجروا للغرب وعادوا لديارهم مرة آخرى؟؟؟؟ منو القال ان بناة الاهرامات ذاتهم لاينتموا لنفس القبائل المعروفة بالهوسا والفولاني اليوم؟؟؟؟ يا جماعه تحيليات ال DNA الطلعت (جون مكين) و(بارك اوباما) لو جاءت عندنا حتحيركم فآخير الناس تبطل البتعمل فيه ده.وتعرف ان السودان لكل السودانين. الهوسا الموجدوين في السودان سودانين ولا كلام حول ذلك. الفولاني الموجودين في السودان سودانين ولا كلام حول ذلك. وعلى فكره من اكثر القبائل اختلاطا باهل الشمال هم هاتين القبليتن عشان كده مثقفيها تاهوا عن ضرورة الانتماء لحركات الهامش بنقول لهم لا شيئ متأخر....وان تحضروا..متأخرين خير من الا تحضروا نهائي. هذا السودان لن نستجدي فيه احدا الحقوق تنتزع ولا تستجدى. اول سفراء السودان من اسرة ياجي وهو منهم وشرحبيل واسرته المعطاءة منهم وكثيرين وهذا بحر من قيض..... الهوساتي اليرفع راسه فوق ويقول انا هوساتي فهو بشرا وسوداني ومبدع ومنتج ومعطاء لوطنه اذن ما الذي يجعله يحتاج ان يخفي قبيلته؟؟؟؟ الفلاتي يرفع راسه فوق ويقول انا فلاتي.....ويبطل حركات اصل الفولاني من الجزيرة العربيه من البطيخ ولو من الجزيرة العربيه ولو ما منها هم قوم اعزاء ومنتجين ومبدعين واوفياء لاوطانهم وسودانين في المقام الاول. يبقى....انا لا ادعي لقبيله بقدر ما اثق ان كل قيم قبيله بها خير للوطن كلكل. واعتزازنا يبدا بوحداتنا الصغرى لينتهي للاندماج الندي,لا فوقيه ولا استعلاء وانما نديه . للجميع ان يفخروا بتراثهم وموسيقاهم واشعارهم واهازيجهم واطعمتهم وعاداتهم تقاليدهم. وفي سوداننا الجديد لن يجرؤ مسؤل للتحدث بهذه اللغه. انضباط اللغه و الاعلام هو اول خطوات التعافي ورتق النسيج الاجتماعي كفانا جراحات وكفانا نفخه كذابه. ومعا للاعتزاز بسودانينتنا التي تبدأ بهوساتيتنا تنتهي في فولانيتنا. شكرا اخي عبد الماجد لفتح البوست ولكنك غبت كثير اخي عن جراحات كثره اثيرت هنا. مرحبا بعودتك.