أسماء بت الصديق ود الطيب تصدقي لساني ما بعرف يقول ( سوما) هو نحنا برا طيبة ناس البطانة دي المغتس حجرنا شنو ديل وليداتي وبنياتي الببوبو وبمومو ماني أنا دحين أسألي رامي وآية ومؤيد عن رأيهم في السودان وتعالي صادة وريني قالوا شنوا ؟ وعلى قول الشباب ما تزعلي من كلامهم
البنية الفنجرية حبابك ويا زولة فى اسئلة كتيرةبجننونا بيها العيال مرة كنا فى احتفال بمناسبة اكتوبر الكبار قعدوا يبكوا (نظام نوستاليجا ) والصغار بدت عندهم الاسئلة جونى البنيات من دورعزة بتى ـ انتى يا خالتو الناس ديل ببكوا ليه ؟ قامت عزةقالت لى ـ انتى يا ماما اكتوبر دا مش المات فيهوجدو الشفيع زوج حبوبة فاطمةخالتكم ؟ دخلت فى ضفورى وقلت ليهم ـ باكر (تصادف انه السبت ) باكر كلويجمع عندنا محاضرة عن تاريخ السودان الحديث لكن ماجاتنى غير واحدةوعزة معاها بديت احكى عن تاريخ السودان الحديث من الاستقلال ولغاية الان واسئلتهم بقت محرجة لكن الاكثر حرجا طفلة كانت عايشة فى امريكا قامت امها لقت شغل كويس فى الخليج تصادف انى كنت فى الدوحةالعام 2005 اتصلت امها وحكت لى انه بتها ما دايرة حتى تفتح شنطها وبتبكى عايزةترجع امريكا وقالت ليها بالفم المليان ـ mom ,Iwanna go home جنس ديل تحكى ليهم يا تو حكاية ؟
الأستاذ / الطيب شيقوق ربنا يحفظ الجميع إن شاء الله وعن عجن الألفاظ كما تفضلت روت لنا إحدى الأخوات أنها قالت لبنتها يلا ماشين النادي السوداني عشان اليوم عيد الإستغلال ( الإستقلال) فما كان من البنية إلا أن أبدت الدهشة والإستغراب وردت إنتو ياماما غريبين حتى الإستغلال بتعملوا ليهو عيد ؟؟؟!!! نحن عاوزين نشوف لينا حل مع الجيل دا ما نكون ظالمين . لك الشكر أجزله .
البنية السكرية الكملتي سكرنا حبابك آلاف كلامك دا وقع لي فوق جرح كبييير بالحيل تصدفي صفاء بتي مصرة علي إنو بيتنا ياهو دا الفي مسقط وسلطنة عمان ياها بلدنا رغم إنها مولودة في السودان أنا ياسلمى دايراهم يجوا يكتبوا لي هنا يفهموني الحاصل شنو ؟
حباب الكريم ود الكرام حاتم ود هاشم ياحليلنا الشوية دي بس ؟ والله ياخوي أحترنا في أمرنا مع هذا الجيل والإنتماء للوطن ... هل قمنا بخطأ شحنهم الزائد عن السودان؟ ثم ذهبوا وهم يحملون فكرة أن السودان مثالي وناسو ملايكة ؟؟ ففوجئوا بل صدموا ؟؟؟ ماقولك ...؟ مارأيك...؟ بما تنصح ..؟؟
لك التحية أخي حاتم هاشم .
07-06-2008, 04:42 AM
abubakr abubakr
تاريخ التسجيل: 04-22-2002
مجموع المشاركات: 16044
يا صحبي الجميل .. نحكي الحقيقة فنسلنا اليوم يري عوالم كثيرة من خلال منافذ كثيرة من فضائيات واسفير وسفر وكتب .. لا يكفي ان نحكي لهم عن ماضي عشناه نحن وفق مقاييس زماننا وهو مخالف تماما لواقع يرونه اليوم ... لا يجب ان نضخم من ذواتنا فهم يروننا في احجامنا الحقيقية ....اليوم وغد هي عوالمهم يشكلونها وفق رؤي تناسب طموحاتهم . استدرار عواطفهم ليحبو السودان لن يجعلهم يحبوه ...انهم سيحبوه وفق رؤاهم وايمانا بحقهم في ارضهم وليس لبطولات لاجدادهم في الماضي ...
07-06-2008, 05:16 AM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
Quote: ....اليوم وغد هي عوالمهم يشكلونها وفق رؤي تناسب طموحاتهم
للاسف من في الداخل تشكله سياسات ومناهج تربوية تخدم ايدواوجية بعينها ومن في الخارج تشكله القنوات الفضائية وغيرها من اداوت التواصل العصرية ومن ثم يكون الحديث عن وجود عوالم مشتركة امرا عصيا .
Quote: للاسف من في الداخل تشكله سياسات ومناهج تربوية تخدم ايدواوجية بعينها ومن في الخارج تشكله القنوات الفضائية وغيرها من اداوت التواصل العصرية ومن ثم يكون الحديث عن وجود عوالم مشتركة امرا عصيا .
الأستاذ/ الطيب شيقوق لك أطيب تحية أرى أنك تجحف هنا فى حق من في الخارج وهذا سبب تأزمهم وهو أن من بالداخل لايفهمونهم الفهم الصحيح وبما أنك محايد حيث أنه ليس لك عائلة في الخارج ولكنك عشت في الخارج مع عوائل لمست همومهم عن قرب ولكن رغم ذلك أراك تميل لكفة مائلة وتجزم بإستعصاء الحل الوسط .
