|
|
 Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
ابن عمتي عبد الكريم والله كتر الف خيرك علي السؤال وتحيه خاصة للاخوة معاويه وللاخ عوض الله مصطفي
الذي طاف بنا مع كبار شخصيات بحري وذكرنا بمحمد ومحجوب قباله وعثمان الحاج والمرحوم عباس شله
ووالدته التي كنا نخافها ونحن صغار الحاجه سروره الشايقيه .ونحن ولدنا في الحته دي.!!!
يا كمال
| Quote: كانت في أستديو غردون (النيل الأزرق حاليا) |
الصوره دي انا خايف يكون اخدا منك غردون ذاتو !!!ياخي دي لوتذكر قلتها ليك قبل كده.
عبد الكريم ذكرني في الاعياد ايام حفلات بلدية بحري سيد خليفة وعبد العزيز داؤود يا سلام علي
الايام الطيبه.
تصور يا عبد الكريم كنا نمشي شله من الاهل من بحري الي الثوره الحاره الرابعه قبل عمل كبري شمبات
وكداري طبعا يعني نلف العاصمة القوميه بالارجل من كبري النيل الازرق وعبر كبري النيل الابيض لا كلل
لا ملل !!!
| |
 
|
|
|
|
|
|
|
 Re: بحري طراوة... ويا ناس بحري .. قالوا بتحبوا يلا حبونا.. (Re: عبدالكريم أحمد الامين)
|
| Quote: يعني لو ماكنت ود سوق ولافي سوق بحرى اكتر من ناس العوائد والبلديه كنت قلت شنو ,, دكان سمير قصاد عمارة كامل أمين الدكان القديم في الزقاق والدكان التاني علي الشارع الرئيسي |
ماالمشكلة ياعبد الكريم انا من صغير كنت بمشي سوق بحري مع الوالد وعارف السوق كويس لكن محلات سمير دى ماشفتها والزقاق البتقولوا ده كان فيهو محلات انوار المدينة ومهدي شريف والمحل الاكثر ازدحام فى العيد كان معروضات عزيز الفاتحة على سوق الخضار ،وانت كدى ورينا المحل ده كان سنة كم يمكن انا ماكنت مولود وقتها.
الاخ طارق
وينك ياراجل مسجل غياب طويل كنت معتكف فى جامع غبيرا ولاشنو ،غايتو انا اتخرجت من عبد الكريم وقلت ليهو كنت معتكف رغم انو هو عارفني لا انا ولاهو ولا كل شلة بيت المغتربين مارجال اعتكاف (دى على وزن انا والكاشف أخوي )
وللجميع اصدق الامنيات بالعيد السعيد
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبدالكريم أحمد الامين)
|
مُناشده الي :- ابو النور وعوض الله
** أنا ود. إبراهيم العجب الشبابيك مخلنها فاتحه والرطوبه دخلت الغرفه وبوظت المُكيف وغبار الشارع وسخ الاوضه ,, وبالرغم من ذلك مافي مُشكله الشبابيك ستظل فاتحه عشان مايكون عندكم حجه تقولو جينا نناولكم بالشبابيك لقيناها قافله ,, والدنيا عيد وانتو عارفين ناس بحرى بحبو لمة العيد في إى مكان والكل في إنتظاركم...
** ومُقدماً كل سنه وأنتما طيبان وربنا يحقق الاماني..ً
*** لكما كل الود والإحترام,,,
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
عبدالكريم والله شايل البوست على أكتافك..وتستأهل نوط الخدمة الممتازة
معاوية: يا أخي سألناك عن هاشم كرارة (كما كنا نسميه) وين أراضيه..وطنشت...
طارق وين يا أخي... إتصل بي الأخ المستشار/ حسن طه أمس الأول...بعد الساعة 11 مساءا وكنت أنا في الظهران... وتواعدنا أن يكون بيننا تلفون نشوف إمكانية اللقاء.. وبالفعل حوالي الساعة 2 مساءا أتصلت بالمستشار في التلفون الأداني ليهو.. لكن رد شخص آخر وقال إنو حسن بعيد شوية من التلفون.. قلت ليهو بلغوا بإني أتصلت.. ووقفت في منتصف المسافة بين الخبر والدمام (الراكة) حوالي نصف ساعة قلت يمكن يتصل... بس مافي نصيب...ووقت المستشار ضيق... لأنو كان راجع ثاني يوم أو قل في نفس اليوم الساعة 10 صباحا.. عموما لم نلتق ولكن إن شاء الله الجايات أكثر من الرايحات إذا بقى في العمر بقية.. معليش يا أبو علي حقك علينا.. لم نقم بالواجب كما ينبغي... ومبروك العمرة يا أبوعلي...ونسأل الله أن يعيدكم لها مرات ومرات
وين الديلفري يا دكتور؟؟؟
طبعا أسعد واحد فينا عبدالرزاق سعيد في هذه الأيام المباركات.. وهو ربما كان على مرمى حجر من نقطة تآلف جموع المسلمين .. في أطهر بقعة على الأرض.. بس حتما مضيوف... ودي برضها بركة يا أبو رزقة
| |
|
|
|
|
|
|
|
|
 Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
## الله أكبر... الله أكبر... الله أكبر... ولله الحمد...الله أكبر كبيرا ,, والحمد لله كثيرا ,, وسبحان الله بُكرة وأصيلا ... الله أكبر..##
*** إنقطع هذا الصوت الذى كان يُجلجل بالتكبير نداءاً لصلاة العيد بمسجد الشيخ عثمان أونسه بالمزاد في 19 أبريل 1978 ,, أنه صوت الوالد المرحوم الحاج أحمد الامين محمد نور له الرحمه وكذلك الرحمه لكل أبائنا الذين رحلوا من حي المزاد ***
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبدالكريم أحمد الامين)
|
Quote: معاوية: يا أخي سألناك عن هاشم كرارة (كما كنا نسميه) وين أراضيه..وطنشت...
|
الاخ كمال
ياخي باين أنت متابع الحوش بتاعك ده ، انا كتبت ليك تقرير شامل عن الأخ هاشم كرار واخوانه كمان فى نفس يوم سؤالك راجع صفحة 16
الاخ عبد الكريم
رحم اللة الوالد احمد الامين وكلنا نذكره مؤذناً فى جامع اونسة رحمه اللة رحمة واسعة وجعل الجنة مثواه بقدر ماخدم الاسلام .
وقلت بوست بحري وصل التونسية عشان كده أحسن تطلع منه بحقك .
ولكم جميعاً كمال وعبد الكريم وعوض اللة وطارق وعبد الرازق ود. أبراهيم وانور العجب وجميع ابناء بحري اجمل التهاني بالعيد السعيد ونتمني أن نكون العيد الجاي فى ربوع بحري
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبدالكريم أحمد الامين)
|
Quote: ## الله أكبر... الله أكبر... الله أكبر... ولله الحمد...الله أكبر كبيرا ,, والحمد لله كثيرا ,, وسبحان الله بُكرة وأصيلا ... الله أكبر..##
*** إنقطع هذا الصوت الذى كان يُجلجل بالتكبير نداءاً لصلاة العيد بمسجد الشيخ عثمان أونسه بالمزاد في 19 أبريل 1978 ,, أنه صوت الوالد المرحوم الحاج أحمد الامين محمد نور له الرحمه وكذلك الرحمه لكل أبائنا الذين رحلوا من حي المزاد *** |
عبد الكريم كل سنة وأنت طيب...
صحيح أنقطع هذا الصوت عن هذه الدنيا الفانية ولكن لم يغادر صوت المرحوم أذني أبدا... فكلما جاء العيد تذكرت صوته.. وهذا ليس مجاملة ولكنها الحقيقة وأنا بعد يافع كم كنت أستمتع بصوت المرحم الحاج أحمد الأمين له الرحمة...وهو يكبر ويهلل قبل صلاة العيد
| |
|
|
|
|
|
|
|
|
 Re: بحري طراوة... ويا ناس بحري .. قالوا بتحبوا يلا حبونا.. (Re: طارق ميرغني)
|
العيد في الغُربه والعيد في بحرى :-
** العيد في الغُربه:- زى وينتهي العزاء بإنتهاء مراسم الدفن ,, أها جينا من الصلاه وجبنا الجرائد وشربنا القهوه ولعنا لينا حجر شيشه وبكده أنتهت مراسم العيد ...
*** العيد في بحرى :- الناس طالعه من صلاة العيد ومتجمهرين حول المسجد للمُعايده وبقية الشباب مُتجمعين في دار الجمعيه والمشاورات شغاله نبدأ بشارع ناس دارقيل او ناس عبدالله مبروك والله أحسن الناس تتقسم شله تبدأ بشارع ناس عم سيداحمد ميرغني وعم الدابي وشارع ناس الزين حسن محجوب ,, الشله الثانيه تبدأ بشارع ناس عم إدريس وشارع ناس مانجل ,, شُله تكسح تغطي ناس كوشة الجبل (ناس زُحل وحلة المارد) ,, ودالزين غطي شارع ناس عثمان فضل ونمر , البقيه ياجماعه ماتنسوا حلة الترسانه شارعي 7 و8 ياجماعه التقسيمه دى عشان ما الناس كلها تكون لافه في شارع واحد ونعمل زحمه في البيوت ...
