من أجمــل الأصوات النسائية في الساحة .. خطيرة جدا في غنـاء (البنــات) لو فرضنا إنو البنات عندهـن غناء خاص بيعبر عن أماني الواحدة تجـاهـ (حبيبة) .. أو فن التعبير المحسوس بي جـووهـ .. مع الملاحظـة إنو هاجر كباشي .. (جرست) اصالة نصري الفنانة الجادة في جميع اعماله .. ودي شهادة طبعا من اصالة نصري عندما زارت السودان ..
10-08-2008, 07:34 PM
حمور زيادة حمور زيادة
تاريخ التسجيل: 03-28-2007
مجموع المشاركات: 12116
والله يا تامبا ، أنا غنا البنات ده بريدو عديييييل .. ياخ والله أنا قبل سنين كده كان عندي شريط لفاطمة الجعلي ، من شدة ما بسمعو لمن قربّت تقوم لي شلوخ T واللا H ما عارف ، وابقى (جعلتي) ..
وبصراحة هاجر خطيرة في الشغل ده..
10-08-2008, 08:06 PM
baha eassa baha eassa
تاريخ التسجيل: 07-21-2007
مجموع المشاركات: 6578
Quote: والله يا تامبا ، أنا غنا البنات ده بريدو عديييييل ..
.. ايوة كدا يا اصلي .. المخضرمين كلهم بموتو مووت في غنـاء البنات دا من زمن يا بنات المدرسة ونادو لي المدرسة .. بعدين الفنانين المخضرمين الكبار ديل ما تشوف طلعانم في المسرح والواحد يعمل ليك فيها بت هوفـن .. والله اقرب قعدة الواحد بيفك آخـرو ( وعندنا اثباتات وموثقين ) تعرف زمان عندنا واحد قريبنا دا كمل قروشو كلها حنـان بلوبلو .. ايام مفتوحة .. قيدومات .. سمايات الغناء ساهل .. بس الصعبة فوقو تجويدو وتأديبو .. وتقعيدو .. اها هاجـر دي بتديهو ليك على راسو وزولة مفتحة بتاعت غنـاء ..
Quote: عندي شريط لفاطمة الجعلي ، من شدة ما بسمعو لمن قربّت تقوم لي شلوخ T واللا H ما عارف
.. .. يازول لا تسريب عليك ، كان رصيدك دا انتهى بحولك لي ناذر الخليفة ( يشحـن ليك )
10-08-2008, 07:53 PM
tmbis tmbis
تاريخ التسجيل: 10-19-2002
مجموع المشاركات: 24862
ما العنب بس يا حمـور .. العنب والتين والزيتون كمـان .. هـاجر دي غناية شديد وفيها صوت عارفه تتعامل معاهـو ومتأكدة منو وواثقة فيهو .. لو جيت قارنتها مع الكتير من (البغنن) بي نفس اللونية .. (غناء البنات) بتلقاهـا الأولى بدون اي منافسة .. مستغـرب من كووم (الدهــب) والتياب بي مختلف مسمياته ونوعيات (الحنـة) وباقي (الخـم) والاكسسوارات التامين بيها الغناء موية .. وهاك يا تهافت القنوات الفضائية .. إيمـان لندن .. ومنو كدا ما عارف كوستاريكـا .. وندى القلعة .. ومحاسن الثورة بالنص . الناس العايزة تسمع وتستمتع من اجل تسمع وتستمتع بتلقى كل حاجة عند هاجـر كباشي .. صوت موزون فيهو كل شئ مفترض يكون فيهو .. النضمي كتير .. والمتخصصين في المزيكا (وعلم الأصوات) كلامين اكتر مني .. لكن نحن بتاعين عنـب ساكت قاعد ارفع في ملفات .. لكن الموقع بطئ شويتين .. اكيد البوست ح يكون مليان ملفات .. ولو عندك جيب إنت كمان .. طريقة التحميل ساهلة جدا في الموقع بس العرض بيختلف من اكسبلورر لي التاني .. خلي الملفات تكون احجامه صغيرة علاشن تترفع معاك ..
Quote: ما العنب بس يا حمـور .. العنب والتين والزيتون كمـان ..