نحكي الحقيقة فنسلنا اليوم يري عوالم كثيرة من خلال منافذ كثيرة من فضائيات واسفير وسفر وكتب .. لا يكفي ان نحكي لهم عن ماضي عشناه نحن وفق مقاييس زماننا وهو مخالف تماما لواقع يرونه اليوم ... لا يجب ان نضخم من ذواتنا فهم يروننا في احجامنا الحقيقية .... اليوم وغد هي عوالمهم يشكلونها وفق رؤي تناسب طموحاتهم . استدرار عواطفهم ليحبو السودان لن يجعلهم يحبوه ... انهم سيحبوه وفق رؤاهم وايمانا بحقهم في ارضهم وليس لبطولات لاجدادهم في الماضي ...
الباشمهندس / أبوبكر سيد أحمد لك تحية الإجلال والتقدير نحن في أمس الحاجة لمثل هذه الحقائق الجميع هنا بقولوا ليك يسلم فهمك وقلمك
تقبل الشكر والسلام .
07-06-2008, 06:57 PM
سلمى الشيخ سلامة سلمى الشيخ سلامة
تاريخ التسجيل: 12-14-2003
مجموع المشاركات: 10754
Quote: يا صحبي الجميل .. نحكي الحقيقة فنسلنا اليوم يري عوالم كثيرة من خلال منافذ كثيرة من فضائيات واسفير وسفر وكتب .. لا يكفي ان نحكي لهم عن ماضي عشناه نحن وفق مقاييس زماننا وهو مخالف تماما لواقع يرونه اليوم ... لا يجب ان نضخم من ذواتنا فهم يروننا في احجامنا الحقيقية ....اليوم وغد هي عوالمهم يشكلونها وفق رؤي تناسب طموحاتهم . استدرار عواطفهم ليحبو السودان لن يجعلهم يحبوه ...انهم سيحبوه وفق رؤاهم وايمانا بحقهم في ارضهم وليس لبطولات لاجدادهم في الماضي ...
يا صحبى الجميل احكى ليك قصة حدثت فى هذى المدينة التى اعيش فيها جاءت فتاة امريكية بيضاء من غير سوء وطلبت من احدى النساء السودانيات التى تدير مطعما هنا انها تود ان تجرى حوارا مع السودانيين وبعض الامريكان وهى طالبة فى المرحلة الثانوية بعد لاحظ كثافة وجود قضية دارفور على شاشات التلفزيون وهى الامر الذى حدا بهذه الطالبة ان تفعل ما فعلت حيث طلبت من الحاضرين ان تجمع منهم تبرعا تقوم بارساله الى اهل ادرفور كنت اتمنى ان تكون الدعوة التى قامت بها هذه الطالبة وهى لم تتجاوز السادسة عشر من عمرها ان تكون من احد ابناء او بنات السودان والحقيقة انهم قاموا بعمل اعده مشرفا(حيث ارسلوا عبر الجالية بعض الملابس والهدايا ) لكن قياسا بما قامت به هذه الطالبة وبدافع ذاتى اجد اننا متخلفين عن طرح قضايانا بين اطفالنا او حتى مناقشتهم فيها وحولها الشاهد انهم يكونون فكرتهم بعد ان يزوروه لكنهم يزورنوه وهم غرباء عنه ويحسون ضيقا من تعاطى الناس معهم والعزلة التى يجدون انفسهم فيها بل التى يحسونها كلها امور علينا كاباء وامهات ان نعيرها بعض اهتمامنا لكم مودتى
07-06-2008, 05:37 AM
abubakr abubakr
تاريخ التسجيل: 04-22-2002
مجموع المشاركات: 16044
Quote: للاسف من في الداخل تشكله سياسات ومناهج تربوية تخدم ايدواوجية بعينها ومن في الخارج تشكله القنوات الفضائية وغيرها من اداوت التواصل العصرية ومن ثم يكون الحديث عن وجود عوالم مشتركة امرا عصيا .
ليس بالضرورة فليس كل من في الداخل رهين بان يسمع صوتا واحدا لايدلوجية بذاتها وحتي ولو سمع فامر المقارنة وارد بين الذي يقال مفروضا عليه وبين ما يفسره هو نفسه بعقله وبين الذي يراه عند غيره من اقرانه القادميين من الخارج والامر كذلك بالنسبة للقادم من الخارج ...محاولة ان نلغي فكر هذه الاجيال وطموحاتهم الشخصية بحكم اننا الاكبر والاعلم وانا قرايتنا ام دق وتغليف العاطفة الابويةمثلا بقسوة زائدة واصدار فرمانات بالمحظور والمسموح وفق رؤاهم لم تجعل من السودان الا الذي يراه نسلنا اليوم ...السودان ليس جزيرة معزولة عن العالم وحتي الدكتاتوريات التي حاولت ان تجعل من بلادها جزر معزولة كبورما تمكنت فيها الاجيال الصغيرة بما تيسر من تكنلوجيا في كسر الحاجز وتوصيل صور حية بما يحدث في الداخل الي العالم الخارجي ... سيخلقون عوالمهم مثلهم مثل غيرهم في كل الدنيا .
07-06-2008, 06:15 AM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
Quote: سيخلقون عوالمهم مثلهم مثل غيرهم في كل الدنيا .
المؤسف حقا حتى المتواجدون بالداخل فقد تباعدت المسافات بين مفاهيمهم. فشباب الارياف والبوادى بحكم استشراء الامية اما بينهم انفسهم لكلفة التعليم او بين من قاموا على تربيتهم فهولاء يسهل التاثير عليهم من خلال الاعلام الضلالي لا سيما وان اعلامهم المحلي ممثلا في مجالس قياداتهم التاريخية والادارية ( نظار زعماء عشائر ادارات المحليات ) قد صار متناغما مع الاعلام المركزى الموجه .
