صحوا كلية موسيقانا على ابداع أل شداد رسل فن الموسيقى السودانية الجدد

Quote: كتابه الاخ شقلينى فى نقد المدرسه البلوريه ثم المعارض التشكيليه الخاصه بى :   اوضح ان المدرسه البلوريه (1976) هى حراك وتنظير قُصد به محاولة ملامسة العمل الفنى فى جوهره (الابداع) وهى أساسيات أوليه لمشروع ثقافى فنى يلخص فى كلمتين الشفافيه و الحريه .           حين صدر البيان الخاص بالمدرسه أحدث نشاط (معقول) فى الساحه الثقافيه بعدها (طُمر) واصبح تاريخ شأنه شأن معظم الحراك الثقافى فى بلادنا وشأنه ايضا شأن المسار المعتاد لمدارس الفن التشكيلى مثل المدرسه التكعيبيه ,والمدرسه الوحشيه,والمدرسه الداديه .. والقائمه تطول وحاليا ربما لاتجدها على المستوى النظرى إلا فى بعض كراسات طلبه الدراسات فى قليل من الجامعات (بحوث). ارجوا ان نكون متفقين على البديهيات (او هذا ما اعتقده انا) وفى هذا اقول ان اى مشروع ثقافى فنى قابل للنقد والتصحيح بل واحيانا للدحض التام اذا فقد المنطق والمعقوليه والاصاله ولايوجد عمل ثقافى او فنى كامل(الكمال لله وحده) كما ان البيان المشار إليه بالطبع قابل للنقد اذ انه ليس بنص مقدس.        ماكتبه الأخ شقلينى فى نقد المدرسه البلوريه ثم المعرض التشكيلى الخاص بى انا فى الحقيقه لا آخذ ماكتبه مأخذ الجد على الأطلاق ,ماكتبه على كل حال ضرب من ضروب الفكاهه ومايزيد الفكاهه تظاهره   بالجديه والمعرفه والتعالم.        والشقلينى يظن انه بمجرد القائه (اكلاشيهات) جوفاء ومفرغه ويمكن الصاقها بأى مشروع ثقافى أو أى حائط حتى لو كان واجهه (جمعية سراب التعاونيه) ,كاف لالغاء المشاريع الثقافيه والقضاء عليها وأشانتها. هو فى نقده لايناقش الافكار أو المقولات او الحجه بالحجه هو فقط يطلق الاحكام من موقع الاملاء ويكون بذلك قد قال! وماعلينا سوى التسليم و الخضوع. وهذا مايجعل الامر فكاهه بل واسراف فى الفكاهه.           فلننظر لهذا النموذج الذى كتبه الشقلينى (وجاءت الفتوحات الرقميه وقضت على الفهم المبسط الذى نشره بيان الكرستاليين ) وطلما اعطى نفسه الحق ان يطلق هذه الاحكام دون تفسير او شرح يكون الرد المناسب (متين جات ياشقلينى الفتوحات دى؟ والساعه كم؟وماكلمتونا ليه؟والفتوحات دى شنو؟ وسويتها انت ولاسواها زول تانى وقالك عليها؟ والسماها فتوحات ده منو؟ ماعلينا! المهم الجو كم؟ والفى الحمير كم؟ و الفى الحصين كم؟ والسائقين الغنم منو؟  و ال بيقودها منو؟ أوعه يكونوا ترك ولا ناس بيشبهوا الترك!لكن انتوا مابتقصروا اكيد بتكونوا سقيتوهم المويه وعشيتوهم)                             ياشقلينى يا ولدى انت فاكر الناس بتشترى نوع (الدليب) ده تانى ,شى فتوحات رقميه وشى فتوحات فلسفيه و.... ! ننظر الى النموذج مره اخرى : (وجاءت الفتوحات الرقميه وقضت على الفهم المبسط الذى نشره البيان الكريستالى)   وبعدين ياشقلينى انت حكمت انها (فهم مبسط) السبب شنو تاعب نفسك يا ولدى و جايب ليها الفتوحات الرقميه دى ,مش كان (مطرق) كدى ساكت ولا (نهره) كفايه عشان تقضى عليها.   