تعرف يا عمي الفكهاني انت ابداع النسوان دايما فيو مشكله عند المتلقى .. زمان عمنا العقاد قال انو المرأه لمن تكتب الناس بتقيم انوثتا اولا بعد داك بيقيمو كتابتا على الجنبه كده و ده طبعا في الغنا اكتر .. خاصة في زمن الحفلات و الهجيج و الصفقه مالا تعبانا .. الموضوع بقا استعراض اكتر من سماع .. ما مهم الصوت و لا الكلمات .. مهم التتي يا عمك وش صبوح و قوام فتان و لادن اهيف مكحول مقسم .. كده دي فنانه و الما عاجبو يحلق حواجبو يا حليل زمن الناس بتسمع حسن عطيه بصلعتو و ابو داوود بنخرتو .. الحنجره زمنا ولى يا تمبس
10-08-2008, 08:31 PM
tmbis tmbis
تاريخ التسجيل: 10-19-2002
مجموع المشاركات: 24862
Quote: تعرف يا عمي الفكهاني انت ابداع النسوان دايما فيو مشكله عند المتلقى .. زمان عمنا العقاد قال انو المرأه لمن تكتب الناس بتقيم انوثتا اولا بعد داك بيقيمو كتابتا على الجنبه كده
والله يا منقـة نحن في السودان سمعنا براهـو .. وسمع باقي الناس براهـو .. وكتاباتنا براها وكتابات باقي الناس براهـا .. يعني العقاد دا لو سمع عشة الفلاتية .. يا سمع حواء الطقطاقة .. يا سمع (حميـرة) بتغني دلوكـة وقدر يدخل في السستم .. بيعرف كيف يلحس كلامو دا. اي نعم انا معاك انو مسالة دي كتابة مرا ودي كتابة راجل ودا غنا رجال ودا غنا نسوان لسه مسيطرة على الجو العام للنقد ولسه في ناس شوافة وسميعة .. تعرف قبل كم يوم كان معاي صاحبي مزيكاتي كنا بنسمع في زولة قاعدة تغني صوتة مميز خالص .. والاغنية كلماته جميلة قام صاحبي قال لي اللحـن دا رجالي انا اتفقت معاهو في الحتة دي .. من زاوية ضيقة جدا .. إنو في (نفس) خاص للانثى بتقدر توصل فيهو كل الفنيات المطلوبة .. بينما بتتجرد من أي قيمة جمالية لو غنت في الاتجاه المعكوس .. يعني اشبه بي مسالة انو الزول بيغني في سلم .. والمزيكا تكون في سلم تاني .. أنا بقول ليك الكلام دا بي طريقتنا السودانية .. ما بي فهم العقاد طبعا ..
Quote: و ده طبعا في الغنا اكتر .. خاصة في زمن الحفلات و الهجيج و الصفقه مالا تعبانا .. الموضوع بقا استعراض اكتر من سماع .. ما مهم الصوت و لا الكلمات .. مهم التتي يا عمك
.. الاستعراض جزو من الناحية الفنية .. وفن قائم بي زاتو .. لكن لما الاستعراض يكون من أجل الاستعراض ساكت بدون الاستناد لي اي قيمة .. دي هنا بتبقى القصة البايخة .. لكن استعرض وإنت متاكد انك بتمتع في العالم البتسمع وبتشوف فيك دي .. وطلع كل الحاجات الجميلة البتدعم الاستعراض دا .. يعني هاجر كباشي بتستعرض .. أو هي فنانة استعراضية من كل النواحي .. صوت وحضور في الخشبة .. وطبعا بتتفق معاي انو في مكان بيحتاج للاستعراض بي وسائل تعبير مختلفة ... الصفقة والرقيص .. لكن طبعا بعيد من الحاجات الذكرتها دي والبتمو بيها المسالة موية زي ما قلت ليك ..
10-08-2008, 08:57 PM
حمور زيادة حمور زيادة
تاريخ التسجيل: 03-28-2007
مجموع المشاركات: 12116
Quote: وطبعا بتتفق معاي انو في مكان بيحتاج للاستعراض بي وسائل تعبير مختلفة ... الصفقة والرقيص .. لكن طبعا بعيد من الحاجات الذكرتها دي والبتمو بيها المسالة موية زي ما قلت ليك ..
اتفق معاك ميه الميه يا زول .. بس طبعا كلام العقاد القالو ده ما رأيو .. ده تقييم لراي الناس الحوالينو المهم .. كلامك الفوق ده سليم .. يعني انا هسه بحب جدا غنا الطمبور و الاستعراض الفيو رغم انهم ضكور شنباتم تطبز لكن كل فن عندو استعراضو و هاجر استعراضيه و حضورا عنيف .. لكن ما اظنك تغالطني انها مقارنو بناس لندن و القلعه و غيرو فهي وجه اذاعي عديل
عموما خلينا في صوتا الجميل لانو جمال الوجوه ما هو المطلوب هنا
سمعنا ما تطمعنا يا عمك
و كتر الزبيب بالله
10-08-2008, 11:38 PM
tmbis tmbis
تاريخ التسجيل: 10-19-2002
مجموع المشاركات: 24862
Quote: و هاجر استعراضيه و حضورا عنيف .. لكن ما اظنك تغالطني انها مقارنو بناس لندن و القلعه و غيرو فهي وجه اذاعي عديل
والله يا زياد الليلة إنت والعقاد استعرضتو فينا استعراض شديد.. .. شوف يا زياد انا معاك في حاجات كتيرة جدا عامل (اللوك) بيلعب فيها دور كبير جدا .. لكن بالذات مسالة السمع دي حالة خاصة جدا .. بيحكمه في المقام الأول التخاطب الوجداني .. الاذاعة ممكن تنقل لي الفكرة دي ويأسرني صوت ما شفت ملامحو ولا عمري ح اشوفو .. ممكن اكون راقد لي في عنقريب حبل ومرخممم والهواء جايب لي صوت فنان يا فنانة ما عارفم من وين زاتو واكون نمته ومزاجي مظبوط أربعة وعشرين قيراط .. لكن في نفس الوكت ممكن امشي لندن يا القلعة واطلع مغلوب تلاتة واحد .. وأجي راجع يغلبني النوم زاتو .. ياخ عليك الله جرب احضر ليك قناة فضائية سودانية وخلي يجيبو ليك واحده من الفي بالي ديل .. والله كان بلعته فاليوم 20 ما تنوم .. علشان كدا خلي العقاد دا يبطل العقد بتاعتو دي .. وادونـا صوت موزون بعداك ما عندك مشكلة الواحد ممكن يسعي ليهو رادي بي أربعة حجار ..