اخي النوبي اخشى ان تكون قد تباعدت المسافات بينك والوطن فما عادت الزعامات العشائرية ولا القيادات الادارية التي لها تاثيرها على رعاياها ، ما عادت كما كانت عليه فجميعها اخترقت وجميعها استقطبت لتؤثر على من حولها وينسحب ذلك حتى على الزعامات الدينية.
أوعى ليل الغربة ينسيك ريحة الطين في جروفنا والتميرات البهبن ديمة راقصات في جروفنا
اما في المدن فتغيرت يا حبيبي جميع معالم المجتمع المدنى للدرجة التي جعلت الصادق المهدى يمد يده للانقاذ مطالبا بالوفاق معهم وربما التحالف معهم في قائمة انتخابية واحدة .
صحيح يا صديقي لاول مرة نسمع الاصوات عالية من شباب دارفور وهي تقول لا لحزب الامة ولا للصادق المهدى وهذه مؤشرات ايجابية تنبئ ببروز كيانات جديدة قادرة على تشكيل معالم لسودان جديد.
Quote: المؤسف حقا حتى المتواجدون بالداخل فقد تباعدت المسافات بين مفاهيمهم. فشباب الارياف والبوادى بحكم استشراء الامية اما بينهم انفسهم لكلفة التعليم او بين من قاموا على تربيتهم فهولاء يسهل التاثير عليهم من خلال الاعلام الضلالي لا سيما وان اعلامهم المحلي ممثلا في مجالس قياداتهم التاريخية والادارية ( نظار زعماء عشائر ادارات المحليات ) قد صار متناغما مع الاعلام المركزى الموجه .
لا أوافقك الرأي تماما وها أنت تنسف ذلك بنفسك بإقرارك بسماع أصوات شباب دارفور تلك زعامات مضت في طريقها أما نحن بصدد جيل اليوم فلذات أكبادنا
Quote: ...محاولة ان نلغي فكر هذه الاجيال وطموحاتهم الشخصية بحكم اننا الاكبر والاعلم وانا قرايتنا ام دق وتغليف العاطفة الابويةمثلا بقسوة زائدة واصدار فرمانات بالمحظور والمسموح وفق رؤاهم لم تجعل من السودان الا الذي يراه نسلنا اليوم ...ا
عين الحفيفة ... وإن لم نفتح لها صدورنا وعقولنا فإنهم :
Quote: سيخلقون عوالمهم مثلهم مثل غيرهم في كل الدنيا .
07-06-2008, 06:30 AM
abubakr abubakr
تاريخ التسجيل: 04-22-2002
مجموع المشاركات: 16044
يالعرريب ودشيقوق .. القياس بمنظورنا نحن الاجيال الاكبر والتي عاشت زمانا مختلفا لا يعطي صورة حقيقية لما تريده الاجيال الصغيرة باختلاف مواقعها واماكنهم ... مهمتمنا الاساسية بصورة عامة فشلنا فيها ... مهمتنا هي النهوض بالوطن خلال العقود الخمس الماضيات وليس دحرجته الي اسفل السافليين بحيث جعلنا من السودان في كل التقاريير العالمية المحايدة احد اكثر الدول فشلا وفساداهل السودان دولة فاسدة وفاشلة ومنهارة؟
07-06-2008, 06:41 AM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
Quote: مهمتنا هي النهوض بالوطن خلال العقود الخمس الماضيات
صحيح هى حقب زمنية اضعناها ، فالصيف ضيعنا اللبن . امام اجيالنا القادمة معطيات اسهمنا نحن في تشكيلها وستبقى تركة تثقل كاهل هذه الاجيال لدى تفكيرهم في صناعة معالم لسودان جديد.
معزتي
07-06-2008, 09:26 AM
Mohamed Abdelgaleel Mohamed Abdelgaleel
تاريخ التسجيل: 07-05-2005
مجموع المشاركات: 10415
السؤال عميق ومهم والاجابة عليه بصدق تساهم في تكوين الوحدة الوطنية من غيرعنف وهو دور ساهم فيه آباؤك الكرام يا استاذة سمية وهو ما يفرض عليك واجبا لا بد من القيام به تجاه هذا الوطن الغالي الذي يقف قاب قوسين او ادني من التشرزم
Quote: السؤال عميق ومهم والاجابة عليه بصدق تساهم في تكوين الوحدة الوطنية من غيرعنف وهو دور ساهم فيه آباؤك الكرام يا استاذة سمية وهو ما يفرض عليك واجبا لا بد من القيام به تجاه هذا الوطن الغالي الذي يقف قاب قوسين او ادني من التشرزم
أستاذالعارفين/الحبر عبدالوهاب الكباشي حوله ندندن ... وبمثل عمق هذا الفهم أود مشاركتكم الرأي وها أنت توجز ما تفاكرت فيه مع أناس يحزبهم الأمر في قولك : ( بصدق ... ومن غير عنف) وهنا مربط الفرس .. لك التحية وأنت تلقى علينا قولا ثقيلا ، التشرذم أضحى كظلمات بعضها فوق بعض حتى داخل الجامعة الواحدة وداخل الكلية الواحدة هناك فئات الشهادة العربية والشهادة السودانية مثلاً ...
Quote: أنتظرناك وبدينا نخمن الكلام البزعل .. لكين في تخمين تحت التخمير.
هات كل ما عندك يامحمد ... و ولع نار وجيب كواي وسو لطعي العقارب من كدي ومن جاي
ليه بنقصوا نسبة الشهادة العربية؟ ليه بندفع رسوم الجامعة أعلى من الشهادة السودانية حتى لو تساوت النسب؟ هو نحنا أجانب ؟ ولاأسياد بلد ؟ ليه بعاملونا كده...؟ وأسئلة دايرين ليها إجابات والكلام البزعل : ( نحنا ما دايرنكم ترجعوا السودان )
Quote: امام اجيالنا القادمة معطيات اسهمنا نحن في تشكيلها وستبقى تركة تثقل كاهل هذه الاجيال لدى تفكيرهم في صناعة معالم لسودان جديد.