أيضا فى وصفك فى بيان البلوريه قلت من موقع العارف طبعا.. وطبعا انت ما بتقدم اى دليل واحنا سكوت   انت قلت عن البيان (مجموعه افكار مقتضبه ورؤى محدوده فى التصور عن العالم) شوف المسأله وصلت وين فى الادعاء (رؤى محدوده فى التصور عن العالم) ,لم تحدد ماهى الرؤى الغير محدوده او الواسعه عن العالم التى تمتلكها انت حتى نستفيد! ,أنت تتكلم من موقع عالم بالقديم و الجديد والجاى فى الفيزياء والكمياء والفلك وكافه العلوم وانا اوعدك لوكنت قدر كلامك ده حاتصل بوكاله ناسا للفضاء واقوليهم انتوا (تلسكوب (هابل) ده الباحث فى المجرات لابد من ايقافه ويسلط من جديد على رأس الشقلينى ليكتشفوا كل العلوم العاوزينها ,وطبعا إنت حتسمح لهابل يسحب و يجر ويعمل داون لود .. البشريه محتاجه للكلام ده ياخى!! ومرات الشقلينى بعمل فيها شويه مسرح شوف العباره اللى رماها فى البدايه وهى الاشبه بدوى رفع الستار (الافكار تمسك برقاب بعضها البعض) ماوريتنا ما هى الافكار الماسكه برقاب بعض عشان نعمل (الحجازه) ونفكهم! وفى متن المقال انت لم تناقش هذه العباره ونحن ماعلينا سوى ان الرضوخ ولكن اسمح لنا ان نشاطرك السعاده ونكتب لك بعض من هذه العبارات التى تحبها مارأيك فى (الافكار تمسك بمناخير بعضها البعض) ,(الافكار تمسك بحلاقيم بعضها البعض),(الافكار تشد شعر بعضها البعض),(الافكار تمسك بجلاليب بعضها البعض)   كلامك عن التصوف كان الاسواء انت قلت ان ( البيان الكرستالى يطوف بالتصوف بفهم مبتسر) , من يقول هذا الكلام يفترض أن يكون صاحب فهم ومعرفه بالتصوف ولكن للاسف برغم تظاهرك فى نقدك للبلوريه بالغيره على التصوف الا إنك حين تتحدث عن التصوف يكون حديثك إشانه للتصوف وتبخيس يدعو للعجب بالطبع لا أحد يقول ان اليوجاء و الباراسايكولجى والتنويم الايحائى من التصوف كما تقول انت (تنويم إيحائى! تنويم مغنطيسى ياشقلينى هبنوزز عديل كدا ,يعنى الحيران منومين فى المسيد تنويم مغنطيسى والشيخ شغال يردم فيهم كدا ! ,مدد ياشيخ مغنطيس ,مدد يا شيخ مغنطيس) ( الشيخ ابو مغنطيس ده قاعد وين؟! .. عجيبه) هنا أنت تستعمل التصوف للاشانه للبلوريه ثم بعدها تشين التصوف(أهو ده الشغل)   أحيانا تتمادى فلننظر لهذا العباره (وكيف نصدق ان شراء ألواح من الثلج ورصها يصلح لأن يكون عملا مبدعا) الاجابه من الذى طلب منك ان تصدق؟ من الذى طلب منك ان تصدق ياشقلينى؟ المقام هنا ليس مقام تصديق بل مقام تذوق اما يعجبك العمل الفنى او لا يعجبك وانت حر ,اما ان تحس وبالابداع اولا تحس به فا أنت حر .          أيضا حديثك عن معرض الثلج فقد كتبت( انه بكل المقاييس عمل فطير). ماذا تعنى بكل المقاييس ! يعنى انت ما بتستعمل مقاييس شويه(كل المقاييس) على كل (مقياس ريختر) للزلازل هو ايضا مقياس فهل يدخل ضمن كل المقاييس بتاعتك وايه موضوع الفطير ده؟ اهى دى احسن كلمه قولتها علشان بتفتح الباب لتلك المجموعه الشهيه من الفطائر ,فطيره بالسكر ,فطيره بالعسل ,وفطيره بالشمام..   كلمه اخيره:         فيه ناس بتعمل بجهد ومعاناه من اجل التنوير ووضع العتبات للانسان السودانى لرقى حياة فكره ,وحياة شعوروه ,بالثقافه والعقلانيه والفكر والادب بانواعه,والرياضات والفنون بانواعها المختلفه من موسيقى وسينما و تشكيل ومسرح وغناء ...الخ ,وانت ياشقلينى جهز فتوحاتك الجامده دى وأترس عليهم وماتخلى (صفقه شجره) .             وفى الختام دعنى أسألك بعض الاسئله وأنت مدجج ومتمترس بالفتوحات الرقميه والفتوحات الفلسفيه وبالطبع لاينقصك سوى الفتوحات المكيه .                .اسئله فرضيه(الالباى) 1.هل شاهدت معرض الثلج فعلا؟ ولاسمع كده ساكت 2.هل شاهدت معرض النيل الازرق فعلا؟ولاسمع كده ساكت                         .أسئله فرضيه التخصص فى الفن التشكيلى   1.هل تجيد قراءه النحت فعلا؟ولا أجتهادات كده ساكت 2.هل انت فعلا تجيد قراءه اللون؟ولا أجتهادات كده ساكت 3.هل أنت تجيد قراءة الرسم؟ولا أجتهادات كده ساكت    متى قراءه هذا البيان لاول مره؟  مع تقديري واحترامي محمد حامد شداد