10-08-2008, 08:32 PM
rosemen osman rosemen osman
تاريخ التسجيل: 06-06-2008
مجموع المشاركات: 2916
Quote: ازيك يا تمبس وكل سنة وأنت بالف خير النية خامة صوتها ممتازة جدا بالمقارنة مع الموجودات حاليا لكن
ازيك يا روز .. والقابلة على امانيك .. فعلا يا روز صوته مظبوط جدا .. وبتقدر تعرف تتصرف معاهـو .. والظاهر لي هي قاصدة تطلع جزو بسيط جدا من الامكانيات دي
Quote: ياخى أصالة نصرى دى صوتها وأداءها براه كدة غير قابل للمقارنة ولا ما كدة
.. لا يا روز انا ما دخلت في مقارنة في الصوت لانو اصالة بتغني في حتة ليها علاقة بالخامة الصوتية حقته .. وهاجـر عندها درجة برضو بتختلف من اصالة دا طبعا موسيقيا حسب كلام الخواجة .. لكن كان جينا نشتغله بي العنـب زي ما قال اخونا حمـور انا بخرم علي اتجاهـ هاجــر سودانوية مني وما سأل ليك في ويتني هيوستون ذاته .. سمعت لي اصالة نصري كتير جدا من الالابوم الأولاني (اغضــب) .. ومعظم الاغاني لنزار قباني .. ودي برضو وأنغام محمد علي سليمان قاعد اختهم في مكان براهـن بعيد من كل البغنن في الساحة العربية حاليا من بنات جيلن .. خلينا نفصل المسالة .. علشان نكون بعيدين من مسالة المقارنة دي لانو في كتير من المعطيات ما متوفرة في المقارنة .. بس بقصد انو اصالة نصري لما جات الخرطوم .. صادف وإنو هاجـر كباشي تقريبا التقت معاها في حفل وشاركته الغناء .. واندهشت اصالة نصري من صوت هاجـر .. وكانت اشادة منها بي شكل راقي جدا وحفظت ليها حقها الصوتي ..
10-08-2008, 08:41 PM
tmbis tmbis
تاريخ التسجيل: 10-19-2002
مجموع المشاركات: 24862
تشكر يا بهـاء على الملف .. لكن لو كان هاجر كباشي براها كان بيكون أجمل .. لانو تعرف لما اسمع لي واحد من الجماعة اياهم . ديل .. بحس بي انو الواحد فوقم زي الكان نايم وبعدين جاهو اب كباس .. وبي اب كباسو دا قام لقى المكرفون قعد يغني .. والغريبة انهم كلهم صوتم واحد وبيتشنجو بي نفس الطريقة بتاعت التشنج الواحدة دي .. الناس ديل كلهم بجيهم نفس الابو كباس مع بعض ..؟
10-09-2008, 05:41 PM
tmbis tmbis
تاريخ التسجيل: 10-19-2002
مجموع المشاركات: 24862
Quote: غناية لمن ما كفاية ومظلومة اعلاميا ظلم الحسن والحسين وهذه الاغنية (قول كلام تاني) اضافة حقيقية لهذه الكروان الطروب
.. تشكر يا محمد خليل ودا كلام منصف جدا في حق الكروانة دي .. غيره كتيرين مدفونين من خلف الأضواء .. وباقي الجماعة شغالين تش بالتياب والدهب والاكسسوارات وقاعدين ساااكت في السهلة .. قول كلام تاني أغنية فعلا جميلة في مفرداته في لحنها في القالب حقها .. في صوت هاجر الموزون جدا .. جدا وفنيات الصوت لما تلطع بشكل سليم من شخص عارف امكانيات صوتو وبيعرف يتحكم فوقو كيف ومتين
10-09-2008, 05:02 PM
tmbis tmbis
تاريخ التسجيل: 10-19-2002
مجموع المشاركات: 24862
تمبس ازيك وكل سنة وانتا طيب هاجر كباشى خامة صوتية كويسة ومشكلتها زيها وزى كتير من الاصوات السودانية الجميلة التى لم تجد من يؤلف لها موسيقيا ما يتناسب مع امكاناتها الصوتية وربما حتى هى لم تساعد نفسها فى البحث عن كلمات يمكن ان تخرج بها من اطار اغنيات زى بجى بجى وتحبس نفسها فى حتة ضيقة وعلى فكرة دى مش مشكلة هاجر بس ناس كتاااار
10-09-2008, 04:49 PM
tmbis tmbis
تاريخ التسجيل: 10-19-2002
مجموع المشاركات: 24862