لو أن أجيالنا تفكر في صناعة معالم لسودان جديد فهذا دليل عافية إنما الأجيال فكرت في إقتلاع السودان من نفوسها ونخن بصدد البحث عن الأسباب وعلاجها نريد أن يخبرونا هم
الموضوع فيه جوانب كثيرة و ما أظن الوقت يسعنى لتعليق كثير ولكن
Quote: mom ,Iwanna go home
وما هو تعريف الهوم عموما ليس بالضرورة التفرقة بين الأجيال للإجابة
Quote: جنس ديل تحكى ليهم يا تو حكاية ؟
جنس ديل ما بستنو زول يجى يحكى ليهم الحكاية يا أستاذة سلمى جيل يأخذ المعلومة من شتى وسائل الميديا والاتصالات المتاحة وينقى منها ما يناسب تفكيره ومستوى فهمه قصة جدى حكى لينا وحبوبتى قالت دى ياها الودت السودان بأجياله الفاتت كلها إلى no where فدعوه يأخذ نصيبه ويثبت نفسه السودان نفسه ملّ وبفتش على حاجة جديدة والمسئول عن تنشئة كل جيل الجيل الذى ربّاه وبتلقاه رغم انتقاده الكتير ليه برضو فخور بيه جدا يبقى الغلط وين؟
بعدين فى رأيى العلاقة عكسية إذا جينا للمقارنة بين الجيل الحالى والذى سبقه فالاسبق حظى بالنصيب الاكبر من التعليم المجانى والتعليم على مستوى لست أنا من أحكى عنه وما هى النتيجة؟ ماذا قدم للسودان الذى لا يقبل ببلد آخر ليكون هوم لأبنائه؟ ولكن جيل اليوم لا يحمل نفس المفاهيم التى حملوها أجدادنا الذين سبقونا بإدمان الفشل هنا لا ألوم أحد ولكنّى أرى أن من حق هذا الجيل أن يثبت أنه مختلف
وربما إذا جينا للجيل نفسه برضو بتلقى إختلافات فى المفاهيم ليس كما قال شيقا أمّى ومتحضر ولكن بتلقى العاش خارج السودان بدرس فى مدارس بها كل أنواع البشر وأجناسهم وهذه فى حد زاتها ثقافة ويكتسب منها الكثير بينما الجوا السودان بقاتل عشان يوسع مداركه ويخلى الإعتماد على وسائل التكنولوجيا أكبر من الإعتماد على قصص الجدود والحبوبات. لا أستهين بها ولكنها ليست ضرورة لتنشئة مجتمع نريده أن يكون كاملا
واحدة من نعم الله علينا والذى يتميز بها جيل اليوم هى عدم اهتمامهم لأى القبائل تنتمى و ابن من تكون؟ أولا توافقوننى الرأى؟
Quote: قصة جدى حكى لينا وحبوبتى قالت دى ياها الودت السودان بأجياله الفاتت كلها إلى no where فدعوه يأخذ نصيبه ويثبت نفسه
يا صديقتى اعيش الان فى امريكا واعمل فى مدرسة صغرى خاصة بالامريكان هل تعلمى ان الجد والجدة هما اهم من الام والاب ؟ لانهما يحكيان للصغار القصص تلك القصص يا صديقتى هى التى جعلت هذا الخيال ممكنا طالعى روايات جابريل غارثيا ماركيز ستجدى انه متكئ على القصص التى كانت تحكيها له جدته والماعنده تاريخ فى الخيال عمره ما حيكون عنده خيال نحن تعلمنا من حبوباتنا واجدادنا معنى الانتماء تعلمنا منهم ان التاريخ غير المكتوب هو الاكثر صدقا جدتى لامى كانت احد تلميذات الشيخ الذى درس عليه المهدى (محمد خير ) وهو جدنا لكنا تعلمنا منها انه كان على خصومة والمهدى تلك لم نطالعها الا حين بلغنا العمر المدرسى لكنا كنا نعرفها وتحكيها لنا جدتى كشاهدة عصر واضيف اننا فى اسرتنا تلك الكبيرة الممتدة الى عمق الجنوب من اقصى الشمال لم نسمع يوما واحدا من اهلنا يتحدث عن قبيلة او ما شابه فورثنا تلك الخصائص اذن يا صديقتى الحبيبة دعينى اختلف معك ان مقولتك حول الاجداد والحبوبات غير صحيحة لانهم عمادلا غنى عنه قط
07-06-2008, 01:15 PM
abubakr abubakr
تاريخ التسجيل: 04-22-2002
مجموع المشاركات: 16044
Quote: بدل النقد المستمر شوية look at the bright side
بنيتنا سماح .. من جيل اليوم وخبرت الداخل والخارج فاكتسبت معرفة بالتعامل مع الاثنين ... هي من جيل "يسال" ليجاب علي اسئلته وليس "اسكتي يا بت ؟ " .. اصرار علي السؤال بحثا عن الاجابة وهذه محمدة في هذا الجيل حيث لا يستكين ل "اسكت او اسكتي " او " نحن بنعرف احسن منك بس انتي سوي البنقولو ليك ؟ "....جيل له في مخيلته معالم للوطن والهوية ربما اكثر وضوحا عن اجيالنا السابقة .. جيل يبحث عن سبل لترجمة ايمانه بحقه في وطنه باسلوب غير اسلوبنا فنحن لم نترك لهم اجندة واضحة او مؤشرات نعينهم فتاريخ الخمس عقود الماضية نزاعات سلطوية مسحت حتي اثار كانت باقية من اجندة قديمة .....