*** عمر شاويش ومحمد حسن الزين ياشباب بعد ساعه الفطور في النادى ..
*** الحله كلها في لمة فطور النادى بعد أن انتهوا من المُعايده علي كل بيت في الحي ,, وبعد الفطور الشاى وعمر يوسف مظبت القهوه الماخمج قدام دكانو,, وناس الضُمنه دورو ,,, وناس الوست شدو الملايه في التربيزه وناس الحريق لانهم كُتار عملو تربيزتين ..
### بالله هسه الفيهو نحنا في الغُربه دا عيد ,,, والفي المزاد عيد...
### تحياتي لدكتور الزين حسن محجوب وكيف طعم اول عيد خارج المزاد؟؟؟
@@@ وكل سنه أنت طيب , وانتم طيبون وربنا يُحقق الاماني , والعــفـــو والــعــافــيــــه@@@@
(عدل بواسطة عبدالكريم أحمد الامين on 09-30-2008, 05:02 AM)
(عدل بواسطة عبدالكريم أحمد الامين on 09-30-2008, 12:56 PM)
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote:
الاخ كمال
ياخي باين أنت متابع الحوش بتاعك ده ، انا كتبت ليك تقرير شامل عن الأخ هاشم كرار واخوانه كمان فى نفس يوم سؤالك راجع صفحة 16
|
معاوية .. كل عام وأنتم بخير...
معليش العتب على النظر.. أنا متابع جيّد للبوست لكن جل من لا يسهو...
عموما تحياتي للأخ/ هاشم.. والمرة الجاية إن شاء الله نزوره في السودان
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبدالكريم أحمد الامين)
|
الاعزاء:-
** سيد الحوش الكبير بكرى أبو بكر ..
** سيد البيت الكبير بحرى ود السر كرار..
** المستشار ودطه..
** الباشمهندس ود ميرغني .
** اولاد العم عبدالله العجب بدون فرز..
** عوض الله مُصطفي..
** ود سعيد (ابورزقه)..
** ود محمد الحسن جبريل..
** ود حسن محجوب..
** ود محمد عبدالدائم (شكوكو)..
*** ناس بحرى الحلويين إينما وجدوا داخل الوطن أو خارجه..
## كـــل عـــام وأنــتــم بـــخـيـــر وربــنــأ يــديــكم الــصــحــه والــعــافـــيــه##
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: طارق ميرغني)
|
مُناشده الي :- ابو النور وعوض الله
** أنا ود. إبراهيم العجب الشبابيك مخلنها فاتحه والرطوبه دخلت الغرفه وبوظت المُكيف وغبار الشارع وسخ الاوضه ,, وبالرغم من ذلك مافي مُشكله الشبابيك ستظل فاتحه عشان مايكون عندكم حجه تقولو جينا نناولكم بالشبابيك لقيناها قافله ,, والدنيا عيد وانتو عارفين ناس بحرى بحبو لمة العيد في إى مكان والكل في إنتظاركم...
** ومُقدماً كل سنه وأنتما طيبان وربنا يحقق الاماني..ً
*** لكما كل الود والإحترام,,,
***************************************************
## نحن في الإنتطار والدنيا إجازه وابو النور موجود بأبوظبي اليوم ويبلغ تحاياه لكل ناس بحرى وفي إنتظار وعده لمناولتنا العيديه ,, ويا عوض الله واقفين وفاتحين شيش الشباك ....
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: محمد عبدالمنعم التلب)
|
| Quote: ناسف للانقطاع الغير مقصود ولكن لظروف قاهره انقطعنا عنكم نرجو من الاخ عبد الكريم (بوليس) البوست رفعنا من القائمه وسنلتزم بحسن السير والسلوك ونعوض انقطاعنا باذن الله. |
ود التلب
سؤالنا عن الغائيبين هو مايميز أهل الطراوه عن البقيه ,, كل سنه وانت طيب والاسره الكريمه ,,
** تم إجراء اللازم بشأن التعميم الصادر ضدكم من بحرى طراوه وتم وقف كل الاجراءات مع الزامكم بالتواجد بهذا البيت لتعويض فترة الغياب **
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
طله جديده في صباح جديد للعيد
وشكرا المستشار عبد الكريم علي التغطيه والله بقيت ملك التغطيه " ابو القدح" المجبور علي بت عمو
وشكرا التلب، ابو رزقه ،علي سر الختم ،الاستشاري ابراهيم العجب ، معاويه، محمد شمس الدين
والمستشار حسن طه، صديقي ابو النور وسيد الحوش رفيق العمر كمال السر وكل الحبان والزملاء.
والسنه الجايه علي امانيكم.
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: طارق ميرغني)
|
اهل الطراوه عساكم طيبن
بحرى كعهدها فى العيد هادئه ورايقه ترى الناس يتجولوا فى زياراتهم الاسريه والامسيات تلقى الشباب فى الاحياء يتسامرون حتى وقت متاخر اذ مايزالوا متعودين على برنامج رمضان .
اسئله لقدامى بحرى:
كان هنالك بائع طعميه شهير يدعى مسلمى . وين كان موقعه ؟
عم احمد بتاع الجرم كان يجلس فى موقع شهير ببحرى . منو البتذكروا ؟
اقعدوا عافيه لمن اجيكم راجع .
انتو لسه نايمن والا شنو البوست انا لقيتو فى خور حلة حمد ياالله قبضتو
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
الأخ الفاضل/ م. عمر عثمان
كل عام وأنت وأسرتك الصغيرة والكبيرة وجميع الأهل بخير وصحة وعافية وربنا يحفظ ليك شهد وشيماء ..
وتحياتي الخاصة للأخوان الأعزاء خالد وأمين وجميع أفراد الأسرة وإن شاء الله القابلة معيّد في بحري وسط الأهل والأحباب والأصدقاء
وأهنئك بمناسبة الكتاب الذي قمت بتأليفه (أخي المهندس الهمام) مع تمنياتي لكم بمزيد من التوفيق والنجاح والتميز ..
ولك خالص تحياتي ،،
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: محمد عبدالمنعم التلب)
|
| Quote: كان هنالك بائع طعميه شهير يدعى مسلمى . وين كان موقعه ؟ |
ود التلب
الاول دا حتي ديناصورات بحرى الذين تمت الإستعانه بهم(عوض الله مصطفي) أفادوا إحتمال يكون بدأ يرمي طعميه بعد ماهم غادروا بحرى في دروب الغربه..
| Quote: عم احمد بتاع الجرم كان يجلس فى موقع شهير ببحرى . منو البتذكروا ؟ |
** ابو العوض موقعه الدائم تقاطع شارع المعونه مع شارع السيد علي عند الاشاره الضوئيه ,, وموقعه المتحرك ميدان عقرب (له الرحمه فقد كان إعلاماً متحركاً للنشاط الرياضي ببحرى)..
كما وأنه كان لاعباً بفريق المورده عندما كانت المورده في عز منافستها للهلال والمريخ..
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
طله وزوغه واليوم السبت ومن زمن المدرسه يوم السبت ما بنحبه.
يا تلب عمنا احمد بتاع الجرم كان اول اعلامي رياضي اولا حيث كان يتجول في ميادين الكوره مثل ميدان عقرب ليبيع الجرم ويتلو جدول
المباريات وفي نهاية اليوم يعسكر في ناصية شارع المعونه مقابل طلمبة شل حبيب .
كان يشتهر بصوته الرخيم حين ينادي للجرم وكان يقود عجلته ببدال واحد لعطب برجله حاملا طبقا عريضا من السعف وكان الوحيد ربما في
العاصمة الذي تخصص في بيع الجرم.
| |
|
|
|
|
|
|
|
|
 Re: بحري طراوة... ويا ناس بحري .. قالوا بتحبوا يلا حبونا.. (Re: طارق ميرغني)
|
[| Quote: U]Quote: كان هنالك بائع طعميه شهير يدعى مسلمى . وين كان موقعه ؟ |
Quote: ود التلب
الاول دا حتي ديناصورات بحرى الذين تمت الإستعانه بهم(عوض الله مصطفي) أفادوا إحتمال يكون بدأ يرمي طعميه بعد ماهم غادروا بحرى في دروب الغربه.. |
** رأيك شنو ياأبن خالي في كلام عوض الله مصطفي بخصوص مسلمي ,, برضو يكون بد يرميها بعد غربتكم.
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبدالكريم أحمد الامين)
|
الاخوه ديناصورات بحرى ست الطراوه
مكرر الاخ عبد الكربم
مكرر الاخ طارق ميرغنى
مكرر الاخ طارق احمد خالد
مبروك الجزء الاول من الحل الخاص بالعم احمد وطبعا عم احمد رحمه الله كان من رواد دار الرياضه بحرى البلديه الاساسين بجانب ميدان عقرب ومكان مجلسه مضبوط وكان يجلس بمكانه حتى دخول ناس الدور الثانى للسينمات ( وطنيه _حلفايا) يعنى حتى 9:30 _ 10 مساء وحتى نفاذ الكميه الكانت مضبوطه تماما على هذا الزمان تقريبا.