Quote: هاجر كباشى خامة صوتية كويسة ومشكلتها زيها وزى كتير من الاصوات السودانية الجميلة التى لم تجد من يؤلف لها موسيقيا ما يتناسب مع امكاناتها الصوتية وربما حتى هى لم تساعد نفسها فى البحث عن كلمات يمكن ان تخرج بها من اطار اغنيات زى بجى بجى وتحبس نفسها فى حتة ضيقة
العزيز تيتاوي كلامك سمح .. لكن لو نظرنا لي هاجر في الاغنيات المعروضة دي .. وباقي الاعمال الجاية .. ولو تجاوزنا محطة (بجي بجي) اعتقد انها تقدمت خطوات في مجال الغنـاء دا (واعني بيهو اغاني البنات تحديدا) .. كل الكتابات هنا دا في الاغنيات دي سواء أن كان من هيثم عباس الاصبح ملازم ملازمة لصيقة لهاجر في كتير من الاعمال وانا بعتبره اعمال ناجحة وطورت حبتين في اللحن المتماشي مع الكلمات بي قالب مختلف .. ومحافظ في نفس الوقت على السمة المميزة لاغاني البنات أو اغاني الدلوكة أو اغاني السباته وبرضو لو تجاهلنا التفصيل بتاع الكلمات في بعض الاغنيات الكان بيفصل ليها الكلمات على الحان سابقة او قوالب موسيقية جاهزة زي الشئ الحاصل الايامات دي مع المدائح المركبة في الالحان دي .. بنجد هاجر متقدمة بشكل جميل وبدون اي مقارنة مع رصيفاته أو حتى مع أي من الفنانين الشباب الاقتحمو مجال اغنيات البنات أمثال سامي المغـرب أو حتى بعض الآخرين .. فالسؤال المطروح دائما ايهما افضل توصيلا للفكرة صوت نسائي يوصل فكرة الكلمات المكتوبة أم صوت رجالي يحاول (محاكاة) الدور .. ممكن اتفق معاك انو المشكلة ما زالت قائمة في سبيل الخروج من نفق الايقاع الواحد أو المفدرة الواحدة وافتقار الساحة للشعارء الممكن يضيفو .. لكن لي قناعة خاصة شديد أنو امكانية هاجر الصوتية بتأهله لي الغناء في أي لونية تانية خلاف النمطية دي .. لكن السؤال التاني هل بعداك يمكن انو نتقبله في لونية تانية ونسقط بذلك النوع دا من الاغنيات ...؟ مع العلم انو النوعية دي متاحة ومشرعة من زمن طويل جدا ومدرسة خاصة ليها فنانات بيجيدو التعامل مع ادبياته .. العمل المرفق دا الظاهر لي بيأكد كلامي الفوق .. مع ملاحظة قالب الاغنية (سيرة) كلمات وألحان يوسف التني والظاهر لي امنيات مشرعة لي اي أم أو أخت أو خالة أو عم أو خال أو جد.. وفي عمل تاني من كلمات وألحان (سحــر ميسرة) ودي الظاهر لي نقلة في الاتجاه المعاكس لي كونو عدم البحث عن مفردة جديدة وألحان مناسبة .. أنا متأكد أنك ح تكون متابع معاي ..
.. سلامات يا هند وكل سنة وإنت بالف خير .. عزرك معاك يا هند .. انا ذاتي مزروع معاكم .. الحاجة الجميلة بتكون دائما ظاهرة .. والمصطنعة برضو بتكون ظاهرة .. ولي حكمة الله الباينه إنو مسالة الجمال دي الحاجة الوحيدة الما بتتدسى .. هاجر تمتاز بصوت جميل جدا ـ ومميز خالص .. علشان كدا كانت متميزة عن البقيات..
10-09-2008, 09:50 AM
خالد عبد الله محمود خالد عبد الله محمود
تاريخ التسجيل: 11-28-2004
مجموع المشاركات: 5393
تامبا هاجر صوتها لو ملاحظ ليهو شوية غليظ مقارنة بالأصوات النسائية و ده المخليهو مميز جداً ... ياخ في بنات لما يغنو صوتهم بكون حاد لمن يعمل ليك إزعاج ..
الزولة دي رهيبة شديد و زولة متواضعة جداً و مجاملة لأبعد الحدود ..
هاجر يمكن تكون أفضل صوت نسائي موجود في الساحة لكن الظهور في الأجهزة الإعلامية في السودان مرتبط بالتمسح بصفوة المجتمع يعني لازم يلحن ليها صلاح إدريس و ما عارف منو المك داك عشان تظهر في التلفزيون بالصورة الكثيفة القادننا بيها من هم أقل شأناً منها بكتير ....