ونواصل ونامل في اصوات اخري من الاجيال الصغيرة تاتي هنا لتعيننا نحن الكبار في افساح ساحات هي لهم ولكننا مددنا فيها وعليها ارجلنا وايدينا نمنع الجديد القادم .....
Quote: "In the beginners mind there are many possibilities, but in the experts mind there are few."
Quote: دحين أسألي رامي وآية ومؤيد عن رأيهم في السودان وتعالي صادة وريني قالوا شنوا ؟ وعلى قول الشباب ما تزعلي من كلامهم
سمية يا ريحانة سلاااام والله كلمة ماما وبابا بشوفها ناشفة ومافيها حنية حتى ... ابوي ويايا امي ويمة يا سلام تسند وترقع ويا حلاتها في خشيم الشافع والشافعة ويا طعمها وكت ترن وجوانا ونجاوبهم ايا يابا تعال .. وامي انتِ ... تحس وتر التجاذب فيها موتور .. لكن ماماو بابا زي ( تك )مافيها امتداد نشافة نشاف حجار جبيلات كرري ..
والقضية كبيرة الارتباط بالاهل والوطن لجيل اليوم وهناك عوامل كثيرة لعبت في تشكيل أطفال وجيل اليوم والعلاج صعب ونحن كنا سارحين في إنشداهة الحياة وناسين الوصية والله يستر ....
عموما الموضوع جميل وسوف تكون منه فوائد كثيرة من المداخلات وهيا إيد مع إيد تجدع بعيد
خالد ياأب أحمد لعلك طيب كل جيل بزمنه ويربى لزمن غير الذي نعيش هونها وتهون ولاتتحسر على ماض فالقادم أجمل ...
Quote: والقضية كبيرة الارتباط بالاهل والوطن لجيل اليوم وهناك عوامل كثيرة لعبت في تشكيل أطفال وجيل اليوم والعلاج صعب ونحن كنا سارحين في إنشداهة الحياة وناسين الوصية والله يستر ....
أجد ريحاً من حديثك تشي بأن هناك حالة مرضية تستوجب العلاج ! كيف ؟ ولما ؟
وفي هذه الايام وفي فضائية سودانية اعلان عن برنامج قادم عن " هبوط مستوي التعليم في السودان " وبرنامج اخر عن هبوط مستوي اللغات في المدارس السودانية والجامعات وشاهدت برنامجا فيه حديث عن ارتفاع نسبة الامية في السودان حيث بلغت 57% لكل جنس وقابلت شبابا تعلمو في السودان في زمن ثورة التعليم فاوجعني كثيرا كيف هدرت سنوات اعممارهم وهم يتلقون علما دون المستوي فخرجو مقهوريين بشهادات لم تسمح لهم بالمنافسة مع غيرهم في الخارج وشاهدت صورا عن حالة الفصول في المدارس ..الخ وحيث ان التعليم يزدهر حين تتوفر له معينات من مباني ومعدات ومدرسيين مؤهليين ينالون معاشا يكفيهم مؤونة التنقل ركضا بين المدارس والبيوت بحثا عن زبائن لدروس خاصة فواقع الحال في بلادنا يعني ان مستوي التعليم الان عموما دون مستواه في كثير من البلدان حولنا وبالتالي فان الشهادة العربية وشهادات مماثلة والتي تصدر من دول غنية وفرت كافة معينات التعليم هي احسن مستوي من تلك السودانية الان ( ودعونا من ماض لتعليم كان ممتازا ومضي ماسوفا عليه ) وهنا فمن العجب العجاب ان تصر سلطات السودان علي ان تستقطع نسبة كبيرة من تلك الشهادات وتجري امتحانات قدرة علي حملة الشهادات العربية وغيرها بحجة ان الشهادة السودانية احسن واقوي منها ....!!!! وهكذا يظلم حملة الشهادات العربية والمماثلة بينما هم قد نالو قدرا من التعليم احسن من الذي يتوفر في بلادنا ...بنات وابناء المغتربيين ليسو من سكان عوالم غيبية انهم سودانيون واسرهم تعاني غربة وتدفع ضرائب اضافة الي ذلك دون ان تنال اية خدمة من هذه السلطات وباموالهم تملا جيوب وكروش من يعمل في اجهزة المغترببيين وغيرهم ....ان هذا "الوهم" الذي يعشعش في مخيلة سلطات التعليم في السودان بان مستوي التعليم في السودان احسن واجود من مستواه في دول الاغتراب فيه ظلم لكل اهل السودان ..فان تتلقي شريحة من بنات وابناء السودان تعليما جيدا خارج السودان يصب في تحسين مستوي "المتعلميين" السودانيين وليس العكس .....الاصرار علي "وهم" اننا "الاحسن" دون سند جعلنا نعيش في وهم فصرنا كالسيد "ظلوط" وتلك حكاية اخري ....
كما قلتي انتي ان هنالك فجوة وعدم تواصل بين الاجيال في السودان وكما هو معروف ان كل 30 عام في حياة البشرية تشهد نشؤ جيل جديد يختلف عن سابقه في عاداته وثقافته وربما ادوات الحضارة بفعل التقدم والتطور في مسيرة الانسانية وكما قال ود شيقوق ان الاختلاف حادث ايضا بين سكان الريف والحضر وله ولكي هذا التعبير الذي جادت به قريحة الشاعر البلولة حاج الامين حيث قال:
والله يا سمية اختي ختيتي يديك علي موضع الآلم وكلنا في الهواء سواء وعيالي بالرغم من حبهم للسودان في فترة الإجازات إلا انهم في الفترة الأخيرة وبعد بلوغهم مرحلة متقدمة من العمر بداءت مرحلة المقارنة بين هنا وهناك وليه كده يا بابا وليه هنا في كده وهناك مافي كده يعني مجموعة من الأسئلة المستمرة . الموضوع بصراحة ذو شجون وانا كتبت كتير ورجعت مسحت تاني لكن برجع ليك تاني بقصص من واقعنا المعاش
والتحية عبرك ( للسماء السابع ) سموحة الظريفة ( نموذج جيد للواقع الحالي ) ولجميع المتداخلين الخال ابوبكر وود شيقوق وخالد محجوب وكل من سقط اسمه سهواً .