للمساعدة فى الجزء الثانى من السؤال مسلمى بتاع الطعميه مكانه ليس ببعيد من مكان عم احمد واتوقع انه الاخ كمال ود السر قد يساعد فى الاجابه .
اذا فشلتم فى الاجابه حتى المساء (المغرب) بتوقيت السودان سنذكر الحل
اها ااا رايكم شنو؟
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: طارق ميرغني)
|
وكما وعدنا الكوتش عوض الله مُصطفي ظل الشباك فاتح وتلقينا الحلقه رقم (3) من ظرفاء وأحياء في بحرى (حي الدناقله جنوب) الا هو محجوب صالح الشهير بـ ( ود اب كالوك)
****************************************************************
ظرفاء و إحياء في بحرى (الدناقله جنوب) - الحلقه الثالثه - عوض الله مصطفي - العين
=============================================================================
الاسم محجوب صالح اشتهر باسم ( ود اب كالوك) لا احد يدرى سر هذه التسمية كان رجلا نحيفا اسمر البشرة رشيق الجسم سريع الخطى يمتاز بقدر كبير من الوسامة و الأناقة كان يسكن في الجزء الفاصل بين الدناقلة جنوب و شمال في الاتجاه الشرقي لذا كان تعلقه شديدا بديوم بحري كان (ود أب كالوك) برغم عدم تعليمه من اذكي أذكياء مدبنة بحري وكان داهية متحركة كما كان اجتماعيا من الطراز الأول تجده أول الحاضرين في السراء و الضراء لذا كان محبوبا جدا له طرائف و مواقف متعددة منها قصة الاراضى التى كانت حديث المدينة فى ذلك الوقت .
كانت الاراضى تباع بواسطة المجلس البلدي الذي كان يعمل فيه ابوكالوك مراسلة و كانت توزع بموجب إيصال خاص حاملا ختم مجلس بلدي بحري و القصة يرويها على لسانه كما سمعتها شخصيا منه خاصة و إن بيننا صلة قربى إذ انه من مدينة الكاملين مسقط رأس حبوبتى فاطمة احمد حسن و التي اشتهرت في تلك الفترة ببت الكاملين تمييزا لها لجمالها الأخاذ الذي لايقل عن نانسي عجرم قال ود اب كالوك انه تحصل على دفتر الإيصالات و كانت العقبة الوحيدة هي الختم الذي كان بحوزة الباشكاتب و تحت عهدته الشخصية قال (ود أب كالوك) إن ذلك الباشكاتب كان يذوب وجدا عند سماعه مدح المصطفى صلى الله عليه و سلم و كان (ود أب كالوك) يمتلك صوتا جميلا رخيما فقال كنت احضر له قهوة الصباح و اجلس أمام الدرج الموجود به الختم و ابتدئ بالمديح فتاحذ الباشكاتب رعشة و يأخذ له دقسة قال أثناء تلك الدقسة أقوم بختم عدد من الإيصالات المهم قام بعد ذلك (ود أب كالوك) ببيع تلك الاراضى لعلية القوم منهم أطباء مشهورين و كبار موظفي الدولة و الذين كانوا حريصين و متوسلين للسيد (ود أب كالوك) بعدم ذكر أسماءهم في القضية .
القصة كانت فى الستينات طبعا الكوامر القديمة ناس طارق مرغني و ود كرار يكونوا شهودا عليها . خاصة العم طارق مرغني حامل أسرار و أختام مدينة ست الهوى بحري و كل يوم و كل زول من بحرى بالف خير ..
******************************
## عوض الله شباكنا دا فاتح حتي في الخريف وفي إنتظار المزيد منك..
لك كل الود والتقدير,,,,
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: بخاري عثمان الامين)
|
Quote:
كمال انا من الديامة وديل براهم واولاد الديم ما بيبيتوا بره الديم الا في المعتقلات لكن وحاتك من 1992 اتعرفت علي زوجتي نجلاء من بحري كايس البتمرقني ياخ بحري دي غير |
الاخ بخارى
بعد ترحيب ود السر كرار ,, أها جاك ترحيب من واحد من ناس ست الهوى والطراوه ,, ياخوى أنت لو صاحبت ليك راجل من بحرى مابتقدر تتخارج منها ومن ناسا ,, خليك بقيت سيد بيت فيها والحكومه من بحرى ,,
يخيل لي لما تمشي الديم بتكون متلهف للرجعه لبحرى ,, وإسمها كيمياء جذب المدينه الساحره فهى تجذبك وتسحرك وتجعلك مُقيداً بها تبرحها وعند وصولك لمبتغاك وقبل أن تلتقط أنفاسك تجد دافعاً ذاتياً يعطى تعليماته لك بالعوده اليها:- أنها بحرى ست الهوى والطراوه..
*** لك كل الود والتقدير وفي إنتظار مُساهماتك ***
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
أولا أحيي الأخ/ عماد عثمان على إتصاله وفي إنتظار مساهماته التي وعد بها..
كما أحيي الأخ/ عوض حامد.. والذي تذكر لي الشخصية الجالسة على يمين أبو النور وهو الأخ/ عصمت الهاشمي..من أبناء الحلفايا.. وكان معانا في فصل المتنبيء يا طارق.
أما الشخصية الأخيرة بالبنطلون فهو يشك في انها للأخ/ جمال حسن ..و أنا أشك في أنها للأستاذ المصري الدسوقي الذي كان يدرسنا الفيزياء... أها شن قولك؟
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبدالكريم أحمد الامين)
|
اخوتي الأعزاء
سلام وجيتكم راجع
وكنت مفتكر اني حاكشف ليكم البحر وابدأ بالاجابة علي سؤال الاخ التلب عن عمك احمد ومكانه ولكن نعمل شنو مع الديناصورات .
Quote: عم احمد بتاع الجرم كان يجلس فى موقع شهير ببحرى . منو البتذكروا ؟
|
فعلا اجابات الديناصورات صحيحة ومكانه كان بالمحطة الوسطي نهاية شارع المعونة ( او قل بداية شارع المعونة ) مقابل الترمبة .
الجميل في ذاك الزمن الجميل ان الزيادة عندما تشتري التسالي تكون اكتر من الكمية المشتراة.
سؤال : عمكم احمد هل كانت احدي ساقيه مقطوعة ؟؟؟
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
| Quote: سؤال : عمكم احمد هل كانت احدي ساقيه مقطوعة ؟؟؟ |
سعادة المستشار حسن طه
مبروكه العُمره وتهانئنا بالعيد والطله..
عمك أحمد (ابو العوض) كما يعلم جميع ناس ست الهوى والطراوه بأن أحد رجليه عباره عن ساق خشبيه مما يعني بأن رجله مقطوعه نتيجه لحادث ترام في الزمن الذى كان به ترام ,, ولكن صيغة السؤال تدعو للتساؤل عن المعني الخفي والبعيد ؟؟ وفي الإنتظار..
** يوجد شخص آخر في بحرى مشهور زى ابو العوض وبرضو برجل واحده وبسوق عجله واحسن واحد بيعمل عكو وكوارع دى الشغل الظاهر للعيان ولديه نشاط في مجال آخر !!!! ؟؟؟
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
الاخ عوض الله مصطفي الاغرب في قصة بيع الاراضي بواسطة اب كالوك انو مدير شرطة بحري في ذلك الزمن ولا داعي لذكر الاسماء كان قد اشتري
من تلك الاراضي الوهمية وكان عشم كل الموظفين الكبار في عدم ذكر اسم اي منهم والقروش طايره لكن اب كالوك رحمة الله شرب كل تلك الثروه
في بطنو.
يا عبد الكريم لو بتقصد جابر اب كراع بالفعل كان له اكثر من نشاط!!!!!!!!!!
يا دكتور ابراهيم العجب بالله قول لي ابو النور خلاص ينقلنا من قصة الشوارع وتخطيطها الي البشر ليحدثنا عن ظرفاء بحري وناس بحري
وذكرياتنا في بحري الثانويه وعن شلتنا والطرائف وعن وعن والكثير الذي اثق تمام في ذاكرته الحديدية والوحيد الذي يمكن ان يتفوق علي
كمال السر من ناحية الذاكره.
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبدالكريم أحمد الامين)
|
يا عبد الكريم لو بتقصد جابر اب كراع بالفعل كان له اكثر من نشاط!!!!!!!!!!