10-09-2008, 09:02 PM
Esam El-Khawad Esam El-Khawad
تاريخ التسجيل: 06-27-2008
مجموع المشاركات: 715
تمبس الحبيب هاجر بت الديم سابقا الانقاذ حاليا فنانه صعدت الى السلم بجهد وصبر تحسد عليها.... انسانه فى كل شى معرفه اكثر من خمس عشر سنه (ما كبيره قريتا فى الروضه) اخت اخوان وما قصدتها لتغنى لمحرم والا استجابت دون حركات فنانين (ايوه بجى ساى بس قروش العازفين والساون)بتجى بى الساون والعده وتدفع فى الكشف كمان اولاد حله انا ود السجانه وهى بت الديم.... هاجر كباشى ليست فنانه... انه رحله نضال فى عالم لا يرحم .... دايما تجدها مبتسمه وتضحك مع ان ما تحمله من هموم ينوء من حمله الجبل يا كباشيه ....الله يخليك
10-09-2008, 10:21 PM
ASHRAF MUSTAFA ASHRAF MUSTAFA
تاريخ التسجيل: 08-04-2008
مجموع المشاركات: 11543
هاجر فنانة مميزة وشاذة لمن غلط تستاهل كل خير ود الخواض نصفها وانا اثني وازيد ما كنت قايلها جارتنا في الديم انا في الناحية المقابلة....العمارات اتابع اغانيها وما لقيت ليها شريط الا اشتريته بالرغم من انو سمعت بيها قبل كم سنة بس عشان اخوك طول من السودان شكرا علي هذا البوست الجميل ولك مني فائق احترامي ومحبتي اخوك دايما اشرف
11-08-2008, 01:08 PM
tmbis tmbis
تاريخ التسجيل: 10-19-2002
مجموع المشاركات: 24862
Quote: تمبس الحبيب هاجر بت الديم سابقا الانقاذ حاليا فنانه صعدت الى السلم بجهد وصبر تحسد عليها.... انسانه فى كل شى معرفه اكثر من خمس عشر سنه (ما كبيره قريتا فى الروضه).. اخت اخوان وما قصدتها لتغنى لمحرم والا استجابت دون حركات فنانين (ايوه بجى ساى بس قروش العازفين والساون)بتجى بى الساون والعده وتدفع فى الكشف كمان
سلامات يا خواض .. دي سيرة ذاتية مختصرة جدا عن هاجـر الفنانة وبت الحلة ... في كتير من الفنانين رافعين القزاز خالص .. يندموك على السمع .. وعلى المعرفة. الفنانة لو مات بقى قريب للناس شن الفادة من فنو..؟
Quote: هاجر كباشى ليست فنانه... انه رحله نضال فى عالم لا يرحم .... دايما تجدها مبتسمه وتضحك مع ان ما تحمله من هموم ينوء من حمله الجبل
د اهم حاجة في الدنيا .. لو راحت البشاشة والابتسامة .. فقد البني آدم كل قيمة جميلة جواهو .. التحية ليك يا هاجــر .. وغني قدر ما تقدري .. وجاملي الناس وختي في الكشف ـ وكوني دايما بسيطة زي ما انتي .. ح نسمع ليك .. وح نخلي البقية .. لانك الاصل.
11-01-2008, 01:20 PM
tmbis tmbis
تاريخ التسجيل: 10-19-2002
مجموع المشاركات: 24862
Quote: تامبا هاجر صوتها لو ملاحظ ليهو شوية غليظ مقارنة بالأصوات النسائية و ده المخليهو مميز جداً ... ياخ في بنات لما يغنو صوتهم بكون حاد لمن يعمل ليك إزعاج ..
.. سلامات يا خالد .. وسوري للتأخير .. دائما يا خالد الأصوات النسائية محصورة في حتات محددة أو تكاد تكون متقاربة .. الصوت الحاد خالص السبرانو .. والغليظ ما دون الباااص .. الباص دا طبعا حق ناس محمد الأمين والمرحوم أبوداؤؤد .. أو هو الدرجة الغليظة جدا في الصوت الرجالي .. وما بين الحاد جدا للنساء .. والغليظ جدا للرجال بتظهر الميزة الطبيعية للاصوات .. يبقى بعداك التفرد بالصوت .. عند صاحبو/تو كصوت (التينور) الرجالي عند الأوبرالي بافروتي .. (والسبرانو) العجيب جدا عند فيروز (ضربت الامثال بي الاتنين ديل لانهم على مستواي الشخصي بعتبرم استاندرد عالمي ) .. هاجـر زي ما قلت صوته غليظ مقارنة بالاصوات النسائية .. لكن أقل غلظه من (حنان النيل) والجاذب اكتر والمميز في صوته أنو امكانيات التطيريب الفوقو عالية جدا .. وهنا بيظهر الفارق الكبير بين الصوت الفوقو الامكانيات العالية .. وبين الصوت الممكن يعمل ليك ازعاج شديد جدا ..
Quote: الزولة دي رهيبة شديد و زولة متواضعة جداً و مجاملة لأبعد الحدود ..
ودا يا خالد المخليها مميزة وداخله قلوب الناس دون استئذان ..
Quote: هاجر يمكن تكون أفضل صوت نسائي موجود في الساحة لكن الظهور في الأجهزة الإعلامية في السودان مرتبط بالتمسح بصفوة المجتمع يعني لازم يلحن ليها صلاح إدريس و ما عارف منو المك داك عشان تظهر في التلفزيون بالصورة الكثيفة القادننا بيها من هم أقل شأناً منها بكتير ....
.. والله ياخالد أنا معاك مية المية .. ومستعد اجيب (النشاب ) بتاعي وادخل الغابة .. أمثال هاجر كتيرات وفي موجة بتاعت شابات غنايات خالص .. لو الاحتكاريين بتاعين اذواق البشر في السودان والمحتكرين لي نفسيات الناس بطلو البعملو فوقو دا .. والله الناس بتمشي لي قدام .. والناس كلها بتستفيد .. وكل واحد بيدي التاني الناقصو وبشيل منو الناقص منو ..
ــــــ - ما كتبته من تنظير في الصوت ومسمياتو لا يمت بصلة بالاكاديميات أو التخصصية .. علشان ما يجي واحد يشبكني (وقع) لينا هنا دا .. - المصطلحات الكتبتها دي علشان اربش بيها ناس (جلخص) ..