07-06-2008, 10:55 PM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
الله يديك العافية واصيك يا اللخو ما تهم وخلينا ننسى ماضينا ونعيش معاهم ان جكسو نجكس وان اتعولموا نتعولم وان ابدعوا في نغمات الحب يلقونا قدامهم خليك بلبستك الراقية دى ومحل رهيفة تنقد .
هيييييييييييع
07-07-2008, 00:13 AM
عمر صديق عمر صديق
تاريخ التسجيل: 06-06-2008
مجموع المشاركات: 14776
أخي الحبيب هاشم أحمد خلف الله تسلم من كل سوء والسما السابعة دي ذاتا من تكنولوجيا هذا الجيل العبقري ديل لو قبلوا علي الحروف والأرقام يغيروها بما يوافق العصر ولو مسكوا التلفونات والكمبيوتر يبدعوا
Quote: برجع ليك تاني بقصص من واقعنا المعاش
عاوزين الواقع دا عشان ما نعيش في أوهام وخيال ولك أطيب تحية.
العرريب دحين لو ادوك PSP فيهو WIFI وانت في HOTZONE اها شن نسوي.... بالمناسبة في دبي المستشفيات فيها HOTZONE وممكن تقرء سودانيزاونلاين لو جهازك اللابتوب VAIO - لانو خفيف - معاك وانت خارج من غرفة العمليات بعدما تقلع ضرس العقل وتقول للناس اها انا صاحي وممكن برضو لو معاك ال Blackberry .... وتقولي اختبارات "قدرة"؟؟؟ ان يكون في السودان بشر يتعاملون مع التكنلوجيا ليس لانهم صفوة او مقتدرون ماديا وانما لا نهم عاشو في بلاد توفرت فيها فصارت متاحة للجميع امر مهم يضيق المسافة بيننا وباقي العالم .. للاسف انظمتنا السياسية الفاشلة لم توجه بعضا من الاموال الكثيرة التي تحشره في جيوب ولاتها وكروشهم الكبيرة نحو تنمية الطفل السوداني -من غير ابناء النخب والصفوةالمادية- وتقريب المسافة بينه وبين العالم الخارجي...ليس في صالح شبابنا واطفالنا ان يبقو بعيدا عن اقرانهم في العالم الواسع في استعمالات التكنلوجيا فالمسافات قد صارت قريبة بين البلدان والذي يستعمل ادوات العصر بكفاءة هو المتحضر القادر .. وهنالك شركة امريكية معروفة اصدرت كومبيوترات صغيرة باسعار جد زهيدة لاطفال افريقيا الفقراء ويمكن ان بتمن سيارة همر او بي ام دبليو 7 اكس شراء ما يقلرب المليون منها وتوزيعها علي اطفال بوادي السودان ولقد اشتري صاحب الجماهيرية عشرة مليون منها ....
Quote: وهنالك شركة امريكية معروفة اصدرت كومبيوترات صغيرة باسعار جد زهيدة لاطفال افريقيا الفقراء ويمكن ان بتمن سيارة همر او بي ام دبليو 7 اكس شراء ما يقلرب المليون منها وتوزيعها علي اطفال بوادي السودان ولقد اشتري صاحب الجماهيرية عشرة مليون منها ....
مشكلة المغتربين بتذكرني القائمين على امور التشريع في السودان واغلبهم اما من اولاد البندر او اولاد الريف المنعمين . فعندما يطرح مشروع قانون عن الريف او البادية تضحك على مناقشاتهم البعيدة عن الواقع . مثلا صدر قانون حماية الحياة البرية في اوائل الثمانينات من القرن الماضى وينص هذا القانون على مصادرة 50% من عدد البهائم التي تدخل المحميات بصورة غير مشروعة . يبلغ طول حظيرة الدندر 350 كيلو متر اى يمتد من نهر الرهد شرقا وحى النيل الازرق جنوبا - لم تكن هذه الحدود واضحة المعالم بمعنى لم يوجد سلك شايك او حتى معالم واضحة تفصل بين المحظور والمباح علما ان الطبيعة بين الاراضى المباحة والمحظورة متشابهة جدا . الفاصل الوحيد المعمول هو سكينة موتر قريدر عملت قبل كم سنة قد تجدد كل ثلاث اعوام على عرض 4 او 5 امتار وهى لباتاكيد تتلاشى بسبب كثرة الامطار ونمو الحشائش ما يتعذر معها ادراك الفواصل .
لم يكن هنالك اعلام كافي للرعاة يعلمهم بتلك الحدود ومن ثم نجد اغلب الرعاة الذين في الغالب يرعون ليلا ( سربة) يتجاوزون تلك الحدود ليقعوا في فخ المصادرة والسجن .
هل تعلم ان دخل الحظيرة القومى من مصادرة بهائم الرحل يتجاوز عشرات المرات دخلها السياحي ؟ وهل تعلم ان ناتج مبيعات البهائم المصادرة يؤول لسلطات الحياة البرية التي قد تلجأ احيانا لمدودرة البهائم من خارج الحدود الى الداخل لمصادرتها .
وهل تعلم ان بعض القضاة الذين تحال اليهم مثل هذه القاضايا يكرمون باعداد من الاغنام التي يصدرون احكام بمصادرتها.
وهل تعلم ان القضاة احيانا يستعجلون محاكمة مثل هذه القضايا حتى لا يستطيع المتهمون اجراء اتصالاتهم مع المحامي الذى يدافع عنهم .