الاخوان الاعزاء كيفكم
اعتقد ياعبد الكريم انت فعلاص بتقصد جابر ابو كراع ونشاطه الاخر انه كان يعمل ترزي فى سوق بحري .
وبرضوا كان هناك اسكافى فى سوق المزاد له رجل واحدة وايضاً كان يعمل غفير فى مستشفي بحري انشاء اللة تكون متذكروا .
طبعاًبتكون متذكر عبداللة بتاع الجرائد الذى كانت لديه يد واحدة ورغم ذلك كان يبيع السعوط ايضاً بيده الواحدةوبالمناسبة دي اذكر انو اخونا عوض اللة مصطفي عندما كان يدربنا اهدي له احد اصدقائه ترينق سوت والبنطلون فيه جيب بسوسته فقال عوض اللة بانه اكثر حاجة عاجباهو فى التريتق سوت انو فيهو جيب بخت فيهو الصعوط .
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: معاوية محمد الحسن)
|
كمال كرار وضيوف البوست المثابرين .
عاوز واحد يحكى لى عن (بص داخل مدينة الخرطوم بحرى)
الدائرى ، موقفه وين وبمشى وين، ومين أشهر سائقيه؟؟
صديق متابع حكى لى عنه لكنه إفتقر للمعلومات الحقيقية
حوله وكان عشمه وما زال أن يجد إجابة من ناس بحرى
الذين تداعوا لهذا البوست التوثيقى الغنى، والثرى
بالنفيس من المعلومات والتاريخ التليد لمدينة بحرى،
أم الصناعات، وأحد أضلاع مثلث العاصمة المثلثة رحمها
الله هى ومن أقاموها، وقاموا عليها .
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبدالله شمس الدين مصطفى)
|
ياخوانا ماتخارجونا من صفحة التونسية دي بقينا طوالى نلقى البوست فى الصفحة الثانية ،ومحاولة منى للمساعدة من الخروج من التونسية أحكي طرائف عن الكوتش سليمان فارس مدرب التحرير الشهير والساخر والمعتد بنفسه للحد البعيد ،فيروي عن سخريته أنه جاء لتمرين التحرير عندما كان يقوم بتدريبه واوقف سيارته فى منتصف الشارع واثناء التمرين جاءت شاحنة كبيرة عابرة بالشارع ولم تستطيع المرور بسبب وجود عربة الكوتش فى منصف الشارع ونزل مساعد الشاحنة ودخل الاستاد وسأل عن صاحب العربة فقام عثمان الحاج بمناداة سليمان فارس لياتي ويخرج السيارة من الشارع ،فقام سليمان فارس بمنح مفتاح السيارة للأعب الفنان سكسك عندما كان يلعب فى التحرير وطلب منه اخراج السيارة من السشارع وبعد أن قام سكسك بالمهمة واعاد له المفتاح ،قام الكوتش بإطلاق صافرة وجمع اللأعبين فى منتصف الملعب وحكي لهم قصة سيارته وقال لهم بانه قام بإعطاء سكسك المفتاح رغم انه لم يسبق له فى حياته أن شاهد سكسك سائق سيارة ولكن من كورتو بس عرفتو انو الوحيد فيكم الممكن يطلع السيارة .رحم اللة سليمان فارس
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبدالله شمس الدين مصطفى)
|
مرحب بيك أخي مصطفى شمس الدين...
ربما ذكرت أنا في عجالة عن البص الدائري... وأخي طارق اسهب بعض الشيء في الموضوع... إلا أنه تجدر الإشارة إلى أن هنالك باصين... أحدهما كان يسوقه العم/ علي (رحمه الله) والثاني كان يسوقه العم/ نصر (رحمه الله) وعلى ما أذكر أن الباصين كانا يقفان عند سوق الخضار..وجل ركابهما من النساء وفي الغالب كبار السن منهن.. وكان خط سيره من سوق خضار بحري.. مرورا بإمتداد شارع الصناعات والذي يمر شمال سوق سعد قشرة الحالي ويتلوي في طريقه من أمام دكان سعد قشرة أمام بيت الأخ/ يحي حسن عبود.. في طريقة إلى نهاية المحطة عند تقاطع شارع شمبات عند سهلة الشيخ موسى.. مارا شمال بيت الفنان أيوب فارس وجنوب بيت ناس كمال وعصام سعيد...
وفي بداية الستينيات أنتقل الباصان للعمل في خط المزاد السوق مرورا بشارع البوستة الحالي.. حيث أستمر أن يكون ركابهما من كبار السن من النساء وهن في طريقهن لسوق الخضار في بحري..وكان البص يقف في محطات عديدة وفي بعض الأحيان من دون أن يكون هنالك شخص في المحطة.. إنتظارا لأحد النساء التي تكون لا زالت داخل بيتها ولا بأس من أطلاق البوري تنبيها لها بسرعة اللحاق بالباص الذي لم يكن ليغادر دون حضورها... يتم هذا دون تذمر من أي من الراكبات اللائي سرعان ما يتناولن أطراف الحديث عن فلانة وفرتكانة.. وعن قفة العجور التي طار سعرها ليصبح شلنا بالكامل...
أرجو أن أكون قد ألقيت بعض الضوء عن موضوع الباصين الدائريين وأرجو ألا أكون off point .. ويمكنك الرجوع للصفحات الأول للأستزادة كما يمكن لبعض الأخوان إن يزيد ما شاءت له الذاكرة...
ومرحب بيك ثاني
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: معاوية محمد الحسن)
|
| Quote: [B]اعتقد ياعبد الكريم انت فعلا بتقصد جابر ابو كراع ونشاطه الاخر انه كان يعمل ترزي فى سوق بحري . |
العزيز معاويه
والنشاطين المتبقيين ,,, قرض علي كده !!!
| Quote: وبرضوا كان هناك اسكافى فى سوق المزاد له رجل واحدة وايضاً كان يعمل غفير فى مستشفي بحري انشاء اللة تكون متذكروا . |
علي ما أعتقد العم علي وكان مرضان بكور رابطه المزاد وكور ميدان عقرب ومابفوت كوره ...!!!!
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
يا كمال تقليت الرسالة التالية من الباشمهندس صلاح بشير احد ديناصورات ما بعد الجوراسي .... ما قبل الجوراسي ديل ناس المستشار حسن طه ودكتور عبد المحمود وبالمناسبة وين الدكاتره عبد المحمود عل المانع خير...؟بالله يا حسن طه انكت لينا الدكاتره عبد المحمود الاتنين
Quote: عزيزي طارق
لك تحياتي و سلامي
إستمتعت كثيرا بمتابعة بوست بحري وذلك لعدة أسباب منها مشاهدة صورتك البهية و الصلعة اللماعة كما تذكرت كمال السر ورجعت للأمرية 1 بكل ذكرياتها الجميلة وكم أسعدتني الدعوات بشفاء عمر و هو الأن و الحمد لله بصحة جيدة وفطرنا في الحلفايا في اخر جمعة في رمضان مع ناس بابكر وعلي و أبو رزقة وعصام و عثمان الداروتي و شباب عائلتكم الجدد
بوست بحري متسارع جدا وما فيهو تركيز و يا ريت لو أخدوا بي رأيك و ركزوا شوية لتعم الفائدة خاصة للجيل الجديد. طبعا نحن الان نعتبر من الجيل القديم .
في معلومات كتيرة ذكرت تحتاج لي تصحيح زي حكاية يحي عامر اللي إنت بتقصدة هو أخو خالد عامر و يحي دفعتنا وما بلعب كورة و ما ليه دخل بلأهلي السعودي.
تحياتي لي كمال السرو أنا ما عرفت ال
e-mail بتاعة عشان أراسلة
.صلاح بشير
|
طبعا يا كمال الاخ صلاح بشير من الشخصيات الساخره في بحري وهو دفعة وصديق ابن خالتي المهندس بحري عمر قسم السيد الذي والحمد لله
تعافي وبلغ الصحة الآن.
اتصل بي كما وعدت بالامس اخي علي قسم السيد وطمأنني علي حال الاسرة.وهو متابع للبوستات طراوه والاميريه...
الحمد لله الذي جعل الاسفير مجالا للتواصل وشكرا بكري ابو بكر
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: طارق ميرغني)
|
Quote: اقول ليك صلاح بشير تقول لي صلاح عمر بشير ؟؟؟
] |
طارق صدقني الخطأ مطبعي.. ليس إلا . وأنا أكتب مستحضر كامل شخصية صلاح بشير وليس صلاح عمر بشير... أنت بس ما تصدق غلطة مطبعية وتطلعنا من الجنة وسقطها...