10-09-2008, 10:25 PM
عبدالوهاب علي الحاج عبدالوهاب علي الحاج
تاريخ التسجيل: 07-03-2008
مجموع المشاركات: 10548
هاجر فنانة مميزة وشاذة لمن غلط تستاهل كل خير ود الخواض نصفها وانا اثني وازيد ما كنت قايلها جارتنا في الديم انا في الناحية المقابلة....العمارات اتابع اغانيها وما لقيت ليها شريط الا اشتريته بالرغم من انو سمعت بيها قبل كم سنة بس عشان اخوك طول من السودان شكرا علي هذا البوست الجميل ولك مني فائق احترامي ومحبتي اخوك دايما اشرف
العزيز أشرف .. كل من تحدثت معه عن هاجر كباشي .. اثنى على مجاملتها وعلى انسانيتها وتقديرها لكل الظروف في زمن اصبحت فيه المادة تتحكم في الكثير من أحوال العباد .. أول شريط قبل سنوات اغتنمتوا كان من ايد (بائعة شاي) .. في قطية لطيفة جدا في منطقة (الحواته) وأنا داخل على القضارف كاول مرة ازور فيها المنطقة في اجازة سنوية .. وكاول مرة اسمع صوت هاجر كباشي وكأول مرة احضر لي مطرة زي دي بي رعد زي دا .. وقتها والمعاي جرينا القطية دي علشان نخارج نفسنا من المطرة والرعد القادي السماء دا .. ضربنا اجمل شاي في الدنيا الله خلقو .. ومن وقتها صوت هاجر كباشي كلما اسمعو .. بفتكر طوالي انو في مطر صابة .. يا ح تصب بعدما وصلت الخرطوم .. اشتريت اي شريط قابلني لهاجر كباشي .. وجيت بيهم السعودية .. اتلفحو مني كلهم .. الأخوان ما بقصروا لقيتم كلهم بيسمعوا هاجر كباشي وبي ادمان ..
Quote: سلامات ياتمبس رابط لحفظ الاغنية لو أمكن يديك العافية
يا هنـــد .. مفترض تكوني نزلتي الـ http://www.realplayer.com دا الموقع وحاولي نزلي آخـر اصدارة .. بتحفظ ليك اي ملف في الدنيا مجرد ما تضغطي عليهو . ودا احسن ليك من المعافرة بتاعت كود الحفظ بتاع بكري دا .. نزلي البرنامج وادينا رايك .. وهاك احفظي دي معاك .. علشان تجربي بيها:
10-11-2008, 12:02 PM
alfatih alfatih
تاريخ التسجيل: 02-04-2003
مجموع المشاركات: 1150
هاجر كباشى ياااااه الانسانة دى فيها صوت دافئ بشكل كبير شديد .. غايتو فى تصنيف الصوت ما بقدر اشتغل لكن احساسيا كدا بتتميز بطبقة براها .. فيها بحة ممكن تكون قريبة من اسرار بابكر ( فى البحة بس ) .. لكن كلو واحدة بتعكس عمق براها .
كويس جدا انك سلطت عليها نافذة .. لانها بتستحقها فعلا بالمقارنة مع ..( ياخوى راسى دا حلاقة العيد لسة ما ثبتت فيو كويس فمافى داعى للفليق مع بعض الناس )
افتتاح صباحية حلو جدا
10-11-2008, 12:45 PM
ابراهيم محمد الحسن ابراهيم محمد الحسن
تاريخ التسجيل: 11-08-2006
مجموع المشاركات: 8154
Quote: مستغـرب من كووم (الدهــب) والتياب بي مختلف مسمياته ونوعيات (الحنـة) وباقي (الخـم) والاكسسوارات التامين بيها الغناء موية .. وهاك يا تهافت القنوات الفضائية .. إيمـان لندن .. ومنو كدا ما عارف كوستاريكـا .. وندى القلعة .. ومحاسن الثورة بالنص .
تامبا يا حبيب أزيك لا حظت برامج العيد في الفضايئات السودانيه كلها مع الجماعه ديل دهب وحنه ودخان كمان ولا قناه فكرت في هاجر كباشي وبعض المظلومات والمظلومين أعلامياً
ولم يتذكروا الناس ديل بيعملوها شتره يعني أيام العيد تمت إستضافه عبدالمنعم الخالدي على قناتين على مدار يومين لمن خفت على الراجل مايقوم يموت فجاءه بعد ما الناس دي إنتبهت ليهو
غايتو يا تامبا ده زمن الدهب والحنه والتياب وبالجنبه التانيه زمن البدل والكرافتات والعمم الكبيره والعلاقات العامه
توم بس , كل عام وانت بخير يامبدع ياخوي في سهرة في النيل الازرق من فترة كده هاجر كباشي دي جابت ليها اغنية كده بس انا ما مستحضر البرنامج برضو ما مستحضر غايتو في ناس قاعدين كده بعد نضمي كتير كده في حاجة برضو ماعارفو شنو بتغني زي 4 اغاني او 5 كده , حاجة تانية خالص ياريت لو شوفتو لينا من مكتبة الاذاعة يا تمبس ,