اخي ابو بكر حديثك عن تخصيص جهاز حاسوب لكل طفل سوداني يذكرني التشريع الذى يناط لابناء البندر والمترفين من ابناء الريف . يا اخي الاطفال ما لاقيين اكل وغير مستطيعين دفع رسوم الدراسة تقول ليهم اشتروا اجهزة حاسوب؟؟ اما انك عجيب يا ايها المغترب المدلل.
07-07-2008, 07:09 AM
abubakr abubakr
تاريخ التسجيل: 04-22-2002
مجموع المشاركات: 16044
Quote: اخي ابو بكر حديثك عن تخصيص جهاز حاسوب لكل طفل سوداني يذكرني التشريع الذى يناط لابناء البندر والمترفين من ابناء الريف . يا اخي الاطفال ما لاقيين اكل وغير مستطيعين دفع رسوم الدراسة تقول ليهم اشتروا اجهزة حاسوب؟؟ اما انك عجيب يا ايها المغترب المدلل.
ياعرريب الكومبيوتر الان ليس ترفا كما كان الموبايل ضرورة في قري وجزر بنغالاديش قبل ما يقارب العقد من الزمان حين وفرت الدولة اجهزة زهيدة جدا وباقساط وبعضها مجاني لكل القرويين واهل الجزر وساهم ذلك المشروع في تطويير مقدرة اطفال واسر كثيرة وحمايتهم وانقاذهم وقت الفيضانات الكثيرة وكلهم في درجة ما دون الفقر ...ما ذكرتهانت هو احد جدران وموانع ستقف حائلا بين بن الريف وبن المدينة .. وفر كمبيوترا زهيدا لابن الريف الشبعان ووفر بنفس الثمن اكلا لابن الريف الجائع .. الامران لا ينفصلان .. العالم سوف لا ينتظرنا ..
07-07-2008, 07:44 AM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
Quote: انت يا ابن عمى بتحلم باتوبيا مجتمع الرفاهية والعدل وبس .
الاصرار علي ان يوتوبيا او مدينة فاضلة هي التي نريدها لبلادنا يبدو امر هلاميا وهميا ومانعا للتحسن درجة درجة ...هذه الاجيال الصغيرة الان و القادمة لن ستبقي متفرجة وفي بلد "شاب" كالسودان ( نسبة الاعمار الصغيرة هي الغالبة) فانهم اكييد سيتخلصون من وهم "الكبار" ويبدؤون من نقطة ما بداية صحيحة ...
07-07-2008, 11:51 AM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
غالبية جيل المهجر ظن أن السودان هو الجنة وسكانه هم الملائكة من كثرة كلام الأهل الذين يصورون لنا السودان بدون مسالب لا أخوض في مبررات ذلك ولكن تلك أمانيهم يذهب معظم هذا الجيل للدراسة الجامعية في السودان حاملا ثقافات العالم وأرقى أساليب التعامل في الحياة نسبة لما خبروه من معايشة أجناس ولغات من أشتات العالم فيصطدم بعوائق تحول دون تمرير فكره ويكون الفهم الخاطيء هو الذي يسبق عليك خصوصاً لو كنت أنثى يفاجأ هذا الجيل بمجتمع من أبرز سماته عدم الإلتزام بما يقول مجتمع قوال وليس فعال ومن هنا تبرز مشاكل عويصة أودت بالفعل بمستقبل الكثيرين من جيل عهد الإنضباط في مهجره يفاجأ بمجتمع نمّام تنقلب فيه المفاهيم وتنعكس بصورة محبطة للعاية يفاجأ بمجتمع يصر على البقاء في مكانه بسخريته من كل جديد قادم كل ذلك أنتج جيلاً قرر أن يمضي في طريقه بمعزل عن هكذا مجتمع غبر منصف جيل لايهمه كثيراً : ما جنسك وما قبيلتك وما وما ؟ بل يفعل مايراه صحيحاً ولو كره الآخرون جيل مؤمن يما يفعله مصصم على النجاح ليثبت ذاته أولا ولينتصف من المجحفين بكل أسف السودان يفقد خامات أتت بكل إندفاع لتندمج فيه فأصطدمت بسدود ولّدت تيارات متباينة
(بابا وماما أقول لكم حاجة بس ماتزعلوا؟ ماترجعوا السودان)
صفاء الزبير
07-07-2008, 05:20 PM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
(بابا وماما أقول لكم حاجة بس ماتزعلوا؟ ماترجعوا السودان)
الحالة دى انت بت الزبير ود الشيخ الطيب الامك الملكة بت طلحة بالتاكيد لما ترجعي من هنا ببطحوا ليك اب اربعة ( اب اربعة يعني الخروف المدوعل ) المدعول يا بتي يعني المكلوف والمكلوف يعني المشبع بالفتريتة اوع تقولي لعمو الفتريتة شنو كمان ؟
والله يا بتي اكان شفتى السودان زمان هيييييييييييع الزيك يصحوها من الصباح يجهزوا ليها كيلة حقت عيش عشان تطحنها وتقوم تعوسها كلها كسرة وتجهز القروانة ( القروانة عبارة عن اناء تنقل به الماء من الجمام) والجمام يا بتي دى العيون مش عيون المها دى عيون الموية النابعة من الرملة .
وبعد تجيبي الموية تمشى تشوفي الدابة العطشانة وتجيبي ليها الطشت وبووووووو تكبي الموية في الطشت عشان الدابة تقرطع ( تقرطع يعني تشرب) وكمان عشان تشرب كتير تسصفري ليها .
اها يا بتي والعصرية بجى وقت البهائم عايدة من الخلاء تقومى تربطي العجول من الرضاعة ولازم تكونى جراية لانو المتلاب انت ساكاهو بياخد ليهو نقزة يقرب ليك ويجفل منك .