ودي فرصة عشان أؤكد ليك أني متذكر تماما.. وأزيد وأقول ليك صلاح بشير من حلة حمد يعني جنب ناس جدي وأعمامي... وبيعرفهم وبيعرفوه... أما صلاح عمر بشير... (الأبيض).. ده كان في حلة الدناقلة وليس ببعيد من المرحوم / جلال عثمان ...ونسيب الأستاذ المسرحي/ مكي سنادة... وهو الدفعة القدامنا فقط وليس قدام القدامنا... وصلاح بشير أغبش وصلاح عمر بشير أقرب للحنكشة برضو تقول لي الطيارة فيها بوري...
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبدالكريم أحمد الامين)
|
وظل هذا الرقم المُسمي بالتونسيه (17) في هذا البوست من تاريخ 28/09/2008 الساعه:- 09:44 مساءاً والي تاريخ اليوم 07/10/2008 الساعه :- 10:27 صباحاً ... اللهم خارجنا من هذا الرقم للبوابه رقـــم (18) حتي يتنفس سكان هذا القصر الصعداء ويرتاحو نفسياً من حكاية مشى الخور وجابوه من الخور ...
*** اها يامعاويه جكه جكتين منك وواحده من ود السر كرار وود ميرغني علي مصطفي ترتاح نفسياً وتقلب الصفحه تلقاها عملت ليك مامجموعه (9)..
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: لووووووووووووووووووووووووول يا عبدالكريم..
البتتشرب دي... ما عندنا بيها خبر يا عبده (وجه يظهر منتهى البراءة)...
البتقع دي الله يحفظنا منها ...قول آمين |
لكن ياود السر كرار
شم ساكت يكون جاك صُداع منها خانة نصر جنب إستاد التحرير دخانا في السما زى حريق قصب السكر في الجزيره ,, المزاد كلو كان يتسطل علي الريحه ,, علي وزن قهوه علي الريحه..
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
برضو يا طارق أنعم عليّ الأخ/ صلاح بشير بالرسالة الضافية التالية.. وهو بيشدد على إقتراحك (المهبب) بتاع فهرسة المواضيع .. وإن كان لم يعد كذلك عندما ثناه الأخ/ صلاح. وأنا إكراما لأخينا صلاح.. رئيس الجمعية الأدبية السابق أطرح الفكرة مرة أخرى على إخواني من رواد وكتاب البوست..وأرجو منهم أن يشيروا علينا بالآلية أو المنهجية التي يمكن أن نحقق من خلالهاهذا الإقتراح المقدر...
والآن إلى رسالة أخي صلاح بشير...
Quote: عزيزي كمال السر
ألف سلام وتحية ليك
يبدو أنك ما زلت كمال السر الساخر الحبوب والذي كنت استمتع كثيرا بمناكفتة كما ان طارق هو نفسة طارق الشخصية المرحة الودودة. اخبرني الأخ دكتور علي قسم السيد عن بوست بحري و قال لي " كمال السر و طاريق مدورين ذكريات ظريفة في النت"
من عجائب الصدف يا كمال وإنت و طارق تتغالطو في صلاح بشير و صلاح عمر بشير
فعلا صلاح عمر بشير هو الدفعة الورانا مباشرة يعني الدفعة اللي قدامكم مباشرة في الأميرية و صلاح الان أستاذ في كلية الطب في جامعة أبها بالسعودية و انا متزوج شقيقة صلاح عمر بشير .
يا ريت يا كمال و للفائدة تركزوا شوية و ترجعوا للإقتراح اللي قدم قبل كدة بالتوثيق لعدة اشياء وذلك بتحديد موضوع واحد يساهم كل المشاركين بمعلوماتهم حولة حتي يكتمل التوثيق الكامل له. مثال : معلمي بحري , كل من له أي معلومة أسماء , مواقع , نوادر , أحوال إجتماعية , كل ما يتعلقباب بالمعلمين. ثم بعد إيفاء المضوع حقة من التوثيق و الذكريات الطريفة يتم الإنتقال إلي موضوع اخر. و بذلك تعم فائدة التوثيق والإستمتاع و الترويح مع ذكريات بحري الجميلة.
هنلك مجموعة من شباب بحري أسسوا ما سمي ب " بحري مدينتي" من ضمن هؤلاء شقيقي المرحوم عبد المنعم بشير و كذلك الأخ صلاح لبيب و الذي كما رأيت في البوست أن هناك محاولة" لإستكتابة" وهو رجل ذو مقدرة عالية في الكتابة ومن شباب بحري الأوفياء و أكيد سوف يثري هذا المنتدي بإسهاماته.
وكل عام وانتم بخير
صلاح بشير
|
شكرا أخي صلاح على الرسالة الضافية...وإن شاء الله نتقابل ما بقى في العمر بقية...الدكتور/ صلاح عمر بشير كان مثالا للطالب الخلوق...فله منا عبرك التحايا الطيبات...والمنى لك وله ولأسرتيكما بعام سعيد وكل عام وأنتم بخير..
تخريمة:-
يا طارق... أهو الغلطة المطبعية عرفتنا أنو الصلاحين نسيبان...
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: الأخ/ طارق أحمد خالد...
سلام كثير وكل سنة وأنت طيب..
إذا إنت إبن الأخ/ أحمد خالد... من حلة حمد... الدرس قدامنا في بحري الأميرية...يبقى أنا وعمك طارق... ديناصورات جد جد..
مرحبتين ثاني.. وفي إنتظار مساهماتك.. |
اهلا كمال كرار
ابدا أنا ما ابن احمد خالد بتاع حلة حمد.... ما تخاف من الدنصرة
أنا ذاتي ديناصور صغيرون شوية
أقرب ليك المسافة:
أنا من الختمية.. والدى المرحوم أحمد خالد على ضابط سابق بالقوات المسلحة.. شقيقي الاكبر صلاح كان من الدفع الاولى في بحري الحكومية
انا دفعة محمد شريف الخبير وهو صديق مقرب جدا وحميم.. منزلهم كمنزلنا .. الحاجة زينب أعزها كوالدتي.. أماني.. أيمن...اخوة اعزاء
منزلهم بحلة حمد دخلته مرارا وتكرارا مع محمد .. اعرف مصطفى وبكرى حتى أصهاركم ناس بخاري اعرفهم تماما
اهلي في بحري كثر منهم ال التازي وايضا حيدر الجقدلي
اظن كدا حصلت المعرفة....
تحياتي العطرة
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبدالكريم أحمد الامين)
|
Quote: الاخ العزيز عوض الله شباكنا لايزال مفتوحاً وسيظل مفتوحاً وماتحرمنا من إبداعك وفي إنتظار ماتجود به الذاكره عن أخونا وحبيبنا أبراهيم عيونو ,, وخاصة بعد زواجه وإستقراره بالجريف غرب والتي يذهب اليها من بحرى بعد العاشره او الحادية عشر مساءاً ,, وماأحلي نوادره وقفشاته.. في الانتظار.....
الاخ عبد الكريم
انشاء اللة قربنا نتخارج من التونسية وبعد ده ممكن كل واحد يطلع بحقو وزي مابقول اخونا خالد قيلي نلعب فى حق العوراء.
بمناسبة ابراهيم عيونو طبعاً هو راجل ظريف للحد البعيد ومابحب المشاكل وبخاف منها موت وكان بجي يقعد مع عوض اللة فى المزاد وعندما يعود للدناقلة فى منتصف الليل بشيل ليهو طوبة ويلفها فى جريدة ويشق المزاد فى طريقه للدناقلة كداري طبعاواى واحد يقابلو يسلم عليهو من بعيد عشان يأمن شرو وكثيرين كانوا بستغربوا انو ابراهيم ده بشيل جريدة فى الليل ليه وماعارفين الجريدة دى فيها شنو .
وفى فترة تولي رئاسة فريق البرازيل وسافر معنا رحلة لبورتسودان وفى منتصف الليل جاءهو خوجلي كباشى وكان اداري فى الفريق يشكو من مغص فى بطنه وطلب من ابراهيم بصفته رئيس البعثة ان يذهب معه للمستشفي وابراهيم كان خائف من الخروج فى الليل وحلف مايمشي معاهو وقال ليهو انا مقتنع انو اى مرض من اللة لكن وجع البطن من سيدو عشان كدة تمشى براك انا ماعندي معاك شغلة بالليل ده يقوم يطلع لينا هدندوي يودينا الاخرة .
وبرضو كان الاخ كمال فضل اللة (نوبة) بخاف من المشاكل للحد البعيد ومرة كان راكب حافلة المزاد ومعه اخونا صبري حامد قام واحد فى الحافلة سالو ياخي انت اخو صلاح فضل اللة فرد عليهو كمال نوبة بسرعة لا لا لا ولمن نزلوا صبري سالوا مستغرباً ليه انت قلت للزول انك ما اخو صلاح فضل اللة فرد عليهو كمال انت عوير ياصبري يمكن يكون مشاكلوا .
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: اظن كدا حصلت المعرفة....
تحياتي العطرة |
يا زول كده بقينا أهل تب. أولا الختمية فيها بيت عمي الكبير (فضل كرار) رحمه الله، وبيت عمتي (زينب كرار) رحمها الله... عدا بيت ناس زينب بت عمي أم محمد شريف...وأهل آخرين...