عذرا .. ياصاحب فهذه أول سانحة إتداخل في بوست من طرفك، ولعل ما حفزني لذلك الإشادة المستحقة التي أطلقتها هنا لفنانة في قامة وسطوع هاجر كباشي وقد أتاحت لي الظروف يوما أن إحادثها عقب مشاركة مشهودة لها بيننا، وقلت لها بالحرف عليك ياهاجر أن تقدري هذه القدرات الصوتية الهائلة والأداء المميز وماتملكين من معرفة حقيقة وأصيلة بالغناء وهذه الاخيرة لايدركها الكثير ممن زجوا بأنفسهم في هذا السوق وأفزعوا منام الناس قلت لها: تقديرك لكل ذلك يعني التطلع لأفق جديد في مسيرتك الغنائية وقد يتطلب ذلك جهودا مضنية لإكتساب المزيد من المعرفة الموسيقية .. الخ أنا لا أعرف كيف يتم لك ذلك في طاحونة الحياة في بلد ضنين ومستهلك مثل السودان .. ولكن أرجو أن تعملي في هذا الإتجاه ما إستطعتي .. إنتهى حديثي مع هاجر كباشي على وعدها بالعمل لتقديم الكثير في هذا المجال. ومن وقتها لم اسمع الكثير عن أخبارها الفنية وما زلت اتصيد الإستماع لصوتها هنا أو هناك!! في بلدان أخرى ( وأعوذ بالله من كلمة بلدان أخرى ) تلك الكلمة التي ناءت بكلاكل خيباتنا وأحلامنا المهدرات كشعب (مسالم) في معمعان صنع الحياة والإمساك بأسباب نهضته وخروجه لعلن الحياة الكريمة وبراحها الممكن .. المهم .. مثل هذا الصوت عندهم يضاف الى رصيد الثروات القومية .. فيتعهده أهل الدراية والتخصص بالرعاية وتفتح له دروب التحصيل والمعارف وتتاح له كافة أسباب التفوق بلا ضجيج من باب حقوق المواطنة قبل حقوق الإبداع وضرورة الإسهام في بناء الثقافة .. في تنوعها وتعددها كل حسب قدرته ..ولكن قدرالمواهب عندنا أن تنداح كيفما كان تحت رحمة الفوضى الماهلة والتجاوزات القاتلة والمفارقات المؤسفة ... وهذا المجال عندنا وبحمد الله يعيش تحت رحمة جوقة من (المتسلبطين) والدجالين والتجار .. وجيوش لاحصر لها ولاعدد من العاطلين عن الموهبة ..
أنا أهتم بالموسيقى ولست معنيا بالتصنيف الجائر (غنا بنات)، ولزمان أفضل كلما أحزنني زيف المغنيين على أجهزتنا، أهرع للإستماع للفنانة الأمريكية ويتني هيوستن كصوت يجلى عن النفس صدأ الأصوات النشاذ .. وفي هاجر كباشي يحق لنا التساؤل : هل من الممكن أن تعود تجربة الموسيقار بشير عباس والبلابل بكامل جدارتها في شكل آخر يقدم لنا الفنانة هاجر كباشي وغيرها ممن يملكون الحس الفني الصادق والصوت المطرز بعافية الغناء ... ياريت
شكرا لهذا البوست
سيف اليزل
.
10-12-2008, 12:49 PM
mamkouna mamkouna
تاريخ التسجيل: 12-05-2004
مجموع المشاركات: 2246
زمااااااااان يا تمبس لمن كنت صغيرة ..( في العصر الكربوني )... كانت بتعجبني ( ليلى غفران ).. كنت بحس إنو أغانيها و كلمات أغانيها مختلفة.. فيها تحدي..إصرار..رغبة في التغيير..حاجة مختلفة..
نفس الإحساس دا جاني مع ( هاجر كباشي ).. شوف عنوان زي ( تحلم بيٌ ..حلم ).. عليك الله ما مختلف؟!!!
10-12-2008, 01:03 PM
HAMZA SULIMAN HAMZA SULIMAN
تاريخ التسجيل: 04-20-2002
مجموع المشاركات: 3278
أو عند عنفوان الاشتياق لمذاق مبهّر بنكة الاختلاف كان تمبس يترصد عــلّه يظفر بصيد ثمين عند سماعي لها ذاب المزاج في ترانيمها فامتلأت عروقي بالدهشة قدلا يختلف معي أحد في أن هاجر كباشي عندما تصدح لها جاذبية الأرض لمن يحاول الصعود إلي أقاصي الأعالي دون كســر نظرية الجذب وقانون الفيزياء . تســـمرت في مكاني بلا حراك ، كنت أشـــبه بتمثال صامد ضد عوامل الزمن والتعريـــة ، كنت مشدوهاً لهذا الصوت العذب ، لهذه البساطة التي في وضوح المعطيات . عادةً لم أصادف منذ زمان ما يشدني لمتابعة المغنيين والغناء ( والغناوي الفارده ضلها للمسارح في التراب ) إلي أن جاءت البت العجيبه وسرها ...! سمعتها ملئُ دهشتي ورددت معها ما تيسر من غناااا ( قايلو ساااي هو غنا ) ...؟ كاد أن ينفجر الشريان العلوي من فرط الإعجاب ، كلانا ينوه الآخــر عن ( الحته ديـــك ) وذاك التطريب الذي يخرج من أمكنةٍ يصعب علينا وصفها ... تعتلي المســرح تغني ، نعتلي نحن الشواهق من رحابة راقصين .
هاجر ...
