يا طلاب وخريجي جامعة جوبا وثقوا تجاربكم هنا..

Quote: الاخ كبر لك التحية نعم قامت رابطة طلاب كردفان بجامهة جوبا بقافلة صيفية الى مدينة الدلنج اوائل التسعينات ( 1993 على ما اظن ) وكان رئيس الرابطة فى تلك الفترة الزميل رمضان محمد معتوق من كلية التربية وكان الوفد يتكون من الاخوة والزملاء رجاء قدف - تربية كوثر بخيت - تربية امال نورين - اقتصاد كوثر صالح ابوحراز اقتصاد غادة سليم - موارد وفاء - ( رحمها الله ) - موارد الجيلى النور - اقتصاد امين الزبير - اقتصاد الحاج اسماعيل - اقتصاد جابر كدفور - موارد نهلة - اقتصاد امين الزبير - اقتصاد ومن العجايز (الفكى عمر جيلوجيا - وعبدالمنعم اقوز - اقتصاد واخر لا استحضر اسمه حاليا ) وعتبى لمن سقط اسمه سهوا احتوى برنامج القافلة على اقامة معرض للكتاب - كورس تدريبى للطلاب-زيارةو توزيع -مواد عينية لبعض معسكرات النازحين ( انقاركو وزيارة لسجن الدلنج العمومى والمعايدة على المسجونين- ) اقامة سوق خيرى اقامة ليالى ثقافية تحركت القافلة فى رمضان صوب الدلنج وتفاعل معها سكان المدينة بصورة رائعة وادت غرضها تماما وكانت ايام لا زالت عالقة فى اذهاننا ونتذكر دار الاتحاد الذى يقع بالقرب من السوق والذى كان مقرا لعمل الرابطة - وكذلك سوق الدلنج الذى اصبح لدينا زبائن يه حيث كنا نرتاده للتسوق والغريب انه من ما ندخل السوق كانو بيعرفو انه ديل ناس القاقلة وكانوا ما بقصروا معانا واخر احترام وتعامل راقى فالتحية لهم اينما كانوا - وطبعا حضرنا العيد واحنا فى الدلنج وبتذكر صباح العيد ده كان صعب بالنسبة لينا شديد وهى اول مرة نعيد بعيدا عن اهلنا وبتذكر الاخت كوثر بخيت اول واحدة فتحت لينا بيت بكاء من الصباح واحنا فى الداخلية ( غايتوا كتر خير امين الزبير بقى يحكى فى نكات وبقفشاته المعهودة طلع الناس من حتة الدبرسة دى)- اها بعد الصلاة قاموا جونا الزملاء فى مقرنا والله يا( كبر) شفت كاننا فى بيوتنا فطور العيد جاهز شى عصيدة وتقلية ونعيمية وفاجأنا الاولاد بالخبائز المشينا عملناها فى الحلة - يا خى دى والله ايام لها ايقاع فعلا - اما الكلام عن الابيض اللى مشينا ليها ترانزيت دى دايرة ليها صفحة خاصة عشان نقدر نوفى اسرة كوثر ابوحراز حقها فى الكرم- وكردفان الغرة ام خيرا جوة وبرا مجسدة فى اسرة ابوحراز بحى القبة فالتحية للاخت كوثر ابوحراز واسرتها اينما كانوا ونعدكم بالمزيد