بالنسبة لأخوك صلاح ربما كان دفعة بخاري وهم أول دفعة في بحري الثانوية...
المهم حصل المعرفة.. ونحن ديناصورات بس مش لدرجة بخاري وصلاح خالد
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
| Quote: يا اخوانا ابراهيم عيونو البتقصدوهو الشلالي الدهان ولا واحد غيرو؟؟ |
الاخ طارق
كيف الحال
ابراهيم عيونو الذى نتحدث عنه ليس هو ابراهيم الذى تقصده وقد وصلتني الان معلومة سريعة عبر الهاتف من اخونا عبد الكريم ان ابراهيم عيونو الذى نتحدث عنه هو اخو الكونج وابن خالةالكوتش سليمان والفنان وايوب فارس،انشاء اللة يكون عرفتو .
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: معاوية محمد الحسن)
|
| Quote: يا اخوانا ابراهيم عيونو البتقصدوهو الشلالي الدهان ولا واحد غيرو؟؟ |
ياطارق
لو بتذكر فريق الكفاح ومباريات البلديه ,, اها عيونو كان بيلعب باك في فريق الكفاح ,, لمى فيهو محي الدين احرف وأسرع جناح في بجرى وفريق شمبات أداهو ليك مشوارين (مع الاعتذار) عيونو عزف الغدا في اللاين وكان قرع ,, جمهور شمبات بدا يتريق عليهو ,,, قال ليهم انتو مفتكرين دا قرع ياوهم دا اناناس بعيد عنكم...
*** وله الكثير من النوادر وفي إنتظار عوض الله حتي يتحفنا بها ,, وهو لايقل عن شلنكح وشقر في نوادره وقفشاته...
(عدل بواسطة عبدالكريم أحمد الامين on 10-08-2008, 11:25 PM)
(عدل بواسطة عبدالكريم أحمد الامين on 10-09-2008, 08:11 AM)
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبدالكريم أحمد الامين)
|
Quote: وظل هذا الرقم المُسمي بالتونسيه (17) في هذا البوست من تاريخ 28/09/2008 الساعه:- 09:44 مساءاً والي تاريخ اليوم 07/10/2008 الساعه :- 10:27 صباحاً ... اللهم خارجنا من هذا الرقم للبوابه رقـــم (18) حتي يتنفس سكان هذا القصر الصعداء ويرتاحو نفسياً من حكاية مشى الخور وجابوه من الخور ...
*** اها يامعاويه جكه جكتين منك وواحده من ود السر كرار وود ميرغني علي مصطفي ترتاح نفسياً وتقلب الصفحه تلقاها عملت ليك مامجموعه (9).. |
معاويه
عشان نتخارج من الموضوع الفوق دا مُحتاجين لعشره جكات حول الميدان ,, اها انا ساعدتك بواحده الباقي عليك...
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبدالكريم أحمد الامين)
|
الحبايب اهل الطراوه
عساكم طيبين
لينا منكم مده
عندى ملاحظه مالقى ليها تفسيروقلته اشرككم معاى
فيما مضى من الزمن كان هنالك اكثر من محل لبيع الفول (المصلح) او المدنكل فى بحرى واذكر منها على سبيل الحصر لا المثال :
فى الزمن البعيد _ زمن ناس ود السر وطارق ميرغنى وبقيه العقد الفريد_كيسو وماانسى طعم السنتدوتشات بتاعتو ماحييت
فى شارع الخور بالختميه شمال نادى الختميه كان فى واحد ايضا عندو فولا كاربه بس اسمو رايح على.
شرق مدرسة بحرى الحكوميه كان فى دكان ابو الهول والله دا فولو وفتتوا كانت بيجبنا نحنا شله من اولاد بحرى القرينا فى الخرطوم القديمه لى شلتنا السابقه القروا معانا فى الاميريه وبيدرسوا فى ذلك الوقت فى بحرى الحكوميه عشان نفطر معاهم بوش او فول ونرجع القديمه تانى .... فلك ان تحدث عن تلك الافوال.
الملاحظ فى السنين الاخيره مافى محل فول معتبر فى بحرى .
والادهى والامر عشان تاكل ليك فول مظبط بقيت الا تمشى امدرمان عشان تاكل الفول الكلاسيكى بتاع زمان _ فى الهجره (الواحه 1_الواحه 2) او موسى نفخوا او الجان رحمه الله او ابو صليب .
اما اذا داير فول محنكش فتتجه جنوبا للخرطوم لذيذ_ جاد_ واخرين ماانزل الله بهم من سلطان.
كدى افتونى !!! ناس بحرى اصبحوا لحوميين ؟؟؟ والاترفعوا عن حبيب الشعب؟؟ والا القصه شنو؟
عشان كان فى مشكله ,,,, الوحد يفكر ليهو فى محل فول فى بحرى ونكسب الودين لمة الناس الحلوين عشاق الونسه الظريفه ولمة القروش.
افتونا افادكم الله وبالمره نكون ناقشنا مشكله مزمنه الان فى ست الحبايب
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: طارق ميرغني)
|
| Quote: فى شارع الخور بالختميه شمال نادى الختميه كان فى واحد ايضا عندو فولا كاربه بس اسمو رايح على. |
ود التلب
المحل الفي شارع الخور بالختميه شرق نادى الامير هو محل العم عبداللطيف وفعلاً فولو كان مُعتبر..
| Quote: الملاحظ فى السنين الاخيره مافى محل فول معتبر فى بحرى . |
** في المزاد جنوب شرق مستشفي أحمد قاسم وجنوب منزل جنابو القومندان شرطه (م) الاديب الشاعر علي عبدالهادى (الدفعه 35) يوجد عمك علي حالياً هو الاشهر ومايميزه أن القدرة بتاعتو عباره عن صهريج او قل دبل كابينه ,, ولو جيت بعد الساعه 12 م إحتمال موية فول ماتلقاها ,, ونص شباب بحرى بتلقاهم مكسرين بهنالك...
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
| Quote: فى شارع الخور بالختميه شمال نادى الختميه كان فى واحد ايضا عندو فولا كاربه بس اسمو رايح على. |
إسمو "عبداللطيف"
وجنب مدرسة الختمية في "حسن كشك"
| Quote: الملاحظ فى السنين الاخيره مافى محل فول معتبر فى بحرى . |
حرام عليك يا التلب يا خوي: فول فريد.. على سن ورمح.. فول من الزمن الجميل... جوار مدرسة الأهلية
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: المشاركة التالية من عماد عثمان احمد – جدة
شخصيات من بحري (1)
نواصل الكتابة عن الشخصيات البارزة من بحري( ست الهوى والطراوة ) والتي لم يتم التطرق لها او الكتابة عنها في هذا البوست :-
1. المحامي كمال شـانتير صاحب البرنامج التلفزيوني ( مشكلات قانونية ) في الثمانينات يسكن الصافية .
2. الشاعر الغنائي محمد عبد القادر ابوشورة كتب العديد من الاغنيات الرائعة منها : عاطفة وحنان واحترت فيك للفنان محمد ميرغني واحلى الكلام لغة العيون للفنان صلاح بن البادية والاغنية الوطنية حدق العيون للفنان محمد وردي . . ويســـكن حلة خوجلي .
3. المدرب الكفء احمد عبد الله قام بتدريب نادي الزهرة بامدرمان في عصرها الذهبي وصعد بها من الدرجة الثانية الى الاولى في وصارت بعبعا مخيفا للهلال والمريخ ايام سيكا وقدورة واحمد البطل ثم تولى تدريب نادي حي العرب بورتسودان وكانت ابرز محطاته التدريبيه تدريبه لفريق الهلال العاصمي وصل به الى نهائي كاس افريقيا للأندية في العام 1987 م وتم ابعاده قبل المبارة النهائية ليحل محله الدكتور كمال شداد حتى ينسب الإنجاز له اذا فاز الهلال بالكاس ودرب بعد ذلك بعدد من دول الخليج . . وهو من المدربين المؤهلين اكاديميا حيث يحما ارفع شهادات التدريب من البرازيل وكل الفرق المذكورة اعلاه وضع بصماته التدريبيه فيها بصورة لاتخطئها العين ويسكن حي المزاد شــمال .
4. المرحوم احمد زين العابدين المحامي قيادي بالحزب الوطني الاتحادي ومن المقربين للراحل الشريف حسين الهندي كان يسكن حي الميرغنية .
5. المرحوم محمود حسيب من قيادي ومؤسسي الحزب القومي السوداني ( منطقة جبال النوبة ) مع زميله فيليب عباس غبوش وكان وزيرا في العهد المايوي ومن ابنائه زميل الدراسة حسيب كان يسكن حي الدناقلة جنوب ثم شمبات الاراضي .