مبدعة مُجيده واعية لفتت نظري في بواكير الصدفة التي جعلتني من معجبين هذا الصوت النهر والنهر لا يتوب من الجمال ، دائماً يبسط شاطئيه الى جميع السائلين . وقد لا نختلف فى أنها سلسبيل عذب وأنها أخرجت لنا لونيه غناء نادرة بتطريب عالي جداً وأشياء لا تعرف الوصف والمسميات من خلال ما بعد ( الشوف ) خُيـّـل لي إنها في غاية البساطة والجمال هذا الانطباع يخصني وحدي لا ســواي ولكنه تأكد لي بعد حديث الأخ عصام ، تأكدت أن ظنوني تجاهها كما توقعت وأكثر . كنا نستمع جيداً وبين كل أغنية وأخرى نكيل لها المدح والشكر نمجدها كما يجب فى المنتصف دعونا لا ننسي الملحن الذي وفق تماماً في إختيار الكلمات التي كتبها ثم ألبسها ألحان كعروسٍ في كامل زينتها ، المبدع هيثم عباس ملحنٌ بارع وشاعر أغنيه موهوب تماماً كما هاجــر كباشي . لذا كانت رسالتهما مكتملة النصاب ، لاينقصها ســـوي تجاوب الإعلام بكل قنواته في نشر هذا البهاء
ويا تمبس ...
كنت كما أنت تقصد ، تتخير من عمق البحر الأندر والأجمل والمثير ، فكنت موفقاً كما هي الأخـرى . وياهاجـــر معزومه مقدماً من هسي لعرسي بين العديين فى العام الجاااااي ..
داش كتر خيرك جبت لابوست دا فوق .. لانو لسه عندنا فوقو كلام كتير جدا لكن الهكر والعملية البايخه العمله دي خلتني افرمل شوية من البوست لانو بيعتمد على الفيديو المصاحب للتعليقات .. وزلسه عندي شغل كتير جدا لي هاجـر كباشي مجمعو من فترة طويلة .. استميحكم عذرا احاول اعيد باقي الملفات المضروبة .. واواصل معاكم .. ومع هـاجر الفنانة جدا ..
11-01-2008, 10:36 AM
عمران حسن صالح عمران حسن صالح
تاريخ التسجيل: 11-26-2004
مجموع المشاركات: 10159
يا تمبوش إزيكـ .. أنا ما قريت ولا سطر من المُداخلات الفوق دي ... عايز أذاكر بالعناوين أولاً بعدين نشوف الجوة شنو !! بس طبعاً إسم هاجر كباشي فووووووق كده كيفني لأٍسباب كتيرة ... وكمان أديتني فرصة أفش غبينتي .. لأنو بصراحة كدة صوت هاجر كباشي مظلوم عديل كدة .. نحنا ياخي بقت عندنا مشكلة في السمع .. يعني لو ما الزول سمح ما بنسمع ليهو .. بالذات البنات .. أها فلانة أم حنة ديكـ ما عندها غير جضومه المنفخات وتيابه السمحة وإن جات قالت كاكـ تلقى شرايطه مجدعة في البيوت ... استمرارية غناء هاجر للغناء الخفيف والبنوتي مرفوض طالما تملك خامة صوت غير موجوة في الساحة .. وعزوف الشُعراء (البحبو البنات السمحين بس ) عن هاجر كباشي مرفوض .. وحتى أهل الموسيقى والألحان لم لا يطوروا طريقة الزولة دي في الغُناء ... صدقني كان عندها نونات كان للأسف جوها شايلين حاجتم بدون طلب منها .. وهذا مؤسف ...
11-01-2008, 11:16 AM
Halema2 Halema2
تاريخ التسجيل: 03-10-2002
مجموع المشاركات: 1492
ألاخ تمبس ازيك انا داخله البوست دا عشان الصوره دى( فى بروفايلك) http://www.sudaneseonline.com/u1/Mamma.JPG مؤكد الوالده . صوره حنينه وجميله والله شبه من امى الله يرحمها بشكل غريب ربنا يخليها ليك لو الوالده او حبوبه واتمنى تكون اسمها ذينب تحياتى حليمه
------------------------- هاجر غنايه وبسيطه ودا اجمل ما فيها
11-01-2008, 12:35 PM
tmbis tmbis
تاريخ التسجيل: 10-19-2002
مجموع المشاركات: 24862
حرضــني صوتك للغنا فتحتك ليك كل المنافذ والدروب بسم الحلوق البربحت عشراقة الشوق الهنا من أي حته وزايه غطاها المديح علي وين صباحتك تؤوب ما الرجعه للمألوف نست إنــو الحكايه الفينا ... تتمعن سهت في الكون وفي عمق الجروح ما فينا منك وليك وفيك أوفيك تقاسميك مني يارايحه فى النفس التجيك مرتاحه للحن الطروب يا أي شئ ...
تمبس مشتاق للغنا ياااخ ... ( وقول كلام تاني )
11-10-2008, 01:02 PM
tmbis tmbis
تاريخ التسجيل: 10-19-2002
مجموع المشاركات: 24862
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
tmbis
حمور زيادة
..
baha eassa
.. ايوة كدا يا اصلي .. المخضرمين كلهم بموتو مووت في غنـاء البنات دا من زمن يا بنات المدرسة ونادو لي المدرسة .. 
rosemen osman
طلحة عبدالله
mohmed khalail
طارق جبريل
عامر تيتاوى
هند محمد
خالد عبد الله محمود
Esam El-Khawad
ASHRAF MUSTAFA
عبدالوهاب علي الحاج
alfatih
ابراهيم محمد الحسن
داليا حافظ
mamkouna
HAMZA SULIMAN
عمران حسن صالح
Halema2
فيس بوك
تويتر
انستقرام
يوتيوب
بنتيريست