قالت يا بابا ما نمشى السودان انتو شفتوا حاجة يا اولادي ؟
Quote: خالد ياأب أحمد لعلك طيب كل جيل بزمنه ويربى لزمن غير الذي نعيش هونها وتهون ولاتتحسر على ماض فالقادم أجمل ...
Quote: والقضية كبيرة الارتباط بالاهل والوطن لجيل اليوم وهناك عوامل كثيرة لعبت في تشكيل أطفال وجيل اليوم والعلاج صعب ونحن كنا سارحين في إنشداهة الحياة وناسين الوصية والله يستر ....
أجد ريحاً من حديثك تشي بأن هناك حالة مرضية تستوجب العلاج ! كيف ؟ ولما ؟
نعم يا ريحانة البطانة والحالة مستعصية
شعور الإنتماء للوطن لهذا الجيل ( وأعني الإنتماء للوطن عشقه .. وأنا اسمي شعور إنتماءنا للوطن محنة كوت كوت بلا لبن سوف ابين هذا ) وأنا بقصد ( أبناء من تغربوا عنوة عن ديارهم )...روح الإنتماء لديهم ضعيفة وضعيفة جداً ولا أقول معدومة .. لكن مع الضعف ضيق.( هم لا محنة كوت كوت ... ولا لبن ) كيف يحسونها وقد ولدوا ونشأوا وترعرعوا في ديار الغربة .... وزمان كانوا يربطون حبنا للديار والوطن ( صرتو مدفونة هنا ) وهم صررهم في صلالة والمجر
الحميمية للأهل الحبوبة والجد والخال والعم والجار والعشير من الوهن ما يجعلنا نشفق حينا ونحزن ونغضب مرات ....
المعلومة ضعيفة في كل المناحي ( الوطن وشعب الوطن أعني كل مبدع )
الدارجة السودانية ( اللغة ) في مهب للريح وسطهم
أرجع لمحنة كوت كوت وبلا لبن .. وللأسف هذه ما سلم منها من السودانيين ألا من رحم ربي ( التربية القومية وحب الوطن صدقاً .. وأسباب ذلك عيب في تربيتنا القومية وحب الوطن. والتقصير كان منشأه الأسرة وكذلك المناهج التعليمية .. لانرضى أن يسب أو يهاجم أحد كائن من كان اسرتنا.. الجار العشير .. قبيلتنا ...ولكن عندما يكون الوطن المعني لا يهب ألا من رحم ربي ويتصدى لذلك .. الخاص نرعاه ونحرص عليه والعام نفرط فيه ( ما يهمنا ) والمقولة المشهورة حقك ما حق الحكومة ..
والموضوع طويل يل ملكة والمرض مستعصي ونحن غافلين
07-07-2008, 05:41 PM
abubakr abubakr
تاريخ التسجيل: 04-22-2002
مجموع المشاركات: 16044
يا صفاء يابنتي...التجربة كانت ضرورية حتي ولو كانت قاسية...لا احب تكرار المقولات الجاهزة والمعلبة في ان السودان هو الاحسن وان الماضي كان احسن وترديد لصور وحكاوي وفق رؤانا نحن الكبار وتجربتنا وزماننا .. ما يهم الان تجربتك انت وجبلك والاصغر وربما الاكبر بسنوات قليلة .. اجيال لا تعرف اقصاء الاخر بانتقاده دون معرفته وتلويين الخيارات وفق الوان البشر ووفق الاثنيات ..من يلصق وجهه في المراة لا يري وحهه وحالنا كذلك ... تجربتك مهمة وستزيدك قوة فانتي لستي رافضة لبلدك ولكنك ترفضيين بصدق وحق تصرفات بشر جعلت الواقع هناك قبيحا .. الوطن يبقي في خلايانا والبعد عنه لا يعني انه ليس هناك قابع يحفزنا للبحث عنه وربما كان ذلك هو الذي حفز الراحل اليكسي هيلي في ستينات القرن الماضي في ان يترك الدنيا الجديدة بكل بهائها وحضارتها ويرجع الي فقر غرب افريقيا باحثا عن جذوره ويوم وجدها كتب اجمل ما كتب عن "الجذور" وكان حافزا لعشرات بل مئات من الامريكان من اصول افريقية الي السفر الي قارتهم الام ليعرفوها وبعض بقي فيها يحاول ان يساهم ببعض فكر وعلم في تنميتها والاخر رجع يدافع عنها وعن شعوبها المبتلية باوجاع كثيرة ....
الصورة التي نرسمها نحن الكبار في الداخل والخارج عن ماضي مخملي بهي هو ما نتوق اليه وليس حقيقة فلو كان كذلك لما صار الواقع بالقبح الذي رايتيه وعشتيه .. انتي وجيلك صناع الحقيقة وفق خياراتكم وليس صورا منسوخة من حدوته وخيالات امهاتكم وابائكم .. حقيقة تناسب طموحاتكم وامالكم تضيفون اليها اكراما للامهاتكم وابائكم بعض من نكهةعشقوها حتي تخيلو انها كل الحقيقة ... انتم اجيال انقي واقدر واقوي والصعاب لن تحبطكم كما احبطت الاف من اجيال الكبار الذين تخيلو اشياء كثيرة حتي بدت لهم هي الواقع لكن الواقع الحقيقي هزمهم فاحبطو وفشلت مشاريعهم...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
saif massad ali
حاتم هاشم
سلمى الشيخ سلامة
الطيب شيقوق
abubakr
Mohamed Abdelgaleel
sama7
خالد علي محجوب المنسي
salma subhi
عمر صديق
هاشم أحمد خلف الله
فيس بوك
تويتر
انستقرام
يوتيوب
بنتيريست