6. الشاعر الغنائي عبد الرحمن مكاوي وله عد من الاغنيات الجميلة منها : عمر الهناء للبلابل واحلى منك وعشت شقى وشقى الايام للفنان حمد الريح والقدامنا للفنان النـور الجيلاني . . ويسكن الحاج يوسف .
7. الشاعر محمد محمد علي والذي يمت بصلة قرابة للشاعر الراحل ادريس جماع ويسكن حلفاية الملوك .
8. الملحن سليمان زين العابدين – عازف المندلين المخضرم بفرقة الفنان النور الجيلاني لحن العديد من الاغنيات الشجية من ضمنها اغنية ( خواطر فيل ) للنور الجيلاني ويسكن شمبات .
9. الشاعر الغنائي عبد الوهاب هلاوي معد لعدد كبير من برامج المنوعات التلفزيونية الناجحة . . وله من الاغنيات : اغلى من نفسي للكابلي وفراش القاش وتتبدل مع الايام وعشان خاطر عيون لزيدان ابراهيم وزعل الجميل لعمر احساس وحاجة امنة لمجموعة عقد الجلاد والكلام القالوا عنك ليوسف الموصلي ووداد للنور الجيلاني وامل موعود للهادي حامد وشجر العنب لحيدر بورتسودان وابتسامة حبيبي لمحمود عبد العزيز وياجارة لعماد احمد الطيب وغيرها ويسكن حلفاية الملوك .
10. الصاغ طيار الشهيد عبد القادر الكدرو يعتبر من اكفأ الطيارين في سلاح الطيران السوداني وأول الدفعة الخامسة من طلبة الكلية الحربية في العام 1955 م وتوفي في 3/3/1963 م . . سمي شارع المعونة باسمه وكان يسكن الكدرو .
11. السيد عدلي عبد المجيد شقيق الممثل المسرحي الراحل / حسن عبد المجيد كان وزيرا في العهد المايوي ومن ابنائه زميل الدراسة عماد والذي يرتبط بصلة مصاهرة مع الشاعر الرقيق الدكتور علي شبيكة ويسكن شمبات الاراضي .
12. من الإداريين بنادي المريخ العاصمي سابقا العقيد ( م ) صديق علي صالح ويسكن شمبات الاراضي والسر ادم سابل ويسكن الهجرة شمبات ومتوكل احمد علي ( كلبظة ) ويسكن الشعبية جنوب والمهندس فياض اسماعيل ويسكن الهجرة شمبات والكابتن عادل ابوجريشة وكان يسكن الشعبية جنوب وحاليا يسكن الصافية.
13. من الإداريين بنادي الهلال العاصمي سابقا المرحوم حسن عبد القادر وفي عهد رئاستة تم بناء وافتتاح استاد الهلال في العام 1968 م وهو نائب في اخر عهد ديمقراطي عن دائرة شمبات في العام 1986 م عن الحزب الاتحادي الديمقراطي وكان عميد النواب بالجمعية التاسيسية بحكم انه اكبر الاعضاء سنا . . وكان يسكن شمبات والسيد فاروق نور الدين ابن الزعيم الراحل محمد نور الدين وكان يسكن حي الشعبية شمال .
14. الاقتصادي محمد خير الزبير وزير المالية في عهد الانقاذ الاسبق يسكن شمبات وهو لاعب كرة مقتدر بنادي شمبات في اوائل السبعينات من القرن الماضي .
15. المذيعة الاذاعية والتلفزيونية المتمكنة اسراء زين العابدين والتي قدمت عدد من برامج المنوعات وتسكن حي المزاد .
16. المذيعة التلفزيونية منى محمود ( فرسان في الميدان سابقا ) وكانت تسكن الصافية شارع النقطة .
17. المذيعة الاذاعية والتلفزيونية احسان عبد المتعال خريجة جامعة القاهرة فرع سابقا كلية الاداب والمقيمة حاليا بامريكا وعضو نشط بموقع سودانيز اون لاين وكانت تسكن شمبات . . ويمكن ان ترفد وتثري بوست بحري طراوة بالكثير عن حي شمبات العريق ونحن في انتظار ذلك منها .
18. المذيع التلفزيوني محجوب بخيت مذيع نشرات الاخبار الرئيسية الممتاز و كان يسكن حي الوابورات .
19. الاعلامي والاذاعي المعروف حاتم الشيخ يسكن شمبات .
20. نجوم الكوميديا الشباب واللذين يمثلون القاسم المشترك في معظم الاعمال الدرامية في الفترة الحالية (محمد صالحين وعبد السلام جلود ومحمود عبد اللطيف كابو ) يسكنون الحاج يوسف .
21. الشاعر المرهف الدكتور علي شبيكة الذي شكل ثنائية فريدة مع ثنائي العاصمة وكتب لهم كلمات معظم الاغنيات وله من الاغنيات ايضا احلى غرام وزهرة الليلاك للفنان الراحل سيد خليفة ورجع الصدى وروابينا للفنان صلاح مصطفى وليه ياقلبي للفنان عبد العزيز المبارك وشفتك وابتهجت للفنان محمد ميرغني ويسكن شمبات الاراضي .
22. الممثلة والنجمة الموهوبة اخلاص نور الدين خريجة كلية الدراما بجامعة السودان والتي تعتبر افضل ممثلة شابة في الساحة حاليا تسكن الحاج يوسف ( المايقوما ) .
23. الزعيم الراحل الأب فيليب عباس غبوش رئيس الحزب القومي السوداني ذلك الرقم السياسي الذي لايمكن تجاوزه . . كان يسكن الحاج يوسف (الوحدة ) .
24. الفنان محمد الحسن قيقم يسكن حي الديوم .
25. الراحل الجنوبي كاربينو كوانين كان يسكن الصافية في فيلا منحت له بعد توقيع اتفاقية سلام الخرطوم .
26. الشيخ يحي عمر من اوائل القضاة الشرعيين في السودان وكان يسكن حلة خوجلي .
27. الاشقاء الفنان فتحي المك والملحن الشاب احمد المك ورسام الكاركتير سامي المك يسكنون بحلفاية الملوك وهم ابناء اخت الفنان الراحل المقيم حسن عطية .
28. المحامي حسن عوض رئيس الاتحاد المحلي لكرة القدم بالخرطوم سابقا ورئيس نادي الحلفاية الرياضي سابقا ويسكن حلفاية الملوك.
29. الشاعر الكبير محمد الحسن سالم حميد والذي كتب العديد من اغنيات الراحل المبدع مصطفى سيد احمد مثل عم عبد الرحيم ويامطر عز الحريق وغيرهما . . سكن في الديوم والشعبية والحاج يوسف .
30. الفنان الموسيقار وعبقري الغناء السوداني محمد الامين يسكن شمبات بجوار منزل الممثل والهرم المسرحي الراحل الفاضل سعيد منذ العام 1992 م .
31. المرحوم الفكي عبد الرحمن من رواد المسرح السوداني تخرج من بخت الرضا بالدويم ودرس في القاهرة بمعهد التمثيل وبعث لدراسة التربية ببريطانيا . . تقلد منصب مديرالمسرح القومي من العام 1967 م والى العام 1972 م وقام بجهد كبير في انشاء بنياته الاساسية من صالة وخشبة ومكاتب واول من بدا تطبيق ما يعرف بالموسم المسرحي واتاح فرص الدراسة والتدريب لكل العاملين في بعثات تخصصية. . وبعد ذلك عين مديرا للفرقة القومية للفنون الشعبية والاستعراضية وفرقة العرائس المسرحية حتى العام 1974 م وقام بضخ دماء جديدة واقنع وزارة المالية بخلق اربعين وظيفة بتعيين راقصين وراقصات من خريجي المدارس العليا وان تهتم الدولة بامر الفن الشعبي في مراحل التعليم المختلفة حتى يشب اطفالنا ولهم قربى فكرية بالفنون الشعبية ولازالت تلك الفرقة والى الان تقوم بتمثيلها المشرف للسودان في كثير من المحافل والمناسبات والمهرجانات الخارجية وله كذلك الفضل في إنشاء فرقة الاكروبات السودانية في تلك الفترة واصبح مديرا لها عند إنشائها وتولى بعد ذلك إدارة مركز الدراسات الفلكلورية ونفذ الكثير من المشاريع الثقافية وطاف كل انحاء السودان واقام العديد من المعارض وله الفضل في تعيين الباحث الراحل الطيب محمد الطيب بمركز الدراسات الفلكلورية وذلك للإستفادة من امكانياته كرجل موسوعة في هذا المجال واصدر مجلة وازا الفلكلورية. . قام بتقديم عدد من البرامج الاذاعية منها ( ركن الاطفال ) والذي كان يعرف فيه باسم عمكم مختار . . طلب ان ينقل الى مصلحة السجون لان له مشروع يريد ان ينفذه وهو ( السايكو – دراما ) وهو تجريب الدراما مع المساجين وعن طريق هذا العمل المسرحي تستطيع ان تنفذ الى نفسياتهم وقد تصل الى معرفة مايعينهم ليكونوا اسوياء . . وكان يسكن الصافية .
32. المحامي عمر عبد العاطي كان وزيرا للعدل والنائب العام في حكومة الانتفاضة 1985 م وكان يسكن حي الوابورات .
33. العميد شرطة ( م ) والمدرب سمير دهب تولى رئاسة لجنة التدريب المركزية سابقا وهو لاعب كرة مميز بنادي التحرير سابقا ويسكن حلة حمد .
34. المرحوم سعد محمد صالح ( دبيبة ) لعب للتحرير البحراوي وللمريخ العاصمي في الستينات وكان افضل من يراقب الامير صديق منزول قي مباريات المريخ والهلال ويمتاز بلعبه العنيف وبحرارة قلبه وروحه القتالية . . ويعتبر من افضل المدربين في الساحة الرياضية في الثمانينات حيث احرز مع العباسية ثالث كاس السودان في العام 1986 م وفاز مع المريخ العاصمي بكاس دبي الذهبي قي العام 1987 م وتولى تدريب الفريق القومي السوداني بعد ذلك وحقق معه نتائج مشرفة وكان يسكن شمبات الاراضي ويمت بصلة قرابة مع الدكتور نواري عضو موقع سودانيز اون لاين والكاتب الممتاز والمقل جدا ببوست بحري طراوة .
35. رجل الاعمال والصحفي والملحن وعضو المكتب السياسي بالحزب الاتحادي الديمقراطي ورئيس نادي الهلال العاصمي حاليا صلاح ادريس ويسكن كافوري .
36. رجل الاعمال طه الروبي يسكن كافوري .
37. الدكتور والممثل المسرحي عبد الحكيم الطاهر ( كابتن كابو ) على ما اعتقد كان يسكن حي الختمية .
38. عازف العود المتمكن عوض احمودي والذي يسجل حضورا متواصلا في كل الأجهزة الاعلامية المرئية والمسموعة وذلك لما يمتلكه من امكانيات وقدرات عالية في العزف على الة العود من مواليد مدينة الهلالية ودرس بمعهد النور ببحري يسكن الشعبية شمال منذ اوائل التسعينات .
39. من رجالات انقلاب الانقاذ العميد عثمان احمد حسن رئيس اللجنة السياسية واول من تقدم باستقالته من مجلس قيادة الانقلاب بعد شهور من قيام الانقلاب مع زميله العميد فيصل ابوصالح ويسكن الخوجلاب . .والعميد سليمان محمد سليمان رئيس اللجنة الاعلامية ووزير الثقافة والاعلام وحاكم الاقليم الاوسط فيما بعد ويسكن حلفاية الملوك . . والعميد ابراهيم نايل ايدام رئيس اللجنة الامنية ووزير الشباب والرياضة وتولى رئاسة نادي الحاج يوسف سابقا ويسكن الحاج يوسف .. بالاضافة الى العقيد يوسف عبد الفتاح نائب الوالي لولاية الخرطوم ومارس رياضة كرة السلة في نادي الاتحاد البحراوي .. ويسكن حلة حمد .
40. الحكم الدولي السابق عبد الرحيم حاج عمر ويسكن الشعبية شمال.
41. المدرب القدير كمال حسب الله لاعب ومدرب التحرير السابق . . ترك بصمات كبيرة ابان تدريبه للفرق السنية بنادي النصر السعودي وتخرج على يديه افضل لاعبي المنتخب االسعودي على مدى تاريخه منهم محيسن الجمعان وفهد الهريفي ويسكن المزاد.
42. جمعة اسماعيل ادم ابراهيم عازف الساكس المقتدر ومؤسس فرقة جاز الافارقة مع زملائه ( فاروق عبد الله وعبده دوكة والنعمان وعباس دراج وانضم اليهم فيما بعد الفنان كمال كيلا ) والتي كانت تنافس فرقة جاز شرحبيل احمد وجاز الديوم ( العم قسم الله ) واضواء بحري ( بدر الدين عوض ) وجاز العقـــــــــارب ( عامر ساكس ) وشارك مع فنانة افريقيا الشهيرة مريم ماكيبا عند زيارتها للسودان الاولى في العام 1968 م حيث اتت بدون فرقتها الموسيقية وشارك بالعزف ايضا مع كبار الفنانين امثال ابراهيم عوض والجابري وسيد خليفة وخوجلي عثمان وغيرهم وسافر الى القاهرة في العام 1991 م برفقة الفنان الراحل مصطفى سيد احمد ومنذ تلك الفترة اثر البقاء بالقاهرة . . وكان يسكن حي الدناقلة جنوب بالقرب من مدارس الشعب ورحلت اسرته الى الحاج يوسف .
43. الشاعر والمؤلف والمخرج التلفزيوني والمسرحي الراحل مجدي النور خريج كلية الموسيقى و الدارما بجامعة السودان والذي توفي قبل اعوام قليلة في حادث سيارة كان يعول عليه الكثير وذلك لموهبته وقدراته الكبيرة في جميع المجالات المذكورة اعلاه ولكن كانت يد المنون هي الاسرع في ذلك وتوفى مبكيا عليه وهو في ريعان شبابه وله مكتبة ضخمة في ارشيف مكتبات موقع سودانيز اون لاين وذلك لمن اراد معرفة الكثير عنه وكان يسكن الحاج يوسف .
44. الملحن الشاب ناصر عبد العزيز قام بتلحين العديد من الاغنيات الرائعة لابناء جيله من الفنانين وبالاخص الفنان محمود عبد العزيز مثل اغنيات شايل جراح وعدت سنة وفرايحية وحب غيرو وبحسك والله يكون في عونك وغيرها . . وتابعوا هذا الشاب جيدا وسيكون خير خليفة لابن بحري الملحن الكبير بشير عباس ويسكن المزاد جنوب بجوار مدرسة الحرية الأبتدائية للبنين.
45. الصحفي الرياضي النعمان حسن من اوائل اللذين اصدروا صحيفة رياضية ( نجوم وكواكب ) وله عمود رياضي ممتاز باسم ( شرارات ) ويكتب هذا العمود تحت مسمى ابوسامرين . . وقام بتاليف المسرحية الرائعة ( نقابة المنتحرين ) في العام 1985 م والتي حققت نجاحا كبيرا والتى الى الان يتم إعادة بعض الاجزاء منها في التلفزيون في برنامج من الامس . . كان يسكن بالميرغنية وجار للوزير السابق المرحوم الشريف الخاتم ومن ابنائه هيثم . . والان رئيس تحرير صحيفة المشاهد الرياضية .
47 – الصحفي الرياضي رمضان احمد السيد صاحب ورئيس تحرير جريدة قوون الرياضية والامين العام لجمعية الصحفيين الرياضيين ويسكن الحاج يوسف ( الردمية ) .
48 – الصحفي الرياضي صلاح دهب رئيس تحرير القسم الرياضي لصحيفة اخبار اليوم وله عمود يكتبه باسم ( تلكس ) وهو من شلالية حلة حمد ويسكن حلفاية الملوك .
49 – المذيعة التلفزيونية والنجمة اللامعة ندى سيد كامل ابنة المحامي المشهور سيد كامل تسكن بحري بالقرب من شارع السيد علي عبد الرحمن وشقيقها المذيع عمر الفاروق سيد كامل كان مذيعا بقناة النيل الازرق قبل ان يسافر الى الولايات المتحدة الامريكية .
50- العميد / معاش عبد العزيز خالد عثمان العمدة قائد قوات التحالف السودانية السابق المعارض لانقلاب الانقاذ ويسكن حلفاية الملوك .
الرحمة والمغفرة للموتى منهم والامنيات للأحياء منهم بطول العمر ومزيد من العطاء والابداع في مجالات العمل المختلفة وكثير من تلك الشخصيات المذكورة اعلاه سنعود للكتابة عنها بصورة موسعة . .
|
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبد الرازق سعيد)
|
[B]
أعزائي
ما أعرفه عن الاخ ابراهيم عيونو هو انه نحيف الجسم اسمراني اللون و من سكان حلة الدناقلة جنوب ومنزلهم كان ناصية بالقرب من جامع حلة الدناقلة وشقيقه عثمان من أحرف لاعبي الكرة في زمن مضي .
لا أدري ان كان هو المقصود ولكن من المتأكد منه ان الاسم ( ابراهيم عيونو ) هو لنفس الشخص الذي تحدثت عنه أعلاه.
مع التحييييية للجميع
| |
|
|
|
|
|
|
|
| |
عبدالكريم أحمد الامين
معاوية محمد الحسن
Ali Sirelkhatim
Kamal Karrar
محمد عبدالمنعم التلب
عمر عثمان
طارق أحمد خالد
بخاري عثمان الامين
حسن طه محمد
عبدالله شمس الدين مصطفى
فيس بوك
تويتر
انستقرام
يوتيوب
بنتيريست